፤ የበኵር ልጅዋንም ወለደች፥ በመጠቅለያም ጠቀለለችው፤ በእንግዶችም ማደሪያ ስፍራ ስላልነበራቸው በግርግም አስተኛችው።
፤ በዚያም ምድር መንጋቸውን በሌሊት ሲጠብቁ በሜዳ ያደሩ እረኞች ነበሩ።
፤ እነሆም፥ የጌታ መልአክ ወደ እነርሱ ቀረበ የጌታ ክብርም በዙሪያቸው አበራ፥ ታላቅ ፍርሃትም ፈሩ።
፤ መልአኩም እንዲህ አላቸው። እነሆ፥ ለሕዝቡ ሁሉ የሚሆን ታላቅ ደስታ የምሥራች እነግራችኋለሁና አትፍሩ፤
፤ ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋልና።
፤ ይህም ምልክት ይሆንላችኋል፤ ሕፃን ተጠቅልሎ በግርግምም ተኝቶ ታገኛላችሁ።
፤ ድንገትም ብዙ የሰማይ ሠራዊት ከመልአኩ ጋር ነበሩ። እግዚአብሔርንም እያመሰገኑ።
፤ ክብር ለእግዚአብሔር በአርያም ይሁን ሰላምም በምድር ለሰውም በጎ ፈቃድ አሉ።
፤ መላእክትም ከእነርሱ ተለይተው ወደ ሰማይ በወጡ ጊዜ፥ እረኞቹ እርስ በርሳቸው። እንግዲህ እስከ ቤተ ልሔም ድረስ እንሂድ እግዚአብሔርም የገለጠልንን ይህን የሆነውን ነገር እንይ ተባባሉ።
የሉቃስ ወንጌል ምዕ2 ቁ7-20
በሀገር ውስጥም ከሀገር ውጭም ያላችሁ እህት ወንድሞቼ እንኳን ለብርሃነ ልደቱ በሰላም አደረሳችሁ🙏

እጀ አመድ አፋሽ
በገንዘብ፣ በጉልበት ፣ በሃሳብ ያሳደከው ሰው ነገ
ኃይለኛ ጥላትህ ሊሆን ይችላል ::
ይሁን እንጂ መልካምነት የሰማይ ቤት መንገድ ናት።

ጥር 10 #ከተራ
እንኳን ለጌታችን ለመድሃኒታችን ለኢየሱስ ክርስቶስ የጥምቀት በዓል በሰላም አደረሳችሁ!!! #መልካም_በአል!
#ከተራ ምንድን ነው?
ከተራ 'ከበበ' ካለው የግእዝ ግሥ የወጣ ነው፡፡ ፍችው ውኃ መከተር፣ መገደብ ማለት ነው፡፡
በጥምቀት ዋዜማ ታቦተ ሕጉ ከቤተ መቅደስ ወጥቶ ውኃ ባለበት አካባቢ ስለሚያድር የየአጥቢያው ሕዝብ እየተሰበሰቡ በወንዝ ዳር ወይም በምንጭ አካባቢ ድንኳን ይተከላሉ፡፡ ድንኳንም ከሌለ ዳስ ሲጥሉ ይውላሉ፡፡ የምንጮች ውኃ እንዲጠራቀም ይከተራሉ (ይገድባሉ) ጉድጓድ እየተቆፈረ ውኃው እንዳይሄድ በመገደብ ለመጠመቂያ (ለጥር 11) ዝግጁ የሚያደርጉበት ዕለት ነው፡፡
በተጨማሪ በአቅራቢያ የሚገኙት ቤተክርስቲያናት ተሰብስበው ከዚሁ ከተቆፈረው ገንዳ ወይም ከተገደበው ጅረት አጠገብ ባለው ዳስ ወይም ድንኳን ታቦቶቻቸውን ያሳድራሉ ሊቃውንቱም በዚያው እግዚአብሔርን በማህሌት ሲያመሰግኑ ያድራሉ።
በበዓለ ጥምቀት የታቦታቱ ወደ ወንዝ መውረድ መድኃኔ ዓለም ክርስቶስ በእደ ዮሐንስ ለመጠመቅ ከገሊላ ወደ ዮርዳኖስ በዋዜማው የመሄዱ ምሳሌ ነው፡፡ ታቦቱ የጌታችን፣ ምሳሌ ሲሆኑ ካህናቱ የመጥምቁ ዮሐንስ ምሳሌ ናቸው፡፡ መዘምራኑና ሕዝቡ ደግሞ ዮሐንስ ያጠመቃቸው ሕዝቦች ምሳሌዎች ናቸው፡፡

ዛሬ የቃና ዘገሊላ በዓል ነው። ይህ በዓል በእመቤታችን ምልጃ ውኃ ወደ ወይን የተለወጠበት በዓል ነው።

ቃና ዘገሊላ ማለት ሁለቱም ቃና እና ገሊላ የቦታ ስሞች ናቸው። ቃና ዘገሊላ ስንል በገሊላ ውስጥ የምትገኝ ቃና የተባለች ቦታ(ከተማ) ማለት ነው። ይህ ቦታና እለት ጌታችን መድኃኒታችን እየሱስ ክርስቶስ የመጀመሪያውን ተዓምር በእናቱ በቅድስት ድንግል ማርያም አማላጅነት ለዓለም ያሳየበት እና አምላክነቱንም የገለጠበት ዕለት ነው።

እመቤታችን ሆይ! ውኃ የተጠሙትን በምልጃሽ አስቢያቸው። አንቺው የጎደላቸውን ሁሉ በርኅሩኅ ልብሽ ጎብኚ። በየሥፍራው ከቀያቸው ተፈናቅለው በረሃብና ጥም የሚንገላቱትን የሚጎድላቸውን የሚነግርሽ አትፈልጊምና ለልጅሽ ንገሪላቸው።

ኢትዮጵያውያንንም በምልጃሽ ጎብኚን። ለልጅሽ "ወይን እኮ የላቸውም" ባልሽበት አንደበትሽ፦ "ሰላም እኮ የላቸውም፣ ፍቅር እኮ የላቸውም፣ መተዛዘን እኮ የላቸውም" በይልን።

