كربلائي وافتخر وانتمي لحسين
-----------------------------------------

آنـه ابـن هـاي المدينه وهذا يكفيني
وافتخر جي من تربها صار تكويني
ابعلكمي العباس آنه منعجن طيني
ابصورة الحوراء اهلي فتّحوا عيني

وعلمتني اعله الصبر وانتمي لحسين
------------------------------------------

كربلائي وهالمدينه منبعي وبيتي
كسبت امن حسين صيت وكوّنت صيتي
وبهواها امن الطفوله عودت ريتي
كربلاء امي اعتبرها وهاي تربيتي

واعشكتها امن الزغر وانتمي لحسين
-----------------------------------------

بالدم حسين اشتراها وكالوا اشدعوه
وهيه كبل حسين وادي وكلشي ما تسوه
ابدمه هيه اعله البقاع اتقدمت خطوه
وآنــه بالشفـتـيـن اردد كربله غـنــوه

غنوتي طول العمر وانتمي لحسين
------------------------------------------

كربله هيه وجودي ومنشئي بيها
تربه طيبه وبصلاتي اسجد اعليها
كربله ام وآنه واجب امتثل ليها
سيدة هالكون ومن يضاهيها

كربله ليلة قدر وانتمي لحسين
. . . . . . . . . . . . . . . . . . . . .

كربله اشما صار بيها اشما حجوا عنها
ايزيد حبها واعله راسي تاج احطنها
كربله حـب وتسامح ارتــوي منــها
ابدمي وبروحي وعيوني راح اشيلنها

من المهد حد الكبر وانتمي لحسين
--------------------------------------------

كربله بيت الزجيه الثاني احسبوها
وسلموا عالزهراء كلكم من تزوروها
كاعده يم راس ابنها تبجي تلكوها
ياحسين ابصوت صيحوا من تواسوها

حيل الطموا اعله الصدر وانتمي لحسين
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

يكمرة حياتي
رحيلك مماتي
لفن نايباتي
اويه كطع الزنود
-------------------------------------------

كمـر وجهك يضوّي ابظلمة ايــامـي
وارسمك لوحه تزهي ابمرسم احلامي
واحــس فكدك جمر بكليــبي الضامي
انام اكعد اشــوفــك صــوره جـدامي

يروحي ودليلي
يذخري وكفيلي
انتظرتك تجيلي
ورجيتك تعود
-------------------------------------------

اصد واتــذكر الماضي يكفالي
جنت متنومسه من توكف اكبالي
تسد عين الشمس لا تِظهِر اخيالي
وتذل جف الارض لا يلمس اذيالي

امن اوجه خطابي
واسمّعَك عتابي
يفجعك مصابي
ومصابك يزود
------------------------------------------

جنت زهوة حياتي وبيك اتوسّم
امن اشوفك اشعرك فوك الثغر مبسم
ما ادري حقيقه لو جنت احلم
من شفتك ذبيح اموذر امخذم

اصد الجفوفك
واعيش ابطيوفك
سهم طفّه شوفك
يراعي العهود
------------------------------------------

يخويه اعله الرمح واتفكّر ارسومك
بدر بسماك ابد متحجبك اغيومك
اروح اعله الهزيله امحنّيه بدمومك
اسـيــره وانته مـحـد يكدر ايلومك

دحيت الكتايب
يليث الحرايب
يظل عالترايب
علم ويّــه جــود
---------------------------------------------

العلم شفته يبو فاضل هوه ابكترك
وماي الجود فايض ويّه دم نحرك
وسيفك عالترب ياخويه ينتظرك
نفذ صبر الحديد وما نفذ صبرك

حملت المصيبه
يكبش الكتيبه
وأنه امشي غريبه
وبـديّـه الكيـود
-------------------------------------------

راح امشي واعوفك عالنهر مطروح
واعوف اكليبي يمك ما اعوف الروح
لأن الروح ظلت بالمعاره اتـنـوح
يم جسم الحسين اعضيدك المذبوح

اجيت ابزعامه
وارد ابيتامه
سمعت الملامه
اعله فكد الاسود
--------------------------------------

خادم اهل البيت عليهم السلام
عمار العيساوي الكربلائي

بالروح اتجود .. يم راعي الجود
آنه اخت حسين .. ويــن الجـفـيـن
---------------------------------------

آنه العقيله ام الخــدر .. آنه الحزينه
يلي جبتني ابكل فخر .. مـن المـديـنه
راح امشي خويه لليسر .. احدي الظعينه
وحسين اعوفه ابلا نحر .. ومــوذريــنــه

اتحاجي العباس .. يابو النوماس
بدموع العــيــن .. ويــن الجـفـيــن
---------------------------------------

يم راسه كعدت والدمـع .. عالوجنه همال
يمها الصبر محني الظلع .. ومشتت البــال
اتقبّل يـمـيـنـه المـنكـطـع .. وتقبل الشمال
وتكله تـرضه بـهالوضـع .. مجتوفه بحبال

شلون انت اتنام .. وانه احدي ايتام
انهض يا زين .. وين الجفين
-------------------------------------------------

يابو الفضل عكبك بعد .. احرس نساوين
ولو شب خيمنه ابن سعد .. وين اتجه وين
كامت تحوم اعله الجسد .. وتعاتب العين
ضيّــج لـونّــه مــا خـمـد .. ما ذبحوا حسين

سهمج يا عين .. فت كلب حسين
السهم ابسهمين .. وين الجفين
---------------------------------------

اتـكلـه يــكافـلـنـي تــره.. من بعدك انظام
اصبح حزينه امكدره .. واتـحـمـل آلام
كلبي الكسير اشيجبره .. امن اتدور الايام
يا خويه كسروا خاطره .. بشموع جـســام

يا ريت اتشوف .. كلبي الملهوف
يصرخ كل حين .. وين الجفين
--------------------------------------------

صدت لعد جود البطل .. كالتله يا جـود
لو مايك الحدّي وصل .. ما طاحن ازنود
من شالك اعضيدي وحمل .. كل ظنّتي ايعود
مــا ادري يــتـنـاه الاجل .. ومصيبتي اتزود

ما ادري شلون .. تاليها ايهون
عِشرة السنين .. وين الجفين
--------------------------------------

ياخويه راح امشي غصب .. عنك ينوماس
وفراكك اصعب كل صعب .. خويـه يعبـاس
وشـلـون امـشـي بـهـالـدرب .. ما بين الارجاس
دمـعـي اليـكـت مــن الكلب .. يا نبض الاحساس

تودعه ابدمعات .. وتجذب حسرات
حسرات البين .. وين الجفين
. . . . . . . . . . . . . . . . .

