#محرم الحرام_1446هـ
الليله السابعه

عندما سقط مولاي ابا الفضل جره هناك حديث مملوء بالحزن والضياع بينه وبين جربة الماء 💔

____
يا جربتي
تمنيت اوصلچ للــخـيـم
وخوفي عليچ من السهم
والطاح مو مـايــچ الـم - ياجربتي

متانيني ...
متانيني چم طفله وطفل
مواعدهم اسگيهم عـذب
سمعيني
سمعيني وگلبي انگـطـع
وگضيته شوغات الدرب

من طاح منچ تعبي ياجربه
راعيچ ما يـنـدل بقـى دربه
چي ماوفيت بوعدي للخدر
لمن طحت موتتني الـغـربه

___
ياجربتي
چفي بقه بخصرچ تره
يشهد عله دمي الجره
تنطرنه چم طفله ومره - ياجربتي

ما همني ...
ماهنمني من چفي انگطع
روحي المهم وصلي الخيم
الموتني ...
الموتني مايـــچ مـن جره
ووعدي الخنگني للحـرم

علگاع اباوع تعـبـي بعـيـونـي
وضليت اغـمــض گوا بجفوني
حاولت ادورن وجهي عالخيمه
والغبره عجت وسفه حرموني


___
ياجربتي
عشره وي چفي انتي عمر
ودي العذب ماضـل صـبـر
لا يسلبچ تالـي الشـمـر - ياجربتي

مخنوگه ...
امتوني ياجــــربه احس
چي فارگه خـوا وبــخـت
مبيوگه ...
وتــراب لايــح ريـشـتـي
واحلامي گدامي انچفت

امنيتي اباوع يمي مذبوحـه
وراعيها گوا يـحـرگ بروحـه
ناديت خويه وسكـتت آلامـي
چلمة يخوي بشفتي مجروحه

____
ياجربتي
يمچ يميني هــل بـقـت
وحسيتهه مثلي بـچـت
اسمعها من عنچ حچت - ياجربتي

گالتلچ ...
مو وكـت طيحت كافلي
خيالنـه وسـفـه انـكـتـل
صاحتلچ ...
امشينه للخيـمـه زحف
ونحقق امنيته الرحل

سدهه السهم چي زينب بعينه
الوادم تـسلـبـه الـمـيته چفينه
والگاع متروسـه بدمـه جروحه
وبگلبه چلمة العــذر يـسـكيـنه

___

✍ابو فضه الحميداوي

#محرم_الحرام_1446هـ_
الليله الثامنة

لسان حال مولاتي رمله بمصاب مولانا القاسم بن الحسن (صلوات الله عليهم)

#####

راح وخذه وياه الروح
وبده حناني عله الگاع
من القلق بـيـه شــصار
بخطواته حسيت اوداع
يمه صـحـت رد الوليـد
بس الولد مـنـي ضاع

تخط اجدامه وشو مشيول
اشماله أوليدي گلبي يگول
وين الضحكه وين الطول ... اشماله وليدي

لاتگلولي انـذبـح ابـنـي وفـرحـتـي
صحته جاسم يمه هاي اول ركضتي
فــدوة گـلـولي عــدل جـبـتو الـيـه
ربـي لاترحم سبب حزني وكسرتي
###

جابـو الـي ودم فـوگـاه
وبروحي ما ادري شصار
وبحضني حطيته ونام
تذكـرته اول ما صــــار
مخربين الرسوم اشلون
وبگلـبـي شـبـوها النار

ما راح ابچي ولا ما انوح
بس گلو ضلت بــي روح
شوفو وليدي ما مذبوح .. شوفو وليدي

هذا ابني القاسم وشوفو شحلاته
امسحت دمه وباوعو تخبل صفاته
چانت امنيتي يشيل اولاده حضني
شدعي عالطف باگ گدامي حياته

####

يمه الولد گلبي يصـيـح
مالي على فگده عـيـون
ثياب العرس جبت وياي
يرجعلي مذبوح اشلـون
ميته واحاچي بمذبـوح
وگبل الولد ميـتـه كــون


عريس ابني اشلون يموت
اشلون بدمه بنصنه يفوت
يخبل طوله وهم مبخوت... يخبل طوله

لو انازع ابتسم لو اشــوف عـيـنـه
العمري يخلص لـو اسمعنه ونـيـنـه
اشلون اقنع روحي مات ابني يوادم
چا بعدهي الحنه نيشان عله ادينه

