يالرايح أتزور العقيله
وياك أخذ دمعي الاسيله
كلهه يا مولاتي
خادمج كل امنياته ايزورج
.......
يلي شديت الرحال ابهاي الايام
اتريد تكصد كبر زينب ام الايتام
اوياك اخذ روحي امانه امحمله اسهام
كلشي بية ايصيح زينب طبت الشام

لو وصلت البابهه طش دمعتي
واذكرلهه اشلون جانت حالتي

وصلهه اخباري
وقدملهه اعذاري

ماعندي ظلت كل وسيله
وياك أخذ دمعي الاسيله
كلهه يامولاتي
خادمج كل امنياته ايزورج
.........
ما أوصيك اعله روحي تمشي وياك
حيل مشتاكه تزور ام عون ارجاك
شدهه عالشباك روحي بهايه يمناك
ولا تردهه اوياك خلهه تخدم اهناك

روحي فدوه اتروح وسنين العمر
الزينب ام المفخره ام الخدر

يالتروح الزينب
أخذ روحي التنحب

وكلبي الي ما بطل عويله
وياك أخذ دمعي الاسيله
كلهه يا مولاتي
خادمج كل امنياته ايزورج
.......
حاجتي وياك اخذهه لخت الاحسين
واقسم اعليهه بكمرهه وام الابنين
كلهه يامولاتي زينب ابقه لا وين
انتظر يوم  الازورج صارلي سنين

سولفلهه وكلهه ما بطل بجي
الليل يخلص والصبح بيج الحجي

ابروحي المشتاكه
ودمعتي الحراكه

حال اشبهه ابحال العليله
وياك أخذ دمعي الاسيله
كلهه يا مولاتي
خادمج كل امنياته ايزورج
......

كلهه ناذر ما اجيلج الا وياي
تربه من كبر الحسين الماشرب ماي
ومن ابو فاضل اجيب ابهاي يمناي
رايه ازورهه ضريحه ابطن عيناي

وحالف اتعناهه ايدي امنسلسله
حتى اعيش اوياهه لوعة كربله

دمي خل يجاره
للبقت  محتاره
تطفي الخيم تجمع العيله
وياك أخذ دمعي الاسيله

كلهه يا مولاتي
خادمج كل امنياته ايزورج
......

يمن كاصد للعقيله بقلب مفطور
بعد يمك طلب عندي وانت مأجور
علك من شباك زينب ردت وابخور
وزور عني بالانابه لمن اتزور

وتحت كبتهه الشريفه ادعي الي
زاير اتعناهه انه وكل هلي

هيج وادخل بابهه
واسجد أعله اعتابهه

وحملي الثكيل اهناك اميله
وياك أخذ دمعي الاسيله
كلهه يامولاتي
خادمج كل امنياته ايزورج
........
كلمات
موسى الخادم

ياحفار كبر الطاهره ام عون
وسع باللحد توجعهه الامتون
......
هاي اخت الذبيح الما شرب ماي
وسعلهه اللحد يا سامع ابجاي
لا تلجم متنهه اعليهه بهداي
انه امهه واجيتك فاكده الراي

من كبري اجيت ابدمع الاعيون
......
بهون اوياهه احلفنك يدفان
بيهه امن الاسياط الهسه نيشان
ماتت بالغرب ما يمهه خوان
الجابت كل عمرهه احزان بحزان

ما شافت فرح مثل اليفرحون
.......
زينب من محرم فكدت الروح
من شافت اخوهه حسين مذبوح
ما ضل حيل بيهه وشبعت اجروح
وليل انهار دمع العين مسفوح

عالراحو وعافوهه اويه الاضعون
......
جيت وجايبه امن الكافل أعذار
ما يكدر يجي ابلا يمنه ويسار
انه اوياك ندفنهه ابدمع حار
العاشت بالغرب ما يمهه كل جار

يا زين العباد الناس يحجون
.....
زينب ماتت امن الشام والشام
موش امن المرض ل أهل الإسلام
طبت السوك باكت منهه الاحلام
وضحكات الشماته بوجه الايتام

غير أحبالهم بيهه اليجرون
......
زينب وينهه اوين الدواوين
هاي الهاضمتني يبن الاحسين
من سئلو على اخوتهه الميامين
اشكالت روحهه ابين الملاعين

اشلون اهناك زينب صبرت اشلون
.....
كلمات
موسى الخادم

لو ردت يعله مقامك
أخدم أخت حسين امامك
بت علي زينب ...بت علي زينب
.....
الف السلام اعله العقيله واعله اسمهه
ابدنياته واخرته ربح كلمن خدمهه
ستر الله زينب والسمه تحجي ابعلمهه
من كل ذنوب ومعصيه الله عصمهه

زينب الحوراء اميره .... جذبو الكالو أسيره
امر مستصعب ... بت علي زينب

......
يعله مقامه ابين اهل ناسه وصحبته
كل واحد الام الخدر نزلت دمعته
يوم الحشر ميه يلاكيهه درجته
والجنه تتلكاه واتقبل جبهته

يالردت بالجاه تعله ....
اخدم الهه ابلايه عله ....
اجازي اليتعب .... بت علي زينب

......
ربنه اصطفاهه ورحمه للأمه جعلهه
كل حاجه متعسره تمرك تسهلهه
مضرب مثل صارت فلا واحد وصلهه
منهه الصبر ياخذ صبر هاي اشيحلهه

أيوب شاهد على صبره.
من صبر زينب اخذ صبره
ابد لا تعجب .... بت علي زينب


ام الخدر والمفخره وأم العبايه
أمفصل عليهه كل شرف بالدنية هايه
رفعت شعار بكربله بوجه البغايه
هيهات للذله البدايه والنهايه

رايتهه رفت مثل اخوهه
هيه السبتهم ما سبوهه
حاربت مرحب ... بت علي زينب

.....
تحضر مجالسنه البعيده والقريبه
لا مو عجيبه هاي ابد لا مو عجيبه
تحضر تسجل الحاضر بدمعه ونحيبه
وتتشكر امن الخادم الهه ابهل مصيبه

