بسم الله الرحمن الرحيم
نضع بين يدي خدام الحسين عليه السلام ما وفقنا الله . وما تلطف علينا به آل محمد من تحضيرات لمحرم الحرام 1447
نسال الله القبول ونسالكم الدعاء

1 هلاليه

هل عاشور او ما هلّيت
يل غايب چا مـا ملّـيت
ياشمعة بيت اهل البيت
______________________

هل عاشور او دمعات اهلك دار اعليهن حول اجديد
هل عاشور او زينب لسا مچتوفه ابديوان ايزيد
اسنين اعجاف اهواي المرن وايتامك بس ماي اتريد
ارجع خلنه انذب الاسود او نعرف شنهو طعم العيد

ألف او اربعـ مية عام
عشناهن طف او الآم
لا حي واحدنه او لا ميت
ياشمعة بيت اهل البيت
______________________

هل اهلال اليوجع گلبك من فدوه الگلبك هل روح
چني بيك اتعاين رسمه واتفرفح مثل المذبوح
تنحب . كل عبره اتهد حيلك او فكرك يم التله ايروح
توگف يم زينب تسمعها امن اتصيح ابصوت المبحوح

ريض يل ذباح أشواي
بلكي الگاله طاسة ماي
حنت . وانت ازيد حنيت
ياشمعة بيت اهل البيت
______________________

من ذيچ الساعه او عاشورك ضل اوياك الهاذه اليوم
كلما شفت الماي ابعينك عينك تجري الدمعه ادموم
چن الحافر كاسر ضلعك انفاسك حسره او مالوم
تندب ليل الله او مصباحه ويلا يحسين المظلوم

لبچي اعليك انهار او ليل
يل ماخذ من عندي الحيل
من كثر الدمعات اعميت
ياشمعة بيت اهل البيت
______________________

اشما تنظر لهلال اتعله تتعلعل روحك واتذوب
يل ما بين اجروحك عايش لامن سلوه او لا محبوب
بس ذكرى الي تنخر چبدك او صورة جثمان المگلوب
او نسوان اعله المنحر طاحن هاي اتصيح او هاي اتلوب

طفله اتلوذ ابكتره اتخاف
اتغمض كلما مر سياف
اشگد الهل منظر ونيت
ياشمعة بيت اهل البيت
______________________

اجروحك بل طف ما ينحملن او لا بيهن فد وحده اتهون
ردن بيك اردود الليله ايخضرن واينشفن العيون
جرح احسين. او جرح الكافل .جسام .او اكبر . وام عون
كل امصيبه اتهز عرش الله چا گلبك يل مهدي اشلون

ما بين اضلوعك چن نار
ميطفيهن غير الثار
مانه ادري بيك انعليت
ياشمعة بيت اهل البيت
______________________

هل عاشور او صليت انت چا يمته اتهل يا مولاي
گوم الخاطر عين الزهره گوم او شرب احسينك ماي
گوم او داوي امتون الخدر اجروح البيهن حيل اهواي
گوم او لملم شمل الشيعه المن دونك ما عدهم راي

اغياب مر واتجرعناه
امروتك ها يا ثار الله
اتفرح الزهرا لو رديت
ياشمعة بيت اهل البيت
______________________

ابو فاطمة الطائي

2 الخدمه لمقدسه

روحي للخدمه نذر
عبدك آنه وافتخر
_______________

سيدي يبن الطهر
الك رخصت العمر
دمعتي او دگ الصدر
ابلا ثمن وابلا سِعر

عبدك آنه وافتخر
_______________

العمر دونك ما حله
ابخدمتك راسي اعتله
او حزت اعلى منزله
ابدنيتي او من انحِشر

عبدك آنه وافتخر
______________

يقرآن امن العشگ
احسين دونك احترگ
گلبي بسمك ضل يدگ

او من اتركك ينعِصر
عبدك آنه وافتخر
_______________

لا أبالغ لا غلو
خدمتك عز او علو
الحنضل البيها حلو
تجبر او ما تنكسر

عبدك آنه وافتخر
_______________

الك سلمت النفس
غير عطفك شلتمس ؟؟
باچر . اليوم . او أمس
اكتب ابحبك شعر

عبدك آنه وافتخر
_______________

يمن بيك الله انعرف
او تنطي للخادم شرف
المثلك ايتعب الوصف
يا ملاذ او يا ستر
عبدك آنه وافتخر
_______________

مجلسك نعمه او علي
ألي والربعي او هلي
او يومن الدمعه اتهلي
احس حزني ينتصر

عبدك آنه وافتخر
_______________

او ثوبي الاسود مفخره
ابدنيتي او بل آخره
القى بيه الطاهره
وينكشف عني العسر

عبدك آنه وافتخر
_______________

او لطمة ايدي عل ضلع
بيها گدري يرتفع
منها ذنبي ينگشع
او دفتر ابيض يسر

عبدك آنه وافتخر
_______________

او دمعتي اعليك ابوجل
ربّنا عز وجل
ايجيبها ابوزن الجبل
لنها لجلك تنهمر

عبدك آنه وافتخر
_______________

ابو فاطمة الطائي

3 الليلة الثانيه وصول الضعن

هل هاذه طف كربلا خويه يراعي العلم ؟
بس وصلت العايله گلبي انعصر بل ألم
چن هل وطن مو زين
وجهه انخطف الحسين . خويه يراعي العلم
________________________________

هل ضعن چن سرب الگطا . او سرب الگطا . اترف ابحزن جنحانه
ما ضل وطن الهم رحب . والمنكتب . بس الحزن والوانه

أهل بيت الله والصفا او زمزم
أمشردين أمسو مُـهدرين الدم
هيچ الدهر غدراته

حطو بارض نينوى او نصبو خيم للخدر
او زينب گلبها انخمش صاحت يربي الستر
مشبوحه منها العين
وجهه انخطف الحسين . خويه يراعي العلم
________________________________

أول مسيه ابكربلا والعايله. العين الكفيل اتناظر
بعيونهم كثرت حچي . ما ينحچي . عن باچر او عل عاشر

زينب العباس. اتگله حاچيني
نيتك شنهي يا نظر عيني
طمن دليلي الشاجر

يا غيرة الله او علي أسمع ونين الگلب
انت اكفلت محملي. لا لا تردني الغرب
بس تمشي يلفي البين
وجهه انخطف الحسين . خويه يراعي العلم
________________________________

همي ثگل يا كافلي اسمع ألي. وياك چم احچايه
كل الأريده انضل سوه . في نينوه. سيفك وانه والرايه

او لو نويت العين سهم يطفيها
عيني طفها اوياك لا تخليها
انطيني چلمه ابهايه

اعيونك أذا ينطفن بعيوني ميضل ضوه
خلهن أذن ينعمن او عل شاطي نوگع سوه
چا شلي بل عينين
وجهه انخطف الحسين . خويه يراعي العلم
________________________________

