حديث طويل بس كتير مهم والله.. اقرأ بتأمّل وتمعّن

🔵 قال صلى الله عليه وسلم:
ضرب الله مثلا صراطا مستقيماً وعلى جنبتي الصراط سوران فيهما أبواب مفتحة، وعلى الأبواب ستور مرخاة، وعلى باب الصراط داعٍ يقول: يا أيها الناس، ادخلوا الصراط جميعا ولا تعوجوا، وداع يدعو من فوق الصراط، فإذا أراد الإنسان أن يفتح شيئا من تلك الأبواب، قال: ويحك، لا تفتحه؛ فإنك إن تفتحه تلجه .
فالصراط الإسلام، والسوران حدود الله، والأبواب المفتحة محارم الله، وذلك الداعي على رأس الصراط كتاب الله، والداعي من فوق الصراط واعظ الله في قلب كل مسلم .

الحديث مليان مبادئ ومواعظ والله

🟢 اذا بتلاحظ من الحديث.. الأبواب يلي بتوصل عالمحارم مفتوحة.. وبينك وبينها في بس ساتر
بس الانسان بطبعو فضولي كتير
ومفكر حالو بطل خارق.. بيفوت بيستكشف وبيطلع وأموره بخير

مع انو رب العالمين عم يخبرك انو انا حاططلك واعظ بقلبك.. شي من جواتك بيقلك دير بالك..
🔹 هاد الباب ما بصير تفوتو
🔹 هي الشغلة مو منيحة بلالك ياها
🔹 هي القصة حرام حتى لو اختلف شكلها واسمها وعنوانها وتزينت وتحضّرت والعالم كلها حاببتها.. بس والله انا شايفلك ياها حرام

بس المشكلة انو دائما جهاز الانذار بيكون شغال للاعطال الصغيرة
لما تكتر الأعطال حتى جهاز الانذار بيخرب وماعاد يرن 🌚💔
دير بالك على المنبه تبعك.. اوعك تخسره بكثرة الأعطال

ويحك لا تفتحه فإنك إن تفتحه تلجه

حفظها كتير منيح.. إنت مانك خارق.. إنت إنسان.. وشو قال عنك رب العالمين؟
وخُلِقَ الإنسان ضعيفاً

لا تجرب حالك مع الفِتن.. ولا تجرب حالك مع الحرام
لأنك اول ما تفوت راسك رح تفوت كلك.. واول ما تفوت رح تغرق

فهام ضعفك منيح... وتقبله... واحمي حالك على أساسه.. والتجئ دائماً للقويّ المتين

🔵 قال صلى الله عليه وسلم
إن الله يبسط يده بالليل ليتوب مسيئ النهار ويبسط يده يده بالنهار ليتوب مسيئ الليل

هو الإله ونحنا عبيده.. ومع هيك هو دائما بانتظار توبتك
بتتوب بالنهار بيستقبلك.. بالليل بيستقبلك
باي لحظة بتدق الباب بيفتحلك

في عندك شي حجة لحتى ما تتوب؟
اذا رب العالمين سألك يوم القيامة.. ليش ما تبت من ذنوبك عندك شي جواب؟

{ولا تيأسوا من روح الله إنه لا ييأس من روح الله إلا القوم الكافرون}

صباح الخير 🌚💙

🔴 تذكير من هلق لحتى تعملوا حسابكم

بكرة يوم تنين = صيام 🌚💙

يمكن من هون لرمضان في شي 10 ايام تنين

عميل شي جانبي على جدول مهامك..وحط فيه خانة لصيام التنين من هون لرمضان .. مشان كل ما تصوم تحط ✅ وهيك لرمضان بتلاقي حالك عامل انجاز محترم

صدقني مارح تسخى ما تصوم وتحط ❌.. والموضوع بساعدك شوي بالتحفيز والتذكير ان شاء الله