ما تنسه لطماتك يخادم
اخت ابو فاضل كمر هاشم
رحمه من الرب ...  بت علي زينب

......
كلمات
موسى الخادم

اجنازة زينب اعله الكاع ... ما واحد تعناهه
.....
اجنازتهه بقت  بالشام  مطروحه
ما واحد وصلهه ابدمعته ونوحه
اعليهه اعيون كل الغربه مشبوحه


اجنازة زينب اعله الكاع .... والشمات تبراهه
.....
المايمهه اهلهه الوين منواهه
بساعة موتهه ياهو الي يرعاهه
ياهو اليكعد ويبجي اعله فركاهه

اجنازة زينب اعله الكاع ... محد باجي لبجاهه
......
أخت عباس ياوسفه وألف وسفه
تدفنهه الغرب مو ناسهه الكلفه
بموتت زينب الشماته تتشفه

اجنازة زينب اعله الكاع ... هاي وشنهي معناهه

.....
كلهه اتصيح يوم الطلعو زينب
هاي اخت الكمر هاي اخت المسلب
ما رحمت وضعهه وحالهه اليصعب

اجنازة زينب اعله الكاع ... صيحه الكون علاهه
.....
اه ياعازت الخوان اشد عازه
من تلتم عليهه بشيل الاجنازه
على زينب دهرهه اتماده واتوازه

اجنازة زينب اعله الكاع .... هذا الدهر خلاهه
......
مسألت العقيله ياهو اليَّحلهه
ماتت بالغرب يم ناس مو هلهه
ولا طارش وصلهه من الأكفلهه

اجنازة زينب اعله الكاع .... ماكو الكافل اوياهه

.....
كلمات
موسى الخادم


.....

محد بجه اعله اجنازتج
محد حضرهه دفنتج
محد وصلهه غربتج
يازينب العلويه
.....
أتمنيتي جان ابدفنتج عباس حاضر
وحسين اخوج الهشمت صدره الحوافر
جانت دعوتج روحج بيوم التسافر
يمج  يجوج الفاركوج ابيوم عاشر

ما أنصف اوياج الدهر
عشتي بهضم عشتي بقهر
منج اخذ شمس وكمر
الفاركتي موش اشوية
........
حتى ابدفنتج ما خلصتي من عذابج
مو جف كفيلج جف غرب هالت ترابج
بالموت وانتي اعيوانج اتصد اعله بابج
شمتانيه يم الخدر جيت احبابج

ياهو التتاني جيته
الكطعوله جف لو ركبته
العلترب ظلت جثته
سهم ورمح مرميه 


.......
بس ابن اخوج الشيعج هاي الهضيمه
اجنازتج ظلت حالهه حال اليتيمه
ابعازت امتون الشيلهه اتصيح الضليمه
محد فزع ليهه مثل حركت الخيمه

ماواحد الضل من هلج
بس الشماته تبره الج
ميته وضحكهم واصلج
وانتي الكلب مدمية


......
عشتي غريبه ومتي يا زينب  غريبه
خلصت حياتج نوح واهات ومصيبه
الشافت اخوهه أعلى الترب جثه سليبه
كل عمر ما يبقه الهه ابد لا مو عجيبه

عيشتهه جرح ابصف جرح
الشافت اخوهه ينذبح
وراسه اعتله فوك الرمح
واكطعت منه الجية


......
الشام اه يالشام بيهه اشفتي اذيه
ما رحمت ابحالج يبت خير البريه
ابنوك الهزيله دخلوج الهه  سبيه
وظلت ابالج هالصور حد المنيه

اتحملتي انواع المحن
شيدتي بحزانج وطن
من البجي عيونج عمن
الموتج عقدتي النيه


.......

وينه الينادي اوياي بالونه الثجيله
يا مايله الدنيه اويه زينب خوش ميله
هاليوم وحشه اديارهه صارت عليله
من عدهه شالت عافيتهه اوياهه شيله

دار العقيله مظلمه
تبجيهه املاك السمه
وين اليصب دمعه دمه
عل بالحبل مسبية
،.....
كلمات
موسى الخادم

.......

بحركه يحبابي ..... ابجو لمصابي
الغربة دفنوني .... وهالو اترابي
......

انه زينب بت علي
المابقالي من هلي .... بس صورهم

يا كبرهه محنتي
كبري مو يم اخوتي .... ابعيده عنهم

شفت ضيم الماسده اعله احد تراني
كربله جارت علية وي زماني
مني اخذت شكو واحد احب اني
وعافت اعليه دمع عيني العماني

ليلي وانهاري .... انجوي ابناري
يشهد اعليه ...  مدمعي الجاري
.......
ما حسبت ابموتتي
يشيعوهه اجنازتي  ... ناس غربه

كافلي جنت اعتقد
هو الاعيوني يسد ... والله صعبه  

مو كفيلي الشيعاني ابعيد عني  
هيه هاي الهاضمتني وكاتلتني
جنت احسب يمي يحضر يوم دفني
ايغمض اعيوني بجفوفه الودعني

غربه شيعوني .... غربه دفوني
موش ابو فاضل ... سلوة اعيوني
......
ما رحم بية الزمن
بعيد عن ذاك الوطن ... خله كبري

شنسه من فعله السبي
لو حرك بيت النبي .... وانه بصغري

انه ذيج الشافت امهه عذبوهه
بين باب وحايط الباب اعصروهه
شرد اكلكم بعد انه الي سبوهه
زينب انه المشت وي ذباح اخوهه

ما رحم حالي .... دهري للتالي
لاجم اجروحي .... وذابح امالي
......