اسكينه لو ليك اشتكت. ماي اطلبت. او گالت يعم عطشانه
وياك أروحن للنهر. اي يل گمر. احمل جربتك آنه

او گبل گطع ايديك أيميني ارفعها
بلكي لن يخطيك و ايدي يگطعها
او من السبي خلصانه

خل تنگطع يل گمر. او عمري يخلصه النزف
خل تنگطع يل گمر. اهون ولا تنچتف
فدوه الك اليدين.
وجهه انخطف الحسين . خويه يراعي العلم
________________________________

الطف كربلا انت الگلت واتكفلت . او گلت الخدر بعيوني
لو انت ليه اتضل عدل . لو انچتل او عل مشرعه ايدفنوني

عني من اتروح أشيضل ليه
يعني هل جيمان تنچفي اعليه
او بل العايله ايحيروني

حرمه آنه وامخدره مابيه احمي الحرم
او لابيه اداوي اليگع او لا بيه. اطفي الخيم
المثلك اجيبه امنين
وجهه انخطف الحسين . خويه يراعي العلم
________________________________

انطيتني كلمه او وعد . واعله العهد . يابو الفضل جاوبني
انت الجبتتي امجلله . وامدلله . ياهو الهلي ايرجعني

خل اسولفلك لا تضل سكته
اويه الشمر ممشاي من تروح انت
وابسوطه ايلوعني

العاشر گبل لا يجي سويلي چاره او فرج
گلبي تراه ايغلي. او ماعندي ضلت مهج
وين آنه والطف وين
وجهه انخطف الحسين . خويه يراعي العلم
________________________________

ابو فاطمة الطائي

4 العباس والحسين

أنا الصمصام أنا الضيغم انا العباس المشّيم
ألك يحسين أوفي الدين
_________

أنا المذخور من حيدر
انا الحماي .. انا الوفاي
انا المعروف موت احمر

كلام انطيت من الذر
برض الطفوف اسوي اخسوف
أذل الشاطي والعسكر

أريد احسين بس يأمر
أشوّف الناس .. منو العباس
العلى سيفه الارض تفتر

على السبعين الف واكثر
أدوس الروس ... اقبض انفوس
واقيم ابكربلا المحشر

الما يعرفني خل ينشد واليعرفني خل يشرد
يروح الوين !! أوفي الدين
_________

جمر بعيوني يتلاهب
ينور العين .. ردت يحسين
رخصه او كلشي ما طالب

وحگ گدر ابن ابي طالب
دليلي ابنار .. اريد الثار
گلي اتوكل او حارب

انزل چن شُهب ثاقب
ادور الحيد .. ابرجال ايزيد
واسحگ فوگ الأشوارب

امن أروايهم وجه غاضب
سكارى اتصير .. اتمنى اتطير
اشجعهم يضل شاحب

لخلي كربلا ترعد .. الميت يگعد او يشرد
على الصوبين أوفي الدين
_________

يگله يا ( بِـروحي انته )
يبو النوماس .. كفو عباس
يا نعم الأخو شفته

وجهك يل گمر ردته
يضل وياي .. ضوه الدنياي
يحزامي . او فخر اخته

دليلي تدري لو عفته
يضل مهموم ... يون مالوم
او ظهري ينكسر سكته

سيف او روحي ذاخرته
امن اگلك روح تروح الروح
او گلبي اتصوّبه علته

انته أحزامي والعسكر من تمشي الگلب ينطر
يماي العين. أوفي الدين
_________

اگبال احسين دك صدره
او يهز السيف .. يگله حيف
أشوف ابعينك العبره

يبن الطاهره الزهره
فداك العين .. والف چفين
واخيك فدوه الك نحره

اشوف اعيالي مصفرّه
تريد الماي .. وانا السگاي
وخلص من الگلب صبره

جربتي او سيفي منتظره
وكتهن حان ..مثل اذآن
فرض والموت حل امره

زرع هالروس گدامي . دخل يحصدها صمصامي
اگوم الحين أوفي الدين
_________

أحامي ابسيفي عن ديني
اوفي اديون .. اقر اعيون
أقر عينك يضي عيني

امن اسل بتاري بيميني
اصيح ابصوت .. اخوف الموت
آنه العباس تدريني

أنا الأمي تكنيني
گمر عدنان .. أسد ميدان
يا فگره اليلاگيني
انا المو ماي يرويني
اريد ارواح . او طعن برماح
او هل عسكر ميكفيني

شني السبعين الف جندي .. يگضون امن اريد ابدي
ردت ضعفين أوفي الدين
_________

يصل . يا حيد . يا بلسم
يمثله اهواي . . ردت وياي
او بيهم آنه اتحزم

حگ الخوه منك تم
او عبرت احدود . . يزود الزود
الف مشكور يموزم

لچن بعدك لفاني الهم
سگوني اسيوف .. يريت اتشوف
من نحري يسيل الدم

متت عطشان واتالم
عگب يمناك .. او هذاك الواك
اسلبوني او صبحت مغنم

عگبك يا گمر هاشم .. مني او لا كتر سالم
الچبد نصين. أوفي الدين
_________

ابو فاطمة الطائي

5 العباس عليه السلام

يابو الفضل مال الحِمل
اگعد لاخيتك مو وكت نوم
تدري ابوجهه مابقه ارسوم
يابو الفضل يابو الفضل
_______________________

يا غيرة الله او نخوته او بيرغ فخر كل هاشم
زينب توديلك عتب والدمع عل خد ساجم
مو وكت نومك يل گمر عايفني ليش او نايم
مو گتلي آنه اتكفلچ والضعن يرجع سالم

ونيت .. حنيت .. وادموع هليت

ليش ابعدت يل واعدت
مو تدري زينب دونك تضيع
اهنا يل عفتني ابلايه توديع
يابو الفضل يابو الفضل
_______________________

فص عيني ذاب امن البچي بين الخيم والتله
من كثر ما اوگف وگع بضلوعي صارت خله
لخواني محنيه اركضت او كل هاشمي الأوصله
الگاه نايم عل وجه ميت وانا اتوسله

ناديت . مليت .. اولا صوت سمعيت

محد ألي يا كافلي
خواني محد رد الاجواب
كلمن توسد فوگ الاتراب
يابو الفضل يابو الفضل
_______________________

اگعد واگلب بل جثث وابچي او تطيح اعيوني
امسح ارسومي امن الترب وانشدهم اعرفتوني ؟؟
صح بيّه دخان الخيم بس هاكم اشتموني
بچفوفي ريحة كافلي معقوله تيهتوني

يا حيف. يا حيف تنسون ياحيف

محد سمع او زاد الوجع
وابهاذه حالي او هاي الالام
لن سوط طگني او حز بالعظام
يابو الفضل يابو الفضل
_______________________

