فتحة عزاء الليلة الاولى

قميصك نشرته الزهراء وادموع الحزن هلن
واويلاه يا سيدي واويلاه يا سيدي

__________________________________

مابين السمه والگاع قميصك فاطمه اتنشره
وتعلن بل جنان احداد الليله اموهدنه الزهره
كل اقصورها الفردوس بيهن تعزيه او عبره

والحور البسن أسود لمصابك تون واتحن
واويلاه يا سيدي واويلاه يا سيدي

__________________________________

الليله ابكل گلب يحسين آذان الحزن أذن
الليله ابكربلا امن اجديد بل بر الحرم هجن
الليله اخيولهم ردت فوگ اضلوعك ايدبچن

مثل مردت دليلك هاي اعيوني امن البچي انمردن
واويلاه يا سيدي واويلاه يا سيدي

__________________________________

قميصك نشرته الزهراء وابكتره تهل دمعه
عبرتها تشل الحيل جبل لو واجف اتصدعه
من عاشر لحد هل يوم تنعه اعله الولد تنعه

بيك الف او تسمعية جرح واضلوعك انتثرن
واويلاه يا سيدي واويلاه يا سيدي
__________________________________

هل اهلال احزانك او هيًج بل زچيه اجروح
او غدت بين المجالس دوم دمعتها تصب واتنوح
تدور عل يواسيها اعله ابنها المن گفه مذبوح

تنادي ابني انذبح عطشان والله اشفافه انفطرن
واويلاه يا سيدي واويلاه يا سيدي

__________________________________

قميصك يا جمال الله ابيا حاله ينشرونه
موش ايفتح العميان يوم الي يشمّونه
بل الشافه يامولاي تعمه امن البچي اعيونه

ايتوصف هل قميص اشلون؟. اوصافه علي كلفن
واويلاه يا سيدي واويلاه يا سيدي
__________________________________

الليله خضرن الجروح اهلال الحزن يلچمهن
جرح العطش جرح النار جرح السبي رد الهن
زينب هل مسيه اتلوج تريد اعتاب كافلهن

يهلال الحزن للشام مسبيات هل ردن
واويلاه يا سيدي واويلاه يا سيدي

__________________________________

ابو فاطمة الطائي

فتحة عزاء الليلة الثانيه

خدامك يبو السجاد تفديك ابمناحرها
ويلي اعليك ياسيدي ويلي اعليك ياسيدي

__________________________________

شعار اسمك يبو السجاد نرفعه اوبيه نتفاخر
نريدك انت لا منريد يملكنه شخص آخر
انت الملِـك بالدارين دنيا او عالم الآخِر

حلو حتى الالم وياك يعيوني او نواظرها
ويلي اعليك ياسيدي ويلي اعليك ياسيدي
________________________________

حلو حتى الالم يحسين او بي نشعر دوه النه
ما نتهنه بل لذات ابّچينه اعليك نتهنه
الزلم تخجل تهل العين .او بل دمعه تفاخرنه

اليحبك من صدگ مولاي دم دمعاته يهملها
ويلي اعليك ياسيدي ويلي اعليك ياسيدي
___________________________________

شعار انت او وطن يحسين يامن خدمتك رِفعه
يمن لولاك ما نعرف انخلقت المن الدمعه
بَچينه مو رياء اعليك لا والله ولا سُمعه

بلكي ابدمعتي مولاي الك چبده ابللها
ويلي اعليك ياسيدي ويلي اعليك ياسيدي
____________________________________

نحبك مو طمع يحسين او لا دورنه كل مغنم
لچن نعرف اذا ردنه الكمال انحصله بالماتم
دين انت او فرض عالروح الما حبك فلا اسلم

سفينه انت لهل لذنوب. او كل صعبه تذللها
ويلي اعليك ياسيدي ويلي اعليك ياسيدي
____________________________________

شنهي دنيتي ابلياك رخصيه او خير ما بيها
يمالكني امس واليوم او باچر والتواليها
بايعلك بلاش الروح ابعطفك سيدي اشريها

خاطر ما ازل وابعد او تالي النار ادخلها
ويلي اعليك ياسيدي ويلي اعليك ياسيدي
____________________________________

رحمه ابهيئة الانسان الله امنزلك النه
صحنك جنة الفردوس او گعدت مجلسك جنه
يعشگك چن عسل مختوم لا ما ينشبع منه

واكبر نعمه الي يحسين لو هل دمعه تقبلها
ويلي اعليك ياسيدي ويلي اعليك ياسيدي
____________________________________

ابو فاطمة الطائي

فتحة عزاء الليلة الثالثه

عليله او فارگاها احسين الله ايعين مهجتها
وايلاه يل فاجده واويلاه يل فاجده
__________________________________

عليله او فوگ علتها صوبها الدهر بصواب
ودعها عزيز الروح او ضلت موچبه عل باب
مثل نعي ام ولد غرگان تنعاه ابدمع سچاب

يومين او ترسها الشيب او نار الفرگه حرگتها
وايلاه يل فاجده واويلاه يل فاجده
__________________________________

مُرّ افراگ ابو السجاد نبي ما يگدر ايجرعه
العليله يا گلب عدها لمن گامت اتودعه
هل موقف اوصفه اشلون وبيا طور ألها انعه

تگله الساع طاب الموت واختنگت ابعبرتها
وايلاه يل فاجده واويلاه يل فاجده
__________________________________

تگله لو بديه الموت ساعه ما اضل بعدك
شلي ابدنيتي يحسين اذا مو گعدتي ابسدك
اذا مو كل صباح الگاك وحط خدي على خدك
الحياه والموت چا يحسين نفس القيمه قيمتها
وايلاه يل فاجده واويلاه يل فاجده
__________________________________

عليله ابنيّتك يحسين واعتابي غصب عني
چا منهو اليداريني وايدوّر دوه الونّي
وره الحادي اشكثر ناديت ولا منكم صرت چني

بح صوتي ولا تسمعون بنتك ليش ضلتها
وايلاه يل فاجده واويلاه يل فاجده
__________________________________

اگول اشويه وايرجعون بس محد رجع ليه
لما چلچل عليه الليل وآنه امناطره الجيه
لا اگدر اضل بل چول و ارد للدار مابيه

لا سكنه ولا ارقيه ترد عل روح وحشتها
وايلاه يل فاجده واويلاه يل فاجده
__________________________________

