ليش كل هذا الصبر ..وهل عذاب بهل عمر
شوكت لمصابه انكسر ..ولجرحه مانام

شوكت اعيشن غربته..واعرف المن دمعته
شلون عاش بحسرته.. ١٤ عام

اختنگ نور الله وطفه بين الطوامير
شنهي اعرف عن مصابه وكلي تقصير
ليش حدب ظهره من سجن اشجره عليه
وجانت الحرية موت وعمره اگصير

يسئلمن المحتار..عليها اشصار..ما نعلم بالسجون
ليش الجدم مرضوض..وعليه مفروض ..سلاسلهم يخلون
امن السجن لو سجان..طبع نيشان..مرسوم اعله العيون

وآه ويلي يامولاي..يبن جعفر اويلآه
____________________

أله بس اقره السلام..وجاهل بحقه امام
روحي ماليها الظلام..وضايع قراري

على المحروم الشمس..المثلي جا يمتى يحس
ويعتذر عن الامس..شيكفي اعتذاري

ريت احس بالام كلبه وحشة اليل
ليش شاب وما يعينه صاير الحيل
يوم عاشر عايش اباله والخيام
نارها تحرگ ابروحه وهدت الخيل

صار الجسم نحلان..اوجه ذبلان..جن فاطم صفى خيال
ومن حقه هم ممنوع ..وحنى الضلوع..وحاله صار ياحال
جا وين الينشدون..سجن هارون..ظهر مولانا بيه مال

وآه ويلي يامولاي..يبن جعفر اويلآه
____________________

لغيره ما صب الدمع..لغيره المن انفجع
كون الطمله ضلع..مولاي هل يوم

ال عالارض سبل اديه..انعى كل عمري عليه
شوكت احس نار الي بيه ..التجرع اسموم

لا اهل يمه وكضه من غير تغسيل
راح مجتول وعكس كل المجاتيل
محد ايطالب بدمه تكول مطلوب
وشيخ هاشم ما يصحله اربع محاميل

ملت محاميله..والتشيله ..غرب وين اليشيعون
عالجسر ضل نعشه..وعليه وحشه..يريد اهله يحضرون
لا شيعته حضروا..وعليه لطموا..ودمع تتجاره العيون

وآه ويلي يامولاي..يبن جعفر اويلآه
_____________________

اليوم يخلص كل عذاب..وللفرج ينفتح باب
وصار موعد للمصاب..اكبر حسافه

جنازه مو سالم طلع..رجع بس ميت رجع
جثه عالگاع انوضع..بجسر الرصافه

يعاينه رادو طبيب وايعرف البيه
ليش متغير اللون وشنهي ماذيه
صاح اذا عنده اهل تحضرله ابساع
تشوف منهو بسم غصب هل ميت ساگيه

وتطالب بدمه..ولد عمه..الهواشم خل تشب نار
الماسكتو بعيله..تجي تشيله..وتشاهد للجرى وصار
وين ابنه المهدي..امن السندي..يجي ويطالب الثار

وآه ويلي يامولاي..يبن جعفر اويلآه
_____________________

يا امام الرافضا..جيت احلفك بالرضا
چفي ابد لا ترفضا..وانفي رقادي

لجرحك ارد اني اغترب..بدونك يضيع الدرب
انت دين وديني حب..انطيني مرادي

هاك ادي وحطلي من قيدك يمولاي
فاكد الراي واجيت الصاحب الراي
اعليك امشي القاسم ومعصومه وانخاك
اتگودني من العدم واللزملي يمناي

اليلزمكم اتلزمه..وللخدمه..تفك للمضطر الباب
ياموسى بن جعفر..إنه المضطر..دخيلك يبن الاطياب
سائل طرق بابك..وعلى مصابك..انذرت كل عمري ينصاب

وآه ويلي يامولاي ..يبن جعفر اويلآ
____________________

حسين سعد البهادلي

https://www.tgoop.com/Hussein_s_b

مشاهدكم تئذيني
ضريح الها بوسط عيني
عقيدة دمعي ابجيها
بدموعي يكتمل ديني

شبر اعله الارض صارت الگبور
ومحد يعتنيها والها يزور
اهل البيت صفوا تالي ابلا بيت
وبلايه شواهد ضلت دور

ياگاع بله استحي
من اكبور آل النبي
عندچ چم طالبي..بالغرقد

حجارات اعله الترب
والعين الهم تصب
ساده وچنهم غرب..صار شكد

اتضيع روحي ومنهم ولا اضيع
ماعدنا مطلب غير نبني البقيع

___

بدعاء الندبه من اقره
عجل ياولي الثار
شيهيجك من بعد الطفوف
وتنضر بالبقيع اشصار

السادات البريه ألهم يزاد
عبدك يندبك اسياده ابعاد
حنت روحي رادت بس تطوف
من مأوى الحسن المأوى السجاد

عجل يبن الحسن
ثارات الكم بقن
مايمحيها الزمن..بگد صبرك

اطلب ثار الحُسين
واطلب دم الجنين
وغرقدكم ضل حزين..ينتضرك

واطلب بسيفك يالثار الرضيع
ماعدنا مطلب غير نبني البقيع
_

شكثر ثارت مضمومه
تشب نيرانها وتنعاد
ماتبرد ترد كل عام
جمر يلهب تحت الرماد

انگلبت بالمضايف عدنا ادلال
وما نعدلها اله نعدل الحال
لخاطر فاطمه تگصد وتنوح
مكسورة گلب وي ضلع المال

