يمه ينور العين آنه العزيز احسين
كلميني يا زهراء گلبي انجسم نصين
____________________________

يعافيتي . انا اوليدچ عليمن ما تحاچيني
افتحي اعيونچ اسويعه او شوفي اشصاير ابعيني
اگعدي الخاطري لا اموت . واشيوجعچ دليني
تعوفيني يهون اعليچ ؟ او للحسره تخليني

حاچيني بس چلمات مو حيلي يمچ مات
يحنينه بيّه اشلون ؟ گلبي انجسم نصين
____________________________

شلي ابعمري عگب عينچ او دنياي اشيضل بيها
يل احبيبه انكتب دنياي بس لچمات اگضيها
انشدچ يمه بيه اشلون اهمومي المن اشكيها
لو دار الزمن وياي بل طف او نواحيها

يا يمه ضلي وياي جيبلي بل طف ماي
يوم الاگع عطشان گلبي انجسم نصين
____________________________

ييمه عني لا تمشين ياهو ايسكن الآمي
اوياي الكربلا اتروحين واتگعدين بخيامي
حتى ابچي واطيح اعليچ واگلچ يم حسن : ضامي
واشمن شيلتچ وارتاح گبل سحگتهن اعظامي

امن اتوسد التربان تحميهن النسوان
من تستعر نيران گلبي انجسم نصين
____________________________

اريدچ بالطفوف اوياي من اوگع على الغبره
المثلث تَطلعينه منّ اضلوعي يل الزهره
ييمه او للشمر حاچيه لا تگعد على صدره
لتلوع دليل احسين عوفه او لاتگص نحره

لو سلبو لهدوم غطيني عن الگوم
ماريد اضل عريان گلبي انجسم نصين
____________________________

لو نمتي ابوسط تابوت زينب من يضل يمها
تضل اوحيده بين اجناب كل اليجي ايشتمها
بسياط او حجر واعصي ينزف بالمتن دمها
تحير اتلم عبايتها مدري ايتامي اتلمها

فوگ الهزيله اتنوح لارض الشماته اتروح
واتطب على الديوان گلبي انجسم نصين
____________________________

ييمه لو غفيتي اليوم زينب بل خرابه اشلون
اهي حرمه او تضل بل ليل تتلصص عليها اعيون
لا يمها ولي او لا جار يمها ارجاس ميخجلون
تندب بيچ . بل كرار . لاچن حيف متردون

تبقه بأسر واجروح الحد المنيه اتنوح
منها الصبر خلصان گلبي انجسم نصين
____________________________

ابو فاطمة الطائي

آنه عبد فاطمه الريحانةُ العالمه
روحي بِـها هايمه .... فاطمه
______________________________

يل تلوم اعليه حُبّي او گاعد اتنظّر الي
آنه اگلك ليش احبها ازيد امن امي او هلي
قال مولاي ابو جعفر باقر العلم الجلي
( وهلِ الدين إِلا حبٌ ) دفتهم يا عاذلي

چا مذهبي ابلايه حب چن جسد ابلا گلب
ابهاذه المثل تنضرب .... فاطمه
______________________________

فاطمه هيه ( النعيم ) الراح عنه تنسئِل
لا ديانه او لا شريعه ابغير فاطم تكتمل
اشلون يل تجهل گدرها ابجنة الله تنقبل !!
اشلون بل فردوس تطمع انت هم عندك عقل !!

الجنة عدن مالكه او جهنم المُهلكه
ارادها رَبّـُكَ .... فاطمه
______________________________

يا مقام العدها محد بل خلايق فاهمه
الرسل والأملاك چِفه . او چفه الاخرى فاطمه
اليخدموها عنهم ابلغ بالصحف رب السمه
گال خدامچ { وُجُوهٞن يَوۡمَئِذٖن نَّاعِمَةٞ }

باسمةٌ ناظره لفاطمه ناضره
فعندها حاضره .... فاطمه
______________________________

الله رزاقني هواها او هاذي اعظم مرتبه
انطاني دمعه اعليها يعني انطاني رِفعه او منقبه
لنّي شجره ابلايه فاطم غصني يابس شاحبه
عبد الها اضل رغم الــعاجبه او مو عاجبه

رغم على الما يعتقد لِفاطمه آنه عبد
بعد الاجل الها ارد .... فاطمه
______________________________

اتريدني امن الزهره ابطل واتبع اصحاب الدرن
يلي كل اسيادك انت جوه نعل ام الحسن
الزهره امي الزهره ابوي الزهره روحي والوطن
ليله لوما ابچي الها اعيوني احسهن ينعمن

أم أبيها مهجتي وعِبرتي وعَبرتي
تسبيحتي وسجدتي .... فاطمه
______________________________

الراضيه المرضيه فاطم فقط مرضاها اود
نذر كل اسنين عمري في مجالسها عبد
مره شاعر مره ناعي مره الطم مره ارد
گلبي احسينيه الها بابه ابدن ما اسد

اسمعني يا عاذلي ميت عدل هيه الي
بيها لذت . وابعلي .... فاطمه
______________________________

ابو فاطمة الطائي

ابغصٌة ألم شجيّه
وصت علي الزچيه
زينب عليها بالك
ما تحتمل أذيه
_____________

اتون من كسر ضلعها
ما ينحمل وِجعها
يچوي الوجن دمعها
نادت يبو الحميه
_____________

اتگله يبو المَحنّه
اگرب علي تدنه
جاها ايتعالى ونه
يگلها آمري عليه
_____________

اتگله وصيّه عندي
لو وسدتني لحدي
وِلدي يحيدر وِلدي
الهم تضل تچيه
_____________

زينب علي دللها
والدمعه لا تهملها
تره الهظم يكتلها
يل تحفظ الوصيه
_____________

لا واحد ايأذيها
وسط الجفن خليها
من تعطش اترويها
تره زينب أبيه
_____________

بالك جمر يچويها
خيمه انت صير اعليها
ابنيتي الشمس تاذيها
حيدر يبو الحنيه
_____________

