tgoop.com/Poemq/1447
Last Update:
خدمة الزهره الزچيه رَوحَن او ريحان
التاجَر اوياها ابدمعته لاتضن خسران
بلسم الكل داء فاطمه الزهراء
____________________________
جنة وابخدمتها تنعم هل موالين
باب ( حِطّه) لليحبها ام الحسين
للـ على گلبه غشاوه والعليه رين
گلبه يطهر بس عليها يهمل العين
برد او سلامن فاطمه في يوم الاحساب
بيمينه من الها لطم ينطونه الاكتاب
من عدها الآء فاطمه الزهراء
____________________________
أم ابوها الما مثلها بل خلگ صار
الله عن كلمن يحبها حرّم النار
والعليها عنده ونه او دمعه مدرار
يشفعوله اثنعش واحد كلهم ابرار
اليخدم الزهره او دليله للكسر مهموم
اهناكه يوگفله محمد واثنعش معصوم
اتوصله العلياء فاطمه الزهراء
____________________________
الخير كله بين اديها يل ردت خير
الرحمة الله الوسيعه هيه تفسير
تلتقط باچر خَدَمها اتّلگّط الطير
مثل ام اتلم ولدها او بيهم اتسير
تعتني للجنه بيهم رافعين الراس
او حيدر اليستقبل الهم والگمر عباس
تعرف الاسماء فاطمه الزهراء
____________________________
العالمه الحره الگلبها احنين اهواي
گلبي صحراء او ذكرها للگلب ماي
الها احب وني او دمعتي او جرحي وبچاي
هيه روحي و جروحي دائي او داي
الساعه في مجلسها تسوه عمري الراح
دمعه عل خد الها تجري اتطيب اجراح
امن الالف للياء فاطمه الزهراء
____________________________
گلبي بل زهره الزچيه اتعلگ او ذاب
صاير احسينيه تنعه لوعة الباب
ليل وانهار الها يقره . يقره المصاب
كل جرح طاب الا جرحچ بيه ما طاب
ابهل شعائر والمشاعر الها انعه اضلوع
عمري وقفته الحزنها او كلي اجري ادموع
دمعتي حمراء فاطمه الزهراء
____________________________
ابو فاطمة الطائي
BY الشاعر ابو فاطمة الطائي
Share with your friend now:
tgoop.com/Poemq/1447