####

بالخيمه حطيته وصار
القاسم تره اگبال العيـن
وبروحي اقنع بس ليش
يبچي بقه يمي حسـيـن
اجمل شباب الطـف راح
يا رمــلـه الـمـن تبقـيـن

ما عــنـدچ بــس هــذا وراح
وگــفـتـه ورد يــــمــچ طـاح
روحي اقتنعي ولزمي اصفاح ... روحي اقتنعي


ما اصدگ مـنـذبـح ابـنــي وحـنـانـي
يگلي ها يمه اضــل لولــيــدي اتانـي
ادري ما يقبل يشوف دموعـي تـنـزل
شبيدي عالطف طگني بعيوني وعماني

#####
✍️ ابو فضة الحميداوي

#محرم_الحرام_1446هـ
الليلة التاسعة
بعد مصرع مولانا علي الأكبر لسان حال مولانا سيد الشهداء (صلوات الله عليهم)

####

هاي آخر مره اشيلك
الشبگه ذكرتني بصباك ...
گبل شلتك وانته تضحك
وهسه متروس بدماك ...

ياهو اليه احچي يبني
ما يدگ گلبي بسكوتك ...
گلي بويه وخل اسمعك
تدري احبن حيل صوتك...

گوم گوم فدوة گوم
لاتخلي حسين حاير
گوم گوم فدوة گوم
وياك ما اگدر آكابر

يوليدي
ارد اشلون وانه اسهامي اهواي
يوليدي
اجيب منين گلي لروحك الماي
يوليدي
گطعت هروش گلبي گوم وياي

علي يبني علي يبني
####

يل ربيت بحضني يبني
ازود من احضان امك ...
يا اعز ولدي وحبيبي
سايل على الوجنه دمك ...

الشمس هايه تچوي خدك
گوم يوليدي يل الاكبر...
انته اكبر ولـدي اعـرفـك
ليش چا بالسيف تزغر...

گوم گوم فدوة گوم
مو الك نوم الضهاري
گوم گوم فدوة گوم
ياسبب هذا انكساري

يوليدي ...
اريد بخدي كون امسحهن ادماك
يوليدي ...
اذا مـتـگوم عاده افتحهه عيناك
يوليدي ...
يطول بطول انامـن كــون ويـاك

###

اليفگد الأكبر يالاكبر
يحچي وي الموته تالي ..
ولسه تلچم گلبي لسه
الماي ليش عليك غالي ..

اطلبت ماي وما سگيتك
حسين منك وسفه يخجل...
الخيل شربت وانته ضامي
لـيــش ثــغـــرك ما تبلل ...

گوم گوم فدوة گوم
گطعت يوليدي گلبي
گوم گوم فدوة گوم
أتعبت بيك وراح تعبي

يوليدي ...
هظيمة شلون يبني تموت عطشان
يوليدي ...
شكثر الحسين منك ولله خجلان
يوليدي ...
عوف الگاع هذا بحضني اكو مچان

###
يالـهـواشم لـحـگـو ليه
بساع الحگو وشيلو ابني ...
ردت اشيل اوليدي الأكبر
وعالترابه حيلي ذبـنـي ...

شلته لكـن طاح مـنـي ...
مـيـت ويـحـمـله مــوتـه
لون يدري شصار بعده
حسين يبچي بعالي صوته ..

گوم گوم فدوة گوم
احچو ويا يالـهـواشم
گوم گوم فدوة گوم
هواي گتله وبعده نايم

يوليدي ...
تره نـوم الصحاري عليك مـو زيـن
يوليدي ...
كسرت ضهر الخيام وضهر الحسين
يوليدي ...
ابوك انحسب بعـدك على الميتين

###
✍️ابوفضة الحميداوي

#محرم_الحرام_1446هـ_
الليله التاسعه
لشجاعة مولانا علي الأكبر عليه السلام

#######

دخل للحومة وتبدة
دخلها وزلــم لـبـدة
ونار الهاشمي صبت - بروس الأعداء

غبار ومـعـركة شــدة
فارس هيچ ما شهدة
خلفته وبـعـد بـطـلـت - الأكبر قد جاء

طباها ورعـيـع الگـــوم مــذهـول
وگـعـد يتخير ع المهره ويـجـول
دخل الأكبر خذاها عرض والطول
انفرشله الجيش چن فرشت صماطين ..

