(( #طيف_حيره )) 
ترويه العليله للسيده أم البنين ع
#محرم_الحرام
……………………………………………………………

طيف .. مر عليه و خله روحي ابحيره
طيف .. شنهو جده ام الگمر تفسيره
غامض ويحمل حزن
كلبي رف اوي الجفن
طيف حيره .. طيف حيره

……………………………………………………………

جده چن الدنيا حمره . وكلشي اشوفن منجرح
شفت قران و يرتل  .  مرتفع فوگ الرمح

جده هالقران صاير لونه اصفر
من كثر أياته تنزف حبر احمر
البسمله عطشانه اشوفنها اتفطّر
سورة الاخلاص تبچي اتعازي كوثر

ليش .. هو قران السمه ايعرفونه
ليش .. من حديد الرمح و ايعذبونه
مصحف الباري يون
گلبي رف اوي الجفن
طيف حيره .. طيف حيره

……………………………………………………………


شفت يا جده ابمنامي . شوفة الدهشه و عجب
الشمس فوگ الگاع ظلمه .والضياء منها انسلب

اخيول وحدتهن جبل غارن عليها
روحه رده و بالركض سحكات بيها
خيل تسمع رنة احديد ابمشيها
الگاع حدر الشمس تخسف من تجيها

حيل .. الحافر ابلايه رحم داساها
حيل .. هالشمس وي الارض ساواها
جده وانطحنت طحن
كلبي رف اوي الجفن
طيف حيره .. طيف حيره

……………………………………………………………


چن اشاهد طير ابيض . ابعينه مذبوح الصبح
وعشّه هم ابيض ابلونه . فارغ و ظل منجرح

حيل عطشان و دمع يلمع يهلّه
أكباله صار اغراب ما تشرب يگله
شويه لن ابرگبته مدري اشتخله
عاينت لنها اطلعت يا جده نبله

طير .. رگبته ازغيره و سهمها اشطوله
طير .. و اصبحت عن الجسد مفصوله
مات و العشّه يِحن
كلبي رف اوي الجفن
طيف حيره .. طيف حيره

……………………………………………………………


جده شفت الكمر نازل . امدخن ابغيظ و قهر
خوف منه و لون اصفر . انگلب ماي النهر

ومدري وين اتوجه وبالماي حاير
والسمه اعليه مطرت اسهام وعساكر
اتبده مايه و حيل ظل مكسور خاطر
ولن عمود اشگد ضخم ولراسه فاطر

صاح .. صوت عالي و معرفت مقصوده
صاح .. عذروا عمكم ما وصلكم جوده
صوته باذاني يرن
كلبي رف اوي الجفن
طيف حيره . طيف حيره

……………………………………………………………


شفت اميره وتاج تلبس.امبينه بت أصل وفصل
تركض و چانون صاير . جوه رجليها الرمل

جده مثل اعبينه تلبس هالاميره
وهالركض مالتها چن وكت الظهيره
بس يجده الحيره و العجبه الجبيره
هالاميره اتحولت صارت اسيره

سوط .. وحش وامكشر اسنونه اعليها
سوط .. اعبايه لون ازرگ غده امسويها
اتميل لو مال المتن
كلبي رف اوي الجفن
طيف حيره . طيف حيره

……………………………………………………………


أورود چن وحيل ذبلت . منها مسلوب العطر
خايفه واللون شاحب . جده عطشانه اشكثر

الورد دوم امدلل ابحضن الفراشات
الشفته من الخيل شابع جده سحگات
محد ايشمه وفقط ضرب و شتيمات
اورود ترفه الشوج تارك بيها لچمات

آه .. شفت ورده و جرح تركت بيه
آه .. خضره واعليها انرسم ترچيه
ادموم تجري امن الاذن
گلبي رف اوي الجفن
طيف حيره . طيف حيره