فاطم تگصد تون
ام تنعى اچم ابن
شعنده اوياهه الدفن..اذاها

لو چثه اعله الثره
لو ماكو مگبره
والجرح شيجبرها..وبجاها

وچم مشهد اليلچمها تنضر فضيع
ماعدنا مطلب غير نبني البقيع
_

يضل مطلبنا حي للدوم
كلمن حق اله بدينه
وعگدنه اروحنا بهل يوم
روح وهمه شدينه

صرخه تضل تهز عرش الطاغوت
عجل يبن فاطم صحنا بصوت
عندك للبقيع طلابة هواي
زلم توحدت ما همها الموت

بچفك اعظم نصر
بيرغكم ينشر
وتنهض من چم گبر..انصارك

الغربه بجفك تزول
ها ياروح البتول
غيبه وماچن تطول..لثارك

مادام اكو طلاب حگ ما يضيع
ماعدنا مطلب غير نبني البقيع
__

حسين سعد البهادلي
https://www.tgoop.com/Hussein_s_b

السلامُ على وارثِ الانبياء
السلامُ على خَلَفِ الاوصياء
كلُ نبيًّ إجتباهُ الله
اعطاكَ ربُك كُل ما اعطاه.. ياحُسين
____

امن اول مابده التكوين اسمك الله گال حسين
ومنه استنبطك منه اصبحت كلهن خصالك

محد الله بيك ايقيس من يوم امتنع ابليس
ربك صورك من نوره وتمم كمالك

ولجلك يوم التحاكم چي انت بصلب (ادم)
وچا غافر اله من ما سجد لو بس بچالك

وانته بالمهد بعدك اتعلمت ابعلم جدك
مواريث الرسل والانبياء من فَي وصالك

يا من هو وجهٌ لمن سواه
اعطاكَ ربُك كُل ما اعطاه... ياحُسين
____

(اسحاق) انته وهبه سواك هيج انته الاله انطاك
رحمه اعله الارض يا نعمة الباري علينه

لدينك چم بلد عابر (هود) بضعنك امسافر
تصلح دينك ابدمك وجيت بهل ضعينه

بجيتك للخلق ناصح تخطب بيها واتسامح
يالجنك (شُعيب) وحجيك اُنزل بيه سكينه

ثابت للهُدى امناطر ومنا اعله الاذى صابر
(ايوب) الصبر جسدته بل زدت ابسنينه

أنت الذي جاهدت في مرضاه
اعطاك ربُك كُل ما اعطاه... ياحُسين
____

(هارون) ومعينه(الياس) وانته العون الك عباس
جاي ابحكمتك وبعصمتك تكمل رساله

وشيخ المرسلين احذاك (نوحك) چن حبيب اوياك
وما واحد هلك لو يتبع من صَحبه واله

بضعنك واهلك اتجاهد اترد كلمن كفر عابد
(يعقوب) الحزين ابحزنك ال الله بجلاله

(ذوالكفل) ابذكائك هام سويت الصدك بحكام
ميزت الحلال امن الحرام ابكل مقاله

والانبيا سَيّرتَها لله
اعطاكَ ربُك كُل ما اعطاه..ياحُسين
__

(موسى) وكلمة الرحمٰن بحچيك منشرح قرآن
مو عصه ابيمنك لا كتاب الله تكلم

واهب(لليسع) ذكره وامك فاطمه الزهره
عرفوك وعجب للجاهدك من ما تندم

وانت ولا تهم بيهم (ابراهيم) وظهر ليهم
واكبر طاغيه بيهم صنم بيدك تهدم

(يعزير) النصر ربه وربه مهد الدربه
وكل جيل السبق والي تبع منك تعلم

(يونس) نجا بسمِكَ مُذ ناجاه
اعطاكَ ربُك كُل ما اعطاه... ياحُسين
____

ما شافو حِسن ربك گوم الگصدت الحربك
(يايوسف) جمال الله انتمت ليك المناير

طحت وطاحت الاكوان يمبچي الانس والجان
يا مالك (سُليمان) المُلك ادوسك حوافر

بضلعك تكسر امن تجيس وما صار الجرى (الادريس)
جسمك ما رُفع فوك السمه وجرحك يكابر

وراسك عالرمح يعلى يقره المصحف ويتلى
(يحيى) جسدك راسه انرفع ابلا ضماير

ناديتَ (وا مُحمداً) جداه
اعطاكَ ربُك كُل ما اعطاه.. ياحُسين
____

وانت الاقرب لعرشه محد شيع لنعشه
(صالح) مو اجل ولجله اصبحت مثل القيامه

نفديه ابذبح اعظم (اسماعيل) وصبح مُرحم
هوه انت ذبيح الله وذكر الله ابكلامه

(ياعيسى) وترد الروح رد لطفالك الي اتنوح
راحت بالسبي اتحشم تردلها بسلامه

حيره البيها تدري اتزود ها يملينه( لداوود)
اطفالك بالحديد امگيده هاي اليتامه

من مِثلُكَ جار الزمان آذاه
اعطاكَ ربُك كُل ما اعطاه.. ياحُسين
_

حسين سعد البهادلي
https://www.tgoop.com/Hussein_s_b

انعاك من الطف متت ياسيدي بحسرتك
يطحن سنينك جن رحى وضل بيه اثر عبرتك
ياباقر آل المصطفى عشت الجرى اوي عمتك