كر وذبح حته الهوى
ومخنوگة ريت نينوى
من دمهم الصارم روى .... حد الأشباع

شبعو بچي شبعو ردم
يبسو تره اشباه الزلـم
يطشر الجيش ورد يلم ... عله طول الگاع

#####

عروسه الحومه للأگبر
وزفوها بدمه المنـحـر
راس وغيراا يـتـكـتـر - والباقي ذيـــــول

الحومه بثگله ما شافت
عوجـه ولسه ما طابـت
اختصر لك جملتي عابت - من ثگل حمول

واحد يم الاخر يسأل اشصار
الأكبر هـذا اجانه لـــو الـكـرار
وحلگ كلمن نطقها رأسن اندار
عوج حلگ الزلم بزريت الحسين ..

ضيغم كسر خشم الوغى
فارك خشم كلمن طـغـى
يا درع ابوك ومـبـتـغـى .... تاليت الشيب

يازلمة مثلك ماله حد
حته العدو بهذا شهد
لو مثلك وماكو بـعـد .... النسوان تجيب

#####

اصايل هاشم وصـهـلـت
والوان العده انخـطـفـت
الرفعت روسها انصطرت - بچفوف الحيد

من اهلها وماهو شاريها
ابن اخو عباس طب ليها
كـفـو وما مـدعـي بـيـهـا - وبروس يصيد

هوسله ابــو فاضل رب الأسباع
يلأكبر فـوت بيها وعندك اطباع
ثگيل ومن دخلها اختنگت الگاع
وضاگ النفس بـصـدور المحربين ...

وبكر التحسبله العرب
الأكـبـر نزله وارتـعـب
وعالموته من شافه انحسب ... يركض ويطيح

الأكبر عـلـي ما يـنـگـدر
براس أبنَ غانم ضل يجر
للخيمه رد جايب نـصـر ... ويضحك ويصيح


#####

صوارم هاشم انسلت
الگاع من الدمه ابتلت
غيور وغيرته طفحت ... وفازع للـثـار

اختاض ورجف اكبرهم
عبيد وسيفه يأمـرهـم
علي بالشرده حيرهـم ... بغيضه تطگ نار

الشمس دخلت وخيرهم مثل ليل
وعله العياله گـام الأكـبـر يـعـيـل
گصار هناك كلهم وهوا الـطـويـل
وكسر ضهر ابن غانم بيده نصين ...


يطگ وابــد لا مااااا يرد
ضل بالرگب يحصد حصد
وسيفه تره ضـل يـنـبـرد ... تربات اشيوخ

شيخ وابن شيخ ودخل
وللمشرعه بالطگ وصل
وشمر الروس عله النخل ... اللأگاه يدوخ

#####

✍️ ابو فضه الحميداوي

#محرم_الحرام_1446هـ_
الليله العاشرة

(جرح المقتل)

#####

آخـر حچي وي الــحــرم
حاچاهــن وگلـبـه انلـچـم
ومن البچي حسين انهضم - وتخنگه يالريح

وصـه العقيله بالـصـبـر
ويدري صعب هذا الأمر
شوفت خدرها والقصر - ويا محمل يطيح

يوصي وبچه حگه تره ذاك الدرب كله جرح
كلما وصل يم السبي يغص بچلمته وينذبح
ما يگدر يقنع الگلب بسبي الحرم وي الصبح

گلبه عله ضعنه ضل محتار
اشجاب الفواطم وي النار
هاي التأذي الغيره اهواي
يصيـر بخواته اللي ما صار

####

التمن عليه يشبگن
وحده تشمه والبقن
يحلفنه ابقى ياوطن ... من دونك اشلون

وجتله العقيله وشبگته
اتذكرت وصيه وباسته
بميمونه اجته وحاچـته ... ومغورگه عيون

لا ما شفت مثلي اخت تقدم لخوها امنيـتـه
ولا اقسى من گلبي گلب لخيل الأعادي ودته
وماكو بجلادت خافقي گالت لخوها وبچـتـه

وجتله رقيه تركض شوگ
بركضتها جته چن محروگ
وگالته بـويـه لا لــــتــروح
تدري برحيلك ندخل سوگ


####

ادنتله زينب والــهـوى
بالحسره ياناس انچوى
هذا الجرح بچه الدوى ... واحزانها تشيع

عشرة عمر ماهي سفر
وگلب الحجر ليها انكسر
خمسين عام بلا سهر ... ومن تالي تضيع

ويا حيرة حسين الصفت مهموم يمشي لو يضل
كلشي انتهه وضلت حرم بالغربه ضل ماله اهل
يصعد المهره بدمعته وما يرضه گلـبـه ورد نزل

