سامراء سم او داء ...
سِگت اطهر سلاله
عاشر نور ضل مكسور ....
او دمع عينه ايتلاله
______

مأ انسه لوعة مهجته يوم الهوه ابسامره
أمسمم علي الهادي او يون وارسومه صارت صفره
من وجع چبده والالم ضل يندب أمه الزهره
وايصيح يمه فاطمه انفاسي صارت جمره

ابروحه ايجود ذابل عود ...
ولا واحد اجاله
اهله ابعاد والون زاد. ...
او دمع عينه ايتلاله
______

أيده على اصفاحه او يون او تهمل دمعها اعيونه
واندار وجهه الكربلا ضل ينعه و ايسمعونه
ثاري الوجع مال الچبد ما گدرو ابوصفونه
وانت الي چبدك بالعرى طحن الرحه ايطحنونه

عشره اخيول فوگه اتجول ....
وذر صارت وصاله
ويلي اعليك وشضل بيك .....
او دمع عينه ايتلاله
______

اتوجه للحسين او نعه والجفن بل هم دامع
چبدك او اچبدي اتصوبن لاچن فرقهن شاسع
الماي ما عني انگطع او لا ضامي بالحر واگع
ويلاه بس انت العذب ما ضگته من السابع

السانك صار خشبة ابنار ....
وحگ رب الجلاله
والشفّات متفطرات .....
او دمع عينه ايتلاله
______

مسموم آنه من طحت واليمي كلهم غربه
اتذكرت حالك واصرخت الله يساعد گلبه
اوحيد . او ضامي . او منكسر . وابكل كتر بي ضربه
وانوب زينب تنسبي مولاي هاي الصعبه

اتلثـ مرات. گام او مات .....
لمن وصلو عياله
زينب صاح خدرچ راح ....
. او دمع عينه ايتلاله
______

أمصيبتك يل بالطف متت هونت كل آلآمي
مهيوبه اهل بيتي او بگت نسواني هل جدامي
لا أخت ليه تنسبي او لا هجمو اعله اخيامي
او لا بل مهد عندي طفل بالسهم ذبحو ضامي

جدي احسين مثلك وين .....
سبو خدره او دلاله
علويات مچتوفات ....
او دمع عينه ايتلاله
______

حي ميت اعيوني اتهمل لجلك يماي اعيوني
ايضنون اون امن الوجع يوم الذي سموني
مادرو ونتي العمتي لمن تصيح : امتوني
يحسين گطعها الشمر اعليمن يخي عفتوني

اليوم الدين تجري العين ...
اكف نوحي محاله
حدر الگاع گلبي لاع ....
او دمع عينه ايتلاله
______

ابو فاطمة الطائي

نزله

يل مهدي الشيعه اتنادي
مسموم الهادي الهادي
____

يا وعد الله اشضل بعد يمته او ترف الرايه
خلص عمرنه بس حزن واقرايه فوگ اقرايه
كل يوم عدنه فاتحه او جثه اعله المسنايه
لو بارض سامره نِون لو عل فرات او مايه

بينه الهم رايح غادي
مسموم الهادي الهادي
____

ابسامره جدك يا نفل فاضت مِنَ السم روحه
يل مهدي والهاذه الوكت ما طيّبات اجروحه
ايريد ثاره ابيمنتك يل چلمتك مملوحه
راية الثار اليا وكت تبقه ابهضم مطروحه

خلها اترف ابكل وادي
مسموم الهادي الهادي
____

چم علي الهادي الينتظر چم چبد تسعر ناره
اهدعش معصوم ابأمل كلها تتاني ابشاره
كل واحد ايريدك دوه واتردله حگه او ثاره
ارجع الخاطر فاطمه ماعدنه غيرك چاره

شوف اشمر بينه او سادي
مسموم الهادي الهادي
____

انهض يصمصام السمه يا حيد يا جيدومها
عترتكم انوخذت غفل او هل نازفات ادمومها
ما سلم شايب لا طفل من السقيفه او يومها
بين المخذم هامته او بين السگوه بسمومها

