Ярашув.

 (Мандан ўтган бўлсаям баъзида "сени кечирдим" деб гапирвораман. "Ман кечирим сўрамадим"-дейди. 😁 Сўрайвер деб ёзилган шеър бу. 😁)

Инсон борки адашадир,  беайб Худо
Ўзим бойу лекин кўнгил қургур гадо
"Узр",- дея салгина сен берсанг садо
Ким бўлибман битта сени  кечирмаган

Кечирганим  сенга  гулмас  гулчамбарлар
Жаннатларда хид таратган мушк анбарлар
Кечиримли бўлган хатто пайғамбарлар
Ким бўлибман битта сени  кечирмаган

Тураверсанг айтилган ҳар сўздан тониб
Узр деган ширин каломни  қизғониб
Бошинг эгсанг  манглайимда куйиб ёниб
Ким бўлибман битта сени  кечирмаган

Майда чуйда турмуш дарди булар бари
Қолиб кетсин унутилиб кўздан нари
Авлиёмас,  мен бир йигитман жайдари
Ким бўлибман битта сени кечирмаган.

Шунда сенга нур сочади  кўкда ҳилол
Ибодатга чорлагандай ҳазрат Билол
Ахир сенку менга Ҳақдан жуфти ҳалол
Ким бўлибман битта сени  кечирмаган.

Бахриддин.

​​Программистни уйлантириб қўйишибди. Келин дангаса эмиш. Шунда программистни онаси:
-Ахир уйига совчиликка борганимизда, уйларни бир чиройлик супуриб сидирганини кўрувдик. Ўз қўллари билан овқат пишириб бизга олиб келиб берганди, нега энди уйда қилмаяпти экан,-деб куюнибди.
Шундда программист:
-Сизлар ДЕМО версиясини кўргансизлар!-дермиш 😃

#Онамдан_хотиралар.

Ёзнинг қоқ чилласи.  Тушликдан кейин салқин уйга кириб ухлаб қолибман.  Ташқарида  йиғи аралаш овоздан уйғониб кетдим.  Соатга қарадим,  молларга ўт ўргани ҳозир кетмасам улгурмайман,  қоронғу бўлиб қолади.  Ташқарига чиқиб ҳовлидаги ариқчани олдида уйқум очилмай ўтирдим.  Сўрида онам билан қўшни "касал келин" ўтирибди.  Йиғлаб гапиряпти.
-Ахир ман келин бўлиб  тушганимда соппа-соғ келганман. Мана шу полсиз зах уйларда орттирдимку,  Манзура опа!  (йиғлайди). Онамниям кимдир Пахталиккўлда балнисада (ўпка касалликлари касалхонаси) ётган, шундан кейин ўлган  дебди, қайнонам шу гапни маҳкам ушлаб олган. Ахир онам қон босими ошиб ўтдилар-ку!
- Ичингизга олманг қизим,  ман ўзим гаплашаман қайнонангиз билан,- юпатади онам. Ҳали кўўўп яшайсиз,  қизларингизни турмушга бериб,  ўғлингизни уйлантирганингизда шу гапирганлар келинни қўлидан чой ичиб уялиб қолишади.  Намозни бошладингизми?
- Бошладим,  лекин алхамду билан қулҳу аллоху ахадни биламан холос.
- Ҳозирча бўлади, манави дафтарга сизга 5-6 та ёдлаш осон зам сураларни ёзиб қўйдим.  Ёдланг.
- Хўп.
Онам келин билан қучоқлашиб хайрлашиб чиқиб кетди.
- Ҳалиям кетмадингми,  хадемай кун ботади,  болам.
- Ҳозир кетаман,  яқинроқдан беда ўриб келаман,  улгураман.  Нега у келин билан қучоқлашиб хайрлашдиз,  уни юқумли касал деб ҳамма нарироқдан ўтади-ю.  Энди сиз биланам сўрашмай қўяди қўшнилар.
- Ҳеч ҳам касалмас! Аслида уни касал деган одамлар касал. 
- Қанақа касал?
- Қалби касал. Уни касали ўтиб кетади.  Лекин қалби касал тузалмайди. 
- Қалбини касаллигини қаердан кўрасиз. 
- Уларнинг ўзида кўринмайди бошқаларда кўринади.
- Бошқаларда қанақа кўринади?
- Ҳозир кўрмадингми?
- Барибир тушунмадим. 
- Майли,  кейин тушунарсан.  Ҳаммамизни ўзи ислоҳ қилсин.  Омин. 
- Мен яхши кўрган қиз касал бўлсаям оберасизми?
- Кўнгли тоза бўлса обераман.
- Зеби тегмайман деганмиш манга.
- Тегмай бўпти! Тегмасига қўймайман! Бор энди даланга жўна, тезроқ бориб кел,   сигирниям эртароқ соғишимиз керак,  боласини қорни оч. 

