Ҳукмга кўра, судланувчи Х.Ҳ. ўзининг қонуний никоҳдан ўтган турмуш ўртоғи Х.А. билан бир рўзғорда биргаликда яшаб келган пайтда ўзаро оилавий келишмовчиликлар сабабли доимий равишда жанжаллашиб турган. Бироқ шу жанжаллар ортидан сўнгги пайтларда бирга яшамаган.

Жорий йилнинг 11 январь куни соат 12:00 ларда Х.Ҳ. нарсаларини олиш учун Каттақўрғон тумани «Чароғон» МФЙдаги яшаш уйига борган. Ўша вақтда турмуш ўртоғи Х.А. билан яна жанжал келиб чиққан. Жанжал вақтида Х.Ҳ. турмуш ўртоғини тош билан чап кўз соҳасига қасддан уриб, умумий меҳнат қобилиятининг 35 фоиз турғун йўқолишига сабабчи бўлган. Шу тариқа Х.А. қасддан «оғир тан жароҳати» етказиб, оилавий зўравонлик қилган.

Жорий йилнинг 3 июль куни жиноят ишлари бўйича Каттақўрғон туман судида мазкур иш кўриб чиқилган. Унда судланувчи айбига тўлиқ иқрор бўлган. Шунингдек, у турмуш ўртоғининг доимий спиртли ичимликлар ичишини ва шу сабабли ўрталарида доимий жанжал бўлиб туришини айтган. 3 нафар боласи борлиги учун эри билан ажрашмаётганини, ҳаммаси «яхши бўлиб кетишини» кутаётганини билдирган.

Жабрланувчи Х.А. ҳам судда кўрсатма бериб, аёли Х.Ҳ.ни ўзига айтмай уйдан чиқиб кетганини билдирган ва уни ҳиёнат қилишда айблаган. Бир неча бор ажрашиш учун ариза берганда турмуш ўртоғи буни рад қилганини маълум қилган. Шунингдек, у чап кўзининг кўриш қобилияти пасайганини айтиб, аёли шу пайтгача кечирим сўрамагани учун унга нисбатан қонуний чора кўришни сўраган.

Суд ҳукми билан судланувчи Х.Ҳ.га Жиноят кодексининг 126-1-моддаси (Оилавий (маиший) зўравонлик) 7-қисмининг «ж» банди билан Жиноят кодексининг 57-моддасини қўлланилиб (Енгилроқ жазо тайинлаш), 4 йил муддатга озодликдан маҳрум қилиш жазоси тайинланган. Жиноят кодексининг 62-моддаси (Ушлаб туриш, қамоққа олиш ёки уй қамоғи вақтини ҳисобга олиш қоидалари) 1-қисмининг «а» бандига мувофиқ жорий йилнинг 9 апрель кунидан 3 июль кунига қадар қадар уй қамоғида бўлган 86 куннинг ҳар бир куни озодликдан маҳрум қилиш жазосининг бир кунига тенглаштирилган ва тайинланган жазодан чегирилиб, ўташ учун 3 йил 9 ой 4 кун озодликдан маҳрум қилиш жазоси қолдирилган.