زغير انته يعبد الله
بس اويل زلم تنعد
امك تدري گلبي عليك
لا هيد اولا يبرد

هاي دنيه وتنگضي ***هاي ايام البچي
يعبد الله يعبد الله يعبد الله يعبد

امك يل رضيع أنه يمدلول
يا قرة اعيوني يا سماري
يذبحوك بسهم شنهي انته عباس
موتك موت بروحي خضاري
الرباب أنه وعليك عيوني تندار
مثل ديرت الماي بنص قواري
امك أنه امك ردلي شبيك
شيخلصه بعد عگبك نهاري

السهم وي راسك شكبره
يعبد الله يمي عيني
شيخلصه العمر دونك
جنت انته التسلسلي

هاي دنيه وتنگضي**** هاي ايام البچي
يعبد الله يعبد الله يعبد الله يعبد

من السهم گام تنفظ دماه
ويبچي ظل ولاكن موش بدموع
الشمعه من توجها تبچي بهداي
بس عبدالله صاير عكس الشموع
يبچي بكل علات الصوت ويلاه
من ضربو رگبته نكسرن ضلوع
مدري السهم ينزف مدري الزغير
اشوفنه بدين حسين ويلوع

الولي المن بعد يمه
گلي آليا شخص أسهر
يجازيني بذبح وكتي
وجازيه بعلي الازغر

هاي دنيه وتنگضي**** هاي ايام البچي
يعبد الله يعبد الله يعبد الله

اگابل هدمه وابجي عليه كل يوم
ويم كاروكه اگعد وابچي سكته
كل ضني يشوف دموعي ويگوم
يبچي ولمن يبجي بخده بسته
وارد لواقعي واتئمل بخير
يلفي وچن حبيبي بعيني شفته
وگول الله اليعوض وحنه ميتين
بس للموت اگولن ليش بگته

باكه الموت مني بساع
زغير اهوه بعمر ورده
صدگ ردو عبد ابني
بس ميت اجه برده

هاي دنيه وتنگضي**** هاي ايام البچي
يعبد الله يعبد الله يعبد الله يعبد الله

راح تموت عكبك كل الازلام
بس الروس راح ويانه تروح
ثريه الروس راح اصير برماح
وتبدي بزينب تبين هل جروح
ويبدي العطر ينشم من مسافات
عطر الجنه يطلع منها ويفوح
من روس الزلم تبدي العلامات
لحد ما توصل اعله الشام وتلوح


طريق الشام يمه بعيد
رايدتك تسليني
رايدتك لهو لدنياي
وصبي رايده لعيني

هاي دنيه وتنگضي**** هاي ايام البچي
يعبد الله يعبد الله يعبد الله يعبد الله



كلمات خادمكم: حسين علي الدليمي

لحن اهوازي

گبل لا ينزل الاكبر * صوب المعركه اتبختر
گلاله ابو حسين ** *إذن يبني أو كبر

بده ايئذن علي الاكبر حته احسينه يصلي
هاي اخر صلاه وياه من ابني وشبه جدي
من قرت عيون أمه ومن ابن عم المهدي
حته بل صلاه الاكبر صوته يكسبر بجلدي

إذن واستعد صله ****گبل لي موت عبدالله
ياخذ ثاره الاكبر *** من عيون الموجره

راح استئذان الوالد أودع أمه ورقيه
وقبل عمه العباس من چفوفه الربيه
أودع عمته زينب وگللها عله النيه
كله من أطب للگوم تتشيم تظل بيه

سرج مهره ولبس سيفه* رايح ياخذ بحيفه
صح بل عمر بعد زغر** شبل يتخير ابكيفه


نزل وتوسط الاكبر وتحزم على الحومه
شد حيله أبوه حسين شدة عگده بهدومه
محد يوگف اگباله والگرب اذا يومه
شبل صاحوله الوادم بنصهم شاعت علومه