اعلية اقرو الفاتحه
روحي ماتت نايحه .... يوم عاشر

من نضرت اعله الثره
اجسوم اخوتي امطشره .... بالحوافر

ابالي ضلت صوره ما ممكن نسيهه
حسين فوك الذبح جثته امسلبيهه
الخيل تعبت كثر ما سحكت عليهه
رايحه وجايه اعله صدره عايفيهه

طشرو لحمه ... اكبالي شيلمه
صورته بعيني ...  سابح ابدمه

........
جنت اريد ابكربله
دفنتي اويه اهل الهله ... والمحنه

صعبه يا سامع صعب
دفنتي ابديرة غرب ... موش اهلنه

جانت أمنيتي لخوتي ياخذوني
ويمهم يحفرون كبري ويدفنوني 
واليجون ازياره الهم هم يجوني 
دهري ما انصفني يامن تسمعوني

ليلة الجمعة .... اشتعل شمعه
اخواني مو يمي .... وزاير الينعه


......
من تقيمون العزاء
اعلية كثرو بالبكاء ... يالحبايب

الغريبه انه صرت
كبل موتي اشكد متت ... بالمصايب

من تلطمون الصدر ابجو علية
امتوني متورمات من اسياط اميه
متت وأثار الحرك لساهه بية
والجروح اهواي حسبتهن رقيه

كبل لا تمشي .... سولفت كلشي
من صبح عاشر ... حد حمل نعشي
......
كلمات
موسى الخادم

من كربله للشام .... جابتهه ضيم اَلام
واليوم وافاهه الاجل زينب
........
يلي تنشد على الصار وحل عليهه
هاي بت حيدر علي اليتباهه بيهه
من بعد موتت اهله افتو سبيهه
مشت من يمهم غصب مجتوفه اديهه

يالتنشد اعله الصار ... زينب سبوهه أشرار
ويدرون بيهه بت حبيب الرب
واليوم وافاهه الاجل زينب
......
بلايه هودج على الهزله ركبوهه
الذبحو ابن امهه وذبحته شوفوهه
حركو اعليهه الخيام وطلعوهه
حارت اتلم اليتامه اتشيل اخوهه

اخت البطل عباس .... جارت عليهه الناس
مارعو حهقه والأخو تسلب
واليوم وافاهه الاجل زينب
.......
مشت للشام ونضرهه عالشريعه
تنتظر جيت ابو اجفوف الكطيعه
راحت ودمعتهه فوك الخد صريعه
وبيدهه ذكره دمه حسين ورضيعه

ورايه كمر عدنان ... ظلت على التربان
اوفوكه جفينه ودماه الصب
واليوم وافاهه الاجل زينب
......
اتريد اكمل ما سداهه من مصايب
امن السياط امتونهه اتورمت يصاحب
بالخرابه كعدوهه اعله الترايب
والحسين اعله الرمح راسه يراقب

ايعاين عليهه اشلون .... بيهه العده ايجرون
خاف احجي  الك اكثر وتتعجب
واليوم وافاهه الاجل زينب

......
من بحر همهه الك سولفت قطره
الشافته زينب يهد الكون بَسره
طاحت اعليهه المصايب عشره عشره
من زغرهه اجتفت بحزان كثره

ضيم السداهه اهواي ... كد العطش للماي
كل ساعه من الزمن تتعذب
واليوم وافاهه الاجل زينب
.......
حتى بالموت المصايب جاورتهه
ناس غربه موش اهلهه شيعتهه
اعيونهه مو جف اخوهه الغمضتهه
جانت اتحسب يجيهه ابخاتمتهه

زينب بقت هيهات .... بعازت اخوهه المات
بمنازع الموت وبقت تنحب
واليوم وافاهه الاجل زينب
.......
كلمات
موسى الخادم

نزله

يهل المجالس ... يهل المجالس
يحرسكم الله ... يهل المجالس
.......

انه حيدر انه حماي الحميه
البجه دمعة الزينب ادموعه بدية
احضر اليحضر عزه ابنيتي السبيه
ما اخلي حاير بيوم المنية

يهل المجالس.... يهل المجالس
يحميكم الله ... يهل المجالس
......
والنعم منكم يصَّناع البطوله
من ابو فاضل ورثتوهه الرجوله
شرف خدمتكم صعب واحد ينوله
حلوه لمتكم ابد ما بيهه لوله

يهل المجالس .... يهل المجالس
يحفظكم الله .... يهل المجالس
......
بيضه رايتكم يخدام المجالس
بيكم اتباهه حبيب اتباهه عابس
واهس العدكم أبد ما مثله واهس
على الخدمه اكبار واصغار التنافس

يهل المجالس .... يهل المجالس
يرزقكم الله .... يهل المجالس
.....
ابد ما قصرتوا بالونه اعله زينب
من لطمكم هذا كون الله تعجب
باجر البيكم تعب وياه اتعب
بيدي اعبرنه الصراط الجنة الرب

يهل المجالس .... يهل المجالس
يبراكم الله ... يهل المجالس 
......
ربنا بيكم باهه املاكه العضيمه
ناس طيبين ومضحين اهل شيمه
للكرم عنوان انتم مثل غيمه
تمطر اعله اليعطش وماشيله هيمه

يهل المجالس .... يهل المجالس
ايخليكم الله .... يهل المجالس 
......
باجر بيوم القيامه الكم افزع
اشفعلكم انه وام الحسن تشفع
خله يسمع من بغضنه خله يسمع
مرتبت كلمن يحبنه راح نرفع

يهل المجالس .... يهل المجالس
يرفعكم الله .... يهل المجالس
.......
كلمات
موسى الخادم

يا مايله الدنيه اويه زينب مايله
اتشيعت بيد الغرب
وعينهه اتصد عالدرب  ..... يا مايله
........
١؛؛؛؛؛؛؛؛؛؛

قصة الحره العقيله ما تشابهه قصص
صارت الحزن الليالي يالتواليهه حصص
فرحه ما شافت تراهه والعمر بالهم نقص
من بعد موتت أهلهه مدمع الناظر رخص