تشاهد حرم يتراكضن
وضاع الضعن ماضل ضعن
منانه روحك ونگضت
عماتك بيوم اطلعن

وللضعن ماضل بس عليله
وروحك تباري للعقيله

يا شيمتك العمتك تحمامي
من بالخيم ماضل علم ومحامي
__

نيران شبت بالخيم وحترگت الطفوله
باربع سنين اتكفلت من ناخت الحموله
وتدري الحچي ماينحچي ولهذا ماتگوله

بعينك شفت سبيي الدلال
وبيدك تشد ذيچ الحبال
بكل عگده روحك تنعگد
تنسى وتمر عينك خيال

وتعاين العمتك سبيه
تبجيلك وتبچي الرقيه

نفس العمر ونفس الجمر سحكته
وبنينوه الرمل الچوه ركضته
__

معصوم چفك ونعصم بحبل الرزيه تالي
وعينك تصب لجل الحُسين ولزينبك تلالي
غالي البقه فوگ الثره والعلهزيله غالي

بين الحرم بين الحُسين
ضلت الك مشبوحه عين
تبقى لون تمشي بيسر
ياحيرتك تگصد لوين

ياهضمة وداع الغوالي
وياهضمة الصعدن عوالي

خدر النبي يمشي لسبي حرامات
وتغربن بيه المشن يتيمات
__

ياهضمة ايام السبي واكلفهن الخرابه
امن تشوف خل مات اعله خل لمن ندبله بابه
دار الوكت بآل النبي ياجرحك وعذابه

وتحملت درب اليسر
وعانيت بس جان الكسر
لمن شفت تالي الضعن
بنسوانه يدخل للقصر

ذباحك الشام ومراره
وهم ذابحك قصر الاماره

فتر الزمن وماضل وطن لعفافه
وبالطالبي يحكم دعي حسافه
__

طلابكم چنه العطش والسم گضه الهواشم
تتجرع بسم الزمن وتنحب على الفواطم
تالي انگضه نحبك چتل وهل عاده عالضياغم

والسم طفه ذاك الحسن
البرسومك وسد الجفن
واشوه ألك شيعه احضرت
وجنازه ناحت بالدفن

ميت لچن دمعك يلالي
عالضل طريح اتلث ليالي

محد دفن وبلا چفن حُسينآه
اهل القرى الدفنت ترى اويلآه
__

حسين سعد البهادلي

_شهادة مولاي الباقر عليه السلام
https://www.tgoop.com/Hussein_s_b

بسم الجروح استقبل شهر
البيه للحُسين الظهر انكسر
واصبح غريب ابين العده
من العلم ضل اعله النهر

مديت اديه لجف الغريب
بلكي جرح من عنده تصيب
وكلبي مثل عام الي مضه
ماعنده سلوه غير النحيب

من الطفولة وما مضى انعى المصيبه
اول حجاية امن انطقت زينب غريبه
شديت اله عهد الدمع براية كفيلة
والساقي يسقيني دمع وجيت بوسيلة

انساك هاي حجاية.... لجفوفك وللراية
_

نوحي المصابة متخذه دين
وقدس فرض بيه صار الونين
ماعندي غيره وشما حجو
ماعندي مولى الا الحُسين

من غيره ابرى وهوه الولي
روحي تولت ابنُ علي
وتوله دمعي لصب الاجل
لأخته الغريب من تنولي


منه ولجله دمعتي وخدر الهواشم
خل تعمى عيني لو بجت غير الفواطم
وبس للمشن عنه بهضم وبهزله ماشين
من رايحين اويه الغرب يسمعها الحسين

رايحين.... خويه عنك رايحين
____

احمي خدمتي ابحمى الكفيل
حاشى بخدمتي عنه اميل
تفضل عليه سوالي بيت
بيته العزاء لبيته دخيل

وانه ادخلتله بجاه الگمر
وشكد لطف بيه ومستقر
واصبحت اردد كلمة حسين
من الزغر والگلب انفطر

كبرني بيته اعله البجي مثل امي حسيت
داريت دمعي امن الزغر مو روحي داريت
الماعنده دمعه ادري اله يخلص متاعه
بگماطي عشت مصيبته من الرضاعه

جنت بگماطي بس امي.. لبيت قرايه تاخذني
_

متفضل اهواي وما حصيت
واسجدله شكراً كلما بجيت
ضعت آنه وي الناس شكثر
وبس بعزائه روحي لكيت

بكثر الشكر دمعاتي تدوم
وخلي تلوم الناس التلوم
محد جذبني غير الحُسين
هوه شتراني وكلها تسوم

ياهو إنه حتى استحق منه عده عطفه
وشكد اريد اشكر اله المدالي جفه
اتخلى عن كلشي وفقط ليه انتمائي
ضايع وروحي حصلت بدمعة عزائي

ضايع وحبك لگاني.... بعد ماريدن اضيع
__

كاضي العمر وياك اعتذار
وانت بخيامك مستعره نار
بين الاكونُ او لا اكون
ياكلبي كتله ثبت قرار

