tgoop.com/Alfaesale/3207
Last Update:
راجع للخيام ... بصدرك شنو شضام
شفتك جرح شايل جرح
عبدالله بس لا منذبـــح
حاچني يحسين
.................
يحسين بچفوفك دمه عبدالله گلي شلونــه
حاچيني شو مابي نفس شو ما يفك عيونه
چان أحمر بلون الورد شنهو المغير لونــــــه
شمسوي خاطر ينذبح واميه ما يطونـــــــه
راجع تون حيل ... ودموعك تسيل
دم نحره شو ما ينمسح
عبدالله بس لا منذبح
حاچني يحسين
.................
يا خويه راجع للخيم خانگتك انت العبـــــــره
سولفلي يحسين الحصل مشيه عليك الزهره
شفتك على ابنك منحني مغطي بعباتك نحره
گاصد اجيت الخيمتي خايف على امه تنظره
ضل بالي محتار ... گلبي شتعل نار
بضلوعي أحس نابت رمح
عبدالله بس لا منذبــــــح
حاچني يحسين
.................
خليني اشم نحره واون خليني أشد جروحـــه
بچفوفي أحس عن منحره دم رگبته المذبوحه
من نحره أجر بيدي السهم هذا المطلع روحــه
عبدالله الفه بشيلتي خاف التراب يلوحـــــــه
تراب الگبر حار ... متحمله الازغار
خوفي على وجهه السمح
عبدالله بس لا منذبــــــح
حاچني يحسين
.................
ريت الله ياخذ حرمله الگاطع وريدك سهمه
ذبلان يالخدك ورد ذاك الگبل نشتمـــــــــه
ذبحوك بس ما فكرو من الله كلش زحمــــه
نعمة انت بالطف و الكفر ما قدرو هل نعمه
شنو الذنب چان ... تموت انت عطشان
يالوجهك بلون الصبح
عبدالله بس لا منذبح
حاچني يحسين
.................
ماكوا أعلى گد طولك نعش عبدالله بعد عيوني
تمنيت گبلك انذبــــــــح يالغالي و يدفنونــــــي
من أيدي رايح يالچنت شايلتك أعلى امتونــــي
رحت و عفت بس الدمع دم يجري فوگ جفوني
أصرخ حرامات ... عطر الورد مات
مدلول يالشعرك سرح
عبدالله بس لا منذبح
حاچني يحسين
.................
خادم أهل البيت( ع )
✍#حسين_الفيصلي
BY قناة الشاعر حسين ألفيصلي
Share with your friend now:
tgoop.com/Alfaesale/3207