ابوحشه داركم ضليت انون الليل وانهاري
وازيد من دمع يعگوب اعليكم سال مداري
لاني الميته يحسين ولا آنه الطفت ناري

وانه مدري اشجره اعليكم بل طف او شريعتها
وايلاه يل فاجده واويلاه يل فاجده
__________________________________

ابو فاطمة الطائي

فتحة عزاء الليلة الرابعه

گلبي اعله السبط مالوم منهو اليرحم اونينه
واويلاه من كربلا واويلاه من كربلا
__________________________________

عگب ذاك الزمان البي چانت دنيتي تانس
اشوف احسين كل مصباح والروحي فرح تارس
اوبنيني الاربعه ويّاي تضوي ليلي الدامس

شعب گلبي سهم الفراگ الما تخطي نياشينه
واويلاه من كربلا واويلاه من كربلا
__________________________________

شِعب گلبي الزمان احّاه واخذ كل غالي من عندي
الولد من الچبد گطعه اومني انوخذ كل چبدي
واخذ منّي الأعزّ منّي عليّه او أعز من وِلدي

تكتل فرگة المحبوب . ربي هم يرد لينه ؟
واويلاه من كربلا واويلاه من كربلا __________________________________

زماني اوياي لا مو زين ابدلالي شچخ فاله
راح الما هويته ايروح او عزرائيل يبراله
وبـ [هل اتى عل أنسان ] طول الدرب يقراله

خذاه الوادم ايبغضوه او محمد جده ناسينه
واويلاه من كربلا واويلاه من كربلا
__________________________________

لولادي فلا هميت بس احسين شاغلني
اون خلاني طول الليل بس اشفايدة وني
دمعي ما يرد الراح . ربي امروتك ابني

يربي كلشي بعد ماريد بس احسين اريدنه
واويلاه من كربلا واويلاه من كربلا
__________________________________

لعب بيه الزمن ياحيف او صارت خاليه داري
الچانت زاهيه ببدور او بيها احسين خطاري
صفت بس للحزن والآه اونوح الجزًع الجاري

يگلولي جثث عل گاع كل منهم امگطعينه
واويلاه من كربلا واويلاه من كربلا
__________________________________

ضحايه امجزره اعله الشط واحد من بعد واحد
واحد رضرضنه الخيل وابصدره الشمر گاعد
او واحد ضل بلا چفين وابعينه السهم راكد

لا والي البقه منهم والكل غمّضت عينه
واويلاه من كربلا واويلاه من كربلا
__________________________________

ابو فاطمة الطائي

فتحة عزاء الليلة الخامسه

ويلي اعليه بل كوفان مسلم ما اله ناصر
واويلاه يمصيبته واويلاه ياحيرته
__________________________________

وگف بين الجموع اوحيد لا خوّان لا بن عم
مِغبره الكوفه جيش او خيل والقادات تتحزم
وادم ما تعرف الدين ولا بيهم بشر يفهم

گلوب التبعت الشيطان يطيعونه وهو اليآمر
واويلاه يمصيبته واويلاه ياحيرته
__________________________________

الكوفه مغلجه البيبان او كل ادروبها انسدت
الچانو بل امس اسلام چنها اعله الكفر ردت
شيّاب او شباب اعليه شالت سيفها او هدت

كل ضنهم يرهبونه . او هو الكل خشم كاسر
واويلاه يمصيبته واويلاه ياحيرته
__________________________________

كل ضنهم يرهبونه وهو تربيت حامي الجار
ما يدرون اذا زمجر او جر ابيمنته البتار
فنه الضل عدل منهم او فنه الراسه ما يندار

فحل تربات حامي الجار ذاك الما رجع خاسر
واويلاه يمصيبته واويلاه ياحيرته
__________________________________

اجت ليه الجيوش اسيول واطبول الحرب تُقرع
لن طوعه تهلهل له بس ابحشرِجه او مدمع
يگلها دمعتچ عدنه عزيزه او ما ردت توگع

وحگ الفلق والتوحيد لفرحچ واجبر الخاطر
واويلاه يمصيبته واويلاه ياحيرته
__________________________________

يطوعه اليوم حامي الجار ارد بالكوفه افعاله
لخلي النايحه ابكل دار والونات تتعاله
واخلي ابن الدعي ايشوف كون اسحگ عله ارجاله

واشوفه افعال زلم احسين يوم اتجرد الباتر
واويلاه يمصيبته واويلاه ياحيرته
__________________________________

يطوعه ما يهمني الموت انه الموصوف موت احمر
او ما دام اعله درب احسين يا اهلن بل امگدر
هلا بل موت ما دامي خذت حيفي او خذت اكثر

رابح بل حرب ودماي بيها اويه السمه امتاجر
واويلاه يمصيبته واويلاه ياحيرته
__________________________________

ابو فاطمة الطائي

فتحة عزاء الليلة السادسه

ابروحي مسعره نارين لجل انصار ابو اليمه
واويلاه . ويلي اعليهم واويلاه . ويلي اعليهم

_____________________________________

اريد انعه على الانصار حد ما تنشف الدمعه
مثل الفاجده الويلاد على الانصار خل ننعه
گضو حگ الوفه لحسين اهفتو شمعه بثر شمعه

ابيوم الطف بواترهم متربعه على القمه
واويلاه . ويلي اعليهم واويلاه . ويلي اعليهم
_____________________________________

سلام الله على الانصار ما دامت شمس تطلع
سبعين الوفو لحسين منهم روحي ما تشبع
اذكرهم صبح واغروب واحسّن بيها ما تقنع

أنعه الهم أون الهم والناظر يهل دمه
واويلاه . ويلي اعليهم واويلاه . ويلي اعليهم
_____________________________________

سبعين ابفرد مصباح طاحو دون ابو اليمه
تنافس عدهم اعله الموت كل واحد يريد اسمه
الوگع منهم يگع فرحان چي منطي السبط دمه
لجل احسين قايدهم يحسبون الجرح نعمه
واويلاه . ويلي اعليهم واويلاه . ويلي اعليهم
_____________________________________

لجل احسين كل من صاح خل آنه أموت اول
حبيب ابشيبة ولهان يوم اعله الحرب حول
يصيح الموت وين الموت ليش اعليه شو طوّل