خلها تصير اميره
مو عل هزل اسيره
من ديرتن لديره
امچتفه او مسبيه
_____________

حيدر وصيتي زينب
دلالي ليها شيب
خاف ابسبي اتعذب
او تسمع ضحك اميه
_____________

ابگبري . او عليها بالي
ميته . او دمع يلالي
ما يبقه عدها والي
بس لوعه سرمديه
_____________

ابو فاطمة الطائي

ادموع ادموع اواسيها دموع ادموع
_____________________________

اليوم والينه علي ابيا حاله
او ماتت الزهره الزچيه اگباله
ويلي دمعات الوجن هماله
والحزن والضيم ضل تبراله

ادموع ادموع جره عليها ادموع ادموع
ادموع ادموع اواسيها دموع ادموع
_____________________________

راحت الچانت كحل بعيونه
ويلي يابو حسين هسه اشلونه
امس وياه والمسه مدفونه
او بس شماته . ماكو ليعينونه

ادموع ادموع يحاچيها بدموع ادموع
ادموع ادموع اواسيها دموع ادموع
_____________________________

والحسن هل يوم ذابت روحه
وجنته ابسيل الدمع مجروحه
نوح ما نايح ابد من نوحه
راحت امه او طولت هل روحه

ادموع ادموع يصب ليها ادموع ادموع
ادموع ادموع اواسيها دموع ادموع
_____________________________

والحسين ابهل مسه انهد حيله
ليله گشره اعليه سدت هل ليله
حيث املاك السمه تبچيله
شالو امه والجدم ميشيله

ادموع ادموع يناغيها بدموع ادموع
ادموع ادموع اواسيها دموع ادموع
_____________________________

او زينب اتگوم او تگع مالومه
اتصيح يا يمه متت يا يُمه
ليش من زغري اصبحت مهظومه
ريتها اضلوعي الذي مهشومه

ادموع ادموع تچويها ادموع ادموع
ادموع ادموع اواسيها دموع ادموع
_____________________________
آه يا دار الوصي اشضل بيها
ضلمه . بس ون ودمع ماليها
راحت الزهره يويلي اعليها
ماتت او ذاك الضلع ماذيها

ادموع ادموع اگضيها ادموع ادموع
ادموع ادموع اواسيها دموع ادموع
_____________________________

ابو فاطمة الطائي

ابيات ابوذيه لشهادة سيدتي ومولاتي فاطمة الزهراء
بلسان حال الحسن و الحسين وزينب عليهم السلام

تون روحي لچني ... خافي المها
ابد ما ساعه أمي ..... خاف المها
اريدن خدها اشمه ... خاف المها
واهي ملچومه ما تحمل أذيه

جفني امورم او زايد .... وراماي
او گمت اوگع وارد انهض .... وره امي
اليسافر يا عرب ينطش .... وراه ماي
اشيفيد الماي يا نعش الزچبه

المعصم والجفون امست ... لها الوان
او ليل انهار متواصل ..... لها الون
السماء السابعه حنّت ....... لهل ون
الله يعين حيدر هل مسيه

يون الگلب يا ريته ... ون اومات
الزچيه ابلحد مدوها .... ونامات
يمها المرتضى ينحب ..... وانا مات
حيلي . او ضاگت الوسعه عليه

السدر . والماي . والكافور .. يابه
وانعينه على التغسيل ..... يابى
يگلي خافن اتموتون ..... يابه
او تصوبوني على اصواب الزچيه ...

وبلسان حال الزهراء عليها السلام :

انا الاملاك تنشد ... شتمني ؟
اكسرو ضلعي او جنيني .. شت مني
احرگو بابي . او لِسِنهم .... شتمني
او گنفذ سوطه ضل يلعب عليه

الهظم مجبل تعنه ... وجهه لحسين
او نار ابوسط گلبي .... وجهه الحسين
غده يصفر او يزرگ ...... وجه الحسين
يوم الهجمت الوادم عليه

ابو فاطمة الطائي

اتلث روايات  قليلات  عزاء أم الحسن
اثمنطعش كون  والعيون  وجوبن ينعمن
ريت كل عمري عزيه
او بس ليالي فاطميه
    بس ليالي فاطميه
________________________________

يا أم الوگع ضامي    او نحره امگطّع او دامي
جيتچ هل مسيه

عن تقصيري اتعذّر       دمعي ماهو دم احمر
لجلچ يل زچيه

اتلث روايات المصابچ مو كِفايه
يلي بِـضلوعچ جنو اعظم جنايه
كون كل ونّه الچ تِنعد روايه
او عله كل دمعه نِون وَنّ السبايه

انسوي عاشور   والصدور  الچ تشبع لطم
نعمي العيون  والجفون تذوب امن الهظم
حسره يل زهره الزچيه
بس ليالي فاطميه
________________________________

آنه او صفنتي اتأمل      مِن اسمع لچ المقتل
والباب او حرگته

ابّالي اتصور الوگعه     او اسمع رنة الصفعه
والضلع او كسرته

يوم خلف الباب طحتي اگبال حيدر
ايشوف خدچ يسطرونه وايتحسّر
بذنه يسمع صوت ضلعچ من تكسّر
بچه . گدام الشماته الله واكبر

