#لمولاتي_الغريبه_زينب_ع

لسان حال مولاي السجاد ( عليه السلام ) وهو يوصف حال مولاتي زينب ( عليها السلام ) في آخر لحظاتها .



على فراش الموت زينب تلتفت وتريد اهلها
حالها يبجي يوادم هسه هاي شلون احلها
ياهو اجيبه من التحبهم يوگف يوَگف دمعها
ياهو اجيبه وما مگطع حتى بس خوية يكلها

اه زينب ،، اه زينب
اه زينب ،، اه زينب

===========================

تنازع وتنظرلي ساعه بوجهي تتأمل تلمحه
حسين ابوي التعباها وتعباها هواي جرحه
هذا حال الماله اخوه ساعه الفرگه تذبحه
بكلشي يتخيل صورهم وهيه تتخيل برمحه

اه زينب ،، اه زينب
اه زينب ،، اه زينب

===========================

گطعت الضِنّه ودمعها دمعه دمعه گام ينشف
وبردت إچفوف الحنينه وبيها بس الباري اعرف
وماتت ام عون اعله اديه وبالي يركض گام للطف
جنها تركض راحت الهم حتى بالموته ركض طف

اه زينب ،، اه زينب
اه زينب ،، اه زينب

===========================

هسه اگولن فدوه عمّه لو اگولن فدوه يمّه
فدوه كلهن وانتي كلهن فدوه بس احجيلي كلمه
راح اموتن غالي غالي بيدي جندوب انا اطمّه
بيدي أدفن بالأحبهم وين البگلبي أضمّه

اه زينب ،، اه زينب
اه زينب ،، اه زينب

===========================

شيعتها وظهري محني وَحدي ومالي گرابه
نزلتها بنص كبرها ضلمه ذكرني بخرابه
وصحت بويه حسين احظر انت والصاحت يبابه
هايه زينب هل اجتكم وخلَّص الشام وعذابه

اه زينب ،، اه زينب
اه زينب ،، اه زينب

===========================

تمت
الخادم حسن الكريماوي ✍🏻

@Alphadli
قناة في رحاب الحسين ع

اتمنيت نعشي اتحمله خواني
وحسين اخوي ايصير دفاني
حاجيني يالايام شتريد مني الشام
كليلهم ما تنكظي احزاني
******
عافوني وحدي بغربتي وعالخد دمعتي اتلالي
واشما اغمضنه الجفن الكه الحبال اكبالي
ويا دنيتي صوط الشمر كل لحضه يتراوالي
واشلون انسه كربله وبيها انذبح جم غالي

واكبال راس حسين ضربوني
وخلوها زركه صارت امتوني
وشتدت الالام شتريد مني الشام
كليلهم ما تنكظي احزاني
***
جنت بعمر خمسين انه وركض رحت للتله
حسبالي ابو فاضل عدل عالريحه اخوي اندله
ياهو اليخبره بالجره وياهو اعله حالي ايكله
من طاح شيال العلم بانت يناس الخله

عباس فوك المشرعه نايم
وبخيمنه كامت تحرك الوادم
وما خلت النه اخيام شتريد مني الشام
كليلهم ما تنكظي احزاني
*


هاي انه زينب بت علي والكربله مشتاكه
واشخله بيه اشكد صحت يمه الحسين افراكه
من عندي جم ضلع انكسر لمن صعدت الناكه
ضلينه انه واخوتي بس بالرمح نتلاكه

وحده اويوحده بحبل شدونه
وكبالهم كامو يشتمونه
واحنه حرم وايتام شتريد مني الشام
كليلهم ما تنكظي احزاني
***
ونيت وجبيني عرك والموت بين عيوني
بهل لحضه وانه بحيرتي ردت اخوتي ايحضروني
كربت منيتي والاجل حان وتغير لوني
اتمنيت اموت بكربله وبكربله ايدفنوني