بيده السيف ظل يفتر*فرت گافل الخدر
ما خذ شمره من عباس ***والعباس ابن حيدر

محد يوصل اگباله شبل بس اب الف زلمه
اليگرب حده ما يگدر واليگدر منو يلمه
وصل سواهم الاكبر وخاله اليدعي بأمه
گله العمي إنه ارجع ما ارجع الك زحمه

عمي المن اطيح بظيج* يوگفلي نده بهل ريج
ما يفزع ابد خالي ***اولا اشگن عليه الزيج

صال بصولته الاوله رجع والريج متفطر
يبس ريجه بشحيح الماي چن الدنيه ما تمطر
خله السانه أبوه حسين فوگ السانه الاكبر
ولا گطره بلسانه يگول يرب انته الذي تستر

خشبه صاير السانه* ويكسر كل شخص جانه
الاكبر حالته حاله** شيخ بعين خوانه

گام وصال هم بيهم علي الاكبر اسد بارز
گال الميت أويه حسين بل جنه إذا فايز
جائز نطلب الي نريد بس الكم ولا جائز
مكاني بل جنان هناك والكم أنه ما عايز

يهنياله الگه مچانه **** وتشهد كلها عدوانه
صح جدي الصميده يگول*قسيم الجنه بس أنه

تمت كتابتها في (٢٠/٥/٢٠٢٤م)

حسين علي الدليمي

طور كربلائي

شبه من النبي شايل **** علي الاكبر يمي عيني
ابوك حسين ظل وحده * اگعد يمه حاجيني

اكعد خل اشوفنك
يماي عيوني بس لحضه
يا اول شهيد انته
البل طف ما گعد حضه
ذبل وجهي بوگعتك هاي
جسمي گام يترضه
وعيوني جفاها الشوف
مثل خشبه وكلتها ارضه

اگعد فدوه يوليدي
بعد ما بيه أشيل ايدي
موتك نار بوريدي
بعد ياهو النشد ويني * اكعد يمه حاجيني

يبس ريجه وجاه حسين
يركض منشده باله
يگله اوليدي أمر كول
ادري بحالتك حاله
انته اول شهيد تموت
بس الماي جتاله
وصل يمه بلسانه وضاگ
طعم ما مر عله خياله

طعم شد حيله وعضامه
رده يعارك بقامه
طعم مأخوذ من قامه
منو الخاله يوديني**** اكعد يمه حاجيني

چنت اضحك لمن اسمع
وحده بفگد ابنها تون
من استشهد الاكبر
حرت من يا حزن احزن
حرت وعيوني تتجاره
دمع وتراب بس صبن
بكثر ما لطمن ايديني
اصابع بل وجه طبعن

كبر عمري وكثر شيبي
زاد بفگدك نحيبي
درهم طاح من جيبي
شبه افراگگ وديني* اگعد يمه حاجيني


وصل يمه أبوه حسين
شافه مخضب بدمه
شاف الضربه البراسه
مثل ضربة ابو اليمه
مثل جده علي الكرار
موش بسيف بل چدمه
بعمد ضربة علي الاكبر
ما سوف ولا كلمه

شاله ولل خيم دزه
بهون يخاف لي فزه
منعداد العدل چزه
واخته اغمت على اديني * اگعد يمه حاجيني

خواتك تايهات ابر
عگبك يا صبي عيني
علي السجاد ما يگدر
يل مونس دواويني
احيرن بيك لو بختك
لو بحسين وسنيني
بفگدك يا علي الاكبر
بعد ياهو اليسليني

ياهو اليحمل همومي
ياهو يگلي بس گومي
گرب يومك گبل يومي
يظل فگدك يبچيني **** اگعد يمه حاجيني


حسين علي الدليمي
تمت كتابتها في (٢٥/٥/٢٠٢٤م)

هذه گروب القناة إذا حاب تدخل
https://www.tgoop.com/HusseinAliAlDulaimi

لحن اهوازي

زينب ودعت عباس،،،،،، باسته فقط بل راس
گلتله يبعد اختك،،،،،،،،،، سوي بل زلم وهواس


جهب عباس والريشات تجدح من يشوفونه
خلاها الزلم طشار بس بخزرت اعيونه
دخل چن نار نص الزور ما لحگو يطفونه
غير الكافل منيفوت حَبدر بس يسمونه