يبن الساده الامجادِي
مسموم الهادي الهادي
____

تدري ابعلي الهادي اشجره يابعد اهلي او ناسي
طايح بلا اعمامه يون يوم اغدره العباسي
اعذرني يوجع هل حچي وادري المعاتب قاسي
شمعطلك يبن الحسن ماتدري بي ؟ لو ناسي ؟

يا حرزي او كل اورادي
مسموم الهادي الهادي
____

عجل علينه امروتك ماضل صبر وانتاني
يا كوكب المالك مثل يا واحد ابلا ثاني
رد واخذ ثارات الطهر امن الناصبي والجاني
خل بينه عيد الله يمر او ننسه دمعنه القاني

يامن يفداك اولادي
مسموم الهادي الهادي
____

ابو فاطمة الطائي

ابن مكه او زمزم او قرآنها
اعليه سامره اغلجت بيبانها
يابدر هل ليله غاب والچبد من عنده ذاب
____________________________________

الليله عند الآل لوعه او دمعه واصياح او عويل
او چنه يوم الطف الاگشر راجع ابهمه الثجيل
غصن من شجرة محمد بارض سامره چتيل
ميت الهادي يا شيعه والمصاب اصبح جليل

الكسرو اضلوع ام حسن بحقادهم
علي الهادي سمموه اولادهم
جددو نفس المصاب والچبد من عنده ذاب
____________________________________

چن گمر ليلة تمامه او صابه يا وسفه الخسوف
جرح غاير بينه اصبح فوگ لچمات الطفوف
يوم طاح ابناس غربه او عينه بس شامت تشوف
لا عشيره او لا گرابه جردت يمه السيوف

موش چنه ابن النبي مختارها
لحد موته احشاه تلهب نارها
اتجرع اصنوف العذاب والچبد من عنده ذاب
____________________________________
امورثه بل دلال جمره ما تطفيها الدموع
صار الف عام او بعدها تستعر بين الضلوع
عين تبچي اعله العطاشه الركضن ابين الجموع
او عين يل هادي المصابك تسچب الدمع الجزوع

مثل يعگوب الدموع اجريها
لحد ما عيناي الك اعميها
صارت آمالي سراب والچبد من عنده ذاب
____________________________________

ارض سامراء امست ارض شوغات او بلاء
چنها بالتاريخ صفحه من مآسي كربلاء
جددت بينا المدامع واستمر هاذه العزاء
جيل جيل اتوارثينه أو ما إله أبدن فناء

ننعه بسمك كل مسه او مصباحها
يمن تفداك الخلگ وارواحها
يا شريچ اقدس كتاب والچبد من عنده ذاب
____________________________________

طيحتك طيحة عشيره او دين او واعگال او وطن
يوم صلى اعله الجنازه واصبح ايتيم الحسن
هل وجود اوياه تيتم واسود الحور البسن
والبيارغ مال اهلنه اعليك كلها اتنكسن
ابكل زمان مصيبتك نحييها
كلمه من احرار الك ننطيها
لحد ميصير الحساب والچبد من عنده ذاب
____________________________________

ابكل وكت ذكرك نعيده رغمن اعله السمماك
لو يگطعونه ابحقدهم هم نضل نمشي وراك
ياعلي الهادي مهجنه والنظر والدم فداك
ليك وقعنه او هتفنه لعنت الله اعله الجفاك

لوعتك لا والله ما ننساها
بل نواظر تنحفظ ذكراها

ياجرح ماساعه طاب والچبد من عنده ذاب
____________________________________

ابو فاطمة الطائي

قصيده لميلاد سيدي ومولاي امير المؤمنين علي بن ابي طالب صلوات الله عليه

هلا ابتاج الإمامه
علي الحب والكرامه
بدر هل ابتمامه
علي يا علي علي يا علي
____________________________

علي اهلن وسهلن سيد الساده
علي يا بهجة الاكوان ميلاده
علي ابجيد الوجود امصوّغ اگلاده
علي امن الله هديه الخالص اعباده

انولد وجهه يتلاله
جمال الله جماله
الگلب فر واعتناله
علي يا علي علي يا علي
____________________________

أمير المؤمنين الأول المطلق
يوم اثلطـ عش من هل رجب اشرق
الأكرم والأعز ألأشجع الأصدق
هوّه الدين هوّه العدل هوّه الحق