خادم اهل البيت عليهم السلام
عمار العيساوي الكربلائي

الغيره بالطفوف .. تطلب الجفوف
الغيره فوك الكصه كطره وما يمسها خوف
-------------------------------------------

صاحب الغيره سمعها الغيره نادتله
خل نشوف اشجان رده وشنهو كالتله
خلّي جفك عالشـريـعـه للـوفــه قبله
ينبني ويصبح مزار وكلها تـوصله

عالنهر تصول .. وانته ابو الاصول
هيّه صوله عالشريعه منها للحتوف
--------------------------------------------

كال اصول ابزودي واذكر للنهر شاهد
كَنـطـره عسكر اسطّر واحــدٍ واحــد
مثل ريح الجيش يهجم طود اظل صامد
عالشريعه سيفي ويّه الموت متواعد

يحصد الركاب .. يعله عالصعاب
ما تكع سيفي زلمهم لا ولا السيوف
-----------------------------------------

انتفضت الغيره ابعروكه وصعدت ابراسه
واحـنــه نعرف بالغـيــور وهـمّـتـه وبـاسـه
عـاشـك حـسـيـن وحـسـيـني حـتّـه بأنفاسه
حسين روحه حسين نبضه حسين باحساسه

راسه للجدام .. عاشك الامام
حتّه دمه من وريده بالعشك يطوف
---------------------------------------------

جنه حيدر بالحرايب لمن ايقاتل
حتّه بالظربه يقلده ابظربته عادل
غيرة الكرار هـيّــه ابغيرة الكافـل
ابحيدر العباس اوصفه لو طلع صايل

يسحك الجنود .. ايفرق الحشود
ما تهمه حشود بالطف حته لو الوف
-------------------------------------------

عالنهر وكفت كتايب والكمر وحده
لو يميل اتميل بـيـهـم ياهو اليصده
بس غدر صوبوا عينه وانكطع زنده
طاح متسنده جفوفه غيرته اتسنده

اجفوفه عالتراب .. بالنبل مصاب
عالرمح مرفوع راسه وغيرته تشوف
------------------------------------------

بالعمود انصاب راسه وجثته متوذره
غايه من الله اكطعوها اليمنه واليسره
بهالمصيبه الباري راد الوادم اتعذره
حتّه ما واحد يلومه وزينب اميسره

وتمشي عالهزيل .. وغايب الكفيل
عالترب بدر الهواشم صابه الخسوف
------------------------------------------------


خادم اهل البيت عليهم السلام
عمار العيساوي الكربلائي

عباس سيفك معروف كل اليشوفه ايهابه
من يخطف اعليها اوحيف سيفك حمم لهابه
------------------------------

بركَة فقارك عسكر ايهابوها
كل ظربه منك ميت الف حسبوها
خزرت اعيونك كلهم ايخافوها
ظربة يمينك فنهم ايصدوها

لو سيفك ايأذن موت تسجد ركَب باعتابه
عباس سيفك معروف كل اليشوفه ايهابه
-------------------------------

فنه اليشاهد سيفك ويتوانه
وما يركض ابرجليه و بذرعانه
ذيج الاعادي التانتك غلطانه
تانت اجلها وما سلم من تانه

واللي يتانيك ايموت ابخوف انتهت اعصابه
عباس سيفك معروف كل اليشوفه ايهابه
-------------------------------

من تغضب ايجدحن شرار اعيونك
تهجم عليهم فنهم ايلاكونك
هاي الحرايب لعبتك وفنونك
واعداك سبع الكنطره ايعرفونك

سيفك جهنم والجيش حان الوكت لحسابه
عباس سيفك معروف كل اليشوفه ايهابه
-------------------------------

عندك مواقف بالحرب جباره
اثبت البطوله اعله العده ابكل غاره
الماي الرميته امن ايدك انطه ابشاره
معناها لسه ثابت ابتياره

ما غرّك الماي اشلون روحك ولا مرتابه
عباس سيفك معروف كل اليشوفه ايهابه
-------------------------------

جيش آل اميه اتجبنت ابطاله
شخصك دهاها وقررت تغتاله
سيوف الغدر من كل كتر تتواله
افواج تلت مراجله وخياله

من كل كتر يتولوك كلمن يكشر انيابه
عباس سيفك معروف كل اليشوفه ايهابه
-------------------------------

خادم اهل البيت عليهم السلام
عمار العيساوي الكربلائي

صوت مذبوح .. جاي من صوب النهر
صوت مذبوح .. صاح زينب واعتذر
منج ارجو المعذره ... والجفوف امبتره
---------------------------

يختي اطلعي و اوكفي اباب الخيام
اتأملي اتشوفين مجموعة حمام
يختي الج وديت وياهن سلام
اتقبلي عذري يبت خير الانام

يختي هالحين .. ايسي من كافلج
يختي هالحين .. باقي بس الله الج
ادري بيج امحيره ... والجفوف امبتره
---------------------------

طلعت ابّاب الخيم ثمرة علي
والها طير الدوح دمعاته اتهلي
يا حمامات اسأل اشعدجن الي
خبر عدجن والخبر واضح جلي

بيجن اشتم .. ياحمامات الخبر
بيجن اشتم .. عطر عباس الكمر
كافلي انحز منحره ... والجفوف امبتره
---------------------------

يختي زينب خلي صوتج ينحبس
ولو عتبتي وياي اعتبي بس همس
خاف صوتج ينسمع بين الرجس
يختي ظلج لا يبين بالشمس

طفوا العين .. وظربوا الراس ابعمد
طفوا العين .. يعني ما شوفج بعد
انصاب اخوج ابناظره ... والجفوف امبتره
---------------------------

همست وهبّت نسايم طايفه
خويه امن طولي محد شايفه
خويه بس تدري آنه من من خايفه
خافن الشماتي اصيرن سالفه

