قصيدة في ولادة النبي الأكرم صلى الله عليه وآله وسلم .
ـــــــــــــــــــــــــــــــــــــــــــــــــــــــــــــــ

نورَه مِن سِطَع نورَه مِن سِطَع

هَلّ البِشِر عَلينا

نورَه مِن سِطَع نورَه مِن سِطَع

كِلّ الهَلا بنَبينا

ـــــــــــــــــــــــــــــــــــــــــــــــــــــــــــــــ

طَير السّعَد إجانَه
وِيرَدّد بعِبارة

يَهلِ الارُض جميعاً
عِندي لَكُم بِشارة

كِلمَن دِليلَه ظامي
ومَحّد يِطَفّي نارَه

نورِ النبي محمد
عالدّنيا شَع نَهارَه

سَيد البَشَر سَيد البَشَر

بجَيتَه الأمَل يِجِينا

نورَه مِن سِطَع نورَه مِن سِطَع

كِلّ الهَلا بنَبينا

ـــــــــــــــــــــــــــــــــــــــــــــــــــــــــــــــ

طَر فَجرَه عالخلائق
نورِ النبي إجانَه

وتزَيّنَت أرُضنه
وزَخّت فَرَح سِمانَه

بمَولِد نَبينَه أحمد
خَل تِفرَح الحَزَانه

طِيبة وصِدِق صِفاتَه
ومِن شِيمِتَه الأمانة

طاهِر النّسَب طاهِر النّسَب

وَصَاحِبِ السكينة

نورَه مِن سِطَع نورَه مِن سِطَع

كِلّ الهَلا بنَبِينا

ـــــــــــــــــــــــــــــــــــــــــــــــــــــــــــــــ

صَرحِ الشّرِك تِهَدّم
وبيَمنِته يِزيلَه

وغَيم الكِدَر تِلاشَى
مِن بَسمِته الجميلة

وطَير السّعَد تِغَنّى
وبرَوضِته الخميلة

وحَتّى الصّخَر تِصَدّع
يَم حَضرِته الجَليلة

خاتَم الرّسُل خاتَم الرّسُل

وقائد السفينة

نورَه مِن سِطَع نورَه مِن سِطَع

كِلّ الهَلا بنَبينا

ـــــــــــــــــــــــــــــــــــــــــــــــــــــــــــــــ

بارِينه كِل رَحِمتَه
وكِل مَنقبة كريمة

خَلّاهه في حَبيبَه
بأخلاقهِ العظيمة

مِتكامِل بصِفاتَه
وبفِطرِتَه السلِيمَة

بي تِهتدي البَريّة
وبنظرِتَه الحكيمة

لشوفِتَه الگلُب لشوفِتَه الگلُب

يتلاهَب بحَنينَا

نورَه مِن سِطَع نورَه مِن سِطَع

كِلّ الهَلا بنَبينا

ـــــــــــــــــــــــــــــــــــــــــــــــــــــــــــــــ

أبعَث إلَك سَلامِي
يا سَيّد البَرايَا

أشواقي ومنياتي
وَي خالِص التحايَا

أعلِن إلَك وَلائي
يا طَيب المَزايَا

بيك أرجو مِن إلهي
يِغفرلي هالخطايا

يا بو فاطمة يا بو فاطمة

فَضلَك فلا نِسينا

نورَه مِن سِطَع نورَه مِن سِطَع

كِلّ الهَلا بنَبينا

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في ولادة النبي الأكرم صلّى الله عليه وآله وسلّم . مُلَمّع
ـــــــــــــــــــــــــــــــــــــــــــــــــــــــــــــــ



حَبيبي يا مُحمد يا مُحمد
حَياتِي يا مُحمد يا مُحمد
ـــــــــــــــــــــــــــــــــــــــــــــــــــــــــــــــ

على الأغصانِ طَيرُ الحُبّ غَرّد
وهاجَ الشوقُ في قلبي وَوَرّد

وغَيثُ اللهِ قَد نَزَلَ ٱحتفاءً
بمَولِدِ سَيّدِ الثّقَلَينِ أحمد

عَليمَن تِسأل وتِنطُر جَوابي
تِخِبرَك هالسهول وهَالهِضابِ
بِزَغ فَجرَه وگِشَع كِلّ الضبابِ

وفَرَح هالكون في ميلادِ أحمد
حبيبي يـــــا محمد يـــا محمد

ـــــــــــــــــــــــــــــــــــــــــــــــــــــــــــــــ

وأوصالي وما يَسري بجِسمِي
وأنفاســــي تُنادي يا مُسَدّد

رســـــولٌ طاهِـــــرٌ بَرٌّ نَقِـــــيٌّ
لَكَ الأعداءُ قَبلَ الصّحبِ تَشهَد

رسـول وأكرَمَك رَبّ البَرِيّة
حَبيبه وخَصّك بهاي المَزِيّة
أمين وصـادق ورَادَك نَبِيّه

ولا يوصَل مكانَك طه أحّد
حبيبي يــا محمد يا محمد

ـــــــــــــــــــــــــــــــــــــــــــــــــــــــــــــــ

بُعِثتَ إلى البَرِيّةِ فٱستنارَت
وكانَ نهارُها بالشّركِ أسـوَد

بُعِثتَ تُتَمّمَ الأخلاقَ فِينا
ومِن أنوارِكَ الدُّرّيُّ يُوقَد

إلهي الأرسَــلَك للناسِ هادي
وجَعَل حُبّك خلاص لهَالعِبادِ
الشّرِك هَدّمتَه ورموز الفسادِ

وجَعلتِ البَرّ والفاجِر يِوَحّـد
حبيبي يــــا محمد يا محمد

ـــــــــــــــــــــــــــــــــــــــــــــــــــــــــــــــ

ولَم تَقبَل سِوَى الإسلامِ دِيناً
وتَأبَـــى أنّ غَــيرَ اللهِ يُعبَد

رَسولَ اللهِ يا أمَلَ البَــــرايا
أهذا طِيبُ ثَغرِكَ أم زَبَرجَد ؟

رسولَ الله ونِعِم مِنّك يَطَه
وَصِيّك حَيدرالجَنّة ٱشتَراهَه
سَلامي لفاطمة الكوثر وَباهَه

وعلى العِترة الشريفة المِنهه تِمتَد
حبيبي يـــــــا محمد يــــــا محمد

ـــــــــــــــــــــــــــــــــــــــــــــــــــــــــــــــ

سَيَبقى فيكَ مَدحِي وٱعتقادي
فَمَدحُكَ مِنهُ مَدحُ الحَقّ يُولَد

بِكَ الرّحمنُ قَد بَاهَى وصَلّى
عَليكَ وقَلبُك المِعطاءُ مَعبَد

هُوَيتَك مِن قَبِل ما نُطفة أصبَح
حِزَنـــتِلكُم يَـطَه وإلكُم أفرَح
يفوز اللي مِشَى بنَهجَك ويَربَح

أنا بوَصلَك جَمُر دَلّالي يُبـرَد
حبيـــــبي يا محمد يا مـــحمد

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في مولد الرسول الأكرم صلّى الله عليه وآله وسلّم .
ـــــــــــــــــــــــــــــــــــــــــــــــــــــــــــــــ


نور و جـمال
حُب ووصال
كِل هَمنه زال
بِولايِته

أجمل كلام
يِحمِل غَرام
لخَيرِ الأنام
بِولادِته

ـــــــــــــــــــــــــــــــــــــــــــــــــــــــــــــــ

لحظة فَرَح هَالليلة جِمعَــتنه
نِنسى الحِزِن والبهجة غُمرَتنه
يِحـلَى السهر والليـــلة لِيلتنه
بأجمل شِعِر تَرجمــنه فَرحتـنه