ويرجع يشم ب اخته حسين
وتعبته چلمة رايـــح ويـــن
وچف الزغار يـچـلـب بــيـه
ونضرة سكينه تبچي العين

###

راح الحسين ومنكسر
وگوا صعد ويلي المهر
الراح لمنيته بلا صبر - وما شارب الماي

عالموته هم اهون تره
العايف وراه امخدره
حرمة لچن مو اي مره - ام الخدر هاي

هد عالزلم بس منهظم هدت الطير عله الدخن
صح يذبح بروس العده بس گلبه موجوع ويون
يحن عله ابنه المنذبح ولغيرت الــكـافـل يـحـن

ويگلي خويه انه وحـيـد
لاصحبه ضلو لاكو أوليد
لحضات اليه وجوا الخيل
والغربه كلها مـنـي تـريـد

####

هده التعب ويلي اوگع
چم سيف طگه ورد طلع
وبدمه يا هضمه نگع - ضل ينزف اهواي

التمو عليه من كل جـهـه
واعله المهر وسفه انتچه
الما طگه هم علي حـچـه - ومحتار مولاي

فوگ الثره ويلي هوا والتمت عـلـيــه الــرجــس
وبعده عدل داسه المهر وگوا يـجـر گام النـفـس
يدير بعيونه عله الخيم وضل يهمس لزينب همس

طلعي البنات مـــن الخيمات
ولحگي عليلي بــس لا مــات
النار واجتكم شبيدي بـهـاااي
وذباحي اجاني بدون اصوات

####

✍️ ابو فضه الحميداوي

شهادة السيدة رقية
لسان حال

======================

ناري بيه يمته تطفه
وينه حضنك بويه وينه
يچوي يا حضن الخرابه
الگاع مو مثلك حنينه
من العطش شيبت خطوتي
وگصرت انفاسي الحزينه

وينه * وينه دلالي
بعدك * شو بس حبالي
وينه * يكتل سوالي ... وينه

وينه الگبل لو اختنگ
يفزع نفس يم ريتي
هسه الدمع منه ذبلت
والحرگ غير مشيتي

بابا حسين ...
مشتاگه الك رقيه

###
لسه ألوم بروحي لسه
ونادمه چي چفه عفته
يانده روح اليتيمه
بروحتك تكتلني سكته
ما تجي ذبلت رقيه
يا احن گلب عله بنته

بويه * عطشانه حضنك
ولله * كتالي حزنك
بويه * اشفت انه منك * بويه

اشفت انه خاطر انهجر
وبوجهي بانت كسرتي
اتعثر بثوبي صرت
زغرانه من مصيبتي

بابا حسين ...
مشتاكة الك رقيه

###

گلي ياخنصر تگاود
چفي وتحس ب الأمان
اشلون انام وماكو انته
والغرب من كل مكان
بويه متغيره رقيك
تعب ارسومي الزمان

احچي * وگلي تعالي
بعدك * انه شبقالي
احجي * شوف انته حالي * احچي ...

خليني اسولفلك ألم
اسمحلي اسولف بالأمر
الجمر غير مشيتي
والخطوة تصعب بالجمر

بابا حسين
مشتاكه الك رقيه

###
عن هموم الشام اگلك
بويه وانته اسمع اليه
الما رمانه بالحجاره
يشامر بچلمة خطيه
بيمن اشگف لو رموني
وانه حبلي بين اديه

صحتك - بويه ونخيتك
گتلك - انه بحميتك
صحتك - واجگد بچيتك * صحتك ...

شحت تره كل الگص
الگطرة شحت يم دمعتي
حنت علي نوگ الهزل
وفرحت لناس لهضمتي

بابا حسين ..
مشتاگة الك رقيه

###

بويه اگلك عن غربتي
عن وگفتي والأشاير
من اجت تاخذ حرمها
تجمعت كل العشاير
بويه بس احنه بقينه
لا اكو فازع لا اكو ناصر

اليفزع - چا بويه وينه
كلها - انتبهت علينه
اليفزع - انباوع بقينه * اليفزع ...

