في ذكرى استشهاد الإمام الكاظم (ع)

هالليله يموسى جيت
و اذنوبي اكسرت ظهري
غيِّر حالي يا مولاي
او طهِّر باللطم صدري
&&&&&

آنه العمري كله اذنوب
وأسود وجهي يا مولاي

جيتك ظامي يم بابك
و انته للعطاشى ماي

خلِّصني من اذنوبي
خلك دايم انته اوياي

يا موسى يبن جعفر
أصيح او دمعي يتحدَّر
دخيلك عالنفس مگدر
الـ عبدك سيدي إحضر

إحسبني (بِشِر حافي)
و انظر ليه يا ذخري

غيِّر حالي يا مولاي
او طهِّر باللطم صدري
&&&&&

أنا اللي سجنته نفسه
ابسجن اذنوبه و الآثام

گيْدت روحه هالدنيه
او خلَّص بالهوى الأيام

جيتك فدوه لتردني
عليك الغَرُّبتها الشام

بابك انته باب الله
گلبي بالله لتخِذْله
ابرضيع الظامي عبدالله
إسمي اويه الخدم سجله

سجِّلني عبد تايب
خاطر أشعر ابعمري

غيِّر حالي يا مولاي
او طهِّر باللطم صدري
&&&&&

يبن جعفر أنا عاصي
بس آنه صدگ أهواك

لا تتركني بذنوبي
يبو المعصومه أترجَّاك

الدنيه ابعيني مو حلوه
تحله من يمر طرواك

الدنيه عندي طاموره
الفرج گبرك إذا أزوره
بيك المهجة مأسوره
و ابعيني إلك صوره

اذنوبي تنمسح كلها
ابحبك يا عشگ دهري

غيِّر حالي يا مولاي
او طهِّر باللطم صدري
&&&&&

بيَّه چم (بِشِر) عايش
اذنوبه كسِّرت ظهره

حاير سيدي بـ أمره
او منك راد بس نظره

يموت ابحسرته مولاي
ساگك من يمر ذكره

عزيه عمري لك صاير
بجروحك أنا حاير
گلبي هذا لك (جابر)
بدموعه يجي زاير

عليك ابفاطمه أقسم
إرحمْ شِدَّةَ ضُرِّي

غيِّر حالي يا مولاي
او طهِّر باللطم صدري
&&&&&

خادم جيتك ابدمعي
او تطردني فلا أظِنك

أموت ابدنيتي مولاي
لو لحظه أبتعد عنك

او لو كل عمري أخِدمنَّك
حاشه ما أمل منك

إمامي خلني بالخدمه
بليَّاها العمر ظلمه
خِدِمْتك نعمةِ النعمه
النفَس عندي تره لطمه

يا موسى يبو طلبه
خِدِمْتك جنتي ابحشري

غيِّر حالي يا مولاي
او طهِّر باللطم صدري
&&&&&

إجيتك و الگلب مجروح
او صوتي يعتلي ابلونين

صحت والدمعه فوگ العين
هالله هالله موسى وين ؟!

گلُّولي ابجسر بغداد
ابسلاسل جِثِّته امگيدين

يبو السجدات الطويله
حَسرْةِ امصابك اثجيله
المسيح ايودِّع انجيله
الرضا متحيِّر الليله

الرضا ابفگد الأبو ناده
الآن انكِسر صبري

غيِّر حالي يا مولاي
او طهِّر باللطم صدري
&&&&&

إبراهيم الدريس

في ذكرى استشهاد الإمام الكاظم (ع)