اموت او احيه للعطشان يامحلاها هل خدمه
واويلاه . ويلي اعليهم واويلاه . ويلي اعليهم
_____________________________________

حلم ريته واموت واياك وارجعلك عدل مولاي
وارد انوب اموت اهنا ضامي او ما اضوگ الماي
لحد سبعين موته انموت ولا گولن عليك اهواي

مناحرنه يهيبتنه اوياك اوياك ملتزمه
واويلاه . ويلي اعليهم واويلاه . ويلي اعليهم
_____________________________________

گضو والروح مستعره عليهم تلتهب نارين
ماتو والدمع مدرار چي باقي وحيد احسين
واعليهم ابو السجاد ضلت دمعته بالعين

ضل وحده بلايه انصار يريت اعيوني اله تعمه
واويلاه . ويلي اعليهم واويلاه . ويلي اعليهم
_____________________________________

ابو فاطمة الطائي

فتحة عزاء الليلة السابعه

زينب يا اخو زينب چاتلها الحزن والهم
واويلاه يابا الفضل واويلاه يابا الفضل
______________________________

دخيلک يا گمر عدنان زينب لا تجافيها
اجت الكربلا بحماك وانت اتكفلت بيها
لو صبّح صبح عاشور لا تمشي او تخليها

ضلت عينها امن الخوف تتهامل او تگطر دم
واويلاه يابا الفضل واويلاه يابا الفضل
______________________________

تناديك ابدمع سچاب يخويه لا تضيعني
يودعني رغيد العيش يوم الي تودعني
او خدري يابعد خدري ينخاذ او غصب عني

شني نيتك دباصرني يابدر الدجا الاضلم
واويلاه يابا الفضل واويلاه يابا الفضل
______________________________

شني نيتك تريد اتروح ؟ او زينب چا منو الها ؟
اعلمود الماي ناوي اتموت ؟ والزينب تعلعلها ؟
ابيش الروح اصبرها ؟ امن اتريدك شگللها ؟

بس ابقه يضي العين خلنه امن العطش نعدم
واويلاه يابا الفضل واويلاه يابا الفضل
______________________________

شريچ ارويحتي لتروح امشي اعليك ضلع امي
النهر من اسمع ابطاري يگف گلبي او يجف دمي
اخاف اتروح والذباح يجي او يحرگهن اخيمي

اركض واعثر ابهمي اگباله او هوه يتبسّم
واويلاه يابا الفضل واويلاه يابا الفضل
______________________________

گلي لو رحت للماي او مارديت الي سالم
يعباس اشتضن بالله ترحم زينب الوادم
شگللهم اذا سبوك او سبو حيدر او فاطم

او ولا فزاع گللهم متنها امن الضرب ورم
واويلاه يابا الفضل واويلاه يابا الفضل
______________________________

دخيلك يا صبي العين چاره اوياك سويلي
لو نيتك تموت اليوم خويه او يابعد حيلي
اموت اوياك خليني او من ادماي تغسيلي

يعافيتي او بدر ليلي العمر بعدك عسن لا تم
واويلاه يابا الفضل واويلاه يابا الفضل
______________________________

ابو فاطمة الطائي

فتحة عزاء الليلة الثامنه

يجاسم گلبي مرمرني عله اوداعك فلا يگدر
واويلاه يبن الحسن واويلاه يبن الحسن
__________

يعگلي اويا نظر عيناي يلب احشاي حاچيني
جاسم يمه بيّه اشلون لو ناوي تچافيني
عدمن يا شريچ الروح من تمشي تخليني

الخاطر شيبي واسنيني جاوبني يل أمشكّر
واويلاه يبن الحسن واويلاه يبن الحسن
__________

يحلم اصباي اذا ماشي او ما ناوي عليه اترد
اخذني وياك للميدان سويه انموت وانمدد
اشحلات الموت يومنّك تشابگني او عليه اتصد

واموتن يل ولد وياك واحط النحر عل منحر
واويلاه يبن الحسن واويلاه يبن الحسن

__________

اجتني كربلاء امنين او ذبحت كل حلم ليه
يجاسم وين چنت احسب واعيد احسابي يوميه
تكبر وافرح ابعرسك وازفك يمه بيديه

يجورية انبتت بل روح غصنها اتلوه واتكسر
واويلاه يبن الحسن واويلاه يبن الحسن
__________

غصن من الهرش مكسور ابوادي كربلا اتلوّه
ترف يا كربلا اوليدي توّه اربعطعش توّه
عليمن ينذبح عطشان او بل صمصام يتچوه

يوادم ابني اشسوه عليمن جسمه امطبر
واويلاه يبن الحسن واويلاه يبن الحسن
__________

عريس اعله راسه اسهام مو چكليت طشوله
يسمع بس صرير اسيوف ما سمعان هلهوله
وگع متخضب ابدمه يمن فدوه اشحلو طوله

او ماي اهناك جابوله امن ايد الطاهره الكوثر
واويلاه يبن الحسن واويلاه يبن الحسن
__________

رايح من أدي جسام او ضلت عيني للدمعه
رايح والبچي شيفيد لو كل العمر انعه
جاسم راح من عندي اعليه بعد شيرجعه

گضه لجل الخدر شمعه ضواها اتبده واتبعثر
واويلاه يبن الحسن واويلاه يبن الحسن
__________

ابو فاطمة الطائي

فتحة عزاء الليلة التاسعه

شبيه المصطفى يحسين بيك اشسوه لمن خَر ؟؟
واويلاه على الاكبر واويلاه على الاكبر
____________________________________

يبو الاكبر على الاكبر حگها الروح من تطلع
حرام الجزع بالتشريع بس لجله وِجب اجزع
امن اذكره او اذكر التوديع اهيّس گلبي يتگطع

تودعه او ليك ما يرجع ضل گلبك لهب يسعر
واويلاه على الاكبر واويلاه على الاكبر
____________________________________

يعينك الله يامولاي للتوديع شابگته !!
من طولك هويت اوياه مدري اشلون ودعته
گلبك يابو سكنه اشگال اشلون او بيش صبرته

گبالك ينذبح ويلاه ضامي او چبده اتفسر
واويلاه على الاكبر واويلاه على الاكبر
____________________________________

عفه گلبك يبو السجاد بل طف شِبتله بلوه
تشوف اوليدك ابعيناك من الطعن يتلوه
واهو مرمي عله التربان لا حول ولا قوه