يابو فاضل .. شنهو اجاوب للسأل
يابو فاضل .. وين عباس البطل
وينه سبع الكنطره ... والجفوف امبتره
---------------------------

يختي راسي اعله الرمح وبلايه شوف
يختي جثتي اعله الارض وبلا جفوف
يختي بس روحي بكت يمج تطوف
يختي احس استفردت بيج الالوف

آ يزينب .. حالي لو حالج صعب
آ يزينب .. حالج ايفت الكلب
لو طلعتي اميسره ... والجفوف امبتره
---------------------------

خويه حالي ايهون والروح ابثبات
لاجنا يفت الكلب حال الخوات
ومن شفت سكنه ورقيه امجتفات
ابلا خيم بس بالعبي الليله نبات

يا كفيلي .. باليسر وانعاتبك
ياكفيلي .. ابصاية الله وشاربك
يا وصيّة حيدره ... والجفوف امبتره
---------------------------
خادم اهل البيت عليهم السلام
عمار العيساوي االكربلائي

مـن اعيوني المدمع جاري .. عالراح امنيدي
طبيت الخيمه ادعي الباري .. رجـعـلي وليدي
رب ارحم دمعة عـيـناي ... تدري الاكبر لب احشاي
-------------

ربيت الاكبر عالـوفـه وادري الـولـد يـوفـيني
ولوكَرب موعد ساعتي يحـضـرنـي ويواسيني
ولوغمضت عيوني عـلـي يـتـهـيئ التـجـفـيني
ويحـملني بـجـفـوف الـدمع للـحــد ويـخـلـيـنـي

مـاأدري الـدنـيـه الـغـــداره .. نصبـت للاكـبـر
وبـيـوم الـعـاشـر واشـفـاره .. جـسـمـه يـتوذر
بـالاكـبـر غـدرت دنـياي ... تدري الاكبر لب احشاي
----------------------------------

غدرتني بالطف دنـيـتـي وضاع السـهر وربايه
وابني الذخرته الضيعتي وحسبته سور احمايه
وسفه انـهـدم سـور الحـمه بأبــني وعمد دنيايه
وانـطـفت شـمعة ناضري وأنكَطع لب احشايه

مـن اتـوجه صوب العسـكـر .. صديت اعيوني
لحسـيـن ولـن لـونه ااتغـيـر .. واتـغـيـر لـــوني
كتله اترجاك احجي وياي ... تدري الاكبر لب احشاي
---------------------------------------------

لن ابو الـسـجـاد ابـحـزن ناده ويـصب المدمع
طبي يـلـيـلـه الخـيـمـتـج وادعـيـله بلكن يرجع
وارفـعـت أيـدي للذي للـدعــه وحده الـيـسـمـع
ياربي من بحرا لكرم كَـطـره كـرم بـيـهـا اطـمـع

يـالـرديــت اليـعـكَـوب ابـنـــه .. من بـعـداغـيـابه
بـغـيـاب الاكـبـر مـمـتـحـنــــه .. صرت ومـرتابه
ادعي ومابـطـلت ابجـاي ... تدري الاكبر لب احشاي
---------------------------------------

اغـمـه عـلـيها من البـجـه والكَـلـب زايد همه
واتـقـبـل الباري الدعـه ورد الـولـد يـم أمـــه
فاقت وللاكبر غـــــدة اتـقـبـله ونوبه اتشمه
وبثنـيـن اديـهـا تـاخـذه ليله الصدرها اتضمه

والاكـبـرمـن يحـجـي وياها .. اتـقـبـله اجـبـيـنه
ومن تهمل دمـعـة عـيـنـاها .. الله اللي ايعـيـنه
صبـّر كَـلـب امـه الـوفـاي ... تدري الاكبر لب احشاي
----------------------------------------

ودعـهـا راح الحـومـتـه وبـيـا وضـع خـلاهـا
الها تنوح اهل السـمه والارض تبجي ويـاها
لحـسـيـن ابن حامي الحمه ظلت تصد عيناها
شـافـتـه يـهـدر جـالاسد للحـومـه وتـعـنـاهــا

للـمـصـرع حـيـن اتـعـنـالــه .. ويصـد الجـسمه
منثوره اعله الكَاع اوصالـه .. جابـيش أيـلـمـه
اشهد يارب اعله اعداي تدري الاكبر لب احشاي
---------------------------------------

لـيـله من شافت جـثـتـه مـتـوذره ومـخـذومه
صـوبها سهم النايبه وكَـعـدة تـون مـهمومه
ياريت يومي لولفــه من كَـبـل مـاحـل يـومـه
عكَبه اظل طول العمر مـتـلـوعه ومهضومه

مـن بـعـدك يـانـور اعـيـوني .. خصمك يوليني
ومن ديره الديره أيـودونـي .. لمن يـسـبـيـنـي
يانور اعـيـونـي ورجواي ... تدري الاكبر لب احشاي
. . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

الحومه يالاكبر تريد ارجالها
كوم يبني وبيدك اتشل حالها
-----------------------------------

كوم يبني الحومه تتنطر رجال
وانته قادر وحدك اتدير القتال
صيح وينه اليبرز الهذا النزال
واظرب ابوسط الجمع زلزالها
-------------------------------------

زلزل ابصوتك الحومه ولا تهم
وادرع ابأيمان كلبك والعزم
ولا تهاب احشودهم مامش زلم
الخوف متملك اكلوب ابطالها
----------------------------------------

الخوف متملكهم وزاد الرعب
وانته يبني ابزودك اعليهم تطب
مثل جدك حيدره ابسوح الحرب
العده ابحيدر ترجف امن اخيالها
---------------------------------------

ترجف امن اخيالها ابطاري الامام
من يمر طاري علي اتموت الاجدام
اعلن ابسيفك عله الدنيه السلام
الحومه تثبت للرجال افعالها
---------------------------------------

الحومه تثبت فعل وتثبت الاسود
وعدد بالسبعين الف ذيج الجنود
وانته وحدك يبني متهاب الحشود
لايك اعليك الشجاعه افصالها
--------------------------------------

يبني مو هين علي توكع طعين
ولا يهون ابسيف ينشج الجبين
ابحالتي يعرف اله العالمين
جثتك يصعب الم اوصالها
---------------------------------------