وانته قراراي وماعندي غير
انت العشك الاول والاخير
انا الصغير الرابي بهواك
وياهو اليرحمه غير الكبير
الماعنده غيرك وانته الكبير

وبرحمتك هاي السنه اخدم ردتني
ومن عالمي لعالم غرامك اسرتني
يامَن لاهلِ الذنبِ والدُنياْ مناراْ
فَديةُ التوابِ منكَ الإعتِذارا

اعتذاري اقبل... احروف اعتذاري
____

حسين سعد البهادلي
محرم الحرام1446
https://www.tgoop.com/Hussein_s_b

حُسيناً وآه حُسينآه
___

ابدي اوياك يامولاي بتوبت حر الك گاصد
والزم ابابك اشما طال رضاك وعنه لا مارد
اعترف بذنوبي واني ادري اليقدم ذنبه تغفرله
تلزمني واهد جفك بس هلمره لا ماهد

اقبلني عبد مملوك
اباب اخيامك اتذلل
كلشي ولا تشيل ايدك
عني وبيه ماتقبل
رؤوف وتقبل المثلي
بأمك فاطمه اتوسل

مولاي ارحمني اكتبني اوي الخدم
من دون الخدمه اعمه اصبح عدم
حُسيناً وآه حُسينآه
__

اجف ابلايه خدمتكم بجفاكم عودي صار اصفر
وضعيف الحال من دونك الهوه لو مرني اتكسر
بضلام الدنيا شفتك نور وبس حبك فقط مخرج
اركضت ملهوف الك مولاي وكمت بذنوبي اتعثر


دنيه بلايه خدمتكم
عسى الله لا يطولها
واذا ماتبجي لمصابك
ذمة عيني اشكلها
اشد حيلي بخدمتي اعليك
عكده اوحدك اتحلها

يامالك عيني سنيني لو كضت
من غير اعيونك ودونك شحصلت
حُسيناً وآه حُسينآه
__

اسعى ودمعتي بخدي تقبل هل سعي مني
مقصر عندي بس دمعه عساها اوياك تجمعني
طرفة عين ماابعد منك اندعي لربي
اشهد تسمع الينخاك وادري بهاي تسمعني

المربط خيلكم حارس
جبيره الامنية ادري
المهم بس اتبع اضعونك
اخذني وين ما تسري
انتشلني امن الضياع ارجاك
اوياك ويبتدي عمري

ادري اليلزمكم منكم ينلزم
تارسني بخيرك بغيرك مااهم
حُسيناً وآه حُسينآه
__

اريد اوياك امل الغير وحدك انت ما ملك
رحمتك توسع الدنيا وكلشي لايذ بظلك
بفيّ اخيامكم اگعد وفزز جون البروحي
حتى ايئدب افعالي برخا وبشده ماخذلك

الحس قصعتك مولاي
وتغزر نعمتك بيه
لحم اجتافي من خيرك
كبرت وبين اعليه
من جدمي لحد هامي
فاض وتارس ايديه

لو عد افضالك بجالك ماحويت
احسب كل عمري وادري قصريت
حُسيناً وآه حُسينآه
__

عهد هلمره إنه نادم وقسم ما اخلف بعهدي
بحذر من اخطي الك خطوه انتهي ومنك ارد ابدي
شلون تريد وين تريد انت اختار ألي بكيفك
عفت كلشي مهم يحسين وبس انته الاهم عندي

الزم نيتي ابيمناك
وبيضه اوياك خليها
وذا تسمحلي تتفضل
ارد اخيامك ابچيها
ابجيهن بچي الثكلى
وجمرها ابگلبي اخليها

يا اخر حزني ووني وأوله
من دمعه اخلقني ارزقني كربله
حُسيناً وآه حُسينآه
__

حسين سعد البهادلي
محرم الحرام 1446
https://www.tgoop.com/Hussein_s_b

يهل مضعن
رحيلك وين
اغمض عيني من الخوف
ويفك عيني الدمع كوه
الزمه ويطلع امن العين
يهل مضعن رحيلك وين

الهوا ايحرك بيارغكم
ويشعل نار فرگاكم
واطيح ارماد وي دمعي
عسى طولك يضل سالم
وخلي ينحني ضلعي

بس عاد التفت بويه
واجبر خاطري بكلمة
ها يافاطمه ترحين
يهل مضعن رحيلك وين

ماضل بيه عطر داري
شلت حتى المهد ومشيت
اختنگت بعبرتي واصفن
شنفع بيتي بلا اهل البيت
اخلط دمعي باثارك
ونذر حنيت كل البيت
يلهبت ترد تاخذني
وترحمني لضعف حالي
مايبقى امان بدار
اذا من الزلم خالي
يهجرك صار جتالي
بكل خطوه علي تبعد تكبر بالعمر عامين
يهل مضعن رحيلك وين

تعال وشوفني بلياك
گلبي وحايطي تفطر
امن يسمع المضطر
يمن گلبك علي مكسور
لهجرك ضهري اتكسر
اذا بيها امل وياك
اجي من يستقر وضعك
من هسه واروح وياك
وما حمله سفر الاكبر
امن يسمع المضطر

عرضة خير يابويه
وعساها راشده النيه
محد يحسب ابضعنك
ويگلك بعد علويه
كلشي اصفر صفى بلياك
وبس دربك بعيني اخضر
تراها النيه معكوده وياكم اليلغفل ماشين
يهل مضعن رحيلك وين

