37. الامام الحسين عليه السلام وزينب

الرحله طويله فوگ الهزيله
روس او دمايه اضعون او سبايه
وابهل الدرب محد الچ
بس راسي يبره المحملچ
الرحله طويله
____________________

الرحيله طويله والگلب
رايد رفيج الهل درب
يا زينب اشلون

أيخفف اعليچ الحزن
وي گلبچ ايون من يون
وايسيل الاعيون

وانتي ابدرب قاسي او عَثِر
وبل ضعن مدري چم شمر
لا ما يرحمون

وين الذي يبغض علي
الهاذه الضعن صاير ولي
وين اليكرهون

بس راسي يمچ اشكيله همچ
الدربچ يباري ابهاي البراري
هو البقيه من هلچ
بس راسي يبره المحملچ
الرحله طويله
____________________

گدام ضعنچ راسي ضل
بلكت يسوي اشويه ضل
من الشمس هاي

او بعيوني التارسها دم
أتقاسم اوياچ الالم
واجروح الاهواي

كل آه نجسمها سوه
او نجسم الما ألهن دوه
ونتجاسم الداي

اشعندچ سوالف احچي الي
عيدي الامسامر الاولي
ذكريني بصباي

لمن تلمنه الزهره أمنه
ابحلوه الليالي او ضحكه التلالي
يوم الي چنت امدللچ
بس راسي يبره المحملچ
الرحله طويله
____________________

راسي وإن فوگ الرمح
يوميه ساهر للصبح
حارس عل العيال

من الرمح يتمنه أن
ينزل يجي يمچ لان
بي شوگه چتال

ملهوف لاكن شيحچي
محروم حنى من البچي
برماح الاطوال

فوگ الهزيله اتأملچ
كل ساعه مايل محملچ
مشدوهة البال

كلما نعيتي انعادت منيتي
يلچمني جرحي او يدعچني رمحي
بعيوني اضل اتوسلچ
بس راسي يبره المحملچ
الرحله طويله
____________________

أثنينه ابهاذه الدرب
ميتين بس نمشي غصب
رغمن علينه

للشام . والشام الصعب
ما أدري يا حاله تطب
هاي الضعينه

گدام هاي الراحله
راسي اجدمه للملا
لهل الضغينه

عسا وان بي تنذهل
العيون . عنج تنشغل
اي يل حزينه

بلكي النواظر الراسي تناظر
او طولج تعوفه لا ما تشوفه
او ما واحد اليتأملچ
بس راسي يبره المحملچ
الرحله طويله
____________________

والسوگ لمن بي نگف
او تگصدنه ناس ابلا شرف
عندي البصيره

بحجار خافن ننرمي
ابراسي انتي احتمي
صيري الاخيره

خل جبهتي ايصكها الحجر
بس لا يرى طولچ بشر
وانتي كسيره

الشام هَم ألي او الچ
وبالقصر لما اينزلچ
كلمن مصيره

بلكت سويه انضل يل سبيه
ابأصعب رزيه ديوان أميه
والنذل لو ضل يسألچ
بس راسي يبره المحملچ
الرحله طويله
____________________

ابو فاطمة الطائي

38. العليله عليها السلام

يا گلـبي موت ألمن بعد ضـال
لا جوني هلي لا جاني مرسال
امنين أجتني كربلا أمنين
آيگلبي آيگلبي
_______________________

يا گلب بطّل هل نبض
الموت الك واجب فرض وراهم

المن تعيش ألمن بعد
واحسين رايح وابتعد هواهم

يا گلبي شلي بل عمر او ما شوف الحسين
لا ليله واگعد انتظر لا هنّه يومين
هل سفر واضح أوله او تاليه مو زين

فارگني وآنه امصوبه ابداي
ياگلبي موت اروحلك اهواي
ارتاح واخلص من الاونين
امنين أجتني كربلا أمنين
آيگلبي آيگلبي
_______________________

من يوم سدّر هل ضعن
صرت الغريبه ابلا وطن مصيبه

انده وراهم ماكو رد
فص عيني شلعو وابتعد نهيبه

ابذاك الصباح السافرو صوب النواويس
حسيتها فوگ الضلع چن تسحگ العيس
كل خطوه تكسرلي ضلع وانت بعد قيس

ياهجره زود علّتي اضعاف
يا ناس هو احسين ينعاف
يومين دونه تنعمي العين
امنين أجتني كربلا أمنين
آيگلبي آيگلبي
_______________________

لحسين هجره والله مر
علگم ولا ايفيده الصبر شصابر

ما عوّداني اعله الهجر
لن يدري اغيابه جمر شكابر

ما أدري ليش ابكربلا طول هل اغياب
اعتب ولاچن يا گلب شيفيد الاعتاب
ماي او تبده من ادي عافوني الاحباب

ياريته ينظر حالي الغروب
لمن اگف والزمله الدروب
وادعي الاهي ردلي الحسين
امنين أجتني كربلا أمنين
آيگلبي آيگلبي
_______________________

لا والنهيبه من غبش
ماخذ معاه اسبعطش بدر تام

عباس. الاكبر . الطفل
كل الهواشم ترتحل يل اسلام

ضليت وحدي امعلعله مابين الف داي
ابدار ظلمه او موحشه متلهبه احشاي
لا أخت ضلت لا أخو بس حزني وياي

اتمنيت وحده امن الحنينات
سكنه . رقيه ابكتري اتبـات
سلوه العيوني او عل بچي اتعين
امنين أجتني كربلا أمنين
آيگلبي آيگلبي
_______________________

لاچن وحيده باقيه
او عيني الدربهم رابيه تتاني

ادري ولا منهم أمل
لاچن اتاني او ما أمل واتاني

أدري أبوي اعله الثره مسحوگ الاضلوع
عطشان وابحر الشمس فوك الثره ايلوع
لاچن اعيوني امتانيه والياس ممنوع

بلكي الله ماكو اسيوف واسهام
ولن هل ضنون اضغاث احلام
يردون ليه هلي الطيبين
امنين أجتني كربلا أمنين
آيگلبي آيگلبي
_______________________

بلكي او شوفنه الصبح
سالم ولابي من جرح. يرباه

واركض احضنه واشبگه
وعطره اشمه او اشهگه يمحلاه

هيچي اويرد ليه مشي مو فوگ الارماح
واتطيب علتي من صدگ وابحضنه ارتاح
وانرد سويه جن گبل وانساها الاجراح

او يرجع دليلي ينبض اردود
او عبد الله يمي حلو الاجعود
وعباس أشوفه او عنده چفين
امنين أجتني كربلا أمنين
آيگلبي آيگلبي
_______________________