امفرع الراس   يهل ناس    يدگ ابهامته
يهوه وايگوم والهموم سقيمن خلته
شيبت راسه الرزيه
بس ليالي فاطميه
________________________________

شذكر يا ألم شنسه وانتي ابصدرچ الرفسه
لنفاسچ گطعها

ليلچ فاطمه امسهد من السطره فوگ الخد
ليشيّب وجعها

امنازع اتخلصين ليلچ يل حنينه
كل نَفَس مثل السهم تتجرعينه
العينه مصيوبه تنام اشلون عينه !!
يون طول الليل ما بطل ونينه

حالچ اشحال شده البال ملائكة السمه
اتنادي بل آه اويلاه ماتت فاطمه
ياعظم هاي الرزيه
بس ليالي فاطميه

________________________________

امتونچ يم حسن يدّن      حيل اهل السمه هدّن
او يبچولچ يفاطم

طحتي ياجلال الله او كلهم صاحو اسم الله
من طاها او لآدم

كل نبي ناح المصابچ يل زچيه
او لجلچ امفرع فزع سيد البريه
ايگول ريت اجذوعكم طبگن عليه
او كل مصاب الصار بيچ ايدور بيه

دمعچ ايصير بسامير ابدليلي انبتن
بويه زهراء يزهراء ثجيله هل فتن
شلها هل وادم عليه
بس ليالي فاطميه
________________________________

رغم القله والكسره     او رغم اشبينه من حسره
نحييها المآتم

امصابچ بينه يتجدد       الرفسه او صفعتچ عل خد
وسوط البل معاصم

هوّه يا جرح الذي ننساه گِدرنه !
الباب والبسمار عاشن وي عمرنه
الطيحتچ فوگ الترب طاحت عگلنه
من وكتها الهل وكت محني ظهرنه

ابصدرچ الآم    چن اسهام    بل اصفاح انبتن
او محسن الروح  بلا روح      وگع يم الحسن
مرتمي فوگ الوطيه
بس ليالي فاطميه
________________________________

عهدن نبقه بل خدمه       انموت او تبقه هل كلمه
نتوارث عهدنه

اشما رادو نِگع . نعله         كلها الخاطرچ سهله
يا ام المحنه

لحد يوم البي نشوف المهدي قادم
ايشوف بعيونه عزائچ عدنه قائم
اويسمع الناعي يون لضلوع فاطم
او يگعد اويانه او دمع عيناه ساجم

انكحل العين   والحسين   إله ثاره يرد
بيده يسگيه    يرويه       يبردله الچبد
او زينب ترد مو سبيه
بس ليالي فاطميه
________________________________

ابو فاطمة الطائي

شوط كربلائي جديد لمصيبة الزهراء عليها السلام

ثجيله الباب من اجذوع واعله الطاهره انطبگت
غدت بل گوه تتنفس تشوف الموت لو شهگت
_________

من جذع النخل هل باب ثجيل او محد اينحره
يرج الگاع من ايطيح چنه من جبل صخره
اذا يوگع على ابنادم دخيل الله ايخسف صدره

يشيعه او بيه كل بسمار
چن خنجر عدو غدار
الشافه ايصيح يا ستار
هذني الباب والبسمار هنه الكتلن الزهره

_________

مثل طبگ الجفن طبگوه عليها الباب يهل الله
هوت مثل البدر مخسوف او محد گالها اسم الله
هوت وادموعها مدرار او دمها اعله الوجن صله

اضلوع البيها متكسره
او يا بسمار ال شكبره
خله بل صدر حفره
خلاها تون بسكوت حتى انفاس ما خله
_________

ناس الما رحم بيهم خلوها تون بل گاع
موش اسباع بل ميدان بس اعله الزچيه اسباع
واحد يرفس ابرجله او شوفها المرار انواع

او رد بيده سطر خدها
او فص العين ماردها
وابنها ميت ابسدها
گلبها ايلوع من الچف . مدري عله المحسن لاع

_________

دوهنها مصاب الصار او ما ضل كل فكر عدها
تريد اتگوم ما تگدر ولا واحد يساعدها
تحط چفها على الضلعين مدري اتحامي الخدها

مصيبتها تشيب الراس
فاطم توگع او تنداس
محد الها يا هل ناس
بس حيدر علي مچتوف وصيه اليمنته اتشدها

_________

يمها بس علي الكرار او سكته ابسكته يتحسر
لا يگدر يسل السيف لا يصبر بعد يگدر
گبل هل ساعه مابي شيب . علي بس شيبه المنظر

يسمع هل الحنينه اتنوح
امن الراس الجدمها اجروح
بچه ليها الطلاع الروح

يگللها اشبديه عليچ يروحي او يانبض حيدر

_________

يگللها اشبدي هل ساع غير النوح والدمعه
مثل نعي ام وحيد اعليچ يا فاطمه ارد انعه
يريت آنه الذي صابوه وآنه ال اكسرو ضلعه

يل حبيبه مصابچ كون
لجله تنعمي العيون
وامسى بل گبر مدفون
ولا گدامي اتونين يزهرة روحي يل بضعه
_________

ابو فاطمة الطائي

ابيات جديده على وزن الميمر
لشهادة سيدتي فاطمة الزهراء

انتي العدن يُم الحسن
الجنات بيچ اتزينن
كوثر الرب المعبود للمصطفى اهداها
______________________________

يا ديرة مثلچ شاهدت يا أُمّه ؟
من چان آدم والارض ما همّه
چان السماء اتصيح الچ يا يُمّه

