سريعه للعليله

بالدمع ___ بالدمع
عينو العليله بالدمع
_________

يخادم ارخص الدمعه
صدرك باللطم وجعه
عليله او فاجده او تنعه ... اويلي اعليها

تحسّر وابچي وياها
ابوها الراح ماجاها
جِفه والنوم جافاها ولا مر بيها

يهل الخدامه افزعو ويه العليله اجزعو نعي الثواكل انعو
اويه الراح ابوها

محد بقه ايواسيها نار الحزن تچويها والدمعه دم تجربها
شمعه او طفوها

بالدمع ___ بالدمع
عينو العليله بالدمع
_________

المجالس الها معقوده
او عليها المهجه ممروده
صبرها جازيه احدوده جفنها ذابل

عليله والالم فتها
يچنها الزهره هيئتها
مثل لخيال صورتها تون واتسائل

اتدور عل ايدليها والكربلا ابوديها بس محد ايمر بيها
او محد رحمها
يهل العزا الثجيله گومو الى العليله لوعتها مو قليله
واسو المها

بالدمع ___ بالدمع
عينو العليله بالدمع
_________

مسيل الدمعه حل وكته
وين الي يجر ونته
احسين اتحيرت بنته دمعها ايهل دم

غير الحسره ماعدها
وين الي يساعدها
يهل دمعه اعله والدها الغده متخذّم

نوحو لجلها نوحو صيحة مراره صيحو ويه دمعكم طيحو
والرايه ارفعو
راية حزن شيلوها وسط العزه فروها حد الفجر خلوها
رفعوها وانعو

بالدمع ___ بالدمع
عينو العليله بالدمع
_________

مصيبة فاطمه امصيبه
ابوها امطول الغيبه
اسحگنه اخيول شيجيبه تفتت چبده

حوافر دايسه ابصدره
والف طعنه ولف طبره
دمه اتبده عل غبره بعد شيرده

ما شافت ابدن راحه ليل الله وي صباحه كلهن بچي ومناحه ويلا عليها
ليل اليجن متنامه فوگ المرض والآمه اتحن للأبو ويامه
تفرك بديها

بالدمع ___ بالدمع
عينو العليله بالدمع
_________

يخادم فاطمه ابچيها
عليله او حيل ما بيها
افراگ احسين ماذيها شعلها ابجمره

رسايل ما اجت منه
ولا جاها خبر عنه
ابعمرها اشلون تتهنه عمرها ابحسره

اتعاين عله المثلها كلمن ابوها يمها ايقبلها وايدللها
او هيه اتحسر
لاكو ابو اليحميها لا ضل اخو ايداريها لا عم يحن اعليها
الله او اكبر

بالدمع ___ بالدمع
عينو العليله بالدمع
_________

صفت من شجره مگطوعه
بهلها ويلي مفجوعه
بين الهشمو اضلوعه لبين امگطع

موته كل اهاليها
وام الخدر سابيها
او رقيه مدري اشبيها بقت ما ترجع

يا شيعه الها حنو ون الثكاله ونو الكل تعزبه تعنو
ابحسره الثجيله
ذكروها كل عزيه حد تقبل الزچيه عنكم يرافضيه
او ترضه العليله

بالدمع ___ بالدمع
عينو العليله بالدمع
_________

ابو فاطمة الطائي

العليله

زادي صار النوح من نويت اتروح
فارگيت النوم او ضيعيت الروح
علتي گامت تزود .. ليلي او مصباحي سود
________________________________

فارگت روحي او جروحي يلي هجرانك الم
دمعه دمعه ارسومي ذبلن واصبحت مثل العدم

يا نظر عيني اخلافك عميت
تدري ابحالي اشلوني غديت
الينشد عله اسمي گتله نسيت

ليّه ماضل حال لا گلب لا بال
بس دمع والآم تنتظر مرسال
يمته مرسالك يعود .. ليلي او مصباحي سود
________________________________

بويه من يوم العفتني او ضعنك امغرّب مشه
من اهدها اعظامي بادن والنظر بعدك غشه

امسح اعيوني ابثوبك وانوح
شوفي يرجعلي وابچي اويروح
ياجرح يسكن ايفزز جروح

اشخله بيه اجفاك اموهدنه او انعاك
الما تنام الليل ابيا حلم تلگاك ؟
حنّت الحالي اليهود .. ليلي او مصباحي سود
________________________________

بويه چم مكتوب اليه بالدمع مو بالحبر
إِذا تقراهن يبويه خاف گلبك ينكسر

مادزه خاطر تگدر تنام
وتلفي اعله بالي صورة خيام
چي بيهن انت انترسن حمام

يمك انت اتدور ابلا جنح مكسور
او للعليله اجناح صوّباه عاشور
او بعدت اعليه الحدود .. ليلي او مصباحي سود
________________________________

ابدار مهجوره عفتني لا دواء او لا صبر
احسين يل كلشي خذيته المن امبقي العمر

لا بيه اجيلك لا عندي راي
خبروني عنك السمعو بچاي
احسين الرضعيه مالاگي ماي

گالو امن ضماه دم تخر اشفاه
والدچ عطشان واللهب بحشاه
واصبح ابروحه يجود .. ليلي او مصباحي سود
________________________________

اتشوغ روحي من حچيهم واطلع اگعد عالدرب
بلكي لن طارش يجيني ابخبر وايبرد الگلب

گالولي أبسي يرجع محال
برسومه ماضل ذاك جمال
الخيل اسحگنه او راسه ابنبال

وآنه عندي احساس براسي طاح الفاس
لا ترد يحسين او لا يجي العباس
ضني مگطوع الزنود .. ليلي او مصباحي سود
________________________________

ادعي الله ابكل مسيه مايجي ابراسك رمح
ولون هل محتوم صاير ربي موتني الصبح

الاغله مني بس نحره جاي
معقوله اشوفه بعيوني هاي
ربي اخذني او حقق مناي

تمرمرت بجفاه النوب اضل انعاه
هل عمر ماريد ربي اخذني اوياه
شلّي أبأيامي عود .. ليلي او مصباحي سود
________________________________

ابو فاطمة الطائي

ام البنين

أم الگمر مثل الشمس
منها اخذنه اجمل درس
شنهو الوِلِد ؟ شنهو النفس ؟
لا __ ما يبقه ثمين لا __ من دون احسين
______________________________________

نفتخر عل امم حگنه احنه عدنه ام البنين
شمس بل ظلمه اسمها يضوي بين المشرقين
الله خلاها مناره لن وفت ويه الحسين

جليله عظيمه شوصف قدرها ؟
ملائك رفيعه تسولف بأمرها
رفعها دمعها حزنها او صبرها

صارت حديث اهل السمه
مو حرمه چانت ملحمه
كل ونه بيها مؤلمه
آه __ متروسه انين لا __ من دون احسين
______________________________________

شمس صارت للمكارم والمعارف والوفاء
قدمت لحسين اربع ابدور كلهم كبريآء
اتگله يحسين اشنطيتك ؟ ويني او وين العطاء

الاربع قليله اريد اعتذرلك
دمعتي خجوله شبرر شگلك
تمنيت حياتي اقدمها لجلك

ياريت الي مية ابن
افديهم ابرمشة جفن
ولا اسمع ابگلبك يون
حيف __ ماعندي بنين لا __ من دون احسين
______________________________________