نِشعِل ضِــلوع
ٱبدال الشموع

بلَهفة صُدور
نِنـثُر زُهـــور
فاحَت عُطور
بِمحَبتَه

ـــــــــــــــــــــــــــــــــــــــــــــــــــــــــــــــ

اليوم الشمس لاحَظنه غَيرَتهه
نُور الرسول الهــادي باغَتــــهه
مِن هالجَــمال شاهَدنه حَيرَتهه
وبكِل سُرور ألقَــت قصــيدَتهه

أهلاً تِگـول
يابو البتول

نُورِ الحَـــبيب
ساطِع عَجيب
لازم أغيـــــب
في حَضرِتَه

ـــــــــــــــــــــــــــــــــــــــــــــــــــــــــــــــ

شافَه الگمر مِن لَهفِته ٱتعَنّه
يِنضَح خَجَل لو يِقتِرِب مِنّه
يِلمَع ذَهَب مِن يِبتِسِم سِنّه
ويِصبَح يَتِــيم اليِبتِعِد عَنّه

آية جَمال
مَنبَع دلال

كوكــب نَقاء
مَصدَر صفاء
شَعّ الضــياء
مِن وَجنِتَه

ـــــــــــــــــــــــــــــــــــــــــــــــــــــــــــــــ

بالمُصطفى تِتكامَل الأوصَاف
وبالمَرجلة لِيث وأبد مَيخـاف
يالسِيرِتَه سِيرَة عَدِل وِنصاف
يالعِشــرِتَه جَنّة وفَــلا تِنعاف

بَرّ وكــريم
فَذّ ورَحيم

صادق أمين
ثابــت يقين
واضح مُبين
في كِلمتَه

ـــــــــــــــــــــــــــــــــــــــــــــــــــــــــــــــ

مِن ضِحكته تِتـولّد الأنوار
مِن بين إديه تِتفَجّر الأنهار
بَعذَب لَحِن غَنّت إلَه الأطيار
وِلكِل نَبي خازن عِلِم وَسرار

يِعلَه الهِتاف
بالإعـــتراف

بفَضلَه ونَـدَاه
بعَطفَه وهُدَاه
كِل حُر فِــدَاه
وِبخِدمِتَه

ـــــــــــــــــــــــــــــــــــــــــــــــــــــــــــــــ

يا سيدي يا حُــجّة المَعــبود
نِبعَث إلَك في مَولِد المَحمــود
أجمل شِعِر يِحمِل عِطِر وورود
وبطَلعِتَك يُبقى الأمل مَوجود

طُولِ الزمَن
يَبنِ الحَسَن

نِكتب سُطور
بعِطر الزهـور
لحظة سُـرور
لكِل شِيعِتَه

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في مولد الإمام الصادق عليه السلام  .
ـــــــــــــــــــــــــــــــــــــــــــــــــــــــــــــــ
**

هالليلة كِل هَمنه ٱنجلَِه والبَهجة غُمرَتنه
ونِزلَت ملائكة السّما ٱتشــاركنَه فَرحتنَه

تِحمِل وَرِد واليَاس    في مولد الصادق
فَرحانَة هاي الناس    في مولد الصادق

ـــــــــــــــــــــــــــــــــــــــــــــــــــــــــــــــ

طَير السّعَد  فَرحان
وِيخاطب الأغصان
وبأعــذَب الألحــان
أحمِل إلِچ  أخـبار

عالدنيا أشــــرق نور
ليلة  فَرَح  وِســــرور
بساق العَرِش محفور
إسمه بحِبِر أنوار

ساحِر جَمالَه الكون
بحُبّه الگلب مفتون
وبمَولِده  المَــيمون
تِتناثَر الأزهار

هذا الخبر أجمل خبر يِمكِن تِسمعينَه
طَبعاً شُعورِچ  يخـتلف لَمّن تِشوفينه

يِتشابَك  الإحساس  في مولد الصادق
فرحانة هاي الناس   في مولد الصادق

ـــــــــــــــــــــــــــــــــــــــــــــــــــــــــــــــ

جَدّه  النّبي  المختار
بوَصفه العَقِل مِحتار
وَجهَه  اليِـشِع  أنوار
سُبحانَه  مَن  سَوّاه

سادس وَتَد معصوم
بخَدّه الورد مَرسـوم
بحُبّه  الوَجِد مَهيوم
ولكِل جَرِح  سَلواه

مَنبَع  تُقَى  وإيمان
وللطِيبة  والعِرفان
أقوالَه كالمَـــرجان
لِليفتِهِم  فَحواه

حَتى الفَلَك مِن فَرحـــتَه مِبتَهجَه أبراجَه
باب الحَوائج ما يِخِيب اليِگصِدَه بحاجة

للأمة رَفعـــة رَاس    في مولد الصادق
فَرحانَة هاي الناس    في مولد الصادق

ـــــــــــــــــــــــــــــــــــــــــــــــــــــــــــــــ

ضنوة علي الكرّار
عِندَه  العِلِم أسرار
مِن  عادِتَه  الإيثار
تِتناقَلَه  الأجيال

إبن  النبي  ومَـعروف
حَولَه الشهامة ٱطّوف
دَمعِ  الفَــرَح  مَذروف
فوگ المحاجِر سَال

كِل  التحايا  اليوم
للصادق المعــصوم
لو شافه أي مهموم
كِل هَمّه رَاح وزال

كِلّ  البلابِل غَرّدت  فرحــانة  مَسرورَة
تِلبَس بَراقعهه الشمس لو عايِنَت نورَه

چَنّه  الگُمَر عَبــاس     في مولد الصادق
فَرحانَة هاي الناس     في مولد الصادق

ـــــــــــــــــــــــــــــــــــــــــــــــــــــــــــــــ

وبمَولِده  الميمون
كِل شِيعته ٱيهنّون
مَهدينا  وِينشدون
يَمتى الفَرَج مَولاي

يا حُجّة المعبود
يا أيها الــموعود
والإشتياق ايزود
صَحرَا وتِريد المَاي

بِينه الگلب مَجروح
رَافگنه  بَـس  النوح
يَمتى بلُواك ٱنــروح
لِلصّادق الوَفّاي

ونِبني الضّريح وبالفَرَح جَمرَتنه لَهّابَه
ونِقرَه الزيارة الناحية والنُّدبة يَم بَابَه

عِتبَة  ذَهَب  تِنباس     في مولد الصادق
فَرحانَة هاي الناس      في مولد الصادق

ـــــــــــــــــــــــــــــــــــــــــــــــــــــــــــــــ

يا صادق الأقوال
والسيرة والأفعال
مِن أفضل الأعمال
نِفرَحلَك ٱحنه اليوم

وبفَرحة المِيلاد
تِتوافَد  الأمجاد
كِلمَن يِريد ٱمراد
مِن خالِقه القَيّوم

مِنّ  الفَــــرح آيات
تِنقِلهه إلَك نَسـمات
مَشحونة بالبَسمات
مِن عاشِگ ومَحروم

نِبعَث تهاني بمَولِدِك  لِلمَهدي هالليلة
وِنگِلّه  طالت غَيبتَك  يَمعَدّل  المَيلَة

تِتلاهَب الأنـــفاس      في مولد الصادق
فَرحانَة هاي الناس     في مولد الصادق

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في ولادة الإمام الصادق عليه السلام  . 
ـــــــــــــــــــــــــــــــــــــــــــــــــــــــــــــــ