علما اني رح ذكركم كل اسبوع باذن الله 😂💙

احم
استعدوا نفسيّاً لبوست بدو كتير شغل
مخصص للمزنوقين متلي 😂😂💙

🔵 مساء الخطط والبرامج 😂💙
بدون مقدمات.. جاهزين كل واحد يقوم يعمل برنامج دراسة؟ 🌚🔥

رح اختصر حكي واكتب بس الشي العملي

لحتى يكون برنامجك ازبط ما يمكن.. إنت بحاجة عدة مقومات
1⃣ انك تفهم منيح شو المنهاج يلي فايت تدرسه
2⃣ انك تفهم منيح شو الالتزامات يلي عليك وشو الايام يلي فيك تدرس فيها كتير والايام يلي لا
3⃣ انك تكون واقعي وما تجرب ابدا تحط خطط السوبرمان
4⃣ انك ما تستسلم ابدا واذا كربجت بيوم تفرط كامل البرنامج

🔵 افهم المنهاج

🔹 اول شي يباشا بتمسك ورقة بتكتب عليها كل المواد يلي عندك
🔹 بعدين بتاخدن مادة مادة.. وبتروح بتشوف مين الدكاترة الصعبين وبدن شغل.. ومين يلي بيتمرقوا قبل المادة
وبتسجل هاد الحكي عندك وبتحط خط تحت الدكاترة الصعبين
🔹 بتعمل هيك بكل موادك.. وبتحط بكل مادة شو دارس منها انت من قبل كمان

🔹 بعدين بتشوف برنامج امتحان السنة الماضية لتشوف شو المادة يلي وقتها مضغوط عادةً وشو المادة يلي وقتها مرحرح.. مشان تعرف شو المادة يلي الها الاولوية بالدراسة

2⃣ افهم التزاماتك

على الوجه التاني من الورقة بتكتب شو عليك التزامات خارج الدراسة
وكل التزام بانو يوم بيكون
اي شي.. دروس جامع.. تسميع قرآن.. دورك بالطبخ والجلي

3⃣ انك تكون واقعي

شفت النتيجة يلي عملتا تبع فهم المواد؟
بتشوف كم يوم ضالل عليك من هون للامتحان وبتحطن قدامك
مثلا 35 يوم: بتقسمهن على المواد تقسيم تثقيلي.. يعني ممكن تعطي لمادة 5 ايام ولمادة يومين حسب ما بتشوف كل مادة شو لازمها

وهون بدك تعرف انك مارح تحرر القدس بالبرنامج ولا رح تختم كل المواد.. وإنما رح تاخد القدر يلي فيك تحملو فقط
وعصفور بالايد أحسن من 10 على الشجرة

بعدين بتحط الترتيب يلي بدك تدرس المواد فيه مشان تبنّدن اخر شي بالترتيب

4⃣ كتابة البرنامج بقى

🔵على ورقة منفصلة.. اول عامود بتكتب فيه كل الايام الباقية من هون للامتحان
🔹 اول شي بتعمله انك بتحذف كل الايام يلي مانك حسنان تدرس فيها
مثلا انا حذفت يومين لمقابلة العملي يلي عليي
وكل ايام الجمعة يلي جاية

🔹 بعدين كل التزاماتك بتنزلها.. مثلا هاد اليوم في درس.. هاد في عرس.. مشان لما تحط الدراسة تشوف هاد اليوم شو وضعو

🔹 انا بفضل انك بعد كل أسبوع تفرغ يوم للتقصير او تفرغ اخر شي 3 ايام للتقصير
اذا. كتير كتير مزنوق لا تفرغن

🟢 العمود التاني بتنزل فيه المواد يلي بدك تدرسها.. بحسب الترتيب يلي انت رتبتو
اذا اتفقنا مثلا عندك الكلية وقررت تحطها اول شي وتعطيها 5 ايام
بتشوف شو اهم الدكاترة يلي لازم تدرسهن بال 5 ايام.. وبتشوف كل محاضرة كم صفحة وشو مستواها.. لتعرف قديش فيك تدرس