گلت انعه بلچن عل نعي ايگعدون ألي خواني
أيسمعوني او واحد يرد ايحاميني من عدواني
ما گعد اخ او لا ولد بس الشمر هل جاني
بچاني گلي هل نعي لحسين لو للثاني ؟؟

ابچيه ... انعيه .. عباس أنسيه

شبعي بچي لا مايجي
تدرين وجهه الچنه قرآن
حرمله سوه اعيونه نيشان
يابو الفضل يابو الفضل
_______________________

عباس آنه ابعازتك اشلون اگعدك گلي ؟
بس كون ساعه تنتهض يابو الفضل تنظرلي
طحت ابزلم ما تستحي وآنه استحي من ضلي
آنه اترس الجربه دمع والماي خله ايولي

امن النوم .. بس گوم .. بحماك هاليوم

گلبي انشلع ضيم او وجع
حِفاي نركض والجمر حار
ابطارف عباتي اطفي النار
يابو الفضل يابو الفضل
_______________________

عباس أئيس ماترد ؟ مامش بعد كل ضِنّه
ماگعدك ذاك النعي او صوت البچي والونه
يابعد عيني شوفتك نام ابرغد واتهنه
من بعد وجهك يا گمر بس الله اليضل النه

وفيت .. كفيت .. وانچان ما جيت

ما قصرت واتوذرت
موت انت . وآنه ابقه أنظام
كل يوم أليه موته بل شام
يابو الفضل يابو الفضل
_______________________

ابو فاطمة الطائي

6 السيده رقيه عليها السلام

التتنفس أنفاسه ..
مشتاگه لأحساسه ..
ماتت على راسه ...
_________________

آ يا رقيه او يا جزع .. بيها الگلب شايل .. حيث الظهر مايل
ذاك الوجه ذابل يعگوب چنها او ينتظر
_________________

أمست عباره عن جرح. .. تتنفس الحسره ... مخنوگه بالعبره
چن فاطمه الزهره نفس الالم نفس الكسر
_________________

امن الشام جت الكربلا تنعه نعي الثكله ... او يل والد اتگله
ما خلصت المهله يل خلصت مني الصبر
_________________

من الخرابه اشضل بعد يمته ابحلم ترجع واتنشف المدمع
من حضنك ارد اشبع وانسولف اوياك اشكثر
_________________

اسوالف محنه مو عتب . مااحچي بجروحي . او چويه الخذت روحي .. او لا عل هزل نوحي مو خاف گلبك ينكسر

_________________

ما راح اگلك حرمله .. شمسوي بآذآني .. واشكثر بچاني
او لون الدمه القاني ابخديني من ضل ينتثر.

_________________

بس چلمه وحده ابخاطري .. يا بابا تعبانه .. للموت ولهانه
خل دفنتي اهنانه ارد اغفه وارتاح ابگبر

_________________

عجل لي بطيوفك أبه .. اسرع لي بل جيه .. مو جايبه أميه
لارياجك اشويه ادريك ضامي او تستعر
_________________

تشرب اريدك من أدي .. او لتعاين المعصم .. واتشوفه اتورم
يابويه تتألم او ترفض الماي او تنعصر

_________________

ابو فاطمة الطائي

7. الانصار

أنصارك الكرام
معجزة الغرام
هيبه او مراجل وفه او عز شهامه
اعليهم من الله صلاواته او سلامه
___________________________

انصار اعلنو بيعه غالي احسين منبيعه
دونه ارگابنه اتهون

لارض الطف تعنينه حب او شوگ يحدينه
والحب يعني اجنون

نحن فداء السيد المبجّل
من فيه دين المصطفى تكمّل
وبالدما اقوالنا تسجّل
سبعين قتله دونه نقتّل

احنه اله عبيد
عن دربه مانحيد
العاف الحسين أذن عاف الكرامه
اعليهم من الله صلاواته او سلامه
___________________________

واحد واحد ايگله الموت امن الشهد احله
دونك يبن الاطهار

آمر . شوفنه اشبينه على الكلفات هد بينه
أحنه الموت والنار

نحن لها فالتبلغ التراقِ
اليوم يوم الكر والتلاقي
للسيف انا نعشق العناق
الى المنايا نستبق سباق

ارخصنا خل نروح
يا بلسم الجروح
الما جايب احزام تحزم بل عمامه
اعليهم من الله صلاواته او سلامه
___________________________

گام الشيخ الموقر حبيب الطاهر الاطهر
چنه قطعه من نور

امحزم شادله اعصابه چبير او شيخ اصحابه
يحچي او حچيه مبرور

حسين يبن السادة الكرام
يشكو أليك ضامئا حسامي
أئذن لنه ارجوك يا امامي
ليرتوي من هامة اللئام

خل نسحگ الرؤوس
وتزهق. النفوس
واتصير الاطفوف مثل يوم القيامه
اعليهم من الله صلاواته او سلامه
___________________________

او عابس عاقد النيه. يريد ايسولف اشويه
أرجوزة شعر گال

بلياك العمر ذله. الموته بس الك تحله
يتاج الدنيا واعگال

حب الحسين أصابني بجنه
فصرت اهوى دونه الأسنه
أحسبها شهد بطعم الجنه
ألأنس تحسدني بها والجنه

وابصوته الحنين
جنني الحسين
عطر المسچ فاح يعابس من كلامه
اعليهم من الله صلاواته او سلامه
___________________________

او جون المخلص الوافي يحچي بل حچي الوافي
وي احسين مولاه

يخيمه الـ لمت اسنيني. يل تجري ابشراييني
ضايع عمري لولاه

يا صاحب الموهبة السنيه
انا غلام ليس لي هويه
وان لي يا سيدي أمنيه
دمي يخالط دمك الزكيه

گبلك انا اطيح
من الگفا ذبيح
يمسح بل دموع وأيده اعله حسامه
اعليهم من الله صلاواته او سلامه
___________________________

أشاوس واهجمو كلهم سبعين او نعم منهم
سوو للي ما صار

خلو كربلا ترجف الشط يابس او ينزف
نار او ريح واعصار

وسط الرقاب سيفهم تردد
هم كبروا وخصمهم تشهد
في كربلاء ذكرهم تخلد
كما الصلاة للنبي محمد

ملحمة الوفاء
خطوها بالدماء
وفو للحسين . وفو حگ الإمامه
اعليهم من الله صلاواته او سلامه
___________________________

ابو فاطمة الطائي

8 العليله

ويلي اعليها ويلي اعليها
بل هم ضلت ويلي اعليها
ضلت بل دار الوحدها ... معلوله او دمعتها ابخدها
ويلي اعليها
___________________________________