اويلي بگبلك اشسوه. سبع طرات اضنه انطر
واويلاه على الاكبر واويلاه على الاكبر
____________________________________

يبو اليمه صبرت اشلون زين او ماتت قِبله
وانت تسمعه من يشهگ وي كل طعنه بالنبله
وجهه انترس دم واتراب الچان امن الگمر احله

هاي الما اضن سهله ولا بل شعر تتصور
واويلاه على الاكبر واويلاه على الاكبر
____________________________________

عفه گلبك رحتله اشلون يوم الفرفحت روحه ؟
او تمددت اعله طوله اهناك او گلبك مرتفع نوحه
ساعه ابمنحره اتشمه ساعه اتحسب بجروحه

او تگله امودع ابـ الله يبعد اعيوني يل اكبر
واويلاه على الاكبر واويلاه على الاكبر
____________________________________

امصابك يا أبو السجاد بوليدك يفت أگلوب
مثل طير العويدي اتنوح يمه والدليل ايلوب
تنعاه ابگلب مالوم او مدمع عالوجن مسچوب

او صرت يمه تگع واتگوم وابممشاك تتعثر
واويلاه على الاكبر واويلاه على الاكبر

____________________________________

ابو فاطمة الطائي

فتحة عزاء الليلة العاشره

الليله اوداع ويه احسين آه اشمكلف الليله
واويلاه ياسيدي واويلاه ياسيدي
____________________________________

ابخيمة زينب التمو او هاي آخر مسيه الهُم
او چني ابزينب الحوراء متچلچل عليها الهَم
تصد لحسين والعباس بالحسره او تگللهم

اطحن بالصبر چم دوب ولا من والي اشكيله
واويلاه ياسيدي واويلاه ياسيدي
____________________________________

يبو اسكينه تريد تروح او تالي اسنيني تجفيني
اعيش اشلون انا ابلياك يا روحي او نظر عيني
ابحليب امي احلفنّك وحدي لا تخليني

اخاف امن السبي يحسين خاف الشام امشيله
واويلاه ياسيدي واويلاه ياسيدي
____________________________________

يگللها الخلف بالله يزينب والوعد گرب
او لو طر الفجر باچر ما منّ الاجل مهرب
على گلبچ مرار او ضيم مثل صب المطر تنصب
اخوتچ باچر ابيا حال كلمن دمه تغسيله
واويلاه ياسيدي واويلاه ياسيدي
____________________________________

هاي آخر مسيه اوياچ بعد هيهات ما نلتم
مسية باچر اتلوجين لا والي ولا امخيم
اعيونچ والجدم وامتون من كلهن يسيل الدم

وجعهن حد طلاع الروح حيره الياهو تبچيله
واويلاه ياسيدي واويلاه ياسيدي
____________________________________

باچر عطش باچر موت يزينب شدي احزامچ
باچر كل بني هاشم ينذبحون گدامچ
يحرگون الخيام اعليچ ويسحگون ايتامچ

چم طفل التسحگه الخيل يصرخ محد ايشيله
واويلاه ياسيدي واويلاه ياسيدي
____________________________________

تگله احسين بيه اشلون والله اتحيرت بامري
اجتني كربلاء امنين او شلي عگبك ابعمري
بعد وجه الصبح ما طر وانه شح او خلص صبري
گبل طرت الفجر ياربت عليه اترابي اتهيله
واويلاه ياسيدي واويلاه ياسيدي
____________________________________

ابو فاطمة الطائي

هلاليه

اجيب المستهل امنين وابديها
قصيده او عن هِلالك شرد اخط بيها
___________________________

يهلال الحزن يمدوهن افكاري
قريحه ما بُقت وامشتته اشعاري
اذا بيك الحسين اموسد الذاري
ضامي اعله الرمل متسلب او عاري
مصيبه او هل مصيبه امنين ابديها
___________________________

مصيبه او بل عرش الها انعقد ماتم
قميص احسين منشور ابسماء الهم
عله العالم اشوفنه يگطّر دم
من عنده كتر سالم وسف ماتم
تصدله فاطمه او تنعه ابنعاويها
___________________________

تصدله فاطمه او تنعه بلف عبره
او تدور عل مجالس تنزل الزهره
وين الي على اوليدي ابهظم يقره
وين الي يدگ راسه او يدگ صدره
نار البل گلب وين اليطفيها
___________________________

باول ليله وين التهمل ادموعه
على العطشان واخته اگباله مفجوعه
تشوف اخيول اميه اتهشم اضلوعه
يا لوعه المثلها اتصير يا لوعه
بيمن ابتدي او ياهي الأخليها.
___________________________

انعه يا جرح . ياجرح اعوفنه
على العباس لو جسام المحنّه
لو لكبر علي اگعد واجر ونه
مدري انعه الخدر لخيامه ما هنه
الماضل عدها والي الي يحاميها
___________________________

ويلاه يل هلالك يلچم العتره
ابجيتك ما تضل چفيه لا غتره
محمد وي علي هاذه المسه ابحسره
من الشاطي للتل ثم يم نحره
ابو السجاد واجروحه اشيداويها
___________________________

ابو فاطمة الطائي

هلاليه

ياثار الله لمتانينه چم عاشوراء مر اعلينه
واحنه امضيعينك مولاي
يمته اتشرّب احسينك ماي
ياثار الله ياثار الله
_______________________________

وين انت سيدي ابهاذه المساء
أبِرضوى لو مشيت الكربلاء
واگف ابتبديل رايات العزاء
لو عله التله رحت تشبع بكاء

تبچي الوحدك دمعاتك دم اهلال امحرم حيلك هدم
هَلّ وامصوب گلبك داي
اجروحه اهواي اهواي اهواي
ياثار الله ياثار الله
_______________________________

هيّج اجروحك هِلال النايبات
وخله دمعك يجري چن شاطي الفرات
المثلك انت ما على العيله يبات
اشلون صابر والحرم متسلبات

چم دوب اتضل نارك تسعر او منك مسلوب خيمه او خدّر
كل عاشور انگول الجاي
يظهر راعي الحگ والراي
ياثار الله ياثار الله
_______________________________

جانه عاشور او جرحنه ما بره
الف عام او عبره بينه امكسره
مدري نبچي للي گطعو منحره
مدري نبچي الغييتك لمقدّره