جنازي كون حسين جنازي
وخلف الجنازه تنحب اعزازي
كلبي اشكثر محتام شتريد مني الشام
كليلهم ما تنكظي احزاني
****







بالشام شفت اشجم جرح لليوم ما ناسيته
يحضر يشيل اجنازتي اهواي الاخو اتمنيته
مليت كلشي بدنيتي بس دمعي ما مليته
دمعي عله اعزاز الكلب مثل المطر خليته

اوحيده رقيه وغربه غربتها
ويمها تريد تموت عمتها
لحضه الجفن ما نام شتريد مني الشام
كليلهم ما تنكظي احزاني
**
تمت
تحسين الخفاجي


@Alphadli
قناة في رحاب الحسين ع

شالو نعشها ابلاية أخوتها
ناس الغرب حضرت وشيعتها
ياغربتج يا زينب .. يا محنتج يا زينب.. ياحيرتج يازينب
 
......

على افراش المرض واتعاين اعله الباب
جانت تنتظر طارش من الغياب
احتاجت بالوداع  أللمت الاحباب
احتاجت للمحنه احتاجت الخوه
.....
من  كربت منيتهه واجاها الموت
زينب ذكرت اخوتها وبجت بسكوت
هيضمه جف غريبه شالت التابوت
مو جف الكفلها راعي المروه
.......
لحسين وحسن ام الخدر حنت
والعباس الخوها الشوفته اتمنت
اخر صيحه الها اشكالت اشونت
اه يفارك اخوتي ابحالتي اشسوه
......
جانت زينب اتحسب اليشعيوها
العليها اعزاز مو غربه اليدفنوها
اه يلوعتج يم عون يحجوها
الحضروها بدفنها شافو البلوه
.....
ماتت بالغرب والدمعه تجريها
ولا واحد حضرها من اهاليها
الزمن ما انصافاها ولا رحم بيها
خلة اجم  المصايب جم حزن كوه
.......
غريبه ام الخدر ماتت يمن تسمع
يمن تحضر عزاها الليله لا تقنع
الا اتكسر الها اظلوعك الاربع
وتطيح امن البواجي اعيونك الحلوه
.. ...
الحمد الله رب العالمين
اللهم صل على محمد وآل محمد
موسى الخادم



@Alphadli
قناة في رحاب الحسين ع

(شور )

من  ادگ بيبان دمعي غير بابج ماادگ
فدوه خليني اعله بابج بلكي اموتن من صدگ
انه كل امنيتي اجيلج بس اضلن احترگ
مال اموت بنص ضريحج واشبگ الحايط شبگ

راح اموت - يمتى مولاتي اجيلج
راح اموت - خل ازورنج دخيلج

خاف اموت وماجيلج خاف تطلع روحي
وبالصحن مولاتي ماكوو صدى يردد نوحي
///////////////////////////////////////
الجمره البگلبي لمصابج ارد ازودها بعد
كل سنه احلف ازورج واخلف وياج الوعد
حققي امنيتي دخيلج والله دلالي انمرد
اخذيني مولاتي بذنوبي واخذ ابابج عهد

الكلمه هاي _ التهظم واكبر مصيبه
الكلمه هاي  _ خرجت زينب غريبه

امنيتي احس بغربتج لوعني ينسد بابج
اعصر اعيوني اريدن بالبجي اعله اعتابج
///////////////////////////////////////
لانه رايح لانه ميت بس هوه لريتي يفوت
والعله عيونج يزينب رايد اسمعها واموت
اهلا بزوار زينب يمتى اسمع هيجي صوت
تصارحن دمعي ومصابج ويحرم اعليه السكوت

تبجي ليش _ ينشد المايدري بيه
تبجي ليش _ صحت زينبنه سبيه

المغرب المغرب يزينب تحترگ روحي عليج
شلون اصدگ يالعقيله هالسنه محد يجيج
///////////////////////////////////////
ياجرح فرگاج يكتل لا له طب ولا طبيب
منين مايندار وجهج الشام زينب كله شيب
گمنه نسمع ياغريبه واعتله عليج النحيب
خاف هاي السنه لگبرج ماكو قسمه ولا نصيب

