قـصـبـةَ الــسُــكَـر💚

‏كم تمنيت أن أجد رسالة منك تخبرني أنك تفتقدني بشدة

731 viewsESRAA, 22:25

حَبيتـك ، كتير حبيتك !
حَاولت إحتوي ضُعفـك ، قَلـقلك وعَصبيتك ..
حاولت نَسّـيك بِـدوري جزء من ذِكرياتك إلّي مَضت ، نَـسّيك حبيبتك إلي .. لآخر لِـقاء بِـيني وبينك حَسيّـتك شـايفها بعيوني .. !
حَاولت إنّـي حَبّبّـك بالحياة ، بالألوان ، بالفراشات ، بالشوارع الضيّقة لمّـا أجبرك نروح ونمشي فيّا ، كَونَنـا تنين
" منحبّ بَـعض"
أو يمكن ..
بحبّـك لَحـالي
بس أنتَ كنت مُصرّ ، مُصرّ تَـضلّ معلّق نصّـك بِـماضيك وحَبيبتك السابقة .. ونصّـك بالحاضر ، مَعي !
وما كان حَدا خاسر بِـهي العَلاقة غيري أنا ، أنا بس !

- خَلينا نطلع مشوار شو رأيك ؟
- مـنطلع .. لوين ؟
- باب توما !
- باب توما .

أوّل ما وصلنا ، طَلـبت منّـك بوري بوظة ، وكَـعادتك ما بترفضلي طَـلب ،
ما بَـعرف كيف مشّ راضي ترفض تطلع مِـنها وتـدخل لَـ قلبي !

وصِـرنا نمشي ..

- كتير بحبّ المشي مَعك .
- " ما ردّ علييّ "
- وبحبّك

" تطلّعت علييّ وأنتَ كمان ساكت .."

- هَالقدّ ما بستحق تَـبادلني كلمـة بحبّك ؟
هَالقدّ ما إلك رغبة حتّى تلاطفني !!

- بضل مستغرب كيف حبيـتيني وأنا أصلاً مو حابب حالي .. كيف عندك هَـالشغف تِجاهي وأنا أصلا ماعندي ربع هَالـشغف لأكتشف حالي

" قلبي نَـقز منو بهاللحظة كتير "

- نـحن بكلّ مرة بدنا نطلع سَوا لازم تحسسني إنّي عَشقانة شِيطان ؟
كمّ مرّة بدّي قلّك إنـّي بحـبّك بعيوبـك قـبل محاسنك ، بسيئاتـك ، بعصبـيتك
ليش مو قًادر تـصدق حكيي ؟
ليش مفكر إنّـي عم أكذب ، إنّي رح ألعب بِمـشاعرك وأمشي متل " إلي مَشت قبلي "
أنا مو متلا .. مَعلش تستوعب ؟

" بلّشت عَ ملامحوا العَصبية ، لطالما كان بيـتدايق وَقـت جيب سيرتـا .. سيرة أكتر إنسانة خلّـتو حزين .. "

وتَـركني ومـشي ، بـلا ولا حَرف ، ما كنـت بصراحة متخيلة هَالـتصرف منّـو بنوب ، تَركني لحـالي بهالشـارع و مشي ، حسّيت حالي لحظتـا ، إنسانـة بلا كـرامة ، بـلا إحساس ،
إنسانة عـم تـحاول بأقصى جهدا إنّـها تكون محبوبـة ، بس عم تفشل ، حسّيت حالـي رخيصة وأنا عم حَـاول لـلمرّة الألف خلّي شبّ يحبني ، وهوّ عمّ يرفض ، عـم يرفض يطلـع من الماضي ، ويأسس مُستقبـل لَـطيف معي

يوم ، تنين ، تلاتة
وأربعة ..
ولا حتّى رفع موبايل وحكانـي
وبصراحة كانو هالأربعـة أيام كفيلين لحتّـى يخلوني قرر شو أتصرف بهـالعلاقـة يلي مو معروف قرارا ..