زينة هل كواكب
علي ابن ابو طالب
احبه او بيه راغب
علي يا علي علي يا علي ____________________________

لله الحمد والشكر والمِنّه
أنولد اليقاسم النيران والجنه
علي النعمه الچبيره البيها نتهنه
يهل بسمه الخلايق كلها تتغنه

علي النعمه الجليه
نطاه رب البريه
وقف للرافضيه
علي يا علي علي يا علي
____________________________

ابوسط بيت الله حيدر اشرق اجبينه
يوسف لو يشوفك تنذهل عينه
الكواكب والشمس جنك يوالينه
يگولن لك ضوه من وجهك انطينه

بيك الحور حارت
منك كلها غارت
يم المهد دارت
علي يا علي علي يا علي
____________________________

امبارك يا أمام الأنس والجِنّه
ميلادك اجه .او طير السعد غنه
الك نبعث تهاني اقبلها . واقبلنه
عبيد احنه او خدم وانته الولي النه

يبو روح النقيه
صلاتي والتحيه
الك صبح او مسيه
علي يا علي علي يا علي ____________________________

أبو فاطمة الطائي

ابيات لميلاد سيدي ومولاي امير المؤمنين علي بن ابي طالب صلوات الله عليه

هل فرح بسمك يعتلي
انت عشگنه الازلي
علي علي علي علي
________________________

عل دنيه قد اشرق علي مشكاة الانوار
طاهر امطهر من طهر من اطهر اطهار
اجمل بشاره امن السمه لعيون الابرار
سلطان عرشه بل گلب يا هل خلگ صار

حبه مثل طعم الشهد
ماصار مثله اولا انولد
علي علي علي علي
________________________

ميلاده اول معجزه فوگ الموازين
اول وَليد ابهل ارض بي طلگن اثنين
فاطمه . اوبيت الله سوه هل قرن العين
جابن علي بس يا علي حيد الميادين

سبحان ربي الأبدعه
بي كل جماله امودعه
علي علي علي علي
________________________

فرحانه بي جن او انس ارض او سماوات
كاركوه واعيونه غدن اعظم مزارات
بي طافن املاك السمه جوگات جواگات
كل ملك ينظر وجنته نادى صلاوات

هاذه الوجه ما اجمله
يسوه الوجود ابأكمله
علي علي علي علي
________________________

محلاها ليلة مولده ليله ابالف عيد
بيها الله رازقنه (علي ) چا بعد شنريد
مولى . وطن . قائد . أبو . واشما ردت زيد
وكت النفاهه النه ترف . وكت الحرب حيد

حگنه انتظاهر بل فخر
عدنه علي خير البشر
علي علي علي علي
________________________

نكتب تهانينا الك من نبض الگلوب
مبروك يا حيدر علي يا اغله محبوب
مولاي يا اجمل قدر يا احلى مكتوب
حبي شمس لا غابت او لاتعرف اغروب

يا قائدا هاذه الفلك
اقبل تهانينا الك
علي علي علي علي
________________________

ابو فاطمة الطائي

كلمات لميلاد سيدي ومولاي امير المؤمنين علي بن ابي طالب صلوات الله عليه

غني يا طير السعد
علي هل ليله انولد
أنه الفتح المبين
هاذه امير المؤمنين
_________________

گلبي هل ليله ابتشر
منولد خير البشر
نوره عالدنيا انتشر
بالسما او بل مشرقين
هاذه امير المؤمنين
_________________

ألعلي سماه علي
فوگ خلاه معتلي
او صار للوادم ولي
او غيره ابد ما رايدين
هاذه امير المؤمنين
_________________

غيره گلبي ما هوه
هوه لعيوني ضوه
واقسم ابراعي اللوه
ابغيره ماعندي يقين
هاذه امير المؤمنين
_________________

هاذه اليشافي الجرح
اسمه للدنيه ملح
وجه چن وجه الصبح
لو طلع عل خافقين
هاذه امير المؤمنين
_________________

مولده خير او هنه
علي گلبي موطنه
ضايع ابلياه انه
دونه اصيرن مدري وين
هاذه امير المؤمنين
_________________