هالليلة  ميلادك  يبن هادينه
يا سيدي ودَمعِ  الفَرَح هَلّينه 
ظامي الگلب لزيارِتك حَنّينَه 
ـــــــــــــــــــــــــــــــــــــــــــــــــــــــــــــــ

إلَك أبعث تَهانِي 
وتَحيات وأماني 
يَبن هادينه طَه 

يَبــن باقر عُلــــــومَه
الفَلَك فُرحَت نُجومَه
الخَبَر لَمّن إجاهَه

صَلّت على الهادي النبي وصَلّينه 
يا  سيدي  ودَمعِ  الفَرَح  هَلّيـــنه 
ظامـــي  الگلب  لزيارِتك  حَنّينَه 

ـــــــــــــــــــــــــــــــــــــــــــــــــــــــــــــــ

إجَه الخير بحُضورَك 
گُمَر ساحِـــرنه  نورَك
شَسولِف عَن جَمالَك

الوَرِد خَدّك  يِعُرفَه 
المُوالِي بگلبه لَهفَة
ودَمِع عَينَه الدّلالَة

والشوگ شَمعة وتِحتِرگ بِونِينَه 
يا  سيدي  ودَمعِ  الفَرَح  هَلّــينه  
ظامي  الگلب  لزيارِتك  حَنّــينَه 

ـــــــــــــــــــــــــــــــــــــــــــــــــــــــــــــــ

يَنبراس  الشهامة 
يَعِنوان  الكــرامة
يَمَحبوبي وإمامي 

الجَرِح  إنتَه وطَبيبَه
الگلُب  يِســعَر لَهِيبَه
بجَمُر حُبّي وغَرامِي 

طَال الهَجُر يا لصادق ومَلّينَه 
يا سَيدي  ودَمعِ  الفَرح هَلّينه 
ظامي الگلُب لزيارِتك حَنّينَه 

ـــــــــــــــــــــــــــــــــــــــــــــــــــــــــــــــ

يَمَن قَولَك سَبائك 
نِزَل فَوجِ المَلائك
يِرَدّد هالعِبارَة 

هَلَا  بإبنِ  الزچــــيّة 
بِزَغ عـــــالدّنيا ضَيّه
إهتِدَت بِيك الحَيارَى 

يَالساكِن بروح المُوالِي وعَينَه
يا سيدي  ودَمعِ  الفَرح  هَلّينه 
ظامي الگلب لزيارِتك  حَنّـينَه 

ـــــــــــــــــــــــــــــــــــــــــــــــــــــــــــــــ

إلَك تِحله القيادة 
نِهَنّي بهَالـــولادة 
جَميعِ الجَعـفرِيّة 

ونِهَنّي الحُجّة كِلنَه
أبو صـــالح  أمَــلنه 
بقَصــــائِدنه البَهِيّة 

دَربَك يَبو الكاظم نِظَل ماشِينَه
يا سيدي  ودَمعِ  الفَرح  هَلّيــنه 
ظامي الگلب لزيارِتك  حَنّـــينَه 

ـــــــــــــــــــــــــــــــــــــــــــــــــــــــــــــــ

يَمِنهاج العَــــدالة 
إلَك رَبّ الجــلالة
جَعَل عِزّة ومَهابة 

لأن قُــــرآنه إنتَــه 
وعِلِم جَدّك خِزَنتَـه
وذِكَر فضلَك كِتابه 

وحَتّى الكواكب بالسما اتهَنّينَه 
يا سيـــدي  ودَمعِ  الفَرح هَلّينه 
ظامي الگــــلب لزيارِتك حَنّينَه 

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي 

أبو ذيّات ، في شهادة الزهراء ،،،
ـــــــــــــــــــــــــــــــــــــــــــــــــــــــــــــــ

أفَزعَك گوم لِبنَيتَك تَرَاهَه
يَطَه ٱمجَبّلَة الجِبلَة تَرَاهَه
الحِزِن عَالكون بچَفوفَه تَراهَه
ويِنوح حسين لِمصابِ الزّچية

ـــــــــــــــــــــــــــــــــــــــــــــــــــــــــــــــ

حَزينة وباتَت الليلة بَلَمهَه
يِتيمَة وتِكسِر الخاطِر بَلا ٱمهَه
صَبورَه ٱستارِثَت زينب بَلَه ٱمهَه
ويِتانِيها القَهَر بالغاضريّة

ـــــــــــــــــــــــــــــــــــــــــــــــــــــــــــــــ

غِيابِچ يَم حَسَن هَدنِي وَشَلّيت
وحِمَلت ٱهموم ما تِنعَد وَشَلّيت
الدّمع بالعَين خَلّصتَه وَشَلّيت
وظَل أنعاچ كِل صُبحِ ومِسيّة

ـــــــــــــــــــــــــــــــــــــــــــــــــــــــــــــــ

عَلَيّة ٱشلون يا زَهرَاء مَرهَم
وجودِچ چان لِلمَجروح مَرهَم
هِجَرتِيني وأنَا بليّاچ مَرهَم
أوِنّ ٱعليچ وَي زينب سُويّة

ـــــــــــــــــــــــــــــــــــــــــــــــــــــــــــــــ

غِدَت ظَلمة وتِنوح ٱعليچ داراچ
سَفينة إنتي ورِياح الجور داراچ
لَحَگتِي ٱبساع مَنْ بالعَين داراچ
أبوچ الچان سَيّد للبَرِيّة

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في شهادة الزهراء عليها السلام ، لسان حال السيدة زينب عليها السلام …..
ـــــــــــــــــــــــــــــــــــــــــــــــــــــــــــــــ


أصُب عَبرات لِمصابِچ أصُب عَبرات
أجُر حَسرات بغيابِچ أجُر حَسرات

غُصَص وهموم
هِجَرني النوم

ـــــــــــــــــــــــــــــــــــــــــــــــــــــــــــــــ


لَهَسّا چَن أسِمعِچ مِن تِناديني
أجيچ بلَهفِتي الما فارِگت عَينِي
بحَنانِچ يَا بعد روحي تِشُبگيني
وإذا شِفتِيني مهمومة تِسَلّيني

خَيالِچ عاش بَحلامي خَيالِچ عاش
يِظل گلبي إلِچ ظامي خَيالِچ عاش

بحِزِن مختوم
هِجَرني النوم

ـــــــــــــــــــــــــــــــــــــــــــــــــــــــــــــــ

أبونَه مِن يِشوفِچ تِنجِلِي ٱهمومَه
وتِبَيّن چانت البَسمة على ٱرسومَه
وِذا شافِچ حَزينة ٱظلَم صُبَح يومَه
برِضاچ الباري يِرضه وهاية مَفهومة

ولا عالبال هالبَلوَة ولا عالبال
يَمَن چنتي لعَلِي سَلوى ولا عالبال

ويِظل مكظوم
هِجَرني النوم

ـــــــــــــــــــــــــــــــــــــــــــــــــــــــــــــــ

بَعَدني ٱزغيرَة يا يُمّه على الفَرگة
تروحين وأظَل كِل ساعة لي شَهگة
بعد وين آنه مثلِچ يُمّه راح ألگه
بوجودچ روحي ظَلّت يُمّه مِتعَلگة

أوِن وَنّاتِ وَتحَسّر أوِن ونّات
الگلب مَلهوف وِمحَيّر أوِن ونّات

بدَمع مَسجوم
هِجَرني النوم

ـــــــــــــــــــــــــــــــــــــــــــــــــــــــــــــــ

تِظل عُگبچ يَيُمّة ٱجروحي مَلچومة
وسَواتِر جَفنِي مِنّ ٱدموعي مَهدومة
شيِصير بحالةِ المِنْ أُمهه مَحرومة
العُمُر تِگضِي يِتيمة وتُبقى مَهضومة