أعليله او بيها الموت اينازع او تطحنها أرحي الايام
نبعة ريحان او ذبلانه حگها اتموت او ما تنلام
الما يتفارگ نص اسويعه ما شايفته صار أيام
رايح عنها احسين او زينب الله الله اشلون آلآم

يا حسرتها يا حسرتها
راح الوالد يا حسرتها
غير العبره ما ضل عدها ... معلوله او دمعتها ابخدها
ويلي اعليها
___________________________________

من العين أنشلعو كلهم واهون لو مشلوعه العين
الچانت متفارگ ضحكتها واتنام اعله اردان احسين
أصبح بس الون سلوتها او تغفه اعله ادروب المجفين
تنشد حتى الطير الطاير ما شفت اضعون الطيبين

يمته ايجوني يمته ايجوني
شيب گلبي يمته ايجوني
چن ثگله امگطع واحدها ... معلوله او دمعتها ابخدها
ويلي اعليها
___________________________________

أگضي الليل اشبگ بثيابه واشتمهن وامسح العيون
أدعي او ما اطلب عافيتي . اطلب من الله ايرجعون
خاف الطف ما بيه أميه خاف اهلي اهناك ايعطشون
رضعان او ياهم ما تصبر اشلون ابگلب احسين اشلون

منهو ايعينه منهو ايعينه
لو رادو مي منهو ايعينه
اتسولف للروح او تنشدها ... معلوله او دمعتها ابخدها
ويلي اعليها
___________________________________

لا رد . لا طارش من عنده يوصل ويسولفلي اشبيه
احنين عني ما يتعطل او يدري ابدلالي امتانيه
خافن طاح ابنص عدوانه والوادم بالطف توليه
هاذه يطعنه او ذاك ايرفسه لا ياربي اسم الله اعليه

ادخيلك ربي ادخيلك ربي
من الطف ادخيلك ربي
حسباتي الروحي تمردها ... معلوله او دمعتها ابخدها
ويلي اعليها
___________________________________

مو بطباعه ايعوف ابنيته حتمن بل طف شي مو زين
حتمن طاح او سهم امثلث من چبده امصوب ثلثين
او عشره اخيول اتدوس ابصدره واضلوعه انطشن صوبين
او عمتي او خياتي ابهل چوله مايدرن يرحن لا وين

لا ضل خيمه لا ضل خيمه
لا ضل والي او لا ضل خيمه
والتشرد بالسوط ايردها .... معلوله او دمعتها ابخدها
ويلي اعليها
___________________________________

ما يرجع يا روحي الرايح من الوالد گطعي الياس
لو حي چا ودالچ الاكبر لو دزلچ عمي العباس
ماتو كلهم والما ماتن عل نوگ امشيبات الراس
عگب العز مسبيات امسن اعليهن تتفرج هل ناس

يا رب تطلع. يارب تطلع
روحي الساعه يارب تطلع
خل تطلع تلحگ والدها ... معلوله او دمعتها ابخدها
ويلي اعليها
___________________________________

ابو فاطمة الطائي

9. مسلم بن عقيل عليه السلام

راعي الوفه والمعرفه
مسلم رساله اومعرفه او دين
أول فدائــي الثـورة احســين
راعي الوفه راعي الوفه
_________________________

مو كافي أذا نبچيله دم وانموت من الحسره
مسلم او يا نعم الوفي يمحي الكبائر ذكره
بايع الروح ابكل شرف والي اشترتها الزهره
من عدها واصبح كل نبي يتمنه يوصل گدره

عالي الگدر ما ينكسر
مسلم تعلى بل حياتين
أول فدائــي الثـورة احســين
راعي الوفه راعي الوفه
_________________________

ترست الكوفه هيبته او مثل الوحي چلماته
سيفه او لسانه اتشابهن او باثنينهن صولاته
بسم الحسين امن ايحچي او بسم الوصي حملاته
أدى الامانه والفرض والقى الحجج وآياته

لاكن ضغت واتكبرت
واگباله صارو چن شياطين
أول فدائــي الثـورة احســين
راعي الوفه راعي الوفه
_________________________

اوجوه الي عصرت فاطمه ردت نفسها اگباله
بسيوف وارماح او سهم والآف من خياله
كل ضنهم ايهاب الجمع يهوى او يطيح اعگاله
مادرو مسلم بالحرب چن حيدر او افعاله

ثابت گلب. وكت الحرب
چن جبل راسخ حاشه ميلين
مسلم رساله اومعرفه او دين
أول فدائــي الثـورة احســين
راعي الوفه راعي الوفه
_________________________

اصفوف او كتايب گصدته سيل او أجت گدامه
او مسلم الشبل الهاشمي بيده رصف صمصامه
الهامات لو يم النجم هو اعلى من كل هامه
ذكرهم ابضربة علي والعامري او أيامه

الكل انخرس مامش نفس
خلاها تبچي اهناك صوبين
أول فدائــي الثـورة احســين
راعي الوفه راعي الوفه
_________________________

ميطيح مسلم أيسو اويفنيهم الآخرهم
غدروه كما غدرو علي وادم غدر شيمتهم
ويلي عليه طاح الهظم او يمه اعتلت ضحكتهم
أباله اجت العايله الساده اويه علويتهم

أحنه الضلع هل الدمع
منهو اليخبر احسين هل حين
أول فدائــي الثـورة احســين
راعي الوفه راعي الوفه
_________________________

تالي وسافه للغدر أمگيد خذوه عدوانه
بعيونه حسره او يلتفت ما يمه من خوانه
اتالم على احسين او عرف يرحن سبي نسوانه
سلم علي من البعد او گال العذر مولانه

اتمنيت اضل اويه بو الفضل
انسوي الملاحم عل فراتين
أول فدائــي الثـورة احســين
راعي الوفه راعي الوفه
_________________________

ابو فاطمة الطائي

10 أم البنين عليها السلام

أمن المدينه الكربلا اجروحي
الغاضريــه اشخلــت ابروحي
گَطّعت دلالي ..... خَذت وين الغالي
حسيناه حسيناه
___________________________________

من يوم الضعنهم عني رايح
اعيوني اعيون ميت توه طايح
مو تشبح العين ابطلعة الروح ؟
فص عيني ابرحيل احسين شابح

عيوني ..
تغفه اسويعه ما تقبل
أتِذِكره ابوجهه تتأمل

دمعها ..
كل قطره التهل تنشد
يمته ابن الزچيه ايرد
شگلها ؟؟

چانت اسنين العمر خضره
فارگوني واصبحت صحره
مرمرت احوالي ..... خَذت وين الغالي
حسيناه حسيناه
___________________________________

اجروح الگلب ياناس تنزر
بس جرحي انه كل يوم يكبر
طبيبه احسين واحسيني بل اطفوف
راح الكربلا او عني تأخر