ماتت ودمعه تصب
وعينهه اتصد عالدرب  ..... يا مايله
........
٢؛؛؛؛؛؛؛؛؛

مالت الدنيه اويه زينب من بعد موت الكفل
وين جانت وين صارت والدهر بيهه اشعمل
آه يالوعت هضمهه يحجي تابوت الأجل
ناس غربه الشيعوهه مو علي خير العمل

رادت البيهم قرب
وعينهه تصد عالدرب ..... يا مايله
......
٣؛؛؛؛؛،،،

جانت امنيت العقيله ابأخر ايام العمر
تحضر الخوان يمهه ايوسدوهه اعله الصدر
هذا اليغمض جفنهه وذاك اليشيع الخدر
وعون ابنهه الماي بيده ايرش على اتراب الكَـبر

وقاسم ايهيل الترب
وعينهه تصد عالدرب ..... يا مايله
.....
٤؛؛؛؛؛؛؛؛

ماتت وأثار بيهه من حركَـ ذيج الخيم
والحبل ذاكه السباهه وخله اديهه تجري دم
وصوره للعباس ظلت عدهه من صابه السهم
عالنهر من وكَـع دامي ويمه جفين وعلم

مات اخوهه بالحرب
وعينهه اتصد عالدرب .... يا مايله
......
٥،؛؛؛؛؛؛؛؛؛؛؛؛

منكتب عالحره زينب ترجع الشام الغرب
تموت بيهه من يجوهه السكنو بوسط الكَـلب
زينب اتفاركَـ عمرهه وعينهه اتضل عالدرب
وجف غريبه مو كفيله  تهيل فوكَـاهه الترب

حالهه كلش صعب
وعينهه اتصد عالدرب .... يا مايله

...........
✍️🏻 كلمات موسى الخادم

زينب بالدفن رادت يجيهه
الكفلهه ابكربله وخيم عليهه

ظلت ناطره اعله الباب
هلبت يرجعلهه الغاب
الكفلهه ابكربله وخيم عليهه
..............؛؛؛؛؛؛؛............
١؛؛؛؛؛؛؛

بلحظات الأخيره وزينب الحره .. رادت كَـمر هاشم
مثل الطير ظلت جيته منتظره .. وجفهه الكَـلب لازم

رادت كَـبل ما تطلع الروح الحبيبه
يحضرهه اخوهه الفاركَـاهه اشهل مصيبه
مثل الحمامه اتون بقت للملكَـه رادت
عاشت غريبه وبالدفن  ماتت غريب

ما يمهه حضر ساقي العطاشه
وحلم العاشته ابلحضه تلاشه

ماتت والدمع سجاب
هلبت يرجعلهه الغاب
................
٢؛؛؛؛؛؛؛؛؛؛

زينب تانت العباس موجوعه ... والمدمع تسيله
وصيحات المنازع منهه مسموعه ... ياهو التشتكيله

ضنت نعشهه ينحمل بجفوف اخوهه
الصارلهه كافل من بعد موتت ابوهه
ما رادت الناس الغرب تمشي ابنعشهه
المن كَـبل سنتين ابحبلهم يسروهه

تلجمهه صور مطبوعه بالبال
شام وسبي وخيل ورمح وحبال

وجرح امتونهه الماطاب
هلبت يرجعلهه الغاب
........
٣؛؛؛؛؛؛؛؛؛؛؛؛؛

كل ساعه وتدير اعيونهه بدمعه ..  هلبت ليهه يحضر
ما أيست من عباس رجعه .... يمهه الصبر كبر

من الصبح حد الظهر ظلت تناطر
جيت اخوهه البل سهم ذبحوله ناظر
ونذرت اذا الهه رجع والرايه بيده
اتثوب عمرهه الي بقى من عنده باجر

زينب نذرت انفاس الأخيره
للعباس اخوهه الكله غيره

تانت جيَّت الاحباب
هلبت يرجعلهه الغاب
.........
٤؛؛؛؛؛؛؛؛؛؛؛؛؛؛

ما رادت وحيده اتموت بالغربه ... من بعد الكفلهه
رادت يحضر وجايب بديه تربه...من حسين خلهه

اشتاكَٓت تشم ريحة تراب الفاركَـاهه
الجثته رميه عافته ابطف السباهه
ما أنصف اوياهه الزمن لاخر عمرهه
والموت اجاهه والكفلهه ما أجاهه

الله اشعضم هاي المصيبه
عاشت بالغرب ماتت غريبه

كَـضت كل عمرهه امصاب
هلبت يرجعلهه الغاب
........؛؛؛؛؛؛؛؛............
✍️🏻 كلمات موسى الخادم

ويلي على مسبية الشام ...
ويلي على  مسبية الشام ....
.......
١،؛؛؛؛؛؛؛؛؛

يا حرمه .... مثل العقيله عاشت
ضيم ومصايب شافت .... لاكَـ الحزن عليهه

يا حرمه ... ذبحو اعز ما عدهه
وبين الغرب وحدهه .... متحيّره بسبيهه

بحبل الضّلام ... مجروحه
وصرخت الايتام ... مبحوحه
مذبوحه احلام .... مذبوحه

دمعات العين ... تجريهه
من بعد حسين .... واليهه
ونيران البين  ... تجويهه

ضيم الماسده اعله احد سداهه
عذبهه الدهر ما أنصفاهه
عيشهه بحزن لاخر عمرهه
وجم سهم بسهم يذبح رماهه
.......
٢؛،؛؛؛؛؛؛؛؛؛

بالدمعه .... خلص عمرهه خلص
ومنهه النفس ظل ينقص .... بعد الأخو الكفلهه

بالدمعه ... ماعدهه ظلت فرحه
بيهه الجرح ضم جرحه .... فوكَـ السبي واهلهه

مشغولت بال ... كَـضتهه
واحمول اجبال ... شالتهه
زينب يا حال .... عاشتهه

ماعدهه اخوان ... بالغربه
عافت عطشان ... عالتربه
ورمح العدوان ... شكَـ كَـلبه

جم غالي وعزيز العل ترايب
شافت زينب الحره العجايب
من عبدالله حد راس الكفلهه
جابتهه مصايب في مصايب
......
٣؛؛؛؛؛؛؛؛؛؛