هيچي بقه الماله اهل
بالشام يابويه وصدگ
ضليت مشتاگة الك
رغم الطبل يمنه يدگ

بابا حسين
مشتاگة الك رقيه

حال مولاتنا العقيلة زينب (عليها السلام)

###################

اتحمل يا گلب زينب
شده وتخلص يگولون
وشيخلصه السبي بروحه
الشاف الناس بس عيون
هسه فاتحه وصارت
وقبلت بموتت اخواني
چا ليش الأجو النه
كلهم بيه يشمتون

فوگ ما تنذبح ناسك... لازم تكتمه ونينك
والأشد من هاي جارك.. ذابح اگبالك حسينك
واجبك تحمي اطفالك... وتمسح بچفك دمعهم
وترجع انته بكسره تمشي... وياهو يمسح بديه عينك

صعبه... تشيل اكبر جرح وتصبر الناس
صعبه... تروح وي الغرب وتعوف عباس
صعبه... تشوف حسين باقي فقط بس راس

=====

انسه الوادم يريدون
اشينسي الجرحه بعيونه
شيقنعه الجابه چف عباس
وگدامه يگطعونه
خل ابقى بسواد الثوب
الصار اوياي ما صاير
اليروح يشوف اخو مذبوح
ويرد من عنده يسبونه

شنسه والينسه مصابه... الناس ما يوفي تگله
واليعيش بغربه جرحه... من الغرب ياهو اليشله
ياهو يقبل بلا گولو... راس أخيه گباله يمشي
وياهي بالخمسين تركض... وتنسبي وتصعد بهزله

بيه.. اجگد باقي حچي وضميته بعيوني
بيه... ما ودعت اخوي وعنه بعدوني
بيه.. بگد اجروح اخوي الغربه سبوني

****
هاي الضاله بگلبي
اودعه وانه عالناگه
ولا واحد كسر گلبه
وگال عليه مشتاگه
خل تشبگ اخوها انوب
لسوگ الشام ناخذها
خذوني وانه ادير العين
عله اخوي اليكتل افراگه

الخلصت وياه عمري... ابلا هدم عريان عفته
اني ودعته عله هزله... ورحت فوگ النوگ ميته
وماتت الخوا بحبلهم... وما سمعت الخويه تالي
والربه بحضن الزچيه... عله الرمل مطروح شفته

تالي - اعوف ابن امي دامي وضال عريان
تالي - انه ام الخدر من غير خوان
تالي - سبيه ادخل غريبه بوصط ديوان

****

وين أمي الگبل چانت
تشم نحره وتصب ادموع
خل هسه تجي لحسين
لاله راس لا اكو اضلوع
وحيد وضال عالغبره
وهجير البر يگلب بي
وجرحو غيرته وروحه
سمعو صوت ما ممسوع

سمعو أصوات الفواطم.... الگاع ما ضاگت اثرهن
وچتفوهن وحده وحده... الحبل ما يعرف گدرهن
وطشرو جسمه وبناته... وللسبي اخذو رقية
والهواشم كلهه موته... ياهو يلحگهن يفكهن

ضامي.. صبح حتى الطفل من مايه محروم
ضامي... جفني وچم جفن ما ضاگن النوم
ضامي.. يضل ثار اخوتي ويتروه بدموم

#####
ابو فضة الحميداوي

‏مقطع صوتي من ابو فضة الحميداوي

حين ما يكون الجرح جرح علي والكلام كلام علي (صلوات الله عليه) ...

#####

الما تحني راسه سيوف
ولامره ضاگ الخوف
بنص بيته غربه يشوف
وطب چم زنيم الدار

يصب دم صفه الدلال
حال الوصي مو حال
الما يخطر عله البال
تطب على بيتي النار

اصعب أمر عالزلمه ..
حرمته تنضرب يمه ..
ويضل بغمده السيف

وغربه اطب على بيتي
علي يا وسفه تاليتي
يطب بيتي النذل حيف

يطب لبيتي وعينه بعيني شنهو اكثر يأذيهه الروح
يدفع بابي ويعصر فاطم وفاطم خلف الباب اتنوح
حيدر انه ابيتي اچتف وارفض هذا ما مسموح

###
اليهظم علي مـوضـوع
بنص بيته كسر اضلوع
وللزهره حس مسموع
هاي التهد الحيل

الحامي البشر والكون
ما يحمي بيته اشلون !!!
وبالزهره ما ضل لون
تبچي وتون كل ليل

تـنـاجـي العلي وتدعيله
وچف واحد من اتشيله
تالي القنوت صير

وردة عـلـي وعصروها
بنص بيته بـس اذوها
جرح الأمير چبير

ما ترفعهن اثنين ايديه بس وحده مرفوعه اشلون
وخدها تضمه من ادنها وعني التحچي بس العيون
رغم البيهه وتضحك النه تضحك للرادو يبچون