بحرگه صاح _ صاح ابو اجروح الثگيله
بحرگه صاح _ ان شاء الله نزور العقيله

خادم بخادم يواسي وراحو لگبر الحنين
شوكت تتحقق يزينب يم اخيوانج تجين
///////////////////////////////////////
تمت _ عباس فرحان



@Alphadli
قناة في رحاب الحسين ع

(شور )

يروح اختك تعال الحك
من اشوفك ترگد اجروحي
عليك اختك بقت تنشد
النشد كله اعله مذبوحي
يخوي من السبي ذاكه
لهسه وما گطع نوحي

حيل _ گلبي انلجم
حيل _ زاد الالم
حيل _  حيلي انهدم

الجانت عايشه بجالك بغربه تعيش تاليها
وانت الجنت اليه اعيون ليش  الرمح يعميها
واصلت مرحله من الضيم دنيه ومالت اعليها
////////////////////////////////////////
لهسه اختك تون ضلت
عليك ولا گطع ونها
الهظيمه الي اسمها ام عون
ماتلگه اليعاونها
يبعد اختك اعيّون اختك
دمعها ولا نشف منها

ضيم _ اعله اختك يمر
ضيم _ فوگ الهجر
ضيم _ راح الصبر

سدت بابي كل اغروب تلجم جن سحگ حافر
يخلص ليلي بس انياح مثل الوحشه والعاشر
موبس الگلب مكسور حتى الصوت والخاطر
/////////////////////////////////////////
ليش الي يريد يزور
عليه بجيته يعاني
المايگدر يجي يحسين
ضل يوصي بالثاني
اليجي يبجي يشوف الضيم
وابجي اعليك يلگاني

ليش   _ من التفت
ليش  _ بغربه عشت
ليش _ تصيح الاخت

كل هذا اليصير حسين مامره واجه ابالي
انا الجان اليه افياي وين الحيد والغالي
تالي اختك تطب الشام موخوش ابد هتالي
////////////////////////////////////////
اخذني وحطني يم گبرك
اخيتك كلش ابعيده
الخلص عمره يم شمات
حسين الدنيه شتفيده
اريد اشتم جفافيكم

عطر الشام ماريده
كون _ يصير الحلم
كون _ مره ابتسم
كون_ عطرك اشم

لويمكم اجي يحسين واصير بنصكم اخواني
لو كلكم الي تفزعون وتفتحون بيباني
شگل للجايني من ابعيد ويطردونه عدواني
////////////////////////////////////////
تمت _ عباس فرحان



@Alphadli
قناة في رحاب الحسين ع

غريبه زينب



من بعد الموت ومن بعد الدفنه
جاههه العباس وحسين وحزنه

وسألوهه شنهو الصار
يالحره اعليج اشدار
من بعد الموت
--------------------------------
اول ساعه للحره بعد الموت ولحسره
ابلايه اجفوف اجه العباس وخوهه حافر بصدره
اجاهه جييت المشتاك لخته وخنگته العبره
يزينب حيل الج مشتاك يخويه اهواي متغيره

شاف اعله الوجه اثار
باقي من لهيب النار
يگله خويه شنهو الصار

شافاها حسين لاچن مستغرب
هاي انتي ام اعون بحچيه ومتعجب

شاهد اثار النار
يالحره اعليج اشدار
من بعد الموت
------------------------------
وبدت زينب تگول الصار ويسمع هوه محچاهه
امنين ابدي الحچي يحسين ثجيل امصاب بلواهه
تگله ابديلك امن الخيل جسمك من مشه وياهه
وغيمه امن السهام اهناك وصدرك صار ملگاهه

