رايد أقرالك مقتل ثاني
ومو عبد الزهره الكعبي آني
بوجهك اتأمل
المذبوح الأجمل
گلت اقرالك مقتل وجداني
......
ممكن اسأل . ليش تذبل . وتغمض العين
يا هظمنه . الطف حرمنه . ضحكة حسين

الصوره العدنه هاي حسين قبل الطف
بعد لحجاره ما ضن وجهه يتوصف
فتحتله جبينه فتحة المصحف
قبل كربله تمنيت الزمن يوگف

حسين المدينه بخير عيونه
بس بالطف ظامي وما يروونه
وشفاه ما تبتل
المذبوح الأجمل
گلت اقرالك مقتل وجداني
.......
طحت مايل . اعله ابو فاضل . وگلت بحساس 
شراح نتعب . انه و زينب . مات عباس

ردت ترجع ولكن گومتك تصعب
بعد ماكو اخو يسندك لمن تتعب
الزمت ظهرك وگلت لروحك وتنحب
يلا حسين گوم بعازتك زينب

امشي اعله خيامي ودمّه بإيدي
واصرخ يا زينب مات اعضيدي
مات اليتكفّل 
المذبوح الأجمل
گلت اقرالك مقتل وجداني
.......
وموقف اخر . وي الاكبر . بأوّل وداع
گتله يبني . شگد تحبني . ارجع بساع 
 
ورجع وانت اركضتله وگمت تتعثر
هوّ حسيني صاح وانت يالاكبر 
شبگته وگلت بويه ليش تتأخر
اشتاگيتك يگلك گتله انه أكثر

بتوديعه الثاني ابچيت بسرعه
تعرف بالعسكر  راح يگطعه
وبدر الحب يأفَل
المذبوح الأجمل
گلت اقرالك مقتل وجداني
.......
فطر چبدك . صغير ولدك . من بچه هواي
تسمعه يبچي . يعني يحچي . يا أبي ماي

عبد الله الربيع اليشبه الورده  
اذا قسنه السهم يطلع على گده
انصاب وطلّع إيده يحضِنَك قصده
وراس النبله دگ بصدرك وردّه 

وي صوت النبله وسيلة دمّه
چانت مغميّه وفزّت أمه
فگدت لمدلّل
المذبوح الأجمل
گلت اقرالك مقتل وجداني
......
وداعك يضل . وحده مقتل . عالنساوين
انت توگع . وهي تطلع . للدواوين

وبقيت تواسي زينب يبو الحنيه
ديري بالج اعليچ وعلى ارقيه
وانتي اختي العظيمه وازكى علويه
ليهمچ إذا يصيحون مسبيه

لا ما نتفارگ يختي الاغله
باچر نتلاگه برمح وهزله
صيحيلي اعله التل
المذبوح الأجمل
گلت اقرالك مقتل وجداني