خادم اهل البيت عليهم السلام
عمار العيساوي الكربلائي

ارى بالطفوفِ بعين المصاب
شموعاً مضيئه وعرسٌ الشباب
لتلك الشموعِ .. سكبتَ الدموعي
-----------------------------------------------

كأني واقفٌ بالطف أُطالع مالذي يجري
ارى في الطفِ اجسادٌ على الرمضاءِ في الحرِ
دنوتُ لمصرع القاسم رأيــتُ دماءهُ تسـري
ويروي الارض من دمًّ جرى من فوهةِ النحرِ

ارى منه نحراً قطيع الوريد
وجسمٌ تعفر بذاك الصعيد
حنيتُ ظلوعي .. سكبتَ الدموعي
----------------------------------------------

غباراً قد علا وجهاً كبدرٍ قرصهُ تمّم
ويبقى نوره دائــم مدى الازمان لايُعتم
وحنّى اليـــوم يمناه ويسراه بذاك الــــدم
ونحرٌ حينما ضحّى فدىً من اجل نحر العم

ونفسٌ فداها لاجل الحسين
ومن اجل هذا بكت كل عين
جرت كالنبوع .. سكبتَ الدموعي
-------------------------------------------

ارى في خيمة القاسم شموعاً لا تزل تضوي
بصوت النوحِ والحزنِ ما زال الصدى يدوي
كأنـــي برملةٍ قدمت على الشمع غدت تهوي
متـى يــا شمع تسأله اراه قادمــاً نــحــوي

كدمع الشموعِ سكبت الدموع
ونارُ لهيبي تسيل الشموع
وطال الرجوعِ .. سكبتَ الدموعي
-----------------------------------

رمتني بسهمِ شكواها وصابتني بأنظاري
تصبُ سحابة العينِ بوادي الوجن امطاري
لمــذبــوحٍ بــزفّتـهِ سرت في قلبيَ النارِ
لقلبٍ ضاميٍ يبقى بقلبي جرحُ تذكاري

سيبقى ومهما تطول الدهور
ك جرحٍ وثأرٍ لعصر الظهور
ليوم الطلوعِ .. سكبتَ الدموعي
--------------------------------------------

اناشدُ صاحبَ العصر اله الكون ان قرر
تــعـود وتـحكم الدنيا كنورٍ للدجى ازهر
وحـيــن لكربلا تأتي تطالب قطّعة المنحر
وتُرجعُ رأسه الطاهر اليه بعد ان تُنصَر

لعباسَ لما تُرد الكفوف
كفوف وكانت تهد الصفوف
وتفني الجموعِ .. سكبتَ الدموعي
--------------------------------------

سأنعى عُمريَّ الباقي ومني الدمعه اجريها
على مــن كان كفاه مــن النحرِ يحـنّــيـها
لامٍ تســكـبُ الـدمـــعِ وللآهـــاتِ تـشـجـيـها
وزينبُ بعدَ كافلُها يكون الشمرُ حاديها

سأنعى لزينب ليوم المآب
بحبلٍ اسيره وبين النصاب
لزينب صدوعي .. سكبتَ الدموعي
. . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ماصدكَ الموت خذاك وما ترد ليّه
تنشدني كل حين عليك اسكينه ورقيه
يظهر جوابي .. ابدمعة مصابي
--------------------------------------------

عشت عمري سعيده ابوسط الاحلام
واسـهـرلك ليـالي وعـيـنـي مــتــنــام
وحلم عمري اشوفـك جـالـبــدر تــام
شجاني وما حسبت احساب الايــام

كادتني الايام يجاسم بيك كادتني
ابزهرت شبابك ييمه وبيك فجعتني
ويكثر عذابي .. ابدمعة مصابي
--------------------------------------------

يايمه سكيتك دمع العيون
واتخيل ملامح وجهك اشلون
ابد مت جانت اتمر بيه الاظنون
ولا ظنيت بالكوفه يغدرون

ارسم ملامح كمر واتخيل ارسومك
انته احلى من الكمر لمن يتم يومك
غيابك غيابي .. ابدمعة مصابي
--------------------------------------------

غبت عن عيني واتأمل تجيلي
واحــس الانتظار ايـفـت دليلي
ييمه اويه الهموم ايطول ليلي
وينك ياكمر عمري وخليلي

يا سر وجودي البقيه امن الحسن انته خيط الامل منكطع بس بيك لازمته
ويفجع خطابي .. ابدمعة مصابي
--------------------------------------------

بنات حسين ياجاسم اجنّي
شجاوبهن اذا اعليك انشدني
سكينه اشراح اكللها عله ابني
ورقيه اتون احسها ويه وني

سكنه ورقيه جرحهن يشبه اجروحي ارجع وأنه وياك ييمه اتبادل ابروحي
بكليبي رابي .. ابدمعة مصابي
--------------------------------------------

يجاسم شمعتك تطفه بديه
وترد اردود تشعلها رقيه
تصبّرني وتجي وتلزم اديه
تره العريس ياعمه اعل هجيه

لو ما ترد يبني كلي اشراح اكللها
دمعة رقيه عزيزه لا تنزلها
تسمع عتابي .. ابدمعة مصابي
--------------------------------------------

ابّاب الخيمه اصد وكفت اسكينه
تصد الحـومـتـك وتصد عـليــنه
يــيـمـه راح اكلها مـــا يجـيـنـه
واكللها وكــــع ومــوذريـنــه

راح انثر ادموع واطش اعيوني يوليدي وشمعة زفافك احطها اعله الكبر بيدي
واصبح خضابي .. ابدمعة مصابي
--------------------------------------------

خادم اهل البيت عليهم السلام
عمار العيساوي الكربلائي

المهد خالي امن اشوفه
طـفـلـي اشلون اعـوفه
يـراويـلي ابــطـيـــوفـه
انذبح طيرالسعد .. واحوم اعله المهد
---------------------------------------------

شـفـت مـهـدك يعـبـد الله خالي ومـوحـش اخـلافـك
ذكرتك من جنت يبـنـي واهـيـم ابـعـالـم اطـيـافــك
اجـيـلك تـبـسـم ابـوجهي رغـم مـا يـابـســه اشفافك
ياكعـبـه ابـوسط كلـبـــي ودم الـبـالكـلـب طـافـــك