عِشتِ أيام يالزهرة عِشت أيام
بدِليلي النار مِستعرَة عِشتِ أيام

الگلب مَالوم
هِجَرني النوم

ـــــــــــــــــــــــــــــــــــــــــــــــــــــــــــــــ

يَيُمّه الدنيا عگبچ أوجَرَت بِينه
يِتامَى يالزّچيّة ٱهنانة عِفتِينه
أكِيداً إنتي يومِ المِحنة شِفتِينه
ٱنسَحَگ إبنِچ يَيُمّه وگِطعَوا ٱوتِينه

گِصَت دنياي يوم الطّف گِصَت دنياي
ٱنگطَع عباس مِنّه الچّف گِصَت دنياي

وگع مظلوم
هِجَرني النوم

ـــــــــــــــــــــــــــــــــــــــــــــــــــــــــــــــ

يَيُمّه وبالطفوف ٱفتَرّتِ الدنية
على الهِزّل أروحَن تالي مَسبِيّة
أطُب سوگ النواصِب وانه عِلويّة
مِثِل نَخلة الأيادي ٱتشامِر ٱعلَيّة

بخَرابة ٱنبات يا يُمّه بخَرابة ٱنبات
حَرَم وَطفال مِلتَمّة بخَرابة ٱنبات

بهذاك اليوم
هِجَرني النوم

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي .

قصيدة في شهادة الزهراء عليها السلام  ،،  لسان حال أمير المؤمنين عليه السلام  ….. 
ـــــــــــــــــــــــــــــــــــــــــــــــــــــــــــــــ


صَـعبة صَــعبة يا لَيل      
بجَيّتَك دَمعي ٱيسيل
بِيّة ما ظَل كِل حَـيل      
الزّهرة عافَتني

عَذّباني الفـــــراگ
إلهَه گلبي مِشتاگ
تَايِه وحِلمِي ٱنباگ
بحِيرَة خَلّتني

ـــــــــــــــــــــــــــــــــــــــــــــــــــــــــــــــ
ـــــــــــــــــــــــــــــــــــــــــــــــــــــــــــــــ

هَاي  ٱوّل  مَغـــرِبيّة
دَاري وَحشَة وخِلِيّة
ٱمن أمّ حسين 

شِغلَت حَيّز رِضاتي 
ما أوَفّي كِل حياتِي
إِلهَه  الدّين 

مِن  رَبّي  هِيّه  نِعمَة
نِزلَت  عَــلَيّة  رَحمة 
وِبكِل حِين

چـــــــانَت  أمّ  لمُحَمّد
وبَضعِتَه والدنيا تِشهَد
ونورِ العَين 

لَو شِفِـــتهَه أرتاح
وباللّيالي مِصباح    
وِلدِليــلِي سِبّــاح
بحُبها غُمرَتنِي

وَاحَة مِنّ الإحساس
ما أصَـــدّگ  يا ناس
فاطمة بلايَه ٱنفاس
بلَحظة تِركَتنِي

ـــــــــــــــــــــــــــــــــــــــــــــــــــــــــــــــ

مَحّد يِعرُف قَدُرهه
حَــــارِ الفِكِر بَمُرهه
والألباب

رَبّ العَرِش جَعَلهَه
حُجّة علَلدنيا كِلهَه
وبالأسباب

جَنّة  عَدَن  بَهِيّة
وآية طهارة هِيّه 
في الأصلاب

مِن ٱسمعَت إجوها
لاذَت مِن خاطِبوها
خَلفِ الباب

مَوقف وما أنــساه
وأبقى عايش ويّاه
بالدّمــــوع وبـالآه
الذكرى أذَّتنِي 

مِن رُفَس بابِ الدار
مَعَ سَـــبقِ الإصــرار
مِن جَرَحهَه  البِسمار
بِسمِي  نادَتنِي 

ـــــــــــــــــــــــــــــــــــــــــــــــــــــــــــــــ

أسمَع ضِلِع تِكسّر
يالمُرتضى يَحَيدر
صاحَت صَوت

نَبضِي سِكَت أحِـسّه
لو سِيفِي بَس ألِمسَه
صَارَت مَوت

مِتوَضّحَة القَضِيّة
مِتقَــــيّد بوَصِــيّة
وخَلّي ٱنفوت

بصوتِي صِحِت يَطٰه
الأمة ٱعلِــنَت وِلاهَه
للطاغوت 

ولا كأنّك وَصّيت
داهِمَوا هذا البيت
يالنّبي وِٱحتاريت
الغِيرَة أخذَتنِي

صـايِر بنُص نارَين
والعِصابَة  ٱمتانين
 يِندِثُر هـذا  الدِّين
العَبرَة خِنگتني

ـــــــــــــــــــــــــــــــــــــــــــــــــــــــــــــــ

دِنيانه  ظلمة  صارَت
عيونِ العَرِش تِجارَت
عُگب الصّار

والوَصّى  بيها  طٰه 
كَسرَة ضِلِع  جِزاهَه
والبِسمار

يوم أصبَحَت عَليلة
بِنتِ  النّبي الجَليلة
فِكري ٱحتار

مِن  أنظُر  الزچية
أحزانِي تِسري بِيّة
مِثلِ النّار

إلهَه  أنظُر  بِدمــوع
وِنحِنَت بِيّة ٱضلوع
گلبي ذايب مَفجوع 
الحَسرة كِتلَتني

ذَبّلـــتهَا الأحــــزان
والهَضم والأشجان
صَدري يِلهَب نِيران
جروحِي لِچمَتني 

ـــــــــــــــــــــــــــــــــــــــــــــــــــــــــــــــ

ظَلّت تُوَصّي بِيّة
خَل دَفنِتِي خِفِيّة
يا بو حسين 

وَانَه ٱستِمِع حَچيهَه
يِحنِي الظهر بَچيهَه
ويِعمِي العَين

وزينب تِصرَخ حَزينة
يا يُمّـــه يالحَـــــنينة
لا تِمشين

بوَنّة هَضُم ثِجِيلَة
گِلتِلهَه يالعقــــيلة
لا تِبچين

إحــنا صِرنه أيتام
بَس  مَآسي  وآلام 
وِنرِمِيت آنه ٱسهام
كِلهَه صابَتنِي 

باچر بطَفّ حســـين
بويه كلشي تشوفين
يالعقــيلة  ٱتصِبرين
وهِيّه فِهمَتني

ـــــــــــــــــــــــــــــــــــــــــــــــــــــــــــــــ

حسين وحَسَن إجوهَه
بنوحِ  وشَجَن بِچـوهَه
وحِرگة وآه

أنـــــظُر  تِدَنّه   يَمهَه   
حسين ويِلثِم جِدَمهَه
يا أُمّاه

مَصدومة بِتهَه ناحت
بدَمعِ الهضيمة صاحَت 
يا جَدّاه

ويوم  آنه  غَسّلِتهَه
بكَسرَة ضِلِع شِفِتهَه
واويلاه

مو نَعَش شايِل كَون
وَبچي وَيّه اليِبچون
چَنِّي  آنه  المَدفـون
ويَمهَه دِفنَتني

وِرجَعِت شايِل هَم
والألَـــم  بِيّة  ٱلتَم
والهَجُر مِثلِ السَّم
وهِيّه هِجَرَتني