تگله من شفت صدرك
صعد فوگه ويحز نحرك
صحت من ياصبر صبرك

ومن طحتو اهناك وصارت محنتنه
صاحوو فرهود اووادم جهبتنه

تسألني اعله الاخبار
يالحره اعليج اشدار
من بعد الموت
----------------------------
لمن طحتو فوگ الگاع كلشي طاح وياكم
الدلال ال بالخيم يحسين راح بزود طرواكم
تخييل انضرب بالصوط وصيحن يهلي ونخاكم
ولا صح للخدر فزاع انگطع من گلبي رجواكم

ومن خيمه لعد خيمه
بين النار ولهيمه
وصيحن وين ابو الشيمه

المحتار اشلون يتفسر امره
مابين الخيل مرعوبه الحره

ولخيل ادوس ازغار
يالحره اعليج اشدار
من بعد الموت
-------------------------
لاتتعجب اعله الحال وتگلي اشلون متغيره
على تل الهضم يحسين وگفت وشابجه العشره
وركضتي وانه بالخمسين وخيامي بنار مستعره
يريدلهه زلم يحسين وانه حرمه متحيره

يرهب جان ركض الخيل
يخويه الزلم بيه اتعيل
اميل وهيه هم اتميل

بس ركض الخيل ماخله اعليه
ورايد رجلين وانه المابيه

حفاي بذيج النار
يالحره اعليج اشدار
من بعد الموت
-------------------------
تگله من گضن ذني بده درب السبي يحسين
خويه احبال جابولي وحرت المن ادير العين
انه اوعفتي وعليل وغرب متحاوطه الصوبين
وخدركم عالهزل ينشاف يخويه امچتفه الادين

وخدركم عالهزل مخنوگ
وبلا هودج ركبت النوگ
وبعد هذه السبي للسوگ

وبالسوگ اعيون تتنطر خدري
وبيه يشمتون وبس انه وصبري

ولناس ازغار اكبار
يالحره اعليج اشدار
من بعد الموت
-----------------------------
محطات الدرب يحسين هيجي خويه صار وياي
واخر واجهه للشام هذه السلب مني الراي
دخلنه الناس فرحانه يخويه گلي انته بهاي
سرواين الخلگ وگفت بنصهم رادنه الحداي

ومن فوگ السطوح انشوف
ناس ادگ طبل ودفوف
انگطع بالدنيا كل معروف

ولقصر اشلون وطبت ديوانه
يحسين ايموت الرافگ عدوانه

وبنص ديوان اشرار
يالحره اعليج اشدار
من بعد الموت
-------------------------------
علي سليم الحسناوي

الليله احزان ياروحي على حسين ومصابه
وابجي بنوح مذبوحي على الفاكده احبابه
ادعي ونوح الشوك يعذب وين اهل الوليان
اعظم شي بالدنيا وحقك فقدان الخوان
كل ما ونت روحي تريد حسين وي العباس
ما خلاني لوحدي الكافل ايا رفعت راس
كلبي ينوح بجروحي
اه يانار مذبوحي
اه يانار مذبوحي. ايا نار مذبوحي
اني الباجر مسبيه. لدرب الشام العلويه
ياكبر الجرح. ذبح للعطشان
اني ضلت وحده
وسفه نذبحوا خوته
اني اهدي فده اله هل القربان
@@@@@@@@@@@@@@@@@@@@@
راح حسين والكافل ووحيده ضليت
يوم الجيت حزنانه ولدياره حنيت
راحت فدشت عيني خواني خواني شكد حنان
فراك حسين يعذب روحي وفراك العطشان
ما اكدر للفركه وحقكم يا فتشات العين
لتروحون بداعت حيدر ياكافل وي حسين
ليش هناك عفتوني
بدرب الشام سبوني
بدرب الشام سبوني بدرب الشام سبوني
راحت روحي بفركتهم
اني اترجه تكلهم
زينبهم تون تحن ترضى بهل القدر
ضليت ابجي وما الگه
ربي ارزكني بهل الملگه
لحباب الكلب درب منهم للنحر
@@@@@@@@@@@@@@@@@@@@@@@
غربه ونوح يافاطم يا يمه والله
روحي تريد ملكاهم مشتاكه بكثره
وين الجان اليحمي خيامي ويجيبنا الماي
ما ردنا الماي بفركاكم ردنا احنا الوفاي
يخواني الشام تاذيني ودرب الشام طويل
وضلعي تكسر وي ضلوعك من داسته الخيل
وين حسين والكافل
صحت عليك ياابوفاضل
صحت عليك يا أبو فاضل صحت عليك يا ابو فاضل
وينك يا كافل ضعني
زادت حسراتي ووني
يسبع الكنطره. موجره. والله خيامي
ابجي عليكم وتألم
من سوط الطاغي المجرم
ردالي المهر ظهر. ميت ضامي
@@@@@@@@@@@@@@@@@@@@@@@
لخادم الأمام الحسين سيد علي خالد المهناوي