ألـك احــرم وريــــــدي ويطــوفــك يـا وحـيــدي
ضحكتك يبني عيدي
يـقـطـعـه مـن الـجـبــد .. واحوم اعله المهد
---------------------------------------------

مـشيـت ابعالم احساسي واحـسـك تـمـشــي بدمايه
ماصدك خـبـر ذبـحــك واحـسـك تـحـجــي ويايه
يـزهـره وراويه ابدمي يروحي وثـمـــرة احشايه
يـبـلـسم جرحي يوليدي يـنـور امـضـوي دنـيـايــه
نـبـض بـحـشاي عـشـتـك
يـمـن بالـروح شـلـتـك
يـبـنـي ومن فـكـدتـك
احس عـمــري انـفـكـد .. واحوم اعله المهد
---------------------------------------------

شفت بعيوني دم نحرك واجـــــذب يولدي اعيوني
لجن لمن حـلـيـبــك در خابت حِـسـبـت اظـنـونـي
اناغـي والمـهـد خـالي عـلـيـك امـشـتـتـه اذهـوني
وافز واركض اذا أسمع يــأم عـبــد الله نـــــــادوني

وافــز ابـطــاري اسـمـك
عـلـى اعـيوني ارسمك
و انــاغـيـك و اكـلـمـــك
مــتـــرجــع يـالـولــد .. واحوم اعله المهد
---------------------------------------------
يـعـبـد الله خـبـر فـكــــدك جــرح مـأيـضـمـد ويبره
غبت عني وتظن انساك اعـيـــــش وياك عالذكره
لجن حسره وبكت بالروح وابد ما تـطـلـع الحـسـره
حـسـرة كلـبــــك الضامي نــار وبـيـه مـتـوجــره

شـيـطـفــيـلـي جـمـرتــي
وتـظـلّ بـيـه حـسـرتي
تـظـل للـموت ونـتـي
عله الراح وبعد .. واحوم اعله المهد
---------------------------------------------

اصبّر روحـــي بمصابك واواسي الطاهره الزهره
يعـبد الله وفديت حـسـيـن نحـرك يـولـدي ابـنـحـره
يـعـبـد الله ابـــوك حسين طــايـح مـن ظـهـر مـهـره
وعكب ماكطعوا اوريده بحوافـر هـشـمـوا صـــدره

جـنـت يـبـنـي اريـــــدك
تـشـيـل السـيـف بـيـــدك
لجن كطعوا وريدك
شـظل اتـنـه بعد .. واحوم اعله المهد
---------------------------------------------

يـعـبـد الله لــوّن بــاجـــر اروح وامـشـي لـديـــاري
اظل اتـنـه اجــل روحي بنـحيبي وجمرتي وناري
واذاعـنــك يــسـألـــوني اجــــاوب والدمع جاري
تغسل من دمه الـمـنـحـر واصـبـحـله الجفن ذاري

الكلب لـيـلــه ونـهــــاره
تــظــل مـلـتـهـبـه نـاره
يرب سويلي جاره
عله فراك الولد .. احوم اعله المهد
. . . . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

آه يـبـنـي يــلّي مـفـطـوم ابــذبــح
الفجر عمرك ما لحك يطلع صبح
------------------------------------

الفجرعمرك ما لحك يطلع صباح
ابزغت شمسك لجن محجوبه ابرماح
اعليك يبني اسنيني اكظيها ابنياح
ومن اصد المهدك ايهيج الجرح
--------------------------------------

ينلجم جرحي امن اصد خالي المهد
وهزته اتناغيني جا وين الولد
يبني وبفكدك احس كلبي انفكد
ابكل كتر اتخيل الوجه السمح
----------------------------------

ابكل كتر يوليدي وجهك ينرسم
اسمع اتناغيني وتــرد تــبــتــســم
واذكر الراس انفصل عن الجسم
وصورتك مذبوح بعيوني رمح
-----------------------------------

صورتك بعيوني ما لحظه تغيب
اعليك يبني الدمع بعيوني يشيب
ما تمر نسمه ابصباح ولا مغيب
الّا واتمنه النِفَس عني يشح
-----------------------------------


ريت عني يولدي ايشح الهوه
وريت وياك اندفن جسمي سوه
احس ظلعي اعليك يوليدي التوه
وللاحزان ابكلبي يتشيد صرح
--------------------------------------

ابكلبي متشيد صرح بس للحزن
روح يبني وآنــــه خليني اون
النوم بعدك يبني ما يلفي الجفن
بس دمع والدمع ما يشفي الجرح
--------------------------------------

خادم اهل البيت عليهم السلام
عمار العيساوي الكربلائي

بالعرش مطـبـوع راسك المكَـطـوع
خط الـقـلم عاللوح نحر السبط مذبوح
-----------------------------------

على ساك العرش فوك انطبع راســـك
وبـالـلـوح ارتـفـع عالنـاس مقـيـاســـك
حبـيــب الله الرسول ابـمـنحـرك باسـك
يـالـمـرتـل كــتـاب الله بـأنـفـاســــــــك

بالـذكـر وحـسـيـن انـجـمـعـن الثقـلين
ظل الكتاب اينوح نحر السبط مذبوح
-----------------------------------

بسماء الكون تـنـعـه اعـلـيـك كل نجمه
وكـل كــوكـــب الـك زاد وكـثـر هـمـه
يـمـن نـورك يـضـوي الـلـيـل والعتـمه
غبت عالدنيه من بعـدك صفت ظـلـمـه

نـوّر الـنـه الكــون سـرك الـمـكـنون
فوك الرماح ايلوح نحر السبط مذبوح
-----------------------------------

مـــــن طـبـع الـشـمـس نـيـران لهـابــه
لجـن يـحـجـبـهـا دوم الغـيـم بـحـجـابـه
لجن من شاهدت جـسـمـك دم اخضابه
صـريـع وعـالـتـرب مـتـسـلـبـه اثـيـابه

شـافـتـك عـطـشان خـمـدت الـنـيـران
صاب الشمس بـجروح نحرالسبط مذبوح
-----------------------------------

ألك جـــن وانـس نـاحـت تـصب دمعه
وعلى امصابك غدة الاملاك منـفـجـعه
وبطل صفين ابـوالحـمـلات الك يـنـعـه
هـد حـيـلـه مـصابـك وانـحـنـه ظـلـعـه

بـراسـه المـطـبـور معـتـنـي المنحور
ومـنه الدمع مسفوح نـحرالسبط مذبوح
---------------------------------.

