عگيلي الليلة الرابعه

أم العباس الوفايه
آيه او للطف جابت آيه
___________________

صلى الله اعليها او سلم
امن أم الكافل اكرم وانعم
للتاريخ ادروس اتعلم :
مامش وي احسين اهوايه
أم العباس الوفايه
___________________

آية اخلاص ابمعناها
سبحان الرب السواها
شنهي من دلال انطاها
او صارت بلطف اكبر ثايه
أم العباس الوفايه
___________________

اربع اقمار الربتهم
لعيون احسين امقدمتهم
عن انفسهم ما وصتهم
وصتهم بحسين الغايه
أم العباس الوفايه
___________________

اتگللهم يا عگلي او لوني
لو ردتو اليوم اتوافوني
او بالطف اتقرون اعيوني
لتشربون امن الشط مايه
أم العباس الوفايه
___________________

منذورين الابن للزهره
منحركم فدوات النحره
آنه او انتم فدوه العمره
من يحچي ما النه احچايه
أم العباس الوفايه
___________________

او يوم الناعي محزن جاها
ما نشدت منّه اعله اضناها
ضلت تنشد عن مولاها
او من دمعة خدها امحنايه
أم العباس الوفايه
___________________

حد ما ماتت ضلت تنعه
لحسين اتهل اطهر دمعه
تندب ويلا طحنو ضلعه
فدوه الضلعك راعي الرايه
أم العباس الوفايه
___________________

ابو فاطمة الطائي

عگيلي الليلة الخامسه

مسلم باطباعه المعروفه
مثل السيل او طب للكوفه
_____________________

شبه الكرار اجبل ناصح
يعلن عن الحق الواضح
حچيه اعذيبي اوماهو المالح
يروي الارواح الملهوفه
مسلم باطباعه المعروفه
_____________________

گلهم مرسول احسين آنه
وين الگالو احنه اعوانه
بيده ايبايع مو بلسانه
او حچي الوجهين النه ايعوفه
مسلم باطباعه المعروفه
_____________________

ايناديهم لاچنهم موته
انصمّو ميسمعون الصوته
چلمه العدهم ما مبخوته
والغدره البيهم مألوفه
مسلم باطباعه المعروفه
_____________________
غدرو . كلمن سل بتاره
كل ضنهم مسلم يتباره
چنهم ما يدرون اخباره
هاذه الما تتلاوه اچفوفه
مسلم باطباعه المعروفه
_____________________

اتوسطهم والصارم شاله
اويا فگره الي ايصير اگباله
ركّضهم خيل او خياله
واحدهم ما دربه ايشوفه
مسلم باطباعه المعروفه
_____________________

عادلها الجيمان ابسيفه
يتحكم بالجيش ابكيفه
من الكوفه ماخذ حيفه
والوان العسكر مخطوفه
مسلم باطباعه المعروفه
_____________________

مسلم فنه اليسلم منه
مسلم نار او مسلم جنه
مسلم شامح تاريخه النه
نتفاخر بسمه وابحروفه
مسلم باطباعه المعروفه
_____________________

ابو فاطمة الطائي

عگيلي الليلة السادسه

انصار الحق والحريه
انوار الطف القدسيه
__________________

انصار احسين ابعاشوره
اقتبسو بالطف من نوره
ابقرآن الحب امسو سوره
كلهم هيبه او نورانيه
انصار الحق والحريه
__________________

وفو ويه احسين الكلمه
تتسابق عل موت ابهِمّه
كلمن ضحه ابروحه او دمه
وايگولون الموت اشويه
انصار الحق والحريه
__________________

دون احسين او دون اخيامه
كل واحد جرد صمصامه
سحگو بالحومه اكبر هامه
اسباع او شمرتهم حربيه
انصار الحق والحريه
__________________
صرختهم هيهات الذله
واحسين ابدن لا منبدله
امن الموته اوياه مامش احله
شهد امصفى او اطيب هيه
انصار الحق والحريه
__________________

سبعين او واحدهم ثايه
او هيبتهم شيال الرايه
بن ظاهر شيخ الوفايه
واصحابه اشموع او مضويه
انصار الحق والحريه
__________________

سبعين او واحدهم غيمه
يمطر موت احمر عل جيمه
خلاها اتهج ابهل هيمه
والشط خلو احمر ميّه
انصار الحق والحريه
__________________

واحد واحد قدم روحه
لجل احسين ايحب اجروحه
يسوون ادموعي المسفوحه
الهم بضلوعي التعزيه
انصار الحق والحريه
__________________

ابو فاطمة الطائي

عگيلي الليلة السابعه

كافل زينب سل بتاره
او _ مالك _ گام ايجهز ناره
____________________

بسم الله طب الها الكافل
ناداهم وينه الي ايقاتل
واختلطن حابل بل نابل
امن العباس اندور چاره
____________________

راچب لكحيله او يتبختر
اختلطت والمشراد اتعسّر
صار الطف دوّامه او تفتر
ماتعرف ليله امن انهاره
____________________

اطول واشجع زلم البيهم
اربعتالاف املگطيهم
عل شاطي اهناك امخليهم
نيتهم يحمون اسواره
____________________