كلمات #الشاعر_ميثاق_الحمداني

مقتل ثاني

حفضت ونتي الناگه-- بس أبدي تون أوياي
تحن من تسمع آهاتي-- وتصب الدمع لبجاي
آه➖آه➖عدمن عفتني ياضوه عيوني
➕🔷➕🔶➕🔷➕🔶➕🔷➕🔶➕
ضاگ الهوه➖وضهري التوه➖لمن شفت ناگه وحبل
گمت وطحت➖بسمك صحت➖وين الوعد يابه الفضل
كل مايسمعوني أحاجيك➖أتفز الزلم لو جبته طاريك
لو صحت أبوفاضل➖صاحو أجه الكافل➖
يمبجي عدواني شجره أعليك
يكسر خاطرك حالي ياريتك تجي عباس
                              لمة وادم گبالي وأذتني عيون الناس
آه➖آه➖آه➖ريتك شفتني➖ياضوه عيوني➖
   حفضت ونتي الناگه بس أبدي تون أوياي
➕🔷➕🔶➕🔷➕🔶➕🔷➕🔶➕
يم الخيم➖وگفت زلم➖لا تنحصي أولا تنحسب
الحر والعبد➖هذا اليهد➖هذا اليطگ هذا اليسب
يگلولي ها ياذلة الحال➖وذاك اليگلهم شدو الحبال
واليخزر بعينه➖برقيه وسكينه➖صاح الشمر ما عدهه كفال
تكتل نضرة الشامت ياصوت العتب مخنوگ
          الصوط أمهدل جتافي ويردوني أصعد أعله النوگ
آه➖آه➖آه➖إيأذيني متني ياضوه عيوني➖
   حفضت ونتي الناگه بس أبدي تون أوياي
➕🔷➕🔶➕🔷➕🔶➕🔷➕🔶➕
عندك علم➖نار الخيم➖من حرگت أطراف العبي
إيبان الجدم➖من الحرم➖لو يمشن أبدرب السبي
من خيمتي المحترگه بالنار➖گمت أرگع الصاحي أمن الاكتار
أرجع وگبعهن➖وللنوگ أطلعهن➖أستر بناتي عن الأنضار
مستحيه الرباب أهواي تعثر بالمشي وتميل
                  ورمله أتگلي يازينب نطلع من يجي الليل
آه➖آه➖آه➖يالضيعتني ياضوه عيوني➖
   حفضت ونتي الناگه بس أبدي تون أوياي
➕🔷➕🔶➕🔷➕🔶➕🔷➕🔶➕
لا تعتذر➖هذا الشمر➖يمي وگف ويسب علي
عنك سأل➖وينه الكفل➖شنهو العذر ياكافلي
گتله يرد كفالي وتشوف➖يابوالفضل طلعلي الجفوف
گلي گطعناهن➖لسكينه جبناهن➖ وضل العلم يم زنده ملفوف
ونتي أشما تحشمينه ماينفع بجي أولا نوح
                 ذاك المرتفع راسه إوياج أعله الرماح يروح
آه➖آه➖آه➖الوادم سبتني ياضوه عيوني➖
حفضت ونتي الناگه بس أبدي تون أوياي
➕🔷➕🔶➕🔷➕🔶➕🔷➕🔶➕
گوه أصعدت➖بس جاطحت➖أصعود الأبل ماينجرع
نوگ الهزل➖تكتل كتل➖ضهري عله الناگه أنگطع
والناگه عرجه وهزلة الحال➖من توگف أيجروها بحبال
أبجي وبجت هيه➖عرفتني مسبيه➖حنت عليه والدمع سال
أترافكنه الدرب كله تعبانه أعله تعبانه
                        عنهم تبتعد بيه جن عرفتني ياهي أنه
آه➖آه➖آه➖منهم حمتني ياضوه عيوني➖
حفضت ونتي الناگه بس أبدي تون أوياي
➕🔷➕🔶➕🔷➕🔶➕🔷➕🔶➕
درب اليسر ➖يسعر جمر➖تجوي الوجه شمس المسه
متغيره➖ومتگشره➖أوجوه الحرم وميبسه
يسفي الرمل وتهب السموم➖أشفايف رقيه أيصبن أدموم
أبنيتي الترفه➖متفطر الشفه➖وتصيح أريداً والدي اليوم
تصرخ بابا يابابا مو گد السبي عمري
                 الزلمه اليسطر خدودي جف إيده يجي بكبري
آه➖آه➖آه➖يالدللتني ياضوه عيوني➖
حفضت ونتي الناگه بس أبدي تون أوياي
➕🔷➕🔶➕🔷➕🔶➕🔷➕🔶➕
حسين باهض الحلفي

حفظت ونتي الناگه

(( #الأكبر_أكبر ))  .  #محرم1446
……………………………………………………………

الاكبر اكبر مِـن هـالحرب
اطيح الشوارب لمن يطب
حيا الله الاكبر .. حيا الله الاكبر

……………………………………………………………


اي نعم شنو قياسه بذوله
وهو يتنفس عزم وارجوله
اقزام شاف الجيش ضاعوا بالتراب
يشوفهن علو الجراد  اخيوله