اصل الضوه وطعم الهوه
اقسم ابسورة قل هو
بارينا لولا عيناچ هل دنيا ما سواها

______________________________

مخلوقه من جنة عدن انوارچ
ايعرفون بس طاها او علي اسرارچ
هل ليله آنه ابمجلسچ . خطارچ

جاي ابعشگ او گلبي اليدگ
لو عاف دربچ يحترگ
دگيت بابچ ملهوف رايد قصيده اقراها
______________________________

ارد اقره ابيات ابوَجَد كاتبها
عنچ . او عن هالخدمه والي ايحبها
امرتبها باسمائچ انه امرتبها

أول أسم مثل النسم
او لا حرمه ابوسمه تتسم
( أم ابيها ) الياسين . او ياسين هل سماها

______________________________

( زهراء ) وآنه ابهل اسم اتغنه
لو مرني اتصور بهاء الجنه
دونه حياتي ابلا طعم. لا معنه

هوه النَفَس هو القَبس
من نوره دلالي انترس
او صرت اعرف أن الاخلاص هو انتي يابت طاها

______________________________

الكوثر . الحره . العالمه . القدسيه
حوراء نزلت للارض أُنسيه
الله رزقني امحبتچ عل نيه

او صرتي الي انتي او علي
ديني او قِبلتي او مَنهلي
عدل او نبوه او توحيد . بمحبتچ الگاها
______________________________

( ريحانه ) كل يوم النبي ايشم بيها
( سلطانه ) واطراف الفضا بيديها
(الاحنينه ) يا ويل الذي ايعاديها

رب الملا سواچ اله
ما بشر فوگچ منزله
اقمار او كواكب واشموس . منچ ضياء انطاها
______________________________

(أم الحسن ) و( ام الحُسين ) القابچ
جبريل يوميه يجي ايشم بابچ
لن يعرف احجاب الاله احجابچ

مامش بشر ابهيچي قدر
طاهره من منبع طَهر
هنيال دلالي او حيث انتي الصُبح يهواها

______________________________

هنيال گلبي فاطمه چي لنّه
ابهاي المجالس يخدم او يتهنه
املاك تبچي بالسمه ايحسدنه

ممنون انه الهاذه الهنه
اترزقيني اخدم كل سنه
واتوسط الهل خدام وابچي واون وياها
______________________________

شكرن يبعد امي او هلي واجروحي
شكرن على الدمعه او خدمتي او نوحي
بس وحده ضلت واطلبتها ابروحي

منچ ردت واتوددت
لو ساعت الموت ابتدت
خلي موتي بل مجلس كون وكت النعي محلاها
______________________________

ابو فاطمة الطائي

موشح لشهادة سيدتي فاطمة الزهراء

روحي لا تنشد الليله اشمالها
الزهره ماتت والمحتم نالها
________________________

روحي بيها تستعر نار الخليل
او شايله امن اهمومها الحمل الثجيل
لا دواها بل صبر . لا بل عويل
مثل ثكله هل مسيه احوالها
________________________

مثل ثكله هايمه ابين القبور
بل نعي سلوتها وابدگ الصدور
من السحور اتهل دمعها للسحور
خاويه . او ذبلت غصون آمالها
________________________

خاويه وي فاطمه الشبعت عذاب
چم مصاب الصوبها چم مصاب
يوم نِهشوها او هوت فوگ التراب
تون والمحسن چتيل اگبالها
________________________

يا هظيمه الزهره ماتت بل هظم
او أثر بيها عل وجه من اللطم
چن خيال اصبحت مرضوضة عظم
ازيد امن ايوب ضيم النالها
________________________

واليهيج اجروح وايزيد الحزن
ابليله ظلمه ام الاطايب تندفن
ماكو اليشيعون بس حيدر يون
اوحيده ياويلاه حيدر شالها
________________________

شالها او دمعاته عل لحيه تسيل
گوه يمشي ياخلگ اصبح نحيل
حيث لو نسمة هوه اتمره يميل
چنه شايل فوگ متنه اجبالها
________________________

وايتحسر والگلب منه انجسم
لنه من الحانيه الطيبه انحرم
يصد للتابوت واتهل عينه دم
روحه سالت مو ادموع السالها
________________________

روحه سالت والغصص بيه يطحنن
دنيته اشضل بيها عگب ام الحسن
طايح ابمحنه الفلا مثل المحن
روحه من هيه البعد تبرالها
________________________

آه يا غصة علي فحل الفحول
لو جبال الراسيه منها تزول
علي امن ايده راحت الزهره البتول
والهظيمه مبتسم چتالها
________________________

ابو فاطمة الطائي

ويلي اعله الزهره المظلومه
ويلي اعله الزهره المظلومه
_____________________

هل ربك سماها الكوثر
طاحت والقرآن اتبعثر
آياته اتون او تتحسّر
عصروها او امست مهمومه
________________________

باب اجذوع او ياهو اينحره
دفعوه فوگ اضلوع الزهره
وادم لا دين او لا فطره
خلوها اتون او مالومه
________________________

ماراعو آل او لا ذمه
المو زلمه اعليها اصبح زلمه
بجدامه ايدوس عل نعمه
شيطان . اولا ينفع لومه
________________________

لَم كل تابع ليه او جابه
روع گلب الزهره او صابه
صوبها او ما طاب اصوابه
خله المدمع تجري ادمومه
______________________

ماتت حزنن ويلي اعليها
من جرم الطاغي المض بيها
بس حيدر يمها ايواسيها
متوصي . او حاير بهمومه
______________________