@Alphadli
قناة في رحاب الحسين ع

كُلشي أنتهى ومات الحلم
وبعيون زينب ينرســــــم
شام
الهســـــــــــه محنية ضهر
عشت ومتت مــــــن القهر
شام
......................................................
يا روحي الجروح أهواي أبدي بيا جرح منهن
ألمشت وي روس أخوتي أشلون من يا راس أحسبهن
أبدي من جــــرح عباس وجان أجفوفه مطلعهن
لو من راس أخوي حسين حيرة أوصاله شيلمهن
من الخيــــــــــم للتل جنت
أركض ومدري شكد طحت
شام
والهســــــــــــــه محنية ضهر
عشت ومتت مــــــــــــن القهر
شام
...............................................
من ظهرية العاشر بدت قصة معانتــــــــــــي
من عفت الجثث عالكاع ومشيت أكبال شماتـي
جنت من ألتفت عباس أشوفه يمحـــي خطواتي
وأجفوفه أعله راس حسين يفين وأجري دمعاتي
ومن أنضرب أسمع صدى
عباس و ينكط نـــــــــــــده
شام
والهســــــــــــه محنية ضهر
عشت ومتت مــــــــــن القهر
شام
..................................................
من طبيت ويلي السوك وبأذني الشماته أسمع
ما عدها أهل خوان تجـــي الهاي المره تفزع
مشيت وكاطفونه أحجار وليه وجان منها أروع
من أنصاب أخوي حسين راسه وبالدمه أتوزع
وطبت القصر جانت أشد
من السبـــــــــي الله واحد
شام
والهســـــــــه محنية ضهر
عشت ومتت مـــــــن القهر
شام
.........................................................
كل هاي الجروح وجان بيه أمن الخيم جمرة
من الشام لأرض للشام زينب رجعت أمكدرة
عشت وبيه جـــــان الشيب يومية يشب عمرة
لحد كطع النفس عباس أريدة وداعت الزهرة
أتمنيته يحضر دفنتي
وبيده يشيــع أجنازتي
شام
والهســــه محنية ضهر
عشتت ومت مــن القهر
شام
.........................................................
من طبع التموت أتريد خوان التجي وتحضر
وأخوتي مذبحين وضال واحــــدهم سليل البر
آه الشام ويلي الشام مدري شضاملــــي وأكثر
ويلي وحتى زواري تجيني مــــــــــا بعد تكدر
حال الصحن مثل الضعن
من أنسبى وشاف المحن
شام
والهســــــــه محنية ضهر
عشت ومتت مــــــن القهر
شام
.......................................................
خادم خدمة الحسين
الشاعر
محمد الموالي