... Яқинда маҳаллага борганда узоқдан ўша  "касал келин" ни учратдим. Рўзғори тўкис,  бахтиёр,  болалари ҳам уйли жойли экан...

@Бахриддин Асрор.

#Онамдан_хотиралар. (шеърни мазза қилиб эшитинг)

Онам ҳаёт вақтларида кўп дуоларини олдим. Лекин барибир армон бўлавераркан. Ёши улуғ, илмли инсонлар ота ёки она ўтгандан кейин унинг рухини шод қилиш учун ҳаққига қуръон ўқиш билан бирга унинг яқин дўстлари, ака-ука, опа-сингил ва дўстларини йўқлаб туриш лозимлиги хадисларда ёзилганини айтишган.

Биз 25 йил бир маҳаллада яшаб, кейин 2-3 км узоқликда бошқа ҳовли сотиб олиб, кўчиб чиққанмиз. Икки йилдан бери онамни нечча марта туш кўрган бўлсам фақат ўша аввалги маҳаллада ўша ердаги қўшни дугона аёллар билан кўрганман.

Бугун Тошкентда бўлсамда укам ва синглимга айтиб, ўша қўшни аёлларни меҳмон қилиб хабар олишга шароит қилдим. Наманганнинг тоғли жойларидан бири бўлган Балиқкўл қишлоғидаги сўлим зиёратгоҳга шароит қилдик. Холам, сингилларим, укам ўнга яқин қўшниларни ўша жойга олиб боришди. Қуръон ўқилди, дастурхон ёзилиб, эҳсон оши пиширилди.

Ҳаммалари онамни ёд олиб йиғлаб ўтиришибди. Энди тез-тез йиғиб тураман. Сабаби, мен уларнинг ҳар биридан алоҳида хабар олиб ҳол сўрашга вақтдан имконим йўқ. Онаси тириклар, онангизни йўқлаб туринг.

Ўтганларни Оллох рахматига олсин!

Онамнинг қўшнилари

Бари кўнгил боғбони
Шаддод қувноқ кайвони
Чаккасида райхони
Онамнинг қўшнилари

Ёмонлик кўрмаганлар
Йўқотиб йиғлаганлар
Худойим синаганлар
Онамнинг қўшнилари

Бир супада жам бўлган
Дилига малҳам бўлган
Бугун битта кам бўлган
Онамнинг қўшнилари

Синалгансиз сабрда
Ҳурмат иззат қадрда
Сиздан рух шод қабрда
Онамнинг қўшнилари

Эсланглар ибодатда
Ёд олинг тиловатда
Бизга ҳамроҳ тоқатда
Онамнинг қўшнилари

Узилмайди ришталар
Кўнгли кенг саришталар
Ердаги фаришталар
Онамнинг қўшнилари

Кўриб кўкларда бошим
Сиздан айлансин ошим
Хурсандман кўзда ёшим
Онамнинг қўшнилари

Ҳар элнинг боши бўлинг
Қора кўз қоши бўлинг
Ҳаммангиз хожи бўлинг
Онамнинг қўшнилари

Мен Тошкан азимдаман
Кузатиб сизларни зимдан
Ўлгунча таъзимдаман
Онамнинг қўшнилари

Бахриддин Асрор. 2024 йил, 1-июнь

Кечаги ўйин тўғрисида қисқагина юмор. 😁

​​Набирам Билолхўжага (1 ёш)

Биз катта уруғмиз,  катта сулола
Ота боболаринг, хеш ақраболар
Эй сен, бир йил аввал туғилган бола
Шу катта уруғнинг  бори бўл, Билол