ايصد للفقار او يتحسر
گلبه ايفور او عيناه تسعر
آه لو لا ما گايله اصبر
چا شيبهم ليث الحومه
______________________

يتحسّب الله او يسترجع
گاعد بالگاع او متربع
والمدمع شيباته امنگع
واضلوعه التسعر محمومه
______________________

تسعر ضلت نار ابروحه
سهران . ايسولف لجروحه
عن الزهراء المملوحه
الراحت منه او ما مقسومه
______________________

راحت منه او ضل ابغربه
اوياها اندفنن روحه او گلبه
هيهات اترد فاطم گربه
امنازع ضل ايخلص يومه

______________________

ابو فاطمة الطائي

اعادة نشر
ابيات ابو ذيه لشهادة سيدتي فاطمة الزهراء عليها السلام بلسان حال العقيله زينب


عليها احسين ينشدني ...وين امي
تون او فطر دلالي  ........  ون امي
الوادم مِسعده بأمها ... .. وانه امي
ملچومه وتون صبح ومسيه ......

دگومي او شوفي حاله ....ي ام الحسين
النعش يوگف او يوگع ..... يَمه الحسين
يگول اوليدچ آنه ............ يُمه الحسين
الخاطر دمعتي ردي عليه .....


ابو فاطمة الطائي

من بعد هذه الوصيه التي كانت بلسان حال سيدتي فاطمة الزهراء للعقيله زينب .

كتبت هذه القصيده بلسان حال سيدتي زينب عليها وكاني بها بعد ما استمعت كلام امها حول مصيبة سيد الشهداء فقالت لها:


يزهره من عگب هاي الوصيه
انشدچ يمه لا تخفي عليه
احسين اجروحه من ايصيرن اهواي
أضل اوحيدي لو تلفين ويّاي
لا تخفي عليه       لا تخفي عليه

_________
_
ييمه اصواب ضلعچ گلتي ما گوم من عنده اعله حيلي
او گلتي ابهل مسيه اتوسد اتراب يبنيتي اندعيلي
وصّيتي ابوصايا اتشيب الراس واتگطع دليلي
انشدچ يل حنينه او رايده اجواب اگعدي او سولفيلي

ييمه احسين من تيبس لهاته
او محد عنده بس آنه او بناته
تجين اوياي واندورله چف ماي ؟؟
لو وحدي اضل وامتيهه الراي
لا تخفي عليه       لا تخفي عليه

______

اذا صابه المثلث بين الضلوع واهوه اعله الوطيه
واشوفه ايرافس ابرجلينه بل گاع واعيونه عليه
چنه يگلي اريدن ماي عطشان . من گبل المنيه
وآنه امدوهنه واصرخ يعباس . وابقه افرك بديه

تعالي اوياي غادي او باصريني
اعصري اعيونچ او اعصرلي عيني
نبلل ريجه يمه ابدمعة العين
بلچن ناره تخمد گلب الحسين
لا تخفي عليه       لا تخفي عليه

______

اعله صدر احسين لو شفت الشمر داس وايحز ابوريده
المن انطي وجهي و امنعه اشلون . حرمه آنه او وحيده
لا عنده گلب.  لا يرحم ادموع ييمه او سيفه بيده
امن اگله حز وريدي او عوف الحسين . يضحك . يهز بيده

يگلي بثنعش طبره ارد اطبره
من مگفه يزينب راح انحره
ييمه اشلون بيه او اتجه وين
تعالي او شوفي حالي اهناك مو زين
لا تخفي عليه       لا تخفي عليه

______

توصيني ييمه وآنه هل يوم هم عندي وصيه
اريد من الگبر ليه تفزعين يوم الغاضريه
تعال اوياي من اتدوس الحسين خيل الاعوجيه
ابعباتچ وابعباتي انلم الاضلوع يا يمه سويه

ونسويله فيايه من عبينه
وانرد گلبه لمچانه ابأدينه
او من جسمه نطلع اسهام وارماح
بلكت يل زچيه اينام  مرتاح
لا تخفي عليه       لا تخفي عليه

______

واريدچ يمه من اتهد الجيوش لاخيامي وتسلب
او يحرگوهن على روس النساوين او ركضتهن تشيب
مذعورات هامن مدري ليوين.  التشرّج والتغرب
وحده الوحده تنشد وين الحسين خلنه بي نچلّب

تعالي واسمعي صوت البواچي
او شوفي اشسوه سلاب التراچي
بآذان اليتامه اجروح واجروح
كل عته اليعتها اتشوغ الروح
لا تخفي عليه       لا تخفي عليه

______

وازيد واكلف امن امصاب الاطفوف يا يمه سبينه
على الهزل نطوف الكوفه والشام مچتوفات ادينه
عگب ذاك الدلال او ذيچ الاخدور ابقصور موگفيه
او علينه ايزيد يضحك بل دواوين . يتبختر علينه
تعالي او شوفي حالتنه الرديه

تمنيت السبي ابداله المنيه
او من هسه ييمه اتوسد اوياچ
او لا طب كربلا . او لا نار فرگاج
لا تخفي عليه       لا تخفي عليه
______

ابو فاطمة الطائي

نزله للسيده الزهراء سلام الله عليها

آخره او دنيه اگول خادم آنه للبتول
__________________

كلمه وحده او آنه بيها مِعتقد
هيّه حرزي ودُعائي والوِرِد
ابقه آنه الفاطمه الزهره عبد
والها في يوم الورود آنه ارد

ابد عنها ما ازول خادم آنه للبتول
__________________

ابغير فاطم كل عباداتي عدم
اللوح بيد اوبيدها الاخرى القلم
الفاز في رضوانها اينول النعم
والبغضها حصته حسره او ندم