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي 

قصيدة في شهادة الزهراء عليها السلام  ،  لسان حال أمير المؤمنين عليه السلام  . 
ـــــــــــــــــــــــــــــــــــــــــــــــــــــــــــــــ



عَلَى الوَجنة تِصُب دَمعة
رَحِيلِچ حَنـــظل ٱنجِرعَه

يَتيم وخالي مِحرابِچ
وتِغَيّر حالي  بِغـيابِچ

رَحِيلِچ حَنظل ٱنجِرعَه

ـــــــــــــــــــــــــــــــــــــــــــــــــــــــــــــــ

كأنّي  أنظُر  لحَيدر 
يِكفكِف دَمعِته بِحِزنَه

ويِخاطِبها يَبِت طه 
عُگب عَينِچ تِمَحّنَّه 

مُصابِچ زَيّد ٱجروحي
ويِمُر لِيلِي بألف وَنّة 

كَلِف ما يِنحِمِل هَجرِچ 
وتِفَرّع  كِل  ألَم  مِنّه

تروحين وتُعوفيني
يَزهــــراء وتِخَلّيني 

يِتامى آنه وَحـبابِچ
وتِغَيّر حالي بِغيابِچ

رَحِيلِچ حَنظل ٱنجِرعَه 

ـــــــــــــــــــــــــــــــــــــــــــــــــــــــــــــــ

يفاطِم يا دُوَى ٱجروحي 
أخِبرِچ  بالسّده  ٱعليّة 

أشوف أطفالي باللّوعة 
أموت  وأحيا  يوميّة 

يفاطِم  حَسرة  ٱبنَيتِچ 
تِهَدّم  حَيلِي  البِيّة 

عَليلة بفرگتِچ زينب 
يَتيمة  تعاني  ليليّة

حَزيــنة والدمع هالي
تِصِد مِحرابچ الخالي

أنوح ٱوياهه لِمصابِچ
وتِغَيّر  حالي  بِغيابِچ 

رَحِيلِچ حَنظل ٱنجِرعَه  . 

ـــــــــــــــــــــــــــــــــــــــــــــــــــــــــــــــ

الحَسَن يالزهرة لو شِفتِيه 
تِهَدّم  ساتِر ٱجفونه 

الجِبَل  يِتصَدّع  لهَمّه 
السّهَر خاواهِن ٱعيونه 

مُصابِچ چَن حِلِم شافَه
ويِعايِن إخته محزونة 

يَزهراء وذِبَل عودَه 
عَليچ ومِنخُطُف لونَه

تُوَضّه بجاري دَمعاتَه
تِفِــــت  دَلّالي  آهاتَه

حَنينَه يِنطُر ٱجوابِچ
وتِغَيّر حـالي بِغيابِچ 

رَحِيلِچ حَنظل ٱنجِرعَه  . 

ـــــــــــــــــــــــــــــــــــــــــــــــــــــــــــــــ

يفاطِم  حَسرَة  أوليدِچ 
عظيمة بصَدره أبواليِمّة

أذكرَه  ٱيقبّل  ٱجدامِچ 
ويِنادي بشوغة يا يُمّه 

دَخيلِچ  لا  تُعوفينا 
رِدِت مِنّچ ولَو چلمة 

عِزيزِچ يُمّه آنه حسين
عَلَيّه  ٱجروحي  مِلتَمّة 

شحَلاة إسمي التّنُطقينَه
يَرَيت إبنِـــــــچ تِنُظرينَه 

أروحَن  فِدوة  لِترَابِچ
وتِغَـــيّر حالي بِغيابِچ 

رَحِيلِچ حَنظل ٱنجِرعَه  . 

ـــــــــــــــــــــــــــــــــــــــــــــــــــــــــــــــ

وجودِچ  چان إِلِي  تَچوَة
ويِنَسّيني  الحِزن  والهَم 

ألوذ  بحَضرِتِچ  لَمّن 
وَجِه  دِنيايَه  يِتجَهّم 

صِدِگ يَمّ الحَسَن تِمشِين 
جَريحة  وضلعِچ ٱمهَشّم 

يَبنتِ المصطفى وعگبچ 
سَحاب  الفاجعة  مِلتَم 

عَجيبة صِرتي بَس ذِكرَى
تِجيني بطَيـــفي يازهرة

فِجَعنِي  بعَملِتَه  الصّابِچ
وتِغَيّــــــر حالي  بِغيابِچ 

رَحِيلِچ حَنظل ٱنجِرعَه  . 

ـــــــــــــــــــــــــــــــــــــــــــــــــــــــــــــــ

بقلم الأستاذ  /  ستار عذاب الحچامي 

قصيدة في شهادة الزهراء عليها السلام  ،  بلسان حال العقيلة زينب عليها السلام  . 
ـــــــــــــــــــــــــــــــــــــــــــــــــــــــــــــــ


إحنه  الأيتام  حاچينا 
يا  يُمّه  شلون عِفتينا
دَربِ الأحزان ماشينا…  ماشينا

ـــــــــــــــــــــــــــــــــــــــــــــــــــــــــــــــ

زينب  آنه  العفتيني  بنار أحزاني
يا يُمّه وهاي الصدمة مغَيرة ألواني

رَاح أشرحلِچ شنهو السوّاه ٱزماني
جور وحِرگة  وآلام  وهَم  راواني

صورة وَجهِچ مطبوعة بنص وجداني
وَتقاسَم  دَمع  ٱفراگچ  وَيّه  أخواني 

يا  يُمّه  ٱنصاب  دَلّالي 
عاشَرهه الضيم أحوالي
يا دَم  وروح  هادينا  …  هادينا 

ـــــــــــــــــــــــــــــــــــــــــــــــــــــــــــــــ


عَلَى كِل مَعروف وعِفّة رَبّيتيني 
وشلون  أصبِر عالبلوة  عَلّمتيني

لِمصايب  هاي  الدنيا  هيّأتيني
يا  يُمّه  وأوّلهِن  مِن  وَدّعتيني

عيوني وما شِبعن مِنّچ يالعِفتيني 
غرگانة  وإيدي ترامِح  خَلّيتيني 

مَثخونة ٱجراح  يالزهرة
وبضلوعي النار مِستعرة
وطيفِچ  بالآه  يِلفينا  …  يِلفينا 

ـــــــــــــــــــــــــــــــــــــــــــــــــــــــــــــــ

يا يُمّه وصَارت عگبچ سودة أيامي 
وكِلما  أتوجّه  ألگه  الهَم   جِدّامي

شوفة  مِحرابِچ  خالي  تزيد  آلامي 
يا مَن رِحتي وراحت ويّاچ أحلامي

يا زَهراء ودَمعي ٱعليچ ٱيظل هامي 
حَسرة وظَلّت يا يُمّه ٱتصِل بعظامي

ما عِفتِ الآه واللّوعة
أنعى بوَنّات مسموعة
ويِندِب وياي والينا  …  والينا 

ـــــــــــــــــــــــــــــــــــــــــــــــــــــــــــــــ

هاي  الدنية عگبچ يَمّ  الحِنِيّة
يا يُمّه وما تدرين شسوّت بِيّة

مو لَچمة ولا ثِنتين وصارَن مِيّة 
مِن بَعدِچ گمت أتوچّة علَلعوچيّة

كِل  مِغرِب أنصُب مأتَم والصُبحِيّة
وصِرت أتگرّب لِلبلوة شوية شوية 

شِفتِ  الآلام  بطفوفي 
مَشدودة حبال بچفوفي
وچَتّال  حسين  حادِينا  …  حادينا 

ـــــــــــــــــــــــــــــــــــــــــــــــــــــــــــــــ

يا يُمّه  ومو بَس  هَجرِانچ  سَلّاني 
حَيدر طُبرَوا رَاسه وراح وعافاني

حُرمة وبالطّف طاحَوا كِلهم  ولياني 
ومِن شَبّت نار بخِدري صَاح ٱلساني 

گوم  إنهض  يا عباس  ولا  تِنساني 
صَدرحسين إنداس وهِجمت عدواني

يُمّه عللماي ظَل ظامي 
ونَحرِ المظلوم  جِدّامي 
وذَبّاحه  بسوط  ياذينا  …  ياذينا 