غمَّض اعيونه و انطُفَت شموسه
موسى الكليم الليله ينعه موسى

كضَّه العُمُر ما بين لسجون
لمصابه واجب تبجي لعيون

&&&&&

غمَّض اعيونه ابنَ جعفر .. مات راعي الموزمه

بالسجن مسمومه غابت .. و انطُفَت شمس السِّمه

من سياط اعداه ويلي .. امتونه كلها اموسِّمه

او من ثكل ذيج السلاسل .. جيده يتنازف دِمَه

تبجي اعله حال الكاظم المطامير
فوكـ الجسر ذبَّوا بالأحقاد الخير

هذا الوجود ابحزنه مسجون
لمصابه واجب تبجي لعيون

&&&&&

راهب العتره الشريفه .. وسفه مات ابغربته

لا أَهَل يمه او عشيره .. بالمنيه حضرته

أربعه احماميل إمامي .. هيه بس الشالته

عالجسر مطروح ميِّت .. و الأغلال ابركبته

من شدَّة السَّم وجهه صاير أصفر
او ساكه امن لكيود العليْهِ اتكسَّر

بـ اغيابه عرش الباري محزون
لمصابه واجب تبجي لعيون

&&&&&

كضَّه كل عمره او حياته .. في سجون أهل الغدُر

يشتمون أمه الزجيه .. او عالوجه هم ينسطُر

بالمطامير الرهيبه .. عينه ما شافت فجُر

او عالدرج من ذبَّه خصمه .. اِنْهِشْمَت اضلوع الصدُر

يوم اللي حسِّ اتهشِّمت عِظامه
شاهد ضلع أم الحسن أمامه

ابجرح الزجيه كلبه مطعون
لمصابه واجب تبجي لعيون

&&&&&

بالسجون اهوايه يبجي .. او دمعته من دم تِهِل

من تِجِي هيه اعله باله .. الركّبوها اعله الهِزِل

او يلطمن حيل اعله صدره .. من يمر طاري حَبِل

لنه يذكر عمته زينب .. بالحبل جرها النذِل

كل لحظه يذكر بالسجن هَظُمها
بعد الكمر صار الضرُب يِلِمها

و ابلايه كافل تمشي لظعون
لمصابه واجب تبجي لعيون

&&&&&

الكاظم ابرَغُم المآسي .. للزمن لا ما خِضَع

ركَّع الأرجاس قيده .. او هوه واكف ما رِكَع

هذي زوَّاره إِجَتَّه .. او صوت من عدها ارتِفَع

وينه هارون او غروره .. عرشه متهدِّم وِكَع

كل شي يموت او ما تظل عواطف
او بس اللي يبكه صاحب المواقف

بس هوه يبكه أبيض اللون
لمصابه واجب تبجي لعيون

&&&&&

خادم الكاظم (ع) : إبراهيم الدريس

في ذكرى استشهاد الإمام الكاظم (ع)

على لسان السيدة زينب (ع)

يا موسى الغريب آنه الغريبه
اِلْـ جِسِر بغداد جيت اولن مصيبه

قُيودك ذكِّرَتْني
ابقُيودي ويه متني

الْجِسِر بغداد جيت اولن مصيبه

& & & & &

يا موسى ابنَ جعفر آنه أمْ لحزان
جيتك والدمع عالخد ترك نيشان
جيتك عالجسر ألكيك لن جثمان
ثلاثه أيام هيج ابلا غسل وَأكْفان

من شفْتك أخويه اذْكَرْته بالطف
مرمي اعله الترايب جنه مصحف

أبو اسكينه الْجِرَحني
ابقُيودي ويه متني

الْجِسِر بغداد جيت اولن مصيبه

& & & & &

غريب اوآنه مثلك يا أسد بغداد
غريبه وأعرُف الغربه شِبِه أصفاد
صح مسموم إنته اوشاهدت أحقاد
بس ما دخِّلوك ابطَكـ على ابْنِ ازياد

صحيح امصيبتك عَمَّه عظيمه
بس ما شاكَفِت سوط الهظيمه

زماني اشكد ظِلمني
ابقُيودي ويه متني

الْجِسِر بغداد جيت اولن مصيبه

& & & & &

من شفْت القُيود اتذكّرِت لِعْليل
من ثقْل الحديد اشلون جيده ايميل
اومن شفْت الدِّمَه امْن اجفوفك انته اتسيل
أبو فاضل ذِكَرْته اوصرْت أوِنَّن حيل

شِفِت يا موسى بيك الغاضريه
بس عالراس ما ماتت رُقيه

يمك ما شِفِتْني ؟!
ابقُيودي ويه متني

الْجِسِر بغداد جيت اولن مصيبه

& & & & &

على جسْر الرصافه بو الفضل ممدود
لو إنته الأشوفه اعله الجسر بِكْيود ؟!
حالك يَبْنَ جعفر مِثِل راعي الزود
لجن عالهامه محَّد صابكِ ابعامود