خلاها الزلم تنحب،،،،،، حاصرهم مثل مرحب
لمن هوستله اخته،،،،،،،، ،، كال لخاطرج زينب


صعد عل خيل والرجلين خطن من ضهر خيله
فگره الراد يتلگاه من حسين يوميله
گلاله الشمر عباس خالك لا تهد حيله
خلينه نتفاوض گوم هد ويانه عل عيله

عوف حسينك ايگله،،،،،،،،،،،، خالك انه مو ذله
گلاله اليعوف حسين،،،،،، هذه بعرظه اذآ خله


وصل للضفه والعدوان رجليها بقت ترجف
حته الما يلوحه بسيف من خوفه يضل ينزف
ابن حَيدر چهب للگوب خله الگوم بس تحلف
والچان بطريف ايزيد وي عباس ضل يغرف

الشارد بل حرب زلمه،،،،،،،،، ويلحگ يشوف امه
بس الما شرد ياناس،،،،،،،،،،،،وذر صار ومنو يلمه


رجع عباس لخته وگال شفتي الصار بل وادم
خليت الزلم صوبين والزلمه اليرد سالم
سويتلهم الما صار والصار وانه خادم
خليت الخيول اليوم خيل بخيل تترادم

حسين يگله يبن امي،،،،،،،،، توك ريحت دمي
زينب تعترف كافل،،،،،،،،،، الها انته بعد عمي

ابد ما عايز العباس مايك يا فرات انته
بس سواها دگر خشوم يكسر كل خشم سكته
الما لحگ عليه الموت صعدت روحه وي جثته
بعيونه خفت يا ناس مو وادم تجي بحلته

مو ماي النهر راده**** أخذ ماي بگصص قاده
أخذ لزينب العباس**** ماي الشمر وحفاده

مثل روڤانت الكعبه هيج افتر عله العسكر
الكافل حاصروه صوبين ظل بكيف يتخير
اليمنه علل يسار تروح اليسره بيمنه بس تفتر
غير اهوه ابن حيدر ابن حيدر ابن حيدر

ضي منه الگمر رايد **** جيه وچها بلطف بارد
بس بساعه الصيه*احر من الشمس وايد


حسين علي الدليمي

تمت كتابتها في /(٢٤/٥/٢٠٢٤م)

طور العگيله ( نزله الانصار)


يحسين بدربك ظلينه

يحسين انته القائد النه
لا تحسب سوينه المنه
كل عمرك ما رايد جنه
ونته بزغرك المسوينه

يحسين بدربك ظلينه

احنه انصارك دنيه ودين
لذراعك نصبح جفين
نفزع گبلك مو بعدين
بس اشر تعرف ماضينه

يحسين بدربك ظلينه

يحسين نبوس جفينك
وصبي نصبح احنه لعينك
وداعت عباس وخدينك
بس جرب مره وهد بينه

يحسين بدربك ظلينه

باجر كل علومك تبقه
تنطي لصاب صيته وحقه
منل كوفه وتوصل للرقه
كل اطباعك ذيج الزينه

يحسين بدربك ظلينه

نسحك فوگه الرايد ذبحك
مننطيح احنه عود يطيحك
صاير شيخ وجاي ينصحك
ونته الشيخ عليه وعلينه

يحسين بدربك ظلينه

تمت كتابتها في ( ١٠/٧/٢٠٢٤/م)

قلم خادمكم : حسين علي الدليمي

وزن الميمر


برض الطفوف انه وياك،،،،، خل نبجي عل مسبيه

زينب مشت لحسين تاخذ رايه
بولايه جانت هسه غير اولايه
راحت تگل لحسين بس حجايه
دونك اطفالي تهيم بل صبخايه

