قصيدة ( دمعات عيني جمرات)
لسان حال زينب الحوراء (ع)
ــــــــــــــــــــــــــــــــــــــــ

دمعـات عيـني جمــرات
وانفاس صدري حسرات
ماتدري بيه
ماتدري بيه


°°°°°°°°°°°°°°°°°°


حسيت تهتز الشمس من عكست اخيالي
ما شافت الريشه ترف يم ضلي يـ الغالي
زعلانه نزلت للأرض والواطي عل العالي
حزنانه مشتعله حزن طافت على الوالي
حسـيت كلهــه آهــات
وخيوط ضيهه عبرات
ماتدري بيه
ماتدري بيه


°°°°°°°°°°°°°°°°°°


ذرات و تراب الأرض يبچـن على حـالي
ألتمن و طـارن سـوه يمشن وره اذيالـي
عــالعين رادلـي ستـر مـن اوصلت تالـي
حالك يبو الغيره صعب حالك شده بالي
ذرات هنه ذرات
آتصيح يمي مامات
ماتدري بيه
ماتدري بيه


°°°°°°°°°°°°°°°°°°


مـزروع بعيونك سهـم هـذه الگطع بينه
ياريت تنهـض ياگمر تنـظر لأبـو اسكينه
عطشان متوزع وذر صوب الخيم عينه
عالگاع مگطوع النحر حرگو صـواوينـه
وآگبال عيني شمات
اتحوم عدهه غايات
ماتدري بيه
ماتدري بيه


°°°°°°°°°°°°°°°°°°


فرهود صاحو بالـخيم و انته العلـه لسـاني
حشمتك و مـامش خبر شـو عجبـه تنساني
ضليت اصيحن ياگمر واصرخ على اخواني
و النـار تاكـل بالـخيم واخـذت تـره اردانـي
بالنـار خويه بالنـار
ضليت ويه الصغار
ماتدري بيه
ماتدري بيه


°°°°°°°°°°°°°°°°°°


الليل للـوادم ستـر و انه آختلــف ليلـي
نسوان وايتام الضعن عطشانه تشكيلي
منهم اجيتك اشتكي يا خويه دحچيلي
باجـر يريدون انسبي ويا هـو اليباريلي
عالگاع خويه عالگاع
العيـال بعــد السـباع
ماتدري بيه
ماتدري بيه


°°°°°°°°°°°°°°°°°°
كلمات  :  حيدر  العمار  الخزعلي
.

لحن قصيدة
( دمعات عيني جمرات)
بصوت الرادود سيد سراج الموسوي

قصيدة ( امني بينه)
ليلة الانصار

ــــــــــــــــــــــــــــــــــــــــ

أمني بينه يزينب  ... أمني بينه
أمني بينه يزينب  ... أمني بينه


*****


احنـه خدامـچ اجينه لخيمتچ بالرايه
بيهه خطـينه بدمـانه عالـعـهد وفـايـه
مانعوف حسين وحده نقسم بكل ايه
مـا اجيــنه للـغـنائم و الفـرات ومـايه
و الله يا العقيله
شما نبذل قليله
كون الدم نسيله ..  كون الدم نسيله
أمني بينه يزينب  ... أمني بينه يزينب


*****


مـانفـارگكـم يزينـب الا واحنـه ويـاكــم
لـو تـوذرنـه الهنادي دمنـه قبـل دمـاكــم
لـو يشيعونـه جنـايـز و الله مـا ننساكـم
احنه من باقي التراب الـ الله بي سواكم
مـن عدكم بدينه
نخدم احنه اجينه
نفخــر و انتـميـنه  ..  نفخر و انتـميـنه
أمني بينه يزينب  ... أمني بينه يزينب


*****


خبرينه و احنـه بأمـرچ بالأمـر حاچينه
نركب اضهور المنايـه نركض ابرجليـنه
بالمعـاره انسـوي ثـوره حيـدر امـربينه
ندوس رايتهم يزينب باجـر اتشوفيـنه
أُمري و شرفينه
يالحره الحزينه
وسفه تحشمينه   ..  وسفه تحشمينه
أمني بينه يزينب  ... أمني بينه يزينب


*****


التراب الجوه رجلچ يا العقيله انزوره
منهو يوصلكم يزينب نگلب المعموره
الحناجر تبـقه تهتف والهمم مذخوره
مـو بعيده الله ينزل بينه باجر سوره
نسبگ لو مشينه
نرهب لـو بـَدينه
گدهه وتـُعرفينه  ...  گدهه و تـُعرفينه
أمني بينه يزينب  ... أمني بينه يزينب