طب الهم كفال الحره
طاحو نصهم باول خزره
او نص الثاني ايدور عَبره
لاچن سواهم معباره
____________________

فوگ اشواربهم خطواته
يتبختر . طوله اشمحلاته
حته الماي امست روجاته
ترجف . واتقبل بيساره
____________________

فدوه الاسمك عم الساده
الي اتخزره اتيتّم اولاده
لو هيچي لو مامش قاده
وصلت للفردوس اخباره
____________________

بل طف بس انت المتسيٌد
سيد الريح اوعل مي سيد
كل هاذه اوهاذه انت اوحيد
سبحان اسمك شنهي اسراره
____________________

ابو فاطمة الطائي

عگيلي الليلة الثامنه

الطف ماجت كل اركانه
من جاسم سرفنها اردانه
______________________

ماجت واختضت من جاها
گاع الطف ترجف خلاها
جاسم مغضب واتعناها

موت احمر بالطف عنوانه
الطف ماجت كل اركانه
______________________

شبل او من حيدر اطباعه
شحدهم وايلاوون اذراعه
زلزاهم چن يوم الساعه

اعليهم سيفه ايصب نيرانه
الطف ماجت كل اركانه
______________________

خله الطف ميدانه او هوس
او فوگ الروس افتر او دوّس
جاسم كلشي البيه امقدس

عزمه او تربيته او ايمانه
الطف ماجت كل اركانه
______________________

من عزمه احتارت هل وادم
عينه او سيفه او قوله الصارم
اگباله اليبرز ما رد سالم

ميت يلگونه اعله امچانه
الطف ماجت كل اركانه
______________________

يتقدم والجيش اتقهقر
ناس ابناس الكل تتعثر
او جسام اعليهم يتبختر

طوله اشمحلا چن ريحانه
الطف ماجت كل اركانه
______________________

اشجعهم ما يلزم روحه
اشما يشرد جسام ايلوحه
ما يترك وادم مجروحه

موت ايوزعن چن ذرعانه
الطف ماجت كل اركانه
______________________

من مثل العريس او يومه
خل الزفه ابنص الحومه
كل واحد حناه بدمومه

گال الزفه اتصير اهنانه
الطف ماجت كل اركانه
______________________

ابو فاطمة الطائي

عگيلي الليلة التاسعه

الاكبر واحسين ابميدانه
ريحانه اتشم ابريحانه
_____________________

اتوادع ويه الآيه الكبرى
الاكبر شم احسين ابصدره
گلبه ايفور او خلص صبره

اترخص . واتعنه الجيمانه
الاكبر واحسين ابميدانه
___________________

اترخص واتعناهم مغضب
چنه الريح الحمره امن اتهب
الشمس اتغمّض لمن يِضرب

والماي اتزورگ الوانه
الاكبر واحسين ابميدانه
___________________

يشبه جده الهادي الاكرم
صلى الله اعليه او سلم
وجهه ايضوي بس لو غيم

يمطر موت ابكل اركانه
الاكبر واحسين ابميدانه
___________________

بالطف سوه الما يتصور
كل العسكر بيده اتكور
اي هاذه ابن احسين الاكبر

معروف ابأسمه او عنوانه
الاكبر واحسين ابميدانه
___________________

عذبهم الله اعله اچفوفه
وصّل صايحهم للكوفه
اشما واحدهم حد اسيوفه

لا سيف ايرد لا ذرعانه
الاكبر واحسين ابميدانه
___________________

كحلة عين احسين افعاله
هنياله اعليه يا هنياله
زلمه ايدوس اعله العياله

لا يتراجع لا يتوانه
الاكبر واحسين ابميدانه
___________________

تاج اسمه او ضل فوك الهامه
بل طف موت احمر صمصامه
او حصل من الزهره اوسامه

خالد ضل فعله او نيشانه
الاكبر واحسين ابميدانه
___________________

ابو فاطمة الطائي

عگيلي الليلة العاشره

زينب هاي الليله ابحسره
وابخيمتها ادموع او عبره
_____________________

الهن دويه الليله الخدّر
خافن . والدلال اتفسر
باچر موت او گطعة منحر

والكل باچر ينحز نحره
زينب هاي الليله ابحسره
___________________

زينب تتلوه ابحسرتها
واحسين اتعنه الخيمتها
او عباس ايعدل شيلتها

او يمسح بل دمعات الحمره
زينب هاي الليله ابحسره
___________________

گاللها احسين اعلي هونچ
لا تسفح دمعات اعيونچ
ما دامي حي ما يصلونچ
لا واقسملچ بامي الزهره
زينب هاي الليله ابحسره
___________________