ابكل تفاصيل الرزايه حاضره ام البدور
روحها اعله احسين تفتر مثل دخان البخور
شعرت ابآلامه كلهن شعرت ابچبده اليفور

گلبها لچمها من الخيل اجنه
يربي دخيلك الحسين أسحگنه ؟
ضلوعي اوجعني وگع ابني اضنه

امنين اجيبك يا صبر
ربي اخذ مني العمر
او رجعلي لحسين العصر

خاف __ متشوفه العين لا __ من دون احسين
______________________________________

صلوات الله عليها اشعدها من حب للامام
عن ولدها ما تناشد عدها هل نشده حرام
لچن عن ابن الزچيه ناشدت حتى الحمام

اسكنت بل شوارع تناطر بشاره
الثواني تعدها او تنوح ابمراره
تنادي حبيبي كتلني انتظاره

راح او خذاها راحتي
تاليها آنه او شيبتي
عل درب تهمل دمعتي
وين __ مبعد يحنين لا __ من دون احسين
______________________________________

مثل دمعه ابعين فاجد غدت كل لحظه تطيح
ضاگت اعليها الوسيعه او ضاگ كون الله الفسيح
اتنادي يل طارش انشده يمته اشوفك واستريح

انشده يطارش. يجيني ما يجيني
اورساله اخذها او سلامي البنيني
ييمه اعله خوكم ذبحني حنيني

يمته اشوفنكم سوه
رديتو واشتم الهوى
وايرد عله اعيوني الضوه
آخ __ او يرحمني البين لا __ من دون احسين
______________________________________

وسف طارش ما اجاها اجت بس روس ابرماح
اجت زينب واجت سكينه واجت آلاف الجراح
كلها يم عباس صاحت راح ابو السجاد راح

تركناها جثته طعينه او سليبه
او بنينچ ييمه جثثهم خضيبه
أشنگول اشنخلي يحره مصيبه


عفناهم ابلايه دفن
يله عليهم خل نون
اخت الگمر وام الحزن
ضيم __ شالع گلبين لا __ من دون احسين
______________________________________

ابو فاطمة الطائي

ام البنين

عباس .. اسمعني يوليدي الگمر
عباس .. ربيتك الهاذه السفر
عباس .. انت الخيم انت النهر
لحسين لحسين
________________________

باچر احلامي ايسافرن او تصبح عجاف ايامي
راحة البال الكربلا تمشي واضل بالآمي
بيش آنه اتصابح بعد واحسين مو گدامي
ياليتني گبله متت لاكن سدى احلامي

ياحيف .. كل الاماني زائله
ياحيف .. امنين اجتني كربله
ياحيف ..تمشي الليالي مايله
لحسين لحسين
________________________

باچر النيه راشده واحسين راح ايسافر
ما ادري شو گلبي انلچم چن سحگ فوگي الحافر
يمه اوصيك اعله السبط لو صار يوم العاشر
صير انت إله بلطف درع او للخيم صير الساتر

اوصيك .. يل چنه حيدر لو غضب
اوصيك .. عن وجهه أجليها الكرب
اوصيك .. طف كبربلا سوي لهب
لحسين لحسين
_______________________

عباس ادريبك كلف وادريك نشمي او غانم
عباس كلشي ماردت بس ردت اخيك سالم
يمه اشنگل الفاطمه لو يگطعونه الوادم
او ما متنه گبله اشنعتذر واخجلتاه من فاطم

مرخوص .. انت واخوتك لا ترد
مرخوص .. قدم اله اچفوف او زند
مرخوص .. انت الغصن بس الورد
لحسين لحسين
_______________________

حگ الرِبه او ذاك السهر رايدتك اتقر عيني
اتجازيني لو رايد صدگ عل مشرعه اتجازيني
لا تشرب الماي العذب يا يمه گبل احسيني
شلّع اعيونك لو صرخ عطشان من يسگيني

الماي .. لو منّه الحسين انحرم
الماي .. يصبح بعد مابي طعم
الماي .. واليشربه ايحس الندم
لحسين لحسين
_______________________

يمه او أمانة حيدره ما أوصيك اعليها
زينب يخو زينب تره انت المكفّل بيها
الزمها بيدك يل گمر بالك تهد ايديها
امن اتهدها خافن تنولي او لن العده امچتفيها

بحماك .. من السياط امن الجمر
بحماك .. من السبي من الشمر
بحماك .. وبشاربك هاذه الخدر
لحسين لحسين
_______________________

وآنه عله ادروب الضعن رايح يضل مگعادي
انعه عله احسين الصبح والعصر انعه اولادي
منا لمن يلفي الخبر واسمع منادي اينادي
وين الله واينادي بشر ردلج سليل الهادي

وايگول .. باچر يوافيچ الصبح
وايگول .. راسه مهو ابراس ابرمح
وايگول .. سالم ابد مابي جرح
لحسين لحسين
_______________________

ابو فاطمة الطائي

ام البنين


وحيده .. وحيده .. خلوني وحيده
__________________________

اربع ولد شلّعهم دهري امن اعيوني
اربع ولد راحو للطف او عافوني
اربع ولد كل واحد ماخذ شي مني
اربع ولد روحي او عيني او گلبي او لوني

انطيت للطف اربعه الگمره اتكحل بيهم
بس ردلي الحسين او اخذ ولدي وذر سويهم

ارحم يطف النايبه حالي
شاريته منك والثمن غالي
عباس منطيتك بعد شنطي !!؟؟
خاطر ابو سكنه يجي اگبالي

وحيده .. وحيده .. خلوني وحيده
__________________________

ماضل بعد يل طف اشمالك ما تقنع
ماضل بعد جفت روحي او جف المدمع
ماضل بعد اضناي انطيته او كل عمري
ماضل بعد لجل احسين . او هم ما يرجع ؟

شلچ علي ياكربلا بيش آنه الچ مديونه
ليش الاعز من النفس انحرم من اعيونه

يا طف تراني مشبعت منه
الجنه هو او راحت الجنه
نيران ضلت تستعر بيه
والعايش ابنار اشتضن يهنه

وحيده .. وحيده .. خلوني وحيده
__________________________

كلهم مشو وآنه ابطرگ الون والدمعه
كلهم مشو ليلي امساهر مصباحي انعه
كلهم مشو لا أيوب ايچمل صبري
كلهم مشو ولا كثرت حسراتي اترجعه

مليت من عمري او علي مليت كافي امتانه
لا نوم بي شفت الهنه لا عيد بي فرحانه

تموت الي تفقد بس ولد منها
وآنه الحسين الي مشه عنها
واربع كواكب راحو امن ايدي
چنها شموس الضاويه چنها

وحيده .. وحيده .. خلوني وحيده
__________________________

وين اتجه وادي الطف منهو اليندله
وين اتجه ارد امشي او لحسين اوصله
وين اتجه لو موتن لو اشتم عطره
وين اتجه هو افراگه ابروحي اشخله

گالو ثلث تيام اله عطشان ماكو اميه
يا عمت عيني اعله السبط هنه الثلاثه اشويه

گالو يلوج امن العطش والحر
ايگوم او يطيح او ريجه اتفطر
ذيچ الرسوم الحلوه متعوبه
والشمر يمه امحزم او يفتر