وبس خلصو ال 5 ايام بتنتقل للمادة يلي بعد.. هيك ليخلص العمود التاني بكل الايام

🟡 العمود التالت.. وهاد إضافة جديدة لبرنامجي بصراحة
لحتى اخلص من قاعدة الكل او اللا شيئ يلي عندي.. صرت قيّم يومي بنسبة مئوية.. لهيك هاد العمود عنوانو نسبة الإنجاز.. بتكتب فيه كل يوم قديش بتقدر انجازك الدراسي (80٪ مثلا)

🔴 العمود الرابع.. هو: الشغلات يلي قلت انك بدك تدرسها بس ما درستا

اذا بدك برنامجك ما يفرش بيومين بدك تكون مرن فيه.. لهيك حطيت اخر عمود
وانا قلت اني مفرّغ ايام للتقصير
بجي بشوف شو تركت بقلب هاد العمود وبدرسن

◽️ ملاحظات
اذا لا سمح الله كتير كربج معك البرنامج شو تعمل؟
ببساطة يا عدل عليه واختزل من يلي كنت كاتبو بحيث تكمل
يا اذا ما عرفت تعدله.. كتوب واحد جديد 🌚💙

قولاً واحداً.. 90٪ انك ما رح تدرس كلشي كاتبه لان الحياة مليانة متغيرات
بس 100٪ انو دراستك وانت كاتب البرنامج احسن بكتير من دراستك بدون ما تكتبه

لهيك لا تدرس ابدا بلا برنامج ولو كان الامتحان بعد يومين

هي مانها الخطة الوحيدة لوضع البرنامج.. وإنما هي خطتي يلي بمشي عليها

شوف مثال تطبيقي عن الحكي بالتعليقات

🔴 أفتّانٌ أنت يا معاذ؟

لما كان سيدنا معاذ ابن جبل عم يصلي إمام بالناس بصلاة العشاء.. ويطيل كتير بالصلاة
وصل هاد الأمر للنبي وقال له: أفتّانٌ أنت يا معاذ؟ (بمعنى انت عم تنفر عن الدين وتصد عنو)؟

هاد البوست موجه الي كصاحب قناة.. والأصحاب القنوات يلي عم يقرؤوه.. ولكل واحد عندو منبر دعَوي
وللعالم يلي عم يبعتولي احيانا عالصراحة او بيحطوا اقتراحات

الاطالة بالصلاة بحد ذاتها منيحة ولا لا؟ اكيد منيحة ما انت قاعد عم تناجي رب العالمين

🔵 طيب ليش سيدنا محمد نهاه عنها؟
لان العالم مو كلها باستطاعتها متل يلي باستطاعة سيدنا معاذ.. وفي عالم عندها التزامات اكتر ومشاغل اكتر ما بتحسن تلتزم متلو بالصلاة الطويلة تبعو

معناها انت لازم تشجع العالم عالعبادة وتجيبن لطريق الهداية بس بالتدريج وشوي شوي وبدون تنفير
التشديد بيضر.. التنفير بيضر.. الأسلوب اللئيم بيضر.. إنك تحسسو دائما انو هو كتير فاشل كمان بيضر

🟢 أمثلة من عندي مو من باب شوفة الحال وإنما بس من باب اني أعرض فكرتي منيح وتوصلكم مقاصدي
◽️ كنت بدي أعرض تحدي ال 100k صلاة عالنبي قبل ما بلش فيها انا.. ونبلش فيها سوا

بس انا لا كنت بعرف صعوبة التحدي ولا كنت بعرف كيف بدي شجع العالم يفوتو فيه وما يحسوا انو الموضوع مستحيل.. لهيك قررت ساويه انا اول شهر وشارك تجربتي ليكون الموضوع قابل للتطبيق الطبيعي ومو شغلة من الخيال

◽️ للي عم يقلي صيام تنين وخميس.. كتير كتير ممتاز وحلو.. بس كيف بدك واحد ما بيصوم الا برمضان تقلو ضغري صوم تنين وخميس بكل حياتك؟
انا ما بحسن وانت وهو غالبا ما بيحسنو وصعب عليهن

◽️ عطينا كل يوم سنّة نلتزم فيها
طيب مستحيل انت بالاسبوع الواحد تضيف 7 سنن.. ولا حتى بالشهر فيك تضيف على نظامك اليومي هيك عدد من الالتزامات