يـبـو الاكـبـر كــــل ذره بجـت حـــــالك
حـتـــه الــريـح حـتـه الـغـيـم يـنـعــالك
بس ماي العذب من شـح عـن اعـيـالك
بـيــوم الـواقـعـه ومـــاروّه اطــفــــالك

مــن يـشــح المـاي مــاوفــاك ابهاي
لمـن طحـت مطـروح نحـرالسبط مذبوح
-----------------------------------

الذبيح حـسـيـن بـالـروح انـطـبـع اسمه
وراسه اعله الرمح منهوالذي أيـفـهـمه
اجه الراهب اخذ راسه ونـوه أيـرسـمه
وبــاعــه حـارسـه ابــلا ديـــن لا ذمـه

من مـشـه بـالراس عـالـرمـح عـباس
ناده لوين اتــروح نحرالسبط مذبوح
-----------------------------------

صـدى العـباس للـراهـب شـده فـكـــره
اخـــذ راس الـســبــط وتـعـنـه لـلـحـره
يكلها راس اخـوج اتحـيـرت بـــأمـــره
تـكـلـه يـم نـحـرعــبـاس حــط نـحـــره

والـتـكَــن راسـيــــن والسهـم بالعـيـن
وفوك السنان اصروح نحرالسبط مذبوح
-----------------------------------

خادم اهل البيت عليهم السلام
عمار العيساوي الكربلائي

جديد


يالتعتقد حب حسين وي الظرف يتغير
. . . . . . . . . . . . . . . . .

مهما اختلف بينه الظرف و اوضاعه
حب الحسين ايزيد وي كل ساعه
طبع البشر ما يختلف باطباعه
من المهد حب حسين ويانه باقي ويكبر
. . . . . . . . . . . . . . . . .

نسمع كبل بذل النفيس ابحبه
وشفناها وكت المنع ضيجه وصعبه
وشكثر شاهدنا الصعاب ابدربه
بس عدنه كل صعبه تهون وميهمنه لو نتوذر
. . . . . . . . . . . . . . . . . .

كل السجون ابشيعته متروسه
والخطه جانت محكمه ومدروسه
الشباجه ما رادوا نصل ونبوسه
مارادوا انطب نزور ويوم الطبك نتطبر
. . . . . . . . . . . . . . . . . .

شكد حاربونه ورادوا يبعدونه
عن نهج حب حسين ما يثنونه
كل محب شال احسين بين اعيونه
وصار أغلى من شوف العين ومن الكلب والمنحر
. . . . . . . . . . . . . . . . . . .

تغير وضعنه وصار وكت الإرهاب
وتنذبح كونك تنتدب داحي الباب
ما دروا لاجل حسين منطين اركاب
وكل الشباب امضحين فدوه لشباب الاكبر
. . . . . . . . . . . . . . . . . . .

وبخدمته تربينه من جنه ازغار
ازغار وعدونا يشوفنا بعينه اكبار
من المجالس هيبه عدنا وإصرار
وشاهد علينه التاريخ ما ينسى ظل يتذكر
. . . . . . . . . . . . . . . . . . .

عزه واباء ومرجله تغذينه
ولحسين أرواح ومهج ضحينه
هو البشر كلمن و مايه وطينه
و(من فاضل الطينه) نصير وبالعلكمي نتطهر
. . . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

ضاك صدري وغافيه بعيني المسافات
وي كل جرة نفس اشعر محب مات
كل هوه يهز بابي
كلت جوني احبابي
. . . . . . . . . . . . . . . . . . . .

ضاك صدري ولأهلي ابقه امتانيه . وعيني ظلت عالدرب
ما يجوني والف عام الثانيه . الانتظار شكد صعب
علتي تكثر وبالغياب امعانيه . اهلي بديار الغرب
من بعدهم الدمعه صارت سانية . نهر عالوجنه تصب

ندم عمري لان ما وياهم امشيت
وحدي وي علتي بقيت ابوحشة البيت
من يزيد اعتابي
كلت جوني احبابي
. . . . . . . . . . . . . . . . . . . .

فاركوني ولا خبر يلفيني . ما أمر ابالهم
صبري خلّص ونارهم تجويني . نار طول اغيابهم
وي دمعي ينزل اصبي عيني . وحالي يشبه حالهم
ويه علتي فراكهم ماذيني . انشد اعله احوالهم

مشت روحي اويه الظعن بس الجسد ظال
متانيه يردون بس ليش السفر طال
لو خفت عطابي
كلت جوني احبابي
. . . . . . . . . . . . . . . . . . . .

بالمحامل روحي ظلت غافيه . يم مهد عبد الله
من يناغي ترد بيه العافيه . وما تظل اي عله
كون اشبكه شبكته اشكد دافيه . الدنيا ويا تحله
روحي بعده شمعه ظلت طافيه . وبالهظم اتسله

لا خذوني ولا بقه عبد الله يمي
وظلت الآهات بس تواسي همي
وي ذكر غيابي
كلت جوني احبابي
. . . . . . . . . . . . . . . . . . . .

كلبي مني وي رقيه مسافر . بالسفر يحميها
ايدور يمها امن النسيم ايحاذر . لا يهب ياذيها
اختي نفسي ومهجتي والناظر . بكلشي اني افديها
ابفكري تغفه و تصحه وسط الخاطر . الروح تفرح بيها

فاركتها وظلت الحسرات بيه
يمته نرجع ننجمع آنه ورقيه
من اودي خطابي
كلت جوني احبابي
. . . . . . . . . . . . . . . . . . . .