ابو فاطمة الطائي

39. حميدة مسلم

ما يرد مايرد والدي ما يرد
تمسح ابراسي اشوفك ! والدي ما يرد ؟
_________________________

دمعه بعيون ابو اليمه حيّرت كل الضعن
أكبر امن الغربه كلها امن الطفوف او للوطن
حاول ايضمها او يكابر او لن حميده ابهل المحن
وگفت أكباله تنشده عمي ما هاذا الشجن ؟؟

بل نشد. بل نشد. تنتحب بل نشد
تمسح ابراسي اشوفك ! والدي ما يرد ؟
_________________________

طارش امن الكوفه شفته اوياك يهمس بالحچي
ايسولف أيأشر واشوفك مختنگ رايد بچي
رحت تمشيله اعله حيلك ليش راجع تتچي
او جاي تمسح على راسي سكته ما بيك اتحچي

منمرد منمرد گلبي ضل منمرد
تمسح ابراسي اشوفك ! والدي ما يرد ؟
_________________________

أسبل أدموعه او عبرته او گالها لـ الله الامر
البگه ابراسچ يا حميده او عظم الله الاجر
مات مسلم مات حيلي مات ذخري والصبر
اشلون كسره انكسر ظهري بعد ميفيد الجبر

بل چبد بل چبد طعنته بل چبد
تمسح ابراسي اشوفك ! والدي ما يرد ؟
_________________________

حنت او ونت حميده والظهر منها التوه
اتصيح يل عايفني وانت عندي اعز امن الهوى
ليش بوبه يتمتني ليش ما متنه سوه
انت مو تدري عيوني بليّاك ابلا ضوه

وين اصد وين اصد يا أبي وين أصد
تمسح ابراسي اشوفك ! والدي ما يرد ؟
_________________________

بويه وآحسرتآ بعدك راح أضلن ضايعه
بويه من زغري عفتني بل نوايب گابعه
دون الابنيات آني عيني ضلت دامعه
أمتانيه جيتك يـ جنّه تالي اجتني الواقعه

ينسعد ينسعد المثلي هم ينسعد
تمسح ابراسي اشوفك ! والدي ما يرد ؟
_________________________

امتانيه جيتك ليالي او عيني لدروبك تصد
چنت اگول الكوفه هاذي مو بعيده من يرد
يرجع او عطشانه اگله او چبدي عگبك منمرد
چنت اتاني اتشيل سيفك ويه ابو فاضل تهد

تبتعد تبتعد عني تالي تبتعد
تمسح ابراسي اشوفك ! والدي ما يرد ؟
_________________________

ابو فاطمة الطائي

40 العاشر

باچر مامش وليان باچر نار او دخان
اي يزينب
راح ابن امچ ينداس وايگطعون العباس
وايتعذب
شدي حيلچ شدي حيلچ
باچر مامش وليان
_______________

زينب بعد ما ضل وكت او لاضل سلامه
يم عون گومي اتحزمي باچر قيامه
نار او عطش موت او ألم لوعة يتامه
باچر تشوفين الولي ابلايه عمامه
او عباس نايم عل نهر عايف خيامه

اتحشمين او ميگومون تبچين او ميسمعون
يل غريبه
سيف الكافل منهوب وكتچ يصبح مگلوب
اشهل مصيبه
ما يجولچ شدي حيلچ
باچر مامش وليان
_______________

مسك الختام اويه الاهل هاي المسيه
باچر فلا اتلمكم خيم اتلمكم رزيه
كلكم سويه ابكربلا بس مو سويه
كلمن نصيبه امن الالم او من المنبه
الي عل امسناه يضل او عل غاضريه

أيام الحلوه اتروح والعز يصبح مذبوح
وي دلالچ
اعليكم يندار البين شربة مي ما تلگين
راحه مالچ
ايون دليلچ شدي حيلچ
باچر مامش وليان
_______________

ودعي الاحنين والبجي هساعه عوفيه
من طول ابو طول الحلو شوفچ اترسيه
بس هل مسيه ايضل عدل باچر متلگيه
يتگطع او يصبح وذر ابعينچ تشوفيه
او صوت الكسر مال الضلع بذنچ تسمعيه

كلشي ابعاشر عاشور راح ايصبح مكسور
كلشي رايح
ايسلبون اي شي ينشاف بس عبيچن تنعاف
والجوارح
اي يويلج شدي حيلچ
باچر مامش وليان
_______________

شوفيهن اعيون الگمر الما منهن احله
تدرين يم عون الصبح اتصوبها نبله
او وجهه الذي مثل البدر دمه يغسله
ايگطعون چفه الچان امس حيدر يقبله
اوتبچين ابو فاضل لحد ما تبقه مقله

باچر يشيب الراس باچر بلا عباس
يل اميره
حملچ كلف وايميل چم صلف بيچ ايعيل
حيره حيره
ابلا كفيلچ شدي حيلچ
باچر مامش وليان
_______________

مثل الحشر وادم تجي باچر عليچن
ما يضل وياچن فقط الله او عبيچن
باچر الميت بل گبر يبچي البچيچن
ياويلي من سوط العده اتورم اديچن
يضربچن ابلايه رحم او يشتم وليچن

كل طگه من السوط گاع الله بيچ اتروط
ابلايه رحمه
كل وگعه من تگعين مية عام اتكبرين
والله هظمه
ايضل عويلچ شدي حيلچ
باچر مامش وليان
_______________

آخر مسيه اويه الاهل باچر سبايه
شيفيد يم عون الدمع ميرد منايه
باچر اليحديچن شمر من غمه رايه
محسوب عود امن الزلم شايله رايه ؟؟
يحميچن المنّه الضعن رايد حمايه !!

