كان فاكر أني هموت بعده! 😅

من هان عليه الود
ميجوزش ليه التبرير
علشان تعبت أسد 
في الشق والتقصير 
ولا عنده نية يفوق
ولا نية في التغيير
كل اما اعاتب فيه
بيشوفني باجي عليه 
وارجع انا اللي اراضيه
وهو كما هو
من هان عليه الود
يستاهل النسيان
والبُعد مش خطوات
البُعد من جوا
ميجوزش نرجع ليه
ولا حتى نبكى عليه
والقسوة تعمل ايه؟ 
بتولد القوة ..

قبل الجميع ف انا حبي كله لربنا
اوقات بقصر بس انا فاكراه
وان قولت هوصف رحلتي بجملة
ف هيبقي كل الشكر دة لله

وحلمي عندي ليه رسالة ووعد
ورسالتي ليه اني معاه علي طول
والوعد هو : اني هوصله
وهعلي بيه فوق السما وهطول

والشِعر اسمي وبيتي ومكاني
بلجأله لما ببكي وبعاني
بلاقيه فاتح لي دراعه وبيسمع
مهتم بيا وجي علشاني

الناس حقيقتي وحالتي بكتبهم
صوتهم ساندني فـ عز احزاني
الناس صحابي واهلي مش جمهور
هُما القصيدة وهُما عنواني

بكتب فـ شعر وبلعن الصُدفة
الحب كان نُطفة
كبرت فيه وبكل ما أملك
فـ جعلته طفل يتيم
ياريتني كنت أجهضته من قلبي
أهو صار كبير ولا زال بيكبر طول ما مر الوقت
أنا ذنبي أيه دلوقت ؟
أو ليه سمحت لحُبه يملكني
الحزن زاد والكاس في قلبي اتملى
كل ما أحاول أفضي فيه يتصب
طب أيه يا رب ؟

#شيزوفرينيا

كانت جاية في ميعادها قبل ما نتفارق
و إيديا ساقعة كأنها كوم تلج
و شفايفي لونها أبيض
من خوفي لتقولي أنا همشي وهسيبك
قالت قرارها ومشيت
و أنا قلبي واقف عندها ممشيش
طب حتى سبب البُعد ؟
أقسم بربي مفيش
كان أيه لزوم الجفا والبُعد والقسوة
كتر أوي خيرِك
أنا هنسى وجعي بواحدة مش غيرِك
مش عارف أنساكي
لاء!
بكرة هتعود وهعيش كمان دونِك
دونك فـ أحسن حال
الست قطعت كدبي وقالتها
وبكرة يفوت وبعده يفوت ولا كلمة ولا مرسال

#إمبارح

أميرة البيلي | تاج راسك - من حفل الساقية نوفمبر ٢٠٢٢

صلاة الفجر .

إدعيلي معاك وربنا يرزقك بأضعاف أللي هاتدعيهولي ❤️

وحشتني وسابتني من غير ما أكون جاني
كان قلبها أناني وقلبي طفل يتيم محتاج إيدين أمه
مين بعدها يضُمه ؟
قالت بقسوة يومها نتفارق
قولتلها و أنا ببكي كان أيه الغلط مني ؟
أو أيه الغلط فيا ؟
أنا آسف استني! آسف على كل شيء والله ما عملته
لكن بلاش تمشي
قالتلي يومها:
" حُكم الظروف أقوى "
ومشيت! ..

#إمبارح

وحشتني
والاشتياق اسمي معاني الحب في الغربة
مبقيتش بعرف أنام بدون صوتك
ولا عارفة افرق بين ليالي العمر من غيرك
في شهر مر عليا عمر طويل من غير ايديك الطيبة وحبك
لو هحكي هكتب ايه وانا بدونك
دانا عمري كله في نظرة لعيونك
عندي يقين إنك راجعلي
ومش هنتفارق
وان المفارق لما توهت اهي عرفتني
ان انت اكتر حد فارق
ضيقة وهتتزاح قريب والميعاد هيحين واشوفك
كلها أيام وترجع ليا واتدفي ف كفوفك
كلها ايام يا ضهري وارجع اقوي لما ترجع
ربنا اداني اليقين لجل غُلبي وحزن ليلي
والإشارة ان انت راجع..
مر شهر من الألام ومن المواجع
بس هانت
كل شئ ف حياتي باهت لما غيبت ف يومها عني
والحنين زود أنيني ولما كنت هموت منعني
وقالي راجع
قالي ابنك بكرة هيبات بين ضلوعك
بكرة هتشوفي الفرح لحظه رجوعه
وقتها هيحين رجوعك للحياة الحلوة اللي بينكم
قلبي قالي أنك راجعلي وان حزني مش هيطول
وأن دة بس اختبار..
بكرة يرحل كل حزنك بكرة راح يطلع نهار
بكرة جي وبكرة قرب
دة يقيني ومش بجرب
ربنا قادر وعالم بيا وبحزني اللي زاد
ربنا قادر ينجي روحي من كل العذاب
ربنا قادر يرجع كل حلو ف لحظة غاب
بكرة كل الحزن يمشي..
مهما قفلوا الف باب
طول ما باب الحق واسع..
بكرة خير

بكرة كل الحزن يمشي واعلن اني بقيت بخير.