او كافلها ايحاچيها ابهِمه
زينب انتي اربات العصمه
برگبتي يا زينب ذمه

اليوصل حدچ اكسر ظهره
زينب هاي الليله ابحسره
___________________

گلبچ لا يرجف يا زينب
مادامي حي فنه اليگرب
وانه المنّي مامش مهرب

من ازعل تغدي الطف حمره
زينب هاي الليله ابحسره
___________________

كفي ادموعچ يابت حيدر
مصباح العاشر من ايطر
شوفي افعالي او گلبچ ينسر

من اركب لكحيله الشگره
زينب هاي الليله ابحسره
___________________

نعمين اتگله ابكفالي
يل ماغيرك شاغل بالي
خويه اعذرني او اعذر حالي

كل خوفي لا ننگاد أسره
زينب هاي الليله ابحسره
___________________

ابو فاطمة الطائي

شوط كربلائي الليلة الاولى

قميصك نشرته الزهراء وادموع الحزن هلن
شمخليه الحوافر بي او من اضلوعك اشخلن

__________________________________

مابين السمه والگاع قميصك فاطمه اتنشره
وتعلن بل جنان احداد الليله اموهدنه الزهره
كل اقصورها الفردوس بيهن تعزيه او عبره

الليله بل ملء لعلى
صوت الناعيه يعلى
او كلمن قصره ايجعله

حسينيه او عليها اسواد ولمصابك دليله ايحن

__________________________________

الليله ابكل گلب يحسين آذان الحزن أذن
الليله ابكربلا امن اجديد بل بر الحرم هجن
الليله اخيولهم ردت فوگ اضلوعك ايدبچن

اهلال النايبه عوّد
ابيض بس علينه اسود
شفته او چبدي اتمرد
مثل مردت دليلك يوم خيمات الحرم وجن
__________________________________

قميصك نشرته الزهراء وابكتره تهل دمعه
عبرتها تشل الحيل جبل لو واجف اتصدعه
من عاشر لحد هل يوم تنعه اعله الولد تنعه

ييمه ضامي او ذبحوك
وابحر الشمس خلوك
لا غطوك . لا دفنوك

بيك الف او تسمعية جرح واضلوعك انتثرن
__________________________________

هل اهلال احزانك او هيًج بل زچيه اجروح
او غدت بين المجالس هاي دمعتها تصب واتنوح
تدور عل يواسيها اعله ابنها المن گفه مذبوح

تنادي والدمع نهران
ابني ابحومة الميدان
يا شيعه انذبح عطشان

شربة ماي ما ينطوه والله اشفافه انفطرن
__________________________________

قميصك يا جمال الله ابيا حاله ينشرونه
موش ايفتح العميان يوم الي يشمّونه
بل الشافه يامولاي تعمه امن البچي اعيونه

احمر لونه وامسرّد
وذر صدرك عليه اشگد !!
ورماد امن الخيم اسود

ايتوصف هل قميص اشلون ؟ اوصافه علي كلفن
__________________________________

الليله خضرن الجروح اهلال الحزن يلچمهن
جرح العطش جرح النار جرح السبي رد الهن
زينب هل مسيه اتلوج ذكرت زود كافلهن

راح اعله النهر جوده
يويلي او گطعو ازنوده
واجتهن نايبه السوده

يهلال الحزن للشام مسبيات ما ردن
__________________________________

ابو فاطمة الطائي

شوط كربلائي الليلة الثانيه

الامم عدها شعار او بي تكتب كل مفاخرها
او خدامك يبو السجاد انت اجمل شعار الها
__________________________________

شعار اسمك يبو السجاد نرفعه اوبيه نتفاخر
نريدك انت لا منريد يملكنه شخص آخر
انت الملك بالدارين . دنيا او عالم الآخِر

قاموس العشگ انت
حرز فوگ الگلب شلته
شفت الخير من شفته
حلو حتى الالم وياك يعيوني او نواظرها
________________________________

حلو حتى الالم يحسين او بي نشعر دوه النه
ما نتهنه بل لذات ابچينه اعليك نتهنه
الزلم تخجل تهل العين .او بل دمعه تفاخرنه

رفعة راس دمعتنه
الدمعه اعليك رِفعتنه
هيچ العشره علمتنه
اليحبك من صدگ مولاي . دم دمعاته يهملها
___________________________________

شعار انت او وطن يحسين يامن خدمتك رِفعه
يمن لولاك ما نعرف انخلقت المن الدمعه
بَچينه مو رياء اعليك لا والله ولا سُمعه

شسوي بالرياء آنه
وامامي اشفافه عطشانه
ابگلبه لهب نيرانه
بلكي ابدمعتي مولاي للچبده ابللها
____________________________________

نحبك مو طمع يحسين او لا دورنه كل مغنم
لچن نعرف اذا ردنه الكمال انحصله بالماتم
دين انت او فرض عالروح الما حبك فلا اسلم

الصلاه لولاك ما ترفع
الدعا ابلياك ما يسمع
كل الدنيا الك ترجع
سفينه انت لهل لذنوب او كل صعبه تذللها
____________________________________

شنهي دنيتي ابلياك رخصيه او خير ما بيها
يمالكني امس واليوم او باچر والتواليها
بايعلك بلاش الروح ابعطفك سيدي اشريها

اخذني ابابخس الاثمان
اليبعيك روحه مو خسران
يمن لجلي انذبح عطشان
خاطر ما ازل وابعد او تالي النار ادخلها
____________________________________