بين الطف او بين الغيبه هاي امصيبه او ذيچ امصيبه
شوف ابعينك يا رجواي
نبچي او ننعه الهاي او هاي
ياثار الله ياثار الله
_______________________________

هَلّ محرم سيدي او هاج الجرح
واحنه صرنه ابحالة الما تنشرح
ليلنا سرمد غده او مامش صبح
يمته تلفي سيدي او يلفي الفتح

ابصحن المولى اتسوي اقرايه تقره المقتل اوبيدك رايه
تنعه الضل ابلايه افياي
الصوب گلبك مية داي
ياثار الله ياثار الله
_______________________________

يمته يا موعودنه او ثار السمه
انت تقره للحسين ابماتمه
او تفرح اعيون البچت لجلك دمه
يادوه الضلع الزچيه او بلسمه

رد يا كحلة عين العتره الخاطر زينب او ذيچ العبره
يامن قربك كل منواي
يمته اتكحلهن عيناي
ياثار الله ياثار الله
_______________________________

سيدي اعذرنا اذا طال العتب
فرگتك نار او انا اضلوعي حطب
ارجع او ناشد عداك اليا سبب
مات عمك عل نهر بس ماشرب

رد وانشدهم وين أچفوفه وليش النبله الصابت شوفه
عطشان ايموت السگاي ؟
او ونّت لجله اركان اسماي
ياثار الله ياثار الله
_______________________________

ابو فاطمة الطائي

هلاليه


يل حارم عيني النوم
وامزود اهمومي اهموم
من شفتك چني اليوم
شفت احسين او گطعت نحره .... واويلاه
____________________________________

شفتك او گلبي تصدّع
روحي رادت مني تطلع
چني بل علياء اسمع
قد قامت كربلاء

قد حان الحزن والآه وين اليبچي المولاه
صلى الله عل اينوحون للمتفطرات اشفاه

الزهراء الليله اتريد
لوعة او دمعات انزيد
حزن العلويه انعيد
يوم الرادت لو بس قطره .... واويلاه
____________________________________

بل سمه شفتك تلالي
او سافرت آنه اوخيالي
شفت الارماح العوالي
يحملن شمس او گمر

راس ابن النبي شفته عينه اتناظر الاخته
ابعينه دمعته اعليها او سكنه رمحه شابگته

اشفافه اترتل آيات
وايصد اعله الخيمات
وين ابنياته اتبات
الصيوان اصبح جمره ابجمره ... واويلاه
____________________________________

وابرمح ثاني مراره
شفت نظرات الحيارى
او حسره تشرح اعتذاره
خجلان امن الخدر

لعيونه السهم طفه او يم المشرعه چفه
ماصح بيده شربة ماي چم چبد البقه ابلهفه

اعليه النسوان اتدور
تحچي ابخاطر مكسور
ويلا منك عاشور
كاسر ظهري او كاسر ظهره .... واويلاه
____________________________________

اهواي الرماح الشفتهن
شرد اعدد شنسى منهن
وأمهات اهناك ونهن
ونّت منّه السماء

ليلى تنعه عل الاكبر او رمله تنهض او تعثر
او يم مهد الطفل حرمه اتلولي وتبچي دم احمر

اتناغيه واتحرّك بي
اگعد يبني اتحاچي
يايمه اوليدي اشبي
من عمري ربي انطي العمره .... واويلاه
____________________________________

آخ يهلال الرزيه
رجعتلي الغاضريه
او زينب الصارت سبيه
عگب العز والدلال

اعليها اتگطعن لسياط اتشعوط هل گلب شعواط
المن تشكي والعباس نايم. ما يگعده ازماط

لا ضل الزينب حيل
واعليها چل الليل
مابين ازلام او خيل
ضعن احسين اشلون اتنطره ... واويلاه
____________________________________

ذكرياتك كلها مَرّه
اوتصاويرك بيها حسره
بيك ويه الشام ذكره
بچت حتى الرضيع

تهل . او اذكر آنه الاحزان او وگفة زينب ابديوان
آخ . او ويلي من الشام جرحه ايضل مدى الازمان

ماضل بل گلب ابتوت
اتمنت چم مره اتموت
او ليسمعون الهن صوت
اشعملت بيهن ذيچ النظره .... واويلاه
____________________________________

ابو فاطمة الطائي

هلاليه

آذآن الحزن صاح حي اعله المآتم
هل اهلال عاشور خل انواسي فاطم
______________________________

إهلال الفاجعه بان
وآذآن الدمع حان
حيَّ على الأحزان والحسره الطويله

هل اهلال عاشور
او مذبح سورة النور
چم قرآن منحور واطهر دم يسيله

قميص احسين قد لاح
بي آثار الاجراح
يمّه اتلوج الارواح بهمومن ثجيله

آدم شمّه وادريس
اسليمان اويه بلقيس
فطره موش تدريس كل واحد عويله

كلها اتصيح ويلاه من هاي المظالم
هل اهلال عاشور خل انواسي فاطم
______________________________

اهلال الحسره والبين
كل ما تنظره العين
تذكر لوعة احسين والشيبه الخضيبه

خيّم حزنه عل كون
من كل هظم بي لون
فليبكي الباكون من هاي المصيبه

مصيبه اتشيب الراس
احسين ابخيل ينداس
او بي تتشمت الناس يا عالم عجيبه

شذكر شنسه يهلال
او كلها تشده البال
امصاب ايهد الجبال بل طف او لهيبه

منّ الصبر يهلال ما ضلت معالم
هل اهلال عاشور خل انواسي فاطم
______________________________

الليله بل سمه احداد
او نعي الزهراء ينعاد
من تنعه اعله الاولاد آ يحسين يبني

تنعه او تحثو التراب
اوداعة ضلعي لنعاب
اصوابك اكلف اصواب يوليدي ضهدني

صرت امضيعه الراي
واصيح الماي يل ماي
اريد اللبة احشاي او لا واحد سمعني

من عاشر لهل ساع
اشل بجروحي لوساع
شما ناعي النحر ناع اعلى ايصير وني

مره انحب عله احسين مره اعله الفواطم
هل اهلال عاشور خل انواسي فاطم
______________________________