شتلت اعيوني بدربك
واضل مناطره اعلباب
كلي شيجبر اجروحه
المن اهله بجرح ينصاب
اه يلباب اه يلباب
اموتن واكفه اعلباب
واني اتنطر الغياب
ويبس عود السگيته اسنين
يهل مضعن رحيلك وين

اصرختلك صرخة المخنوگ
يالماتدري اشخليت
روحي..
بس عليها بابكم مطبوگ
وعساهن لا مشلكم نوگ
اصرختلك صرخة المخنوگ

عفتني لاني جوه تراب
ولا فوك التراب اوياك رحاله
يابويه اسمع الحاله
الهوه لوهب يخوفني
اسدن عيني مرتابه
وشجم طيف يرعبني
والينشدني يذبحني
ليش لوحدج عافوچ....
شايفك بشر يحسين
واكف يرجف اخياله
عگبك حالتي حاله
مشيتوا وعفتو وسط الدار
وادم عدله بس ميتين
يهل مضعن رحيلك وين

بس اشرلي من بعيد
بجفك بويه اشرلي
اشارة ملگه موش اوداع
نص دمعي الجفيته اعليك
فايض بيه وجه الگاع
واقبل لو تأشر اوداع

بس المهم تذكرني
واكولن مانساني حسين
واضل اتنطرك لاخر نفس بالروح
وعساكم بالسفر طيبين
بس لا تسرع ابممشاك
رك النظر من عيني
طفله وشاب رمش العين
يهل مضعن رحيلك وين

اضن لأرض الغري ناوين
يهل مضعن رحيلك وين
__

حسين سعد البهادلي
محرم الحرام1446
https://www.tgoop.com/Hussein_s_b

انقام الاذان البيه جرح
تقيمه فاطمه
وتون وسط السمه
يايمه بنحيب..

ونشرت قميص المنذبح
وتضج بيه الارض
الدمع واجب فرض
يصب للغريب..

يايمه.. تنادي بدمعها
ومحني ضلعها.. يمه حُسين
يايمه.. تبچي اعله حاله
وضيعت عياله.. ومشبوحه عين

نثرت دمعها.. ونشرت قميصه.. لمات بضماء
وين اليواسي.. دمعه لدمعها......حان العزاء
___

شمضيعه من تمشي تون
وتدگ اعله الصدر
ويأذيها الكسر
ضلعها نست..

من مجلس لمجلس تطب
وتدور عالنعي
وصبح سلوه البچي
لولد لو بچت..

بدمعتها..تطب للمأتم
ويسعدها فاطم..الدمعه يصب
بدمعتها..بجفها استراحت
كل دمعه طاحت.. لضعن الغرب

كل ناعي لحسين.. يلچم جرحه.. تجزي دمع
باجر دموعه.. حصنه وملاذه.. يوم الفزع
__

شدو حيازيم الدمع
تحشم بالخدم
على الصابه السهم
وفطرله الگلب..

وتعينه البروحه كسر
ويعاشرله جرح
ويذبحه المنذبح
ودموعه تصب..

عاوني.. بنوحي على ابني
يالي تحبني.. سعدني بدمع
عاوني.. ليذرف دموعه
لأبني وضلوعه.. يطيب الضلع

باجر اشوفه.. ابلا ناصر احسين..فوگ الارض
وتنده بناته.. بويه الحگ النه.. وما ينتهض
_

باجر يصير الماجره
اعله ابنها وعيلته
وتشاهد غربته
يضل بالفله..

طايح وحيده بلا اخوه
وترض صدره الخيول
وعلى خيامه تجول
ويلاه كربله..

وتندبه.. شكبره حزنها
ام تنعى ابنها.. موذر تشوف
وتندبه.. يوليدي يحسين
وملتمه صوبين.. اعليه السيوف

تصرخ ييمه .. بلكي الحوافر .. منه تميل
اويها احنا انحير..بيه لمن تحير..بدمعه وعويل
____

عيش بمشاهد چن تشوف
وتشم حرگ الخيم
وبعد ماكو علم
يرف واخو..

بيا حاله لأم تسمع ابن
ينادي العطش
ويضل ابلا نعش
مابين العدو..

يوليدي.. بلهفه تنادي
تشوف الاعادي.. تسلب تريد
يوليدي.. ريت اسحكتني
الخيل واجتني.. وجسمك بعيد

يبني ومصابي.. واكبر جروحي.. وحزني الطويل
وكلمن بجالك.. وناح لغربتك.. عندي دخيل
___

حسين سعد البهادلي
محرم الحرام1446
https://www.tgoop.com/Hussein_s_b

اليوم ضعن الساده يسرج بالشگر
والچفافي تلوح محلاها الخضر
والستر چلب بأطراف الخدر
وابو فاضل يحدي ضعن العايله

يحدي وعيونه اتجادح بالشرار
خير غيم الحرم والعده بنار
حتى طير اعله الضعن ماخله طار
ضعن بحمى الله وحماية كافله

ضعن بحمى الكافل بيوم ارتحل
حيدر اختار وابو فاضل كفل
لشكو معگوده انوجد عباس حل
واللوه بزود ويمينه شايله

اللوه يرفرف على امتونه السمر
ياحلاته وعالعده شگد غيضه مر
سر الحسين وچفوفه بيها سر
الرحمه بچفوفه ونفسها الزلزله