اي نعم سبعين الفاً لچن شافاهم صفر
الاسد لو طبها ايتمشه الغابه اجمع تنصگر
السمه و الگاع و وجهم  كلهن انگلبن صفر
اسيوفهم رجفت وماتت كل غمد اصبح گبر

صورة منيه الاكبر رسم
بالخيمه بعده ونص انهزم
حيا الله الاكبر .. حيا الله الاكبر

……………………………………………………………


دره والرب للحسين انطاها
ابروحه من عين الحسد غطاها
بالحرب شيّاب كالو للشباب
هذا من يثرب اجاكم طه

وقسم گالو هذا حيدر طلع من گبره وعدِل
روسكم حسبوها طارت يرد صولات الجمل
وقسم ثالث كال لاله هذا الاكبر هل نزل
يعني عزرائيل اجاكم بيده جابلكم أجل

بالحومه دگت ساعة خطر
لا ماكو چاره ومامش مفر
حيا الله الاكبر .. حيا الله الاكبر

……………………………………………………………


من نزل وبچفه عصة موسى
وظلت انفاس الزلم محبوسه
مثل حال الغنم لو طباها ذيب
امراكض وللشرده صارت هوسه

دگة اكلوب العساكر بالمعسكر تنسمع
اگلوبهم بالخوف شردت لچن لزماها الضلع
صگر وجناحته تذبح طشّر اگباله الجمِع
ركضاهم و صّلاهم يمكن الخان الربع

من خيل أميه وصاحت فرس
ادخيلك يسيد ناخذ نفس
حيا الله الاكبر .. حيا الله الاكبر

……………………………………………………………


والشمر يتوسل ابكل قائد
العلي يبرز بلكي منهم واحد
منهم اللي انسحب لذيال الصفوف
ومنهم البين العساكر لابد

عوده صاير خوش زلمه بكر ابن غانم طلع
اطمئن يا شمر گله احسب الاكبر وگع
تالي بس خزراه الاكبر وگف كلبه وانصرع
ابلايه راس وفقط جثه عالفرس ليهم رجع

گالوله ربعه وها اشحصلت
موتك ثواني ولا طوّلت
حيا الله الاكبر .. حيا الله الاكبر

……………………………………………………………


تره مامش زلمه يدنّاله
روحه ما رايدها هذا شماله
ابد مو بالسيف من گدروا عليه
الماي هو اللي فطر دلّاله

ولله لو شارب الاكبر ماي و گليبه ارتوه
چا حفر بيده الدماهم نهر ثاني ابـ نينوه
جا مثل  ورقة رساله الجيش بيمينه انطوه
وبقت سبعين الف ريّه مِنه تستجدي الهوه

محبس بدينه و بيهم يفر
ايخلّص عددهم گبل العصر
حيا الله الاكبر ..حيا الله الاكبر

……………………………………………………………



صح علي ما رحم بي ذبّاحه
و الارماح اتشتّلت بصفاحه
لچن بالميدان من صاح اعل ابوه
جان يعني الانتصار اصياحه

الموت من اجل العقيده نصر بي الاكبر عِلن
همه نزلوا نص جهم وارتفع هو العدن
لابس السندس الاخضر لان ظل ابلا چفن
راح ذاك العطش كله وشرب من ايد ام حسن

نصر النهايه و هو الاهم
ياهو البِساط و ياهو العَلم
حيا الله الاكبر .. حيا الله الاكبر

……………………………………………………………
✍️ ( سيد خضر الزاملي )

حي الله الأكبر

سر جماله بصلاته
ماكو كمره بحلاته
طفه بيده شمعته
لعمه زف امنياته
//////////////////////
صحته اعله صفحه بخيمتي _ باس ايدي ابني الغالي
كتله العرس ميلوك الك _ كال الرمح يحلالي
كتله العطش غيمة حزن _ كال الحسين ابالي
يمه اطمئني وشيبتج _ مرفوع راسج عالي