ويلاه من غدر البين ايرچب بنسوان احسين
عل هزيله
او يحدهن ياهو الچان للشام او للكوفان
او دم تسيله
اشيگضي ليلچ شدي حيلچ
باچر مامش وليان
_______________

ابو فاطمة الطائي

41 العاشر الوداع

ويلاه من هاي المصيبه ويلاه
ويلاه يوداع الغريبه ويلاه
_______________________________________

أتوادعو عين او دمع او دمع اليگع گلي اشيرجعه
أموادعهم ايگطع الگلب يهمس غده او زينب تسمعه
كل چلمه حسّتها رمح اتبچ الگلب حدما تشلعه
رادت تسمعه ابلا دمع او سال الدمع مهما تمنعه

ويلاه هل ليله كئيبه ويلاه
ويلاه يوداع الغريبه ويلاه
_______________________________________

مصباح باچر من يطر خلي الصبر عندچ وسيله
باچر تشوفين اشكثر هم او هظم اي يل عقيله
باچر عطش باچر ذبح باچر مصايبچن ثجيله
باچر يحرگون الخيم او ياحسرتچ تصبح طويله

ويلاه واضعونچ سليبه ويلاه
ويلاه يوداع الغريبه ويلاه
_______________________________________

طالت على رسومه النظر واتحسرت او چنها تگله
يحسين فتيت الگلب او خل افترض كل هاذي سهله
بس گلي نتفارگ صدگ تدري الهجر مگدر احمله
امن اتعوفني ساعه اختنگ حتى النفس يصبح مذله

ويلاه يا گلبي او لهيبه ويلاه
ويلاه يوداع الغريبه ويلاه
_______________________________________

خل اعطش اوخل احترگ خل انضرب خل عيني تعمه
ميهمني كل هاذه الالم خويه الگلب بس انت همه
انت العذب انت الدوه يا خيمتي الضعني تلمه
يل بيك ريحة فاطمه من تبتعد حيلي تعدمه

ويلاه تنهبني نهيبه ويلاه
ويلاه يوداع الغريبه ويلاه
_______________________________________

من كل رزايا كربلا هاذه المسه أعظم رزيه
من جفن زينب هل دمع اتوجر گلب والد رقيه
مرن على باله صور فوگ الهزل زينب سبيه
يحدونها وين النذل وين الذي مابي حميه

ويلاه وتعالى نحيبه ويلاه
ويلاه يوداع الغريبه ويلاه
_______________________________________

العيون ضلت شابحه كل واحد الـ واحد يناظر
چنه يراها امگيده او حادي الضعن بيها يسافر
او چنها تراه اعله الثره صدره انمرد جوه الحوافر
او جرح الموادع ما گضه او لن يبتدي صبحك يعاشر

ويلاه اشهل ليله الرهيبه ويلاه
ويلاه يوداع الغريبه ويلاه
_______________________________________

ابو فاطمة الطائي

42. العباس عليه السلام

گمر وجهك أمان أو خزرتك موت
گمر مايعلى صوتك بالحرب صوت
للغيره محور للهيبه مصدر
____________________________

من يوم انخلق هل عالم
والباري نفخ روح آدم
ما شفنه بشر كالكافل
قَدر في هيئة ابنادم

اختزلها الغيره في راسه
جمال الكون باحساسه
شجاعه او معرفه او هيبه
جمر فنه الذي جاسه

والباري منّ الاوصاف قد كمله
الوفه تسعه او تسعين بالميه اله
جل الي سواه والزينب انطاه

الخوّه بس بل عباس متجسّده
المثل يوسف لحسين حگ يحسده
جل الي سواه والزينب انطاه

نهر يجري مراجل ما أله احدود
نهر وافروعه هنه الرايه والجود
ما منه اكبر للهيبه مصدر
____________________________

صوره من علي ابتكوينه
من غِيره انخلق مو طينه
مصدر للحياة اعيونه
اوچم موت انكتب من عينه

عنّه كربلا من تحچي
مدري تبتسم لو تبچي
حيره بالعباس حيره
من عنده إله جت تشچي

ما لا تطيقه العقول هو أفعله
المستحيل أله ايصير يا مسهله
اذا يغضب اتشوف ضلام اعله الاطفوف

إله الملعب او ويل لي زاحمه
لون للسمه ايطير هم يلزمه
اذا يغضب اتشوف ضلام اعله الاطفوف

قهر شبّعهم قهر شبّعهم أذلال
قهر نعم عباس هاذه مخزي الابطال
من عالم الذر للهيبه مصدر
____________________________

عنده امن السمه وكاله
منطي للخدر كفاله
هو الزينب الدگ صدره
منو مثلي وفي ابمقاله

كفو ياهو الذي يغلبه
واهو الما ثنّه بالضربه
يتعب الدنيا ما يتعب
سلام الله على گلبه

من حشمتّه ام عون ضل ينتفض
بيمينه ما هز السيف هز الارض
عيونه جدحت نار أذن كلشي ينهار

ليضل نهر لتضل خيل لتضل زلم
الموت يعني مكتوب وامره حتم
عيونه جدحت نار اذن كلشي ينهار

زعل عباس اشيضل للدنيا معنى ؟
زعل السبعين الف معناها تفنى
وابصوته زمجر للهيبه مصدر
____________________________

الشمر و العدد والعده
واذا جن او أنس عنده
گدام الگمر تتزلزل
عباس او زعل شيرده !!

يا سبعين الف يا ميه
لو كل الكره الارضيه
توگف عل نهر تلزمه
والله تنفني ابصبحيه

أخو زينب او گال للشط أصل
او كلمه متصير اثنين چنها جبل
او يفنكم تگدرون كلمتي تكسرون

على روس الابطال يمشي ابعزم
نزل للشاطي او گال وين الزلم
يفنكم تگدرون كلمتي تكسرون

رعب الجيش والشط رعب متروس
رعب رجفت اجسام او ترجف انفوس
ضل كلشي مصفر للهيبه مصدر
____________________________

أبن حيدر علي الأنزع
يخوف الخوف من يفزع
جيش احسين بس هو
وابكل كربلاء اتوزع.

أوصفه ابيش ما أدري
أيا ليت الحچي او شعري
يبلغ عشر معشاره
ولا ابلغ مدى عمري

محد يعرف العباس أو يفهمه
ماعدا أبوه الكرار أو فاطمه
سر وابخصاله معنى الكفاله

متطهر من الارجاس صافي النبع
عباس الله سواه طب للضلع
سر وابخصاله معنى الكفاله

فخر دارين بسمه يفخر الدين
فخر عباس لنه باب الحسين
اي بسمه نفخر للهيبه مصدر
____________________________

ابو فاطمة الطائي

43 أم البنين عليها السلام

لمّن ضـعـنهـم للسفـر راد ايروح
أم الگمر ضلّت جسد مابي روح
ويلي على أم الاربعه
_________________

طلعت او يرجف گلبها امدوهنه او حيرانه
وگفت اگبال ابو اليمه او چلّبت بردانه
يا بعد حيلي تگله خل أروح اوياكم
خاف من وِلِدي ايتصوب آنه أسد امچانه

ألزملي سيف او أرتجز بين الناس
عباس راعبكم وانا أم عباس
بالرايه اروح امگبعه

ويلي على أم الاربعه
_________________

اتسولف او مستحيه منه ما تصد لعيونه
اتگله بس اربع نطيتك واربعه أشويونه
كون من عباس عندي عشره الك أنطيهم
او كلمن اليوصل خيمكم شاربه يلوونه