امشيب گلبي يهلال
اشعندك بل سمه ضال
ما خليت الي حال يهلال الرزيه

من ايشوفك اليوم
امامي الگلبه ملچوم
اتزود بيه الهموم اويلي ابهل مسيه

يذكر ذيچ الالآم
من هجمو عل خيام
او زينب بين الازلام تعثر بل وطيه

احتارت تتجه وين
من يحمي النساوين
دارت للنهر عين وين اهل الحميه

تصيح الزينبك گوم يا بدر الهواشم
هل اهلال عاشور خل انواسي فاطم
______________________________

يوجع منظرك حيل
وامامي ما أله حيل
من دم دمعته اتسيل ليل الله او صباحه

اشخلن بيه الخدور
اهنا يهلال عاشور
طرن مهجته اطرور خلنه ابنياحه

عمته ابهزل النوگ
ثلث ساعات بل سوگ
كلشي بيها محروگ من شافت جراحه

اضنه ابشوفتك طاح
ذب اعمامته او صاح
من عمتي الخدر راح او لا مر بيها راحه

لا ضل عنده دمعات لا دلاله سالم
هل اهلال عاشور خل انواسي فاطم
______________________________

انظرك بين النجوم
اوگلبي يمتلي اهموم
البس سود الهدوم وابچي ابلا اراده

تلگه ابگلبي الآه
وانادي ما نسيناه
حسينا واحسيناه يا رمز السياده


عهد بل دم كتبناه
حياة او موت وياه
وي كل فرص ننعاه احسين اسمه عباده

الحزن لجله عشگناه
علينه شاهد الله
النَفَس هو حسبناه او شرابة وداده
احسين الما بچه عليه يوم الحشر نادم
هل اهلال عاشور خل انواسي فاطم
______________________________

ابو فاطمة الطائي

سريعه هلاليه

يل حزنك وطن ماعنده احدود
ليك اعله العهد ردينه اردود
_______

يا نعمة النعمه عدنه الدمع ذمه
منطين الك كلمه منعوف المجالس

حزنك وطن النه يجمعنه عل ونه
واللوعه والحنه چن لمة نوارس

الشرف يل رايد شرف. تلگاه بل شعائر
لو شفت اهلاله ارتفع. عاشور المناحر
البس اسود او ركض. اركض للمنابر
ابچي واسعد فاطمه. بدمعات النواضر

خل گلبي نقي. واثيابك سود
ليك اعله العهد ردينه اردود
_______

وي هلة اهلاله ابچي عله احواله
المتسلبه اعياله مرعوبه او عطاشه

وفّي له بدموعك والطم عله اضلوعك
اصبح عله اشموعك چن جنح الفراشه
هل روح لوما تحترگ لحسين شلي بيها
اوعين الما تبچي اله ريت الله ايعميها
چا غير دمعه اعله النحر للموته اتحييها
شمتاني يل گلبك صلف هل فرصه اشتريها

انهض لـ للطم وارضي المعبود
ليك اعله العهد ردينه اردود
_______

اهلال الحزن عَلّه ورث الف عِله
هل الدمع هله. ويه اهل الخدامه

احسينك تره بعده فوگ الترب خده
طايح بالف شده مطحونه عظامه

لحسين جرحه ما بره او للساعه ايتلوه
ماعنده ناصر لا اخو بالشمس ايتچوه
خل نيتك ابسيل الدمع ان چبده ايتروه
ويّاه سجل موقف او عمرك خله يسوه

بل مدمع اله. احفر لخدود
ليك اعله العهد ردينه اردود
_______

امشي اعله كل ثايه ارفع اله رايه
او من تسمع اقرايه. بل لهفه اعتنيها

واحضرله تعزيه وگلبك لبو ارقيه
سويه حسينيه خط اسمه عليها

مو فقط عاشور او صفر گلبك من تعمره
يوميه خل بيه العزه وابنبضاته يقره
ويلاه يحسين الذي عطشان انطه نحره
صدگني حتما تسكنه الزهراء او تحضره

او حيدر كل مسه تلگاه موجود
ليك اعله العهد ردينه اردود
_______

شد بالعزه احزامك لا تتعب اجدامك
گله اويه خدامك جيتك ها يمولاي

من عاشر العاشر حزني يضل عامر
وابكل عزه حاظر. اسگي وادمك الماي

انذر اله اسنين العمر رخّصها اعله موده
اشمحلات ساعات اللطم وابدشداشه سوده
تسمع قصيده او تنهظم واخيالك حدوده
توصل للخيول او تصد سحگتها الحقوده

طحنت له الصدر واصبح ممرود
ليك اعله العهد ردينه اردود
_______

يا سيد الساده يا عگلي وامراده
گله الك ناده گلبي الليله ملهوف

عهدن يضي عيني كل عام عام تلگيني
بالخدمه يحسيني. ما تمنعني السيوف

نرفع شعار انت وانا وانّادي حسيناه
والله ما ننساه ابد يمصابك مننساه
ويلاه يل ذابل عطش يامولاي اويلاه
يحسين اسمك بالگلب والناظر كتبناه

دنيا او آخره وياك انعود
ليك اعله العهد ردينه اردود
_______
ابو فاطمة الطائي

للخدمه الشريفه

انا الربيتني امن الزغر بِحماك
انا العايش ضلاله اسنين لولاك
زغير او انت المعليه
اشگد حظ وبخت منطيه ... يمحبوبي
_________________________________

متاهه دنيتي ابلياك رخيصه او خير ما بيها
يمن لطفك چبير اوياي أنعامك شجازيها ؟
جبتني ابلايه إِستحقاق الهل خدمه او معاليها
صرت ابچي عله اجروحك انعه او دمعتي اجريها

النعيم الخدمه جايبني يمولاي
شكرا ياحُسين انطيتني اهواي
يا كلمة شكر تكفيه
اشگد حظ وبخت منطيه ... يمحبوبي
_______________________________

وحگ الي مشت للشام او تتلفت على اوصالك
امنيتي اضل للموت بين الناس انعالك
وابچيلك بچي يعگوب وين التوجع اقرالك
دموعي او حسرتي والآه المهن واگعد اگبالك

مثل امجدي اگعدلك عله الباب
طِلبتي بس دمع للموت سچاب
دمعي آنه افخر بيه
اشگد حظ وبخت منطيه ... يمحبوبي
_________________________________

دخيلك لا ترد مسكين اعليكم باني آماله
گاصد عالمك مولاي ابرجائه . موش باعماله
رايد يبقه بس طاريك ساكن مهجته او باله
وابهاي الخدامه ايعيش حد الموت لو جاله