……………………………………………………………
✍️ ( سيد خضر الزاملي )


https://www.tgoop.com/plkfc

الشاعر المخلص السيد خضر الزاملي
اداء الخادم محمد السماوي

انشيع الجواد المسموم ٠٠ والكاظميه المگصد
☆☆☆☆
انعزي الزچيه فاطمه بهذا اليوم
لمصاب ابنها والامام المسموم
اليوم الدمع فوگ الوجن طاح ادموم
للطاهر ابن الاطهار ٠٠ باليمه تاسع فرقد
☆☆☆☆
تاسع بدر وسفه تسمّم چبده
واليوم هالشيعه تنوح الفگده
والماي شيلمه اذا يتبده
من السمه غاب هلال ٠٠ وبعده الفلك صار اسود
☆☆☆☆
لبن الرضا ما ينگطع دمع العين
لمصابه ينقام العزه في كل حين
بغداد حزنت للجواد الصوبين
وتعنت ارض الامجاد ٠٠ وبيها الحزن يتجدد
☆☆☆☆
اندگ الصدر هاليوم وندگ زنجيل
وموج الدمع لمصابه هاليوم يسيل
بسم الجواد الكون رتل ترتيل
صوت حزن والويلاه ٠٠ بلساني اله يتردد
☆☆☆☆
هالدنيا ما تنصف أبد سادتها
غداره ما تنفع ابد صحبتها
تخلي العبدها يعتلي رگبتها
وتغدر بسادات الناس ٠٠ البالدنيا چنت تزهد
☆☆☆☆
شنهي ذنب مولانه ويسمونه
ومرمي على داره العده يخلونه
وممنوع عالشيعه وهله يشيلونه
لكن نفذ أمرُ الله ٠٠ وهذا الاسم يتخلد
☆☆☆☆
امصاب الجواد ايعيد يوم العاشر
يشبه حسين الظل ثلاثاً عافر
بس ماسحگ جسم الجواد الحافر
وماشالت الراس ارماح .. والجسد باقي امّدد
☆☆☆☆
ماعنده أخ طاحن رميه چفوفه
ماعنده زينب لليسر مچتوفه
ولا فرّو ابنياته شام وكوفه
مامش مثل يوم حسين .. كل القصص لو تنعد
☆☆تمت☆☆
حيدر بشار الدراجي

الشاعر المخلص لخدمة أهل البيت عليهم السلام
حيدر بشار الزيادي
اداء الخادم محمد السماوي

مجموعة ابوذيات
شهادة الامام الجواد ع


              إطـلـب يـنـوخـذ ثـــاره.. يطالب
              غـريـب ومـحـد ابـدمـه.. يطالب
              زلـمـكم ويـن مـا تـفـزع.. يطالب

              الـجـواد ألليله بٱحضان الـمـنـيـه

                          *---------------*---------------*

              إلـــه بــحــســره اجــرن آه.. ويْآه
              واحـس گلبي مصابه ابنار .. وياه
              ثـلـث تــيـام مـحـد وصــل.. وياه

              بسطح داره وبقت جثته رميه   *---------------*---------------*

              عـليـه ام الـفـضـل صـبـت.. يهلهه
              وحـگـه الـدمـعتـه ألـلـيـلـه.. يهلهه
              الـجـنـازه هـاي شـيـعـوهـه.. يهلهه

              تـعــالــوا  لـلـجـــواد  بــهــالــرزيــه

                          *---------------*---------------*

✍️خادم الأمام الجواد ع
   الشاعر رعد الجريخي

لاستشهاد الامام محمد الجواد عليه السلام (موشح)🚩

خلت داره وارتحل منها الجواد
ابوالهادي ابن الرضا خير العباد

موحشه بغداد هذا البيها صار
صب ظلام الليل لونه على النهار
دار تضوي كل وكتها وهسه دار
اموشحه بثوب الحزن لبست سواد

ياجبال التحمل بصبره وتشيل
من هظم من جور من وادم تعيل
بالخيانه ردوا اعليه. الجميل
وقابلوا إحسانه بالشر والعناد

رحل من احيا الصلاه والموعظه
ناشر علوم النبي.   والمرتضى
گضه نحبه الجود راح ابن الرضا
تاسع الاطهار عنوان الرشاد

مهجة الأسلام وأسباب الوجود
ونعمة الايمان خير ابلاحدود
قابلوا فضل الامامه بالجحود
وزاد حقد المعتصم عن غيره زاد

گضه نحبه بعيد عن اهله غريب
غاب عنه كل حبيب وكل قريب
گضه بالسم لامداوي ولاطبيب
أبحر هجير الشمس ظل باب المراد

الشاعر حسن لعيبي الحريشاوي

اوصفـلك وصـف مـذكور بلـ قرأن
ايـه سيـدي مـن ســورة الرحمـان
مرج البحر يبنه السبطي مـن مده
جعل بينـي وبينــك سيدي الحده
انه لونـي خبـط مـن كل الــذنوب
وانت الصافي وأنه البيه العيـوب
*
يبن الصميـده... ذنبي جريـده
خلصني فدوه...واخذ التريـده