ـــــــــــــــــــــــــــــــــــــــــــــــــــــــــــــــ

على ظهرالناگة الهَزلة أجري الدمعة 
وأنظُر مذبوح  الوالي  هُوّه  ورَبعه

يا  يُمّه  وخيل  الظالم  رَضّت  ضلعه 
ولمصاب ٱحسين ٱتنوح وتِبچي السبعة

بذيچ الخِربة أبچي ٱعلَحسين وأنعه 
وبذيچ اللحظة  ضاگت بِيّة الوَسعَة

وِرقَيّة ٱتموت عالمَنحَر
 ظَلّت  أيام  تِتحَسّر 
بَرضِ الأجناب تالينا  …  تالينا  

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي 

قصيدة في شهادة الزهراء عليها السلام ،،،،
ـــــــــــــــــــــــــــــــــــــــــــــــــــــــــــــــ



عَيلة وتِهمِل العَبرة
بيوم الماتت الزهرة
وتِسعَر بالگلب جمرة

ـــــــــــــــــــــــــــــــــــــــــــــــــــــــــــــــ

بنُواعي أصبحَت دار الوَصي حَيدر
ونَعَت للفاجعة الكعبة بدمع أحمر
وحِداد أعلَن عليهه بجمرته المَشعَر
وبِچَى حَتّى الجَبل لِمصيبة الكوثَر

مُظلِم حَيدرة بِيتَه
دَمعه غَرّگ ٱلحِيتَه
نار وشَبّت برِيتَه
وبركان الحِزن صَدره

ـــــــــــــــــــــــــــــــــــــــــــــــــــــــــــــــ

لِيلة وَحشة هالليلة شيِعَدّيها
تِرِد بزينب أفكار وتُوَدّيها
بحَنانه ودَمعِته الوالِد يِهَدّيها
الحَسَن يَمها يِصَبُّرها ويِفَدّيها

گالِلها بدَمِع يِنصَب
صَبراً يَختي يا زَينَب
أدري بنارِچ التِلهَب
ورَبنا النافِذ بأمرَه

ـــــــــــــــــــــــــــــــــــــــــــــــــــــــــــــــ

لِيلة علَلحَسَن مَصعَبهه هالليلة
يَتيم ومِنهِدم مِنّ الزغر حَيلَه
يِصِدّ لوالِده والمَدمع ٱيسيلَه
يِكلّم خالقه وبالحَسرة يِشكيلَه

بعَينه ضاگت الوَسعة
مگابل والده ويِنعَى
يِهمِل دَم على البضعة
ونارَه من الحِزن كبرَة

ـــــــــــــــــــــــــــــــــــــــــــــــــــــــــــــــ

أبو اليِمّة حَزين ونارَه لَهّابَة
وعلى أمه البتول ٱدموعه سچّابة
رَحيل الوالدة الما حَسّب ٱحسابَه
يَتيم وللزمان ايوَجّه ٱعتابَه

يِهضُم حاله أبو ٱسكينة
ولزينب تِصِد عَينه
تِبچي الصخرة لونِينه
فاگد يِجذِب الحسرَة

ـــــــــــــــــــــــــــــــــــــــــــــــــــــــــــــــ

هاي أول مِسيّة ٱتمُر بلا فاطِم
وتِبات العَيلة بهموم ودَمع ساجِم
لا گلب اليِهيد ولا جِفِن نايِم
واحِد وَيّه واحد حِزنَه مِتقاسِم

فراگ الزهرة أذّاهُم
وجَمر الحَسرة چوّاهُم
دنيا وأگصَت ٱوياهُم
بيت ومنشِعِب كسرَه

ـــــــــــــــــــــــــــــــــــــــــــــــــــــــــــــــ

حزينة الليلة سورة هَل أتى والتّين
وتِنوح الكوثر وص وضُحى وياسين
على افراگ أم أبيها دَم تِهِلّ العَين
ويِظل مأتَمها قائم حتى يوم الدّين

كِلهه تِجتمِع باچِر
يَمّ الواحِد القاهِر
ويِفضَح كِل فِعل غادِر
وكِلمَن يِنعرِف قَدرَه

ـــــــــــــــــــــــــــــــــــــــــــــــــــــــــــــــ

بقلم الأستاذ / ستارعذاب الحچامي .

قصيدة في شهادة الزهراء عليها السلام ، لسان حال أمير المؤمنين علي عليه السلام .
ـــــــــــــــــــــــــــــــــــــــــــــــــــــــــــــــ