وحيده .. وحيده .. خلوني وحيده
__________________________

گالو وگع ياريت دونه هل السمه واگع
گالو وگع او سهم المثلث من گفاه طالع
گالو وگع عل رمل نايم والرمل يچوي
گالو وگع او عباس عل شط لسه ماراجع

عباس عنه اشعطله واجيوش ميمنعونه ؟
مادام ما يفزع اله لابد سهم بعيونه

اوليدي وعرفه ما يعز روحه
ما يعتذر رغمن على اجروحه
لاجن ادينه امگطعه حتمن
والجربه طاحت يمه مذبوحه

وحيده .. وحيده .. خلوني وحيده
__________________________

وين الاجل شمتاني او ما ياخذ عمري
وين الاجل المن ابقه او حملي ابظهري
وين الاجل يآخذ مني حسين او يمشي
وين الاجل ينبض چيف الضل ابصدري ؟

گمت اقره آنه الفاتحه بلكي ايتسهل امري
بلكن گبل جية الضعن اتوسد ابنص گبري

الموت اشوه او لا عمر ما بي
جيت الحسين او وگفته ابابي
ياربي موت او لا اصد زينب
خدرها رايح والشمر سابي

وحيده .. وحيده .. خلوني وحيده
__________________________

ابو فاطمة الطائي

ام البنين

ام الگمر شكرا الچ من النحر شكرا
ام الگمر شكرا الچ من النحر شكرا
ولدچ كفو منهم وفو حليب امهم
___________________________

السان حاله ابهل رساله انكتبت ابفيض الدمه
يل بچيتي يل وفيتي شكرا ابگد السمه

اولادچ بالطف اوياي
مو اربع لا والله اهواي رفعة راس

همه القاده او همه اجنود
واحدهم متحدّه احدود والعباس

مية شكر شكرا على ازنوده الذي انطبرن
مية شكر شكرا على ازنوده الذي انطبرن
ولدچ علي چنهم وفو حليب امهم
___________________________

من دمائي الحد دموعچ هل رساله ابعثها الچ
يا هنيئا هل كرامه يا من الله اتقبلچ

ويلادچ ما منهم صار
بچفوفي چانو بتار بل ميدان

همه الدرع او همه الطاس
او بيرغهم بل طف عباس چن قرآن

يم الوفه شكرا على اجروحه الذي كثرن
يم الوفه شكرا على اجروحه الذي كثرن
كل الوفه عدهم وفو حليب امهم
___________________________

اخو زينب ها ييمه اخو مثله ما انوجد
لون يوسف عنده مثله ما وگع بالبير ابد

ربيتي او نعم الترباه
واعله الكافل صلى الله في كل حين

تحسدني اعليه الاملاك
يشبه اغصان الارآك هل طيبين

يل صابره شكرا على الميت طعن صبرن
يل صابره شكرا على الميت طعن صبرن
ليه ارخصو دمهم وفو حليب امهم
___________________________

انطه عينه وانطه ايده او جربته ابحضنه بقت
لجل سكنه من نخته طلبته الماي او بچت

لمن شاف اسكينه اتنوح
فرفح ماضلت بي روح للشط راح

بايع روحه اوشاري الجود
بس رايد بالماي ايعود وسفه اوطاح

يبچي ابخجل شكرا على ادموعه البقن يجرن
يبچي ابخجل شكرا على ادموعه البقن يجرن
تبچي السما الهم وفو حليب امهم
___________________________

لا تنوحي لا توني عنچ اولادچ كِفو
الأخوّه فوگ حگها ابكربلا والله وفو

امرضعتهم غيره او اخلاص
كلهم احساس او نوماس كلهم زود

ياهي العدها هيچ ابرار
والدهم ليث او كرار ماله احدود

من الگلب شكرا على الطاحو وسف غدرن
من الگلب شكرا على الطاحو وسف غدرن
او ما ينسمع ونهم وفو حليب امهم
___________________________

يا هنيئا ليچ بيهم ولدچ شموس ابكربلا
ضل اسمهم للقيامه ما بشر فوگه عله

بيهم يتفاخر عاشور
ابليل الوحشه صارو نور للنسوان

اموات الزينب يبچون
شنهي امن احساس ايحملون هل خوان

من الضعن شكرا على الروس البقن يبچن
من الضعن شكرا على الروس البقن يبچن
هاذه الشكر حگهم وفو حليب امهم
___________________________

ابو فاطمة الطائي

مسلم بن عقيل


العگل محتار ابسفيرك سيدي
من يوصفه ابيا مزيّه يبتدي
_______________________

العگل متحيّر يوصفه ابيا مقال
مَلَك چنه او هيئته مثل الرجال
بل شجاعه واصل احدود الكمال
شمس چنه وابضواها نهتدي
_______________________

السفاره ما تناسب بس اله
لأن عنده كل معاني المرجله
مثل عمه يعرف الكل معضله
للشدد حلالها او زلمه اجودي
_______________________

مسلم اگباله العگل عاجز يگف
يوم طب الكوفه بل ودام هتف
آنه مسلم . والجمع لونه انخطف
ما اهاب الموت بيدي امهَنّدي
_______________________

آنه يل كوفان وداني الامام
لليريد الجنه يدخلها ابسلام
ايبايع ابن الزهره موش ابن الحرام
ايفوز خاطر بل رفاه الابدي
_______________________

بل بلاغه ينطق احروف الولاء
او سيفه ابلغ لمن ايحين اللقاء
شاف هل وادم مصره عل جفاء
سلو اسيوف او عليه ضل تعتدي
_______________________

عله مسلم للحرب دگو طبول
يامكرهم جبل من عنده يزول
مادرو چنه علي فحل الفحول
يوم ثوبه الاصفر اصبح مرتدي
_______________________

گلب هل كوفان يمنه ابميسره
خله وادمهم ذبايح عل ثره
او صار للتاريخ مسلم مفخره
لليريد احسين بسمه يقتدي
_______________________

ابو فاطمة الطائي

مسلم بن عقيل


عــظّـم لـك الله الأجـــر مسلم وگع من القصر
هلن دموعه ابوگعته خايف تگع من المُهـر
من بچه ابساعة وگعته
الغربتك چانت دمعته
________________________________

أحسن اللهُ عزائك سيدي يبن البتول
مسلم افداك ابحياته او غصنه قد صابه الذبول
ابن عمك يا وسافه تسحل ابجثته الخيول
بل اسواق او بل شوارع بغضن ابآل الرسول

بغضن يمولاي ابعلي والحقد ذاك الاولي
تمثيل بي قد مثلو واگلوبهم غيض اتغلي
مختنگ مات ابعبرته
الغربتك چانت دمعته
________________________________

مات التحبّه او يحبك مات وايسلم عليك
چانت امنيته الشهاده وامل روحه يفتديك
وفه حگ الي ابرگبته ابفيض دمه مشتريك
مات والموته أليمه صعبه من اوصفها ليك

أول ألم بيها الغدر وحده او جناحه منكسر
ناس الگباله ابلا شرف كل فرد من عدهم شمر
تكسر الخاطر غربته
الغربتك چانت دمعته
________________________________

او ثاني آلآمه الجرعهن عطش ما خلاله حيل
اشفافه متفطره يويلي وابلحيته الدم يسيل
من كثر ما چان ضامي الظهر حسباله ليل
أميه گللهم انطوني ايجاوبونه مستحيل