احله اسنين عمري خلصن اوياك
لا تطردني وآنه اقسملك اهواك
والمثلي اذا تشريه
اشگد حظ وبخت منطيه ... يمحبوبي
_________________________________

انه الربيتني ازغيرون من خيرك كبرت آنه
آنه الما أله كل شان بس انت ارفعت شانه
ماعندي حَسَب ونساب . عندي اعيون ولهانه
تهل اعليك كل مصباح تنعه اچبود عطشانه

المجالس واللطم وايام عاشور
بس ذني رصيدي اليوم النشور
او گلبي الي جمر يچويه
اشگد حظ وبخت منطيه ... يمحبوبي
_________________________________

يل منطي الخدم توفيق وفقني اضل يمك
لملمني شتات انسان يلي احتارو ابلمك
اعيشنك ردت احساس وبأنفاسي اشتمك
خلني ابهل مجالس اواسي الطاهره امك

اواسي فاطمه المابيها كل حيل
وانعاك الصبح وانعاك باليل
ابنها الي يون اعليه
اشگد حظ وبخت منطيه ... يمحبوبي
_________________________________

عبدك وابن عبدك جاي ماد الحضرته ايده
زيده امن الدموع اعليك ومن اللوعه هم زيده
ناعي شاعر لو رادود . ابكيفك انت شتريده
المهم وياك بل دارين يل ما يترك اعبيده

اريدن خدمتك املكها دارين
اهنا ابچي اعليك اهناك همّين
الذكرك بل حشر يحييه
اشگد حظ وبخت منطيه ... يمحبوبي
_________________________________

ابو فاطمة الطائي

للخدمه المقدسه

يل خدمتك دِين اقبلني يحسين
ياقابل الحر من رجع .. اقبلني يحسين
_____________________________

أصفى امن الزلال او بيك عقول الوادم احتارت
قُطب رحّى الفُـلك يحسين وانجوم السمه الدارت

يا امل روحي
طبي واجروحي
آنه الك نوحي
نعمت الله

نعمه ماتنعد
دمعتي عل خد
بيها اتعبّد
وارضي الله

يلما شرب الماي واجروحك اهواي
اقسم عليك ابكل وجع .. اقبلني يحسين
_____________________________


مو اول بشر ناجاك ولا آخرهم ابابك
جايبني الحنين البيك يل ما ترد طلابك

يانظر عيني
امروتك انطيني
جمره تچويني
ابهل المصيبه

لوعه چملني
بيها جملني
خل يضل وني
اعله الغريبه

عمري آنه منذور دمعه اعله الخدور
شلي ابعمر مابي جزع .. اقبلني يحسين
_____________________________

اريد ابچي على امصابك لحد ما تقبل الزهره
كون الحد.طلاع الروح كل جرة نَفس عبره

ابچي لمصابك
او حرگة اطنابك
او طيحة احبابك
عل وطيه

ابچي للعطشن
حنن او ونن
او طلعن ايركضن
بل بريه

وخت الگمر آه صاحت اويلاه
الخاطر گلبها الي انشلع .. اقبلني يحسين
_____________________________

جيت المجلسك ملهوف وادري ما تصد عني
اغفر زلتي مولاي واقبل توبتي مني

المجلسك ردني
امن الالم زدني
يا سيدي اني
والله احبك

كلّي من عندك
اشلون احب بعدك
اقسم ابچبدك
ابقه اودك

تسبيحي كل يوم ويلاه يمظلوم
ارحم محب گلبه انفجع .. اقبلني يحسين
_____________________________

مثل فرض الصلاه والصوم هيچ ادموعي حاسبهن
يلولاك الفرض ما تم يفروع الشرع كلهن

انت كل ديني
علل تكويني
بگلبي وابعيني
ساكن انت

مجلسك چنه
گعده بالجنه
ما امل منه
اشگد عشگته

بل مجلس اربيت لحسينيه الي بيت
جايبني عطفك مو طمع .. اقبلني يحسين
_____________________________

ماي الوجه جبته او جيت بياع او ردت تشري
اشريني ابرخيص السوم وانت ابحالتي تدري

ارد اضل يمك
نٌِفس اشتمك
حرگة اخيمك
گلبي احرگه

اخدم المنبر
واقره عل منحر
الساعة المحشر
ابلايه فرگه

وابيوم الحساب ابچي عل مصاب
واهناك اصيح اويه الجمع .. اقبلني يحسين
_____________________________

ابو فاطمة الطائي

للخدمه المقدسه

روحُُ وريحان درب الخدامه
____________________

هل درب منعوفه
جنة الله انشوفه
تاج فوگ الهامه
روحي بي ملهوفه

يلي رايد تربح دنيتك والآخر
عوف كل اتجاره او بل مدامع تاجر

ربح بي حض او بخت اتحصّله ابدمعاتك
درب مابي ذل ابد بي شرف دنياتك

بل خدمه لتدور دغش اخلص او ذب روحك
بحساس عيش اويه السبط بسمه داوي اجروحك

روحُُ وريحان درب الخدامه
____________________

السراط الاعدل
والنعيم الاجمل
مجلسه او تعزيته
هاذي ما تتأول

احسين رغم اجروحه لچن فاتح بابه
حاشه ميرد واحد او يطول اعتابه

بيده دفتر هل خدم كلمن او تقديره
او يهنيال الي اخذ مرتبات اچبيره

كلمن او رزقه امن الدمع ضلت انت او حيلك
لو ردت يمه ترتفع أگضي بل ون ليلك

روحُُ وريحان درب الخدامه
____________________

سيدي آنه ادخيلك
بس اريد ابچيلك
اخذ بيدي امروتك
خل اون وانعيلك

وجهت لك وجهي او سلمت ناصيتي
خدمتك امنيتي لا تخيب امنيتي

عيشني عاشورك الم خل تغور اعيوني
يعگوب خل اصبح الك اعمه وايگودوني
ارتد بصيرن بل عزه منّ اشم الرايه
اوگف اباول خط لطم لو بدت لقرايه