@Alphadli
قناة في رحاب الحسين ع

▪️▪️▪️▪️▪️
هنيالك لأن گبرك يطوفونه
او بابك منفتح دومه يخلّونه
▪️▪️▪️▪️▪️
هنيالك تجي الزوّار الك واتروح
وابكترك مجالس للبچي والنوح
بابك كل وكت ما ينغلگ مفتوح
او زوّارك يبو الأكبر يبوسونه
▪️▪️▪️▪️▪️
ابكثره يعتنون ابكل خميس الناس
يا خويه او يطوفوك انته والعباس
انه يمّي تضل يحسين بس حرّاس
وابكل يوم اصد بابي يسدّونه
▪️▪️▪️▪️▪️
يخويه دومه صحنك بالخلگ مليان
وآنه ابمرقدي الوحشه تهيْج احزان
ابديرة غربه مامشّ يمي كل خوّان
هيهات الغريب اهنا يرحمونه
▪️▪️▪️▪️▪️
هيهات الغريب ابلا هله يرتاح
يكبر حزن روحه وابد ما يرتاح
بهمومه ينثره الوكت بالمرواح
والدمعه تضل اتسيلها اعيونه
▪️▪️▪️▪️▪️
اباوع للوضع وابچي ابگلُب مكسور
صعب توصل الوادم مرقدي واتزور
رد شمر الخنه وسط الضريح ايدور
واميّه صاروا الگبري يحيطونه
▪️▪️▪️▪️▪️
انه اتمنّيت جسمي بكربله مدفون
او يزوروني مثل ما انتوا تنزارون
وابذكره وفاتي المجلس ايعقدون
او عله گبتي العلم عالي يرفعونه
▪️▪️▪️▪️▪️
ابو الحسن الوائلي
١٤٤٦هـ



@Alphadli
قناة في رحاب الحسين ع

▪️▪️▪️▪️▪️
زينب والقهر والليل والآهات والحسره
رغم كل السده والصار گلبها ما نفذ صبره
على زينب  أويلاه
على زينب  أويلاه
▪️▪️▪️▪️▪️
الله يعينها التنظر أهلها طرحه عالرمضه
ابعيناها الضوه مذبوح والليل ابحزن يگضه
ابد ما شافت الراحه او ألم صار الگلب نبضه
ويلي اشچم هضم منّه ابحزنها تسچب العبره

على زينب  أويلاه
على زينب  أويلاه
▪️▪️▪️▪️▪️
شافت چم جرح خلّه گلبها ينحب ابحرگه
والماتوا هله كلهم اشما يبچي او يون حگّه
من الطف بگت للموت بالحسرات مختنگه
ابريّتها يطب دخّان الهوه لو شمّته الحره

على زينب  أويلاه
على زينب  أويلاه
▪️▪️▪️▪️▪️
ابهمها اتصد عله العدوان تالي عالخدر دارت
او عگب عين الگمر عباس هيّه الكافله صارت
إلمن تحمي ما تدري ابنسه واطفالها احتارت
تربي ابعين صوب الماي مذبوح الوفه اتنظره

على زينب  أويلاه
على زينب  أويلاه
▪️▪️▪️▪️▪️
ركضت وادم ابلا خوف بالنار اعله خيمتها
او ركضت بت علي بالبر لجل تحفظ عبايتها
بت الشرف صعبه اهواي بين الغربه وگفتها
تدوّر ماكو كل فزّاع واتشوف العده كثره

على زينب  أويلاه
على زينب  أويلاه
▪️▪️▪️▪️▪️
يا لوعه التهد الحيل والتلچمها والتقهر
حين الفارِگت عباس لو ذبحة ابو الاكبر
لو من تستمع بالخيل عظم الغالي يتكسّر
لو لمّن خذوها الگوم فوگ الناگه متيسره