يفاطمة ما فارَگ الدمعِ الجِفِن
يفاطمة لَيل ونهار ٱعليچ أوِن

دهري رِماني چم سَهَم
ذابِحني بسيوفه الألم

يفاطمة
يفاطمة

ـــــــــــــــــــــــــــــــــــــــــــــــــــــــــــــــ

ماكو ٱعتراض عللقَدَر
بَس عَيني عَذّبهه السهَر
حزينة

كِل الأمان بحَضرِتچ
طالت يفاطم سَفرِتَچ
عَلَينة

مِن نورِچ آنه مِنحُرُم
وخَلّيتي روحي للهَضُم
رَهينة

يفاطمة دَلّالي ذايب مِنفُطُر
يفاطمة نيراني بِيّه تِستعُر

ظَهري ٱنكسَر حَيلي ٱنهِدَم
ذابحني بسيوفه الألم

يفاطمة
يفاطمة

ـــــــــــــــــــــــــــــــــــــــــــــــــــــــــــــــ

يامَن إلي چِنتي السنَد
يالما عَرَف سِرّچ أحَد
مِشيتي

يالچلمِتچ چانت دُوَه
أتنَفّسِچ مِثلِ الهَوَى
ٱويَ رِيتِي

وِبشوفِتِچ أنسَى الوَجَع
دلّالي سِبّاحه ٱنشِلَع
دَرَيتي

يفاطمة حَسرَة يَتيمة حَسرِتي
يفاطمة أفتَر حزين بحِجرِتي

يالوَجهِچ بفِكري ٱنرِسَم
ذابحني بسيوفه الألم

يفاطمة
يفاطمة

ـــــــــــــــــــــــــــــــــــــــــــــــــــــــــــــــ

خَلّيني أخِبرِچ فاطمة
دنيانه عگبچ مُظلمة
وكئيبة

دارِچ خِلِيّة و موحِشَة
وهَجرِچ يِگطّع بالحَشا
مُصيبة

أفكاري بالهَم سابحة
وَي ذكرياتي الذابحة
الرّهيبة

يفاطمة گبلچ رِدِت عُمري ٱنگضَى
يفاطمة الوَسعة ضاقَت والفَضَا

دَلّالي نُصّين ٱنجِسَم
ذابحني بسيوفه الألم

يفاطمة
يفاطمة

ـــــــــــــــــــــــــــــــــــــــــــــــــــــــــــــــ

عِفتيني وفراگِچ كَلِف
كِل لحظة تِنعَدّ بألِف
عَلَيّة

بهذا العُمُر وِتيَتّمِت
دَمعاتي عالوجنة تِكِت
جِرِيّة

وَيّه العقيلة ٱبنَيّتي
أنحَب عَليچ بوَنّتي
الشجِيّة

يفاطمة بِيتِچ أبد ما يِنچهِب
يفاطمة مِحرَابِچ أنظُر وَنتِحِب

يِلچمني لو هَبّ النّسَم
ذابحني بسيوفه الألم

يفاطمة
يفاطمة

ـــــــــــــــــــــــــــــــــــــــــــــــــــــــــــــــ

وَحدي أظل ما حَسّبِت
بأيتامِچ آنه ٱتحَيّرت
يَروحي

أنظُر وعاين للحَسَن
دَمعاته نار وهَيّجَن
جروحي

وحسين إلِچ هَل عَبرِتَه
يا يُمّه صارَت صَيحِتَه
ٱويَ نوحي

يفاطمة زينب تِولّاهه الحِزِن
يفاطمة مَلچومة ولوَجهِچ تِحِن

صَارالحزن خَصم وحَكَم
ذابحني بسيوفه الألم

يفاطمة
يفاطمة

ـــــــــــــــــــــــــــــــــــــــــــــــــــــــــــــــ

يِتلاگه هَضمي أويَ القَهَر
وحتّى الصّبُر مِنّي ٱعتِذَر
سِمَعتَه

أنحَب يَفاطِم عالضّلِع
سَمّ الهَجُر ما يِنجرِع
جِرَعتَه

حَالِ الغَريب بلا أهَل
وبوَنّتِي حَتّى الجِبَل
صِدَعتَه

يفاطمة كِل ساعة اموت بحَسرِتي
يفاطمة شوغَة عِليلة شوغِتِي

أذرِف بِدال ٱدموعي دَم
ذابحني بسيوفه الألم

يفاطمة
يفاطمة

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي .

قصيدة في مولد السيدة زينب عليها السلام  …
ــــــــــــــــــــــــــــــــــــــــــــــــــــــــــــــــــــــ


تـَـــحياتي لحَــــــضِرتِچ يالجَليلة
ودمِع أفراح على الوجنات أسيلَه

يالعقيلة يالعقيلة يالعقيلة يالعقيلة

ـــــــــــــــــــــــــــــــــــــــــــــــــــــــــــــــ

بسِما الإحساس زينب إنتي نجمة
جليــلة وجَيّـتِچ عـــالدنيا رحــمة
يَـــمولاتي ٱختِنَگنا وإنتي نَســمة

لعَلي حيدر نِبارك والزچية
وتَهانــينا إلى خــير البرية

يالعقيلة يالعقيلة يالعقيلة يالعقيلة

ـــــــــــــــــــــــــــــــــــــــــــــــــــــــــــ

الحَسَن فرحان فرحة شكد چبيرَة
هــلا ومِـيّة هلا بإخــتي الأمـــيرة
يَـيَــوم ٱولادِتِـــچ ما صَــح نَظيرَه

تِحـوم ٱعلِيه طيور ٱمنِ السعادة
ومِلَا الأجواء عِطِر هاي الولادة

يالعقيلة يالعقيلة يالعقيلة يالعقيلة

ــــــــــــــــــــــــــــــــــــــــــــــــــــــــــ

بِدَه بگلبه النّـبُض يِتسارَع ٱحسين
بأحـاسيسَه يزيـــنب إنتي تــدرين
سـعيد بشوفِتِچ والدمعة بالــــعَين

ألف أهلاً يَخَيتِي وعَينَه تِهمي
إلِچ من هَسـه ناذر فدوة دَمّي

يالعقيلة يالعقيلة يالعقيلة يالعقيلة

ـــــــــــــــــــــــــــــــــــــــــــــــــــــــــــــ

وَسَط بيت الرسالة ٱنتِشرَت أنوار
وأكــــاليل السعادة ٱتـزَيّن الـــدار
مِثِل شمس وأحاطت بيچ الٱقـمار

على الشّطآن تِتغَنّى النوارس
بمَحَبّـتكُم أظَل للكِل أنـــافِس

يالعقيلة يالعقيلة يالعقيلة يالعقيلة

ــــــــــــــــــــــــــــــــــــــــ

بقلم الأستاذ  / ستار عذاب الحچامي  .

قصيدة في شهادة الزهراء عليها السلام ، لسان حال أمير المؤمنين علي عليه السلام . مِن قصائد الفصيح
ـــــــــــــــــــــــــــــــــــــــــــــــــــــــــــــــــــــــــــــ


فـي ليلةٍ دكناءَ مظلمة
يغيبُ عني نورُ فاطمة

وبِــتُّ بالآلامِ والشـــــجَن
شَوقاً أصيحُ يا أم الحَسن

يغيبُ عني نورُ فاطمة

ـــــــــــــــــــــــــــــــــــــــــــــــــــــــــــــــــــــ

يا قِبلَةَ الإحساسِ والصّـفا
يَبكي عليكِ الصّدقُ والوَفا
أنا الحَبيبُ ما هذا الجَـــفا ؟
على الحــياةِ بَعـدَكِ العَــفا

تَرَكتِـــــنِي لِلهَــمّ والألَم
والصّبرُ يا زهراءُ مُقتَحَم

أمسَـــيتُ كالأسيرِ مُرتَـهَن
شَوقاً أصيحُ يا أمّ الحَسَن

يغيبُ عني نورُ فاطمة

ـــــــــــــــــــــــــــــــــــــــــــــــــــــــــــــــــــــــ

كُلُّ الليالي أصبحَت صَريم
لَمّا جَفاني قَلبُكِ السّــــليم
بِما أُعاني رَبُّـــكِ العَــــلـيم
والنأيُ عَنـكِ فـاطِمٌ ألِــــيم

أنا اليَتـيمُ كـيفَ تَقهَريه ؟
يُكابِدُ الهِجران فٱنظُريه

والدّمعُ في عَينَيهِ كالمُزَن
شَوقاً أصيحُ يا أمّ الحَسَن

يغيبُ عني نورُ فاطمة

ــــــــــــــــــــــــــــــــــــــــــــــــــــــــــــــــــ

مِـــن ذا القـــضاءِ ما لنا هُــروب
في الفَجرِ ألقَى الموتَ والغُروب
دَمـــعُ الحُســينِ يَعشَقُ السُّكوب
ويَعتَـــــلِي أوصافَهُ الشُّــــحوب

لِلَوعَةِ الحُسينِ الصّخرُ ناح
وَهَـيّجَت ما فِيَّ مِن جِـراح

يَبدو عليهِ الهَــمُّ والحَـزَن
شَوقاً أصيحُ يا أمّ الحَسَن

يغيبُ عني نورُ فاطمة

ــــــــــــــــــــــــــــــــــــــــــــــــــــــــــــــــــ

يا لَيـتَـكِ رَأيتِ زَيـنَبا
وجمرَها بالحُزنِ لاهِبا
لِنَعيِها ينوحُ المُجتبىٰ
سَوِيّـــةً علـيكِ يَنـدُبَا

قَلبـــــي بما يَنــــتابُهُ عَلِيل
صَبري عليكِ ليسَ بالجَميل

أضحىٰ غريباً فاقِدَ الوَطَن
شَوقاً أصيحُ يا أمّ الحَـسَن

يغيبُ عني نورُ فاطمة

ـــــــــــــــــــــــــــــــــــــــــــــــــــــــــــــــ

أراكِ يا زهــــراءُ كُــــلّـما
أُراقِبُ النجومَ في السّما
أنا الذي بِسـورِكِ ٱحتَـمَى
واليَومَ فوقَ قَبرِكِ ٱرتَمَى