اله اهدي ارويحتي
او نظر عيني بسمتي
هوه صيتي او كشختي
فدوه لاسمه اشگد حنين
هاذه امير المؤمنين
_________________

ابو فاطمة الطائي

اعادة نشر
لميلاد سيدي ومولاي امير المؤمنين علي صلوات الله عليه

صلاوات صلاوات على الامام المرتضى
صلاوات صلاوات على الامام المرتضى
_________

اشرق علينه المرتضى ياشيعه صلو عل نبي
اهلا يمعشوگ الگلب يامن فداك امي وابي
انت الحنين انت الوفي انت الغيور انت الأبي
ميلادك ايفرح المحب وايغيض گلب الناصبي

يمهيوب يمهيوب هنيال البوصلك حضه
صلاوات صلاوات على الامام المرتضى
________

بيت الله شرفته او غده قبله او نصلي الوجهته
يا مظهر اعجاز السمه يل بيك نزلت هل اته
دلالي يا حيدر علي بسمك تسبّح نبضته
ميلاد المبارك عسن يا ضوه الشوف او بهجته

اهنيك اهنيك والفرح بيه ما گضه
صلاوات صلاوات على الامام المرتضى
________

عيدك امبارك ياعلي تهتف سماوات او ارض
عيدك امبارك والفرح اصبح علي واجب فرض
يا نعمت الله اعله الخلگ حيدر يساكن بل نبض
الله امشيخك عل بشر رغمن على كل معترض

عشگ بي عشگ بي گلبي مثل جمر الغضه
صلاوات صلاوات على الامام المرتضى
________

هل يوم املاك السمه ضاحكتن مستبشره
بدروبك اتطش الورد والحور يمك حاضره
ملهوفه لعيونك علي ثلثتيام امناطره
دارن عله الكعبه ابشغف والشوگ جمره مسعره

تتانيك تتانيك بالباب كلها معرضه
صلاوات صلاوات على الامام المرتضى
________

انشگت الكعبه واشرقِت عل دنيه چن شمس الضحه
ليك النوارس غردت او كل الزهور امفتحه
وكل الفراشات اعتنن ابحبك يحيدر سابحه
كلها تنادي ياهلا جت المحجه الواضحه

تناديك تناديك اهلا بمام الرافضه
صلاوات صلاوات على الامام المرتضى
________
العيد انت اومولدك يانور عيني يا علي
يا فرحتي ابهاذه المسه تسوه عمامي وكل هلي
والله لاغني للصبح مبروك عيدك يل ولي
ياخير يا نعمه او رزق وداك رب الكون الي

يمعشوگ يمعشوگ ابغيرك دليلي ما رضه
صلاوات صلاوات على الامام المرتضى
________

ابو فاطمة الطائي

ابو ذيات لميلاد سيدي ومولاي امير المؤمنين علي بن ابي طالب صلوات الله عليه

انا الزرعو طريجه احبال ... واشراك
او عليه كافر ايگولون ....... واشرك
لان عاف السقيفه الگلب ... واشراك
او يضل عبدك يحماي الحميه ....

يمن مثل العسل طرواك ... واصفى
مريض آنه او طبيبي اكتبك .. وصفه
امن اذكرك ابتشر وانسعد ... واصفه
مثل الگام توه امن المنيه ...

اليودك طاهر الميلاد ... والدر
يمن اصفى من الياقوت .. والدر
احبك يشهد العباس .... والدار
المابي اسمك اتحرم عليه ....

العشگ ما خله فوگ الگلب ... ينزار ( جنزار )
الليله ابمحفلك كل جرح .... ينزر
علي . يامن نعالك شرف ..... ينزار
اقبل روحي بالمولد هديه ......

يرايح للنجف مكتوب ...... وصله
گله افلان راد اوياك ... وصله
او باچر من يجي عزريل ... وصله
گله ايدير باله اشوي عليه ...