رحمه ابهيئة الانسان الله امنزلك النه
صحنك جنة الفردوس او گعدت مجلسك جنه
يعشگك چن عسل مختوم لا ما ينشبع منه

خدمتك عدنه مثل الماي
لولاها انهلك مولاي
دوه واتداوي اعظم داي
واكبر نعمه الي يحسين لو هل دمعه تقبلها
____________________________________

ابو فاطمة الطائي

شوط كربلائي الليلة الثالثه

عليله او فارگاها احسين الله ايعين مهجتها
وين الي يساعدها او يهل دمعه اويه دمعتها
__________________________________

عليله او فوگ علتها صوبها الدهر بصواب
ودعها عزيز الروح او ضلت موچبه عل باب
مثل نعي ام ولد غرگان تنعاه ابدمع سچاب

تگله يل رحت عني
مثل يعگوب ضل وني
ليالي اجفاك هدني
يومين او ترسني الشيب او روحي النار حرگتها

__________________________________

مُرّ افراگ ابو السجاد نبي ما يگدر ايجرعه
العليله يا گلب عدها لمن گامت اتودعه
هل موقف اوصفه اشلون وبيا طور ألها انعه

الشعر ضل صافنه احروفه
لمن شمت اچفوفه
ملهوف اويه ملهوفه
تگله الساع طاب الموت واختنگت ابعبرتها
__________________________________

تگله لو بديه الموت ساعه ما اضل بعدك
شلي ابدنيتي يحسين اذا مو گعدتي ابسدك
اذا مو كل صباح الگاك وحط خدي على خدك

وعيناك الممات اشوه
يل هجرك علي بلوه
اشتسوه دنيتي اشتسوه
الحياه والموت دون احسين نفس القيمه قيمتها
__________________________________

عليله ابنيتك يحسين واعتابي غصب عني
چا منهو اليداريني وايدوّر دوه الونّي
وره الحادي اشكثر ناديت ولا منكم صرت چني

الحادي بل عجل سدر
وراكم اركض او اعثر
نمت اعله الوجه بل بر
اگول اشويه وايرجعون البنت مو هينه ضلتها
__________________________________

اگول اشويه وايرجعون بس محد رجع ليه
لما چلچل عليه الليل وآنه امناطره الجيه
لا اگدر اضل بل چول و ارد للدار مابيه

شلگه من افترض رديت
موحش چن گبر هل بيت
كلها اوياك ما خليت
لا سكنه ولا ارقيه ترد اعليه وحشتها
__________________________________

ابوحشه داركم ضليت انون الليل وانهاري
وازيد من دمع يعگوب اعليكم سال مداري
لاني الميته يحسين ولا آنه الطفت ناري

انت الكربلا امسافر
وآنه اگليبي ضل حاير
بيكم مدري اشصاير
يوم العاشر اشبي صار بل طف او شريعتها
__________________________________

ابو فاطمة الطائي

شوط كربلائي الليلة الرابعه

سبحان الذي أسرى بيّه امن الطمأنينه
الى هم اوحزن وآلآم او گلب ما بطل اونينه
__________________________________

عگب ذاك الزمان البي چانت دنيتي تانس
اشوف احسين كل مصباح والروحي فرح تارس
وابنيني اربعه وياي تضوي ليلي الدامس

يا ويلي الزمان افتر
او يبّس كل غصن اخضر
اخذ مني ابو الاكبر
شعب گلبي ابسهم الفراگ الما تخطي نياشينه
__________________________________

شِعب گلبي الزمان احّاه واخذ كل غالي من عندي
الولد من الچبد گطعه اومني انوخذ كل چبدي
واخذ منّي الأعزّ منّي عليّه او أعز من وِلدي

بي حادي الضعن حدر
وآذان العطش كبّر
حانت گطعة المنحر
حانت فرگة المحبوب يمشي او ما تشوفينه

__________________________________

زماني اوياي لا مو زين ابدلالي شچخ فاله
راح الما هويته ايروح او عزرائيل يبراله
هل اتى على الانسان طول الدرب يقراله

والطف شاحذ اسهامه
على چبده عله اخيامه
كل اخيوله وازلامه
عطشانه اعله دم احسين او محمد جده ناسينه
__________________________________

لولادي فلا هميت بس احسين شاغلني
اون خلاني طول الليل بس اشفايدة وني
دمعي ما يرد الراح . ربي امروتك ابني

اريد اسويعه اشوفنه
واكحل ناظري منه
اتراب اجدامه اشمنه
يربي كلشي بعد ماريد بس احسين اريدنه
__________________________________

لعب بيه الزمن ياحيف او صارت خاليه داري
الچانت زاهيه ببدور او بيها احسين خطاري
صفت بس للحزن والآه او نوح الجزع الجاري

سابع جار بچيته
من وني الي ونيته
على احسين او اهل بيته
ضحايه امجزره اعله الگاع كل منهم امگطعينه
__________________________________

ضحايه امجزره اعله الشط واحد من بعد واحد
واحد رضرضنه الخيل وابصدره الشمر گاعد
او واحد ضل بلا چفين وابعينه السهم راكد