باليوم الخامس ، إتّصـلت فيه ، وقررت حاكيـه بكلّ جدّية ..
- فيني شوفك
-ماشي ، أصلا اشتقتلّك
- بنًفس مـطرحنا المُعتاد
- ماشي

" ما عاد يغريني حكيوا أبدا ، يمـكن في شي انطفى ، يمـكن ... ! "

والتقينا ..

- بعرف شو بدك تحكـي
- شو بدي احكي !
- بدك حـل ّجَذري
- صح بدّي حلّ جذري ، أنا تعبـت من علاقة هَالحرب هي !
ممكن نعمـل هدنة .. إمّا هلّـق بتسكر عَ كلشي مَضى ، و ما عاد تحسسني إنّي حَابّة إنسان مو منيح ، وسيء متل مابتوصف حالـك !
يا إما ...
- رح تقدري بلاي
- رح خليك تندم
- أندم !
- أي ، تندم ، بالوقـت إلّي رح تـتلفّت حواليك وما تلاقي شعّلة النور إلّي كانت عم تحاول تضوّي حَيـاتك ،
بالوقت الي رح تـلاقي حـالـك لحالـك ، حتّـى ظلّـك رح يختـفي !
رح تندم كتير

- طيّب ، روحي !

" ميّ ساخنة وانكبّت فوقي ، متخيلين ؟ "

- روحي ، أي روحي !
من بدايـة علاقتنا وأنا عم فهمّك إني إنسان مطفي ، إنو عندي مشاكل وهموم لا تُعد ولا تُحصى ، إنّي حبّيت مرّة بحياتي و إنخنت !
وما عمّ أقدر طلّعا من راسي ، ما عمّ أقدر ،
بعترف أوّل ما شفتك لَفتّي نَظري كتير ، حبيت عفويتك ، غنجك ، دلالك ، حُبّك للحياة ، إصرارك ، ذكرتيني بحالي قبل كذا سنة كيف كنت هيك ، شغوف
وقلت أي ، بحاول أتقرب منّا وفوتا ع حياتي ، وجرّب حبّـا ، اول شهر كان مُغري بالنسبة إلي كتير ، لكن شهر بعد شهر ، صرت شوفك عادية ، انطفا بريقك جوا عيوني اي ، اي
هاد أقذر إعتراف مُمكن ينحكالك صح ؟
لذلك روحي ، اتركيني بمتاهتي ، اتركيني بحياتي المُقرفة ، المُتعبة ، وروحي شوفي الناس إلي بتحبّك ، إلي ما كنتِ منتبهتيلا بوجودك معي ،
أنا أقذر إنسان بهالكون ، روحي ماعاد بدي ياكِ

- ماعاد بدّك ياني !
" دمّعت "
- إي ، مُحاولاتك إنّي حبّك فشلت كلها ، بَطلي تحاولي !

" بكيت .. بكيت كتير "
سحب أول سيكارة من باكيتو و حط عيونوا بالأرض ، حاولت لملم دموعي ، وأسألو لآخر مرّة
- أنت متأكد بدّك ياني روح ؟
- روحي !

" و رحت "

كمّية الخذلان والإنكسار إلي حسيتا بهديك اللحظة لا تُوصف ،
أنا كتير بحبّوا ، وكتير بتمنا إنو يتغير ، وتصير حياتو أفضل ، لكن هو مُصرّ ، مُصرّ يبقى بالقاع ،

بَعد بُكاء و تشتت وقلق ، دام شهر .. خلص ، بلّشت أستوعب إنها مالا مشكلة عادية وبتنّحل متل كلّ مرّة ، لأنو هالمرّة كان كلشي جدّي ، حتّى نظرة عيونوا ،

رجعت داوم عَ جامعتي من جديد ، و شفت رفقاتي وبلّشت أرجع لحياتي الطبيعية ، حتّى إنّي شفتوا ، بس مش بعيوني ،
شفتوا بقلبي ، عيوني أكبر من إنّوا يلمحوه بعد كل الأذى إلي سببلي ياه ،

850 views22:56