ጥር 21 ድንግል ማርያም በ 64 አመቷ ያረፈችበት እለት
የጥንት ቅዱሳን አባቶቻችን ስለ እመቤታችን ዕረፍትና ትንሳኤ በዓይናቸው ያዩትንና የተማሩትን እንዲህ ይመሰክራሉ!
....................
1. # ኢቮድየስ_ዘአንጾኪያ (የሐዋርያው የቅዱስ ጴጥሮስ ደቀመዝሙር) :- ይህ ታላቅ አባት ከጴጥሮስ ጋር አብሮ የነበረ፣ የድንግል ዕረፍትዋ በዓይኑ የተመለከተ፣ የትንሳኤዋም ሕያው ምስክር የሆነ ነው! ያየውምን ነገር በሙሉ "Homily on the Dormition of the falling asleep of Mary" በተባለው ክታቡ እንዲህ ይተርካናል!
...........
(ነሐሴ) ወር በአስራ ስድስተኛው ቀን ጠዋት በተመሳሳይ ምሽት በብርሃን ሰዓት፣ ጌታችን በታላቅ ክብር ወደኛ መጣ! ሰግደንም አመለክነው! ጌታም "ለምን ታዝናላችሁ?" ሲለን፣ አባቴ ጴጥሮስም "በእናትህና በሁላችን እመቤት ሞት፣ ከሞተችም ብኋላ ስጋዋን ስላላሳየሀን ነው" አለው! ጌታም ወደ መቃብሩ በመጣራት የድንግል እናቱን ስጋ በማስነሳት፣ ነፍስዋንም እንደገና ወደ ስጋዋ በማስገባት ልክ ቀድሞ በስጋ እንደምናውቃት በስጋ አየናት። መድኃኒታችንም ለስለስ ባለ ድምፅ "እነኋት ውድ እናቴን" አለን። ይህ የሁላችን እመቤት እና የወላዲተ አምላክ የሕይወትዋ መጨረሻው ይህ ነው በጦቢ(ጥር) ወር 21ኛ ቀን። ትንሳኤዋ ደግሞ በሜሶሪ (ነሐሴ) ወር በ16ኛው ቀን ነው> በማለት ከቀብሯ ተገኝቶ ትንሳኤዋን አይቶ ይመክረናል።
.............
2.ቅዱስ # ቴዎዶስዮስ_ዘእስክንድርያ (535 ዓ.ም)
አባታችን ቴዎዶስዮስ ስለ ትንሳኤዋ ሲንፕግረን <የነበሩበት ቦታ በእሳት ተሞላ። ጌታም በኪሩቤል ላይ ሆኖ የድንግልንም ነፍስ በእቅፉ በሰማያዊ ልብስ አጊጣ ይዟት ተገለጠ። ሐዋርያትም በፍርሐት ተሞልተው መሬት ላይ እንደ ሞቱ ሆኑ። እርሱ ፍርሐታቸውን አጥፍቶ እንዲህ አላቸው "እናንተ ደቀመዛሙርቴና ደናግል ሆይ፥ የእናቴን ክብር ታዩ ዘንድ ተነሱ።" እንዲህ ብሎም ወደመቃብሩ ጮሀ "ለእኔ መቅደስ የሆነሽኝ አንቺ ቅድስት ስጋ ሆይ፣ የእኔ የዘላለም ድንኳን የሆነችኝን ይህቺን ነፍስ ውሰጂ" ... ጌታ እነዚህን ቃላት ሲናገር መቃብሩ በዚያ ቅፅበት ተከፈተ... ከዚያም ብኋላ የከበረው የድንግል ስጋ ተነሳ፤ ነፍስዋንም አከበረቻት። ሁለት ወንድማማች ከተለያየ ሀገር እንድሚመጡ እንዲሁ ተባበሩ አንድም ሆኑ> ብሎ ወደ ትንሳኤዋ ይወስደናል።
.............
3.ቅዱስ # ዮሐንስ_ዘደማስቆ (675-749)
ይህ ቅዱስ አባትም <እርስዋ ልጅን ስትወልድ ድንግልናዋ እንደተጠበቀ እንዲሁ ስጋዋ ከሞትም ብኋላ ከመበስበስ የተጠበቀ ይሆን ዘንድ የተገባ ሆነ። ፈጣሪን በሕፃንነቱ በደረቷ እንዳቀፈችው እንዲሁ በመለኮታዊው ድንኳን (ሰማያዊ መቅደስ) ትኖር ዘንድ ተገባት! የእግዚአብሔር እናት የልጇ የሆነውን ነገር (ትንሳኤ) ታገኝ ዘንድ በፍጥረት ሁሉም የእግዚአብሔር እናትና አገልጋይ ተብላ ትመሰገን ዘንድ ሆነች> ይለናል።
.............
4.ቅዱስ # ጌርማነስ_ዘቁስጥንጥንያ (8ኛ ክ.ዘ)
ይህ አባት ደግሞ <አንቺኮ እንደ ተፃፈው በውበት የተገለጥሽ፣ ድንግል የሆነ ስጋሽም ቅዱስና ንጹሕ፣ መላውም የእግዚአብሔር ማደርያ ነው። ስለዚህም ጠቅልሎ አፈር ሆኖ ከመቅረት ነጻ ሆነ (ቀረ) ምንም እንኳን አሁንም ሰው ብትሆኚ ሥጋሽ ወደ ማይበሰብስ ሰማያዊ ሕይወት (አካል) ተቀየረ! አሁንም ስጋሽ በሕይወትና በክብር፣ ሳይጎድፍና ሳይጎድል በፍፁም ኑባሬ አለ!> እያለ ከእናቱ ከእናታችን ጋር ያወጋል። በአባቶቻችን እምነት ያፅናን!
.... የትንሳኤዋ በረከት ከወደቅንበት ኃጢኣት ያንሳን!

ፆመ ነነዌ
ነብዩ ዮናስ ሦስት ቀንና ሌሊት በአሳ ነባሪ ሆድ ውስጥ ሰነበተ
፤ ዮናስም በዓሣው ሆድ ውስጥ ሆኖ ወደ አምላኩ ወደ እግዚአብሔር ጸለየ፥ እንዲህም አለ።
፤ በመከራዬ ሳለሁ ወደ አምላኬ ወደ እግዚአብሔር ጮኽሁ፥ እርሱም ሰማኝ፤ በሲኦልም ሆድ ውስጥ ሆኜ ጮኽሁ፥ ቃሌንም አዳመጥህ።
፤ ወደ ጥልቁ ወደ ባሕሩ ውስጥ ጣልኸኝ፥ ፈሳሾችም በዙሪያዬ ነበሩ፤ ማዕበልህና ሞገድህ ሁሉ በላዬ አለፉ።
፤ እኔም። ከዓይንህ ፊት ተጣልሁ፤ ነገር ግን ወደ ቅዱስ መቅደስህ ደግሞ እመለከታለሁ አልሁ።
፤ ውኆችም እስከ ነፍሴ ድረስ ከበቡኝ፤ ጥልቁ ባሕር በዙሪያዬ ነበረ፤ የባሕሩ ሣር በራሴ ተጠምጥሞ ነበር።
፤ ወደ ተራሮች መሠረት ወረድሁ፤ በምድርና በመወርወሪያዎችዋ ለዘላለም ተዘጋሁ፤ አንተ ግን፥ አቤቱ አምላኬ፥ ሕይወቴን ከጕድጓዱ አወጣህ።
፤ ነፍሴ በዛለችብኝ ጊዜ እግዚአብሔርን አሰብሁት፤ ጸሎቴም ወደ አንተ ወደ ቅዱስ መቅደስህ ገባች።
፤ ከንቱነትንና ሐሰትን የሚጠብቁ ምሕረታቸውን ትተዋል።
፤ እኔ ግን በምስጋና ቃል እሠዋልሃለሁ፤ የተሳልሁትንም እከፍላለሁ። ደኅንነት ከእግዚአብሔር ዘንድ ነው።
፤ እግዚአብሔርም ዓሣውን አዘዘው፥ እርሱም ዮናስን በየብስ ላይ ተፋው።
(ትንቢተ ዮናስ ምዕ. 2ቁ2-11)
በሦስተኛ ቀኑ ከነነዌ የባህር ዳርቻ ሲደርስ  ተፋው። እግዚአብሔርን አመሠገነ። ወደ ነነዌ ከተማ ገባ። ያለማይክ ሕዝቡን ሰበከ። ከህጻን እስከ አዋቂ፣ ከእንስሳ እስከ ሰው፣ ከሎሌ እስከ ንጉሥ ድረስ  አዳመጡት። በክፋታቸው ተጸጸቱ። ጾሙ፣ ራሳቸውን ስለ እግዚአብሔር አዋረዱ። እግዚአብሔርም ማራቸው። /

ነብዩ ዮናስ ሆይ ባንተ ስለሆነ ዳግም የኛ ተስፋ
አንዴ ተነስና ቀንደ መለከቱን በምድር ላይ ንፋ
የፍርድ ፅዋው ሞልቶ....
ዳግማዊ ነነዌ ኢትዮጵያ እንዳትጠፋ🙏