حبيبي
اعليّه ما دره اشسادي
صرنه كلمن ابوادي

أريده
كلشي ما ردت دونه
عمري او وِلدي يفدوه
عبيده

مَن يجيني او جايب ابشاره ؟
أنوي عنّه الفاطمه ازياره
منسحن دلالي ..... خَذت وين الغالي
حسيناه حسيناه
___________________________________

وحگ الي تصيح أحاه يضلعي
اتوضا ابدمعتي او أگعد ادعي
موش ابني . لچنه اغله امن الاولاد
خلصت النواعي او بعد شنعي

دعائي
من عمري على عمره
ادخيلك تجبر ابكسره

أصيحن
ربي ابعينك اتحفظه
لا خيل العده اترضه
يروحن

نوحي او ضنوني موتن حيلي
حسباتي تگعد من يِجن ليلي
دمعي دم ايلالي ..... خَذت وين الغالي
حسيناه حسيناه
___________________________________

من ارض المدينه اجروحي تبدي
يوجعني الگلب وايصيح وِلدي
مو خوفن عليهم. خافن ايموتون
خاف احسين يبقه ابلايه جندي

اخافن
يناديهم واهم موته
لحد ما ينجرح صوته

ايتحسر
يدورهم يعاتبهم
يريد أُميه من عدهم
تمرمر

يحني ظهره او يلتوي عوده
لأن أخيه صوبو جوده
والگمر ميلالي ..... خَذت وين الغالي
حسيناه حسيناه
___________________________________

يا طف كربله شمسوي عمله
ياهو الي أعوفه ياهو اهم له
گالو حرمله يتربص اهناك
الكل من الاحبهم بيده نبله

نباله
ما ترحم ولا تغلط
تذبح حتى المگمط

عجيبه
ثلثين الچبد تمرد
وابفص النظر تگعد
مصيبه

خافنها غفله تاخذ انفاسه
واتشوفه زينب ينگطع راسه
تصبح ابلا والي. ..... خَذت وين الغالي
حسيناه حسيناه
___________________________________

هيهات الجروح البيّه تبره
لا تِسله ابنعاوي او لا ابعبره
هاذه اسمي تبدل بام الاونين
ياحسرة التخلص تبدي الاخرى

ونيني
حدما ينختم عمري
وانوب ابتدي ابگبري

ييمه
حتى ابساحة المحشر
من وني فلا افتر
يهظمه

يل مصاب ايشابه امصابه
يا الم گلبي او حزنه واصوابه
ياجرح للتالي ..... خَذت وين الغالي
حسيناه حسيناه
___________________________________

ابو فاطمة الطائي

11 كذلك الليلة الاولى

الدّموعُ سَرمدْ بالمِحجرَين
عَهدُنا تَجَدّدْ مع الحُسين
________________________

العهد ويه احسين باقي ما بقت ارض او سماء
عهد منعوف ابو اليمه . اعليه بصمنه بل دماء
كل صبح عاشور عدنه . كل أرض كربلاء

اعلينه شاهد الله وام البنين
عَهدُنا تَجَدّدْ مع الحُسين
________________________

أحنه غير أحسين شلنه من نضيّعه احنه نضيع
الدنيا بعناها اعله موده او دمعه وحده ما نبيع
ابلا شرف هاي المدامع يغدي واحدنه وضيع

هل خدامه ألنه دُنيا وَ دين
عَهدُنا تَجَدّدْ مع الحُسين
________________________

تستعر لحسين بينه جمره من عدها نلوع
او يا دمعنه اعليه غالي يختلف عن الدموع
موش من العين يوگع ينشلع من الضلوع

الهل سبب تخلد طول السنين
عَهدُنا تَجَدّدْ مع الحُسين
________________________

من يهل عاشور نركض عل عزاء امفرعين
مثل حال امه الزچيه اندور الحن والانين
قاري اليوجع گلبنه بل نعاوي اندوره وين

والدمع عله الخد بي كاتبين
عَهدُنا تَجَدّدْ مع الحُسين
________________________

اتسافر اويه اهلاله روحي والمشاعر للطفوف
چني أشوف احسين وحده دارت اعليه الالوف
أمن العطش يا ويل گلبي بعد ما يگدر يشوف

يقسم ابمحمد يا مسلمين
عَهدُنا تَجَدّدْ مع الحُسين
________________________

والشمر بيده يذبحه اگبال زينب من گفاه
اترافس اجدام ابو اليمه او زينب اترافس معاه
هل ذبح بحسين لاكن الوجع بيها تراه

يانهار الاسود عل طاهرين
عَهدُنا تَجَدّدْ مع الحُسين
________________________

شنسه من طف النوايب شذكر ايطول الكلام
عطش . واسياط . او يتامه . او نار شبت بل خيام
او زينب العگب ابو فاضل تدخل اقصور اللئام

والدرب يُمهّد للناظرين
عَهدُنا تَجَدّدْ مع الحُسين
________________________

ابو فاطمة الطائي

12 الانصار سلام الله عليهم

نِنعه أنصار الحسين الماكو منهم .
آيه آيه او كربلا مصحف تلمهم .
بل سماء العاليه اتخلـد ذكرهـم .
____________________________

يا من اعليهم تهل حُمُر المدامع
ما نريد انهيج اعليك المواجع
لاجن انواسيك ردنه عل فواجع
او نبچي مثلك يومن ابروحك تنازع

يبو اليمه النوح متوجب علينه
او ما نوفي احگوگهم مهما بچينه
اعرفو گدرك وارتفع عالي گدرهم
____________________________

هم _ رجالَُ صدقوا _ ويه الزچيه
او مشو چن زفة عرس صوب المنيه
هوسو هوسة روافض حيدريه
والله يا زينب فلا تمشي سبيه

احنه طلگنه النسه او عفنه المنازل
جينه نفدي ارواحنه الهاي المحامل
من اغناضو يرتجف حتى علمهم
____________________________

اعليهم ايحگ الدمع دم ايتجاره
للوفاء ابكربلا صارو مناره
هُم _ رجالَُ لا تلهّيهم تجاره _
الفرد منهم بس الحسين اختياره

شايب البيهم بل اعمامه ايتحزم
يغلي دمه للحرب يمته ايتقدم
للمنايه اتلهفو شوگ ابگلبهم
____________________________

واحد الواحد مشو صوب العساچر
مسلم او نافع . زهير. او ابن ظاهر
ابدم مناحرهم يقدسون الشعائر
او دون خيمة زينب انطوها المناحر

چن شموس او غربت وكت المسيه
او ضلت الحسره عگبهم سرمديه
نذرو الارواح هل وفو نذرهم
____________________________

حر قلبي من هوو فوگ الترايب
گلبك اعليهم غده باحزانه ذايب
اتنادي اعليهم لچن محد يجاوب
ليش عفوتني وحيد ابهل مصايب