اتنه منهم طارش ايودولي . يحول النار البرد
اني اشعر بعد ميردولي . ولا خبر مفرح يرد
ادري بيهم مثلي يشتاكولي . ابينّه حال البعد
لا اصلهم ولا اهم يصلولي . ابينه نقره الحمد

الفاتحه يقروها تسهيلاً للاحوال
وآنه اقراها تخفف عنهم أهوال
لو يهون امصابي
كلت جوني احبابي
. . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

صلت دمعتي عيوني بغيابك
فرض الحب على ريحة اثيابك
يمته يبني يحسين
ترد وتشوفك العين .. ارجع يا ضواها
. . . . . . . . . . . . . .

مشيت وكلشي هاجر لمن امشيت
وضاك بوحشته بغيابك البيت
عين اعله الدرب مشبوحه ظليت
كل لحظة اناشد جيت؟ . ما جيت ؟

نهار ابطولة عيني امكابله الباب
بلكي اسمع خبر ردولي الاحباب
يمته . وبلكت . و وين
ترد وتشوفك العين .. ارجع يا ضواها
. . . . . . . . . . . . .

وياكم ما رحت مدري شجاني
وبكيت بحركتي وعلت زماني
منك يبني لا طارش اجاني
لا رد خبر ويبرد حناني

طالت غيبتك كل لحظه الف عام
انطر جيتك وعيوني متنام
بلكت لو خبر زين
ترد وتشوفك العين .. ارجع يا ضواها
. . . . . . . . . . . . . .

لو ماخذني يبني بظعنك وياك
بحنان امك اواسي كلبك هناك
احضنك لو مصاب الاخو اذاك
أطيب خاطرك وبروحي افداك

بت احزام . اصير احزام ظهرك
بقنوت الأم اناجي يزيد صبرك
دعائي برفع الايدين
ترد وتشوفك العين .. ارجع يا ضواها
. . . . . . . . . . . . . .

ما رحت وكتلني القهر يبني
ونوايب هالزمن بعدك ولني
شيّب حتى رمش العين مني
وشال الفرح كل ضعونه عني

غيرك منهو اليه ومنهو عندي
وانه قربان الك ضحيت ولدي
خليهم مطاعين
ترد وتشوفك العين .. ارجع يا ضواها
. . . . . . . . . . . . . .

الك اربع ولد يرحون قربان
ولا فوك الترب مطروح عطشان
ولا راسك يرد مرفوع عالزان
ولا صدرك يظل للخيل ميدان

مو اربع ولد . لا . كون عشره
بيهم كون اواسي امك الزهره
ولو مو عشره . عشرين
ترد وتشوفك العين .. ارجع يا ضواها
. . . . . . . . . . . . . .

خادم اهل البيت عليهم السلام
عمار العيساوي الكربلائي

صلت ادموع الحوراء بين النهر والمنحر
. . . . . . . . . . . . . . . . . . .

بين النهر والمنحر اتمر كوه
صلت دموع الحره فرض الخوه
يم جف ابو الغيره الينكط امروه
يم جربته البيها احساس امغذيها جفه الأيسر
. . . . . . . . . . . . . . . . . . . .

شالت جربته البالسهم مرميه
شافتها من دم الكمر مدميه
وي الكمر وفت وميه الميه
شكفت سهم عن عباس وللنبل صارت معبر
. . . . . . . . . . . . . . . . . . .

خطوات عنها ولكت سيف الكافل
يم جف يمين الهاشميّ الباسل
شمرة علي بيمينه من ايقاتل
طاح اويه جف العباس ابنفس التراب اتعفر
. . . . . . . . . . . . . . . . . . .

كصدت وشافت هامته المطبوره
الجفين من حد الزند مبتوره
وجثة كمرها اعله الترب منحوره
والجثه مليانه اسهام ومن السيوف اموذر
. . . . . . . . . . . . . . . . . . . .

حركوا خيمنا كوم خويه اطفيها
واطفالك النار التشب تجويها
احميها عوف الماي لا ترويها
بين الحوافر والنار ايتامكم تتطشر
. . . . . . . . . . . . . . . . . . . .

امتدت ابطوله وكامت اتسولفله
ظعنك يتاني اتكوم خويه اتكفله
بالسوك لو طب الظعن توكفله
كل النسه والأطفال الجيتك غدت تتنطر
. . . . . . . . . . . . . . . . . . . . .

راح امشي عنك غصباً ومسبيه
يالجنت خويه ابصايتك محميه
بطرواك اسولف يالكمر يوميه
وياي عايش كل حال ما انسه حتى اتذكر
. . . . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

انصارك بالطف سيف ايمينك
يحسين وفدوة نروح العينك
الاخر لحظه وياك امضحين
يا دنيا التسوة بدون حسين
. . . . . . . . . . . . . . . .

ذوله احنه انصارك . يحسين وكلنا سيوف وياك
منعيش ابدونك . ويا دنيا اللي اتلمنه ابلياك
جينه انضحيلك . ودمانه انضحيها اويه ادماك
محد يوصلكم . انصارك احنه و عد عيناك

يحسين شحده اليوصل حدكم
ننطي أرواح وما نتعذركم
بالدم انصار الك اموقعين
يا دنيا التسوة بدون حسين
. . . . . . . . . . . . . . . .

جينه لارض الطف . ذبينه دروع وشلنه سيوف
حيدر علمنه . عالحك ما نعرف اسم الخوف
تشتد . نتبسم . وبالحومه اعله الموت احنه نطوف
ما دامك قائد . سيوف احنه وحولك كلنا نحوف

نتكطع كلنا ونهتف بسمك
وتسيل ادمانه ويسلم دمك
كبلك خل نوكع متوذرين
يا دنيا التسوة بدون حسين
. . . . . . . . . . . . . . . .

خل يوذرونه . ما نهتم ما زال انت بخير
يا خير الدنيا . يالبيك امأمن حتى الطير
طبعك متفرّد . ما يتكرر باطباع الغير
يا منبع رحمه . حتى الأملاك بهاي تحير

حبيناك وما نتبع غيرك
يمغرك الدنيا بفضلة خيرك
بحبك انصارك متوحدين
يا دنيا التسوة بدون حسين
. . . . . . . . . . . . . . . .