صح يا موسى دم تنزف إدينك
لجن ماكو سهم طفّاها عينك

إجيت اوظهري محني
ابقُيودي ويه متني

الْجِسِر بغداد جيت اولن مصيبه

& & & & &

حالك عالجسر يشْبَه أخويه احسين
من ظل عالأرض وسفه بلا تكفين
إِلَك ما إجه واحد صح يغَمْضِ العين
بسِّ الصدرك انته اخيول مَمْهَشْمِين

ثلاثه أيام صح ظل مرمي جسمك
لجن لِخْيُول ما صِعْدت تِهَشْمك

لِهذا الونه فَنِّي
ابقُيودي ويه متني

الْجِسِر بغداد جيت اولن مصيبه

& & & & &

يا موسى ابنَ جعفر آنه زينب شُوف
زركه امتوني ظلت يا أبو المعروف
من كثر الضرُب خدري صُبَح مخسوف
اوما أشعُر صِرِت يا بو الرضا ابْلِجْفوف

يبِن جعفر أنا اليِحْجُون عني
سليت آنه المصايب ما سِلنِّي

أنا اليِحْجُون عني
ابقُيودي ويه متني

الْجِسِر بغداد جيت اولن مصيبه

& & & & &

خادم زينب (ع) : إبراهيم الدريس

في ذكرى استشهاد الإمام الكاظم (ع)

ثَورةْ قُيود .. ثَورةْ صُمود
اتسجِّلت بسمك يموسى الكاظم

اوهاي السِّجُون .. ابدمْعِ العُيون
حوّلِتْها مِعْوَلِ اعله الظالم

& & & & &

من قُيودك إنته سوّيت النه أعظم ثوره
اوعلّمِتْنه اشلون نِسْجِن هالوُجود ابعَبْره
سيفك القاطع دُعاءَك جان يبْنِ الزهره
اوصوتك انته زَيْنَبِي ضَمَّه الحسين ابنحره

ثورةْ إباء .. من كربلاء
ثورِتك والدّعا جانِ الصارم

والرّكَعَات .. في كُل صلاةْ
حوّلِتْها مِعْوَلِ اعله الظالم

& & & & &

كِل سِجِن حوَّلْته طفِّ اوكِل نَفَس عبَّاسي
اوكِلِت للدنيه أنا ابْن الزهره ما طِخْ راسي
إسمعي يا دنيه صوتي اشما تِضَيْقي انفاسي
آنه أتنفّس محمد وَيْ علي بـ إحساسي

يا دِنْيِتِي .. وابغُرْبِتِي
هذا أنفِج بالسلاسل راغم

اوشوفي الحياةْ .. اشلون ابثبات
حوّلِتْها مِعْوَلِ اعله الظالم

& & & & &

إنته أول ثائر ابسَجْداته يهْزِم خَصْمه
(ثائر) اوأنطيت هيبه الـ معنى هاي الجلمه
جِنِت بالطاموره قِمَّه سيدي للقِمَّه
اوهاي عدوانك سِجَنْهُم كلبك انته ابعَزْمه

إللا رَشيد .. ابهذا الحديد
كتله اَقَيْدك واَصبَح آنه الحاكم

صار السَجين .. اوهاي السِّنين
حوّلِتْها مِعْوَلِ اعله الظالم

& & & & &

مثْل ابو السجاد روحك يا أسد ثوْرِيه
ما تحِبِّ الظلم إنته اوتعْشَكـ الحُرِيه
لنْها دنيه ابلا كرامه طلّكِتْها الدنيه
لجن رَدَّت بين ايديك ابنظْرِتك مسبِيه

إنته المليك .. اوما بين ايديك
صلّت الدنيه وإلاهك عالم

كِل نبضه بيك .. والْتِعْتِنيك
حوّلِتْها مِعْوَلِ اعله الظالم

& & & & &

ياللي جَدك شرَّفِ ابساط القداسه اِنْعَاله
كبِّتك رَغْم الظلام ابرايتك تتلاله
شالِته اشلون النعِش بس أربعَةْ حمَّاله ؟!
وانته نعشك بي عرِش بارينه موش اخياله !