###

جرح الشهامه امصاب
يبقى ندي وما طاب
شخله بعلي هل الباب
وينطر صفه الدفان

تموت الرجل بسكوت
وعنده اهون من الموت
(لداره) غصب وتفوت
ويمه تطگ نسوان

وحيدر يشوف بعينه
بحبله صفه مقيدنه
والزهره خلف الباب

فوگ الترب مرميه
وشماتي التلثيمه
وگدام ابن خطاب

الأنه احميهه تصبح تالي ادافع عن حيدر چا ليش
تحمل كسر ضلوع وترحل خاطر حيدر هوا يعيش
الجرح الأكبر جرح الغيرا هذا الجرح اليهدم جيش

##

ما تشفي گلبي ادموم
وحرمة عليه النوم
ما يهده كل مهظوم
اله بدموم انذال

الكسرت دليلي وطاح
وخلتني اكض اصفاح
بطوله مشه الذباح
گدامي وما شال

گدامي يمشي بحيله
ومـــرتـاح نايـم ليله
واني الدمع بالعين

شـيـجـبـر كسرتي بهايه
بذنـي اسمعت الحچايه
يريد الزچيه حسين

صوت حسين يبچي اخوانه ويبچي حيطان الدار
لونادها بس حاچيني انه حسين وينحب صار
وزينب تكسر گلب الزهره وما كسرت گلب البسمار

###
✍️ابوفضة الحميداوي

حال مولاتنا زينب العقيله عليها السلام
بعد رحيل مولاتنا الزهراء عليها السلام

======================

حزن تارس زوايه البيت
وچانت زينب العباس عمرها چان خمس أعوام
گوا نامت من الضيم
رادت راحه تلفيهه مثل الناس عود تنام

نامت وما چنهه نامت
بالحلم چم ضيم شافت
شافت العاشر يصيح = الماي

الگاع والخيل وزلمهه
كلهه تسبيهه بحلمهه
وزينب تصيح عله امهه =اهواي

يايمه الحگي لزينب
الحلم خوفني واريد احضانچ اليوم
يايمه وراي العاشر
بمشاعل يركض بعد ما ريدن النوم

======
فزت تبچي الطفله
ومبچاها خفي الصوت حلم خلاها مذعوره
فزت فزت المحروگ
رادت تشبگ الزهره وردت تبچي مكسوره

رادت تسولف حلمهه
لمهه والموقف لچمهه
بس تذكرت امهه مات = بليل

تگلهه رادت عن مصايب
الهزايل والخرايب
وفوگ اخوها حسين شافت =خيل

يايمه تنادي وينچ
الحلم خوفني == اريد احچيلچ الصار
يايمه يراحت زينب
اذا مو لمي ==اسولف المن احتار
==========
راحت دخلت الغرفه
وتشتم گامت بسكته بفراش امها مهضومه
عن لا يسمع الونات
حسين وينكسر گلبه حنينه وتبچي محرومه

لاكو ام تسمع وجعها
ولا اكو اخت تمسح دمعها
شافت الهم من زغرها =ضيم

تشتم بهدم الزچيه
وتحچي والچلمه سبيه
يمه بعدچ ياهو اليه = ضيم

محتاره =صفت محتاره
تگول لياهو ويداوي بيهه الاوجاع
يايمه الهظم كاتلني
مشيتي وعفتي زينب تشبع اوداع
====
مكسوره صفت زينب
لا ام لا اكو راحت بال وسابيهه ضلام البيت
تبچي وتحچي مهضومه
اليفگد امه واشلون ام لو ابچي عمر يايمه ماوفيت

تنادي ها يا روحي هيدي
ماتت امي فوگ ايدي
اشلون انه البس جديدي = اشلون

امي هايه الماكو منهه
بدنيا ما ابدل حضنهه
اشلون اكف بچيي وحزننه = اشلون

ما انزع = سوادي واضحك
واموت بحزني ريت العمر لا طال
يايمه عليچ اعيوني
نذر تبچيلچ وحالي عليچ ياحال

=====================
✍️ابو فضه الحميداوي