جادك الغيث يا دارٍ ربا فيك خلّي
‏كثر مَـ افشيت سرّك لـ الهبايب ، وابحته

‏رحت كلّك بلا رجعه ، وانا رحت كلّي
‏يمكن الموت لوْ قدمي يعرّض نطحته

‏عايشٍ في رجا وصلٍ ماهو حاصلٍ لي
‏مابقى باب ما طقّيته ، ولا فتحته

‏الغلا بيننا ماهوب حاجة تغلّي
‏كم خطا من قبل لا تعتذر لي دمحته

‏الأكيد انّي كنت اشعر بـ رفض ، وتخلّي
‏من كِذا رحت عنْك ، وموقفي ما شرحته

‏ليت لي حيلةٍ واحتال في طيفك اللي
‏وين ما لدّت عْيوني بـ دربي لمحته

‏ودّي انساك .. بس شلون ابنساك قلّي
‏وانت من وين مايونس خفوقي جرحته

‏هاك قلبي تقاضى منّه .. ولا تخلّي
‏حاجةٍ في ضميرك باقيه لو ذبحته

‏لا تحنّه ، ولا تاويه واخذه تسلّي
‏اضرم النار في جوفه ، وفوقه ، وتحته

‏انت لـ اشفيت غلّك كنّك اشفيت غلّي
‏استبيح الخفوق ، وعاذرك لـ استبحته
- فهد العيبان

تحديث جديد ♥️

السلام عليكم ورحمة الله
لكثره الطلب وبعد تفكير طويل فتحت الباب لكتابه الأبيات، وفقنا الله واياكم♥️
لطلبات الكتابه بمقابل مادي التواصل خاص @maha031

لمن يسأل عن قصائدي؛ كل ماهو مذيّل بإسم مها من كتابتي

صبحكم الله بالخير

اللهم صلِّ وسلم وبارك على نبينا محمد

‏الليلة البال ماهو صوب ذات الخمار
‏ما كن لليل هذا في الليالي شبيه

‏ما للمواعيد يا شوق البشاير نهار
‏الصبح ماهو بعيد إلاّ على محتريه

‏خمريّة القّد صبّت لي من الغي نار
‏ومدّت لها كاس ما ذاق الكرى مشتهيه

‏كل أمنيات الهوى في قائمة الأنتظار
‏كم قلت : لا للهيام وقالت النفس : ليه ؟

‏مشاهي النفس جمّه والأماني كثار
‏النفس لو خيّروها كل شيٍ تبيه

‏غياهب التيه شتّى والحياة اختبار
‏من شِعلته نور عن درب الهُدى ما يتيه

‏بئساً للأشعار والأضواء وللأنتشار
‏ان كان مالي قصيدة في المقام النزيه

‏ما في محبتكْ يا أم المؤمنين إختيار
‏محبتك فطرة القلب السليم النبيه

‏يا أطهر نساء الأرض ما ضاهى وقارك وقار
‏الخاسر اللي طعن في عرضك وخاض فيه

‏في سورة النور جاك من السماء الإنتصار
‏من واحدٍ كل خلقه بالعفو ترتجيه

‏يا زوجة أشرف عباد الله زهاك الفخار
‏أنتِ الحبيبة وبنت أحبّ صحبه إليه

‏العمر رحلة قصيرة والليالي قصار
‏ما للبنادم حصاد إلا غرايس يديه

‏عسى شفاعة رسول الله لا سِدل الستار
‏ تشملني ان كان مالي وجه بين الوجيه
‏
‏المسلم يذود عن عرض الحبيب ويغار
‏طوبى لمن في الدجى صلّى وسلّم عليه
- سعود مهدي

صبحكم الله بالخير

هذا الليل ماهو ليل دمعة و حرّ عتاب
‏ولا قلوب مكسورة ولا عقول منجنّه

‏يهبّ الهوى من يمّ دارك علي ماهاب
‏من مواجهي يوم أطيب الخيل منعنّه

‏أفتش هواك من الهوى و الهوى غلاب
‏و آداري دموعٍ تطرق الرمش و تسنّه

‏ياعذب اللمى عذب القصايد تطير أسراب
‏على يمّتك ، يوم ازفر الشوق و اكنّه

‏ما والله تطيب جروحي و خاطري ماطاب
‏ أنا ناسي النسيان ماعرْف وش كنّه !