على زينب  أويلاه
على زينب  أويلاه
▪️▪️▪️▪️▪️
ابو الحسن الوائلي
١٤٤٦هـ



@Alphadli
قناة في رحاب الحسين ع

▪️▪️▪️▪️▪️
ردتك تشيّعني  من موتي يوصلني
يحسين يا خويه
يحسين يا خويه
▪️▪️▪️▪️▪️
يابو الاكبر اجه موتي رايده اتجازه
اليحتضر ينسه المنيّه ابلمّة اعزازه
واني بالغربه او نخيتك ليك معتازه
روحي من تطلع اريد اتشيل لجنازه

گلبي تره امتاني  ايشيعوني خوّاني
يحسين يا خويه
يحسين يا خويه
▪️▪️▪️▪️▪️
خويه لا تِبطه ابحضورك باقيه انتظرك
خلّي أشبع شوف منك وانتشي بعطرك
هواي مشتاگه عيُوني او رايده اتنظرك
بخير كون انظر عليهن صدرك او نحرك

ليّه تجي ردتك  سالم يبعد اختك
يحسين يا خويه
يحسين يا خويه
▪️▪️▪️▪️▪️
تجي ليّه ابذاكه حالك گلبي ميريدك
بس نحر ماريد انظرك داميْ اوريدك
كون ما مگطوع اباوع خنصُرك بيدك
ما أريد اتزِيد همّي او كسره مازِيدك

ارجاك من تحضر  لا صدرك امكسّر
يحسين يا خويه
يحسين يا خويه
▪️▪️▪️▪️▪️
جيب ويّاك ابو فاضل لو تحِضروني
رايِته من روحي تطلع بيها چَفنوني
غيركم ما عندي أحّد وانتوا تدروني
تغمض اعيوني ابغربتي لا تخلّوني

مشتاگه اصدلكم  حضروا الي كِلكم
يحسين يا خويه
يحسين يا خويه
▪️▪️▪️▪️▪️
ابد ما عفتوني لحظه حته بالمسره
عالرماح او تحرسوها لزينب الحره
عاتبت يهلي تعالوا ابونّه وابحسره
گرب موتي يهلي وآنه جيّه منتظره

هالروح مشتاگه  وامتانيه املاگه
يحسين يا خويه
يحسين يا خويه
▪️▪️▪️▪️▪️
هايه گاع الشام تكتل تكسِر الخاطر
حزن صبّت عله حزني مثله ما صاير
بالگلُب چم لوعه خلّت عَملة بالعاشر
ياهو بالوادم حبيبه ساحگه الحافر

امن العاشر او يومه  لليوم مهمومه
يحسين يا خويه
يحسين يا خويه
▪️▪️▪️▪️▪️
ابو الحسن الوائلي
العتبة الحسينيّة المقدّسة
١٤٤٦هـ



@Alphadli
قناة في رحاب الحسين ع

الى السيدةِ زينب ع


أيّها المَوتُ حَياتي

دُفِنتْ قُربَ الفُراتِ

قُربَ عبّاسٍ حُسينٍ

والخِيامِ
____
ايّها المَوتُ المُحتَّمْ كانَ مَوتي في المُخيَّمْ
قبلَ هذا في مُحرَّمْ يَوم َعاشِرْ

وَلدتْني كَربلاءُ قِبلتي صَارَ البُكاءُ
كلُّ أيّامي سِباءُ * فيَّ حَاضِرْ

سَكنتْ نَفسي المُصِيبةْ ولذا صُرتُ غَريبةْ
بَعدَما كُنتُ الحَبيبةْ دَهرُ غادِرْ

آهِ آهٍ يا زِماني

كَم جِراحٍ قد سَقاني

مَا بَقى غيرُ حَنينِ
وهُيامي
____

نَاحِلٌ جِسمي ورُوحِي مَا بقتْ غيرُ الجُروحِ
هذهِ آهاتُ نَوحِي يا إلهي

شَهِقتْ نَفسي الدُّخانا شَيبُ رأسي ذاكَ بانَا
عَذّبَ اللهُ الزّمانا آهِ إهِ

حفرَ السَّوطُ مُتوني بيّضَ الحُزنُ عُيوني
ذبّلَ النّهرُ ظُنوني وشفاهي

هَذهِ كانت حَياتي

أطلبُ اليومَ مَماتي

يا إلهي يا مُعيني
ذا كَلامي
___
أنَا متُ المرتينِ مَرةً قُربَ الحُسِينِ
مَرةً قُربَ اليَدينِ وا كَفيلي