حرمهم تاهت ابهل بر
عليها الشمر ضل يفتر
تركض زينب او تعثر
لا والي بقه او ياهن واليهن طفت عينه
__________________________________

ابو فاطمة الطائي

شوط كربلائي الليلة الخامسه

مسلم جسّد الاخلاص والحب ابمعانيه
مسلم يا سلام الله على روحه الحُسينيه
______________________________

اول نفحه للاخلاص واول تضحيه بل دم
اعله درب احسين ذب روحه شمعه ابنص وطن أظلم
راد الوادم ايفوزون وابخير السبط تنعم

طاهر مخلص او مهيوب
عند اهل السمه محبوب
اسمه بل گلب مكتوب
مسلم للعشگ قرآن كل اوصافه قدسيّه

______________________________

سفير الحمد والتوحيد والقرآن واحروفه
نبي چنه او يريد ايزيح كل اصنامها الكوفه
جاهم صوره من احسين لچن الأعمه ميشوفه

ابلسان الحگ يخاطبهم
يذكرهم يعاتبهم
وين الوعد گللهم
مو گلتو نريد احسين او خل يستعجل الجيه
______________________________

الوادم ما ترد اجواب ما چنهم يسمعونه
لجل بضعة دراهم صار نيتهم يبيعونه
باعو كل ضمايرهم وابن ازياد يشرونه

وادم ما عهد الهم
والدينار رب عدهم
للشيطان كل ودهم
خانو مسلم او ياحيف ماهي راشده النيه
______________________________

خانو مسلم او دارو عليه بسيوف غداره
التمت علي الآف ربع ابليس وانصاره
واهو مثل الغضنفر چان لازم بيده بتاره

اتكلم وابرفيع الصوت
آنه الما اهاب الموت
انا عمي الذي منعوت
موت احمر اذا يغضب واتعرفون ماضيّه
______________________________

سل سيفه او تعنه الجيش ابابيل الغضب چنه
خل الكوفه بس اصياح وانياح او بچي او ونه
بس الداعيتله امه اتمكن ينهزم منه
نِعم من مسلم المغوار
جدد حملة الكرار
خل الفاجعه ابكل دار
مسلم من مثل مسلم ابصولاته الولائيه
______________________________

اعليهم ضيّق الآفاق مهرب منه ما يوجد
غدروه او غدرهم ورث اباََ خذاه عن جد
كتلو مسلم او لاكن اسمه ابكل زمن سرمد

نعم من عل سطح شمروه
او بخيول او حبل جروه
بس اسمه فلا يمحوه
مثل شمس الظهيره او صار مشعل للولائيه
______________________________

ابو فاطمة الطائي

شوط كربلائي الليلة السادسه

ابروحي مسعره نارين لجل انصار الو اليمه
مثل بدر الدجه امن يغيب غابو واصبحت ضلمه _____________________________________

اريد انعه على الانصار حد ما تنشف الدمعه
مثل الفاجده الويلاد على الانصار خل ننعه
گضو حگ الوفه لحسين اهفتو شمعه بثر شمعه

اكتبو بالدم مآثرهم
ارخصو للحگ مناحرهم
ابيوم الطف بواترهم
كتبت للعشگ تاريخ واتربعت عل قمه
_____________________________________

سلام الله على الانصار ما دامت شمس تطلع
سبعين الوفو لحسين منهم روحي ما تشبع
اذكرهم صبح واغروب واحسّن بيها ما تقنع

مثل فرض الصلاه حبهم
واجب عَيني نندبهم
ننعه الهم نون الهم
لجل انصار ابو السجاد قليل الشوف من يعمه

_____________________________________

سبعين ابفرد مصباح طاحو دون ابو اليمه
تنافس عدهم اعله الموت كل واحد يريد اسمه
الوگع منهم يگع فرحان چي منطي السبط دمه

المنيه لو تناشدهم
مثل طعم الشهد عدهم
لجل احسين قايدهم
يعدّون الألم توفيق يحسبون الجرح نعمه _____________________________________

لجل احسين كل من صاح خل آنه أموت اول
حبيب ابشيبة ولهان يوم اعله الحرب حول
يصيح الموت وين الموت ليش اعليه شو طوّل

وينادي ابشغف ولهان
لون بيدي يهل ميدان
اموت او احيه للعطشان
واگول الربي الف ممنون هم تضحيه او هم خدمه
_____________________________________

حلم ريته واموت واياك وارجعلك عدل مولاي
وارد انوب اموت اهنا ضامي او ما اضوگ الماي
لحد سبعين موته انموت ولا گولن عليك اهواي

يبن الزهره ذوله احنه
كلنه اوهاذي نيتنه
ابمناحرنه يهيبتنه
كتبنالك عهد يحسين او كلمن وقع ابدمه

_____________________________________

گضو والروح مستعره عليهم تلتهب نارين
ماتو والدمع مدرار چي باقي وحيد احسين
واعليهم ابو السجاد ضلت دمعته بالعين

ينعاهم غده يبرار
گومو احسينكم محتار
ضل وحده بلايه انصار
او دارته العده صوبين او تبضع منهو الي يلمه

