⛰МагIарухъа харбал

Хунзахъ 
КIудияб Бергьенлъиялъ 80 сон тIубаялде ва Халкъазда гьоркьосеб руччабазул къоялде «Этюды жизни Сиядат Казиевой» абураб выставка рагьана «Хъахlал къункъраби» музей-комплексалда. С. Казиевалъ бахъараб 20 суратги, цифровияб къагIидаялъул цогидал хIалтIабиги руго выставкаялда лъун.

Гъуниб районалъул гIаммаб лъай кьеялъул идарабазда тIобитIана информациялъулаб хIинкъигьечIолъиялъул бицунеб тадбир. ЦIалдохъабазда малъана Интернеталдаса битIун пайда босичIони батIи-батIиял захIмалъабигун балагьазде ккезе рес букIин ва гьелдаса цIунулеб къагIида.

ГIахьвахъ
ГIолилазул библиотекаялда, Халкъазда гьоркьосеб руччабазул къо кIодо гьабун, тIобитIана «ГьечIо дудаса берцинай щийго» абураб тадбир. Районалъул бетIер МухIамад МуртазгIалиевасул рахъалдаса баркигун сайгъатал кьуна СВОялда ругел ракьцоял аскариязул улбузеги лъудбузеги.

Гумбет районалъул администрациялъги баркала кьуна гIагараб ракь цебетIезабиялъулъ кIудияб бутIа лъурал ракьцоял руччабазе, СВОялъул гIахьалчагIазе гуманитарияб кумек гьоркьоса къотIичIого битlулел Руччабазул советалъул вакилзабазе.

ЦIунтIа
Халкъазда гьоркьосеб руччабазул байрамалде «Россиялъул улбул» абураб ТIолгороссиялъул жамгIияб гIуцIиялъул ЦIунтIа бугеб отделениялъ ва районалъул администрациялъ районцоял, ВатIан хириял ва квер гIатIидал руччабазе баркалаялъулаб тадбир тlобитlана. Грамотабигун сайгъатал кьуна СВОялъул гIахьалчагIазе хIалтIизаризе сеткаби хьухьулел ва цогидабги кумек гьабулел руччабазе. 

Шамил районалдаги Халкъазда гьоркьосеб руччабазул къо кIодо гьабун кIудияб тадбир тIобитIана. Районалъулго батIи-батIияб хъулухъ-ишалъул гIадамалги СВОялда гIахьаллъулел аскариязул 100 гIанасей эбелгун лъудбиги гIахьаллъана районалъул культураялъул минаялда тIобитIараб байрамалда.

Казбек районалъул ОМВДялъул хIалтIухъабазги администрациялъул хIалтIухъабазги баркана СВОялда ВатIаналъул тIалабал тIуралел ва гьенир хварал васазул улбулгун лъудбузда руччабазул берцинаб байрам.