والندم كلش يطول خادم آنه للبتول
__________________

هل خلايق ذره والزهره جبل
غيرها الآخرتي ما عندي امل
تغفر اذنوبي او تسامح عل زلل
تختم ابدفتري تكتبلي : انقبل

منها محلات القبول خادم آنه للبتول
__________________

زهره . واليخدمها مرفوع القدر
حيث حاشاها تغض عنه النظر
او ينحرج خادمها گدام البشر
لا . ولا اتخليه ساعه في سقر

جنه وانهارن ينول خادم آنه للبتول
__________________

أم حسن واحسين الها انتمي
بيها من جور الليالي احتمي
حبها يجري في شراييني او دمي
حتى اسمي افلان صار الفاطمي

بيها اعلى ابلا نزول خادم آنه للبتول
__________________

خادم الها وافتخر بل عالمين
آنه مولاتي الأميره أم الحسين
في مجالسها الي دمعه او انين
يِسون الدنيا شمالن ويمين
ريت عمري الها يطول خادم آنه للبتول
__________________

ابو فاطمة الطائي

أمير المؤمنين بلسان الحال يخاطب الزهراء بعد دفنها :

وين اروح .. روحي يل زهره عگب عينچ غريبه
وين اروح .. صبر ما ضل عندي من هاي المصيبه
يمن چان ابشوفتچ جرحي يطيب
علي مكسور الجنح ضل او غريب
وين اروح وين اروح
__________________________________

چلچل الليل او عيوني چن ملح محطوط بيها
لا تنام اسويعه تقبل لا رضت تگطع بچيها
اعيوني مشبوحه الحجرتچ جَر تجرجرني عليها
والگه بس اعبايه سوده عل جدار امعلگيها

هل عباه .. اصد ليها او گلبي ايفر من مچانه
هل عباه .. صور بيها عن فرح راح ابزمانه
راح وابدال الفرح حل النحيب
علي مكسور الجنح ضل او غريب
وين اروح وين اروح
__________________________________

آنه عگبچ يل زچيه طير عشه امهدمينه
حدره الصياد جاعد او صگر فوگ اتخزره عينه
لو اجي الگبرچ انوحن خاف الچمچ يل حنينه
او من ترد للدار روحي تلگه باب امحرگينه

الگه باب .. على دم اضلوعچ أيأشرلي چنه
ألگه باب .. اهنا يحيدر ماتت الكلها محنّه
وآنه كلما اصدله دلالي يشيب
علي مكسور الجنح ضل او غريب
وين اروح وين اروح
__________________________________

دهري والليل وجروحي اعليه متحزمات كلهن
وين اروح او اشكي المن تعّبني او تعّبتهن
فاطمه كلشي احتملته اشگد مصايب عبّرتهن
لچن بس ساعات هجرچ يصعب اعليه احتملهن

بس تعاي .. لاني ميت لا عدل عگبچ يروحي
بس تعاي .. ردي يل بعدچ مثل يعگوب نوحي
الباب طفوها او بقه ابگلبي اللهيب
علي مكسور الجنح ضل او غريب
وين اروح وين اروح
__________________________________

هاي أول مره اوگع وانكسر مني جناحي
فاطمه رحتي او دليلي اتگول تحفر بي مساحي
اعيوني ليل انهار تجري وين اليگلها استراحي
وين اليردچ أليه واليداوي لي جراحي

امن العيون .. ياهو يمسح صورت الطيحه الرهيبه
امن العيون .. اشلون اوخر عصرة الباب او لهيبه
او صيحة الـ آخ الّي عنّي ما تغيب
علي مكسور الجنح ضل او غريب
وين اروح وين اروح
__________________________________

يا حياه تنعاش عگبچ او ياطعم بيامي باقي
وآنه من ينجاب اسمچ روحي توصل للتراقي
ابكل نفس تطلع لي شيبه وابكثر شيبي اشتياقي
ريت گبرچ ليّه ينطر او تحصل أسويعة تلاقي

ارد اجيچ .. او شوفي اضلوعي الغدت عگبچ نحيله
ارد اجيچ .. يمچ ارفع ايدي ل الله وارد اسيله
وارد اگله اقبضني ابجاه الحبيب
علي مكسور الجنح ضل او غريب
وين اروح وين اروح
__________________________________

آخ يل زهره وحگچ المر علي محد يحمله
او دمع عيني الي هملته غيم ما يگدر يهمله
يوم بغيابچ كتلني اشلون لو طالت المهله
يمته هل شيبه اتخضب واندفن والموته تحله

يل بتول .. علي مو نفسه علي حامي الحميه
يل بتول .. علي صار اخيال عگبچ يل زچيه
شاحب او نحلان محزون او كئيب
علي مكسور الجنح ضل او غريب
وين اروح وين اروح
__________________________________

ابو فاطمة الطائي

باچر اترف رايته المنصوره
او نمشي الگبر الزچيه انزوره
يا مهدي يامهدي يامهدي يامهدي
____________________________

باچر ايرد لينه بالفرج مهدينه
الفاطمه ايودّينه قرّة العين

وعد الله والوعد أنَّ المهدي غالب
يِرد واترد شيعته في اعلى المراتب
او درب مرقد فاطمه تمليه المواكب
يضل بس مذهب علي ما تبقه المذاهب

شمسه تطلع عل الارض والشيعه
يم گبرها ايجددون البيعه
يا مهدي يامهدي يامهدي يامهدي
________________________________