عطشان گادو للسطح وجهو وجهه للذبح
مثل النحم لمن هوه لوما ضواه ما ينلمح
والارض صكت جبهته
الغربتك چانت دمعته
________________________________

فاضت الروح الحنينه او عل وجه صار المنام
بين وادم مو شريفه او لادرو معنى الحرام
ميت او بحبال ينجر او ينشتم بابشع كلام
آه يحسين المصيبه والله تنخر بل عظام

مو كافي مسلم ينچتل بگلوبهم لساعه غل
بل حبل ربطو سيدي والخيل تسحل بل حبل
مات ما راعو حرمته
الغربتك چانت دمعته
________________________________

گبل موته چنه يعرف ابحالته اشرايح يصير
يدري هل ناس اهل وليه موش اهل غيره او ضمير
باچر ايغدروك بل طف او تنولي ابحر الهجير
تنذبح عطشان باچر او تنتهي ابمثل المصير

اتمنى ترد من كربلا من گبل رمية حرمله
گبل العطش لا يبتدي او ينهتك خدر العايله
اتگطعت حسره مهجته
الغربتك چانت دمعته
________________________________

چان خوفه اعليك توگع او للخيم مُهرك يروح
يصهل اينادي الهظيمه احسين ماصل عنده روح
او تطلع الحره الابيه امن الخيم تبچي او تنوح
خوفه لا شمر ايتشمت بيها وايزود الجروح

لو انت طحت اعله الثره زينب يعذبوها تره
گدامها اتضل تنسحگ واخيولهم تلزم سره
والسبي تبدي سفرته
الغربتك چانت دمعته
________________________________

ابو فاطمة الطائي

مسلم بن عقيل

ياويلي من هل قصر صوب حميده ابكسر
نفس القصر يا ابي
باچر ندخله ابسبي
___

حزن المات ابوها ابولية انذال
تون منه الأرض وايذوب اجبال
حميده او حالها هل ليله ياحال
وابوها ميّت او جرّوه بحبال

من عِمت عين الدهر مسلم يموت ابقهر !؟
والظالمه ناصبي
باچر ندخله ابسبي
___

وصل ليها الخبر أن والدچ راح
او تلث تيام يفتر بي الذباح
واهو ميت عليه تنهال لرماح
صاحت ويلي بس شيفيد لصياح

صارت تگوم او تگع طفله او گلبها انشلع
همها يموت نبي
باچر ندخله ابسبي
___
تنعه واحسين الدمعها يجري لدموع
بويه ابوچ آنه او اضمچ بين الضلوع
انتي وي سكنه ورقيه ابدنيتي اشموع
ونچ ايگطع دليلي وآنه موجوع

اشما نبچي اله مايرد مسلم وسف بل لحد
يبنيتي لا تنحبي
باچر ندخله ابسبي
___

انت عمي وانت ابوي وانت دنياي
اتگله لاچن خاف دهري يگطع وياي
او من ادورك ما اشوفك لو ردت ماي
خاف هم تروح مني ها يرجواي

ايذبحوك وآنه انلچم مرتين اشوف اليتم
ما يبقه كل طالبي
باچر ندخله ابسبي
___

على الشيبه الكريمه دمعته اتسيل
گلها مسلم بالشوارع سحبته الخيل
الخيل تطحن صدري باچر طحنت الهيل
والحبل ينشد بديچن أول الليل
للكوفه تمشن سوه او ماهوه راعي اللوه
عگب الكفيل الابي
باچر ندخله ابسبي
___

آخ من القصر گلبي جم الم بيه
لنشمر من عنده مسلم چيف اطب ليه
كون الله احجار يمطر حته يمحيه
گبل ما طب له سبيه اودمعي اجريه

چم لوعه واچم الم ريت الوجود انعدم
او لا يشمت الاجنبي
باچر ندخله ابسبي
___

ابو فاطمة الطائي

مسلم بن عقيل


ياموت .. امهلني لتسد عيني
يا موت ... خل ارد لحسيني
وابصحاري نينوه .... نعطش آنه اويا سوه

________________________________

ياموت من عندك ردت مهلة شهر مو اكثر
واقبضها روحي ابكربلا بين النهر والمنحر
اويه احسين آنه اعطش ردت من چبدته تتفسر
وابليلة العاشر نضل يم المخيّم نفتر

وياه .. نحرس اخيم زينب
وياه .. اتعب اشما يتعب
يترس اعيوني ضوه .... نعطش آنه اويا سوه
________________________________

ياموت خلني اوياه اضل يوم اليگف بل حومه
اوحيّد ولا ناصر اله واخوانه كلهم نومه
اينادي منو ايحامي خدر بت حيدر المحشومه ؟
محد يرد اجواب اله اوحاير يضل بهمومه

هيهات .. من يرد اجوابه
هيهات .. امگطعين اصحابه
كلمن اموذر هوه .... نعطش آنه اويا سوه
________________________________

بل كوفه اموت او اتركه والله يعز اعليه
خليني للعاشر عدل إويا اضل للظُهريه
ياموت مهجة فاطمه انصاره حيل اشويه
او زينب تراها خايفه ما تدري شنهي النيه

تحتار .. منهو اليحاميها
تحتار .. لو شمر سابيها
من يگع راعي اللوه .... نعطش آنه اويا سوه

________________________________

ياموت سكنه من تضل اتنادي العطش وج بيه
يهل الرحم وين الرحم جيبولي چف أُميّه .
للنهر خليني اعتني وي كافل العلويه
جربه اله او جربه الي نترسهن ابحنيّه

بسهام .. لو نوو يرمونه
بسهام .. عيني دون اعيونه
اويا اموتن لو نوه .... نعطش آنه اويا سوه
________________________________

ياموت روحي اترجتك ارحم نفس ملهوفه
روحي للحسين اتهوي اقبضها بين اچفوفه
اندفن خلني ابكربله شلي ابتراب الكوفه
اتمرني حميده للگبر او هيه ابحبل مچتوفه

والروح .. تتبع آثار السبي
والروح .. ويه ضعنه تنسبي
تبچي لو طفل انچوه .... نعطش آنه اويا سوه
________________________________

وانچان ما حنيت الي او خيبت كل آمآلي
وحتمت دفني بهل الارض او خليت دمعي ايلالي
وياك امانه الكربلا وصل لامامي الغالي
شوگي او سلامي او لهفتي او گله علي ضل بالي

وياك .. وصل البنتي خبر
وياك .. گلها گلبه ما فتر
مشتاگلچ گد الهوه .... نعطش آنه اويا سوه
________________________________

ابو فاطمة الطائي

الانصار

صوت الانصار ضل خالد
ويّـه الـــقــرآن مــتــوارد
حبهم لحسين حب واحد
مضمونه مضمونه
__________________________

انا گلبي ابحبهم ينبض ليلي انهاري
وانا الهم راسم صوره ابريش اشعاري
انصار احسين المستخلصهم بيده الباري
واحد واحد مثل الليلو امن المحاري
للطف ضمهم يوم ايشح الماي الجاري

مثل الانصار ما صاير
لو شح الماي بالعاشر
يسگون احسين امن الناظر
مضمونه مضمونه
__________________________