لاچن العندي اربعه موش اهواي
اعذرني لوما شربو طفلك ماي
ادروب الشريعه امگطعه

ويلي على أم الاربعه
_________________

صدت العباس أبنها والحزن بأنفاسها
گبل ما تحچيله كلمه باس ايديها او راسها
گلها لتوصيني يمه وآنه ابن كرارها
ذاك الطوال الشوارب يوم خيبر داسها

انچانهم سبعين الف وايزيدون
عباس آنه المن خزرتي ايطيحون
جفنچ امسحي مدمعه

ويلي على أم الاربعه
_________________

قدمت سيفه او جربته او حضرت له الرايه
او گامت اتوح الحنينه او سوت الها اقرايه
بعد ما ماشين عنها او چنها گامت اتنازع
أشلون لو جاها خبرهم فوگ المسنايه

اشلون لو سمعت شمر حز الروس
اوفوگ صدر حسينها خيل اتدوس
او ذيج الضلوع اموزعه
ويلي على أم الاربعه
_________________

انوب يم زينب تعنت اوچبت يم بابها
والدمع يشرح المها او ياعظيم اصوابها
زينب اوصيچ اعله زينب ما أوصي ابغيرها
من توج نار الحرايب من يعج اترابها

اوصيـچ يمـه او بل گلب امنيّات
وياچن أمشي واخدم الـ علويات
مكتوب اضل املوعه
ويلي على أم الاربعه
_________________

ودعوها او غيشه راحو واگعدت تنعاهم
من دمع عيناها اويلي رشت ابمگفاهم
نوم ما شافت عگبهم لا تعرف الراحه
مثل غرگان او يفرفح هل شكل تتناهم

لاچن وسافه هل سفر طول حيل
ما طر فجرهم والعمر خلص ليل
ويلاه يليل الفاجعه
ويلي على أم الاربعه
_________________

ابو فاطمة الطائي

44 العليله عليها السلام

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

مامش ابهل ليله
طارش اليمشيله
ايشوف ابوي احسين شنهي اخباره

عني ليش اتعطل
هل سفر شو طول
ما دره الدلال تسعر ناره

ويه كل اغروب گلبب ايذوب تطلع روحي
گمت اصب دمعات والدمعات من اجروحي

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

_________
ما اريد أيامي
بيها بس آلآمي
عمر مابيه والدي ماريده

امعلعله او مهجوره
امصوبه او مكسوره
المثلي كل طب يا خلگ ميفيده

گلبي يصبح زين بس حسين يمسح فوگه
يمته هل وجنات ليله اتبات ما محروگه

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

الليل من يلفيني
چم حلم ياذيني
چني أشوف الماي يهدم داري

يجري چنه احيايه
منترس بدمايه
او يمه اشوف حسين ميت عاري

واگعد امن النوم بيه اهموم تترس ديره
همي چن يعگوب گلبي ايلوب من هالحيره

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

علتي تآذيني
والحلم صك عيني
المن اشكي الضيم واشكي البيه

والدي ما هوّه
والنفس بل گوه
من يجيب احسين وايحن ليه

من يگله الضيم مثل الغيم صب اعليها
بنته شبعت موت اصلا صوت ماضل بيها

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

طارش ابمكتوبي
رايده المحبوبي
خل يگله الموت دگ بيباني

موش من هالعله
العله تنعد سهله
آنه چاتلني هجر ولياني

افراگه طعن ارماح وسط اصفاح جسمي الخاوي
وني چن محموم وابكل يوم يصبح داوي

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________
كربلا أشتاليها
يا عتب يكفيها
ليش دهرتني دهيره اعليمن

ابيا طلب تطلبني
كل مسه تكتلني
جرحتني اجروح لا ما يطيبن

احسين عني ابعيد وادري ايزيد ماله امروه
احسين خافن مات والخيمات بالطف تهوه

وين الذي متروس گلبه احروره
يمشي لبوي احسين هسه ايزوره
يلگاه بالطف ذابلات اشفافه
ايگله العليله ابغيبتك مكسوره

________

ابو فاطمة الطائي

45. للامام الحسين عليه

احسين يبن امي دخيلك لا تون
امنين اجيب الماي جف حتى الجفن
لا لا تون لا لا تون
_______________________

احسين يبن امي ونينك بطّله
احسين بچيت السماوات العلا
امنين اجيب الماي هيه كربلا
خير لو بيها تريّس حرمله

الصخر لو حن حرمله هم ما يحن
امنين اجيب الماي جف حتى الجفن
لا لا تون لا لا تون
_______________________

گطعت گلبي يمهجة فاطمه
طايح ابحر الشمس تشكي الضمه
هيه غير اعيوني تجري امغيمه
لچن يبن امي تهل بس الدمه

اوشوفي اضلم تشبه الليل اليجن
امنين اجيب الماي جف حتى الجفن
لا لا تون لا لا تون
_______________________

امنين اجيب الماي واروي مهجتك
يمن ريت اسنيني فدوه الدمعتك
تدري اشسوت ابگلبي ونّتك
شيبت روحي او گلبي اوداعتك

مات حيلي والگلب هل منسحن
امنين اجيب الماي جف حتى الجفن
لا لا تون لا لا تون
_______________________

أحنه بس أيتام مفجوعه او حرم
يا هو احشمه او محد ابگلبه رحم
والي اگله أميه يرميك ابسهم
يا ألم ازيد بعد من هل الم

ريت گلبي تطحنه العشره طحن
امنين اجيب الماي جف حتى الجفن
لا لا تون لا لا تون
_______________________

ماي ماكو ابكربلا بس الرماح
لا تون يحسين موت او استراح
موت مو ماضل مكان الهل جراح
ارتاح خويه او خلي اعليه النياح

او خلي اعليه السبي او باجي المحن
امنين اجيب الماي جف حتى الجفن
لا لا تون لا لا تون
_______________________

گوه تتنفس اشوفك يا نفل
شني الشاغل بالك ابهاذه الشكل
خايف اعلينه يچتفونه ابحبل
اتخاف يسبينه او يلوعنه النذل

لا تفكر اهواي بــالله نستعن
امنين اجيب الماي جف حتى الجفن
لا لا تون لا لا تون
_______________________

ابو فاطمة الطائي

46. العباس عليه السلام

راح أخوي الچنت اشوفنه وطن
راح عامود الخيم حامي الضعن
يا أبا الفضل يا أبا الفضل
_________________________