العمره خلص عباده
راد ازفله الشهاده
يدعي ربه سمعته
هنانه تخلص حياته
//////////////////////
الليل اشوفه من يمر _ نقطه بسواد اعيونه
وانطيته جفيت الحسن _ خلاهه فوك امتونه
ياشاب بهدوم العرس _ للمعركه ايزفونه
يقره بوصيته اعله الشمع_ بدم ركبته يحنونه

توهه خطت لحيته
وشفته عاشك منيته
بدمه حنيت اديه
العندي جان شغلاته
//////////////////////
صله ركعتين وطلع _ وفرح كلب عماته
غازل منيته بكشخته _ ومنه استحن شمعاته
عدلهه عمه اعماته _ وحب عمه من شيباته
ابيناتهم مدري شحجو _ وهلن فرح دمعاته

هنا حلتله الهلاهل
ابني طالع يقاتل
هذا وارث شجاعه
والكرم من صفاته
//////////////////////
من بوصلت كلبه عرف _ شلون العشك يوفيله
يعرفني من عيني شردت _ من دون ما احجيله
شديت حيلي بالحسن _ وبيه الولد شد حيله
امن انطيته مارفلي جفن _ والغالي غالي انطيله

ابني نورس زمانه
بصف الاكبر مكانه
العشره رادت وكفتي
وكلمن او تضحياته
//////////////////////
بجروحه من جابوه الي _ كمت انه بيهه اتباهه
بين الخيم صحت بفخر _ عفيه الولد سواهه
هالشاب عمره اربع طعش _ شموع العرس طفاهه
ثياب العرس لمن وكع _ للحافر ابني انطاهه

بالمواقف عجبني
هلهلت عفيه يبني
العمه صح اختياره
بدمه ذل الشماته
//////////////////////
تمت ____ علاء الزيدي

زف امنياته

يادعبل اقرالي المصيبه//تبجيني اريدك عالغريبه
كالولي عنك شاعر
وصفلي يوم العاشر
//////////////////////////

مجلس اريد . عن الشهيد . سمعني واقرالي
وجان الجواب . فوك التراب . متطشر الغالي
افاطم من قراهه للرظا بلوعه
عله جده الغريب يهلن ادموعه
الحوافر ظيعن نص كلبه وظلوعه
امتونه من السحك بالكاع مطبوعه

واعذرني عالشطر القريته // حسين الشمر لازم لحيته
بجاني حيل الحافر
وصفلي يوم العاشر
//////////////////////////

باوع عليه . يفرك بديه . والعبره خانكته
للطف خذاه . لازم كفاه . وتفطرت شفته
عله المنبر صعد دعبل بده يقره
ثلث من السهم جدك عبر ضهره
الما ذابح كبل ماعنده اي خبره
صاحو خل يجي يتعلم بنحره

فوك السهم صارت وكعته // المن الكفه كطعو ركبته
مو سهم واحد عابر
وصفلي يوم العاشر
//////////////////////////

دم كلشي صار . بذاك النهار . ولون السمه اتغير
حال الامام . كبال الخيام . يشيل ايده مايكدر
بخاصرته الرمح ضل كاطع انفاسه
ضهريه الوكت جان وعطش جاسه
شافو عل خيم ضل يبجي بحساسه
اواحد بالحجر ضل يضرب براسه

لتمو شماته اعله اليلجمه//شمرو شكو احجار اعله جسمه
وكلبه اعله زينب حاير
وصفلي يوم العاشر
//////////////////////////

بذاك الظلام . وذيج السهام . والظايع الخنصر
زينب تنوح . للتل تروح . لو تكعد ادور
لزمت ايد اخوهه تباوع وتنعه
تحسب بالاصابع ليش بس تسعه
الخنصر مالكيته وياهو اليرجعه
ومن كد السهام ابنادم اتعضيعه

هوه الكطع منه وريده // مااظن يرجع خنصر ايده
بحسين هذا الصاير
وصفلي يوم العاشر
//////////////////////////