خطط العباس دربه من مشاه
جدمه خط الگاع سيفه يخط سماه
والهوه يهب فقط لو حرك لواه
هبه حسين انطاه كونه وحلله

حلله الكونين واشرعله المسير
ورفع چفه مثل چف يوم الغدير
الكون عندي زغير عباس الجبير
گالها حسين ورفع چف للمله

گالها حسين انت يانعم المعين
وفه وغيره راضع امن البنين
يالبنها الخلف الليوث العرين
تقدم وجدامي ادخل كربله

ادخل ونكسها رايات العدو
حگه يتشيم المثلك عنده اخو
ماكو مثلك شهم وفه لابن ابو
هلا بكشاف الكرب والمعظله

بيك اشد الحيل والهمه اشد
ياحسام الباشط بجفي امن اههد
يلمعلم من علي تكر ما ترد
ويالبچفك تنعدل كل مايله

جسد العباس اعظم ملحمه
چا كضه الدنيا لمن سل صارمه
ياعلي ينادي ومدد يا فاطمه
وبيرق احيود الهواشم حامله
______
حسين سعد البهادلي
محرم الحرام 1446
https://www.tgoop.com/Hussein_s_b

طلعته بيدي امن الخيم چي عطشان
عبدالله ايروونه
يبست لهاته والگلب يرجف چان
من العده ايذبحونه

آه~ من گد الضمه.. تفطرت شفته ولسانه منفطر
آه~ وضايع مبسمه.. ريت من عمري الولد انطي عمر

حُسين حُسين.. گتله عبدالله وشفت دمعه يهل
حُسين حُسين.. عنده اخر شي بقه بس الطفل

گلي يالرباب.. ترسي عينچ بالولد
گلي يالرباب.. خاف مايرجع بعد
گلي يالرباب.. ومن علي يخله المهد
____

راح وحلم عندي الولد گطرة ماي
يرحمونه ويشربونه
ساعه وشفت رد بالمهر فاگد راي
حسين وتبدل لونه

آه~ من رد للخيم.. طاح الحسين وطحت وي طيحته
آه~ مذبوح بسهم.. جاب عبدالله ودمه تصب رگبته

حُسين حُسين.. اوليدي ابدل نحري بنحره اريد
حُسين حُسين.. وانذبح كون ابداله امن الوريد

ويتيه السهم.. بطيف مايندل يجيه
ويتيه السهم.. اسم الله والزهره عليه
ويتيه السهم.. وريت ما نسمع بچيه
____

ضليت اسكت البلخيم من يحچون
نايم اگول الغالي
وضليت اهز وما بقن بيه متون
مهدك ييمه الخالي

آه~ يالبعدك زغير.. بيا ذنب حضني فرغ منه خذوك
آه~ ما شفتك چبير.. وتلزم ايدي وأيد تلزم جف ابوك

حُسين حُسين.. گلي نام اوليدچ اشويه ويفز
حُسين حُسين.. وداعت الأكبر عمر اسهر اهز

نايم لا يفز.. گمت أللولي بالخيم
نايم لا يفز.. واحلم اوليدي سلم
نايم لا يفز.. وينده احلامي السهم
___

ياتعبي ورباي وسهر تالي الليل
وما لحگ ايتم حلمي
لباچر گلت فدوه اله ايروح الحيل
من يمشي ويگول اسمي

آه~ مذبوح الحلم.. وطشر النشاب ست اشهر هدر
آه~ كون اگدر ألم.. عمرك ويالضل حليب امك يدر

حُسين حُسين.. ياشريچ امصابي اشكبره المصاب
حُسين حُسين.. ارد اموتن شنهي ضلتها الرباب

حضن امك برد.. كون وياك انذبح
حضن امك برد.. يبني اموتن للصبح
حضن امك برد.. ونفرش حضن الرمح
__

حسين سعد البهادلي
محرم الحرام 1446
https://www.tgoop.com/Hussein_s_b

آه يوليدي.. شسوت بأمك مصايب كربله
آه يوليدي.. عگب فيك ما اضل مدلله
__

يالرحت للماي بس ماي السراب
يمه سهمك نابت بگلب الرباب
يبني نشاب الاجه ريت اعمى كون
ويخطي نحرك يلولد وبنحري صاب

امن ايدي ليد حسين سرت امن الخيم
وچان عطشان اعله نحرك چم سهم
واني ادري الراح يتخطى اعله موت
آه يعزي ومن رحت عزي انهدم

آه يوليدي.. شلت ايده ولا يذبحك حرمله
آه يوليدي.. عگب فيك ما اضل مدلله
____

يبني اطيحن عالمهد ورجع افز
ادري خالي بس گلب امك يهز
يبني عاده ومتني متعود عليك
وعاده اگول اوليدي نايم لا يفز

ريت اداويك ويصح ليك الدوه
يبني يالمفطوم حتى امن الهوه
چلمه اليمه ردت اسمعها عاد
وضاعت اليمه اسلبتها نينوه

آه يوليدي.. ماكو ابعيني مثل رسمك حله
آه يوليوي.. عگب فيك ما اضل امدلله
__

الله لا ينطيه يا يمه الضمه
عطشاك ونحرك ايروي السمه
عميه ريت اعيوني كون ولا اشوف
من وريدك جيتني مخضب دمه