عرش الجَليل .. امْن المُستحيل
بس تُرُفْعه أربعه امن الوادم

اوجِثْتك أكيد .. يبْن الشهيد
حوّلِتْها مِعْوَلِ اعله الظالم

& & & & &

وينه هارون اوزُمُرته .. ايشوف هاي أحبابك ؟!
هيه مثْل السيل إجَتْ واتبوس كلها أعتابك
للغَياره اوللحَياره التاج صار اترابك
اوسِجْدت الحاجات إمامي اوْيه السماء ابَّابك

يركع ضياء .. تسجد سماء
ابّابك اوبسمك ينادي (القائم)

اجروح اِلْجِدام .. وابلا كلام
حوّلِتْها مِعْوَلِ اعله الظالم

& & & & &

خادم الكاظم (ع) : إبراهيم الدريس

في ذكرى استشهاد الإمام الكاظم (ع)

والله يا إمامي .. ازيارتك مَرامي
اوهالمِسَه ابدموعي .. لك أبث سلامي

& & & & &

والله يا مولاي ما رايد إماره
بس أريدن أوصلك واحظه ابزياره
ازيارتك يا بو الرِّضه تاج الغياره
ازيارتك لليفتِهِم أكبر تجاره

ازيارتك ردِتْها .. عمري ما عفِتْها
اتفضّل اعله عبدك .. بيها .. يا هَيامي

& & & & &

من أشوف الحضره بدموعي الجِريه
كلبي يهتف يمته ازور الكاظميه
ما أعوف ازيارتك يبن الزجيه
لو يِكَطّع هالزمن كل لحظه بِيه

يمته آنه اَطوفك .. يالوِلي اوأشوفك
وابعذِب مَعِينك .. تخمد اضطرامي ؟!

& & & & &

روحي مشتاكه الضريحك يا إمامي
بيْه يا محله رُكوعي وَيْ قِيامي
بالدمع يالكاظم أرسل لك سلامي
اوعندك أدعو الباري يكتب لي ختامي

عندك النهايه .. تحله يا رَجايه
اولو صِدِكـ نِلِتْها .. يرتفع مقامي

& & & & &

ذهب حوّلت القيود انته اعله تُربك
ياللي رجَّفْت السُّجون ابصبُر كلبك
السِّندي بِنْ شاهِك من اَعلى الدَّرَج ذبَّك
يوم صدرك ضاكـ والملعون سَبَّك

سَبّك اوتِعَدّه .. اومدمعك تِبَدّه
يا الزجيه وينِچ ؟! .. اِتْكسِّرَت عِظامي

& & & & &

من أصدِّ الكبَّه تبجي اعيوني من دم
اوجبدك أتْذَكّرْها مِنْ صابوها بالسَّم
امصيبتك رَدَّتْنِي مولايِ اِلْـ (مُحَرَّم)
صِرْت أشوف ابعيني سِجْنَك جَن مُخَيَّم

شِفْته صَحْ مُخَيّم .. بس ولا تِضَرّم
اِمْخَيّم العقيله .. خَلّه دمعي هامي

& & & & &

عالجسر مرمي لجن هيبه ابقيودك
وانته ميِّت خاف من ظِلَّك حَقُودك
زَلْزَلِت هارون في قصره ابسجودك
هوه وينه وإنته باقي ايشع وجودك

يا ملِك تخلّد .. ماكو مثلك أحّد
أمك البتوله .. اوجدك التهامي

& & & & &

يا ملِك بغداد والوادم عبيدك
كلها منك تنتظر إيماءه بيدك
إلسِّجِن يالكاظم اسجَنْته ابحَدِيدك
ياللي باقي اعله الجسر صرخَة نَشيدك

إلسِّجِن سِجَنْته .. اوبالقيامه إنته
لَيّه بس أريدك .. تحضَر اوتِحامي

& & & & &

خادم الكاظم (ع) : إبراهيم الدريس

في رحاب الإمام الحسين (ع)

لكَ في وُجوهِ الحُبِّ شامةْ
ولكَ الخُلودُ غدا عِمامةْ

أنتَ السُّمُوُّ وتاجُهُ
أنتَ الأناقةُ والفَخامةْ

يكفي إذا قُلتُ الحُسينَ
تفوحُ رائحَةُ الشهامةْ

وإذا استطالَ القُبْحُ
من عينَيْكَ تُسْتَجْدى الوَسامةْ

هذا مقامُكَ سيِّدي
تَهوي لَهُ مِليونُ قامةْ

معناكَ يا ابنَ المُنتهى
تاهَت بهِ حتَّى الإمامةْ

عَبَسَ الزمانُ وأنتَ فوقَ
شِفاهِهِ أحلى ابتسامةْ

في جَيْبِكَ الدُّنيا تُعَشْعِشُ
في أمانٍ كالحَمامةْ

يا مُبدِعاً رَسَمَ الحَياةَ
بريشَةٍ تُدعى الكرامةْ

هل أنتَ غَيْثٌ أم ظَمَا
تحلو بِهِ عينُ الغَمامةْ ؟!