Дўсту миллатини сотмаган қавм
Энг катта шиори силайи раҳм
Йўлдош бўлсин ақлу, фаросат, фаҳм
Бобонгнинг ғурури,  ори бўл Билол

Тилларингдан сени,  ўзим ўргилай
Суюкли бўлсайдинг  пайғамбарлардай
Худойимдан ҳам  туну кун сўрай
Муаззин,  мураттаб қори бўл Билол

Умр йўлида ким ҳақ,  кимлар ноҳақдир
Солиҳга  фазлу марҳамат нақддир
Саодатли қисмат айласин тақдир
Ғуж йигитнинг асл нори бўл Билол

Олий юмушим- сенга Ҳақни танитиш
Шаҳодат келтириб,  қалбинга қуйиш
Тугамайди бу фонийда юмуш
Яхшилик,  хайрнинг кори бўл Билол

Бахриддин Асрор.  2024 йил 14-июнь

​​Ўлимдан олдин!

40 ёшида ошқозон саратони билан касалланган халқаро миқёсда таниқли дизайнер ва ёзувчи Крисда Родригес вафот этишидан олдин шундай ёзган эди:

Гаражимда дунёдаги энг қиммат машина бор эди, лекин энди ногиронлар аравачасида ҳаракатланишимга тўғри келмоқда.

Уйимда ҳар хил брендли пойабзал ва қимматбаҳо буюмлар сотилади, аммо ҳозир менинг танам касалхона томонидан тақдим этилган кичик матога ўралган.

Банкда кўп пулим бор, лекин ҳозир бу маблағдан ҳеч қандай фойда йўқ.

Менинг уйим қасрга ўхшайди, ҳозир эса касалхонада оддийгина каравотда ётибман.

Беш юлдузли меҳмонхонадан беш юлдузли меҳмонхонага ўтар эдим, аммо ҳозир касалхонадаги бир лабораториядан иккинчисига ўтмоқдаман.

Мен юзлаб одамларга дастхат берар эдим, аммо бу сафар тиббий ҳужжатларга имзо чекмоқдаман.

Сочларимни етти нафар сартарош тартибга келтирар эди, энди эса бошимда битта ҳам соч йўқ.

Хусусий самолётимда исталган жойга уча олар эдим, аммо ҳози касалхона дарвозасига бориш учун икки йўлак керак.

Гарчи озиқ-овқат жуда кўп бўлсада, лекин ҳозир менинг диетам кунига икки таблетка ва кечқурун бир неча томчи шўр сувдир.

Бу уй, бу машина, бу самолёт, бу мебель, бу банк, жуда кўп обрў ва шон-шараф, уларнинг ҳеч бири менга мос келмайди. Буларнинг ҳеч бири мени тинчлантирмайди.

"Ўлимдан бошқа ҳақиқий нарса йўқ.

​​#Юмор_бозор.

Фарход бозорида малина сотиб ўтирган холадан
"малинангиз сал қимматроқмасми, озгина туширинг нархини, - деганимда, у манга: "болам, малина қимматмас, сени ойлигинг паст, ойлигингни кўтаришсин ишхонангда. Ман туширгандан кўра, сан кўтаргин"-деганиди.)))

Ҳамма ўзининг ўлчамида ҳақ.

​​#Ташхис

Кадрдан ходимларнинг меҳнатга лаёқатсизлик варақалари (блютеньлар) далолатномасини опкиришди. Меҳнатга лаёқатсизлик варақаларини Соғлиқни сақлаш вазирлиги сайтидан оляпмиз, варақа QR коди билан.

Лекин жуда ғалати диагнозлар бор, мисол учун: "Аниқланмаган буйрак, сийдик йўли касаллиги". "Аниқланмаган ўткир бронхит касаллиги" ва ҳоказо. "Аниқланмаган" сўзи деярли 70 фоиз ташхисларда бор.

Варақалардаги ташҳислар баъзилари ўзбекча, баъзилари русчада ёзилган. Рус тилида ташҳис ёзилган ҳужжатнинг боши ва охири ўзбекча. Фақат ташхис жойи русча. Хатолар ҳам кўп.

Нега аниқ ташхис йўқ? Менимча карантинда ўқиган дўхтир талабалар тамомлаб, ишга жойлашди шекилли))).

​​#Ўқиб_кўринг.