ما صرت دون البعمرك يبني شاب
برد حضني يالنمت فوك التراب
يبني واليفرغ حضنها المن تعيش
شاب گلبي اعليك مو بس رمشي شاب

آه يوليدي.. رخصت عمري وبس عمرك غله
آه يوليدي.. عگب فيك ما اضل مدلله
_

ياهو ينشدي اگله الولد نام
وصرت اسكت ياهو يحچي بالخيام
هيج شادهني يعبدالله عليك
وكلشي يوجعني بغيابك كلشي گام

صرت بيني وبين روحي اعليك اصيح
وهيج امك گامت تگوم وتطيح
وگلت باچر تكبر وتچوتي اتصير
وباچر اعله ارماح اشوفنك ذبيح

آه يوليدي.. گطعيت انياط كل العايله
آه يوليدي.. عگب فيك ما اضل امدلله
__

ساعت حصت النار يصبح هل مهد
شلون ما ناغيك لا لولي بعد
بيا علي ويا علي ست اشهر كضيت
بعيني تكبر وين رايح يالولد

حتى ما لحگت تكبر لا مشيت
بسرعه اجيت ومني ابسرعه مشيت
احلم بساعت التلزم چف ابوك
وتمشي. مو للموت يالضلعي حنيت

آه يوليدي.. الما حضه السانك بگطره اتبلله
آه يوليدي.. عگب فيك ما اضل مدلله
__

خاف اروح وما احصلك طبيب
الجرحك الماله ضماد ولا يطيب
آه يا اول ولد والاول عزيز
حالت النسوان مثلك ما تجيب

شلون لو عنك مشيت ابهازله
وانته عالتربان تبقى بكربله
شلون بشلون امشي جسم ابلايه روح
ريت اضل يمك وبيك امعلعله

آه يوليدي.. عاجر ابدونك تسير القافله
آه يوليدي.. عگب فيك مااضل امدلله
__

حسين سعد البهادلي
محرم الحرام1446
https://www.tgoop.com/Hussein_s_b

ماغمض اليل
اخاف اعله الضعن ماغمض اليل
وي المجاتيل
اندهك يالطحت وي المجاتيل

انخاه يدلني لجسمك الشوف
فراگك يبعد امي عماني
وحمل ضلام ورعب هل ليل
ردت اعتنيك وتيهاني
وداعت الطاح وحاني ظهرك
هيجي ترى اوداعك حناني

محتاره اجيلك حتى الاگيك.. لو ابقى احامي مدللاتي
ثمانين طفله وطفل يحسين.. مرعوبه ومچلبه بعباتي
____

وابقى انعاك
لحد المنية وابقى انعاك
ياخويه وياك
تمنيت اموتن خويه وياك

تحرم علي عيشتي يحسين
لو ما انوح اليل كله
يا كلشي والفاكد المثلك
بعد بحياته خويه شله
أبچيك وگعد واوكف ابجيك
فراگك اثر بلگلب خله

ريت اغفى حجه وكلت بلطيف..يحسين عادك بيه اشوفك
ساعه وتجينه هزل النوگ.... راضي ولو ماراضي اعوفك
____

حنت النوگ
خويه الحنيني حنت النوك
وكلبي محروك
امن النوگ اودعك گلبي محروك

يل چنه مثل الرمش والعين
واقرب امن عيوني عليه
لا كتلك الله اوياك ووياي
لا ودعيتك بالمسيه
ردت ارفع ايدي وما شلتها
خافن تشوف احبال اديه

تحرم عليه الخويه اگولن... ياكوني بعدك لو گلتها
امشي وحسرتي تاكل الروح.. مو هيج تكضي آنه ردتها
_

رايده الموت
اختك يخوها رايده الموت
مايطلع الصوت
بكثر البچي مايطلع الصوت

لا صوت لا ضل حيل عندي
كثرت حمولي وظهري مايل
موعاده ضعن الهاشميات
ما الهن احد راية شايل
ياهو اليرده وكلها شمات
لو عال عگبك بينه عايل

الفارك هله وفارك دلاله.....يگضيها سكته وكلشي ماله
اوداعت الله حسين ماشين..اواحدنا خايف من خياله
____

حسين سعد البهادلي
محرم الحرام1446
https://www.tgoop.com/Hussein_s_b

(اجيت امن النهر)

توني اجيت امن النهر
بس النهر اذاني

يازينب وكلشي انتهه
واشتم حرگ صيواني

وتوسطت بين العده
شيسوي الضل وحده
وانضره على الغبره وشفت
الميتين كلها اخواني

ياخويه قلت حيلتي
هناك وتغير لوني
سبعين الف البكربله
شافوا دمع بعيوني

مو خوف دمعي من نزل
بس كافلچ بچاني

يدري امن اجيله منكسر
گطع جفوفه بكل كتر
خاف اعثر بجف بالمشي
يتچيلي چفه الثاني

راح الستر
ياجف اشيله اتحيرت
وما اكدر اثكيل اشكثر
مدري اني ظهري المنكسر
ومابيه اشيل ارداني

عباس كتله امن وصلت
خليني اشيلك للخيم
واصفن واكله ياخيم
هوه اليضل بلا اخو
شيَحسب اتضله خيم