‏لعلّ الزمان يجود بك ، سالفة كذاب
‏يوقّف لك الدنيا و اهلها على ظنّه

‏أعديك ياعدٍ ماتروي ظما الشرّاب
‏واخيل السراب ب عين شرهه و ممتنه

‏أنا ليش أحبك؟ أنا أحبك بدون أسباب
‏لو أبدي سبب مات الهوى ماهرم سنّه

‏أشوفك قدر مطبوع في ناصية و كتاب
‏مثل موتي أقرب له كثر مانتحي عنه

‏تعالي، عزا نزفي .. لاصار ليديك خضاب
‏لك الجرح والسكين و الشكر و المنّة

‏لعلّ الزمان يجود بك ، سالفة كذاب
‏يوقّف لك الدنيا و اهلها على ظنّه
‏
‏من الخال والخلخال فال العواذل خاب
‏بتعميهم الشامة و تصعقهم الرنّة

‏تمادي علي وغلقّي دوني الأبواب
‏خذيني من يدين المقادير للجنة
- متعب البقيلي

‏الايام .. ( ظلما ) والليالي ، عديمة راي
‏مشاويرها " حرمان " .. و دروبها حرة

‏خذت مني .. أغلى ما تمنيت في دنياي
‏و خلت لي اللي ما تعوّذت !.. من شره

‏أنا بخير والله !.. لو معي ، ذاكرة نساي
‏ماهي بـ الحنين ولوعة الوجد مضطرة

‏تفاصيل ماترحم .. وقوفي ولا ممشاي
‏وجعها !.. يجي و يروح ، و يعاود الكرة

‏سلامي على المتحكمة بـ زعلي ورضاي
‏وعلى الغرة ، اللي ( طوّقتني ) على غرة

‏ولا هان عودٍ !.. شوفته ، تطلق محيّاي
‏نسيم الهبوب .. ( يداعبه ) كل ما مره

‏هذي جرته في مرتع الصدر رايح' جاي
‏من أبسط حقوق الحر ، خطواته الحرة

‏يا محبوبتي .. لا زال كوعي ، على مركاي
‏تحلويت !.. صكات الليالي ، و هي مرّة

‏أنا آجر قلبي مع طريقك .. وآجر خطاي
‏وآخاف أجرحه ويسيل دمي على الجرة

‏تغرّبت .. حتى عن ربوعي ، وعن مرباي
‏أحس الوطن .. ما فيه عارض ولا حرة

‏بعدك الليالي صوتها صوت عازف ناي
‏يهيّض جروح القلب .. ويقلّب ، صوره

‏اذا ما بقى .. ( حنيةٍ ) تستعيد ، قواي
‏حنانيك .. باللي يقطع الشوق بـ المرة

‏وقوف الحياد أستنقصه من سنين صباي
‏أشوف آهله فـ الغالب ، أصغر من الذرة

‏لا شان الزمان يضرّني واحد من عداي
‏ولا غالي !.. لا " سرّ وضعي " ولا ضرّه

‏لو الموت مرّة .. ما تعنّيت في دنياي
‏أنا آشوف لي حيّين .. ماتوا مية مرة
- عبدالله السراهيد

مساكم الله بالخير♥️

مثل من يحجب بيده عن عيونه شعاع النور
‏انا وشلون بنفي فقدك وتأثيره وجوره

‏فقدتك كني أول من فقد غالي وعاش الدور
‏ولا احدٍ قد فقد غالي قبله ويفهم شعوره

‏عبث تحضن خطاوي الدروب ودمعي المنثور
‏تطلّعه ابتسامات الرضا والحب من طوره

‏كأني وان عرفت سرور قبلك ماعرفت سرور
‏او إن القلب زهّده الحزن واستكثر سروره
‏
‏اشوفك كل ماغنى على غصن الشجر عصفور
‏ولا عاد الشجر نفسه ولا غصنه وعصفوره
‏
‏يمر بعيني اشهی ماخلق ربي بدون شعور
‏صحيح إن القلوب جنود منهيّه ومأمورة