Жигули пробеги.

Озода Нурсаидованинг "Лада" қўшиғи ва унга ишланган клипини кўрдим. Қуйида ўз фикрларимни айтиб ўтмоқчиман.
90-йиллар бошида рахматли Мухаммадкарим Соиповнинг "Вой аламжон" қўшиғи трендга чиққан. Изидан яна бир рахматли санъаткор Мухриддин Холиқов "Узатамиз" қўшиғини яратди. Иккаласининг ғоявий мазмуни, мантиғи бир ҳил. Лекин қўшиқларда дард такрор бўй чўзган бўлса ҳам, оҳанги, мунги ва ижроси алоҳида алоҳида олқиш олган. Хатто жозибали клип ишланмаган бўлса ҳам.

Лекин "Кўк жигули" ва бугун премьера бўлган "Лада" қўшиқлари тўғрисида бундай фикрни айтолмайман. Нега?

Клипдаги носталгия либос ва даврга хос предметларни ҳисобга олмаса мазмун янги рухий кайфият бермайди. Иккала қўшиқнинг видеорелизи бир ҳил. Клип маркетинг инструменти, яъни просмотр сони учун ясалган.

Олдинги қўшиқдаги логлайн (мантиқий йўл) нинг бошқа костюмдаги иккинчи идентификацияси бўлиб қолган, чунки синопсис (қисқа ҳикоя) бир ҳил. Вақтинчалик завқ беради, лекин рухан тез зерикасиз. Махсус эффект анимациядан кўра костюмерияга устунлик берилган.

Мазмундаги дарднинг имиджи тушиб кетган, жигулига ўралашиб қолган. Хотираларни ёритишда "жигули" дан бошқа архетип танланиши яхши бўларди.
Клип сюжетини қуришдаги моҳирлик учун, сценарий ёзувчи кучли бўлиши керак. Кучли ёзилган сценарий аввал куйланган қўшиққа бошқа креатив тасвир ярата олади. Кларк Рой Питернинг "50 приёмов письма" асари шу ўринда ҳар қандай асар ёзадиган муаллиф учун дастур бўла олади.

Умуман олганда бу қўшиқ айнан битта дарднинг мазмунида бошқа бошқа жозиба ва муҳаббат уйғота олган "Карвон кўрдим" ҳамда "Сарбон" қўшиқларидай маҳобатли ва умри узун бўла олмайди, чунки тижорат ниятида (просмотр учун) қилинган. Кўнгилнинг эски дарди қўзиганда вақтинча қўл келадиган вирусли видеотерапия холос.

Мен санъат иҳлосманди сифатида ўз фикрларимни ёздим холос. Чиройли қўшиқ яратиш камёб ходиса бўлган бу замонда шунча меҳнат қилингани қадрли. Овоз, ижро, дид томонидан ҳам иқтидорли бўлган, шкнингдек молиявий имконияти катта бўлган Озода Нурсаидовадай санъаткорнинг ҳар қандай ижод маҳсули бетакрор бўлишини истайман.

​​Танганинг иккинчи томони.

Баъзан кўринасан, баъзида мавҳум
Кимгадир виждон, кимгадир халқум
Кимларга тириксан ва кимга марҳум
Танганинг иккинчи томони

Бир томонда ғийбат, фитнаю фасод
Асил ҳақиқатнинг қисмати касод
Кимни асир қилар, бошқани озод
Танганинг иккинчи томони

Кимнинг зўри бор, кимларнинг зари
Кимлар ёш кўринар, кимлардир қари
Баъзан сафсатанома, ё ҳақ дафтари
Танганинг иккинчи томони

Нариги томонингда ўртанар бағир
Кимнинг чини сарсон, иймони сағир
Бир йўла кўринсанг не бўлар ахир
Танганинг иккинчи томони

Ўткинчи фонийда уруш, жанг тинмас
Эгилар, букилар, ҳақиқат синмас
Кўрин, майли, билинар билинмас
"Танганинг иккинчи томони"

Икки қирғоқда ҳам битта сув оққан
Оға-инини кетма-кет бир она туққан
Оғага ёқмагани гоҳ инига ёққан
Танганинг иккинчи томони

Холислик истайди бу сарсон уммат
Ёлғоннинг сандиғи бугун "серҳиммат"
Шунда сен Зумрадсан ва гоҳо Қиммат
Танганинг иккинчи томони

Бахриддин Асрор, 2024 йил, 21-сентябрь

Бир маза қилиб эшитинглар. Ҳаммаси «Б» бошланади 😅

Ома талант экан))

👉 @PRIKOL_LAVHALAR

​​#Онамдан_хотиралар

Онам билан ҳазиллар.