وكتله يخويه لا تهم
مستقبل الخيمه جمر
الما فوگهه ايرفرف علم

يمه اوصلت
توني انه اريدن احضنه
وبعينه يعرضلي السهم

وستوحدوني بوكفتي
ويأشر اعليه العدو
هذا البقه ماله اخو
ذبحوه الماعنده اخو
يا ضيعتي من غمضت
ليحامي اضعوني منو
عباس مثلك وين اكو

واخر حچي منه اسمعت
يحسين زينب والخيم
ابخير كتله
بس طحت
ومدري اشلت من عنده ماادري اشلت

كلشي عفت
يم النهر كلشي عفت
جفوفي تخط فوك الترب
رديت ومتيه الدرب
وكوه الچ خويه اوصلت

طول الدرب
تتشمت بحالي الغرب
وشلون اسكتها التصب
طول الدرب

حسين شبقه عنده بعد كلشي يضيج بعينه
من طاح عامود الخيم تبقى بضماها سكينه

وراح احچي الج يم الخدر
چلمه بوسط وجداني
اتمنى عندي بالخيم
عباس واحد ثاني

يازينب وكلشي انتهه
واشتم حرگ صيواني


حسين سعد البهادلي
محرم الحرام 1446
https://www.tgoop.com/Hussein_s_b

فگدك ابد..ماينحمل
وشگد صحت..يابو الفضل

خويه ..من حرگوها خيامي
خويه..وفرت منها ايتامي
خويه..يموت اليركض ضامي .خويه

يضيع
اليركض بهيمه وبراري
وماعرف شنهي الصحاري
استوطنت نار اعله داري..يخوي

الرضيع
لا سلم لا شيبه ضلت
وجم يتيمه جتني سئلت
وين ابوي وعيني هلت..دمه
———————

نار بغصن..يابس عطش
هيج اصبحت..بليل اهدعش

حيره..لا رايه تحامينه
حيره..بدخان العامينه
حيره..وضاعت مني سكينه.. حيره

طفه
شوفي وبعد مااشوفن
المن اركض وين اروحن
خافن امشي وخاف اعوفن..طفل

صفه
بس ضياع اوي الاعادي
محد سمع من انادي
اتسمعه صوتي كل مرادي..وتجي
———————

صوتي الك..من ما وصل
ردتك تشوف..بينه شحصل

اتعنه..ليك ابين الحومه
اتعنه..ودروبك ملزومه
اتعنه..واشكيلك ملچومه..اتعنه

عذاب
ردنه نوصل ما وصلنه
ليك وعدونه حرمنه
نقتربلك بس يردنه ..العدو

مصاب
مر عليه وعالفواطم
ردنه جف امن الهواشم
يرد الفزع بالصوارم..عليّ
—————

يل ما گمت ..من الفرات
وادري الجفوف..امگطعات

جفك..طاح وطاحت خيمه
جفك..تترجاه اسكينه
جفك..ردناه يابو الشيمه..جفك

جروح
من عگبك احنه اغتربنه
وسمعونه باسمك ندبنه
وياسبايه صار اسمنه..حرام

نروح
بحسره عنك يابو فاضل
والهزيل ابلا محامل
ومحد النه رايه شايل..تشوف
——————

حسين سعد البهادلي
محرم الحرام1446
https://www.tgoop.com/Hussein_s_b

اعاين عالضعن مفجوعه مفجوعه
وكل وحده بگلبها انياط مگطوعه
كل حرمه تنادي يالولد يبني
وبس اني اعله اخوتي هنانه مفزوعه

ليله تكلها رمله عاوني مبچاي
وام عبدالله لولت للمهد بهداي
واني المادريت بعون طايح وين
خالك گتله يمه المرد لب احشاي

ماتغنيني ضلت اولادي انت حسين
شكثر ماتولي هسه وشكر ميتين
بس فگدك علي يهجم گلب مو بيت
اذا تفارگ نضرها شنهي نفع العين

الله يابعد اهلي وشريچ الروح
وحده الروح ذابحني يهل مذبوح
يحته بالبچي افرد دمعتي عليك
يواحد گلبي انوحك واستلذ بالنوح

اذا اشوفن اثر لجدامك اعله الگاع
اركض للأثر واحضن ترابه ابساع
إنه تمنيت انطيك العمر يحسين
( ياكون المنايا تنشره وتنباع )

عفت كلشي وگلت اتعنى الك بليل
اهي عبرت جمر ومدافع اوي الخيل
حگ الها الاخوه وهل اجيت اعليك
مره ايعيني ومره آنه اعين الحيل

عميه ولاشفت بالعين هل منضر
تتلوى شمعل يحسين بيك الحر
يهون الحر اذا هان العطش بشفاك
وما هانن وشوفك كلك امفطر

اجيت وبالكفى تابعني العسكر
يمكسور بغيابك كلشي تكسر
تراني ادوهنت بعيالك وبالنار
گوم اوياي عين اختك اذا تكدر

مذبوح واكلك گوم خويه اوياي
صح ميت واندبك هيج اسمع اعداي
ياهيبة ونأمن باسمك امن الخوف
وتسكن چلمة الخويه رجيف اعظاي

راح امشي غصب منك واعوفنك
بس يحسين بطل كافي من ونك
وصني بناتك خويه اسلم اعليك
باچر من على النوگ ويودعنك
_______

حسين سعد البهادلي
محرم الحرام1446
https://www.tgoop.com/Hussein_s_b