مسبيه ... صارت بعد واليهه
بشام انختم طاريهه  ....  من دخلوهه بكسره

مسبيه .... ما واحد الراحمهه
والشامت الهاضمهه ... يضحك عليهه اتنظره

ويلي اعله النوكَـ ... جابوهه
دخلوهه للسوكَـ .... دخلوهه
وحجي الميلوكَـ .... سمعوهه

بين الشمات .... وكَـفتهه
بجت آيات .... صفنتهه
شبعت دمعات ... شيلتهه

مكسورة كَـلب مكسوره خاطر
وروس اخوتهه تنظر والمناحر
اه يالوعت المسبيه لوعه
ترسم بالدمع صورت العاشر
........
٤؛؛،؛؛؛؛؛؛؛؛؛

بالغربه ..... ماتت ابدار الغربه
مو يم اهلهه صعبه ... ماحضرو التحبهم

بالغربه .... ظلت تحن للملكَـه
واذتهه حيل الفركَـه ... والنامو ابكَـبرهم

تانت عالباب .... جيتهم
وامحسبه حساب  .... جمعتهم
ماتت بمصاب ... شوفتهم

باخر انفاس .... ندبتهم
وين العباس ... سئلتهم
ومقطوع الراس ... هيبتهم

هلبت طارش ايوصل خبرهه
يكَـل لخوانهه انطتكم عمرهه 💔
اتمنت واحد ايرد امن اهلهه
يشيعهه وبديه يحفر كبرهه
......
✍️🏻 كلمات موسى الخادم

خوية زينب .. اعذريني .. ما حضرتج هالمسيه
اشلون اشيعج .. من اجيلج .. وانه مكَـطوعات اديه
................؛؛؛؛؛؛؛؛؛؛؛؛؛؛..................
١؛*

يا زينب صعب أمري ... اجيج ومنكسر ظهري
بلا يساري ويميني اشلون ...
اشيعج يا بعد عمري

الما ظلتله جفينه ..... بحاجه الواحد يعينه
والمتسَحكَـه امتونه
يشيع اشلون ضي عينه

ورايج استمع يم عون
احضرلج بلايه اعيون
اشلون اوصلج انه اشلون
والاجنازه تريد امتون

وانه متني .. مهشمينه .. وشيلتج تصعب عليه
.............
٢؛؛**

زينب خوية اعذريني .... متشوف الدرب عيني
اوصلج يخوية اشلون
انه ابهل حاله تدريني

لو صح بيدي يازينب ... اجيج وانه كلي انحب
لجن حكم القدر ياحيف
بعيد اعليج دمعي انصب

مو سهله علي تنخين
وما جيلج يضي العين
اعذريني واعذري حسين
الاثنين احنه مذبوحين

اعلينه داست .. بالحوافر .. خوية زينب الاعوجيه
..............
٣؛؛؛***

عليج انه يصب دمعي ... لجن انتي اعلم بوضعي
على اجروف النهر خليت
جفيني وكسر ضلعي

وحق المنكَـطع نحره ....لو ظلت الي اليسره
اجيج وما اهم بيمين
ما جازيلج العشره

منج يل الأخت خجلان
ما صرت انه الج دفان
معذور البلا ذرعان
وعذر ما بينهه الخوان

سامحيني .. يا لحبيبه .. دفنتج ناس اجنبيه
.................
٤؛؛؛؛****

انه ابكربله وروحي .. اعله بابج هيه واجروحي
حضرت تسجب الدمعه
وابد ما بطلت نوحي

عفتج بس جسد انه .. يمج روحي حزانه
يا أكبر جرح بيه
اعليج اعيوني ذبلانه

ميت روحي تبجي اعليج
ولو عندي النفس انطيج
ليل انهار اسولف بيج
الشام الشام المأذيج

غربه غربه .. هوايه عشتي .. وشفتي انواع الاذيه
..................؛؛؛؛؛؛؛؛؛؛؛؛؛؛..............
✍️🏻 كلمات موسى الخادم

بوية وينك .... ياعلي أحضر الي
بوية وينك .... زينب انه يا علي
ردت اتشيع الخدر
وتحفر الزينب كبر  .... بويه وينك
..............؛؛؛؛؛؛؛؛؛؛؛؛؛؛؛؛؛؛؛............

١؛#
وكَـفتك بويه يحيدر..... ابأخر انفاسي ردت
ردتك اجبلني بيدك ....القبله لو انه غبت
تقره عد راسي العديله ... صوتك اسمع لو متت
وانت التغمض عيوني .... ياعلي انه اتوقعت

بويه بيدك .... ردت تمسح دمعتي
بوية بيدك ....  ردت شيل اجنازتي
من يحل وكت الظهر
وتحفر الزينب كبر .... بويه وينك
.......
٢؛؛##

للنجف عيني درتهه .... والمدامع هامله
حسبَّت تحضر اليه .... وي كفيل العايله
ويه روحي اعليك اسولف ... مو علي اليترك هله
انت سلمان احضرتله ..... سهله حيل المسأله

بس عليه ...   منكتب هذا الاجل
بس عليه ...   منكتب نعشي يضل
ينتظر جيت البدر
تحفر الزينب كَـبر .... بويه وينك
....................
٣؛؛؛###

بوية كل ساعه اعله بابي .. شوفي يسبك دمعتي
احتضر والموت اجاني ... وما حضرت بموتتي
احسبتك اتسير عليه..... طيف اليسد وحشتي
الكوفه مو كلش بعيده .... اعليه يا كل هيبتي

حسبيتك .... تحضر ابوكت الدفن
حسبيتك .... تكعد اكَـبالي تون
ابساعت اني أحتضر
تحفر الزينب كَـبر .... بويه وينك
....................
٤؛؛؛؛####