Ҳар қишда онамни опкелардим. Ўзлариям сал совуқ тушса "дўмга кетаман, дириктир чақиради, эртами индин" деб тараддудни бошлардилар. Келсалар уйимизга нур ёғилади. Тартиб ўрнатилади. Ҳамма бир вақтда овқатланади. Ҳамма келиб ҳисобот беради, бермаса сўраволадилар. Қишлоқни сузмаси, ошқовоғу хурмоси, тандир нонлари келади. Овқатда қуритилган райхонни сезасиз. Эрталаб ўрик қоқи солинган сув ичасиз. Кечаси Қуръонни овозини эшитасиз. Онам кечаси ухламасидилар одатда. Тахажжуд ўқирдилар, баҳоргача 2-3 бор хадму қуръон қилардилар.
Иш оғир вақтлар кеч келаман, кўзойнак тақволиб Қуръон ўқиб ўтирган бўладилар. Лекин қалин кўрпачада ётолмасидилар, бир қават кўрпачада ётардилар, "қалин қилма белим оғрийди, исиб кетаман" дердилар.
- Ташқаридан биров келса онасини хўрлаб бир қават кўрпачага ўтказибди, деб сизга ачинади, манга нафрат билан қарайди,-десам
- Эшик таққиласа кўрпача қалин томонга ўтволаман, -дердилар. Ростанам ташқаридан биров келса дарров Қуръон китобларини кўтариб кўрпача қалин томонга ўтволардилар)).
Кўп ҳазиллашиб қийнардим. Кечки овқатга бирор жойга олиб боришга келишсак, аёлимга:
- Онамларни салонга опчиқ, сочларини химка қилиб бўят, прическа қилдиргин,-дердим, жиддий)).
- Унақа бўлса бормайман, ман рўмолдаману, ҳеч ким сочимни кўрмайди,-дердилар. Бир гал аёлим иккаламиз оёқларига қишки махси калиш опкелдик. Доим махси калишда юрардилар. Ўша куни арзонроқ учраб қолиб аёлим каблукли туфли олди. Ўша туфлини онамга сизга олдим, киясиз деб қийнадим)). Ишдан кеч келсам:
- Дириктир санга давлат ҳайкал қўядими,-дердилар
- Бугун эшитиб қолдим, қўяркан ҳайкал. Лекин жа шаҳар марказигамасу, шу Чилонзор атрофига қўярмиш, ҳокимлар ер қидириб юрибдикан,-дедим)).
- Ундан кўра 4-5 сотих ер берсин ўша ҳокимлар, уй солардинг-дедилар.
Ҳовли олганимда "ер берди Сергелидан"-деб онамларга расмини ташладим. Ла илаҳа моликул ҳаққул мубийн деб дуо қилдилар. "Уй 🏠олганингни кўрарканман" деб дуо қилдилар. Ҳовлига кўчганимиздаям келдилар. Райхон, қалампир, помидор, бодринг экдик. Шашлик қилиб бер дедилар. Бирга шашлик қилдик.
- Дириктир қизиқчи, зериктирмайди,-дердилар.
Ҳозир ҳам тирикдай ҳис қиламан. Аёлим қуръон ўқийди, онамнинг овозлари эшитилади. Райхон иси келади.

Бахриддин Зайниддинов

Ажойиб!

«Мен ўғлимга айтдим "Мен қайси қизни олиб берсам ўшанга уйланасан" десам у йўқ деди, "У Билл Гейтсни қизи" десам хоп деди.

Мен Билл Гейтсга қўнғироқ қилиб "қизингни ўғлимга бер" десам у йўқ деди, "У Жаҳон банкининг дастурчиси" десам хоп деди.

Мен Жаҳон банкининг бошлиғига "Ўғлимни жаҳон банкига дастурчи қилиб ишга олгин" десам у йўқ деди, "У Билл Гейтсни куёви" десам хоп деди».