راحت وشافت عباس،،،،،،،،،، نايم علله الوطيه



عافت خيمه وراحت بصوب حسين
شافت اخوهه موذر ومامش عين
رجليهه تاهت والدرب صاحت وين
ما جنه تمشي فتره بس جنه سنين


من وصلت اعليه من طاح،،،،،،،، ما گالت شنهي البيه



حمل ضعنهم للسبي كلهه تروح
بس الگمر صاير وذر هم مذبوح
جسمه اليشيم عل ارض ضل مطروح
ودم النحر من الوتن شو مسفوح

محد بقه لهل اطفال،،،،،،،،، غيري وأنه مسبيه



انهض يا عباس وحاجي اختك هاي
من اشوفك ثق ترتوي من الماي
ترضاها ندخل لل مجالس حفاي
تدري بدونك تيهت حته الراي


ومن وصلت الصوب الشام،،،،،،،،، كل الحرم مرميه



گطره ما بيها الگصص يل تحدون
حالي سبيه وصارت بعبي ضعون
شحجيليج بيا حال عگبج يم عون
سب وشتايم والغلط يتمشون

مشيتنه هاي اويل روس *غثتهم كل اميه



خليني احجيلج عله طبت الشام
طبت اميرات وزلمهم خدامه
طبت وزير ابضهره زلم وجدام
والنوگ ال تشيل الحرم بنت العام

ما تمشي كل هاي النوگ* اله تحن عليه

قلم خادمكم :حسين علي الدليمي

فحل نزل طر الحومه
ابن علي حلوه ارسومه
أخذ عهد تبقه علومه

سمعت الكافل امن بعيد
يصرخ عل زلم قادم
زلمه اليبقه حي اليوم
اخلي الخيل تترادم
اخلي الفكر يشب نار
عقله اولا يرد سالم
مثل حال الطفل يا ناس
ابجيهم بجي الفاطم

محد گدر يلوي ذراعه
هذه الگمر هاي الطباعه
عل حومه يفتر جن ساعه
شاف الزلم خرده وچومه ***أخذ عهد تبقه علومه

مثل گود الطفل بل سوك
من تگوده حيل أمه
لخيمت زينب أنه اليوم
اگود الشارب وزلمه
افحط عسكر ابن ازدياد
وابن زياد اطش دمه
ولا اخليهم يگولون
مات الكافل بهمه

تعثر زلم من عيونه
بل حومه كلهم يجفونه
زلمه وفحل ميگدرونه
منو يقدر حيله بيومه*أخذ عهد تبقه علومه

وحگ دم الرضيع الطاح
بس ما طلح عل غبره
كلمن يوصل لزينب
وحك زينب حفر گبره
إنه الكافل خدر الحسين
وبن ذاكَ ابو الفقره
ابن العارك بصفين
وبن الفاطمه الزهره

سهل صعب حارو بأمره
عطر حرب ينشر صدره
ابن علي ياهو يگدره
منو بعد هم يلومه** أخذ عهد تبقه علومه

زعل وعيونه تجدح نار
ياهو يسكت عيونه
الف واحد يطره بسف
كلهم ما يشوفونه
لغه قانونك انيوتن
العالم طايره دونه
من اجبل عليهم صار
الجانو ما يحسبونه

اسد وگف يزئر بيهم
أخذ عهد ميخليهم
صحف كتب ما تحميهم
حفض علم جده وصومه *** أخذ عهد تبقه علومه

وكف فوك النهر عباس
وگف وكفت أبوه حيدر
سواها الزلم خرفان
گدام الأسد تفتر
خلاها الجيوش أصيح
اجانه الفارس الابهر
اجانه الما يعرف الخوف
وعله سمعه ابد ما مر

ابد ما يحسب حسابه
مو سيفه الحچه گرابه
من شدتله عصابه
أخته وبعد كلمن يومه *** أخذ عهد تبقه علومه

تمت كتابتها في/١٨/٥/٢٠٢٤م
قلم خادمكم/حسين علي الدليمي