ኮንዶም አምጣ እስቲ(የያዘውን ድፍን 50ብር እየወረወረልኝ
ዛሬ ደሞ ተረኛዋ ማናት?
ዝም በለክ አምጣ የዛሬው ቀጠሮዬ ልዩ ነው(በጥድፊያ ኮንዶሙን ቀምቶኝ እየሮጠ
ዱዱ ይባላል ከሰፈራችን ወጣቶችን ተቀማጥሎ ያደገ የሀብታም ልጅ ነው የመንደራችን ጎረምሶች እንደሱ ባረገኝ እያሉ ሲቀኑበት ሳይ እኔ ግን ዱዱ የሚሄድበት መንገድ ሁሌም ያስጨንቀኛል ከቅርበታችን የተነሣ ዱዱን ቁጭ አድርጌ መክሬዋለሁ ዱዱ ግን በምክሬ መመለሱን ትቶ ብሶበታል
ቁመናው የሀገሩን ሴት ከሩቅ የሚጣራ፤መልከቀናነቱ እንኳን ሴቱን ወንዱን የሚያስደነግጥ፤በዛ ላይ ጠዋት የለበሰውን ማታ የማይደግም ሲያሻው በአባቱ መኪና የሚንፈላሰስ ነው ቅንጡ ነው።ግን ደሞ ይሄ ሁሉ የተሠጠው ልጅ ፀባዩ ምግባሩ የጎደፈ መሆኑን መንደሩ ይመሠክራል በየመንገዱ አቅብጠው ያሳደጉት ወላጆቹን ሲሳደብ ማየትም ብርቅ አደለም
እ በሌ ዱዱ መጥቶ ነበር እንዴ(ብቸኛው የዱዱ ፈላጊ ሳሚ
ቅድም ያቺን የለመደውን ገዝቶ እንደሄደ አልተመለሠም ስልክ አትደውልም እንዴ?
አረ አያነሳም(ፊቱን ቅጭም አድርጎ ጀርባውን እየሠጠኝ
ምነው የደበረህ ትመስላለህ?
ሳሚ ብቸኛው የዱዱ ጓደኛ ነው ዱዱ እና ሳሚ ጓደኛ መሆናቸው ተአምር ቢሆንም የረጅም ጊዜ ወዳጅ ናቸው ሳሚ ጭምት ጨዋ ሰው አክባሪ ሲሆን ዱዱ ደሞ ሀገር ያሰለቸ ቦዘኔ ሴት አሳዳጅ ነው።ሳሚ አጠገቤ ቆሞ ያቺ ኮንጎ ስልኩን አስሬ እየጎረጎረ ያስጨንቃታል ስልኳ ግን መልስ ከመስጠት ተቆጥባለች ሳሚ የተበሳጨ ይመስላል በመደወል ብዛት የሠለቸው ሳሚ ድጋሚ ወደኔ ዞሮ
ዳጊንስ አላየሀትም?
እንዴ ሳሚሻ ምን ሆነካል አዎ ወጥታለች አይቻታለሁ ግን በላም ነው?
አንዳች ነገር ያስጨነቀው ይመስላል።ዳጊ የክፍለ ሀገር ልጅ ስትሆን ከሱቄ ትይዩ ካለው ትልቅ ግቢ ነው ተከራይታ ምትኖረው የሳሚ ፍቅረኛ ናት።አብረው ገብርኤል ቤ/ ክ ሲያገለግሉ ነው የተዋወቁት እንደውም ስትመረቅ ሊያገባት ሽማግሌ ሊልክ እንደሆነ ዳር ዳር ብሎኛል
በሰላም ነው ሁለቱም ስልክ አያነሱም(እንደማኩረፍ እያለ
ዱዱ ያኔ ከአንዷ ጋ ሲጋደም ነው ዳጊ ደሞ ክላስ ትሆናለቻ(በግድየለሽነት ትከሻዬን እየሰበቅኩ
ሰአቱን አይተከዋል?በቃ እሺ ቻው
ሳሚ በንዴት ተንቦግቡጎ ጥሎኝ ሲሄድ ሰአቴን አየሁት 6፡15 ይላል እውነትም ሰአቱ የምሳ ሰአት ነው።ምንም እንኳን ልቡ ውስጥ ባልገባም ሳሚ ግን አንዳች ነገር ጠርጥሯል የዱዱን አመል እኔም እሱም ጠንቅቀን እናውቀዋለን።አንዳንዴ እዚሁ ሰፈር ውስጥ እንኳ አብረው ቆመው ዳጊን እየሠረቀ ሲያያት ሲለው ሳሚ በሌለበት ሲጎነትላት አይቻለሁ። ዱዱ ሴት ካየ አያርፍም በተለይ እንደ ዳጊ አይነቷ ከምንም ያልጎደላትን ሴት የጓደኛው ሁና እንጂ እስካሁንም አያቆያትም ነበር...ዳጊ ፀባይዋን ያስመሰከረች ጨዋ የቤ/ክ ልጅ ብትሆንም የዱዱ ምላስ እና መልክ ግን ልቧን እንዳያሸፍተው ፈራለሁ በዛላይ የዛሬ ቀጠሮዬ ልዩ ነው እያለ ሲፎክር ነበር ያሰብኩት እውነት እንዳይሆን እየፀለይኩ ዱዱ ጥርስ በጥርስ ሆኖ እንደልማዱ እየዘነጠ መጣ
ዱዱ ምን እያደረክ ነው?እየሆነ ያለው ምንድነው?ንገረኝ? (ቆጣ ብዬ ጠየኩት
ሚስጥር እንዳታወጣ ግን እጄ ላይ ገብታለች ቀመስኳትኮ(ተንጠራርቶ ጆሮዬ ስር እየተንሾካሾከ
እኮ ማንን ዱዱ?(ተስፋ በመቁረጥ ተናድጄ እያየሁት
ልዕልናን ነዋ!
ኡፍ..ተነፈስኩኝ ከአፉ ዳጊ የሚል ድምፅ ብሰማ በሚዛን አናቱን ብዬ እንዳልታሰር እየፀለይኩ ነበር
ዱዱሻ አንድ ቁም ነገር ላጫውትህ?
ይቻላል..(የሱቄን መስኮት ተደግፎ ጀርባውን ሰጥቶኝ ሩቅ እያማተረ
አንተ ምታውቀኝ እዚህ ሰፈር ከመጣሁ በዚህ 5አመት ውስጥ ነጋዴ ሆኜ ነው።በሌ የተባልኩት እራሴ ስሜን ሰይሜው እንጂ ትክክለኛ ስሜ አምደወርቅ ይባላል።ዛሬ ድረስ ቢመለስ የምናፍቀው ልጅነት ነበረኝ ወደኋላ ብመለስ ብዙ ነገር ማስተካከል ፈልጋለሁ ግን እድሜ ካለፈ አለፈ ነው።