باچر ايرد شاهر ذو الفقار الباتر
واحنه بيه انفاخِر رفعة الراس

نمشي او نرفع لافته مخطوطه او مُبينه
هل يوم ارض الله اشرقت من نورك ولينه
أيتام رد ألنه أبو يزعل لو بچينه
احنيّن ياخذنه ابشغف يم گبر الحنينه

اجروح ايام الهجر ننساها
لو نظرنه بسمته او شفناها
يا مهدي يامهدي يامهدي يامهدي
________________________________

باچر الكم بشرى يل خدمتو الزهره
لا دمع . لا حسره لا عتابات

ضلع فاطم ينجبر والدملج يشيله
او زراگ ابخد فاطمه مهدينه يزيله
لَمَن يعقد محكمه لاصحاب الرذيله
يحاسب كلمن دفع باب الله الجليله

عل مضالم وحده وحده ايحاكم
او يصلبه ابشجره السطر خد فاطم
يا مهدي يامهدي يامهدي يامهدي
________________________________

حكم الله او نازل سيفه ابد ميجامل
على راس القاتل او تفرح الآل

يا ويله الگايل ( وأن ) للزهره او ضلمها
دره مدري ما دره ابهل كلمه او حكمها
كلمه هيه الأسست للطف او هظمها
لحسين من عدها عطش . وعياله سگمها

احسين من عدها ابرمح ضل راسه
او چم امام اتگطعت انفاسه
يا مهدي يامهدي يامهدي يامهدي
________________________________

أله يرجع ثاره وگلبه تبرد ناره
او تبتسم أنصاره عگب الالام

على المنبر يرتقي والشيعه تسمعه
(صلى اللهُ )يبتدي او تنزل منه دمعه
ابصحن لحسين او لچن لامه الزهره ينعه
يگلها ثار الضلع واعدتچ ارجعه

او بدت من طف كربلا مشايه
لحد گبرچ رايه تسبق رايه
يا مهدي يامهدي يامهدي يامهدي
________________________________

حتمن ايرد النه وابعباته أيلمنه
احنه غيره اشعدنه هو الانفاس

حتمن ايرد او نشمه يا تراب اجدامه
يجي والمحزون چاين تنسعد أيامه
حتى طير الفوگ شجره تكتمل احلامه
او كلشي فوگ الگاع ينحني جدّامه

الله حاشا ما خلف ميعاده
هل أرض كاتب ترثها الساده
يا مهدي يامهدي يامهدي يامهدي
________________________________

ابو فاطمة الطائي

لميلاد سيدتي زينب سلام الله عليها

ابنور زينب اشرقت دنيانه
إنهني الزهره . او علي مولانه
يا هلا يا هلا يا هلا ابزينب
________________________

أجمل أبشاره الله زفها للميامين
يوم خمسه اجماد الاول كحلة العين
بيه ميلاد العقيله اخت الحسين
هل مثلها حاشا ربي خالق اثنين

الله حاسبها مثل قرآنه
چنها حوريه ابوصف انسانه
يا هلا يا هلا يا هلا ابزينب
________________________

اصطفت الاملاك كلها او سجدت الحور
من ضوه ارسوم العقيله تقتبس نور
اليوم كل طاهر ولاده الها مسرور
كعبة الأشراف زينب ام الخدور

الكوكب الدري وصف معناها
يسبحان المن طُهر سواها
يا هلا يا هلا يا هلا ابزينب
________________________

اشرقت لعيون فاطم باحلى مصباح
وابتهج بيت الرساله والعطر فاح
من عبق جنات عدنن بيها قداح
يجبر المكسور گلبه او يحيي الارواح

زينب او بيها السمه تتباها
بضعه للبضعه الهي انطاها
يا هلا يا هلا يا هلا ابزينب
________________________

اعيون ابو الحسنين بيها هل فرح بان
انولدت ابنيته الوجهه يمحي الاحزان
بل مهد متروسه هيبه چنها سلطان
سورة النور اوصوفها الأنس والجان

على صدره حيدره ضمّاها
او مثل شمته للورد شمّاها
يا هلا يا هلا يا هلا ابزينب
________________________

والحسن مسرور يمها رايح او راد
وابمهدها اشكثر خله ازهور ووراد
عيد ميلاد اخته عنده احلى الاعياد
ايصلي وايسلم عليها او يقره اوراد

يصد ليها ضاحكن مسرورا
چنها در امن العدن منثوره
يا هلا يا هلا يا هلا ابزينب
________________________

والحُسين ابسد مهدها ما رضه ايگوم
بيها فرحان او يسولف ويه النجوم
ايگلهن اجمل هاي منچن . واكمل ارسوم
اشلون فرحه اشلون بهجه عندي اليوم

هيه روحي والنظر واعيوني
هاي زينب بيها لتلوموني
يا هلا يا هلا يا هلا ابزينب
________________________

ابو فاطمة الطائي

لميلاد سيدتي زينب عليها السلام

يا هلا ياهلا خدر الله اشرق نوره
ياهلا ياهلا دنيانه بي مسروره
______________________

هلا بل نور العظيم الزاهر
هلا بل أسم الجليل الطاهر
زينب البيها غدينه انفاخر
يوم مولدها فرح وانساهر

نفرح انغني ابشغف
صوت يوصل للنجف
والحفل هاذه هتف

يا هلا يا هلا بالنعمة المبروره
ياهلا ياهلا دنيانه بي مسروره
______________________

خبر مولدها السماء اتذيعه
او صار اجمل عيد عند الشيعه
لو نبيع ارواحنه منبيعه
او غير زينب ما نحب . منطيعه