حايره او بهمومي صرت امگبعه
راح كفالي او دليلي گطعه
عل شريعه اوصال جسمه اموزعه
وآنه ما أندل طريق المشرعه

اشلون اوصله واگله اعله المحن
راح عامود الخيم حامي الضعن
يا أبا الفضل يا أبا الفضل
_________________________

أشلون اوصل والنهر بيد الغرب
وآنه عامي اعيوني دخّان او ترب
خيل واسيوف او عساكر بالدرب
رحم ما عدهم ولا عدهم گلب

أشلون بيه مو طِحن گلبي انطَحن
راح عامود الخيم حامي الضعن
يا أبا الفضل يا أبا الفضل
_________________________
ارد الوذن بيه من شر العِده
ارد اگله الناس بينه امفرهده
ارد اگله ايگوم وايشوف اشسده
نار . وايتام ابرماد اموسده

هجن النسوان بالبر فرفحن
راح عامود الخيم حامي الضعن
يا أبا الفضل يا أبا الفضل
_________________________

الميت امن اصياحنه فز او گعد
يبو فاضل يمته تلفي اشگد بعد
نار وجّاها علينه ابن سعد
چم يتيم امن الذعر گلبه جمد

أشكثر علويات بسمك صيحن
راح عامود الخيم حامي الضعن
يا أبا الفضل يا أبا الفضل
_________________________

انت بس ما طحت يا راعي العلم
ركضت الصوبين كلها عل خيم
واحد اينادي الحرم وين الحرم
وين زينب أضربوها ابلا رحم
او مدري چم سوط العليه اتگطعن
راح عامود الخيم حامي الضعن
يا أبا الفضل يا أبا الفضل
_________________________

أمشي واتعثر واطيح اعله الوجه
مدري يا عباس لاوين اتجه
آخ من شفت الشمر ليه اجه
روحي ما بين الجوانح لايجه

صحت بالنسوان للهيمه اطلعن
راح عامود الخيم حامي الضعن
يا أبا الفضل يا أبا الفضل
_________________________

هجن النسوان بالحر والشمس
او هنه عطشانات من اول امس
او ضل وراهن يركض بسوطه الرجس
لا رحم عنده ولا بيهن يحس

لحد والله اجلود منها اتشلعن
راح عامود الخيم حامي الضعن
يا أبا الفضل يا أبا الفضل
_________________________
ابو فاطمة الطائي

47 مسلم بن عقيل

طوعه تحشمه والدمع يتلاله بل عين
گالتله اريدنك ترد حملات ابو احسين
_____________________________

مسلم بلا ناصر وگف بس يمه طوعه
اتهلهل تحشمه او بلگلب من عدها لوعه
اتشوفه وحيد او هل فزع جايب جموعه
تتمنه عباس ايحضر اويه الهاشميين
_____________________________

أو لن مسلم ايگلها .أفا . اتهلين الدموع !!
وآنه الي رباني علي صگار الجموع
راسج يطوعه لا يطخ خل يبقه مرفوع
والله لخلي هل جثث بالكوفه صوبين

_____________________________

گالتله نعمين او كفو منك يمهيوب
أدريك ليث القسوره متهاب الحروب
يمه اعله دمعي لتعتب اعتب عل اگلوب
من شفتك اوحيد وانا دلالي نصين
_____________________________

گاللها گلبچ لا يهم هاذه اني فرّاس
واليوم اجيم الواقعه واحشرها هالناس
حسره أخلي اعله الزلم جرات الانفاس
واگلبها يمنه ابميسره وانتي تشوفين

_____________________________

سل صارمه او ليهم طلع چن جية السيل
نار او شرر ما بنجرع خله الظهر ليل
الكوفه أبأسرها متحچي بس تسمع اعويل
عدلين ضلت هالزلم ماندري ميتين
_____________________________

مرتفع سيفه او لو هوه تتزلزل الگاع
صياد يلگطهم لگط يتخير اسباع
هاذه البقه ابلا هامته او هاذه بلا اذراع
يردون مشراد او لچن ماعرفو امنين

_____________________________

مسلم يمسلم شوصفه للكوفه من غار
خيبر يچنها اوليها طب حيدر الكرار
من نار سيفه اتسفرت راحت الى النار
او مسلم عدل خالد بقه مهيوب دارين
_____________________________

ابو فاطمة الطائي

48 السيده رقيه عليها السلام

لارض الطف رسالة وِد
لحسين العلي مِبعد
أقريها اوبلكت الله يرد زينب يا زينب
________________________________

بدموع العين كتبت لحسين
أمًا بعدو يا غالي
ابگلب محروگ سلام او شوگ
من ارقيه الى الوالي

عذرا للطف ما جيتك وازاني الموت
يابويه أشگد تانيتك وانحب بسكوت
حد ما غمضت اعيوني وما منك صوت

زينب عمه أقريها
يم الوالد انعيها
وگولي اشبيها ما بيها زينب يا زينب
________________________________

اخذيله الروح واخذيله اجروح
من گبري الى گبره

سلميلي اعليه اترابه شميه
آخ أشگد احب عطره

گليله ابنيتك رادت اتزورك يحسين
واترش گبرك بميه من ماي العين
لاچن الشام أيموت للمشتاگين

گليله اشكثر تانت
حتى ابساعة الماتت
بابا بابا الك صاحت زينب يا زينب
________________________________

عباتي هاچ او تراچي اوياچ
گليله هذن ضلن

ضلن تذكار من ذيج النار
والباقي تره انهبن

الما جت اتزورك دزت ترچيه انذور
نذرتها ابيوم الگالو نسبي لخدور
گالت ياربي موتني ابطلعت عاشور

شلي ابعمري وايامي
واحسين انذبح ضامي
لا . وامشي مع الشامي زينب يا زينب
________________________________

لمن تِصلين گبر الحسين
او نويتي ازياره يازينب

يعمه افداچ نيابه اوياچ
أذكري گلبي المتعب

كتبي اعله الگبر بنتك گاتلها الشوگ
يامن صدرك ابحافر اصبح مسحوگ
گلب ارقيه ضل لجلك يسعر محروگ

تتحسر يوالدها
والدمعه اتحفر خدها
يمك محد ايردها. زينب يا زينب
________________________________

من اتسمعين حسرات احسين
كفي امن النعي كفي

لان ياذيه حچي التحچيه
هو ابحزنه متكفي

لتگليله بيه اشصار من ضربوني ابخدي
من چتفو ادي بحبال من سبو علي جدي
لتگليله محروگات اجدامي والجرح يدي

أحنين ميحمل شكوى
يامن عمري اله فدوه
يسوه هل تعب يسوه زينب يا زينب
________________________________