روحُُ وريحان درب الخدامه
____________________

يل تسامح واتعف
عبدك اشما يسرف
من يجي ايدگ بابك
من عطائك يغرف

يا حسين احسانك والله كاسر عيني
گبل ما مد ايدي اشما ردت تنطيني

او لا چني ابابك عبد فلسين ما اسوه
امعيشني چن عيشة ملك من روحي الك فدوه

منطيني صيت او مكرمه وامعلي الشاني
يحسين شكرا سيدي من گلبي والساني

روحُُ وريحان درب الخدامه
____________________

ابگلبي اسمك طابع
وابوصالك طامع
اشما خدمتك آني
ابقه ابد مو قانع

ريته عمري ايطوّل الف عام او اكثر
كون كلها اگضيها اخدم ابهل منبر

ما اسكن ابداري انا اسكن حسينيه
بين المجالس والعزه او زنجيل لطميه

الله يعالم خدمتك لا ما شفت مثله
عالم عجيب هيئته بس بالدمع يحله

روحُُ وريحان درب الخدامه
____________________

يا مليك اوجودي
انت من معبودي
نعمه بيها اتنومس
والها انطي اعهودي

عهد بالدم كاتب تبقه مالك ذاتي
تبقه انت السيّد واخدمك ياغاتي

واشكبر حضه سيدي الترضا عنه انت
جنات يعني في عدن بيمينه ملّكته

كل امنياتي سيدي ما انحرم عطفك
ميت عدل وياك اضل تلزمني ابچفك

روحُُ وريحان درب الخدامه
____________________

ابو فاطمة الطائي

للخدمة المقدسه

لا مـال يـنـفـع بـل حـشر لا تـنـفـع ابنيـن
بس مَن اتى الله ابگلب مخلص للحسين
ليخدمه ربحان : روحن وريحان
______________________________

يامن ردت يوم الحشر من المهالك تآمِن
اورايد ختم من حيدره جنة عدن بي ضامن

لتدوّر ابشرق اوغرب ليّه استمع زين
أبخدمة ابو اسكينه التزم وابدمعة العين

درب الخدامه ابلا دغش مُخلص تعنّاه
ابهاي المجالس واللطم تكسب رضا الله
واتعيش سلطان روحن وريحان
______________________________

اگصد لبو اسكينه ابشغف دگ بابه لا تتردد
اسجد على اعتابه ابهظم غيره يسمعك محّد

عطشان گله سيدي رايدلي چف ماي
ما اروّه الا ابخدمتك امروتك يمولاي

من منهلك ياسيدي خل ترتوي الروح
مجروح مثلك ما شفت وايطيّب اجروح
چفك يعطشان روحن وريحان
______________________________

مد ايدك او لا تعقد خالي ترد من بابه
كالغيث تنزل رحمته لو دمعتك سچابه

چن رحمته الله الواسعه لحسين موصوف
گله يمهجة فاطمه اصنع لي معروف

الماضي من عمري خلص بين ابمتاهات
الباقي اريده ابخدمتك يابن النقيّات
اتقبلني قربان روحن وريحان
______________________________

كل خدمه نلگه بيها ذل بس خدمتك عز بيها
تشبه سلاطين الارض خدامك امخليها

انت اليخدمك من صدگ يخضع اله الكون
للشيء لو گلاله كن من لحظته ايكون

الله يا فيض الدمع واشيحوي اسرار
والگعده جانب منبرك اشگد بيها انوار
چن گعده بجنان روحن وريحان
______________________________

عبدك الآبق مستحي خجلان مدلك ايده
يحسين رايد خدمتك او كلشي بعد ماريده

رايد اعيش اويه الحزن كل التفاصيل
من العطش يا سيدي والسحگة الخيل

رايد اشارك فاطمه بل دمعه والنوح
ابچي الشفاه الذابله حد مطلع الروح
يل منحرك چان روحن وريحان
______________________________

بيك استجارت مهجتي او روحي تلوج ابابك
اعطف عليه ابرحمتك حط اسمي وسط اكتابك

يحسين اسمي سجله واختار عنوان
رادود لو كاتب شعر لو ناعي احزان

مو مهم شنهي خدمتي بس المهم كون
وياك اضل ميت عدل يا نور العيون
يا اجمل اوطان روحن وريحان
______________________________

ابو فاطمة الطائي

العليله

روحي بيش اسليها
عليله اتريد واليها
نار الهجر تچويها نار الهجر تچويها
____________________

يا اهل روحي اعله روحي ما تنشدون
اتضعضعت لا حيل بيه او لاكو اعيون
بيش اسلي الروح عنكم واصبر اشلون
وانه كل الي انشده ؟ ايگلي ميجون

ماضل دمعه بعيوني
يهل الغيره ارحموني
روحي صبر مابيها نار الهجر تچويها
____________________

آنه مدري احسين بيه اشصار ما صار
اجويعده ليلي او نهاري ابعتبة الدار
بلچي لن طارش يجيني جايب اخبار
لا كو طارش . لا اجوني ابطيف خطار

اغفه بل درب واصحه
حتى اطيوفهم شحه
يربي اشلون تاليها نار الهجر تچويها
____________________

انعم الله لو يجيني بل حلم عاد
ابدمعة اعيوني انشده ليش البعاد
هو آنه اشضال عندي؟ صايره ارماد
لا ابو لا ام اليه والجسم باد

علّه تآكل ابروحي
او هجرك زود اجروحي
اعيوني النوم جافيها نار الهجر تچويها
____________________

يمته ترد امن السفر واتكحل العين
بويه اعله بنتك ماتحن معقوله يحسين
طالت عليه غيبتك طالت يل حنين
لا وين وداك الدهر يا مهجتي وين

مامش وعد وانتظره
ويلاه يا هل سفره
اعيوني نوت تعميها نار الهجر تچويها
____________________

بويه عليه اشعطلك مو عادتك هاي
چنت من تتركني ليله . اشعر اهواي
هسه ايام او ليالي او لا خبر جاي
كل مغرببه بدونك يلتهب داي

اتفسر الصخر حسراتي
سهراته وي شوغاتي
اجروحي منو ايشافيها نار الهجر تچويها
____________________

مدري احير ابغيبتك مدري بلالام
بويه تبچي اعليه گامت كل الاسلام
بويه من بچيي عليكم جاري ما نام
بويه ارحم حالي مرلي لو بل احلام

الخاطر الله مر بيه
تراها ايامي مگضيه
المنيه گربت اعليها نار الهجر تچويها
__________________________________

ابو فاطمة الطائي