ماهيتي احبـك... يقبلني گلبك
فدوه حتويني... لا ما اتعبــك

*حسين بويه حسين*
༺༺༺༻༻༻

يـ حسيـن الحمد لله علـ كل حال
بس يا بـويه يكتـل سبـي العيـال
يمملگـة السعــادة بنـص الــدموع
ابچـي والطـم واكســـرلك ظلـوع
يـ المبيـت البنــــات بنص خرايب
بذكرك مو بطر عشــت النـــوايب 
༺༻
عايش جروحك.. نوحي ويـ نوحك 
يا روحي انتـــه.. تسلملـــي روحي 

نــــاذر سنينــي.. تگضـــي حسيني
ولو مـا بجتلـك.. اطفيـــها عينــــي

*حسين بويه حسين*
༺༺༺༻༻༻
تهاون گلبي وتمدني برحمتـك
اعذرني طفل هسـه فتهمتــك
يسيـر جدمي لذنوبي وتردني
يـ مـولاي شبـدر مـني تحبنـي
لالي دمعه تكفي ودمعة العين
ما طيبة جرح من جرح الفين...
༺༻
منطينــي انتــه .. كلشــي ملـكته
لـ دين الله حته.. بــــزرك نذرتـــه

عيشني خيرك .. فدوة الضميرك
كلمة ارد اگلك .. ما عندي غيـرك

*حسين بويه حسين*
༺༺༺༻༻༻
جنت عمـري بسهو گاضيها الايام
انه بصدري ذنب وبصدرك اسهام
ما ينسد جفنهـــن هســـه وارتاح
وامامي مسلـب وداميتـه الجراح
باريـت الگصـب ملمومـه الاحلام
وزينب بالجفوف تطفـــي الخيام

نفســي رديــــه..  يبــن الزجيـــــه
سلمتـــك امري.. عيــنـــك عليــــه 

استـــر عيـوبي..وانسـه ذنوبـي
وبلون الاســود.. يا محله ثوبي

*حسين بويه حسين*
༺༺༺༻༻༻
أسم القصيده.. مرج البحر
      عبد ال محمد
منتظر خالد المنصوري

ملا حيدر المنصوري

شهادة مولانا محمد أبن علي الجواد
صلوات الله وسلامه عليهم

ياسَميّ الهادي جدك وطبعك وطبعه توحد
گلبي من الجاهليه واعله ايدك گلبي وحّد
آمنت بأكبر رساله وبيها يامولاي اشهد
فرو لحسين وعرفته بكربله يدلي محمد

كتابك بأوله
دليلي رتله
جواد آل النبي
يودي بكربله

رسول اهل الخيم
دمع حچيه انفهم
جروح لكربلاء
ويباريها الالم
__

عمرك بكلهن جهاته بي نشوف الغاضريه
عايش اسنينك مواقف من ضهر طف الرزيه
اتيتمت بأول حياتك چنك اتمثل رقيه
للرضا شابح عيونك تدري منه ماكو جيه

الابو راحو الابو
منو يعوضه منو
بخراسان الغريب
ويحيطونه العدو

الغريب بحضرته
ينسيه غربته
جواده شو بقه
غريب بدمعته
__

يامن ابعنوانه واضح ما يأخرها عطيته
الجواد وجوده دايم ينثر الرحمه سجيته
انته من جود الكفاله طعم جودك لو جريته
انطيني للعباس دمعه لطيحة اچفوفه البخيته


خيم تتربه ليه
عذب تروه امن اديه
وگع جود الكفيل
وعطش صابك عليه

الظعن محد رواه
ولاتهنه وراه
ومتت وانته بضماك
لأن تبچي لضماه
__

يالسنينك صوره بيها يوم عاشور وعذابه
خذت من اهلك مصايب رغم ماكلمن مصابه
ياشباب تموت حسره عالبچت امه لشبابه
ليله الاكبر راح منها وگوه ابوه للخيمه جابه