خادم الحسين (ع) : إبراهيم الدريس

أبوذية :

يمَن ساكن ابـ عيني هاي .. وَيْ هاي
هيامك وَجْها إيدي هاي .. وَج هاي
او بدّيت اعله بابك ماي .. وجهاي

إِحُفْظَه او حَوْلَه فرحه ابّين اِدَيَّه

خادم الحسين (ع) : إبراهيم الدريس

في ذكرى مواليد أبطال كربلاء (ع)

أقمار بالفرحه زِهَت أقمار بالفرحه

او بالعَطِّرَوا لنفاس
يتبختر الإحساس

&&&&&

يحسين وجهك ذاك من لاح نوره
كل عاشكـ او مشتاكـ أعلن سروره
او هالليله بالأفراح تتلاله سوره
عدنه أكبر الأعياد كبرك نزوره

يالما ترد ضيفك أبد يالما ترد ضيفك

ابصحنك لَوَن مِكناس
يتبختر الإحساس

&&&&&

يا با الفضل من جيت هَلْهِلَت دنياي
كلبي او هيام الروح جرحي انته و ادواي
للعلكمي امن اتروح بالطف يمولاي
للماي ما محتاج محتاجك الماي

حته المجد محتاج إلك حتى المجد محتاج

خاطر يشيل الراس
يتبختر الإحساس

&&&&&

هالليله يالسجاد مبتَهْجَه لملاك
او تتراكص النجمات او تتلاله لفلاك
كلنه عَدَم مولاي جا صِرنه لولاك
يالعِجْزَت الألباب تِفْتَهْمَه معناك

تجمعنه لك حضره اشوكت تجمعنه لك حضره

تتمَنَّه هاي الناس
يتبختر الإحساس

&&&&&

ابمولد ثلاثه أقمار ابشهر الأماني
إِنْسَر دِليلي اهواي و اِنْسَر كياني
حُبْ عِترَةِ المختار مَيْشِبْهَ ثاني
ظامي جنِت عطشان او بالعِز رِواني

حُب عِترَةِ الهادي عَذِب حُب عِترَةِ الهادي

يطفح كرامه او ياس
يتبختر الإحساس

&&&&&

بالدم أخِطِّ اعهود و أعلِن ولائي
لـ أبطال أرض النور ثابت وفائي
الـ حَد خِشْبَةِ التابوت هذا انتمائي
بقيعي نبض الروح او هم كربلائي

هذي هَوِيَتْنَه تِظَل هذي هَوِيَتْنَه

بِحْسين و العباس
يتبختر الإحساس

&&&&&

إبراهيم الدريس

في ذكرى مواليد أبطال كربلاء (ع)

يا هلا ابـ أنوار أبطال الطفوف
يا هلا ابـ أنوار أبطال الطفوف

&&&&&

هاليوم ابو السجاد شع مصباحه
او كلِّ لرواح ابمولده مرتاحه
إحسين عطّر هالزمن قِدَّاحه
او ردِّ اعله فطرس بالكرامه اجناحه

بالمَهَد والشمِس بيْه صارت تطوف
يا هلا ابـ أنوار أبطال الطفوف

&&&&&

عباس أزهر عالبشر مولوده
ابـ سَبْعِ الدهر فرحتنه ما محدوده
حيدر إجه صاح اليوافي اوعوده
او يفدي الحسين ابـ عينه ويه ازنوده

امكطعه اجفوفه و لا ايردِّ الجفوف
يا هلا ابـ أنوار أبطال الطفوف

&&&&&

اعقول التِوِد زين الخلكـ محتاره
شع او خَذَت شمس الله من أنواره
ألله على طوله او على أنظاره
يوسف يذوب ابحسنه و ابأسراره