ገና ልጅ እያለሁ አፌን እንደፈታሁ እናቴ ከሞቀ ቤቷ አስወጥታኝ ለሌላኛዋ እናቴ ወስዳ አስረከበቺኝ (ለቤተክርስትያን)ከእናት እና አባቴ በቀር ማንንም የማላውቅ የማልቀርብ ልጅ ተሰብስበው ከሚንጫጩ
ቆሎ ተማሪወች መሀል የኔታ እግር ስር እራሴን አገኘሁት በኛ እድሜ ዘመናዊ ት/ት ከመማር ይልቅ የቤተክህነት ሊቅ መሆን ነበር የሚያበላው እናት እና አባቴም በዘራቸው ያላገኙትን ክህነት በኔ ለማግኘት የአብነት ትምህርት እንድማር ወስደው አስገቡኝ።
ከቤተሰብ መራቄ ቢያስጨንቀኝም እዛ ያሉ ተሜዎች
ቤተሰብ ሆነውኝ ለመጀመርያ ጊዜ መልዕክተ ዮሐንስን ገለጥኩኝ።
ህፃን ሆኜ ደበሎዬን እየጎተትኩ የገባሁ ትንሹ ልጅ አመታት ስቆይ በእድሜም በእውቀትም አድጌ ድምፄ የተገራ ስነምግባር ያለኝ ከንባብ እስከ አቋቋም ተምሬ ማዕረገ ዲቁና ተሾምኩኝ።ያኔ ነበር ልቤ ሸፍቶ ዲቁና ልቀጠር አዲስ አበባ ከጓደኛዬ ጋ ጠፍቼ የመጣሁት ቀላል ባይሆንም ብዙ ተሰቃይተን የአንድ ደብር አገልጋዮች ሆነን ረጅም አመታትን አብረን አገልግለን።ጉርምስና ሲመጣ ጓደኛዬ እዚሁ የአዲስ አበባ ልጅ ከአንዲት መልከመልካም ልጅ ጋ ፍቅር ጀመረ በሁኔታው እኔም እሱም ደስተኛ ብንሆንም የሦስታችን ቅርበት ግን እየጨመረ ሌላ የማንወጣው አዘቅት ውስጥ ጨመረን ጓደኝነታችን በአንድ ሴት ተፈተነ።
ከጓደኛዬ ፍቅረኛ ጋ ወዳጅነታችን ልኩን እያለፈ መጥቶ ወደ ሌላ ቅርበት መሻገሩን ያወቅኩት ጓደኛዬ በሌለበት ያቺን ልጅ ያገኘኋት ቀን ነው ከንፈሯ ከንፈሬ ላይ ተሰፍቶ ራሳችንን ያገኘነው᎐᎐ ጓደኛዬ አምኖኝ ከፍቅረኛው ጋ
መዋሌን ጠልቶት አያውቅም እሱ እያለ ስጎነትላትም ቅር ብሎትም አያቅም ይሄ ሁሉ አድጎ እኔና ልጅቷ በድብቅ ተፋቀርን በድብቅ ተኛን በድብቅብ እፍ አለን ..
እውነት ብትሳሳ እንጂ አትበጠስም እንደሚባለው ብዙ ሳንቆይ ጓደኛዬ ነውሬን ተከታትሎ ደረሰበት ስለሴት ምንም የማናውቅ እውሮች አይናችን ሲገለጥ በሴት እና በዝሙት ወድቀን ተቃቃርን ለቁም ነገር ያሰባትን ሴት ዲቁናዬን ማፍረሴ ሳያንስ የጓደኛዬን ህይወት አበላሸው አየህ ያልተገባ ግንኙነት ስርአት ያጣ ቅርበት ብር አንባር ክህነቴን ጓደኛዬን እኔነቴን አሳጥቶኝ የእድሜ ልክ ቁስል የሆነኝን የእሾህ አንባር አቀዳጀኝ!!ስንት
ዘመን የለፋችብኝን ቤተክርስትያኔን ትቼ እዚህ ነጋዴ ሆኜ ወደቅኩ።
"የባልንጀራህን ሚስት አትመኝ"ዘጸ20፥17 የሚለው ከትእዛዛቱ ዋነኛው ነው እየሄድክ ያለክበት መንገድ አደገኛ ነው እግዚአብሔር መሀሪ ነው ሲቆጣ ግን ሀይሉን የሚቋቋም የለም ይሄ ውበት መልክ ሀብት ይጠፋል እድሜህን ተጠቀምበት ይሄ ህይወት ይበቃል ንሰሐ ገብተህ ከአምላክህ ታረቅ ዱዱ አይበቃም?
ዱዱ ጀርባ ሰጥቶኝ ፀጥ ብሎ ሲሰማኝ ቆይቶ ወደኔ ዞረ ፊቱን ክስክስ አድርጓል አይኑ እንባ ቀሮ ሊፈስ እየታገለው..
የተኛሁት ከልዕልና ጋር አይደለም በሌ ጥፋት
ሰርቻለው(ስቅስቅ ብሎ እያለቀሰ
ውስጤ ተጠራጥሮ ነው ይህን ሁሉ ታሪኬን ያወራሁት ከዳጊ ጋ መተኛትህን አይንህ ላይ አውቄዋለሁ ግን አንዴ አጥፍተሀል አሁን ግን ይበቃል ብቻ አንተ ተፀፀት ሁሉም በጊዜው ይፈታል.
ከወራት በኋላ)ዱዱ ፍፁም ሌላ ሰው ሆኗል እኔም በብዙ ሽምግልና ከጓደኛው ሳሚ ጋር አስታርቄያቸዋለሁ።ሳሚ የሚወዳት ፍቅሩን ለዱዱ ጓደኝነት ሲገብር ዱዱ ድሎት ምቾቱን ሱሰኝነቱን ትቶ ለእግዚአብሔር ራሱን አስገዛ ዳጊ ከጓደኞቿ ጋ ብትታረቅም ከሰፈራችን ወጥታ ራቅ ብላ መኖርን መርጣለች።
“ነገር ግን በተፈረደብን ጊዜ ከዓለም ጋር
እንዳንኮነን በጌታ እንገሠጻለን።'1ኛቆሮ11፥32