ابخرابة شام گلب معتام
تتلاهب تضل ناره

انحرم مولاي شراب الماي
وانا المحرومه الزياره

خيرني الدهر مابين اصبر والصبر علگم
لو دنيا بلايه احسين واخلص عمري ابماتم
گليله اشتريت الموت لنه امن الهجر ارحم

نامت بالگبر خاطر
ما تتذكر الحافر
او لا تبقه ابأمل باچر زينب يا زينب
________________________________

ابو فاطمة الطائي

49 الانصار

نادتهم كربلا هلا بيكم ياهلا
______________________

هلا بوجوه الفَلحه
ليقدرون المُلحه
انتم بالطف نفحه
من الله امنزله هلا بيكم ياهلا

أنصار أبن الزهره
نار او تسعر كَبره
خلوها الطف حمره
او زلزال امزلزله هلا بيكم ياهلا

واحدهم چن آيه
نزلو المسنايه
اشويه بس اهوايه
بل غيره او مرجله هلا بيكم ياهلا

چن نار الحراگه
يوم الصار املاگه
انشال الطف من راگه
او رجو رج ابهله هلا بيكم ياهلا

بن ظاهر دايسهم
ثوب الذل لبسهم
امن الخوف اميبسهم
قادتهم معوله هلا بيكم ياهلا

وابن القين اتشوفه
علو الغيم اچفوفه
ابصولاته المعروفه
خلاها امجندله هلا بيكم ياهلا

او عابس عنه اشنحچي
خل العسكر يبچي
الكل شارد يشچي
بيه الجيش ابتله هلا بيكم ياهلا

او سيف الحر ايلالي
ينحر وين العالي
الآف او ميبالي
وايگول اگليّله هلا بيكم ياهلا

شذكر منهم شنسه
الموت الهم ونسه
تخسى اعداهم تخسه
ذوله اهل المنزله هلا بيكم ياهلا

كحلة عين الناظر
كشخة يوم العاشر
ما يوصفهم شاعر
مهما عنهم ملى هلا بيكم ياهلا

____________________

ابو فاطمة الطائي

50. الحسين عليه السلام

حملناك هويه
عرفناك قضيه
هويناك سويه ... ياحسين
_______

لولاك الله والله منعبده
او لانعرف التكبيره والسجده
الدين دمك ساگي اهروشه
يل جدّه منه او هو من جدّه

انت الحمد والقدر انت السور كلها
انت الصحف والكتب من ربي نزلها
انت عدن والعدن ما تسوه من دونك
سورة عشگ خدمتك يومية ارتلها

للعيون ضواها
للگلوب هواها
للارواح دواها ... ياحسين
_______

اهواك انت انت لا غيرك
يلي العوالم عايشه ابخيرك
وين الگه مثلك باسط اچفوفه
بس الله يعرف شنهي تفسيرك

ليك الوجه وَجهت يا وِجهت آمالي
او ليك العمر فوّضت ياسيدي الغالي
ناصيَـتي او مهجتي دلالي وانظاري
يابو علي الحضرتك من هسه للتالي

يساكن دليلي
يخلي او خليلي
افرشتـ لك شليلي ... ياحسين
_______

فارش شليلي او فاتح أيديني
يل عودتني اهوايه تنطيني
هل مره جيتك عازتي عازه
عاشور هاذه اهواي بچيني

عندي طمع اعترف من اطلب ابكثره
وانت الذي ماتِهم من تنطي للفقره
جاي او ردت بالخدم بيدك تسجلني
رايد دموع او حزن رايد الف عبره

تزود دمعتي
حسرتي او عبرتي
اتقبل خدمتي ... ياحسين
_______
يامن خدمتك عز بلا ذله
والطاخ راسه اوياك يتعله
انت اتعرفني اشبيه ما بيّه
غيرك ابد انطيني ما گله

أمد أدي بس الك وانت الي تترسها
خل دمعتي بس الك والغيرك احبسها
منهو الذي يسوه أن ابچيله لو لحضه
غيرك يل امصيبتك لحروفي تخرسها

يمكسور يضامي
يمذبوح يدامي
اويلاه أمامي ... ياحسين
_______

امصابك غميج او لوعتك كلفه
أطوال السنين او هيه ما تشفه
أكبر هظيمه الما أله أمروه
لسه او بعد ضل بيك يتشفّه

ضلعك طحن ينطحن والشامت اتبسم
من يستمع للكسر ينظر عل امخيم
چن يگل للحرم ها هم تسمعنه ؟
رايد يرى زينبك گدامه تتألم
يصد وايتباها
والخدور لگاها
تصاعد بچاها ... ياحسين
_______

رغم السنين او طولت المده
الشامت هذاك انجاوبه انرده
انت ابجهنم انت واسيادك
او باقي الحسين او معتلي السِدّه

باقي او بقت هيبته عل عالم اتسيد
مثل السما مرتفع لا ما يحده حد
املاك او بشر لا تُعد تتسابق البابه
ومن السما خدمته مثل الرزق تنعد

رغم عل يضدنه
الحسين عشگنه
هويناه او يحبنه. ... ياحسين
_______

ابو فاطمة الطائي

51. القاسم عليه السلام

حنه او شمع فرحه او دمع
عريس عمره اربعـ ـطعش عام
متروس جسمه ارماح واسهام
حنه او شمع حنه او شمع
______________________

مشدوه بالي او ما ركد والدمع من دم ساجم
مطرور گلبي اشما يمر طاري المعدل جاسم
ريحانه من غصن النبي جذوة جمر من هاشم
گالتله رمله أبكربلا يمه زهابك والم

سيف اودرع فوگ الضلع
والحوفه يبني بين الاصفوف
فوگك تطش ارماح واسيوف
حنه او شمع حنه او شمع
______________________

ما أنسى لوعة أمه من جاسم برز للحومه
يابس گلبها امن الذعر واتعاين اعله ارسومه
تدعي يرب ابفاطمه خل يومي يسبق يومه
مابيه أشوفن ضنوتي متحني من ادمومه

خل انطعن خل اندفن
بس ردلي جاسم كلشي مابيه
ياربي آنه ابروحي افديه
حنه او شمع حنه او شمع
______________________

خيل او عجاج او مذبحه ضاعت عليها اخباره
متكاثر اعليه الطعن الشيب گلبها اصياره
گامت تحوم اعله الخيم ما تدري شنهي الچاره
جسام ما تسمعله حس والگلب وجر ناره

أتخر عَلَي لا ياعلي
أسمع دفوف او ضحك واصياح
جسام بس لا منچتل طاح
حنه او شمع حنه او شمع
______________________