بِسمه حكها تفتخر هاي الحروف
يا هلا ابـ أنوار أبطال الطفوف

&&&&&

من شع على الدنيه ابجلاله الأكبر
خير او لطف منِّ السماءِ اتناثر
جبريل يقسم هالمِسَه بالكوثر
كل شي يصيرن لو علي بس أشّر

سِجْدت ابـ طف كربله الـ وجهه السيوف
يا هلا ابـ أنوار أبطال الطفوف

&&&&&

طه او هَله الباري مقام اِنْطاهُم
او رَحْمِته ألله الواسعه خلاهُم
خل تستمع هالليله كل اِعْداهُم
لـ آخر نفس نبكه او نِظَل وَيَّاهُم

ما نعوف العتره حاشه ما نعوف
يا هلا ابـ أنوار أبطال الطفوف

&&&&&

إبراهيم الدريس

هوسات في ذكرى مواليد أبطال كربلاء

هوسة في الإمام الحسين (ع)

يَلِبْنحرك كلبْت الدنيه عالظلام
نزورك لو تَرِس دربك ذَبِح و ألغام
إلا اِنْوَصِّلك لو حتى كوم اعظام

نفديها .. لِزْياره ابـ دَمْنَه

&&&&&

هوسة في العباس (ع)

عجيب اشكد عجيب الكمر يا هالناس
ابوسط مهده او سِمَع حيدر هِتَف عباس ..
منو كفّال زينب و الدرع و الطاس ؟!

شَكّـ اكماطه او جاوَب آنه

&&&&&

هوسة في الإمام السجاد (ع)

علي هاي الأرض دَلّلها بِسْجوده
او خلاها تذوب ابـ رَفْعَةِ ازنوده
ماخِذ هالأثر و التقوى من عوده

او ماخِذ من حيدر إيمانه

&&&&&

هوسة في الإمام السجاد (ع)

علي هاي الأرض دَلّلها بِسْجوده
او خلاها تذوب ابـ رَفْعَةِ ازنوده
ماخِذ هالأثر و التقوى من عوده

او ماخِذ من حيدر .. دلاله الأطهر
او من جَفَّه الكوثر .. ينبع و ايروِّينه

&&&&&

خادم أبطال كربلاء : إبراهيم الدريس

في ذكرى ميلاد أبي الفضل العباس (ع)

هُناكَ أَشْرَقَتَ لكنِّي أراكَ هُنا
نهراً من الحُبِّ يَروِي الوقتَ والزَّمَنا

يا سيِّدَ الماءِ لم تَفْتُنْكَ زُرْقَتُهُ
لذاكَ ظَلَّ على كَفَّيْكَ مُرْتَهَنا

عُمْرِي يَضِيعُ بدربٍ كُلُّهُ أَلَمٌ
لو لم تَكُنْ أنتَ يا عبَّاسُ لي وَطَنا

لولا أبوكَ سَمِعْنا عن شَجَاعَتِهِ
لكُنتَ أنتَ علياً في الرؤى سَكَنا

إباؤكَ الفَذُّ لا أرنو (الحُسينَ) بهِ
إلا وأنظُرُ في أعماقِكَ (الحَسَنا)

إبراهيم الدريس

أبوذية :

بَصْمات العِشِكـ كلها .. بهاماي (بـ إبهامي)
او بس انته الأسولف له .. بهاماي (بـ هَمِّي)
لَحَدِّ اليوم إلك جربه .. بها ماي

او تِرَوِّي الدنيه أمجاد او حَمِيه

إبراهيم الدريس

في ذكرى ميلاد العباس (ع)

يراعي الزود .. يبحر الجود
عطر الورور .. يبو فاضل
&&&&&

ميلادك رحمه .. جيتك نعمةِ النعمه
وجهك يالساقي .. شمس ايبدد الظلمه
إنته عرش الله .. يحلف دايم ابإسمه
اشما تطلب مني .. أهتف آنه بالخدمه

يبو النوماس .. يرفعةْ راس
تصيح الناس .. يبو فاضل
&&&&&

غارگ بالحيره .. شوصف سيد الغيره
مصحف للخوه .. محَّد يدنه تفسيره
عندي هالدنيه .. كلها اتعيشن ابخيره
يم مجده السامي .. اسمانه كلش اگصيره