يا طاريهم منّ ايمر اتون الزهره
حسره اعليهم هل واحدهم يسوه الحسره
ابليل العاشر يوم احسين ايدير النظره
ابخيمة زينب لاكن زينب تبچي ابعبره
اتگله انصارك خاف اتعوفك وكت العسره

يحسين ايلوج دلالي
ميروح الخوف من بالي
خدري بحماك يلغالي
مضمونه مضمونه
_____________________________________

ايگللها ادموعچ يا زينب لا تجريها
اصحابي امن الكلفات اكلف اني ادريها
خدرچ كعبه او كل اصحابي اتطوف اعليها
دمعاتج كل واحد منهم دم يفديها
انفسهم آنه امربيها او ادري اشبيها

يفدون ارواح للخدر
نذرو لاجساد تتوذر
كافي العبرات تتكسر
مضمونه مضمونه
_____________________________________

ابهل حال او لن صوت انصاره ابكتر اخيامه
الدمعة زينب جاي الشيخ ابلايه اعمامه
من گالوله الحره اتخاف ايدگ عل هامه
هوسات او كلمن بچفوفه ايهز صمصامه
بنت الزهره الخدرچ احنه انضل خدامه

خدامچ هاي يا زينب
الهاي الخيمات من يگرب
لو صرنه اوصال ما نتعب
مضمونه مضمونه
_____________________________________

نادت زينب ياعم باچر كلها اعلينه
اشلون ابخدري لو لحسين اتغمض عينه
او لا واحد منكم يحضرنه اشما نادينه
ياعم گلي اشلون ابحالي او حال اسكينه
لو شمر اتولانه ابسوطه من يحمينه

ياعم اوصيك بحسيني
ايگللها افديه ابضي عيني
لا ما يعتاز توصيتي
مضمونه مضمونه
_____________________________________

لا اتوصيني يامولاتي او هل دمعاته
روحي او دمي وي دلالي او كل نبضاته
ترخص بس الشيبه اوحيده من شيباته
قسم ابدمعچ قسم ابگلبچ وابحسراته
عدنه الموت اگبال اخيامچ يا محلاته

الكم الارواح مبذوله
او مادام اسيوف مسلوله
لا ما تمشين مذلوله
مضمونه مضمونه
_____________________________________

ابو فاطمة الطائي

الانصار


وفه او أيمان نور او بصيره
زلم شجعان مملوئه غِيره
انصار الحسين اشموس
فوگ المنايه اتدوس
عدهم گلب وانفوس ... مملوئه غيره

_________________________________

صلى الله على انصارك يبو اليمه
محتاره ابوصفهم سيدي الكلمه
اوصاف اليحبها الباري ملتمه
بيهم . وارتقو بل حب على القمه
وابطف النوايب شخدمو خدمه ؟؟

نطو ارواح لجل الامامه
الذكرهم فاح عطر الكرامه
اقدس واجل سبعين
صارو كحل للعين
انصارك مثلهم وين ... مملوئه غيره
_________________________________

ذكرهم مقترن بالفوز والرِفعه
ومتوارد اسمهم ويّه كل دمعه
السمه اعليهم تنوح وهل الارض تنعه
زلم لجل الحسين ابسيف متبضعه
مثل سرب الگطا اعله الموت متجمعه

مثل آيات بل طف تنزّل
اهتفو هيهات ما نقبل الذل
نحيا او نموت اوياك
ابدم النحر نفداك
اشنلگه اذا عفناك ... مملوئه غيره
_________________________________

شذكر ياهو منهم ياهو ماذكره
سبعين اورگه بس واحده الشجره
حبيب امن ارد اذكره تهمل العبره
طايح ما تهمه الطبره عل طبره
فدوه ايصيح بس خل تقبل الزهره

نبل واسيوف صابن دليله
او دليله ايطوف رايد خليله
آخر رمق ناداه
ياسيدي والله
هل موت الك محلاه ... مملوئه غيره

_________________________________

واحد من عگب واحد يودعونه
واليوگع بخير انفاسه يلگونه
يون او يحچي گوه من ينشدونه
شتوصي ؟ يگول او تهمل اعيونه
احسين احسين وحده لا تخلونه

نفس الجروح نفس الوصيه
كل اليروح ابدرب المنيه
ايوصي عله العطشان
لا يبقه بل ميدان
اوحيد بلايه اخوان ... مملوئه غيره

_________________________________

فرد مصباح بل عاشر مشو عنًه
او ضل احسين ينعاهم بلف ونه
يحشمهم . دگومولي أنا ابمحنه
يا اهل الشرف من يحمي زينبنه
الخيم من تشتعل من يطفي اخيمنه

نِده يكرام يهل الحميه
اشعجب نيام واگطعتو بيه
افرك بدي اصفيت
محني الظهر ضليت
آه اشكثر ناديت ... مملوئه غيره

_________________________________

اشكثر ناده ولا منهم گعد ناصر
آ يا عازة انصاره ابظهر عاشر
يوم الضل ذبيح او يرفسه الحافر
مرد چبده الذي من العطش شاجر
كل هاذه او زينب موچبه اتناظر

حرمه او تشوف ابن امها دامي
حد السيوف ذبحنه ضامي
او ذباحه جاها ايريد
يسبيها صوب ايزيد
او زينب جفاها الحيد ... مملوئه غيره

_________________________________

ابو فاطمة الطائي

الانصار

انصار او فدائيه تنبض كلها حنيّه
من عدهم ثلثـ تنعام ما يرضون ابد تنضام .. انصار او فدائيه
_____________________________

هنيالهم بيك افلحو واستربحو بالدنيه والدين
هنيالهم رفعه او گدر فوز او نصر يا قرة العين
هنيالهم نصراََ جلي نصرو علي والحسن واحسين
هنيالهم ماتو ضمه. ابحب فاطمه صارو مجانين

ضلو للوفه تذكار
وابطف كربلا انوار
انصار او نعم الانصار ... اعليهم يا سلام الله

انفسهم حسينيه هيبتهم الهيه
عل عيله حرام تنام ما يرضون ابد تنضام .. انصار او فدائيه
_____________________________

احچاياتهم ترفة طبع من تنسمع روحا وريحان
احچاياتهم وبلا دغش يخسه العطش كتبوها عنوان
احچاياتهم كلهن ادب بيها العجب. وي نور الاكوان
احچاياتهم مالت خدم كلها نعم تآمر يسلطان

گالوله ابفرد نبره
يبن الطاهره الزهره
شنهو اتريد الك يجره ... لو تطلب شمس وانجوم

آمرنه يمولانا خدام احنه تلگانه
نگلب كربلا والشام ما يرضون ابد تنضام .. انصار او فدائيه
_____________________________

صولاتهم وكت الحرب تشفي الگلب. واتريح البال
صولاتهم دون الخيم مثل الحِمم جايه اويه زلزال
صولاتهم طول الزمن ما ينمحن تذكرها الاجيال
صولاتهم اعظم درس لليتلمس قربى من الآل

ابصوت العاشگ المبحوح
گالو كلشي الك مسموح
يحسين او رخيصه الروح ... لجلك من نقدمها

يا آخر حلم النه اشما جرحونه نتهنه
لجلك نعشگ الالام ما يرضون ابد تنضام .. انصار او فدائيه
_____________________________