عاهدنه ابدمنه . وما يغله الدم لو دمك سال
يحسين ارخصنه . كبلك نتكطع كلنا أوصال
خل يسلبونه . ونتسلب ونظل فوك ارمال
خيل ترض بينه . والروس ايشيلوها ابعسال

دونك لو كل لحظه ايكطعونه
ونرجع نحيا وهم ايوذرونه
للموت انروح وفرحانين
يا دنيا التسوة بدون حسين
. . . . . . . . . . . . . . . .

نتواصه بنصرك . ابداً ما نتخاذل يحسين
والآخر لحظه . نندب بسمك ياروح الدين
انصارك لكن . بحبك نتجمع متخاوين
لو مثل اعضيدك . نتمنى انضحيلك جفين

هان الموت النه دون اخيامك
و نيتم أبناء اتواسي ايتامك
نفديلك يا سيد الكونين
يا دنيا التسوة بدون حسين
. . . . . . . . . . . . . . . .


خادم اهل البيت عليهم السلام
عمار العيساوي الكربلائي

عريس عايف حنته واتحنه بالدم
من سمع هل من ناصرٍ گلبه امتله بهم
هاي المواقف تنحسب
تاريخ بالدم ينكتب
. . . . . . . . . . . . . . . . . . .

من سمع هل من ناصرٍ عمه ينادي
ناده يعمي كطّعت مهجة فؤادي
ارخصني اطلع للحرب وافني الاعادي
خليني كبلك آنه توليني الهنادي

هذا آنه لابس لامتي بوجه المنيه
ظلت اليه امن الحسن أجمل هديه
وياك انه بنفس الحزب
تاريخ بالدم ينكتب
. . . . . . . . . . . . . . . . . . .

التاريخ فاتح صفحته من مبتداها
غيرة وبساله ومرجله جاسم ملاها
شجرة العزة بكربله بالدم سكاها
والعمه وافه بركبته وروحه نطاها

صفّن التاريخ وكتب هاي الرساله
شاب ورعب سبعين الف قوة وبساله
آلاف منه ترتعب
تاريخ بالدم ينكتب
. . . . . . . . . . . . . . . . . . .

خاض الملاحم والعده فرّت أمامه
وكل الملامح راسم اعليها ابتسامه
فازع الدين المصطفى ونصرة عمامه
وامتثل جندي وي ركب عمه وامامه

جندي بألف قائد وكف مابين الجنود
واتمنه لو جان الحسن بالحومه موجود
ويشوف جاسم بالحرب
تاريخ بالدم ينكتب
. . . . . . . . . . . . . . . . . . .

وضّح درس للمرجله بأول شبابه
طلك الدنيا لجل دين الله وكتابه
( ان تنكروني ) من خطب واضح خطابه
رغم العدد والخيل وسيوفه وحرابه

اتبسم مثل حيدر علي وفقارة بيده
وناوي عليهم لو حمل عسكر يبيده
للحرب قرر يكتسب
تاريخ بالدم ينكتب
. . . . . . . . . . . . . . . . . . .

دنك يشد شسع النعل ماهمته اعداه
وبالغدر طبروا هامته وداروا من اكفاه
لمن وكع صوته نده ادركني يعماه
وللموت صارت زفته امحنه من ادماه

بين الخيم عمه وسمع من ناده صوته
وحسين ( جابه ومدده مابين إخوته )
والدمعه عالخد تنسجب
تاريخ بالدم ينكتب
. . . . . . . . . . . . . . . . . . .

خادم اهل البيت عليهم السلام
عمار العيساوي الكربلائي

اروي المقتل .. من فوك التل
شفت بعيني شصار بجسمه
وشفت الخيل الطحنت عضمه
اروي المقتل .. من فوك التل
.. .. .. .. .. .. .. .. .. .. .. .. ..

صعدت التله لمن طاح ابو الاكبر
من مهره شمس عالارض يتكور
اوكفت وعيوني كام تصور المنظر
خيول ارماح نبل وسيوف والعسكر

تراب امعفره .. فوك الغبره
واجبينه احجارة امصوبينه
وبكلبه امثلث رامينه
اروي المقتل .. من فوك التل
.. .. .. .. .. .. .. .. .. .. .. .. ..

من عالتل اشوفه اموسد الغبره
وسهام العليه ما تنحسب كثره
تطبرة سيوف والطبره بأثر طبره
ومن كد الطعن جثته متوذره

توزع جسمه .. وينزف دمه
وسيوف التسجد بجروحه
توضت من قدسية روحه
اروي المقتل .. من فوك التل
.. .. .. .. .. .. .. .. .. .. .. .. ..

شفت شمر الخنا جاثم على صدره
ويرفسه ويشتم امنا فاطمه الزهره
على وجهه يكلبه ويبتدي اينحره
وكطع راس الحسين وحزٓه من ظهره

وعيني تشوفه .. الراس ايطوفه
بين اجنوده ايطوفه بأيده
والدم يكطر من اوريده
اروي المقتل .. من فوك التل
.. .. .. .. .. .. .. .. .. .. .. .. ..

طاف ابراس اخوي ويفخر ابذبحه
ويتباها بوريده من وكز رمحه
شال الراس عالي وعسكره ايفرحه
وابو الاكبر مصاحف تنزف ابجرحه

شافت عيني .. ذبح حسيني
والشمر امن ارسل حراسه
باكوا حتى اعمامة راسة
اروي المقتل .. من فوك التل
.. .. .. .. .. .. .. .. .. .. .. .. ..

ظل فوك الترب عاري بهجير الحر
وفوك اجروحه صدره بخيل يتكسر
ابن طه النبي من سورة الكوثر
كل الصابه بغضاً من علي حيدر

بغضوا حيدر .. اهل المنكر
واخذوا ثارات امن اوليده
وبغضاً كطعوا خنصر ايده
اروي المقتل .. من فوك التل
.. .. .. .. .. .. .. .. .. .. .. .. ..

عطشان وثلث تيام ظل مرمي
وجسمه المنسلب من النحر مدمي
كلت لو يمه ابقى لو يظل يمي
رحت مجبوره كتله اعذرني يبن امي


عفته امترب ... جسمه امسلب
مصاب حسين الهدم حيلي
عاش وياي انهاري وليلي
اروي المقتل .. من فوك التل
.. .. .. .. .. .. .. .. .. .. .. .. ..

خادم اهل البيت عليهم السلام
عمار العيساوي الكربلائي