فخر بيت آل الرسول
زهره من غصن البتول
الها يوميه نگول

يا هلا يا هلا ارواح الچ منذوره
ياهلا ياهلا دنيانه بي مسروره
______________________

الورد والريحان يشتم بيها
والفراشات ابشِعِر تطريها
والبلابل صوتها ايناغيها
هلا يل مثل عسل طاريها

ابشارة الله للأمير
زينب العيد الچبير
هيه للزهره غدير

يا هلا ياهلا يل بلگلب محفوره
ياهلا ياهلا دنيانه بي مسروره
______________________

زينب امن الله العلي امودّايه
الله خصّه او كرّمه ابهل آيه
گلّه هاذي للعفاف امرايه
بيها نفسك يا علي امهنايه

صافيه او مثل الزلال
نسمه چنها امن الشمال
الوصف الها محال

يا هلا يا هلا چن عطر منثوره
ياهلا ياهلا دنيانه بي مسروره
______________________

يوم مولدها الملائك طارت
او عله بيت الزهره كلها اندارت
اتهلهل الحور ابمهدها او صارت
صافنه . ابهاذه البهاء احتارت

سبّحت رب الكريم
او نادت ابصوتن عظيم
هاي نفحه امن النعيم

يا هلا ياهلا چنها عدن وزهوره
ياهلا ياهلا دنيانه بي مسروره
______________________

بهجة الشيعه چبيره الليله
والحفل كلها ابشغف تمشيله
بسم زينب هل فرح ترتيله
غيرها من يسوه ليل احييله

سيدة كل الوجود
ابعيد مولدها اجود
بالگلب مو بالورود

يا هلا. ياهلا يا مركز المعموره
ياهلا ياهلا دنيانه بي مسروره
______________________

ابو فاطمة الطائي

هوسات لميلاد سيدتي زينب عليها السلام

1

يامن تنشد اعله العيد او عندك تايه احسابه
سؤالك عندي لا تعجب يومن تسمع اجوابه
صُبح الخامس امن اجماد عيد الباري واحزابه
واهلاله وي مولد زينب

2

لا مريم ولا بلقيس لا أم موسى لا هاجر
زينب والحچي مگطوع مثلها او لا خدر صاير
يوصفّها وحي المفروض ما يوصفها اي شاعر
چن مصحف يصعب تأويله

3

يوم انولدت الحوراء صارت بالسمه ضجه
لان بل مهد كلمن طاف محسوب ابالف حجه
الطريق امن السمه للگاع انترس والحور تترجه
بت حيدر خل ترضا اعلينه

4

هلا يامن نضل لولاچ محد للشرف يعرف
هلا يل هيبتچ تاريخ من عدها الفخر يغرف
امن اوصفچ نبي آنه ابهاي ما بالغ ولا اسرف
يا تاج الدين او نوماسه

5

زينب بيچ ضل محتار عگلي والفكر مرهق
زينب انتي التوحيد وانتي العدل وانتي الحق
ابميلادچ سكت هل كون بس ضل هيبتچ تنطق
واتضل تنطق حد الساعه

ابو فاطمة الطائي

ابو ذيات جديده لميلاد سيدتي زينب

ألي راي . او خصيمي. ... عنده رايه
اعله زينب . من أسولف .. عن درايه
الكوثر أمها . والأب ....... عنده رايه
انبياء الله خذت الها تحيه ...

مثل زينب دگلي .. منهي عدكم ؟؟
ولو نُص عُشر خصله .. منها عدكم
العقل يامن تضدها ... منهي عدكم
او عماكم الله دنيه او آخريه

الشرف من دون اسم زينب ... مناراه
على روس الخلگ ضلت .. مناراه
لأسمها اركع او أسجد ..... من آراه
واصلي اعليها كل صبح او مسيه ...

ابخامس من جماد الفرح ... هَل هَل
او جميع الساكن الجنات .... هَلهَل
يحاضر بل حفل شمتان ؟؟ ... هلهِل
اخت عباس هاي الهاشميه ...

باب النار ربي اليوم .... ساده
ابمولدها . علينه الفرح .. ساده
علويه . واهلها اشراف ... ساده
شمس واشرقت فوگ الرافضيه ...

ابو فاطمة الطائي

ردات للتشييع الرمزي للسيده الزهراء سلام الله عليها



شلنه نعشها او يا وسف صرنه يتامه
بضلوعنه ايعيش الكسر حد القيامه
والله والله
هيهات ننساه
لحد ما يرجع المهدي ابسلامه




ريحانة الهادي ابحقدهم ضيعوها
وبليل اضلم تندفن ما شيعوها
ماخلو آثار
لا گبر ينزار
حتى ابلحدها يا خلگ هم لوعوها




يل شايل النعش ام حسن هونك عليها
مكسور من عدها ضلع وامصوبيها
بالنعش واتنوح
ما تحمل آجروح
بهداي نزلوها اللحد هل هلله بيها



تشييع رمزي الفاطمه الليله نقيمه
وانصيح ماتت من المها والهظيمه
عصروها بالباب
صابوبها بصواب
لو چان بجبال الارض طاحت سقيمه




طاغوت عصره والجبت واهل السقيفه
رغمن عليها انشيع الزهره الشريفه
كل عام كل عام
نرفعها الاعلام
وانصيح ثارچ فاطمه لا ما نعيفه




انشيعها وانسيل الدمع واندگ صدرنه
وانشيل نعش الطاهره ام المحنه
رايات واشموع
واحزان وادموع
حدما يرد المنتظر هاذه دأبنه




ابو فاطمة الطائي