اوصالهم حر او عبد تقره او ترد شكرا للحسين
اوصالهم. رمز الوفه والمعرفه. بين الحبيبين
اوصالهم صارن ضوه ابطف نينوه للمُستنيرين
اوصالهم رسمت صور خيمه او نهر واقمار ميتين

او سبعين آيه منحوره
ابمصحف كربلا سوره
تُتلى ابعبره مكسوره ... باطراف الصبح والليل

والصبح اذا أسفر نبچي الهم دمع احمر
انصار ابطبع خدام ما يرضون ابد تنضام .. انصار او فدائيه
_____________________________

يا شانهم. والله اعتلى في كربلا صارو منارات
يا شانهم دون البشر صارو درر رفعه او مقامات
يا شانهم. من اوگفو يمه اهتفو للذله هيهات
يا شانهم لاطهر خدر. ماتو نذر لجل النقيات

اشگد حظ او بخت بيهم
او بت حيدر تحاچيهم
بس هاذي تكفّيهم .. عز او مفخرة دارين

والله او حصلو نعمه امن الحره اسمعو كلمه
تسوه الموته يم الخيام ما يرضون ابد تنضام .. انصار او فدائيه
_____________________________
يبچيلهم گلبي ابحزن دايم يون ليلي والنهار
يبچيلهم. ويه النبي. اوحيدر علي وولاده الطهار.
يبچيلهم اثنا عشر واهل الحشر تندب يلنصار
يبچيلهم حگ البچي فوگ الحچي. او لچمات الاشعار

انصار الحسين الهم
حگ اعلينه نذكرهم
او بالدمعه نخلدهم ... قربه الفاطمه الزهره

رايتهم تضل النه ابموقفهم تذكرنه
دمهم ذابح الصمصام ما يرضون ابد تنضام .. انصار او فدائيه
_____________________________

ابو فاطمة الطائي

الانصار

الك انصار يبو اليمه
عهد الاحرار تضل كلمه
عهد بالدم كتبناه شعار اسمك رفعناه يبو اليمه
_______________________________________

نِذرنه عمرنه
دمه المنحر فده الاسمك ينور الله او جماله

هتفنه كتبنه
ابد غيرك يبو اسكينه فلا نرغب وصاله

ابصحاري الطف فدائيه او ندوس اهل الضلاله
او لِون متنه الف موته نكرر هل مقاله
يهل عالم شربنه احنه العشگ حد الثماله

نضل عشاگ ابو اسكينه
الك نشتاگ يوالينه
عشگ ذابحنه معناه شعار اسمك رفعناه يبو اليمه
_______________________________________

هوانه دمانه
لجل نحرك نبدّيها ابصحاري الغاضريه

مُهجنه ألمنه
ثواب الفاطمه او ردنه اتقبّلها الزچيه

شكثر حض او بخت عنده اليموت ابين ادينك
يرزق الله انكتب النه تصد اعلينه عينك
عسن طحنو جماجمنه ولا نسمع انينك

يتاج الراس تحت امرك
اعز انفاس فده العمرك
يمثلك حاشه نلگاه شعار اسمك رفعناه يبو اليمه
_______________________________________

معاكم. فداكم
عقيدتته التزمناها معك مو ويّه خصمك

عرفنه فهمنه
عفيدتنا الصلاه ترجع اذا ما بيها اسمك

اعله هل نيه اعتنينالك خدم مولانا وانصار
اعله هل نيه تركناهن نسانه او عفنه الاديار
ولا نرجع لون صارت معارة كربلا نار

نقر عينك يهيبتنه
ابميادينك منيتنه
الاجل لجلك عشگناه شعار اسمك رفعناه يبو اليمه
_______________________________________

جمرها. لهبها
مثل طعم الشهد عدنه انتلذذ بل منيه

نقاتل ننازل
تحت اسمك يمن اسمك سعاده ابلا نهايه

عرفنه انت حزب الله او حزب الله اليربحون
ولا خوفن عليهم لا ولا همه اليحزنون
اذن سهله اذا نعطش واذا ألنه يگطعون

ولا نرجع ولا نهتم
ولا نجزع. ولا نندم
الينصرك الله علاه شعار اسمك رفعناه يبو اليمه
_______________________________________

خدمكم بمركم
زهير او حر وابن ظاهر لهم بالطف تنافس

لجلكم تگلكم
ابجنون الحب يبو اليمه غدو كلهم عوابس

الفرد منهم جبل چنه وفه او غيره او حميه
اليگع منهم نجم ثاقب يضوي اعله الوطيه
فقط انت اليذكرونه ابدمعهم والوصيه

وهم اموات يندبونك
حزن وآهات ينصرونك
جمر واحدهم احشاه شعار اسمك رفعناه يبو اليمه
_______________________________________


اجلهم. وصلهم
يأنصارك تلگوها المنيه بابتسامه

وفيّه زكيه
ابذلو ليك النفس حدما مشو مو بالسلامه

گضو دونك يبو اسكينه العبد والحر سويه
گضو لاچن اسمهم ضل شمس بالغاضريه
اهل ودك غدت بالطف اساميهم هويه

سلام الله عليهم تم
نصر محلاه نصرهم دم
عليهم سلم الله شعار اسمك رفعناه يبو اليمه
_______________________________________
ابو فاطمة الطائي

سريعه للانصار

كواكب السماء مشاعل الوفاء
انصار كربلاء انصار كربلاء
_________

گلـّبنه دفتر هل خلگ من اوله التاليته
من آدم الحد كربلا والعاشر او ظهريته
شفنه البشر عبر الزمن ما تنحزر شخصيته
بيهم ذهب بيهم شِبه كل معدن او نوعيته

والمعدن الأصيل يا صاحبي قليل
فحقها الثناء انصار كربلاء
_________

انصار ابو اليمه بشر بس ما اضن من طينه
من رِفعه واخلاص وشرف واحدهم امسوينه
التاريخ كتبو بالدمه وابكربله امسجلينه
صارو ترانيم العشگ للي يضحي الدينه

دمائهم تقول الحق لا يزول
تجلي البقاء انصار كربلاء
_________

كل واحد المنهم رمز صار او اله قداسه
بن ظاهر الشيبه الابي للحب صبح دراسه
او عابس جنونه السرمدي هل عاشگ ابشراسه
او شاب الي نصراني الاصل فوگ الوصف قياسه

في ساحة النزال كانو كما الجبال
بالعز والأباء انصار كربلاء
_________

احرار واحدهم كلف والحر مثال او شاهد
ايحب المنايه چل يحب بالصيف ماي البارد
واذكر زهير وصولته او حملة برير العابد
خدام گالوله نضل وانت الملك والقائد

مُرنا بما تربد فكلنا عبيد
والقول ما تشاء انصار كربلاء
_________

اگليلين چانو بالعدد بس الفعال اهوايه
كل فرد منهم ينحسب الفين جيش او رايه
الموت عدهم مو مهم المهم تبقه الثايه
يتهافتون اعله الذبح وحسين هو الغايه

يهواهم الرسول نالو رضا البتول
فقد قضو ضماء انصار كربلاء
_________

واحد بعد واحد رقو في سلم الشهاده
بين الشريعه والخيم كلمن اخذ مراده
صارو شموس ابكربلا للحب والعباده
والهاي المواكب والخدم بيديهم القياده