*****


لا يشغلونچ يزينب يا عقيلة هاشـم
غيرة العباس بينه نختلف عـالوادم
لا تهمـين بعمـرنه احنه گــد القاسم
غايـة الغايات يبقه هـالمخيم سالم
خـدام الضعـينه
تسعر جمره بينه
منكم مــا لگينه   ...  منكـم مالگينه
أمني بينه يزينب  ...  أمني بينه يزينب


*****
كلمات  :  حيدر العمار الخزعلي
*****

لحن قصيدة
( امني بينه يزينب)
بصوت الرادود سيد سراج الموسوي

قصيدة ( شاخص اگبالي)
ليلة عبدالله الرضيع
لسان حال امه الرباب ( عليهم السلام)
ــــــــــــــــــــــــــــــــــــــــ

شاخص اگبالي بالرمح
خلاني امشي وانچبـح
مشبوحه عيني والهوى
يتلاعب ابشعره السرح


•••••••••••••••••••••••••••••••


توه صاير يا بشر
واوصافه چن عمه الگمر
يابس دليله وانذبح ... عبدالله بعده ماكُبر 

اول سفرته من الحضن
صوب المنيه و الحزن
اليشبه افلاك السمه  ...  ياوسفه ضامي يندفن

الناس احس الحسدته
بحضن المنيه اتمنته
فوگ العوالي شالته
يتلاعب ابشعره السرح


•••••••••••••••••••••••••••••••


ماحاچي بعده ما مشه
ليش السهام امعشعشه
ابنحره و تلاثه طبك   عاينه واعلينه انغشه

ماله جرم ماله ذنب
من دمه اسمه ينكتب
فوگ السماء السابعه   بچف الحسين المنسلب

يملي چفوفه بالدمه
يشمرهه تتحنه السمه
وهـناك تصرخ فاطمه
يتلاعب ابشعره السرح


•••••••••••••••••••••••••••••••


فرحانه من صار اشكثر
صليت انه لله شكر
لمن وهبني هالطفل  ...  ضنيته لأيام العسر

ضنيته ذخري هالـولد
ما چنت احسب بالمهد
يبدي عذابي وانحرم   ...  ما انظر عيونه بعد

ضنيته يكبر حسبت
تالي على فراگه متت
بالنبله مثله اتصوبت
يتلاعب ابشعره السرح


•••••••••••••••••••••••••••••••


تلگيته عطره بالهوه
شميته وگليبي انچوه
قربني ياحادي صحت ... اتماشه وي راسه سوه

نزلي راسه اتوسلت
ياحادي گتله مو متت
خليني اضمه بالحضن  ...  من الشمس مايلتفت

مارحم بيه ولا عطف
گلالي سكتي وانصرف
ماعنده غيره ولا شرف
يتلاعب ابشعره السرح


•••••••••••••••••••••••••••••••


عَجبني غافي مارمش
صار الرمح لابني نعش
خلاني ابچي بلا وعي  .. ذابحني من ليل اهدعش

بأذاني لسه بچيته
عطشان ضلت صورته
بالبال ماضن تنمسح  ...  فدوه اروح لضحكته

مالمني بعده اي سگف
والحاله صعبه تنوصف
لـوني بغيابه منخطف
يتلاعب ابشعره السرح

•••••••••••••••••••••••••••••••
كلمات  :  حيدر  العمار  الخزعلي
.

لحن قصيدة
(شاخص اگبالي)
بصوت الرادود سيد سراج الموسوي

قصيدة ( بده وكت اللطم والنوح)
مزج مع القصائد الثراثيه

للخدمـه
ــــــــــــــــــــــــــــــــــــــــ




            بـده وكــت اللطـم و النـوح   والاه
          على حسين الزچيه اتنــوح     ويلاه
                  
•••••••••••••••••••••••••••••••••••

عـ الموعد بده المجلس اجينه بحرگه مشتاقين
بده القاري يوون بصوت و احنه آگباله ملتمين
مثل الماي گال حسين واحنه بفگده عطشانين
چن حمزه بده ينشد واحنه انصيح آه يحسين
آه يـحسـين ومصـابه .. لـجله العـين سچـابه
يـحسين يالذچـرك ابطـرف السـاني
وحاشـك لـن يـوم الـوعـد تنـسانـي
وآنـه اعتـقادي ابـدفتـرك عنـواني
وناجـح الصـار ابـدفتـرك عنـوانه
    