chacha

ሱሰኛው መነኩሴ👇
የኔ ልጅ እባክህ ላስቸግርህ እርዳኝ(መለኩሴው ጫት ከምሸጥበት መደብ ፊት ቆመው
አይ አባ እኛም እኮ ቸግሮናል ኑሮ ውድ ነው(ወደ ኪሴ እየገባሁ
አይደለም ልጄ እኔኮ ብር ፈልጌ አይደለም(ሰው እንዳይሰማ በሹክሹክታ እያወሩ
እሺ ምን ፈልገው ነው አባቴ መንገድ ልጠቁሞት?
አረ በፍፁም!!እኔማ ከዝች ከጫቷ ቆንጠር አድርገህ እንድትሰጠኝ ብዬ ነበር(በመሸማቀቅ አይናቸውን ስብር አድርገው
የተቀመጥኩበት ወንበር የሰመጠ ያህል ተሰማኝ ጥያቄያቸውን ተከትሎ አፌን ከፍቼ አይኔን አጉረጥርጬ ቅንድቤን ሰቅዬ አየኋቸው።ምናልባት ይህን ቃል የሠማሁት አጠገቤ ካለ የጫት ደንበኛዬ እንዲሆን በማሰብ
አከባቢዬን ቃኘሁት ግን ሁሉም ተርዚናውን አጭቆ አፉን የሚያላውስ የለም የተናገሩት እኚ መለኩሴ ናቸው?ጆሮዬ ነው?ግራ በመጋባት ደርቄ ስቀር..
የኔ ልጅ አልሰማከኝም?እባክህ ሱስ ሆኖብኝ ነው ሰው ሳያይ ቀስ ብለህ ስጠኝ
ተነስቼ መሮጥ ፈለኩኝ፣አልያም በአስማት ከዛ ቦታ
የሚሰልበኝን ተአምር ባገኝ ብዬ ተመኘሁ ግን እኚ በነጭ ቆብና በጥቁር ካባ ያሸበረቁ ለሠማይና ለምድር የከበዱ
መልዐክ የሚመስሉ መለኩሴ አሁንም ከፊቴ ፊትለፊቴ ቆመው በልምምጥ እያዩኝ ነው
አባ ይቅርታ እኔ ለእርሶ አልሸጥም
እንዴ ለምን እኔ ሰው አይደለሁ?
አይ እርሶ የእግዜር ሰው ኖት ሌላ ቦታ ይሂዱ
ብታቅማ አንተም የእግዜር ልጅ ነህ ግን ደሞ ሱስ ነው የምልከው ልጅ አጥቼ ብቸገር እንጂ ..
እኚ መለኩሴ ለምን አይሄዱም?ደግሞስ እውነት ብሰጣቸው እዚ አደባባይ ላይ ይቀበሉኛል?የሚሆነውን ለማየት እጄ እየተንቀጠቀጠ አንድ እስር ጫት በፔስታል አድርጌ እየፈራሁ ወደ መለኩሴው እጄን ስዘረጋ
ጎሽ የኔ ልጅ በል እንካ ሂሳብክን(በደስታ እየተፍለቀለቁ
እኔ የእርሶን ብር አልፈልግም ሂዱልኝ ከዚ ቦታ ሁለተኛ እኔ ጋር እንዳይመጡ(እኚ መለኩሴ ዛሬ ምነው ሚስማር ካልዘነበ መብረቅ ካልወረደ አሉሳ?ንዴቴ አናቴ ላይ ወጥቶ
አንባረቅኩባቸው
የማየው የምሰማው ነገር ድብልቅልቅ አለብኝ እውነት ግን ለምን ተናደድኩ?እኚ ሰው ቆብ ያድርጉ እጂ እንደኔ ሰው አደሉ?ደሞስ እኔ ማን ሆኜ ነው ምወቅሳቸው? ምናልባትም አንዱ የቸገረው ዱርዬ ጫት መቃም ፈልጎ የፈጠረው ድራማ ቢሆንስ?(ጭንቅላቴን በጥያቄ ወጥሬ ያልተሸጠ ጫቴን እያስተካከልኩ መልሶ የሚጥል ድንጋጤ ወረረኝ...ያኚ ጫት ካልሰጠከኝ እያሉ ሲነታረኩኝ የነበሩት መለኩሴ ለጫት ሲንገበገቡ መስቀላቸውን የጫት
መሸጫዬ ላይ ጥለውት ሄደዋል!!
ድንጋጤ ቅፅበታዊ ሲሆን ፍርሀት ትከሻ ሲወዘውዝ የገጠመኝ በዚህ ቀን ነበር ፍርሀት የማያውቀኝ ሰውዬ እየተርበተበትኩ መስቀሉን አንስቼ ያኚ መዘዘኛ መለኩሴ ወደሄዱበት አቅጣጫ ከነፍኩ..ደርሼባቸው በእጄ የያዝኩትን መስቀል እስክሰጣቸው ልቤ ቆሟል ከኋላ አውሬ የሚያባርረኝ ያህል እየተሰባበርኩ ከሩቁ አባ መቋሚያቸውን እያስቀደሙ ሲራመዱ አየኋቸው ግን
እንደ እብድ ብጮኽ አባ አይሰሙም የምርቃና ሰአታቸው ደርሷል.
አባ..አባቴ..ይቁሙ..(አጠገባቸው ደርሼ ትንፋሼ
እየተቆራረጠ ጠራኋቸው
አባ የቤ/ክኑ በር ላይ ደርሰው እየተሳለሙ ጥሪዬን ሰምተው
በድንጋጤ ዞር አሉ
አቤት ምን አጣህ ምን ፈለክ?(በቁጣ ግንባራቸውን ቋጥረው እያዩኝ
አረ እኔ መስቀሎትን ጥለው.(በፍርሀት እያየኋቸው
በል ና እዚህ ጥሩ አይደለም ውስጥ እቀበልሀለው
እኚ ሰው ዛሬ ለምን አይተውኝም?ገብቼ ደሞ እንቃም ሊሉ ነው?ደሞስ ጫቱን ወደ ቤ/ክ ይዘው ሲገቡ አያፍሩም?በዛ ሁሉ ድካም ውስጥ ይሄ ሀሳብ አእምሮዬ ላይ ሲያቃጭል ዘገነነኝ።ግን አማራጭ ስለሌለኝ ተከትያቸው ቤ/ክኑን አልፈን እስከ ቤታቸው አደረስኳቸው።
ና እስቲ አረፍ በል ቆንጆ ምሳ አለ
አረ አባ መስቀሉን ይቀበሉኝ እኔ ለዚ ቦታ አልገባም ልሂድ...
ግድ የለም አትፍራ..(አባ ፈጠን ብለው በሰሀን እንጀራ በምስር ወጥ ይዘው መጡ...
እኚ ሰውዬ ግራ እያጋቡኝ ነው ውስጤ ብዙ ጥያቄ አለ ይሄን የመሠለ የመመረጥ ህይወት ትተው አለማዊ ነገር መመኘታቸው እያስገረመኝ...
ቆይ አባ ጫት መቃም ሀጥያት አይደለም እንዴ? (በጥርጣሬ ጠየኳቸው
አረ በፍፁም ሀጥያት አይደለም!ይኸው አንተ ትቅም የለም እንዴ?
እኔማ ሀጥያተኛ ነኝ ሁሌም ስራዬ ይህ ነው እርሶ ግን ..
ጎሽ የኔ ልጅ ተባረክ አየህ አሁን ትልቅ ቁም ነገር አወራክ ሰው ከፈጣሪ እንዳይታረቅ የሚያደርገው ዋናው ነገር ሀጥያት ሰልጥኖበት ሳለ ሀጥያተኛ ነኝ ብሎ አለማመኑ ነው ሰው ሁሉ ሀጥያተኛ ነው ግን ደሞ መርሳት የሌለብህ እግዚአብሔርም መሀሪ መሆኑን ነው።(አባ እያወሩኝ ከሰል ማንደጃቸው ላይ የገዙትን ጫት እያስቀመጡ
ታድያ ሀጥያት ከሆነ ለምን እኔ ጋር መጥተው ገዙ?ደሞስ ለምን ያቃጥሉታል?(ጋዝ አርከፍክፈው የሚያቃጥሉትን ጫት ሲንቦገቦግ በድንጋጤ እያየሁ..
አየህ ወጣትነት ማለት እንደዚህ እሳት ነው የያዘውን የቀረበውን ሁሉ ይፈጃል።ይህ እሳት ንፋሱ ወዳለበት አቅጣጫ እንደሚነድ ሁሉ ወጣትነትም አለም ባነፈሰችው ባራገበችው የሀጥያት አየር እንድንገፋ ያደርገናል።ይህ እሳት እንዲነድ ጋዝና ወረቀት ጨምሬበታለሁ ያለዚያ እንዲህ አይነድም ነበር ወጣትነትም ከልክ በላይ ሰውን
እንዲያነድ እና እንዲያጠፋ በጋዙ ቦታ ጫት ሱስ ዝሙት የመሣሠሉትን ሰይጣን ይጨምርብናል ያኔ እንደዚ እሳት በአለም ላይ እንነዳለን።
ቅድም ጫት ስጠኝ ስልክ ድንጋጤክን አስተውያለሁ..አንተ እኔ እንዳልገዛ እንዳልቅም እየከለከልከኝ እንዴት ለራስህ መሆን ያቅትሀል?እኔም አንተም በእግዜር አምሳል የተሠራን ክቡር ፍጥረታት ነን ለኔ ያልተገባ ሀጥያት እንዴት ላንተ ይገባል?ጫት ማለት ለጊዜያዊ መነቃቃት እና ደስታ ለስጋችን የምንጠቀመው እፅ ነው ይሄን ተከትሎ ደሞ መጠጥ ስካር ዝሙት የሚባል ሀጥያት ይመጣል።አንተ ይህን ጫት ቤ/ክ ይዤ ስገባ የጨነቀክ የእግዚአብሔር ቤት ስለሆነ አደል? በምድር ላይ ግን ሰውን የሚያክል የእ/ ር ቤተመቅደስ የለም!እና የእግዜር ቤተመቅደስን በጫት በሱስ ታረክሳለህ?ሱስ ማለት እግዜር የሠጠኝ ደስታ ሰላም አቅም አንሶብኛልና ሌላ ተጨማሪ ነገር ያስፈልገኛል ብሎ መልፋት ከፈጣሪ መጣላት በስራው መጠራጠር ነው! ስለዚህ የመዳን ቀን ዛሬ ነውና ከፈጣሪህ ታረቅ አምላካችን ሀጥያትን እንጂ ሀጥያተኛን አይጠላም ከሴሰኞች ጋር አትተባበሩ1ቆሮ5-9እንዳለ መፅሐፍ ለሀጥያት ለሱስ
አትተባበር።
ቅድም እንደዛ ሲነድ የነበረው እሳት አሁን አመድ ሆኗል! ሰው እንዲ ነው..ወጣትነት ማያልፍ ይመስላል ግን እንደዚ አመድ መክሰማችን አይቀርም።''ከዚህ በኋላ ምኞት ፀንሳ ኃጢአትን ትወልዳለች ኃጢአትም ካደገች በኋላ ሞትን
ትወልዳለች"ያዕ1፥15 ስለዚህ የሞት ሞት እንዳትሞት የስጋ ምኞትህን ለፈጣሪ አስገዛ።
እኔም ሱሰኛ ነኝ ግን የፆም የፀሎት የስግደት ነው።ቅድም መስቀሌን ጥዬው ሳይሆን አንተ ተከትለከኝ እንድትመጣ ስለፈለኩ ነው ጥዬው የመጣሁት።አንዳንዴ ሰወች ወደ ቤ/ክ መምጣት ሲደክሙ ቤ/ክ ወደ ህዝቡ መሄድ አለባት እኔ የቤ/ክ አንድ አካል ስለሆንኩ አንተን ፈልጌ መጣሁ ታድያ ተሳክቶልኛል?
በትክክል አባ!ሁለተኛ እዚ ሀጥያት ውስጥ አልገባም እንደኔ ያሉትንም ለማምጣት ቃል እገባለሁ ይቅር በሉኝ አባቴ(እንባ ተናንቆኝ እግራቸው ስር እየወደቅኩ
እግዚአብሔር ይቅር ይበልክ በል ተነስ
አባ በፈገግታ ተሞልተው አነሱኝ እኔም የማትጠገብ ምስር እና የማይጠፋ ምክር ተመክሬ ቡራኬ
ተቀብዬ ልቤን ለፍቅሩ አስገዝቼ ወደቤቴ
ተመለስኩ።