گومو من نومتكم او ردو عليه
اجروحي كثرن والشمر ما خله بيه
وحدي ايخلوني ربعي مو طبعهم
____________________________

يا مصيبة كربلا والله مصيبه
مدري ابچه عله الانصار النجيبه
مدري ابچي الجثتك ضلت سليبه
لو انوح الزينب الصارت غريبه

لاكو انصار البقو لا عدها والي
يا هظيمه اعله الدمع مو چان غالي
راحو او عنها انگطع وسفه خبرهم
____________________________

ابو فاطمة الطائي

13 للعباس

وجهك أمان اخيامي
صوتك يروّي الضامي
عباس اريدك لا تمشي عباس اريدك
ارحم دليلي .. وني وعويلي
______

يواحد انت بس واحد سلف يسوه
أمان الدنيا كلها اعيونك الحلوه
يمن روحي اوعيوني اوگلبي الك فدوه
عوف الماي آنه ابشوفتك أروه

غيرك يكافل مالي
لا لا تمرمر حالي
تكسر جناحي من تبعد تكسر جناحي
ويموته حيلي .. وني وعويلي
______

العطش خويه أحمله لو جزه اعليه
بس گلي اروحن وين من تتأخر اشويه
اذا سبعين الف ملعون كلها اتحلفت بيه
اذا سمعو مشه العباس زينب بعد مسبيه

يابو الفضل لو جوني
او ضربوني او شتموني
ألمن أحشم يا خويه. المن احشم
منهو اليجبلي .. .. وني وعويلي
______

يستر الله اعله زينب والحرم كلها
الگلب شيب او بعد الطف عله اولها
عدل بعدك وانا اجدامي الرعب شلها
شگل للروحي من تمشي شگللها

او تدري يطب اجروحي
مو روحي انت ابروحي
عباس اضيعن لو رحت عباس اضيعن
اي يا كفيلي .. وني وعويلي
______

بعد وكت الرحيل او شوغة اجروحي
مستعجل عليمن يا بعد روحي
جِربتك من شلتها ما بطل نوحي
يچن اتگلي روحي للسبي روحي

أنسي الگمر وايامه
عيشي السبي والآمه
للكوفه روحي اميسره للكوفه روحي
والدمعه سيلي .. وني وعويلي
______

بعد وكت السبي والركضه فوگ التل
اوحرگة گلبي خويه او لوعة المقتل
گبل متروح دليني الدرب مندل
افر لا وين لو ليه الشمر أقبل

واشلون احامي امتوني
لو گامو ايضربوني
واشلون اطفي اليحترگ. اشلون اطفي
من يعتنيلي .. وني وعويلي
______

اذا ناوي النهر هل ساعه تگصدله
خل بالك على اعيونك من النبله
اخاف اتريد باچر دمعه بالمقله
من تشوف زينب راچبه الهزله

من تنظر اعله اضعوني
اعرف غصب گادوني
للشام اروحن من عگبك للشام اروحن
امن الطف رحيلي. .. وني وعويلي
______

ابو فاطمة الطائي

14. الاكبر عليه السلام

مـقتـلك من گـبله مـقتـل
ابوقته روحك انت عالتل
الأكبـر اتعــايـن له يـقُـتـل
يِنطعـن . وانت التفـرفـح
يا حسين ....... يا حسين
___________________

أيعينك الله ابهاي المصيبه الفوگ الخيال
اتشاهد ملاكك القُدسيّ الاطهر بين النبال
كِثرن جروحه او عطشانه روحه _أُميّه گال_

أجاك أمن العطش واضلوعه تتلوّه
گوه ينسمع من يحچي بل گوه
ما عندي طلب گبل الاجل يحسين
شِربة ماي رايد بيها اتروه

أيسولف او دمعاتك اتخر
عينك اعله جروحه تنظر
گتله تعذر؟ گال اعذر
ينطعن . وانت التفرفح
يا حسين ....... يا حسين
___________________

يا مهجه تِحمل هاي المواجع دلّوني وين
مابي يسولف ايأشر أشاره عل شفتين
أحسين انهظمله . احتار اشيگله . يصفگ أدين

يگله لا تِون ونّك يمرمرني
اوگبل الموت چن رايح تموتني
تعال اخذ العيون اعصرها برياجك
بلكت لو برد ريجك تكلمني

واحد الواحد تقدّم
للوداع . او ناحو ابدم
يعلم الله اشگد تألم
يِنطعـن . وانت التفـرفـح
يا حسين ....... يا حسين
___________________

امشابگ تلاگو أحسين اوعزيزه كلمن يلوع
طاحو يويلي آ يا بچيهم يحني الضلوع
حان التجافي او مامش تلاقي او لامن رجوع

يويلي اومن طلع للحومه يتمشه
ضل احسين كل ساعه عليه يُغشه
يگعد وابلهفته يركض ايدوره
يلگه ارماح واسيوف العده اتنهشه

او يسمع اصوات اتردد
مات الي شابه محمد
عل ترب طاح او توسد
يِنطعـن . وانت التفـرفـح
يا حسين ....... يا حسين
___________________

آ يا ركظته ابذيچ المعاره متخلي حيل
بچه الملائك بچه الخلايق جيل اعله جيل
اعله اوليده طايح وياه تمدد مثل القتيل

طول ابطول متمدد مع أوليده
شاله امن الارض خلاه على أيده
يمسح بالتراب الي عله اجروحه
يشم خده او يصيح العمر ماريده

وابعلو صوته ينادي
يبني قطعت فؤادي
انت كل عمري ومرادي
يِنطعـن . وانت التفـرفـح
يا حسين ....... يا حسين
___________________

كفكف دموعه او لازم ضلوعه بالگوه گام
أوليده شاله او چن المسافه الحد الخيام
صارت كأنها. سبعين عاما كلهن ظلام

جابه والحرم كلهن تلگنه
ليلى اتگول هاذه مو علي چنه
أوليدي ضل عدل واعدني ميموت
لحد ما موت آنه او يحضر الدفنه

گالها او گلبه تفسر
الواعدچ ضامي تطبر
نوحي نوحي مات الاكبر
يِنطعـن . وانت التفـرفـح
يا حسين ....... يا حسين
___________________

ليلى اتّفكر لعيون الاكبر واتگله ليش
يبني عفتني . هو آنه دونك. اگدر اعيش
گلي ييمه گلبي الجرحته يتداوه بيش

يحلو الطول أمّك آنه حاچيني
خذك مني زماني او زيد اونيني
يوليدي اموتن لك سبع موتتات
بس افتحها عينك يابعد عيني

ريت من عمري اعله عمرك
او كون نحري ابدال نحرك
أمنيه . واتوسد ابكترك
يِنطعـن . وانت التفـرفـح
يا حسين ....... يا حسين
__________________