_____________________________________

ابو فاطمة الطائي

شوط كربلائي الليلة السابعه

زينب يا اخو زينب چاتلها الحزن والهم
دخيلك لا تفارجها يل وجهك يزيح الغم
______

دخيلک يا گمر عدنان زينب لا تجافيها
اجت الكربلا بحماك وانت اتكفلت بيها
لو صبّح صبح عاشور لا تمشي او تخليها

خيمه انت على اخيمها
وانت النسمه لتشمها
تريدك بس تضل يمها
ضلت عينها امن الخوف تتهامل او تگطر دم
______

تناديك ابدمع سچاب يخويه لا تضيعني
يودعني رغيد العيش يوم الي تودعني
او خدري يابعد خدري ينخاذ او غصب عني

ابغيابك ينكسر ظهري
واصبح حايره بأمري
يروحي . يابعد عمري
شني نيتك دباصرني يابدر الدجا الاضلم
______

شني نيتك تريد اتروح ؟ او زينب چا منو الها ؟
اعلمود الماي ناوي اتموت ؟ والزينب تعلعلها ؟
ابيش الروح اصبرها ؟ امن اتريدك شگللها ؟

خويه او يانظر عيناي
خل يحرم عليه الماي
او خل ينشف دمه البحشاي
بس ابقه يضي العين خلنه امن العطش نعدم
______

شريچ ارويحتي لتروح امشي اعليك ضلع امي
النهر من اسمع ابطاري يگف گلبي او يجف دمي
اخاف اتروح والذباح يجي او يحرگهن اخيمي

اخافن طولي ايشوفوه
اخافن خدري ايسلبوه
واخافن تالي اسنيني
اركض واعثر ابهمي او عليه اعداي تتبسم
______

گلي لو رحت للماي او مارديت الي سالم
يعباس اشتضن بالله ترحم زينب الوادم
شگللهم اذا سبوك او سبو حيدر او فاطم

او ياريت ابشتم تنفض
اعظامي امن الضرب تنرض
ولا واحد يگف مُعرض
او يگللهم بنت هاشم متنها امن الضرب ورم
______

دخيلك يا صبي العين چاره اوياك سويلي
لو نيتك تموت اليوم خويه او يابعد حيلي
اموت اوياك خليني او من ادماي تغسيلي

خليني اموت اوياك
ولا تسبيني خويه اعداك
شلّي ابدنيتي ابلياك
يعافيتي او بدر ليلي العمر بعدك عسن لا تم
______

ابو فاطمة الطائي

شوط كربلائي الليلة الثامنه

يجاسم گلبي مرمرني عله اوداعك فلا يگدر
اخذني اوياك للميدان المن ضالّه اتعثر
__________________________________

يعگلي اويا نظر عيناي يلب احشاي حاچيني
جاسم يمه بيّه اشلون لو ناوي تچافيني
عدمن يا شريچ الروح من تمشي تخليني

يجاسم غيرك اشعندي
عليمن گطعت چبدي
ارحم دمعي لبخدي
الخاطر شيبي واسنيني او ذاك ارباي يمشكّر
__________________________________

يحلم اصباي اذا ماشي او ما ناوي عليه اترد
اخذني وياك للميدان سويه انموت وانمدد
اشحلات الموت يومنّك تشابگني او عليه اتصد

اجروحي ايواسن اجروحك
او تطلع روح وي روحك
گبل السهم ما ايلوحك
خله الچبدتي يمرد او خله هل العمر يگصر
__________________________________

اجتني كربلاء امنين او ذبحت كل حلم ليه
يجاسم وين چنت احسب واعيد احسابي يوميه
تكبر وافرح ابعرسك وازفك يمه بيديه

يماي امن ايدي اتبده
بعد شيلمه شيرده
غصن بي ماتت الورده
بعد متفيدها أُميه او غصنها اتلوه واتكسر
__________________________________

غصن من الهرش مكسور ابوادي كربلا اتلوّه
ترف يا كربلا اوليدي توّه اربعطعش توّه
عليمن ينذبح عطشان او بل صمصام يتچوه

مثل الطير ربيته
من دم گلبي غذيته
امدلل هيچ تاليته !!!
يوادم ابني اشسوه عليمن جسمه امطبر
__________________________________

عريس اعله راسه اسهام مو چكليت طشوله
يسمع بس صرير اسيوف ما سمعان هلهوله
وگع متخضب ابدمه يمن فدوه اشحلو طوله

وگع جسام الموزم
وگع والنحر ينزف دم
وگع واعله السبط سلم
او ماي اهناك جابوله امن ايد الطاهره الكوثر
__________________________________

رايح من أدي جسام او ضلت عيني للدمعه
رايح والبچي شيفيد لو كل العمر انعه
جاسم راح عندي والي راح شيرجعه

نذرها ارويحته العمه
اوليدي سابح ابدمه
يحامي ابرگبته اخيمّه
گضه لجل الخدر شمعه ولا عن عمه يتأخر
__________________________________