     ضل يقـره دليلي  وروحي      ويـاه
    على حسين الزچيه اتنــوح     ويلاه

•••••••••••••••••••••••••••••••••••
بده يقره بحزن وبـآه يجري انشوف گام العين
من سولف على المذبوح حمره چانت الخدين
بچانـه صدگ مـن صاح متگطع وذر الحسـين
صـوب مهجتي من گـال خل نقره مثل ياسين
ياحسيـن بضمايرنـه** صــــحنه بـــــيك آمــــــنّه
لا صيحة عواطف هاي **  لا دعـوه ومجــرد رأي
هـذي مـن مبادئنـه*** صِحـنـه بـيـك آمـــــــــنّـه
     ضميري وكل يقيني الـ الله     سواه
    على حسين الزچيه اتنــوح     ويلاه

•••••••••••••••••••••••••••••••••••

اجه يوم الوفه والناس تصرخ ياگمر هاشم
كل چف بصدر مطبوع و أول واحــد القائم
لـو گال وحچـه مرخوص ما تلگه زند سالم
مـن يقـره المسه الرادود للعباس چن باسم
يعباس فگدك هضمنه   يعباس حرگو خيمنه
  
     مــا نگـدر عضـيد حســين      ننساه
    على حسين الزچيه اتنــوح     ويلاه

•••••••••••••••••••••••••••••••••••

من نبچي على الشبان واجب نذكر القاسم
من صد و لـگاه حسين واگف لازم الصـارم
يطلب رخصه منه يريد ينزل ينحـر الوادم
للحين الصدى موجود يقره بالحزن جاسم
جسـام يا ضنوتي ...
رايح ... رايح امن اعيوني
ما رحمني الدهر أنته نور البصر
رايح  ... رايح من اعيوني
  
     عــن رملــه حچــه ودلالـي     بچاه
    على حسين الزچيه اتنــوح     ويلاه

•••••••••••••••••••••••••••••••••••
كل ليله بشـهر عاشور اتـوشح ثيـابي السود
مثل الحره گلبي ابنار وخدودي عليه اشهود
امسح بالـدمع كل ساع و المدمع يـرد اردود
عله زينب اجر حسرات واتذكر رضا الرادود
زيـنـب يـا غـريـبة  ..  الله اشــمـصـيـبـة
وجـهـچ يا زينب وين  ..  مـذبـوح اخوچ احسين
و الـجـثـة سـلـيبة  ...   الله اشــمـصـيـبـة
   
     ونعــي ملـه وطـن بلساني    طرواه
    على حسين الزچيه اتنــوح     ويلاه

•••••••••••••••••••••••••••••••••••
كلمات : حيدر العمار الخزعلي
.

لحن قصيدة
(بده وكت اللطم والنوح)
بصوت الرادود سيد سراج الموسوي

قصيدة ( سر الكون )
للخدمـه

ــــــــــــــــــــــــــــــــــــــــ


         سـر الكون يَـم بابك
        آه يحسين ومصابك

«»«»«»«»«»«»«»«»«»«»«»«»«»


دليـني درب وصـلك يـذابحـني
انه مقصر واريـدنك تسامحنـي
فـلا امـوذر ولا بتــار جـارحــني
بطرگ دمعي يمسيني يصبحني
انطـي الـروح بثوابك
آه يحسين و مصابك

«»«»«»«»«»«»«»«»«»«»«»«»«»

انـه اهــواك و اتمـناك تـذكرني
ولـو لمحه يبو السجاد تلمحني
حلم يقضه والعبرات تفضحني
اسيـر وياك اتمنه و تصافحـني
كون انصاب بصوابك
آه يحسـين و مصابك

«»«»«»«»«»«»«»«»«»«»«»«»«»

احسك دوم بعيوني يوجداني
ولا ناسيك واتمنـه مـ تنسـاني
انه گلبي اليوزع دمـه شرياني
الك مملـوك و العبـاس بچاني
ذب اچفوف بـ عتابك
آه يحسين و مصابك

«»«»«»«»«»«»«»«»«»«»«»«»«»

عشت احلم بـ فيايك تخلـيني
حلم عمـري بـطيوفي تلاگيني
شكبر حضي لو مره تحاچيني
العشگ انته و اتمنه تنـادينـي
أسمي ريـت بـكتابك
آه يحسين و مصابك

«»«»«»«»«»«»«»«»«»«»«»«»«»

بلضه المحشر اناديلك تشاهـدني
اجي ألطـم و أنوحـلك يـ مـاردني
اصيح أسمـك والأكوان تحسدني
محـال اهنـاك اناديك و تباعـدني
نعيش آنموت احبابك
آه يحسين و مصـابك

«»«»«»«»«»«»«»«»«»«»«»«»«»
كلمات  :    حيدر العمار الخزعلي
.

لحن قصيدة
(سر الكون)
بصوت الرادود سيد سراج الموسوي