ابو فاطمة الطائي

15. الخدمة المقدسه

يا سيدي او أمامي
بس خدمتك غرامي
غيرك فلا أريده بس انت بالروح
_______________________________

يل بل گلب تربّع
ويّه الدمه توزّع
منّه النظر مَيشبع هوَيته هوَيته

انت الأماني وانت
انت العمر مِلكـته
حُبّك شهد رِشفته هوَيته هوَيته

مالي غيرك بالحياة او بالممات
يلّي منّ أمّي أحنّ أعليّه
مالي غير المدمع او هاذه العويل
والتنجّي رگبتي اللطميه

يل خدمتك تجاره
ما تحتمل خساره
غيرك فلا أريده بس انت بالروح
_______________________________

منّ الزغر هويتك
وسط المهد بچيتك
عفت الخلگ واجيتك اريدك اريدك

جيتك بلا معالم
جيت اودليلي هايم
خادم تِحطني خادم اريدك اريدك

آنه من غيرك عطيّه ما أريد
او لا أحبّ الذّلّه والمنّيٌه
ماي وجهي ما أبيعه الا عليك
أخذه واملكني يبو الحنّيه

يا باسط اليدينِ
الزمني من اديني
غيرك فلا أريده بس انت بالروح
_______________________________

اوياك اشعر ابكمالي
دونك كرامه مالي
حالي تِعرفه حالي احبك احبك

يا كشخة الهواشم
يا دمعة الفواطم
خل تسمع العوالم احبك احبك

والله احبك سيدي ابگد الوجود
او تشهد ادموعي او ألم حسراتي
والله أسمك من اسمعه ابلا شعور
ينعصر گلبي او تهل دمعاتي

يا احلى كل جراحي
يا دعوتي ابصباحي
غيرك فلا أريده بس انت بالروح
_______________________________

روحي غدت رهينه
ابلا خدمتك مهينه
نوح انت .والسفينه نجاتي نجاتي

خُذني الى رِحابك
خل انفني المصابك
كل شمه من ترابك نجاتي نجاتي

انت مأوى للذي ماله أمان
الامان انوجد بس يم بابك
جيبني الهاي المجالس والدموع
خل يطهرني البچي لمصابك

يا سيدي او حبيبي
اشما يستعر لهيبي
غيرك فلا أريده بس انت بالروح
_______________________________

يل ساكن النواظر
شرفني بل شعائر
وفقني للـــمنابر اخدمك اخدمك

آنه اعشگ المجالس
آنه قِدوتي عابس
ابدرب العشگ انافس اخدمك اخدمك

الراح من عمري خلص عنّك بعيد
الباقي اريده يگضي بحسينيه
بين مجلس لطم واقرايه وبكاء
بين موكب طالع ابتعزيّه

اصحابي بس ملالي
والخادم الموالي
غيرك فلا أريده بس انت بالروح
_______________________________

امحلفك ابـرقيه
حن سيدي عليه
وانطيني هل عطيه دخيلك دخيلك

اسمي مع الاسامي
تخطّه يا امامي
خادم مع الوسامِ دخيلك دخيلك

الحُر قبلته يوم اجالك بالطفوف
آنه اجيت المجلسك اقبلني
خادم اليخدم ابخدامك اريد
يبو سكنه ابيمنتك سجلني

هاذه الشرف كفايه
يا محله هل نهايه
غيرك فلا أريده بس انت بالروح
_______________________________

ابو فاطمة الطائي

16. عبدالله الرضيع عليه السلام

يمه اوليدي اسم الله اعله اسمك يا عبدالله
لِسهام اكبار موش ابگدك
مو مال اتراب ناعم خدك
______________________

أناغيلك ردت تغفي
اهزك حد وگع چتفي
دللول الولد يبني

دللول الضِمه امعذبك ؟
وامك ماي مَتشربك ؟
شسوي الشاطي دولبني

لا دمع بل مقله لا نهر اندله
آه يا حيره الحِرتها ابهل مسيه

وين يا خلگ الله وشذنب عبد الله؟
ابعمر ست اشهور وايروح امن اديه

أصفر صاير لونه غارن حتى اعيونه
چن جذوة نار. تسعر چبدك
مو مال اتراب ناعم خدك
______________________

دللول الدمع وشّل
بعد يوليدي شتأمل
ما ضل كل رجه عندي

عليك الماي مِتحرِّم
السما ما تقبل اتغيم
الطف . والسما ضدي

نام لو بس ساعه ارتاح من هل لوعه
او باچر العباس يغبش للشريعه

ايجيب ماي البارد اوتشرب أول واحد
لا تموت او كل أمل عمري تضيعه

حتما باچر عمك يرويك ايفرح امك
نام اترجاك نام ابمهدك
مو مال اتراب ناعم خدك
______________________

كل خوفي الصبح لو صار
واعلينه المعسكر دار
او تبچي انت يسمعونك

يدورك حرمله عل صوت
او يرميك ابسهام الموت
او من دمك يروونك

حرمله لو شافك ذابلات اشفافك
گلبه ما ينكسر يبني او لا يرحمك

من يسمعك تبچي ايجر سهم . ما يحچي
ايصوب النحرك مثلث يفجغ أمك

هم ذابل هم ضامي انوب المنحر دامي
لحسين ايموت بس ايصدلك
مو مال اتراب ناعم خدك
______________________

يچنك طير من جنه
نام ابحضني واتهنه
اروحلك سبع فدوات

صوتك بالبچي مبحوح
ريجك يابس او مجروح
او حيل امك تلاشه او مات

اشلون بيه الليله يا هو الأمشيله
وين الگه موسى واستاجر عصاته

اعيون افجر بيها او چبدتك ارويها
والله انطي عمري كله او ذكرياته

نذر اعليه الربي انطي اعيوني وگلبي
لجل شربة ماي واتبلل لهاته

يا ربي ارحم حالي ليضل مهده خالي
امك واتريد اتنام ابلحدك
مو مال اتراب ناعم خدك
______________________

يتعبان . او تعبت اوياك
فطر گلبي الفطر بشفاك
واحس روحي بدت تطلع

اشلون ابكربلا . او تخلص ؟!
ذهيله فكري اتخلبص
اصيح او ما بشر يسمع

ركض رحت الزينب الگيت كلشي شيّب
راسها او رمش الجفن مِبيضه كلها

خيّه گالت خيرچ ؟ گلت زينب ؟ غيرچ ؟
گلت عبدالله او بعد مدري شگلها

گالت ضامي ادريبه امنين الماي انجيبه ؟
صاحت ويلاه. كلهم ضدك
مو مال اتراب ناعم خدك
______________________