أشويه او تشوف احسين اجه شايل ولد بمتونه
لا چنه شو گوه أيحچي والدمع ترس اعيونه
ملهوفه رمله اتلگته مولاي أبني أشلونه
گللها يا رمله الولد مات او تغير لونه

مي ما شرب جاسم تعب
ذبحوه من الجاري محروم
او يا ثوب عرسه املطخ ادموم
حنه او شمع حنه او شمع
______________________

يا حالها ايبچي الصخر اوحيدها رايح منها
امجابلته واتنازع غدت للسمه واصل ونها
جسام يل ردت ذخر ليش امك اتوهدنها
چا ألمن امجهزه العرس والحنه ليش اعجنها

يمه اشگلت. لمن متت
أمك عفتها يا ضوه العين
متگلي بعد اتجه وين
حنه او شمع حنه او شمع
______________________

بس افتح اعيونك الي يمه رحتلك فدوه
اعصرلك اعيوني عذب واشرب لحدما تروه
يا يمه أرحم شيبتي ظهري عليك اتلوه
اشيطلبني يا طف كربلا وابروحي هيچي سوه

ضاع العمر. مات الصبر
يا ريت موتي ايحين هل ساع
او نتوسد آنه اوياك بل گاع
حنه او شمع حنه او شمع
______________________

ابو فاطمة الطائي

52. الاكبر عليه السلام

دنياي والمآي ذبحني اتلث مرات
مِن راح مِن طاح من گالو الاكبر مات
اعليه اباوع مِن ينازع گمت انازع
من گالو الاكبر مات
______________

بس عجاج او ركضه ينظر كربلا انگلبت عله ابنه
او يسمع امصايح سلفهم خل نگطعه اهنا ندفنه
او لن ابو الاكبر تغير لونه والونّ اليونّه
صارت أنفاسه أتگطع چن رماح او صوبنه

أيشوف السيوف اتطفر دم او أشلاء
أصياح وارماح او دگ اطبول الاعداء
أمة الشر شي تبشر شي تكبر
من گالو الاكبر مات
______________

كربلا انترست شماته او بل حُسين الكل تشفّه
او بيًن أحسين انكساره او دمعه ضل علخد يذرفه
هرول اعله اوليده لاچن حيل ماعنده او يسعفه
وصل يمه او كلّه يرجف ويل گلبي چنه سعفه

ألفاه او يلگاه ماكتر السالم بي
مذبوح واجروح من راسه الحد رجلي
جسمه بل بر قد تبعثر اشگد تحسر
من گالو الاكبر مات
______________

ينظر اوليده او تحسر ليش هيچي الله او لحد
خضب الشيبه ابدموعه عل ترب وياه تمدد
روحه طلعت من يشمه او فوگ خده ايخلي الخد
ايعاتبه ايگله يبويه امنين لي عگبك محمد

شماه حاچاه يبني تگعد لو اموت
بيديه ايهز بي وما ضل ابگلبه ابتوت
گلبه طاير حيله خاير حيره حاير
من گالو الاكبر مات
______________

آنه ابوك الما له غيرك بويه يا سباح گلبي
يبني چا بعدك عليمن بويه هاي اعيوني تربي
ثاري لسيوف المنايه اتعب او أحسب وأربي
علي بويه اعيوني راحن گوم دليني اعله دربي

أوحيد يا حيد ليش اتخليني اليوم
واسيوف واصفوف متحزمه اعليه الگوم
شو عفتني وحدي يبني عالي وني
من گالو الاكبر مات
______________

بويه معتازك يل اكبر طايح ابشده واربدك
بويه راح ايحز وريدي نفسه سيف الحز وريدك
موش وكت النوم دگعد اخذ من دمي الوريدك
الخاطري والخاطر أمك يالله گوم انطيني ايدك

انخاك ابلياك ارجع لخيامي اشلون
اهناك تتناك ليلى ابگلب المسحون
شرد أگلها يا أملها ايحين اجلها
من گالو الاكبر مات
______________

تقبل اتضل نايم انت والشمر يذبحني ضامي
يبني ترضه اخيول اميه تسحگ اضلوعي او عظامي
يبني شو گوم الخواتك راحن ايوجن خيامي
امك او أختك يروحن للسبي واني ابقه دامي

بس عود واردود احفظ خدر النسوان
مو خاف تنشاف خيّاتك بالديوان
ما يجاوب او عل ترايب لونه شاحب
من گالو الاكبر مات
______________

ابو فاطمة الطائي

53. السيده زينب

ويلي وويلاه ويلي وويلاه

وينكم يهل الحميه ويلي وويلاه
گومو زينبكم سبيه ويلي وويلاه
دم مدامعها جريه ويلي وويلاه
اتحشم او محد حماها ويلي وويلاه

عالو بيها يهل الغيره
عالو بيها يهل الغيره
________________

ليش عفتوها يهلها ويلي وويلاه
امحيره او مايل حملها ويلي وويلاه
القهر والهم كتلها ويلي وويلاه
السوط والدگ ورماها ويلي وويلاه

لا يل ساده گومو الزينب
لا يل ساده گومو الزينب
__________________

بالشمس جابوها والحر ويلي وويلاه
والخگ كلها اتفكر ويلي وويلاه
امچتفيها الله واكبر ويلي وويلاه
والحبل زود بچاها ويلي وويلاه

ضل امچانه للموت ازرگ
ضل امچانه للموت ازرگ
_____________________

لا ابن أم باجي عدها ويلي وويلاه
او ينظر الدمعه اعله خدها ويلي وويلاه
لا ابو لا جاها جدها ويلي وويلاه
اتفزع او محد اجاها ويلي وويلاه

من الساده ما واحد هد
من الساده ما واحد هد
_____________________

وين عباس الكفلها ويلي وويلاه
يرخي الحبال او يفلها ويلي وويلاه
او يمسح الدمعه التهلها ويلي وويلاه
او يفگس اعيون السباها ويلي وويلاه

يل عباس اتريدك زينب
يل عباس اتريدك زينب
___________________

محد ألها او تشتكيله ويلي وويلاه
او محد ايرد المعيله ويلي وويلاه
لوعوها. او عل هزيله ويلي وويلاه
الشمات احجاره رماها ويلي وويلاه

وايسب بيها وايسب حيدر
وايسب بيها وايسب حيدر
____________________

الوادم اعليها تگاطف ويلي وويلاه
اوهيه مچتوفه اشتشاگف ويلي وويلاه
الگلب والريج ناشف ويلي وويلاه
الشام يابلوه بلاها ويلي وويلاه