أمنياتي العندي جانت .... كَـبري بيدك تحفره
واللحد بيدك توسعه .... الغربه ظهري كاسره
وانت التهيل الترابه .... فوكَـ وجهي التنظره
دهري ما انصفني حتى .... ابساعة الدفنه تره

غربه غربه .... شيعوهه اجنازتي
غربه غربه .... وسدوني ابحفرتي
ابالي ما جانت تمر
تحفر الزينب كَـبر .... بويه وينك
......................
٥؛؛؛؛؛#####
بويه مو قصدي عتابك .... حاشه يتعاتب علي
بس شفتهه اعليه صعبه ... الغربه جنازه إلي
ابدفنتي الشماته حضرو .... موش انت وكافلي
هيه هاي الألمتني .... يا اعز ناسي وهلي

بالمنيه ... اليمه ما تحضر هله
بالمنيه ... ايموت كلشي ابداخله
ارجو يابويه العذر
تحفر الزينب كَـبر .... بويه وينك
...................؛؛؛؛؛؛؛؛؛؛؛؛...................

✍️🏻 كلمات موسى الخادم

يا هيبة حامي الجار
عزمج ذل روس اكبار
يا ثورة راعي الثار ..... يا زينب
......................؛؛؛؛؛؛؛؛...............
١؛؛؛؛؛؛✔️
يزينب ..  يخسه كلمن كال اهد اصروحج
يزينب ... جبل شامخ انتي ياهو ايلوحج
يزينب ... الله باهه الكون كله ابروحج

يا لبوة الأسد .... يا حاضره الشدد
يم صبرج تركع كل عدوانج

يالبسمج افتخر ... رب الخلق كمر
مو بس الكافل خدر ايمانج

بيج الله امباهي الكون
غير انتي الهيبه ام عون
مثلج وين ايلاكَـون .... يا زينب
......................
٢؛؛✔️✔️
عظيمه .. بصبرج آيات النصر عليتي
عظيمه ... وحدج اجيوش العده اتحديتي
عظيمه ... عالي راسج كل شمر ذليتي

يا شيخة الحرم .... يا سيدة الخيم
دستي اخشوم الشر مثل الكافل

يا هيبة النبي .... ذليتي الأجنبي
منج ضل خايف شمر وخاتل

يالخدرج ما يلاح
اكَـبالج صارو أشباح
ومنهم جم فارس طاح ... يا زينب
.............
٣؛؛؛،،✔️✔️✔️
صمودج ... حيَّر اجيوش العده الجراره
صمودج .... جنه عباس الكَـطيعه ايساره
صمودج .... على ظّلام العصر شن غاره

ماهمج العده .... والدنيا شاهده
سبعيِنهم يا زينب ذليتي

ركعتي الما ركع .... من صولتج جزع
جم خوفه ابخوفه البي خليتي

ما واحد فك العين
اله وشافج الاحسين
ويصيح الشرده امنين    . ... يا زينب

.......................
٤؛؛؛✔️✔️✔️✔️
سبيه ... اعليج ابد متلوكَـ زينب انتي
سبيه ... يا سبيه وانتي قائد رحتي
سبيه ... اشلون والعسكر بعزمج هنتي

من اسمج انكتب.... جم حرمله انحسب
ميت من الذل من الحيره

تاريخ الج يضل ..... مثل الولي الفحل
بي تحجي الناس العدهم غيره

يوكَـف لاسمج إجلال
كل اعكَـال الينشال
يا مدرست الأجيال ..... يا زينب
.......................
٥؛؛؛✔️✔️✔️✔️✔️

أميره ... غصبن اعله اليرضى والما يرضه
أميره ... اسمج امحلي سمه الله وارضه
أميره ... والصبح خادم الج يا حضه

الخادم الج صبح .... كلشي اليحب ربح
مابين الوادم رافع راسه

تتفكَـده الخَلكـَ .... الشد بيده الج عَلكَـ
بي تتباهه وتفخر كل ناسه

كل خادم ليج ايصير
يخلص عمر ابنص خير
يل فضلج لاح الطير .... يا زينب
....................
٦؛؛؛؛✔️✔️✔️✔️✔️✔️

وجودج .... للخدم يا زينب اكبر نعمه
وجودج .... رحمة الله الما مثلهه اي رحمه
وجودج .... مصدر النور اليزيح الضلمه

يا كعبة الصبر ... اشما يكبر العمر
خدامج يا زينب خلينه

العن دربج انحرف ...  هذا بلا شرف
ومو واحد من عدنه اتحسبينه

احنه اربات العباس
خل تسمع كل الناس
بس يمج نحني الراس ... يا زينب

............؛؛؛؛؛؛؛؛؛؛..............
✍️🏻 كلمات موسى الخادم

شووووووور

مولاتي يازينب
............؛؛؛؛؛؛؛؛؛؛..............
١؛"
صدكَـ صارت يزينب عود ... ما نوصل بعد كَـبرج
ولا ندخل ضريحج ذاك ... ونبجي اعله الجره الخدرج
شني رد السبي والشام .. شني رد حبل اليجرج
ما جانت ابد عالبال .... يردلج حرمله ايأسرج

لسه ما طابت جروحج عالمتن
ولا نشف دمعج المغركَـ الجفن
وين جانت هاي يا زينب الج
رد عليج السبي يا ام الحزن

يعني خلصت هاي هيه
يالعقيله الهاشميه
...............
٢؛؛""
صدكَـ ما نلزم الشباج ... بعد ونصبلج الدمعه
شيصبره اليزورج دوم  ... ومتعود الج ينعه
سدوهه الحدود اشلون ... نتعنه الج جَمعه
بس لا سامح الله اطول .... المده وما تصح رجعه

خوفنه ايسدونه بابج للأبد
وما نجي لزيارتج مره بعد
انموت اذا ننحرم من ازيارتج
فدوه منج رايدين احنه المدد