خَــدّي عـلى تُرابِكِ عَــفير
مِن وَحشَتِي باللهِ أستَجير

مِن وَحدَتِي والكَربِ والمِحَن
شَـــوقاً أصيحُ يا أمّ الحَـسَن

يغيبُ عني نورُ فاطمة

ــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

قصيدة في شهادة الإمام القاسم نَجلِ الإمام الكاظم عليهما السلام  ،،، 

ـــــــــــــــــــــــــــــــــــــــــــــــــــــــــــــــ


يالقاسِم وحَيّاك 
يالبِشّدَد تِنخاك 
هاي البَريّة 

جَارِ الزّمَن وَيّاك
دَارَك عِفِتهه ٱهناك
يَبنِ الزچية 

عِشتِ العُمر حَسرَات      فَرگة وحِزِن واهات 
                  يَبنِ الزچية 

ـــــــــــــــــــــــــــــــــــــــــــــــــــــــــــــــ

دِنيا وعِكسَت وَيّه الهادي    ،،،  أحمد نَبينَه 
جارَت  عالزّهرة وأذّتها     ،،،  وماتَت حَزينة
وعِجزَت مِنّه ومِن طلّگها   ،،،   حَيدر وِلِينه
مجنونة  وظَلّت  تِتآمَر      ،،،   لا مو أمِينة 
إبنِ الزهرة وسَمّت چَبدَه    ،،،   بَرضِ المَدينة 
وغِدرَت بحسين وعطشانة  ،،،   ظَلّت سَكينة 

دِنية زَوال   ….   ودَارِ ٱنتقال 

خِطفَت عَقِل فِرعون
وبيها  ٱنفِتَن  قارون
دِنيَة مصالِح 

مِن ضِحكت لهارون
وِمصَدّگ ومَجنون 
وآخِرها واضِح 

ما دَامَت وهَيهَات  ….  فَرگة وحِزِن واهات
 
                يَبنِ الزچية  

ـــــــــــــــــــــــــــــــــــــــــــــــــــــــــــــــ

دنيا وكِل عاقِل يِعرُفها    ،،،    ومِنهه يِحاذِر 
ما خَلّت حَال عللكاظِم     ،،،   بذاكِ التجاسِر 
عانَدها وظَل كاتِم غَيظه   ،،،   وبسِجنَه صابِر 
والعَالَم مِن مَوقف موسَى  ،،،   وِبفِكرَه حايِر 
مظلوم  وتِشهَد  أغلالَه     ،،،   وظُلَمِ المَطامِر
لَجلِ الكاظم تِجري العَبرَة  ،،،   فوگ المَحاجِر

بذَاكَ السّجِين   …   مَرّت سِنين

شاف  الألم  ألوان 
وگلبه التِهَب نيران
بعيونه دَمعة 

تِترادَف الأحزان
لو أذّن  الآذان 
ومَحّد يِسِمعه 

وِيرَتّل الآيات   …..   فَرگة وحِزِن واهات 

             يَبنِ الزچية 

ـــــــــــــــــــــــــــــــــــــــــــــــــــــــــــــــ

يَبنِ الكاظم مِن نِستَعرِض   ،،،   سِيرَة حَياتَك
تِترِك  وِتغادِر اوطانَك      ،،،   موش برِضاتَك
طاغي ومِتعَسّف بَحكامَه    ،،،   وناكِر سِماتَك
وحِقداً  يالقاسِم  تِتلاحَق     ،،،   يالطيبة  ذَاتَك 
مِتواري وإسمَك غَيّرتَه     ،،،    تِطلُب نَجاتَك
مَجهول ووَجهَك نورَاني   ،،،   وچانَت صِفاتَك   

فارِس جَسور  …..   فَذّ  وغَيور 

وكِلمَن يشوفَك گال
بِي  هَيبةِ  الأبطال  
حاوِيهَه دَمّه 

ما صَح مَثيلَه ٱرجال
مِثلِ الأسد  لو صَال 
خَبروني شِسمَه 

طَيّب كريمِ الذات  ….  فَرگة وحِزِن واهات

                 يَبنِ الزچية 

ـــــــــــــــــــــــــــــــــــــــــــــــــــــــــــــــ

عايِف أوطانَك مِتغَرّب    ،،،   والزهرة أمّك
عايِش والكِتمان بصَدرَك  ،،،  وجَرحَك يِلچمَك
مِنّك  هالعالَم  يِتعلّم        ،،،   مَحّد  يِعَلمَك 
وارِث آباءَك وَجدادَك     ،،،   والقاسم إسمَك 
تِخدِم ناس وكانِ الأجدَر   ،،،   هِيّه تِخِدمَك 
مَسجون بآلام  الماضِي    ،،،   وَينه اليِفِهمَك

گلبك عَليل   ….   لِيلَك طَويل 

لَيل الألم  والآه 
باگ اللي تِتمَنّاه
مَهضومة روحَك

يالوالِدَك  تِنعاه 
لِيل وصُبِح ذكراه
تِلچِم جُروحَك

الكاظِم أبو الطّلبَات  ….  فَرگة وحِزِن واهات 

                   يَبنِ الزّچية 

ـــــــــــــــــــــــــــــــــــــــــــــــــــــــــــــــ

دَارَت  يالقاسِم  دِنيانة      ،،،  وِفتَر زِمانَك
مَهضوم  ودَلّالَك  ظامي   ،،،  وگرّب أوانَك
بِفراشِ المَوت المِنتَظرَك   ،،،  واضِح بَيانَك
آنه القاسم نَجلِ الكاظم    ،،،  صَرّح لِسانَك
شيخ الوادِم يِلطُم رَاسَه    ،،،  وطاح بمِچانَك
بيا وَجه أتگابَل وَي جَدّك    ،،،  أطلُب  أمانَك

وا خَجلَتاه  ….   وا ضَيعتَاه 

سامِحني يا مولاي
يا سيدي ورَجـواي 
يَبنِ الأطايِب 

خادِم إلَك وَفّاي
يالـرّاوِتَك دِنياي
كِل هالمُصايِب 

كِلّك وِفَه وطَيبات   ….   فَرگة وحِزِن واهات 

                  يَبنِ الزچية 

ـــــــــــــــــــــــــــــــــــــــــــــــــــــــــــــــ

ذيچ الرّادَت تِدفِن رَسمَك    ،،،  وَينَه رَسِمهَه
والرّادَت  إسمَك  يِتلاشَى    ،،،  ضايِع إسِمهَه
خَلهَه ٱتشوف القُبّة الصّفرة  ،،،  شامِخ عَلَمهَه
والنـاس التِتعَنّا  ٱتــــزورَك    ،،،  يِنزاح  ألَمهَه
أحبابك  يَمّك  مجتـــــمَعه    ،،،  وگبرك يِلِمهَه
تِنظُر شَخصَك يوم المحشر   ،،،  هـــذا  حِلِمهَه

تِعلِن حِداد  ….   تِلبَس سَواد

مِن حَگهه هاي الروح
تِجــزَع  إلَك  وتـنوح
بيومِ المصيبة

يالعُمرك إنته ٱجروح
دَمعِ الحِـزِن مَسفوح
يِسعَر لَهيبَه 

أكتِب إلَك أبيات  ….   فَرگة وحِزِن واهات 

                يَبنِ الزچية 

ـــــــــــــــــــــــــــــــــــــــــــــــــــــــــــــــ

بقلم الأستاذ /  ستار عذاب الحچامي