ابو فاطمة الطائي

شوط كربلائي الليلة التاسعه

شبيه المصطفى يحسين بيك اشسوه لمن خَر ؟؟
لا تگدر تموت اوياه او لا تبقه عدل تگدر
________

يبو الاكبر على الاكبر حگها الروح من تطلع
حرام الجزع بالتشريع بس لجله وِجب اجزع
امن اذكره او اذكر التوديع اهيّس گلبي يتگطع

يوم ايوادعك اقبل
تشابگتو او دمعكم هل
او علي اكلف من المقتل
تودعه او ليك ما يرجع ضل گلبك لهب يسعر

________

يعينك الله يامولاي للتوديع شابگته !!
من طولك هويت اوياه مدري اشلون ودعته
گلبك يابو سكنه اشگال اشلون او بيش صبرته

واتشوف الولد عطشان
او ماشي الحومة الميدان
رايح تذبحه العدوان
يموت او ذابله شفته ضامي او چبده اتفسر
________

عفه گلبك يبو السجاد بل طف شِبتله بلوه
تشوف اوليدك ابعيناك من الطعن يتلوه
واهو مرمي عله التربان لا حول ولا قوه

ذاك اليطعنه ابصدره
اوهاذه الصوبه ابظهره
واجروحه غدن كثره
اويلي بگبلك اشسوه سبع طرات اضنه انطر
________

يبو اليمه صبرت اشلون زين او ما متت قِبله
وانت تسمعه من يشهگ وي كل طعنه بالنبله
وجهه انترس دم واتراب الچان امن الگمر احله

الچان امحلي ايامك
راح او ضلن آلآمك
تجيبه اشلون لخيامك ؟
هاي الما اضن سهله نبي من عدها يتعذر
________

عفه گلبك رحتله اشلون يوم الفرفحت روحه ؟
او تمددت اعله طوله اهناك او گلبك مرتفع نوحه
ساعه ابمنحره اتشمه ساعه اتحسب بجروحه

اشگلتله ياترى او مولاي
من شفت الجروح اهواي
گلتله اعذرني مامش ماي !!
منك رايد اسموحه يبعد اعيوني يل اكبر
________

امصابك يا أبو السجاد بوليدك يفت أگلوب
مثل طير العويدي اتنوح يمه والدليل ايلوب
تنعاه ابگلب مالوم او مدمع عالوجن مسچوب

لا تگدر تجيبه اوياك
او لا تگدر تعوفه اهناك
وامه والحرم تتناك
اشلون تعود يل مصيوب وانته اخلافه تتعثر

________

ابو فاطمة الطائي

شوط كربلائي الليلة العاشره

الليله اوداع ويه احسين آه اشمكلف الليله
هاي آخر مسيه اوياه باچر تنسبي العيله
____________________________________

ابخيمة زينب التمو او هاي آخر مسيه الهُم
او چني ابزينب الحوراء متچلچل عليها الهَم
تصد لحسين والعباس بالحسره او تگللهم

يخوتي او يابعد لوني
نيتكم تودعوني ؟
او بالغربه تخلوني
اطحن بالصبر والهم ولا من والي اشكيله
____________________________________

يبو اسكينه تريد تروح او تالي اسنيني تجفيني
اعيش اشلون انا ابلياك يا روحي او نظر عيني
ابحليب امي احلفنّك وحدي لا تخليني

يخويه احسين باصرني
ترانه الخوف چاتلني
اخافن باچر او لني
وحيده او شمر سابيني ويمد ايده عله العيله
____________________________________

يگللها الخلف بالله يزينب والوعد گرب
او لو طر الفجر باچر ما منّ الاجل مهرب
على گلبچ مرار او ضيم مثل صب المطر تنصب

باچر محد ايعينچ
مصايب تنترس عينچ
والعباس واحسينچ
عل تربان تتسلب كلمن دمه تغسيله
____________________________________

هاي آخر مسيه اوياچ بعد هيهات ما نلتم
مسية باچر اتلوجين لا والي ولا امخيم
اعيونچ والجدم وامتون من كلهن يسيل الدم

تعبانه اشكثر باچر
امشيب گلبچ الحافر
كاسر ضلعي او كاسر
گلبچ منه يتالم او دم المدمع ايسيله
____________________________________

باچر عطش باچر موت يزينب شدي احزامچ
باچر كل بني هاشم ينذبحون گدامچ
يحرگون الخيام اعليچ ويسحگون ايتامچ

يوصي او دمعه يهملها
بزينب والحرم كلها
بس انتي الحرس الها
بالچ تعثر اجدامچ ولو جدمچ برد حيله
____________________________________
تگله احسين بيه اشلون والله اتحيرت بامري
اجتني كربلاء امنين او شلي عگبك ابعمري
بعد وجه الصبح ما طر وانه شح او خلص صبري

عله هاذه الهظم مگدر
گلبي يل ولي اتفسر
ياريت العمر گصر
او هل ساعه انحفر گبري او عليه اترابي
اتهيله
____________________________________