نصبر الهاي الرزيه
يالعقيله الهاشميه
............
٣؛؛؛"""""""
اعله هذا الحال يازينب ... شيصبَّر محبينج
الجابوه العمر يبجون .. عليج وعل أخو احسينج
مو كل الحجي ينكَـال .... يالماكو البقى ايعينج
باجر بربعينج غاد ...  ياهو الينعى لسنينج

يعني معقوله السنه ماكو لطم
يمج ولا كو جزع لاكو هضم
واحنه جنه ابكل سنه يمج نجي
اربعينج نحي حد كسر العظم

هالسنه ماكو عزيه
يالعقيله الهاشميه
................
٤؛؛؛؛""""""""""""

من يوم السمعنه اخبار ... بابج سدته الغربه
واحنه امفاركَـين النوم . وعيشتنه اصبحت صعبه
اشلون انام وانتي هناك ... وحدج ساهره بغربه
لا يمج كفيل ولا .... زاير محتركَـ كَلبه

دارت الدنيه ورجع ليج الشمر
يسد بابج بيده ويطب للكَـبر
يطفى نور الحضره والظلمه بعد
مثل ليل اهدعش يا أم الخدر

هم ظلام وهم سبيه
يالعقيله الهاشميه
........................
٥؛؛؛؛؛"""""""""""""

من نذكر ضريحج صار .... بيد البس ذبح دينه
مو مره نعيش الموت ... الف مره احسبينه
موسهله السبي مرتين .... يا زينب تعرفينه
نصبر يالعقيله اشلون ... وصحنج غربه سابينه

بينه جرح الشام لسه ما شفه
من خذوج اعله النياكَـ امجتفه
مر الف عام وبعدنه اويه الدمع
سالفت عاشر محرم سالـِفه

بيهه نحجي كل مسيه
يالعقيله الهاشميه
......................
٦؛؛؛؛؛؛"""""""""""""""""""

بس لا والله والعباس ... وحسين وكَـطع نحره
ايام ونطب للشام ... نعلًّكَـ راية الخضره
طف أنعيد من اجديد ... بسمج زينب الحره
هيهات اليمسلج خيط ... نكسرله كسر ظهره

كَـبل بس سبعين انصار الولي
هسه كل بيت النطبه بي علي
يخسه كلمن كَـال يسبي حضرتج
بينه كل واحد يكَـول الساحه الي

ما نهاب امن المنيه
يالعقيله الهاشميه

مولاتي يا زينب
...................؛؛؛؛؛؛؛؛؛؛؛؛؛؛؛؛................

✍️🏻 كلمات موسى الخادم

الدفني حضرو ...  ناس غربه ... موش مني
ماحضرني .... حسين اخيي ... والكفلني
مو جف الاخوان
صارالي دفان ......... هذا الهضمني 
..................؛؛؛؛؛؛؛؛؛؛؛................
١؛*
انه ابهل ساعه يا هل ناس..متت مو مره الف مره
شفت نعشي تشيله امتون .. مو خواني يا حسره
لا عباسي شفت اهناك ... لا الحسين ابو العتره
هاي الألمتني اهواي .... وخلت بالكَـلب كسره

وحيده ام عون .... خلوهه .... وحيده ام عون
ابدفنهه اشلون .... ماجوهه .... ابدفنهه اشلون

ما اجوني الأغله مني يا هضيمه
وعيني ظلت عالدرب مثل اليتيمه
ودموعي نيشان
صارالي دفان ..... شوكَـ الذبحني
...........................
٢؛؛**

التموت وما اكو اخو يمهه .... عليهه تكبر البلوه
اه يا عازت الوليان .... اه يا عازت الخوه
يحس بيه الفكَـد مثلي .. أخو صاحب وفه ونخوه
تصير الدنيه بعيونه .... ظلام وكلشي ما تسوه

الفكَـد محبوب ... يكَـضيهه ... الفكَـد محبوب
حياته غروب .... ينهيهه ... حياته غروب

الموت ارحم عاليفاركَـ هوا انفاسه
شنهو ظلته التنذبح كَـدامه ناسه
وتمشي اويه عدوان
صارلي دفان ..... حبل اليسرني
...............................
٣؛؛؛***

ماردت السكن بالشام .... يشيع اجنازتي بيده
لجن هذا الامر مكتوب ... وهذا الشام الاتريده
وحيده ولا اهل يمي .... وعلية كربله ابعيده
حتى ابموتي شماته .... تصيَّح ماتت اوحيده

خطيه اخوان .... ما عدهه .... خطيه اخوان
كَـضتهه احزان .... وحدهه .... كَـضتهه احزان

ماكو واحد من اهلهه اليوم اجاهه
هيه هايه الجانت الكافل حماهه
شو ذابل اغصان
صارالي دفان .... ضحك الشتمني
...............................
٤؛؛؛؛****

اعاين بس غرب وياي .... ما واحد من اخواني
وانه الجنت احسب عود ....يصير ابن امي دفاني
ما أنصف زماني اوياي ... وحدي ابدفني خلاني
اتلفت يمين ايسار ... ولا جن بت علي اني

زماني الويل ... راواني ... زماني الويل
نهار وليل ... بجاني .... نهار وليل

اخذ كلشي العندي غالي ما رحمني
حتى وكت الموت بجاني وهضمني
عيشني الاحزان
وصارالي دفان .....  دهري الضلمني
.................................
٥؛؛؛؛؛*

ما جانت أبد عالبال .... الكفلني الدفني ما يحضر
جنت احسب بخير انفاس .. يجيني بطوله يتعثر
يحفرلي الكَـبر بيده ... ويمسح دمعي الامطشر
ويوسد خدي عالتربان ... ويفي اعليه من الحر

ويرش الماي .... بجفوفه ... يرش الماي
ويضل اوياي ....  ما عوفه ... يضل اوياي

ليلة الوحشه ردت عباس يمي
بشوفت اعيون الكَـمر ينزاح همي
يقرالي قرآن
صارالي دفان ...... تراب الدفني

.................؛؛؛؛؛؛؛؛؛...................