‏حبيبي مابقی دافع وسط بالي ولا لي دور
‏والارض اصلا كذا ولا كذا بالناس معموره

‏انا لو ذكرياتك ماتعمّر بالي المهجور
‏تعدّته الطواري من فزعها وانهدم سوره

‏على وجهك تحاسيف الزمان وصوتي المكسور
‏ياضيعة جرة انسامه من الصدر ومن كسوره

‏تركت من الجفا قلبٍ يحبك راضي ومجبور
‏ولا ملّله طول البعد منْك ولا معي شوره

‏عسی الله لا يضيّع لي سنين وجعلني مأجور
‏ولو ماتدمل اعذارك جروح القلب معذوره

‏احسك اقرب من اني اقول انّا ظلال وسور
‏واحس الأرض مادارت بعد عينك ولا دوره

‏ على صوره موقفني حنيني لي ثلاث شهور
‏وعيت لاتدور الأرض مادري عيت الصوره" ):
‏– ماجد النفيعي

يالله بصوتٍ يغيث السمع ، والكبد يْغسلها
‏فوق الارض المجرهدّه ، كنّه الوسم المبكّر

‏علمّوا بنت السحاب اللي تمادت في زعلها
‏الاوادم طبعها تصطاد فـ الماي المعكّر

‏لا تطوّل في معاندها ، وياخذها جهلها
‏اعرفها زين لا منْها استضاقت ماتفكّر

‏وانا لو شيصير مادوّر مع العالم بدلها
‏ولو يطول البعد ماخون الغلا ، ولا اتنكّر

‏كيف اخون اللي لها فـ الصدر قاعٍ مانزلها
‏غيرها .. ولا رعى فيها المؤنّث ، والمذكّر

‏مستحيل اني اخيّب ظنّها فيني ، واملها
‏عاد مايخفى عليها شيْ .. لْكن حبّيت اذكّر

‏امتشفّق لـ الليال اللي مضت .. والنفس ولهى
‏لـ الكلام اللي يجي من ريقها مليان سكّر

‏ودّي ان كل الدروب تْمر شارع بيت اهلها
‏وكل شبّاكٍ عدا شبّاك غرفتها يْسكّر
- فهد العيبان

مرّت ثلاث شهور مامريت في بال القصيد
‏وما لاح برق .. ولا على الوارف من غْصوني سجع

‏قلبٍ ليا غنّى الحمام اللي على خضر الجريد
‏خطرٍ عليه انه ليا طوّل سْكاته ينفجع

‏فارقتك ، وحسّيت ماني من فراقك مستفيد
‏و رجعت لك ، والقلب دوب انّه ورا ضْلوعي هجع

‏على الصعيد النفسي الليله انا جدًا سعيد
‏مَكذب عليك انّي تخطّيت الكثير مْن الوجع

‏توّي بديت احب ، مدري .. صرت احبك من جديد
‏حتى الشعور اللي فقدته معْك احس انّه رجع
- فهد العيبان

للمكان اللي تحفوى بالليال المدلهمّه
سارت اقدامي ونفسي تاقت لرؤية أثرها

غرفةٍ اهرب إليها كلّما لاقيت غمّه
علمتني صاحبتها كيف تستقبل كدرها

تحمد الله واتّباشر بالصبر يبلغ متمّه
لو غيوم الحزن سالت ! فكّت يْديها لمطرها

خلّدت سيرة واثر ما تلحق الراحل مذمّه
اسمها احيا الديار وذكرها الطيّب عمرها

للموادع إنكساره ؛ مثلما للقبْر ضمّه
والمواجع تتبع المحزون لو قلبه دحرها

من كثر جيّات حزني احسبوني بنت عمّه
كلّما جاني قلط فالغرفة اللي ما هجرها

عادتي اكرام ضيفي لو نفث فالروح سمّه
البلا انه مـ استحى من جود يمناي وبترها

مابقى لي غير ثوبٍ لا طغى شوقي اشمّه
فيه ريحة ذكرياتٍ ما تسنّى لي زهرها

احسب ان الوقت لملم ما عجز قلبي يلمّه
والمشاعر دفنت بليله محد غيري سهرها

لين ما طاح نْظري عالدفتر وناديت : يمّه
مادريت الا وانا آصيييح واعانق صورها
- مها

اشتقت لها💔
غفر الله لموتانا وموتاكم وموتى المسلمين