• لو أصابك همّ وكرب، هَوّن على قلبك في منتصف الليل بقول رسولنا الكريم ﷺ:

"إن عظم الجزاء مع عظم البلاء، وإن اللّه إذا أحب قوماً ابتلاهم، فمن رضي فله الرضا، ومن سخط فله السخط".

- رواه الترمذي وحسّنه.

• غالباً اليوم روح عمعرض الزهور 😁

انطروني بتشكيلة صور جميلة المسويات 💕

• اللي يحب يروح ومتواجد بدمشق..

مستمر لـ ١٤/٧ بحديقة تشرين.

• بتعرف شو الفيتامينات اللي بتتاخد مع الأكل، وأيا اللي بيتاخد عالريق؟

🔹 تؤخذ الفيتاميات المنحلة بالدسم مع الطعام
وهي: D - E - K - A.

🔹 والفيتامينات المنحلة بالماء لا تحتاج أن تؤخذ مع الطعام، ويمكن أن تؤخذ على معدة فارغة أو مليئة وهي: C - B.

🔹 بينما المالتي فايتامينز (المكملات الغذائية متعددة الفيتامينات) تؤخذ مع الطعام.

- د.عمرو عرفة.

_
• كتلخيص بسيط لروحتي اليوم عالمعرض :

الروحة لطيفة كانت، اشتريت نباتين وربع
بكرا بورجيكن ياهن على ضو إن شاء الله

الأسعار أرخص من المشاتل بنقطة صغيرة
يعني الأصيص الصغير شوي سعرو ١٠ لأغلب النباتات وفي تشكيلة زهور ونباتات بيتية حلوة
ومن كل الأحجام..

وفي أقسام للعسل والمستحضرات التجميلية
وبيع البذور والأسمدة والفخار..

غير الأكل والشيبسات والبوظة وهالقصص..

تعبانين جداً عالحديقة للأمانة
يعني الشغل رائع كان،
وهي أول مرة بروح لهيك مكان وأنا حابة النبات وحابة اتفرج عنجد، يعني مو بس مشوار وتغيير جو..

اي بس هيك هي ملخص طويل 🤣♥️..

_
• الصور رح تنزل بالتعليقات مشان ما يصير عجقة هون 🔰:

• كلامي هلأ ما رح يعجب ٧٠٪ من البنات ويمكن أكتر..

بس بتمنى تسمعوني للأخير خصوصاً المحجبات، هالكلام إلي قبل ما يكون إلكن، وصح أنا ما بعمل شي منهن الحمد لله إلا ما نَدَر، بس ما منعرف كيف ممكن تمشي الدنيا..


• معقول ٧٥٪ من البنات ومحجبات وكل أسبوع لازم تنزل تعمل أضافرها جل ومدري شو بسموهن؟

• من إيمتى الشحاطة (أو السليبر متل ما غيرولها اسمها ليضحكوا علينا) بتنلبس عالطريق؟ ما طول عمرها للبيت، لك حتى حد الضيوف منغيرها أحيانا..

• من إيمتى عادي نطلع بالبيجامات عالطريق، ولو حلوين ومريحين وعمليين، هاد اللبس مو خرج طلعة الطريق والله خصوصا إذا محجبة..

• من إيمتى عادي نبين أول شقفة من شعراتنا وننزل غرة؟ ونقول هيك موضة؟

• من إيمتى عادي تبين تلت رباع إيدينا ومنسمي اللي عراسنا حجاب؟

• من إيمتى عادي نلبس صندل وكعب مفتوح ونحط مناكير عرجلينا ونطلع؟

• وليش كتار ما عاد قدروا يطلعوا من البيت بلا مكياج وفوند ومية شغلة عوجهن؟

• ما بكفي الواقي الشمسي؟ طيب لشو التنت (حمرة خدود عأساس طبيعية) ولشو سحبة الايلاينر؟ ولشو الحمرا اللي بترسم الشفاف وبتلفت النظر؟