✍️🏻 كلمات موسى الخادم

مبارك لكم احبتي خدام الحسين ع
ولادة اسد الله الغالب

علي يا ابا الحسن .... يأجمل ما هوينه
ننادي بكل زمن .... إلك نعشكَـ ولينه
.....................؛؛؛؛؛؛؛..................
١؛🌷

إلك بالدم بصمنه
يعزنه ويا فخرنه
على حبك كبرنه .... يا أبو الحسنين

شكثر بالدنيه شفنه
مثيلك ما عرفنه
امير الكل هتفنه .... يا ضوه العينين

مثلك مُحال ... يحصل جَمال ... حُبك يقال
جنة الله الزهيه
عالي المقام  .... مثل الحمام .... خير الكلام
انته اعظم هويه

يمن يمن يمن .... صرت صهر النبينه
...........................
٢؛؛🌷🌷

يمفتاح الأماني
يواحد ماله ثاني
ألك نبعث تهاني .... ابيوم ميلادك

علينه نورك ازهر
ورجب بالفرحه كَبر
وصبح بيامه يفخر  ..... أكَـبال حسادك

فرحه وسرور .... يومك ينور .... بين السطور
نكتب يا علي اسمك
بيك الجليل .... باهه الخليل  ...  مالك مثيل
ابدع ربنه رسمك

عليك اتزاحمن ...  ورود اهل المدينه
.......................
٣؛؛؛🌷🌷🌷

يحيدر انته رحمه
وجودك أغله  نعمه
اليحبك هذا زلمه ..... انحسبه بين الناس

اليبغضك هذا كَـلبه
مثل صخره نحسبه
وجوب اعلينه حربه ...... اي وحق عباس

يالكلشي بيك ... يعشكَـ نبيك ... الما يشتريك
مختل هذا عقله
صيتك جبير ..  خاتمته خير .... الباع  الضمير
مأواك هذا انكَـله

علي ماله ثمن .... عالي غالي علينه
...................
٤؛؛؛؛🌷🌷🌷🌷

مقامك من ينوله
يسلطان الرجوله
إلك تحله البطوله ..  كلشي يشهد ليك

ابن ود من تقدم
شطرته وماتكلم
جعلته سابح بدم ..... منهو اليلاويك

فارس عظيم ... سطراته ضيم ... يمطر جحيم
فقاره اعله خصمه
صولاته نار ... ما ينسه ثار ... مثل النهار
حيدر واضح اسمه

ياحر كل محن .... الك مدينه ادينه

.......................
٥؛؛؛؛؛🌷🌷🌷🌷🌷

يضل تاريخك اول
شبيهه صعبه يحصل
فلا همنه الي يزعل ..... علي سيف الله

نهر عالدينه نابع
خليفه وصيته ساطع
أيُعقل انت رابع  ..... ربح من والاه

كلمن هواك ... اوكَـلبه نطاك... فاز ابرضاك ....
يا فخر الإمامة
مثل الأذان ... حبك أمان .... في كل زمان  ...
يا تاج الكرامه

وطن انته وطن .... لليحبك لكَـينه
.........
✍️🏻 كلمات موسى الخادم

آه يا أميرات الشام
قُصة السبي اترد كل عام
جرح السلاسل .. والمشاعل .. والنياكَـ الهِزله
تروي قصص كلهه الاَم
......................؛؛؛؛؛؛؛؛؛؛؛.....................
١؛/

عادت الشام الغدِرهه ... ابهاليالي المضلمه
وجنهه نفس النيه عدهه ... تنسبي بت فاطمه
وصحن عمتنه العقيله .... ابلا حرس وبلا حمه
وخالي من زواره ويلي .... الجانو بكَـد السمه

هسه الضلام امغطيه
ليل اهدعش خيم بيه

زينب غريبه .. مو عجيبه .. يرجعلهه اخوله
يسبيهه ويه الايتام
.............................
٢؛؛//

خوفنه باجر يمهدي .... يرد شمر وي حرمله
وينّبِش قَبر العقيله .... وتنسبي اويه العايله
وترجع ايام الخرابه ... التنهي قصت امدلله
وترجع اجفوف العقيله ... ايكَـيدوهه بسلسله

وبعيد عنهه الاحسين
وعباسهه ابلا جفين

فوكَـ الهزيله .. العقيله .. اترد عليهه العله
من تنظر الحركَـ اخيام
.....................
٣؛؛؛///

جنهه ايامك يمهدي ...  عجل ابجيتك تره
زينب وسكنه ورقيه .... بالجيوش امحاصره
من بعد عباس كافل .... ماكو غيرك تنطره
زينب الخلَّص عمرهه .... اويه المصايب ساهره

يا مهدي ننخاك تعود
زينب بلا راعي الجود

عمتك وحيده .. مو بعيده .. تصعد اعله التله
لو بيهه ردت الايام
........................
٤؛؛؛؛////

يابو صالح الك نبعث ... هالرسايل بالدمع
ونقسم اعليك بمحمد ... وبكسر ذاكه الضلع
اوياك اخذنه الثار ناخذ .... تحت امرك ننجمع
لجل زينب فدوه كلنه ... انروح يا حلو الطبع

لزينب فده كلنه انروح
ما نبخل اعليهه الروح

هاي الأميره .. وانته غِيره .. كَيد زينب حله
رد السبيهه الضلام
...............؛؛؛؛؛؛؛.............
✍️🏻 كلمات موسى الخادم

🏴 جديد | وفاة السيده زينب عليها السلام 1446هـ



*[أميرات الشام]*

أداء وألحان : *حسين فيصل*
كلمات الشاعر: *موسى الخادم*




🔻‏*للمشاهدة على اليوتيوب:*
https://youtu.be/sVvuaWZGi6Y

الهندســـة و المكساج: *ستوديو سيفن*



تصوير
فراس الحواج

مونتاج
عبدالله الحلواجي

إدارة الإنتاج
أحمد عبدالأمير

*الرعاية الإعلامية:*
‌‎شبكة صوتيات ومرئيات الشيعة