رديت او رحت لحسين
گبل ما احچي هل العين
سألني اشلونه المدال

گتلتله امشارف اعله الموت
امفرفح ما بقاله صوت
مثل غصن الورد يذبل

ون او شاله ابحضنه ونو نفس الونه
دنگ اعله ابنه او گالت ماتو سويه

منه اگطعت الضنه او صرت امأيسه منه
اعرف يا عبدالله ما مقسوم أليه

ادعيت الله او ناجيته اصبح باچر ميته
آنه الاول اغفه ابلحدك
مو مال اتراب ناعم خدك
______________________

ابو فاطمة الطائي

17. علي الاكبر عليه السلام

روح احسين نبض احسين دم احسين الأكبر
رفعة راس عنده احساس چن عباس لو زمجر
علي الاكبر علي علي
علي زمجر علي علي
________________

أبن الحسين الهيبه واحد يضل ترتيبه
الفوگ الغيوم ايجيبه لو طب الاحروب

أيد الله فوگ ايدينه كض كربلا ابچفينه
من يسرته ليمينه گلبها الاگلوب

صعد صهوة جواده
اخذ منهم مراده
فعل حيدر اعاده
هاذه علي حيدر مدري علي الاكير

صدى صوته تردد
انا جدي محمد
انا الاعصار الاسود
قابض على العسكر بتاري موت احمر

فوگ الروس گام ايدوس اگباله انفوس مرعوبه
والقادات چنها اموات بس دمعات. منكوبه
السما والبر علي علي
علي زمجر علي علي
________________

يوم ابتده التلاقي وصلت الى التراقي
أرواح اهل نفاق گامو يرجفون

باسم واهم ثكاله ركضو ركض ثمالى
بس البچي تعالى تسمع ينوحون

سأل وين المراجل
أما بيكم مقاتل
ردت واحد ينازل
فقط فقط زلمه ايكلمني بس كلمه

الوف الكثره انتو
اشو كلكم خرستو
أما للحومه جئتو لحسين ابو اليمه

جردو اسيوف گومو اصفوف خل نشوف خيركم
واحد جاي انتو اهواي مامش راي ضل عدكم
منو يظهر علي علي
علي زمجر علي علي
________________

يتقدم ابثباته ابن النبي اشحلاته
امنومس الخواته في وادي الاطفوف

خيل وزلم گلبها كل ضربه لو ضربها
امن المشرق الغربها بس اجثث اتشوف

زلازل ضل يزلزل
يصعدها او ينزل
يگلّبها او يعدل
وابكربلا اشسوه خلاها تتلوه

فدوه الترب جدامه
محد يگف گدامه
ابعلو الثريه هامه
هو الفخر هو مثل الشمس ضوه

بالطف ثار موت ونار اعليهم غار چن ضيغم
ابن احيود هيبه وزود عنده اعهود ما يرحم
غده محور علي علي
علي زمجر علي علي
________________

أني علي يوادم ابن الوصي وفاطم
على المعاره قادم وين الزلم وين

عن ديني والامامِ اني انا المحامي
أسقيكمُ الحمامِ من دون الحسين

الجمع والله ابيده
مجد خيبر اعيده
يخط سيفي قصيده
حيث الحبر دمكم انتو او مناحركم

يراعي ابدم اترسه
رداء الخلد البسه
المعاره احسبها ونسه
واتحدى خيركم مو واحداََ كلكم

اليوم اليوم بي محتوم نهر دموم ايضل يجري
لا مشراد امن الميعاد ماكو اعناد. عن امري
لكم أقهر علي علي
علي زمجر علي علي
________________

بيهم الارض طواها يم الشمس خذاها
سبعين الف گضاها ماضلت اجنود

القاده والحمايه والتآمر السرايه
والمستشار ابرايه كل منهم اينود

حيارى كلها دونه
ذهيلين ابفنونه
غدو يتوسلونه
علي علي اعفينه بس فرصه انطينه

خذت من عدنه حيفك
دخل يعتقنه سيفك
والتريده انت كيفك
لان ماتن ادينه امن المراكض خوينه

نشرد وين لا رجلين لا ايدين ضل النه
الوين انروح سيفه ايلوح خله الروح بس ونه
يـ موت احمر علي علي
علي زمجر علي علي
________________

ابو فاطمة الطائي

18 العباس عليه السلام

يحيّاه يحيّاه عباس طب للساحه
اجه الموت اجه الموت الجيش صار اصياحه
___________________________________

الله حياه ابو الزود گمر يتلاله
شد الاحزام. والاملاك حرز تقراله
چن اسد غاب لمح صيد مهيبه افعاله
بيده بتار علو الغيم غده يتعاله

صدح آنه عباس
انا الما يطخ راس

أبابيل ابابيل غطه الطفوف اجناحه
اجه الموت اجه الموت الجيش صار اصياحه
___________________________________

ايسابق الريح لمن غار تعنه الحومه
بيده بتار لهب نار يشب لنجومه
والمنيات بل اطفوف غدت محتومه
جاري الماي من الخوف يبس بلعومه

بطل للنهر راح
خطف كل الارواح

يمحلاه يمحلاه اوشاح المهابه اوشاحه
اجه الموت اجه الموت الجيش صار اصياحه
___________________________________

اربع الاف على الماي حرس گالوله
ابتسم گال شمر وين أشو گلوله
اربع اضعاف هل اعداد يدز وي ذوله
فن يگدرون يصمدون ولو بس صوله

انا امخوف الخوف
انا اموزع الاحتوف

والحسين والحسين بيدي السقر مفتاحه
اجه الموت اجه الموت الجيش صار اصياحه
___________________________________

چنه ابو احسين لمن صاح انا حيدرها
دون الخيام . الافلاك نوه ايطشرها
سيفه قد لاح للنجوم شطر يشطرها
ابين الاصدور والگلوب عصر يعصرها

اذا يخزر أنسان
يدوروله دفان

على الماي على الماي الجيش عالي انياحه
اجه الموت اجه الموت الجيش صار اصياحه
___________________________________

يرتجز گام والصفوف جمع مخرسٌه
الزلم والخيل على الگاع جثث متيبسه
اگبال ابو الزود الابطال حجاب اتلبسه
هاذه عباس للحروب ابوه امدرّسه

درس عند ابو حسين
تذكروها صفين

شهادات شهادات بالحرب عنده اطروحه
اجه الموت اجه الموت الجيش صار اصياحه
___________________________________

من حر السيف هل ارگاب غدت تتبخر
بل وعد دوم يحاشاه ولا يتاخر
رغم الاخشوم على الماي نزل يتبختر
اي يعباس لغز بيك صعب يتفسر

عذب وانت عطشان
ترافه اويه نيران
يمكنون يمكنون انت التعب والراحه
اجه الموت اجه الموت الجيش صار اصياحه
___________________________________

ابو فاطمة الطائي