Катта бизнеслар ана шундай олиб борилади.

Сергей Мавроди

Инсон бўлайлик.

-Дўстимммм!-деб гандираклаб келиб сўрашди. Қучоқлашиб кўришдим. Ароқ юқи оғзини елкамга артгандай бўлди. Ичмагин дегандим. Энди уят бўлади, қуда андалисан дедим. Бараканг кетади дедим. Барибир косам оқармайди деб йиғлади. Ароқ обер деди, йўқ дедим. Елкамга уриб, ким бўлсангам ҳаётда инсон бўл деди. Хўп дедим. Каъбани ерига теккан пешонангдан деб, пешонамдан чўлпиллатиб ўпди. Манам бораман кўрасан, деди. Илойим, етказсин дедим. Мана ман деган қори акалар билан бораман, кўрасан деди. Иншаоллох, етказсин тезроқ дедим. Кейин мени хожи ака дейсан, илгарилари ичганимни гапирмайсан деди. Асло дедим. Лекин ичиб турганлар билан ичмасам ҳам улар билан ўтиравераман, ҳалол улфат бўламан деди. Ярим ялонғоч ўйнайдиган хотинларни томоша қилмайман тилпонда, гуноҳ бўлади деди. Тўғри дедим. Сени дуо қиламан деди. Хўп дедим. Биттага эри энди деди. Йўқ дедим. Дуо қилмайман деди. Майли дедим. Кимлигинг капейка, инсон бўлгин деди. Хўп дедим. Ман доим шу ерда ўнлайинман, келганингда қидирсанг шетттан топасан деди. Чайқалиб дўкон пешонасидаги 24/7 ёзувни кўрсатди, тушундингми деди. Ҳа дедим. Маладес деди. Дўконда "Қарашларга" қўшиғи янгради. Ўчир қоровул келади ҳозир деб бақирди, чайқалиб.
Ўғли келди. Матизга ўтқизди амаллаб. Матизга ўтириб яна бир марта манга қараб инсон бўл деди. Қўлим кўксимда хўп деб кузатиб қолдим.

Ғурур. (Бўлган воқеа).

Бундан бир неча йил аввал кечаси қишлоқда ер қимирлади, тахминан 4-5 балл атрофида. Уйлар қарсиллаб тебранган, лекин эски молхона, бостирмаларни ҳисобга олмаса талофат бўлмаган.
Норбой ака (исми ўзгартирилган) хотини билан уйқудан уйғониб, калимани айтиб ҳовлига чиқишган. Кейин кириб ётишган.
- Синчли уй яхшида, тўсинларам, устунларам бақувват, Аллох асради,-деган хотини билан ётган Норбой ака. Хотини ҳам:
- Ҳа, роса бақувват уйимиз. Тўсинларам, устунларам зич терилган. Отам берган тўсинлар российский ёғоч эди,-деган
- Отанг барака топсин, лекин етмай қолганига 2 та тўсинлик берган холос. Қолган 19 та тўсин кесилган тераклардан қилинган, -деган Норбой ота.
- Иккита бўлсаям берганми, шу билан уйимиз битган. Агар дадам тўсин бермаганда ҳозир ола қўйилган бўлиб, устимизга ағанар эди,-дебди хотини.

Хуллас, шифтга қараб гаплашиб ётган эру хотиннинг тўсин можароси жанжалга айланган.

Охир оқибат Норбой ота кечаси 3 да трактор опкелиб, тўсинга қозиқни эгиб илгак қилиб қоқтириб торттириб чиқарган. Чиққан тўсинни юклатиб тўғри обориб қайнотасиникига ташлаган. Уй умуман талофат кўрмаган. Тўсинни тортганда кўчган деворларни қайта суваб, эрталабгача оқлаб қўйган.

​​#Якшанба_ханда.

Барибир боғча пайтим зўриди, бой эдим. Боғчада ўзим кубиклардан қурган уйим ҳам, машинам ҳам, хотиним ҳам бориди. Хатто нариги паралел группада ҳам яна битта хотиним бориди))). Уришиб қолсамам яна "келин-куёв" ўйнаб бошқа оволаверардим, ҳеч ким ғиринг демасиди 😀 Хотиним иккаламизга обедда служанка овқат берарди)))