chaቻ

ዐቢይ ጾም ሰኞ መጋቢት 2 ይገባል
በቤተክርስቲያን ስያሜ መሰረት በዐቢይ ጾም ውስጥ የሚውሉ ሰንበታት እያንዳንዳቸው መጠሪያ ስም ሲኖራቸው እነርሱም፡-
ዘወረደ
የዐቢይ ጾም የመጀመሪያው ሰንበት ሲሆን ይህም ቅድመ ዓለም የነበረ ዓለምን ፈጥሮ የሚኖር አልፋና ኦሜጋ ከሰማየ ሰማያት መውረዱንና ከእመቤታችን ከቅድስተ ቅዱሳን ከንጽሕተ ንጹሐን ከድንግል ማርያም መወለዱን የሚያመለክት ሥያሜ ነው፡፡

ቅድስት
ይህ የሁለተኛው ሰንበት ስያሜ ሲሆን ቅድስት የተባለበትም ምክንያት ስለ ዕለተ ሰንበት ቅድስና ስለሚያወሳ ነው፡፡ እንዲሁም ይህ ዕለት ዕለተ እግዚአብሔር የተባለች የሰንበት ክርስቲያን ቅድስናን ያመለክታል ምክንያቱም የዚች ዕለት ጌታ እርሱ ቅዱስ እግዚአብሔር ነውና ስለዚህም ዕለተ ሰንበት ቅድስት ተብላለች፡፡

ምኩራብ
ይህ የሦስተኛው ሰንበት ስያሜ ሲሆን በዚህ ሰንበት ጌታ በመዋዕለ ትምህርቱ በምኩራብ ገብቶ ማስተማሩ ይነገራል፡፡ እንዲሁም ይህች ዕለት መድኃኒታችን ኢየሱስ ክርስቶስ በምኩራብ ገብቶ እንዳስተማረ የሚታሰብበት ዕለት ነው፡፡ ምኩራብ ማለት የቤተ አይሁዳውያን የጸሎት ቤት ነው፡፡

መጻጉዕ
ይህ የአራተኛው ሰንበት መጠሪያ ሲሆን ይህም ዕለት ጌታችን አምላካችን መድኃኒታችን ኢየሱስ ክርስቶስ ድውያንን መፈወሱ እውራንን ማብራቱ ለምጻምን ማንጻቱ ሽባዎችን መተርተሩ የሚያነሳ መዝሙር የሚዘመርበት እንዲሁም እነዚህ ሁሉ ድንቅ ገቢራተ ታምራቶች የሚዘከሩበት ዕለት ነው፡፡

ደብረ_ዘይት
ይህ የአምስተኛው ሰንበት መጠሪያ ሲሆን ይህም ዕለት ጌታችን መድኃኒታችን ኢየሱስ ክርስቶስ በደብረ ዘይት ተራራ ላይ ሆኖ ነገረ ምጽአቱን እንዳስተማረ የሚወሳበት ሰንበት ነው፡፡ ደብረ ዘይት ማለት ወይራ የበዛበት ተራራ ማለት ነው፡፡

ገብርኄር
ይህ የስድስተኛው ሳምንት ሰንበት ስያሜ ሲሆን ይህም ዕለት ለጌታው ታማኝና በጎ የሆነው ባርያ ወደ ጌታህ ደስታ ግባ ተብሎ እንደተመሰገነ የሚነገርበት ዕለት ነው፡፡

ኒቆዲሞስ
ይህ የሰባተኛው ሰንበት ስያሜ ነው፡፡ ይህም ዕለት ኒቆዲሞስ የተባለው የአይሁድ መምህር በሌሊት ወደ ጌታው ወደ ኢየሱስ ክርስቶስ እየመጣ ይማር እንደነበረ ይታሰብበታል በዚም ዕለት የኒቆዲሞስን ታሪክ የሚያስታውስ መዝሙር ይዘመርበታል፡፡

ሆሳዕና
ይህ የስምንተኛው ሳምንት ሰንበት መጠሪያ ሲሆን ይህም ዕለት በነቢዩ በዘካርያስ ላይ የተጻፈው ትንቢት ይፈጸም ዘንድ ጌታችም መድኃኒታችን ኢየሱስ ክርስቶስ በአህያይቷ እና በውርንጭላይቷ ላይ ተቀምጦ ሆሳዕና በአርያም ሆሳዕና ለዳዊት ልጅ እየተባለ እየተመሰገነ ወደ ቤተ መቅደስ መግባቱ የሚተሰብበት ዕለት ነው፡፡ ሆሳዕና ማለት ‹‹እባክህ አሁን አድን አሁን ባርከን›› ማለት ነው፡፡በሰሙነ ሕማማት ጸሎተ ፍትሃት ጸሎተ አስተስርዮ ስለማይፈጸም ጸሎተ ፍትሃትና አስተስርዮ የሚደረገው በዚሁ ዕለት ነው::
ጾሙን የበረከት ጾም ያድርግልን፡፡

የመጀመሪያ የአቢይ ጾም መግቢያ እሁድ ዘወረደ ይባላል ደግሞም ጾመ ሕርቃል ይባላል፡፡
«ዘወረደ» ማለት «የወረደ» ማለት ነው፡፡ አምላክ ሰው ሆነ፤ ሰው አምላክ ሆነ ማለት ነው። ይህም ጌታችን መድሃኒታችን ኢየሱስ ክርስቶስ እኛን ለማዳንና ፍቅሩን ሊገልጽልን ከሰማያት መውረዱን ከድንግል ማርያም የእኛን ሥጋ መዋሐዱን የሚያዘክር፤ ከሰማየ ሰማያት ወርዶ ከቅድስት ድንግል ማርያም መወለዱን የሚያመላክት፣ የሚታወስበት፣ የሚነገርበት የዐቢይ ጾም አንደኛው ሳምንት ነው፡፡