ابو فاطمة الطائي

موشح الليلة الاولى

روحي لا تنشد عليها اشمالها
والاحزان الليله لاح اهلالها
_____

الليلة دمعاتي تخر فوگ الوجن
تستعر بيها الهضايم والحزن
كل عرج وسط الگلب اصبح يون

يندب اليوث الوغه وأشبالها
____

لا تناشدني على دمعي اليسيل
والله لو من حزني اموتن هم قليل
انت تدري ابهل شهر منهو القتيل

او منهي سلبوها او مشو باطلالها
_____

هل شهر جارح گلب طه الرسول
ومنه متصوب علي فحل الفحول
وكسر ضهر الطاهره الزهره البتول

والارض منه تصدع اجبالها
_____

اهلال عاشور الحزن والدمعه لاح
البي احسين امن الهظم ما مستراح
صار قبله للمواجع والجراح

والعطش فتت چبدتها او سالها
_____

فوگ نار العطش حاطوه اللئام
ابجسمه ماضل أنمله ابلايه سهام
ابتسعميه او الف مجروح الامام

اسيوفهم شبچت عليه وانبالها
_____

شفت الهلال او تذكرت المصاب
احسين نايم عل وجه فوگ التراب
دم رگبته صاير الشيبه خضاب

او خيل سحگت عل صدر وارجالها
_____

فوگ صدره داسو اولاد الحرام
والحوافر طحن تطحن بالعظام
او حرگو او سلبو بناته بالخيام

او خذو زينب تسحل ابأغلالها
_____

ابو فاطمة الطائي

موشح الليلة الثانيه

عدل ميت ضل شعاري كلمتين
نور عيني . يا حبيبي . ياحسين
_____

عدل ميت ماردت غيرك امير
ادخيلك آنه اباب عطفك مستجير
خادم اجعلني الفرد خادم زغير
هاي تكفيني فخر بل نشأتين

نور عيني . يا حبيبي . ياحسين
_____

مالي غيرك لا وسيله او لا رجاء
آنه كل الي املكه بس بكاء.
او عندي مهجه والله تعشگ كربلا
گلبي بيها ساكن ابطول السنين

نور عيني . يا حبيبي . ياحسين
_____

گلبي بيها ساكن او يهتف نشيد
غير ابو السجاد كلشي ما اريد
سيد . او يحسبني عنده امن العبيد
بيها يجبر خاطري وايقرلي عين

نور عيني . يا حبيبي . ياحسين
_____

انت سلطان او انا ابابك عبد
عدل ميت سيدي يمك ارد
انت ديني او بيك ربي ينعبد

لو لا شخصك چا صبحنه مشركين
نور عيني . يا حبيبي . ياحسين
_____

خدمتك عندي مثل فرض الصلاة
لا حياة ابلا خدمتك لا حياة
انت عشقي و جنوني للممات

انت ديني او لو رحت ماعندي دين
نور عيني . يا حبيبي . ياحسين
_____

احسين يا نور الهدايه امن الازل
او بل شعائر ديني يحسين اكتمل
انت لي ديره او گرايب . والاهل

وانت ساكن بالنظر والخافقين
نور عيني . يا حبيبي . ياحسين
_____

انت ساكن بل گلب يبن البتول
على حبك ما احول او لا ازول
دمعي يبقه للحشر لجلك هطول

او بل جنان انعاك واقره الكلمتين
نور عيني . يا حبيبي . ياحسين
_____

ابو فاطمة الطائي

موشح الليلة الثالثه

للعليله النوح والونّه لَجيم
لحد يوم الحشر حزني مستديم
_________________________

على بنت احسين دمعي مستمر
او من يمر طاريها گلبي ينعصر
اكسرت گلبي الصابت احسين ابكسر
اصواب مثله ماجرع موسى الكليم
للعليله النوح والونه لجيم
_____________________

فوگ علتها التي ما تنحمل
اعيونها اعله حسين بس دم اتهمل
راح عنها والحمل زايد حمل
والهجر ياناس ابدن مو رحيم
للعليله النوح والونه لجيم
_____________________

الهجر خلاها تون صبح او مسه
مثل يعگوب الدرب تتلمسه
راح منها الشوف والحيل أنّسه
عله . وافراگ . اشبعد منهن أليم
للعليله النوح والونه لجيم
_____________________

ويل گلبي اجويعده او تتنطره
تنعه يل والد عليّه اشأخّره
يدري ببنيته عليله امّرمره
ليش ما جاني يربي يا عظيم
للعليله النوح والونه لجيم
_____________________

ليش ما جاني؟ تُرى اعليه اشجره ؟
خاف من العطش روحه اموجره
خاف اميه من گفه اتگص منحره
والحوافر داسته ابأمر الرجيم
للعليله النوح والونه لجيم
_____________________

اشلون ياروحي لو انه ما رجع
واجه الطارش گالچ بالطف وگع
يجي بس راس امن اعاتب ما سمع
هاي عله ما يداويها الحكيم
للعليله النوح والونه لجيم
_____________________

العلة افراگ الابو مامش دوه
ما تطيب الا اموت اوياه سوه
ربي اخذ عمري ابمصيبة نينوه
ربي انت ابحالتي وحدك عليم
للعليله النوح والونه لجيم
_____________________

ابو فاطمة الطائي