عضيد احسين .. ضوه ابكل عين
عِرِف السنين .. يبو فاضل
&&&&&

للحره كافل .. بس عباس أبو فاضل
من دون اچفوفه .. دين المصطفى مايل
بالطف رد عسكر .. ذلِّ ابسيفه كل عايل
للمحشر زوده .. شلال ابوفه سايل

إلك آيات .. إلك رايات
هوت هيهات .. يبو فاضل
&&&&&

أجمل من يوسف .. گلبك عالخدم يعطِف
او عالعايل إسمك .. ريح ابكل غضب يعصِف
سيفك من يدخل .. حومه ايزلزل او يخسِف
ذكرك يالغالي .. الهذا الساني ايشرِّف

يسيف الموت .. ابهواك انموت
يصيح الصوت .. يبو فاضل
&&&&&

يا ثاني حيدر .. ابحبك يالگمر نفخر
و ابوگت الشده .. ندري الشيعتك تحضر
بالطف من شافوا .. ظلك ما بقه عسكر
ابسيفك بالعاشر .. ذكَّرت العده خيبر

گمر عدنان .. غضب بركان
هتف الإحسان .. يبو فاضل
&&&&&

عالغيمه كاتب .. إسم الكافل الغالب
هالكون ابأسره .. ابمدرسته يظل طالب
عباس الوافي .. يحله ابوجهه الشارب
بالطف اخياله .. گام ابدالهِ ايحارب

اشحلاةِ اعيون .. كفيل أم عون
ينادي الكون .. يبو فاضل
&&&&&

إبراهيم الدريس

في ذكرى ميلاد أبي الفضل العباس (ع)

يا هلا ابـ عباس سَبْع الغاضريه
يا هلا ابـ عباس سَبْع الغاضريه

&&&&&

يا هلا ابـ عباس كلب الدنيه ناده
اولادِتك غُمرتنه بالحب و السعاده
إنته باب الحاجه من يوم الولاده
إنطي هذا اليوم كل واحد مراده

إليجي يم بابك اتحِل له القَضِيه
يا هلا ابـ عباس سَبْع الغاضريه

&&&&&

مولدك يا با الفضل عيد او مَسَرَّه
او من إجيت آيةْ فَرَح لملاك تقره
كرَّت ابجَيْتك عيون اختك الحُرَّه
يا وَرِد غِيره او يفوح الليله عطره

طَشَّت اعليك العقيله واهلِيَّه
يا هلا ابـ عباس سَبْع الغاضريه

&&&&&

ياللي كلك مرجِله او شيمه او مُرُوَّه
إنته بالطف ثَبَّتِت ساس الأُخُوَّه
من ضياك الجنه يالغالي اِتِّضَوَّه
او من جفوفك يا كمر بس كلبي يرْوَه

صاحت الحوراء وي حامي الحَمِيه
يا هلا ابـ عباس سَبْع الغاضريه

&&&&&

شاهَدِت بدر السِّمه الليله ابتمامه
كِلِت معناها اِنوِلَد ليث الشهامه
راسم ابـ ثغر الفجر أحله ابتسامه
او من حروف اسمك نهر تجري الكرامه

شايل ابـ روحك شهامه حَيْدَرِيه
يا هلا ابـ عباس سَبْع الغاضريه

&&&&&

الغيره صلَّت هالمِسه ابمحراب عينك
او دَنِّكت شمس السماء الـ ضَي جبينك
باسِتك هيه او تِوَضَّت منِّ اِيدينك
يوم شافت حيدره ايقَبِّل يمينك

جَفَّك آيه او رايه للعز هاشِمِيه
يا هلا ابـ عباس سَبْع الغاضريه

&&&&&

خادم العباس (ع) : إبراهيم الدريس

(هوستين) في ذكرى ميلاد العباس (ع)

أوَّل ما بِزَغ نور الكُمر عبَّاس
فاطم حِمْلِته اعله ايديها فرحانه

ألِف مبروك بالعبَّاس يم لِبْنين
كالت والكُمر هذا لِوا اخوانه

زينب هَلهِلت والبسمه عالسِّبطين
والكـرَّار هوَّس غِيره بآذانه

ميلاده .. ميلاد الخوه

& & & & &

مثل عباس ابد متجيبِ لِمَّايه
بالكاروك اوعنده السيف لَهَّايه
صولات الكفيل ابكربله احچايه
اوعلى روس الأعادي ابچفه دگ ثايه