ዮሐ.3-13፡፡ እግዚአብሔር አምላክ ለአዳም በገባዉ ቃልኪዳን መሰረት “ የዘመኑ ፍጻሜ በደረሰ ጊዜ እግዚአብሔር ከሴት የተወለደውን ልጁን ላከ”ገላ 4፥4 እንዳለ ሐዋርያዉ ቅዱስ ጳዉሎስ የጠፋዉን አዳም ፍለጋ ከአባቱ እሪና ሳይጎድል ሳይለይ ከሰማይ መዉረዱን የምናዘክርበት በዓል ነዉ። ይህ ጾም የጾም መግቢያ የመጀመሪያ ሳምንት የምንጾመው ጾም ሲሆን ሕርቃል የሚል ስያሜ ተሰጥቶታል፡፡ እግዚአብሔር አምላክ ለአዳም “ከአምስት ቀን ተኩል በኋላ ከልጅ ልጅህ ተወልጄ በመልዕልተ መስቀል ተሰቅየ አድንኃለሁ” ብሎ ለአዳም ቃል ገባለት ፡፡ ዘፍ. ፫ ፥ ፲፭ ይህ ኪዳነ አዳም ይባላል ፡፡ የቃል ኪዳን ሁሉ መሠረት ነው ፡፡ ሁለቱን ኪዳናት (ብሉይ ወሐዲስ) በፅኑዕ ተስፋ ያስተሳሰረ የረጅም ዘመናት የድኅነት ሰንሰለት ነው ፡፡ ዘወረደ እርቀ አዳም ፤ ተስፋ አበው ፤ ትንቢተ ነቢያት ፤ ሱባኤ ካህናት መፈፀሙ ፤ ኪዳነ አዳም መሲህ መወለዱ የሚነገርበት የፍቅር አዋጅ ነው።እኛም በዚህ በአብይ ፆም የለመነውና የጠየቅነው ነገር ሁሉ ከኃጢአት በስተቀር እንዲከናወንልን ፆምን ገንዘባችን እናድርግ።በተለይ አሁን በቤተ ክርስቲያን ላይ እየደረሰ በሚታየው አስቸጋሪ ፈተና እያንዳንዳችን ልባዊ ፆም በመፆም ልዑል እግዚአብሔር የፀሎታችንን ምላሽ እንዲሰጠን እንማፀን።
ጾም ጸሎታችን የቅዱሳን አምላክ እግዚአብሔር ይቀበልልን አሜን፡፡

እንኳን ለአቡነ ገብረ መንፈስ ቅዱስ አመታዊ የእረፍት በዓል አደረሳችሁ
የፃድቁ ምልጃና በረከት በያለንበት አይለየን

ለሴቶች ሮል ሞዴል
ከጣፋጩ የቁንጅና ኑሮ ወጥታ  ወደ ጥብቅ ክርስቲያናዊ ኑሮ ለመሸጋገር ምንም አልከበዳትም።ገና  በሰማችው ፣ በዝናው... ተረታችለት። በዓይኗ እንዳየችው  ከእግሩም ወደቀች።  ለብዙኃኑ የምታገለግል ምርጥ ሴት ሆነች።
ፈጣሪ ክርስቶስ፥   ማርያም መቅደላዊት ስትቀርበው ከእሷ የተመለከተው
ዝሙተኛ መሆኗን አይደለም፣ ተሳዳቢ መሆኗንም አይደለም፣
ሽቶና ጌጣጌጥ ወዳጅ መሆኗን አይደለም.... ከልቧ ተጸጽታ ከቀደመው ስህተቷ
ለመመለስ መወሰኗን ብቻ ነው።
  ወደ መልካሙ አኗኗር ተመለሰች።   ወንዶችን የሚፈታተነው የፋሺን ልብሶች ቀሩ። አማላዩ ጸጉሯን ተላጨች። ያደፈ ብጫቂ ጨርቅ ከጭንቅላቷ ላይ አሰረች። የባልቴቶችን ሰፊ ቀሚስ ለበሰች።  የዓይኗ ኩል ጠፍቶ ዓይኗ የባልቴቶችን መሰለ።   ከውድና ጥዑም ሽቶ መቀባባት ወጥታ ጭስ ጭስ መሽተት ጀመረች።  ከወጣት ወንዶችና ከሀብታም ወንዶች ጨዋታና ቀልድ ርቃ ቀልድ ከማያውቁት ከኮስታራዎቹ መምህራን እግር ስር  ተቀምጣ ጀማሪ ተማሪ  ሆነች።  ራሷን ካደች። የቀደመውን ምቾት ከዳችው። በሴትነት አካሏ መመካትን አቁማ አእምሮዋን ለዓላማዋ ሰጠች።  በአዲሱ ማንነቷ የሰዎች መዘባበቻ ሆነች።  ወደ ኋላ ሳትረግጥ ወደ ፊት ብቻ ገሰገሰች። ወጣቷ ቅድስት ማርያም መቅደላዊት  ከሴቶቹ በላይ ሆነች።  የአምላክን ከሞት መነሳት ተመልከታ የመጀመሪዋ  የምስራች ነጋሪ ሆነች።
ከተራ ጽድቅ አልፋ  ከቅዱስነት ደረጃ ላይ  ደረሰች። ዘመን የማይሽራት ለሴቶች ምሳሌ ለመሆን በቃች።  ቅድስት ማርያም መቅደላዊት ... 
የዘመኑ ክርስቲያን ሴቶች ሮል ሞዴላችሁ ማርያም መቅደላዊት ትሁን ።

እያንዳንዳችን ለየራሳችን ምሬት የሞላው ሕይወት አለን ብለን እናስበለን። በሌሎች ሕይወት ያለውን የባሰ ምሬት ስናውቅ ደግሞ እንጽናናለን። የብዙ ሰው ታሪክ ሰማሁ፣ አየሁ የእኔን ታሪክ የሚያስንቅ አላገኘሁም። የኔ ታሪክ ግን የብዙዎችን ተስፋ ሲያለመልም ታዝቢያለሁ።

''እንዴት ኖርክ?'' ይሉኛል መሞት እንደነበረብኝ ብቻ ሳይሆን እንዳለብኝ ሲያስታውሱኝ። እስትንፋስ የሰጠኝ አካል መልሶ ስላልወሰዳት ለታሪክ አስቀምጦኝ እላቸዋለሁ።

''ጠንካራ ነህ'' ይሉኛል። እኔ ግን ጥንካሬን ወይም ድክመትን መርጬ አላውቅም። ሁለቱም ለእኔ ትርጉም የላቸውም። የምኖረውም ስላልሞትኩ እና ለታሪክ ነጋሪነት ስለማስፈልግ ይመስለኛል።

ምንሽሮ
እመቤት ተሾመ

የአለም መጨረሻ ምልክቱ ምንድን ነው?
የአብይ ፆም አምስተኛ ሳምንት ደብረ ዘይት
መድሃኒታችን ኢየሱስ ክርስቶስ በደብረ ዘይት ተራራ ላይ ሆኖ ስለ ዳግም ምፅአት ያስተማረበት
...............................
የአለም መጨረሻ ምልክቱ ምንድን ነው?
ይህን ሁሉ ታያላችሁን እውነት እላችኋለሁ፥ ድንጋይ በድንጋይ ላይ ሳይፈርስ በዚህ አይቀርም አላቸው።
እርሱም በደብረ ዘይት ተቀምጦ ሳለ፥ ደቀ መዛሙርቱ ለብቻቸው ወደ እርሱ ቀርበው። ንገረን፥ ይህ መቼ ይሆናል? የመምጣትህና የዓለም መጨረሻ ምልክቱስ ምንድር ነው? አሉት።
ኢየሱስም መልሶ እንዲህ አላቸው። ማንም እንዳያስታችሁ ተጠንቀቁ።
ብዙዎች። እኔ ክርስቶስ ነኝ እያሉ በስሜ ይመጣሉና፤ ብዙዎችንም ያስታሉ።
ጦርንም የጦርንም ወሬ ትሰሙ ዘንድ አላችሁ፤ ይህ ሊሆን ግድ ነውና ተጠበቁ፥ አትደንግጡ፤ ዳሩ ግን መጨረሻው ገና ነው።
ሕዝብ በሕዝብ ላይ መንግሥትም በመንግሥት ላይ ይነሣልና፥ ራብም ቸነፈርም የምድርም መናወጥ በልዩ ልዩ ስፍራ ይሆናል፤
እነዚህም ሁሉ የምጥ ጣር መጀመሪያ ናቸው።
፤ በዚያን ጊዜ ለመከራ አሳልፈው ይሰጡአችኋል ይገድሉአችሁማል፥ ስለ ስሜም በአሕዛብ ሁሉ የተጠላችሁ ትሆናላችሁ።
፤ በዚያን ጊዜም ብዙዎች ይሰናከላሉ እርስ በርሳቸውም አሳልፈው ይሰጣጣሉ እርስ በርሳቸውም ይጣላሉ፤
፤ ብዙ ሐሰተኞች ነቢያትም ይነሣሉ ብዙዎችንም ያስታሉ፤
፤ ከዓመፃም ብዛት የተነሣ የብዙ ሰዎች ፍቅር ትቀዘቅዛለች።
፤ እስከ መጨረሻ የሚጸና ግን እርሱ ይድናል።
፤ ለአሕዛብም ሁሉ ምስክር እንዲሆን ይህ የመንግሥት ወንጌል በዓለም ሁሉ ይሰበካል፥ በዚያን ጊዜም መጨረሻው ይመጣል።
የማቴዎስ ወንጌል ምዕ. 24 ቁ1-14