يمكن حصل تأخير.. بس الميعاد قرب
فيه وعود ما بينا كتير وحنين ملوش ناهية
تايهه..
حزينة ..
وقلبي متكسر..
لكن يقيني كبير!
إن اللي خلق الحب جوانا
صعب إنه يوجع قلبنا بالشكل دة
علشان كدة مهما هتبعد بردوا " بينا ميعاد "
عمري ما هقدر أكتبك في غياب
ولا حتى حبك راح يقل ف يوم
ياللي انت غايب عن عينيا اسمع
مش شايفة غيرك مهما طال الوقت
في حرب جوا ف قلبي من غيرك
في حزن زاد لما انقطع خيرك
في حب زاد لما انحرف سيرك
لكن في قلبي طريقنا متغيرش
متخافش من الأيام مسيرها تهون
متخافش من بكرة.. ربنا حنين
متخافش من قلبي عشان بيصون
واكيد حبيبي.. اللي احنا فيه هين
في كروب أشد ربك عالم بيها
والكرب مهما يطول مسيرة يقل
لكن تأكد اني عمري ما امل

صلاة الفجر .

إدعيلي معاك وربنا يرزقك بأضعاف أللي هاتدعيهولي ❤️

ده البحر لو شافها بيميل ويتلوى
صبية من حسنها أجمل بنات حوا ♥️

بحبك بس مش هقدر
اقول كل الكلام علشان
حبيبي الشِعر قدامك
بسيط وإن قولت الف ديوان
وهعمل ايه عينيك.. خطفوني ولقتني
بروح وياك في كل مكان
وشاعر اه.. كبير وله كلمة والله ..
لكن باجي قصاد عينك
بلاقي الشِعر يتراجع ويرفع راية استسلام
عرفت حبيبي اني بحب وبريدك
عرفت الفرحة علي ايدك
لقيتني بدوب إذا سمعتك تقول اسمي
" اميرة " معاك.. ❤️
وملكة ومالكة كل الكون وانا وياك
اقولك سر : عينيك حلوين!
" وأمروني احب الحب "
واسمع اغنيات الست

عارف
صعب إني أعبَّر عـ اللي جوايا
قدام عينيك بيكون كلامي فـ نظرتي أسهل
بخجل
إذا طولت فـ نظرتك ليا
و بلقى الكلام بيتوه
فـ بقولك إزيك؟
و القصد منها مش سؤال و لا شئ
القصد منها بإن أنا حبَّاك
بلقاك
بنسى اللي فات و اللي جي
و بشوف عيونك ضَي
بتنور الضلمة اللي جوايا
نسَّاية! و مهملة جدًّا
و ياك بقيت بهتم بالتفاصيل
من وقت ما هويتك، و أنا فاكرة كل جميل ♥️

بحق اللي بينا ومسكة إيديك
لهفضل يا عمري بحن لعينيك
وقلبي تملي بيسأل عليك
وعايش بصونك وهفضل معاك
بحق الليالي الجميلة اللي بينا
وحق الليالي الطويلة في غيبتك
هتفضل ف بالي هتفضل يا غالي
وهفضل اقول للجميع اني بنتك
بحق الجَميل اللي بينك وبيني
وحق الجِميل لما نورت عيني
وحق القصايد في غُلبي وحنيني
لهفضل فاضلك وهفضل في ضلك
وعمري ما أضلك وصعب إني أغيب
هتفضل حياتي وصوتي في سكاتي
وهفضل يوماتي بدور عليك
هنرجع قريب ودة بحق حبي
وحق اللي بينا ومسكة ايديك ♥️.

مكنتش عاملة نص حساب لغيبتك عني و شعوري
مكنتش عارفة أني هتكسر و هموت
و هنزف من العياط أطنان
يا غايب عن عينيا بدون ما حتى تقولي يومها سلام!
هترجعلي أنا واثقة و هملّي عينيا من شوفتك ومن طيبتك
ومن قلبك ومن ضحكك في عز الخوف فـ يتحول ويبقى بسيط

#يا_غايب

هترجعلي!!
أمانة عليك لترجعلي في أسرع وقت
أمانة عليك تطمني وتسكن حضني وتجيني
قتلني الإنتظار والخوف وكل ما بينا وحنيني
بقيت ببكي..
كأني عاجزة وكأنك سند قلبي و عُكازي
مليش غيرك.. وفين أراضيك!
ومين يراضيني من غيرك و أنا عايشة علشان أراضيك!

#يا_غايب

في فُرقة قادرة تخرجك كسبان
و فُرقة قادرة تخرجك بـ مفيش!
في توهة ممكن بعد منها تعيش
و توهة عارفة تتوهك فـ تموت
في فالمتاهة صوت هيوصلك
فـ هتجري ناحية أملك الغلطان
وتلاقي نور الشمعة بيقرب
هتشوفه عوضك و النجاة و البر

#المتاهة

مشيت ومنسيتش
حاولت والله بس الحنين قاتل
عمال بماطل في الفرح وأبكي
وأقوله بكرة نعود
ملعون أبوها وعود
الشوق كما السكاكين
بيقطعوا فـ روحك
كحول جبته فـ مال على جروحك

#الحنين

هفضل أمشي لحد ما أمسك حل ليا
رجلي هلكت بس مش هتقل بيا
أملي قالي الصبر طول وأنت روحك مش قوية
والحنين زود جراحه وقلبي مش قد الأذية
بس لسه الصبر قادر يطفي روحي من الحريقة
رحت رايح عـ المراية لقيتني عجزت بطريقة!
يومها بس عرفت أني لسه مش لاقي الحقيقة
أضغاث مشاعر نوفمبر

#نوفمبر_٢٠٢٠