اخت الذبيح . تكوم وتطيح . من الركض تعبت
ام الامان . ادور امان . بالغربه من حست
العاشر خله عمتك تمشي محنيه
كلمن شاف زينب كال مو هيه
تلم بطفال اخيهه وهيه مجويه
اجرحك لوكلت مولاي مسبيه


امنين ابدي واشرحلك وضعهه// صوط الشمر كاسر ضلعهه
ماغير كسر الخاطر
وصفلي يوم العاشر
//////////////////////////
تمت ____ علاء الزيدي

اقرالي المصيبه

مگطع علي وشلون المنه ويگلي صدري من الزمنه
جرح الولد جبير لميته بالحصير
****
علي طاح ورحت اركض ركضت الفاگد ولد
من لگيته مگطعينه جبدي ياناس انمرد
من المهر ذبيت روحي شنهي ظلتها بعد
مددت طولي وي طوله وگتله اگعد ما گعد

ضميته حيل وگمت اشمنه احضن كتر يوگع كتر منه
وتحيرت شصير لميته بالحصير
**
عالتراب مطشرينه والجسد كله جراح
والله گلبي ايطيح مني لو كتر من عنده طاح
شكثر طعنوه بالخناجر والاشد طعن الرماح
وعالمخيم درت عيني وصحت زينب علي راح

التمو عليه والطعنه عالطعنه وللخيمه حرت اشلون ارجعنه
بعيوني گمت ادير لميته بالحصير
**
امسح بجرحه وشوفه من العطش ريجه يبس
وحتى مابي حيل يحجي ضايگ بصدره النفس
ليش ما جاباه اليه وضيع الخيمه الفرس
بالسيوف موذرينه وجسمه طعنات انترس

بويه الوداع ايگلي اسمعنه ووليدي حرت شلون اودعنه
فارگني بالاخير لميته بالحصير
***
گمت الم بي بالحصيره وآنه كل حيلي انهدم
منين اجيبن حيل اشيله وببني اردن للخيم
بس اليفارگ اوليده يشعر بهذا الالم
صارت الخيمه بعيده ويدي صارت كلها دم

من راح الاكبر راحت عيوني وكلما ردت اعثر يلزموني
من حگي اون وحير لميته بالحصير
**
علي ما لميته كله ضاع من جسمه شكثر
شگد خذت منه الحوافر وعنده ما خلن صدر
ضلوعه كلها مكسريهن وظهره شفته منكسر
عله الدنيه العفه بعده وصحت ماريد العمر

ماريده عمري بعده ماريده شحاله البحضنه ميت اوليده
للدمعه اظل اسير لميته بالحصير
****
صحت عينيني يزينب علي مات وجثته هاي
طاحت ولزمت گلبها ليلى لوليدج تعاي
شافته ولطمت وجهه وصاحت اگعد يا ضناي
ليش هيج مگطعينه وليش ما منطينه ماي

شهگت وتعبت من بواچيها تحاچي بولدها وما يحاچيها
بدمعتها تستجير لميته بالحصير
***
تمت
ميثم العمري

جرح الولد جبير

يوميه افز والگه الدموع بعيني   وين الولد يادنيه تعبتيني
وكت الغروب اشتاگ      ما بيه حيل افراگ
*****
ها يدنيه    وين صارو    حيل مشتاگه الهم وتعبني الغياب
الفرگه صعبه     والتحبه    تظل كل عمرك الجيته لازم الباب
الغالي بسرعه ليش ايروح       وهو الغالي شيعوضه
سنيني وذكرته من راح          وراه ركضن فرد ركضه
وصحت من ضعنه صار ابعيد     ريض بالضعن لحظه
طحت من ماوگفلي حسين       وبعد مابيه كل نهضه