የዓብይ ፆም 7ኛ ሳምንት ኒቆዲሞስ
በዚህ ሳምንት እንደ ኒቆዲሞስ ያሉ
ዓለማዊ የመሠሉ ጠንካራ  ክርስቲያኖች ይዘከራሉ።
ኒቆዲሞስ ምሁር ነው፤ ባለሥልጣን ነው፤ ሀብታም ነው።
የፈሪሳዊ ዘር ሆኖ ክፋት አላሸነፈውም።
ቀን ዓለማዊ ሥራውን እየሰራ ሌሊት ወደ ክርስቶስ እየሄደ ሃይማኖትን ይማራል። 
እውቀቱ፣ ሥልጣኑ፣ ሀብቱ ... ለሃይማኖቱ እንቅፋት አልሆኑትም።
ሥልጣን ሲይዝ የሚመራውን ሕዝብ ራሱ  የፈጠረ የሚመስለው፣
በገንዘቡ ሰውን ሁሉ የሚገዛ የሚመስለው፣ በእውቀቱ ፈጣሪን ያወቀ የሚመስለው ፣
በበዛበት ዓለም ክርስቲያን ሆኖ መገኘት መታደል ነው።

ሆሳዕና ከባእለ ትንሳኤ አንድ ሳምንት ቀድሞ በሚውለው እሁድ ይከበራል
ይህ የስምንተኛው ሳምንት ሰንበት መጠሪያ ሲሆን ይህም ዕለት በነቢዩ በዘካርያስ ላይ የተጻፈው ትንቢት ይፈጸም ዘንድ ጌታችም መድኃኒታችን ኢየሱስ ክርስቶስ በአህያይቷ እና በውርንጭላይቷ ላይ ተቀምጦ ሆሳዕና በአርያም ሆሳዕና ለዳዊት ልጅ እየተባለ እየተመሰገነ ወደ ቤተ መቅደስ መግባቱ የሚተሰብበት ዕለት ነው፡፡ ሆሳዕና ማለት ‹‹እባክህ አሁን አድን አሁን ባርከን›› ማለት ነው፡፡በሰሙነ ሕማማት ጸሎተ ፍትሃት ጸሎተ አስተስርዮ ስለማይፈጸም ጸሎተ ፍትሃትና አስተስርዮ የሚደረገው በዚሁ ዕለት ነው::

በህማማት ለምን መስቀል አንሳለምም ወይስ ለምን አናማትብም ?
የመስቀል ክብር እና ሐይል የታወቀው ጌታ በመስቀል ከተሰቀለ በሗላ ነው፡፡ በሰሞነ ህማማት ከሰኞ እስከ አርብ ያሉት ቀናት የአመተ ፍዳ መታሰቢያ ናቸው፡፡በነዚህ ዘመናት ሰዎች የመስቀልን አገልግሎት እንዳልጀመሩ ለማሳየት በሰሞነ ህማማት በቤተክርስቲያን ስርዓት መሰረት መስቀል መሳለምም ሆነ ማማተብ ስርዓት አይደለም፡፡
  በሰሞነ ህማማት ለምን አንሳሳምም?
ይሁዳ ጌታውን በመሳም አሳልፎ ሰጥቷል እኛ ግን እንደ ይሁዳ ክፋት ካለው መሳሳም መለየታችንን ለማስረዳት ከዚህም በተጨማሪ ሰላም በዘመነ ፍዳ እንዳልነበረ ለማሳየት በሰምነ ህማማት እስከ መሳሳም የደረሰ ጥብቅ ሰላምታ የለም፡፡

በሰሞነ ህማማት የማይደረጉ ሌሎች ነገሮች ምን ምን ናቸው? ማንኛውንም ለስጋ የሚያደሉ ተግባራትን መቀነስ እና ቢቻለን አብዛኛውን ጊዜያችንን የጌታን ህማም መከራ በማሰብ በፆም በፀሎት በስግደት ማሳለፍ ፤ቢቻል አመጋገባችንን ከወትሮው መቀነስ አለብን

ጌታዬ ሆይ! ልዑል አምላክ ስትሆን ዝቅ ብለህ የእኔን የባርያህን እግር ልታጥብ ፈቀድክን? እንግዲያውስ እጄንና ራሴን ጭምር እንጂ እግሬን ብቻ አትጠብ። አባቴ ሆይ የቆሸሸው ልቤን፥ ያደፈችው ነፍሴን መላ አካላቴን እጠበኝ እንጂ እግሬን ብቻ አይደለም።

ጉልባን
ጉልባን ከባቄላ ክክ፣ ከስንዴ ወይንም ከተፈተገ ገብስ ጋር አንድ ላይ ተቀቅሎ የሚዘጋጅና የጸሎተ ሐሙስ ዕለት የሚበላ ንፍሮ ነው፡፡ በጸሎተ ሐሙስ በቤት ውስጥ ከሚፈጸሙ ተግባራት አንዱ ጉልባን ማዘጋጀት ነው፡፡ ጉልባን እስራኤላውያን ከግብጽ ባርነት ሲወጡ በችኮላ መጓዛቸውን የምናስታውስበት ከእስራኤላውያን የመጣ ትውፊታዊ ሥርዓት ነው፡፡ በአገራችን ኢትዮጵያ አብዛኞቹ የትውፊት ክንዋኔዎች የብሉይ ኪዳን መነሻ ስላላቸው ይህ ሥርዓት ዛሬም በኢትዮጵያውያን ምእመናን ዘንድ ይከበራል፡፡
ጉልባን እስራኤላውያን ከባርነት በወጡ ጊዜ አቡክተው፣ ጋግረው መብላት አለመቻላቸውን ያስታውሰናል፡፡ በወቅቱ ያልቦካውን ሊጥ እየጋገሩ ቂጣ መመገብ፤ ንፍሮ ቀቅለው ስንቅ መያዝ የመንገድ ተግባራቸው ነበርና፡፡ ይህን ታሪክ ለማሰብም በሰሙነ ሕማማት በተለይም በጸሎተ ሐሙስ ቂጣና ጉልባን ይዘጋጃል፡፡ በጸሎተ ሐሙስ የሚዘጋጀው ጉልባንና ቂጣ ጨው በዛ ተደርጎ ይጨመርበታል፡፡ ይኸውም ጨው ውኃ እንደሚያስጠማ ዅሉ፣ ጌታችንም በመከራው ወቅት ውኃ መጠማቱን ለማስታወስ ነው፡፡

ተፈፀመ
" ኢየሱስም ሆምጣጤውን ከተቀበለ በኋላ። ተፈጸመ አለ፥ ራሱንም አዘንብሎ ነፍሱን አሳልፎ ሰጠ።"
(የዮሐንስ ወንጌል 19:30)