ذبل عمر شباب
وگلب بالخيمه ذاب
بدر ليله حرام
على جروحه التراب

بشبابك يالتغيب
الك منه نصيب
اجه السم ويصير
وسط چبدك لهيب
__

اشسوت الدنيا بگلبها فاطمه شافت عجايب
والولد لمن تعدهم چنها تحسب بالمصايب
بدمعه اجت يم الجواد وشافته من سمه ذايب
يبني آ يبني تگله ليش نومك عالترايب

غريبه وللغريب
تعنت بالنحيب
جرح بيه عليك
ييمه مايطيب

على ترابه تنام
مثل جدك حرام
ثلثتيام انوح
منو يشيل الامام
__

اللهم عجل لوليك الفرج
سيد مرتضى الياسري

رسالة صوتية

ميمر للجواد

لو عكست الدنيه وياك.   الكبر الجواد اتعنه
****
هذا الكريم الما يرد خطاره
محد اجه وما بشراه ببشاره
صبح ومسيه ايرحب بزواره

للحضره لو بس طبيت    جنك تطب للجنه
****
خل يكصد الكبره اليطيح بشده
والصفه كلبه ونيته حاشه يرده
باب المراد امراد اخذ من عنده

جم مره زرته وصليت.   وما خيباها الضنه
***
وين الصعب مرضه وعجز دكتوره
خل يعتني الكبر الجواد ايزوره
والصيدليه كبته المشهوره

اكبر طبيب ابغداد.  واسأل الوادم عنه
*
عندي يقين بسيد الحنيه
ايشافي المريض ويرزق الذريه
وكبته يا ناس بذهب مطليه

والعنده متصير اطفال.  خل يمشي يطلب منه
****
هذا الجواد وكلها تحجي بجوده
وبالكاظميه سفرته ممدوده
وكت الشدايد وكفته مشهوده

وكل عاشك اعله الشباج.  يشبك عمر يتمنه
**
باب المراد ويفرح بخدامه
وحي الله صاح المهدي باللطامه
احيو يشيعه بالدموع ايامه

لمصيبته نبجي اليوم.   ونجذب بكبره الونه
***
تحسين الخفاجي

رسالة صوتية

كعدية للامام الجواد ع
للشاعر محمد الجماسي
أداء عصام المحمداوي

من زغري ويّاك
ما اگدر انساك
يا محرم .. يا محرم
=========================
يا محرم تختلف عن باقي الشهور
انت المخلي حياتي كلها عاشور
اشلون انسه بكربلائك گطع النحور
شنسه نيران الخيم لو سلب الخدور
من زغري محتار
وبگلبي چم نار
امن المخيم .. يا محرم
=========================
ذكرياتك مؤلمه يا شهر الأحزان
شما اشوف الماي اذكر جدي عطشان
من اشوفن خيل ابچي وين ما چان
اذكر الصدره صبح للخيل ميدان
بعيوني مطبوع
تكسير الضلوع
عايش بهم .. يا محرم
=========================
الطفل لو يمي بچه شيسوي بيه
يذوب گلبي من رباب اتصد عليه
ابقه العن حرمله صبح ومسيه
طفل عطشان اذبحه بالغاضريه
وامه تصدله
وبنحره نبله
سابح بدم .. يا محرم
=========================
بعد يوم الطف بقت عمتنه بس عام
من دفناها بديها چوية خيام
چانت آخر كلمه منها آه يالشام
تذكر اشلون بخرابه جانت تنام
من هالمصيبه
ماتت غريبه
عمري اظلم .. يا محرم
=========================
يا محرم هالمحن شافتها عيني
وكل سنه بهلالك تهيج ونيني
خل اموتن گبل ما شهرك يجيني
انه بس دمعه وحزن خلصت سنيني
المحنه چبيره
الماله عشيره
يجرع السم .. يا محرم
=========================
الشاعر كرار حسين الكربلائي





ليلة ٧/ذوالحجه /١٤٤٦ هجري
الأربعاء 4\6 \2025 ليلة
استشهاد الإمام محمد الباقر
عليه السلام #قصائد1446هج

ليلة ٧/ذوالحجه /١٤٤٦ هجري الأربعاء 4\6 \2025 بصوت خادمكم الرادود ابو هاشم الربيعي ليلة استشهاد الإمام محمد الباقر عليه السلام #قصائد1446هج