عَرَفَ المَوتُ كياني مُذ رأى شِمراً سَباني
لَيتَ في الطفِّ أتاني يَا لِويلي

أيّها المَوتُ تقرّبْ فجِراحي باتَ يلهَبْ
ليسَ لِي يا نفسُ مَهرَبْ مِن سَبيلي

أيُّ ارض أيُّ قبرِ

ضمِّ اهلي ضمَّ عُمري

فبُكائي ليتَ يَجدِي

وسلامي

____

وَلمَن أُوصي وَصية أخوتي فِي الغَاضرِيةْ
تَحتَ خَيلٍ أعوجيّةْ سَحقُوهمْ

أينَ اهلي أينَ ولْدِي لِيتَهم شيّدوا لَحدِي
أنا أصبحتُ لوحدِي اخبرُوهمْ

مدمعِي جَمراً يَسِيلُ لا أبٌ لِي لا كِفيلُ
وشَعُوري لي يَقُولُ دُفنُوهمْ

صُرتُ لا أَعرفُ زينَبْ

كلُّ أيّاميَ أنحَبْ
ووجُودي باتَ اغرَبْ
فِي الأنامِ
_

أينَ يا مَهديُ أيَنا أ ترى الحُقدَ الدّفينا
قَتلُوا السِّبطَ حُسِينا أنا عَمّتُكْ

مثلَنا انتَ حَنينُ راحَ يَعلوكَ الأنينُ
حَسرتي أنتَ حزينُ قد عَرفتُكْ

هذهِ آهاتُ أهلِكْ قُمْ وطَالبْ حقَّ شَملِكْ
أنتَ للِثاراتِ تَملِكْ ذاكَ عَهدُكَ

كُلُّ وَقتٍ هوَ نَحْرُ

أنتَ يا عمّةُ ثَأرُ

مَا مَضى يومٌ ودَهرُ
يا مَحامِي
_
علي حبيب الشابي

انصبو الفاتحه بكل شارع الليله
جنازته الغريبة كلش اثكيله

بالغربه السنه ومحد وصل ليها
لحد زارها ولحد نشد بيها
مهضومه وبقه بين الغرب زوار
غير ام عون حكنه نبچي عليها

ضل تابوت زينب محد يشيله

@@@@@@@@@@@@@

قيمو الفاتحه بنص الكلب خدام
زينبكم تضل وحدها هذا العام
غريبة بلا اهل بلغرب هاي ام عون
ماتت لابچي وتشيع نص الشام

كون اخوان عدها النعش تبجيله

@@@@@@@@@@@@@@

فزعه نريد كون اليوم من عدكم
مااريد الطم يبرد اب مجلسكم
شدو حزامكم عالطم والدمعه
خدام المجالس زينب تكلكم

كل واحد بچه عباس يدعيله

@@@@@@@@@@@@@

كون بكربله مدفونه يم عباس
حته نزورها بكل وكت ياهلناس
زينب بالغرب ملجومه هاي شلون
محد زارها والكبر ما ينجاس

غير ام الخدر وحسين نشكيله

@@@@@@@@@@@@@@

بلايه يخوان ماتت بلغرب صعبه
لو يمها الكمر جان الدمع صبه
ضلت لاهل مهضومه يالعباس
موش ولام ليها زينب الغربه

صاحت ياابو فاضل ماتت العيله

@@@@@@@@@@@@@@

وداد البخاتري




@Alphadli
قناة في رحاب الحسين ع