• وليش صايرة الجواكيت الطويلة موضة؟
طب مادام الواحد عم يلبس ويلبس، ليش ما ينويها لوجه الله ويغير كل لبسو وبيدأ بداية جديدة؟

• ليش عادي نحط عطر ريحتو بتاخد العقل ونطلع؟ يعني ما بكفي الواحد يتحمم ويلبس لبس نضيف ومرتب ويطلع؟

• ضروري نلبس كل يوم قطعة حتى نكون متماشيين مع الموضة برا وما يحكوا علينا؟

• وضروري أعمل رموشي بالمدري شو اسمو حتى يضلوا واقفين واطلع واو حلوة؟ يعني الرموش الطبيعيين صاروا مو مقبولين؟

• ومن إيمتى عادي اسأل عالفيس بأمور شخصية وخاصة عن حياتي وضل اخد قرارات من أشخاص غير كفؤ؟

• وكيف نحن منقبل عحالنا نلبس أي شي ضيق وع قد جسمنا ونمشي هيك؟ من إيمتى مات الحياء عنا؟

• وكيف منشوف الأركيلة شي عادي وكل الكافيهات بنات عم تأركل وتتمايع وكلها قعدات مختلطة؟

• وليش عادي ننزل ستوريات عالانستا بالحفلات ونحن بالمكياج الكامل والفساتين؟

• ومن ايمتى عادي نضحك بصوت عالي ونتمايع بالشوارع؟

• وليش وقت نروح عحفلات التخرج منشوف بنات مفكرة يوم عرسها؟ والمكياج مخيف حرفيا؟
وبقلولك إذا مو حاطة مكياج ييي جلسة التصوير بتطلع بشعة؟ خير إن شاء الله مين قال هالحكي؟

• طيب كيف صار عادي ننشر فيديوهات شخصية بالبيت؟ بينك وبين زوجك مثلاً؟ مزح، مياعة، ترند؟ بس كرمال المشاهدات ويكبر الحساب.

• ومن إيمتى نحن منشتغل لعرض الأزياء؟ ليش كلمة فاشونسيتا جننت البنات وصار عادي نطلع نعرض تياب عحالنا؟ كيف هيك انضحك عالبنات؟

وكيف بتلبسوا حجاب ومن تحت تنورة لعند الركبة مع كلسات شفافة؟ طب ورجلك من تحت حلال؟


وتَطول الأسئلة.. وتطول القصص المستغربة منها كيف البنات عم تقبلها عحالها..

هي ما جبت سيرة الرجال ولا الأهل
أنت كأنثى عم تعملي كل هاد، قبلانة؟ من كل عقلك عم تتصرفي هيك؟ اسألي حالك من جوا عنجد عادي هالشي؟


صدقوني تلت أرباع القصص حالياً هدفها تدميرنا، هدفها صرفنا عن هدفنا الأساسي اللي خلقنا كرمالو، وكرمال نكتئب ونكره حالنا ونبطل نقدر نشوف حالنا غير بالفلاتر ومرتبين..

كل البنات مهووسين بالموضة صاروا، بالصالات الفخمة، بالمكياج التقيل الماركة.. بالمصاري وكيف بدها تخفف لبس كرمال الدنيا وبس، كرمال أمور كلها بتنسلب بدقيقة!!

بس همهم يلحقوا التريندات بدون ما يفكروا اذا صح أو غلط، إذا حلال او حرام، إذا بتتماشى مع مبادئهن ودينهن..


بالله عليكن لا تمشوا مع الكل وانتو مغمضين، والله كل وحدة فينا عندها عقل بجنن ومن عيل بتجنن، لا تتخلوا عن مبادئكن لمجرد تمشوا مع القطيع..

ارجعوا لنفسكن شوي، وشوفوا هل راضيين عن حالكن أو لاء؟

وما رح اعتذر عكلامي، لأن أي شي عكس هاد فهو الطبيعي والمريح كمان، مو بس طبيعي.

_
يمكن ما حدا يقرا حكيي هلأ.. لأن طويل

بس كان ضروري اكتب هالجريدة لعبر عن استنكاري للي عم يصير بوقتنا 😮‍💨