واســــــــــــي الإمام المعصوم       بدموعك السچّابه
========================
الباقر رحـل عــــــــــن دنيته أوّدعها
وجعفـر وليـــــــــــــده جنازته شيّعها
العينه ابوداعه مـــــــــا نشف مدمعها
وبصدره لوعــــــــــــه وآهات     عالوالد وعالصابه
=========================
غسّله بأيـــــــــــده وكفّنه إعلي صلّه
وبأيــــــــــــــــده داره اوّسده عالقبله
واسبل الأيــــــــــده ومد يويلي رجله
ومن رد التــــــــــــراب إعلي     ونّت جميع أحبابه
=========================
وضّح معالم گبــــره لا مــــــــا عافه
والناس عرفـــــت موضعه واوصافه
الزاره وحضر يم گبره نــــال الطافه
واللي يندبه امـــــــــــن بعيد       يسمع أكيده جوابه
=========================
بمأتم عزانــــــــه خـل نواسي الجعفر
المجروح گلبـــــــه ابهل مسه وتگدر
عالغابت انـــــــــــواره ابوداعه اتأثّر
ومـــــــــــا هاد گلبه ولرتاح     من وسّــــــــده بترابه
=========================
ابلوعه وألم يــــــــــا شيعه خل نقراله
ونعين أبنه انواسي كــــــــــــــل عياله
بدمعه جريّــــــــــــــــه علوجن هماله
تچوي وتجّـــــــــــــرح الخدود    عالباقــــــــر وبمصابه
=========================
مـــــا ننسه يومه بأسمه هــــــذا المأتم
وبكل عزيــــــــــــــه دوم نخضر نلتم
نشمي الحضر  وســـــط العزه وتوسم
ابلطمة صدر لـــــــو بدموع         نجريها يــوم مصابه
=========================
بالباقر أسأل يــــــــــــا إلاهي وأندب
اتعجل ابطلعة منتظرنـــــــــه اتقرب
هـذا جمعنه أيصيح عجل يــــــا رب
انهي غربــــــــــة المحجوب       ونهيله امـــــــــر غيابه
=========================
الشاعر قاسم حتروش البلداوي




ليلة ٧/ذوالحجه /١٤٤٦ هجري
الأربعاء 4\6 \2025 ليلة
استشهاد الإمام محمد الباقر
عليه السلام #قصائد1446هج

ليلة ٧/ذوالحجه /١٤٤٦ هجري الأربعاء 4\6 \2025 بصوت خادمكم الرادود ابو هاشم الربيعي ليلة استشهاد الإمام محمد الباقر عليه السلام #قصائد1446هج

🖇📍نعي لخروج الامام الحسين عليه السلام من دار المدينه الى كربلاء

         

وگفت ضعينتهم عله الباب
يتشاورون اليوم الاحباب
وخلو الدار امگبعه اتراب
وزينب گلبهه اتصوب اصواب
طبت لخوها اتعاتبه اعتاب

¢¢¢¢¢¢¢¢¢¢¢¢¢¢¢¢


بده اعتابهه زينب امن اليوم
وأتگله يبن امي يمضلوم
ماريد اروح لديرت الشوم
اخافن عله راسك امن الگوم
مانايمه ولا شايفه النوم

¢¢¢¢¢¢¢¢¢¢¢¢¢¢¢¢


مانمت خويه امن امس يحسين
يرجف دليلي  وتهمـل العـين
اخذتوا  ضعنكم وين ماشين
وعفتوا نزلكم  والــــدواويـن
چنه عليكم يفـــــــتر البين

¢¢¢¢¢¢¢¢¢¢¢¢¢¢¢¢


البين ضل يفتر عليكم
يهل الشيم وين اوديكم
والغاضريه اتخون بيكم
حاچوني خـل اسمع حچيكم
شنـ هالسلح هاي البديـكم

¢¢¢¢¢¢¢¢¢¢¢¢¢¢¢¢


اخذتو سلحكم  وين تردون
والطف يخويه موش  مامون
فدوه اروحلكم  لا  تروحون
اريــدكم هيبـــه تضــلون
خاف العده بيه يعيلون

¢¢¢¢¢¢¢¢¢¢¢¢¢¢¢¢


خاف العده ايعيلون بيه
وترحون كلكم من اديه
ضاعت عساهه الغاضريه
وگلبي انشلع يهل الحميه
ادري الهضم مكتوب اليه

¢¢¢¢¢¢¢¢¢¢¢¢¢¢¢¢


لشاعرة اهل البيت عليهم السلام
المله ام هچران  العمارچيه

رسالة صوتية