ما رح تحسن تمشي عليه ورح تتعب وتبطل

🟡 لهيك راعوا قدرات الناس الطبيعية ولا ياخدكم الحماس فتحرقوا الطبخة...تركوها تستوي على نار هادية وقربوا شوي شوي 🌚💙

كالعادة اسف عالاطالة 😂
وشكرا كتير للقارئ يلي مأحسن الظن فيني وبيوصل دائما لاخر البوست 🫡🔥

سنة الامتياز ❌
سنة النصب عالطبيب المقيم ✅

الف مُبارك لمعشر الأطباء المقيمين وطلاب الطب 🌚🔥🔥

🔴 الاحتفال بالكريسماس
بصراحة كنت حابب اعمل بوست عن الموضوع بما انو بكرة بتبلش الاحتفالات

بس بعد ما سمعت هاد البودكاست قلت ضروري ضروري تسمعوه والله.. مارح يكفي البوست

🔹 ليش انتو كتير متشددين؟
🔹 نحنا منحتفل بس لننبسط.. أما مالنا مآمنين بالفكرة تبع الاحتفال
🔹 معقول بدك تخرب الوحدة وما نقلو للجار كل عام وانت بخير مشان افكارك المتخلفة؟
🔹 شو المشكلة إذا صورت ابني جنب الشجرة.. رح يحب الموضوع وينبسط

حرفيا بودكاست جاوب عكل الاسئلة المهمة بهاد الموضوع.. من ضمن يلي كتبتن فوق

قبل ما تحتفل بكرة.. بس سماع هالساعة زمان وبعدا عميل يلي بدك ياه 🌚💙

هي رابط البودكاست ⬇️

https://youtu.be/qyh5aSlv12I?si=YiqF5ZMdoq0UYVMw

🔵 قال صلى الله عليه وسلم:

من قال حين يصبح: اللهم ما أصبح بي من نعمةٍ أو بأحدٍ من خلقك فمنك وحدك لا شريك لك فلك الحمد ولك الشكر، فقد أدى شكر يومه
وتكملة من غير رواية: ومن قال مثل ذلك حين يمسي فقد أدى شكر ليلته

مرة اول ما تفيق ومرة قبل ما تنام.. بتكون شكرت الله عن ليلتك ونهارك 🌚💙

🟢 جبتلكم الحل لحتى يصير كلشي بتعملوه يطلع بيرفكت
دراستكم بيرفكت.. شغلكم بيرفكت.. حياتكم كلها بتصير بأحسن أداء

حل سهل وبنفس الوقت صعب 🌚💙

اول ما تفيق بتقول: اللهم إني تبرّأت من حولي وقوتي وعلمي والتجأت إلى حولك وقوتك وعلمك يا ذا القوة المتين

وقبل ما تعمل كل شغلة بتقولها.. قبل ما تبلش دراسة او قبل ما تفوت على شي اجتماع او مقابلة.. يعني ببداية كل مهمة

سهلة مو؟

🔵 بس القسم يلي بدو شغل.. انو بدك تقولها بعقيدة راسخة انك التجأت لقدرة وعلم رب العالمين فرح تقدم احسن نتيجة ممكنة

وطبعا انت بدك تبذل استطاعتك.. بس رح تلاقي المفعول اقوى بكتير من استطاعتك 😂💙

يعني يقين + عمل = رح تتفاجأ من الأداء يلي الله رح يكرمك فيه 🌚🔥

حابب ذكر بشغلة من الاخبار يلي طلعت لما سقط النظام.. للي ما شافها

لما كانت تطلع المظاهرات اول الازمة
مين كان يقتل المتظاهرين؟.. النظام
ومين كان يقتل العساكر؟.. كمان النظام

يعني كل حركات القتل.. الاغتيال.. الأذى
كانت مفتعلة من قِبَل النظام بهدف انو يخلي الشعب يلتهي ببعضو والكل يكره الكل

مو لازم هلق يكون صار في عنا القليل من الوعي لنعرف انو اي شي بيضر السلم هو غالباً مفتعل مشان تشعل الفتنة والحقد بين الناس ؟