يٱخذ منها ثارات أحد
يآخذ منها ثارات احد
__________________

ابو فاطمة الطائي

54 مسلم بن عقيل

ياحي الله اجه الحيد
اليحسبها الحرب عيد
___________________

من عدهم خَذه الحيف
دِخِيل الله اشهل سيف
عطلها القوانين
المتى . والاين . والكيف

يمين اتشوفه وايسار
جمعهن ليل وانهار
الكوفه صاحت الغوث
ما تعرف شني الصار

مادرو هاذه السيف أَم المحشر؟؟
مادرو هاذه السيف أَم المحشر؟؟
______________________

ليفوگ ارتفع راح
يهوه چن جبل طاح
يطحن بالزلم گام
جمله يقبض ارواح

سكته او ماسمع صوت
رهبه او موزمه او موت
گام اتطيح الابطال
لو من يمهم نوه ايفوت

سيفه ايچوي الغيوم من يدناله ؟؟
سيفه ايچوي الغيوم من يدناله ؟؟
________________________

زلمه او ما أله أشباه
او بي اكبر عقل تاه
واحد لاكن اهواي
وين اتروح تلگاه

اهنا. واهناك واهناك
اشويه او غار مناك
مادرو يجي امنين
هاذه اوينه . لا ذاك

چن مارد سليمان فرهم بيده
چن مارد سليمان فرهم بيده
______________________

اهو تربات الافحول
عنه اشما ردت گول
هيبة جم نبي بي
حير كل الاعقول

شديدا حيل ذو باس
مسلم بيش ينقاس
عوزه اشويه وايصير
راعي الجود عباس

اول زلمه واحسين. بي متحزم
اول زلمه واحسين. بي متحزم
_________________________

آيه امن السمه جاي
مثله كون اكو اهواي
چا مامات الحسين
بالطف چا شرب ماي

مسلم وفه الاحگوگ
عنده احسين معشوگ
صانع لجله آيات
شگ احلوگ واحلوگ

تبچي اجيال واجيال خله الكوفه
تبچي اجيال واجيال خله الكوفه
________________________

مرسول امن الحسين
او خيّال الميادين
تحطه اعله الجرح طاب
مسلم كحلة العين

معدن داحي الباب
اي وامحير الالباب
خالد ذچره لليوم
او باقي اليوم الاحساب

صفره اتصير الاوجوه لو مر أسمه
صفره اتصير الاوجوه لو مر أسمه

__________________________

ابو فاطمة الطائي

55 ليلة الدفن

يا دفان اخوتي ارجوك مر بيه
سولفلي على المتروس حنيه
______________________

يا دفان اخوتي اشمالها اعيونك
اشوف امن البواچي منخطف لونك
دفن احسين هاذه امهدل امتونك
سولفلي تراها الروح مچويه
______________________

يا دفان ابو السجاد شعلومه
غسلته ابدمع لو راح بدمومه
بعدهي ريحة الزهراء بهدومه
ارسومه اتغيرت لو هيه هيه
______________________

يگلها والدمع يتفايض ابخده
يا حيره الحرتها امن احفرت لحده
اوسده اشلون ابوي اوراس ما عنده
مرمرني ابدفنته او موت ايديه
______________________

يا عمه لگيت اضلوعه ما هنه
على آثار الحوافر صرت أجمعنه
مثل خرز السِبح لحسين المنه
واصبع من ادينه ضايع اعليه
______________________

لمن ردت اشيله او بل دفن ابدي
أو صاله حيرني او گطعن چبدي
اشيلن هاي توگع هاي من عندي
ما ضل عندي راي او لابگت نيه
______________________

لملمته ابحصيره تالي ما تالي
بلا غسل او چفن واريته الوالي
بس بخّيت نحره ابدمعي اليلالي
عسنه يبرد او يرتاحله اشويه
______________________

يعمه والگمر ريتچ تشوفينه
دفنته الوحده ما هنه چفينه
يون نحره او سمعته يذكر اسكينه
چنه يعتذر منها اعله الميه
______________________

كافي امروتك گالتله يا عمه
خليت الگلب يتعصر ابهمه
يريت آوياه متت واتوسدت يمه
چا شلي بحياتي او آنه مسبيه
______________________

ابو فاطمة الطائي

56. الخدمه الشريفه

يل خِذت عگلي او دليلي يا شريچي بالنَفس
والله احبك والله احبك والله احبك انت بَس
_______________________________

بالحواس الخمسه احبك بل مشاعر بل نبض
احسين هيه اشبيها غيرك شي حلو هاي الارض
كلشي بيها على روحي من عرضته ينرفض
احسين غيرك ماتريده اليوم باچر والامس
_______________________________

الما يحبك يبو سكنه عگله بي الف خلل
ما عرف طعم العذوبه مشربه بس المُهل
يا جلال الله او جماله البيك مسحوره المِلل
الحمد لله ان فؤادي يشعر اوياك ابـ أَنََس
_______________________________

حبك او هاي الخدامه هيه فخري والشرف
مجلسك والدمعه عندي تسوه أهلي والسلف
چني سلطان او مقدس يوم بل مجلس اگف
راسي يوصل للثريه او ثوبي بالعز انترس

_______________________________

الدين والقرآن انت والاصول او كل فرع
ما يتم توحيد ربي الا اجريلك دمع
والعقائد كلها تكمل يوم الطم عل ضلع
يامن الجنات كلها من ضيائك تقتبس
_______________________________

أحسين أحبك مو احچايه بل لسان او عابره
لا وحگ حسرات زينب والزچيه الطاهره
جلدي او لحمي او دمي . گلبي . عيني الناظره
كلهن ايحبنك انت عشگ بالفطره انغمس
_______________________________

آنه عاشگ آنه خادم آنه كل عمري الك
أوياك ما أمشي اويه غيرك أي يربان الفلك
شغل ويه الناس مالي گلبي لدروبك سلك
بل أمن بل راحه بل حب هل گلب وياك حس
_______________________________

مجلسك يومن اجي له والله احس روحي ترد
او چني ريشه في مهب الريح يوم الابتعد
احسين الزمني بدينك لزمة الحر للعبد
حطني بحسينيه اخدم خلي نيتي ابلا دنس
_______________________________

خلني اخدم بل مجالس راحتي ابهاذه العمل
اشويه ابچي اشويه انعه أشويه ارد المستهل
او كون وآنه ماي أوزع روحي ياخذها الاجل
وابمحرم موتي أريده هاذه منك ألتمس

_______________________________

أبو فاطمة الطائي