بالحب سابقون بالخلد فائزون
صارو لنا الضياء انصار كربلاء
_________

ابو فاطمة الطائي

العباس

آنه اوياك جسمين ابفرد روح
دخيلك يابو فاضل عني لتروح
اذا عني رحت خدري اشيضل بي
يعني اسياطهم لمتوني اتلوح
____________________________

يا شريچ ابروحي انت ياحرز من كلشي شلته
بيرغك خويه عگدته أود

مالي غيرك ياكفيلي ارحم ادموعي او عويلي
خويه ضل يسعر دليلي او چبد

يا بخت كل العشيره آنه بسمك مُستجيره
لا يگودوني اسيره ابحقد

يمي ضل لاتمشي عنّه ابكربله مامش محنّه
كلها تكره طاري اهلنه او تضد

ملامح ما عندهم مالت اسلام
فرصه اتريد حته اتهد عل اخيام
بس اتغيب عني يا ضوه العين
خدري ايضيع مني وامشي للشام

____________________________

ألعطش سالفته صعبه والنهر لازمته غربه
لا دمع بينه او نشربه بعد

والأشد واصعب عليه امن العطش يابو الحميه
لو رحت انت امن اديه اشد

لو فرض للشاطي تطلع وافرض ايديك اتگطع
اشلون بلا اعليه تفزع تهد

لو عساكرهم ولونه وحده وحده طلعونه
او بلسياط ايلوعونه ترد ؟

واضل محتاره آنه ابهاي وابهاي
اضل بل خيمه والنيران فوگاي
لو بل هيمه اركض حافيه اجدام
والحالين كلفه او ضايع الراي

____________________________

شنهو رايك خويه گلي وين اروح اوياهو ضلي
من لي ياعباس من لي يضل

حرمه وابقه ابلايه والي اوتدري اخجل من خيالي
تالي عمري اوهيچي حالي يصل

وادم ابلايه حميه حاقده اتدور عليه
ماكو كل مشراد اليه او امل

ذاك اليصيح احرگوها هاذه يآمر عذبوها
واشتمو امها وابوها او اهل

اضمن وين روحي عن الاجناب
احيرن بل يتامه لو بل احجاب
امن اصيحن بسمك اعليه يضحكون
يگلولي گمرچن عل نهر غاب

____________________________

خلني اعطش مو مهمه خل اطيح او شوفي يعمه
بس اريدن خويه زلمه يحن

وادم البل طف نِذاله لو لگو بس الثكاله
يعني يا حالتنه حاله اشتضن

يعني تغدي ايامي ظلمه يعني ما تبقالي حُرمه
والشمر سوطه يورمه المتن

لا وقار اليبقه عندي امفرفحه اودمعي اعله خدي
والذبحكم بينه يحدي الضعن

مراجلهم تصير اعله الصواوين
زلم تتدافع السلب النساوين
التراچي ايشلعوهن من الآذان
او فنها الي تصيح الحگنه يحسين
____________________________

يابعد ماي النواظر اشلون ياعباس باچر
لو ردت عني تسافر غصب

زينبك تصبح غريبه او يامصيبتها مصيبه
امنين ابو فاضل تجيبه يرب

امدوهنه او افرك بديه واگعد احسب چم رزيه
الوهدنتني ابهل مسيه عتب

بيمن احتار او شخلي وين اودي ارقيه گلي
وآنه كلي الآلآم كلي تعب

اضمهن وين يبنيات الحسين
منا سوط منا مية الف عين
تعبنه اشما بدينه انغطي الوجوه
او تعّبني نشدهن عل گمر وين
____________________________

واعدتني . وينه وعدك هو يسوه الماي انشدك ؟ يمه توگع وتشبعني بعدك قهر

العاشت ابجالك اميره امچتفه او تمشي اسيره
والله ياحيرتها حيرة عمر

چم بلد عگبك اطبله او بل طبل تلفيني اهله
فرحه عدهم واحله حفله او سهر

وآسمع اتگول الشماته هل خبر عدنه اشحلاته
ذني جابوهن خواته الگمر

تموت اتريد وآنه ادخل للقصور؟
اخذني اوياك يا محلاها الگبور
دنيا ابلايه وجهك تنحسب نار
او ما بيه احترگ يابدر الابدور
____________________________

ابو فاطمة الطائي

للعباس

صَـلّـىٰ علـيـكَ اللهُ يا لـيـثَ الـعـريـنٔ
يا كاشفَ الكروبَ عن وجهِ الحُسينٔ
يومَ الوغى نِبراس هذا هوَ العباس
____________________________

أَنا عبدٌ لهُ العَبّاسُ مَولىٰ
أَبا الفضلِ عَليهِ ليسَ يُعلى
لَهُ في خافِقي عَرشٌ وَمأوى
وَفي العينِ لهُ عِشقٌ تَجلّى

لولا مخافَةَ مِدحتي أَنْ تَستطيل
لَقُلتُ في أوصافِهِ قولاََ ثَقيل
ليسَ لهُ مقياس هذا هو العباس
____________________________

مُبجَّلُ ليسَ يشبَهَهُ مَبجلْ
جَمالٌ يوسُفيٌ لا وَأَجملْ
وَفي الميدانِ إِن عبّاسُ أَقبلْ
بِغيرِ الموتِ حَاشا لا يُؤولْ

كانَ كَما الكرارُ إِن شَدَّ الِلّثام
نَظراتُ عينيهِ تَصيبُ كالسِهام
تَجثوا على الأنفاس هذا هو العباس
____________________________

ألٓهُ الحُبُّ في وقتِ السلامِ
وَفي الحربِ ألٓهٌ للحِمامِ
سَلَو عنهُ الشريعةَ وَالأنامِ :
تُنَبِئكَم بِمُختصرِ الكَلامِ

تُنبيكُمُ الطُفوفُ عَنهَ كِلمتين:
إنَّ أبا الفَضلِ جُيوشاً للحُسين
ليسَ كَمثلِ الناس هذا هو العباس
____________________________

لِواديْ كَربلا رَبّي اصطَفاهُ
مَعَ السِبطِ لكي يَحملْ لِواهُ
وٕبالحوراءِ زَينبْ خَصّهُ اللهُ
سِواهُ لا يُكفِّلُها سِواهُ

قَد خَصّهُ اللهُ بِخدرِ الطّاهراتْ
عِذبا فُراتا كَفّهُ . ليسَ الفُراتْ
نَهرٌ مِنَ الأِحساس هذا هو العباس
____________________________

كَفيلُ الخدرِ صافٍ كَالمَعينِ
كَفيلاً عِندَ ذي العرشِ مَكينِ
مُهابٌ وَغَيورٌ وَمطاعٍ وَأمينِ
أَبا الفَضلِ فِداهُ كُلَّ عينِ

كي لا يَرى مِن زينبٍ دَمعاً يَسيلْ
أمسى على الرمضاءِ مَسلوباً قتيلْ
وَالشيب يُملي الراس هذا هو العباس
____________________________

هَوى والسِّبطُ مَكلوماً بكاهُ
أخي عبَّاسُ يا نفسي فِداهُ
أيا بَدراً ثَوى . دامٍ سَناهُ
أيا جُرحاً لِظهري قَدْ حَناهُ