يعني معقول هلق اذا فئة من الفئات الكارهة حبت تشعل الفتنة بالمجتمع.. عيارها كم حركة اذى بالبلد وبتتركنا نحنا بقى نتكفل بباقي النزاع؟

من اهم العوامل المتحكمة بحالتنا بالفترة الجاية هو نحنا

شيلني يا اخي من كل تحليلاتك الدولية والكونية.. إنت وجارك شو وضعكم؟
اذا انت وجارك ما عم تتفقوا وناطره على نكشة.. اي رح تبلش المشاكل من عندك قبل ما تبلش المؤامرات الكونية

الحكومة الجديدة وراها شغل جبار ومسؤوليات جبارة... وظيفتنا هلق انو ما نزيدا عليهن
ولا نكون عقبة بوشن

كلشي هلق مو وقتو خبيه يا اخي لوقتو.. الك حق أجله واستنى تستقر الأمور

اما هلق الكل بدو يخرب عكيفو.. الكل بدو يهاجم عكيفو.. وطبعا منصوّر كلشي عالاعلام ومنقول اخر شي وين الهيئة؟

والله مو منطقي هاد الكلام 🌚💔

آن الاوان لانو يكون عنا شوية وعي مع شوية احساس بالمسؤولية

جماعة الصلاة عالنبي شو اوضاعن 😂💙
نصصنا التحدي مو؟ 🌚🔥

جيتكم بشوية دعم لحتى نكمل منيح

🔵 يلي اول كم يوم قصر وبعدين اقلع واشتغل صح.. خلص كمل متل ما انت ما باثر

🟢 للي قصر كتير وكربجت الأمور معو فقرر يوقف التحدي: من بكرة بكون في شي 15 يوم ليخلص التحدي
بتحط لهال 15 يوم تحدي جديد.. مثلا 50 الف.. اذا بدك تكمل على نفس التحدي

او اذا لقيت حالك مستحيل تجيبو فحط على قدر طاقتك.. وخليك ماشي معنا

🟡 للي هلق اكتشف انو في تحدي وحابب يلتحق بالركب: ببلش هلق كمان بتحدي ل 15 يوم متل الحالة يلي فوق

◽️ يعني نحنا ب 12/1 رح نبلش تحدي جديد.. فأنت عميل تحدي من هون لهداك الوقت وكمل معنا هلق

مشان تضلكم ضمن ركب الصلاة عالنبي وترجعوا تبلشوا معنا بالتحدي الجاية 🌚🔥
وطبعا شوفو البوست تبع التحدي لتقرؤوا النصائح

لاحظتوا الوصف اول البوست ماحلاه؟... جماعة الصلاة عالنبي
قديش رح يكون سيدنا محمد صلى الله عليه وسلم فخور فينا يوم القيامة 💙💙🌸

وكالعادة يلي عندو مشاكل .. يحكيها بركي منساعده 🔥

وحدة من الفوائد القليلة لذاكرة السمكة يلي صايبتني

انو برجع بقرأ البوست ولا كانو انا يلي كاتبو 🤝

والله تاري كنت عم انشر شغلات ظريفة .. يلي ما قرأهن يعمل فتلة بس يصحلو 😂😂💙

اللهم أنت ربي لا اله إلا انت
خلقتني وأنا عبدك وأنا على عهدك ووعدك ما استطعت.. أعوذ بك من شر ما صنعت
أبوء لك بنعمتك عليّ وأبوء بذنبي فاغفر لي
فإنه لا يغفر الذنوب إلا أنت

أصبحنا وأصبح الملك لله رب العرش العظيم

برايي لا حدا يطلع من البيت اليوم.. رح تشوفوا مطرة محترمة جدا جدا ان شاء الله 🌚🔥🔥

عندما لا تدفع ثمن سلعة ما.. فاعلم أنك أنت السلعة


يعني هيك عالاقل خلي عندك كل يوم جمعة تحضرلك حلقة بودكاست تطور حالك فيها وتزيد من وعيك وفهمك 🌚💙