ارجع اصيح ودمعتي بعيوني    وياكم ييمه ليش ماخذتوني
گلبي عليكم طاگ       ما بيه حيل افراگ
*
ها يدنيه  شلون بيه   گرب موتي وماكو واحد من بنيني
فارگوني    وما اجوني   راح اموت وياهو اليغمض لي عيني
يدنيه الام حلمها ايصير     عدها اولاد ترعاها
مثل ما ربة وتعبت           وسهرت ليل عيناها
يباروها ويجازوها             لحد الموت برباها
وهاي ام البنين اتموت    محد ليش حضراها

ها يلولد عالدرب درت عيوني    الموت اجاني وانتو ما جيتوني  
من الفرگه صدري ضاگ     ما بيه حيل افرگ
****
ها يولدي       راح اموتن        واليموت بطبعه تلتم يمه الاعزاز
الليله وحدي    ويمه صعبه    من اموتن ياهو يمشي بنعشي جناز
الجنازه تريد يمه اجتاف   وتريد اولاد تحملها
والماعدها يمه اولاد            من اتموت ياهو الها
وياهو ايغمض الها العين        ويجفنها ويغسلها
الجنازه الما وراها اصياح    وحشه وهاي شيحلها  

ام البنين ورايده تحضروني    يمه وبديكم رايده ادفنوني
دمع الحزن حراگ     ما بيه حيل افراگ
**
يمه اجيتج    وهسه حاير     اشلون اشيل اجنازتج ماعندي جفين
راح اخبرج    طاح جودي    وطاحت الرايه وسهم صوبني بالعين
طحت متگطعه اجفوفي         وحسين انكسر ظهره  
بوجهي استقبليت الگاع     ويمه اضلوعي متكسره
اجاني وما عرفته حسين     عزيز الطاهره الزهره
من شافاني صاح بصوت      اخوي وخنگته العبره

وبحجره حط راسي وبده يحاجيني   عباس ليش الوحدي تخليني
جفينك عله الراگ      وما بيه حيل افراگ
*
حسين يمج     وحيل حاير   شلون اشيعنج ييمه وراسي مگطوع
ضامي يمه   انحز وريدي   وراسي ظل اهواي فوگ الرمح مرفوع
صوبني السهم بحشاي                وطلع يايمه من ظهري
طحت فوگ الترب عطشان     وشمر ظل يگطع بنحري
اجتني الخيل آه يالخيل        گامت تسحگ بصدري
الحوافر طحنت اضلوعي     ودمي عله الثره يجري

خيل وزلم دارت ييمه عليه     هذا اليسلب ذاك يطعن بيه
ومحبسي من ايدي انباگ     ما بيه حيل افراگ
***
تمت
ميثم العمري

يادنيه تعبتيني

يالكتلي تعود شمتاني ..منك مرسال ماجاني
بالغربه وحيده ..شو ضلت حميده
*
يالكتلي السفر ايام  احس بعيونك شبيها
تنظرلي وتهل دموع  اريد افهم محاجيها
حسيت بسفرتك هاي  اصير يتيمه تاليها
يمسلم شابت بنيتك  هجرك طول اعليها

بدمعات العين مهضومه ..ومن سهر الليل ملجومه
كمت انخه الصميده  ..شو ضلت حميده
*
طلعت وي الضعن امشي  بعبرتي اتلفت بحيره
الوج بكسرة الخطار  ومن ديره نطب ديره
الك مشتاكه يابويه  ارحم گلب الزغيره
كل دمعه اعلى خدي تطيح تكلي راح ابو الغيره

يابويه شلون عايفني .. وما يهده الليل من وني
بديار البعيده  ..شو ضلت حميده
*
يابويه الهجر ذباح  وكت الليل يذبحني
ليش بجفه عمي حسين كام براسي يمسحني
وجلمات بلسان يكول يابن عمي سامحني
يلجمني الهوه لو مر  يبويه ودمعي يجرحني

مابين العين خلاني ..ولصدره حسين ضماني
وين ابوي اريده  ..شو ضلت حميده
*
يون كلبي وخذاني الهم يبويه وهاجت آلآمي
بالغربه وكلب مجروح  طفله وضاعت احلامي
يا حيره الخذت كلبي بالطف حيرت الضامي
يصيح شما ترض الخيل يزينب هالله بأيتامي