وابسيفه هوَّس بالحومه

& & & & &

إبراهيم الدريس

في ذكرى ميلاد الإمام السجاد (ع)

مُذْ نورُهُ هَطَلا .. عقلُ الورى انذَهَلا
من حُسْنِ صُورَتِهِ .. ليلُ الهوى ثَمِلا
والبدرُ من أَلَقٍ .. في ضَوْئِهِ خَجِلا
هذا ابنُ فاطمةٍ .. زَيْنُ العِبادِ عُلا
من سِحْرِ مُقْلَتِهِ .. قد كَحَّلَ المُقَلا
على الشِّغافِ نَدىً .. شوقاً هوىً نَزَلا
قد جاءَ من عَسَلٍ .. يُذِيقُنا العَسَلا
ذِكراهُ ما انتَصَبَت .. إلا المدى اشتَعَلا
وبانَ من شُرفَةِ الـ - .. تَّحْنانِ مُغْتَسَلا
على الظَّما نَغَماً .. يُمَطِّرُ الحُلَلا
يا مَن بقافِيَتي .. يُفَجِّرُ الأَمَلا
حرفانِ من وَلَهٍ .. مولايَ قد سَأَلا
أَلَم تُجَنُّ بِهِ ؟! .. قالت دِمايَ : (بَلَى)

إبراهيم الدريس

أبوذية :

ابـ بحر شوقي فقط انته .. مَداراه (مَد أراه)
مثل أم او تداريني .. مُداراه
الوجود اتدوِّر ابجفك .. مَداراه (مداره)

او مِنِ اعيونك يشِع نجم الثريه

&&&&&

إبراهيم الدريس

في ذكرى ميلاد الإمام السجاد (ع)

ابمولد علي السجاد مولانه
أم الحسن هاليوم فرحانه

يا علي يا علي يا علي

& & & & &

عالدنيه أزهر .. واكليبي نَوَّر
نور الجلاله .. شبل الزجيه

رابع ليِمَّه .. المِن طه رَسْمه
هذا اللي خجَّل .. شمْسِ المُضِيه

شمْسَ الله من ضَيْ وَجْهه خجلانه
أم الحسن هاليوم فرحانه

يا علي يا علي يا علي

& & & & &

هالليله فاطم .. مَبْسَمْها باسم
واعله العوالم .. طشَّت وَرِدْها

ابمولد إِبِنها .. مسحت حزنها
لنْ هالمِسِيه .. عيد اهْيَه عِدْها

عيد اوتِغَنّه الطير بَـ ألْحانه
أم الحسن هاليوم فرحانه

يا علي يا علي يا علي

& & & & &

لجل الزجيه .. هِزُوا الثُريه
اوزَيْنُوا المجالس .. بالله يشيعه

اوخلُوا العواذل .. اتموت ابهلاهل
اوهنُوا محمد .. وَيه الوِديعه

هنُوا الرسول ابـ أزكى ريحانه
أم الحسن هاليوم فرحانه

يا علي يا علي يا علي

& & & & &

ابزين العِبادي .. دايم أنادي
جي لنّه ساحر .. كلبي اوحبيبي

سُودَن حياتي .. وَأصْبَح فُراتي
اوبسِّ الـ جُروحي .. هوه طبيبي

روحي ابـ علي السجاد هَيمانه
أم الحسن هاليوم فرحانه

يا علي يا علي يا علي

& & & & &

موسى اوعَصَاته .. اوكِل معجزاته
يَمْ ضَيْ عَلِينه .. تسجِد سجِدتين

اويوسِف جماله .. صوته ايْتِعاله :
(الله اعله حِسْنك .. يا إبْنِ لِحْسين)

كِلِّ الرسل مبتهجه وَيّانه
أم الحسن هاليوم فرحانه

يا علي يا علي يا علي

& & & & &

شيخ السماحه .. وابْن الفَصاحه
هَزِّ المجرَّه .. ابنغمةْ دُعاءَه

غَرَّكنه جوده .. اوظَل بينه زوده
وايظَل عهدنه .. ابحُبَّه او وَلاءَه

منعوفه خلها تسمع اعدانه
أم الحسن هاليوم فرحانه

يا علي يا علي يا علي

& & & & &

خادم السجاد (ع) : إبراهيم الدريس

متباركين بميلاد أبطال كربلاء (ع)