مَنْ لليتامى يا أخي أِنعِم جَوابْ
قَطّعتَ قَلبي ثاوياً فوقَ التُرابْ
جُرِّعتُ مُرَّ الكاس هذا هو العباس
____________________________

ابو فاطمة الطائي

للعباس

انا الگمر لضعوني
انا القدر بـعيوني
انا زمزم
انا مُحكم
___________

يا زينب اعيون قُرّي
او من باب الخيام نظري
شوفيني لو غاص صبري .. شنهو اليجره

لخلي هل كون اظلم
واكاسر الگاع بل دم
اليوصل للخيام يحلم .. اوبايع عمره

بسمي السماوات تفخر
آنه امن الاكبار اكبر
بچفوفي الموت يفتر .. سلم امره

آنه الأسد من يزئر
انه الأبد ما يخسر
انا مَبهم
انا مُحكم
__________

خدرچ هو الخط الاحمر
قد أُعذِرَ الي أَنذر
لبراسه ياذيچ فكّر ... نآخذ راسه

خدرچ سماوي قدسه
قد حرّم الله لمسه
والسوّلت ليه نفسه .. انهي انفاسه

اشحدهم يگربون خطوه
اعليها ابابيل أهوه
آنه الي هل روس جوه .. تحت امداسه

انا الحرب ريسها
اذا اطب اخلسها
انا أعظم
انا مُحكم
___________

اعيونچ ابد لا تدمع
او بچفوفي بتار يلمع
من عندي الموت يجزع .. لو خازرته

ليچ آنه دگيت صدري
يا زينب افديچ عمري
جفنج فلا ريد يجري .. يا دمعاته

باچر اراويچ بل طف
حيدر تشوفيه اشخلف
لخلي الگلوب توگف .. كل نبضاته

انا اللضى ابخطواته
جمر غضا ابطعناته
انا بلسم
انا مُحكم
___________

ليهمچ اسيوف تبرگ
عرج الهواشم لو طگ
واحدهم ايصير ازرگ .. ناشف دمه

عاليهم ايصير اسفل
وآخرهم ايموت اول
سيل آنه عل جيش حول .. شنهو ايلمه

لا لا تشغلين فكرچ
هاذه آنه كفال خدرچ
رهن الأشاره ابأمرچ .. انطر كلمه

يبت علي كفالچ
تدللي شبّالچ ؟
انا ملزم
انا مُحكم
___________

لو گالو الماي يُمنع
او يحمونه آلآف اربع
لا والله هيهات ارجع .. العباس آني

ابسيفي طبع عيب يجرح
سيفي فقط جاي يذبح
لا ثنه لا يوم يصفح .. عن عدواني

عل شاطي اله اليوم صوله
يلعب بل ارواح جوله
وين الذي ايقود دوله .. يتلگاني

وين العدد والعدّه ؟
آنا الوعد شيرده ؟
انا ضيغم
انا مُحكم
___________

يا زينب الروح خلها
تسكن وانا الكافلها
كل الشدايد حلها .. ابهاذه الصارم

كشاف الكروب والهم
سيفي يعرفوه كلهم
چنه الفقار ايذلهم .. هو الهادم

لعيونچ ارگاب احصد
او باب النجاه كون اوصد
باچر الى النار تگصد .. وانه الحاكم

الچ عهد. افنيها
على الوعد امحيها
انا مُلهم
انا مُحكم
___________

ابو فاطمة الطائي

القاسم



ودعتچ الله حان الرحيل يا يمه اصبري صبرا جميل
شمعة شبابي من يطفوها
حنتي دمي والچفن ذاري التراب
واصبري صبرا جميل واصبري صبرا جميل
___

يايمه أعذريني خلص صبري
هضم احسين وآلآمه اكسرن ظهري
يصد صوب المخيم والدمع يجري
شلّي بل عرس يمه شلي ابعمري

عوفي الصواني عوفي الشمع
إِنطيني سيفي انطيني الـدرع
روحـي اويه اهلها خل ترتفـع

ابعمري او شبابي مالي نصيب يا هلا ابموتي دون الغريب
حوفة زفافي بيها ادفنوني
يمه حنيها اچفوفچ ابدم المصاب
حنتي دمي والچفن ذاري التراب
واصبري صبرا جميل واصبري صبرا جميل
__

حانت زفتي والموت اضن گرّب
هلاهل ماردت عندي فرد مطلب
أما يحصل الي چف ماي اريد اشرب ؟
هرش گلبي ييمه چن جمر يلهب

يمه اعله بختچ ريجي يبس
ضل دمه جاري اجروح انترس
يلچمني اصبح حتى النَفس

كل امنياتي هل ساعه هاي ليّه او للحسين كون الگه ماي
او گبل الشهاده عمي أشوفه
يتروه گلبه او معتني اخيامه ابشراب
حنتي دمي والچفن ذاري التراب
واصبري صبرا جميل واصبري صبرا جميل
__

اماني اهواي يمه چانن ابنفسي
اكشخ والشباب اتغار من لبسي
او ما بين الصواني والشمع امسي
تاليها انذبح ضامي وكت عرسي

احلامي ماتت يم النهر
ابليلة زفافي انطي المهر
ياهو الي مثلي مهره النحر

ابليلة زفافي انطي الوريد هلهلي يمه اوليدچ شهيد
واغلى امنياتي چف ماي اشربه
ماشفت گطره والاماني امست سراب
حنتي دمي والچفن ذاري التراب
واصبري صبرا جميل واصبري صبرا جميل
__

توه اربعطعش عمري بده استوه
لچن غصني يبس بالحومه يتلوه
من حر العطش والسيف يتچوه
واگول اتنومسي ابنچ وگع فدوه

ادموعچ ردتها دمعة فرح
گولي اعله مودك ابني انذبح
يبن الزچيه فاز او ربح

دون ابو اليمه اوليدي قتيل هاذي عطية ربي الجليل
يمه او عليه لا تجري عينچ
ابچي اعله عمي لو غده دمه خضاب
حنتي دمي والچفن ذاري التراب
واصبري صبرا جميل واصبري صبرا جميل
__

لو شفتي ييمه جسمي امعفر
حنّي اچفوف اديچ ابنحري المطبر
او خل بدلة زفافي اتغطي المنحر
گولي ابني فديته المهجة الكوثر

گولي ابني وفه وي فاطمه
او سوّه زفته زفة دمه
ماهمه جيش او لاهل ضمه

سهر الليالي او تعب السنين وفاها اليه اوليدي الحنين
نال اليريده . او حصل وسامه
اوليدي ابعزمه چل حسن سيد الشباب حنتي دمي والچفن ذاري التراب
واصبري صبرا جميل واصبري صبرا جميل
__


تگله مرمرتني يا بعد حيلي
حنيت اضلوعي يمه يابدر ليلي
يويلي امنين اجيب الماي ياويلي
يشمّامة حياتي لا توصي لي

لو بيدي يمه اوياك اندفن
جاسم ييمه لا لا تون
تدري ابدليلي ضل منسحن
جاوبها لاچن ياذي الجواب گللها باچر اكثر عذاب
كل الهواشم باچر ذبايح
بس حرم تصفن والشمر يحدي الرچاب
حنتي ابدمي والچفن ذاري التراب
واصبري صبرا جميل واصبري صبرا جميل
__

ابو فاطمة الطائي