شمسويه الخيل بضلوعه .. ينهد الحيل لدموعه
ومن كطعو وريده  ..شو ضلت حميده
*
طلعت وي الحرم اركض  ونار الخيمه تجويني
ودخان الخيم ورماد كام يجلب بعيني
افر ويركض السلاب يبويه بسوطه ياذيني
وجم مره تجي زينب من عدهم تحاميني

طفله وبحبال شدوني .. ولدرب الشام ودوني
عكب الطاحت ايده  ..شو ضلت حميده
*
الابو يهل الرحم خيمه وندار الزمن بيه
طاحت خيمتي وضليت يتيمه بغربه مسبيه
اون بصدري الك شوغات المصايب جارت اعليه
يتامه انه ورقيه نروح وعرفت شبيها وشبيه

بالطف زغار والصعبه .. نتشابه حيل بالغربه
بدمعي الك قصيده  ..شو ضلت حميده
*
تمت
احمد الخفاجي

بالغربه وحيده

بضعونك وين.  ترحل يحسين
     بداري الموحش خليتوني
      ليش وياكمً ماخذتونيً

—————————————————
حضرت روحي من العصر كل ضني امشي وياكم
روحي  على  الناكه صعدت من العصر. تتناكم
تنزلونها     شنهي    السبب   كولولي  أترجاكم
أخذوني  لو خدامه   أصير    الكم   ولافركاكم

فركتم موت  مثل التابوت
فركاكم يطفيها عيوني
ليش وياكم ماخذتوني

——————————————-
شمسويه بويه وما تريد اصعد  بهاي ضعونك
سولفلي بويه اعله السبب خل أفتهم مضمونك
ليش من اصدلك تصد لي  ودمعتك   بعيونك
تدري    العليله   مدلله.  كلفه  تعيش   بدونك

تشربني دواي.  مدللني هواي. 
بداري الموحش من عفتوني
  ليش  وياكم   ما   خذتوني
   
——————————————-
ماصار  ساعه  من  رحت والشيب طش براسي
فركاكم السلاني  سل  بل كوه اجر ها  أنفاسي
موعدله  تلكاني     تره   من   ترد     ياعز  ناسي
جن موت يمشي وي الضعن هيجً انه يقرأ إحساسي



بروحتكم هاي.    عطشانه هواي
من جود العباس اسكوني
ليش    وياكم   ماخذتوني


—————————————-

تفشلت   روحي التنتضر تمشي بضعن والدها
ماتخسر  انته   لو كلت     ويانه   خل   نأخذها
وبنيتك      كلفه   تره    وزحمه   تضل  وحدها
بويه  العليله  لو  رحت  مايضل شي من عدها

بفركاك شلون    ذبلانه ألون
أتنفس   ماضن  تلكوني
ليش وياكم  ماخذتوني

———————————
مدري بعلم مدري بحلم شفت الخيول العشره
تراوتلي تسحك عل جسد وحافرها يطحن صدره
بعمري  وحياتي  ماشفت  خيل الحجر تفطره
وضلع الصدر  من الضهر طالع وخاسف حفره

حافر مسنون  بل دوس شلون
    تمنيت يدوسن بمتوني
   ليش وياكم ما خذتوني

ضرغام منعم الكربلائي

رايح يحسين

عظم الله اجورنا واجوركم بهذه الليالي المؤلمه والعظيمه
جميعاََ خدمة الحسين اللي يحتاج لحن او قصيده بخدمتكم صح مرات اتأخر عليكم بالرد بسبب التزاماتي بس ان شاء الله اخدمكم بعيوني خادمكم الاقل والصغير
@Eng_alhabeeb

دعم مؤسسة منبريون الحسينية
#افضل قناة للنعي
https://www.tgoop.com/+P0VV4bLqtzuKdcQS
#للاشتراك بالدعم @ahmed_alziwar0