الكعبه اتشرفت بسمك .... والايات
يمثلك ما اجه ابنادم ...... ولا. يات
الك مو بس ولايه اهنا ..... ولايات
اعله گلبي او روحي واعيوني واديه

ابو فاطمة الطائي

هوسات لميلاد سيدي ومولاي امير المؤمنين علي بن ابي طالب صلوات الله عليه




هلا ابمولد امير الروح هلا يل شوفتك جنه
هلا يل مدري ابلياك بيش ابعمري اتهنه
اجيت ابمولدك مولاي اهوس . بسمك اتغنه
يا اجمل عيد اعله الشيعه



ثلثـ تيام تطلگ بيك. ضلت يا علي الكعبه
واقيسك ويه هاذه او ذاك . والله ياعلي صعبه
يل أسمك وجب عل ناس تتوضه من اتكتبه
او تسجدله امن ايمر اعليها




اوصفك بيش يل كرار. شكتب عاجزه الكلمه
يأكبر نعمه بين الناس ريت الينكرك يعمه
زلمه او بي تجله الله يعني شنهي من زلمه
يفتر الكون ابخاچيته



ميلادك سرور او عيد. اوفرحة كل گلب طاهر
يمحكم . يلي متشابه يباطن عندك او ظاهر
اليوصفك كون بل ميدان. لا مهوال لا شاعر
ايهوس جبريل او امثاله




شع نورك على الاكوان ضوه العالم ابأسره
او شعاع ارسومك الحلوات عابر كوكب الزهره
ابمهدك والرسل زاروك او طلبو ياعلي نظره
تتوسل كلها اشفع لينه




الف مبروك هل ميلاد يا تاج الخلگ كلها
جبتلك روحي بالميلاد رخيصه ياعلي اقبلها
واخذ من عندي كل دنياي تاليها اويه اولها
ترخصلك يانور اعيوني

_____

ابو فاطمة الطائي

ميمر جديد لمصيبة السيده زينب عليها السلام



غربه او قهر يخت الگمر
يوم الوفاه محد حضر
شباچچ ابلا زوار يدري الكفل لو لاله ؟؟
________

زينب يزينب هم تِطيب اجروحچ ؟؟
هم تنشف الدمعه او يبطّل نوحچ ؟؟
شو عدله ميته ايلوّعون ابروحچ

اشضل بل گلب او هاي الغرب
تتشمت الگبرچ تطب
صوت آل اميه امن جديد رد ازيد او يتعاله
________

والشآم آ يل شام ما بي راحه
ابگبرچ يزينب وانتي ما مرتاحه
يوميّه گلبچ گطّعو سبّاحه

نفس الالم او حرگ الخيم
اتمنيت لو راعي العلم
يگعد يشوف الدمعات ابنص الگبر هماله
________

ابليلة وفاتچ منشده ضل بالي
ابچي اعله نعشچ من بقه ابلا والي
مدري اجري دمعي للضريح الخالي

راحو هلچ ؟ محد الچ ؟
وين الحسين . او كافلچ
وين المواكب والناس ياحسرتي الهل حاله
________

متّي غريبه او شابحات اعيونچ
تانيتي اهلچ بلكت ايحضرونچ
ما جو وسافه او غربه اليدفنونچ

ابدار اليسر نحتي اشكثر
او لليوم نوحچ بل گبر
مافزعو اهل الكلفات لا خيل لا خياله
________

ريت ابو فاضل يگعد او نشكيله
وانگله زينب . يا كفيل العيله
فارغ صحنها والضريح الليله

لا فاتحه لا نايحه
لا ناس يمها رايحه
لا كو لطم لا عزيات لامن دمع يتلاله
________

زينب غريبه او ما گضت غربتها
وين ابو فاضل عنها وين اخوتها
ترضون ميته او جاريه دمعتها
هي بنتو من هي اختو من
ليش او ليمته هل محن
الله واكبر چم دوب اتضل حسرت الچتاله
______

اهنا يل كفلها ما تگوم الزينب
اوحيده. او غريبه . والگلب يتعذب
اتراب الگبر گد ما نون هم شيب

حيل اتعبت زينب گضت
مرتين زينب شيبت
يمته يراعي الكلفات للشام تتعناله
________

ابو فاطمة الطائي

رساله امن الگلب للغاضريه
ماتت زينب ابهاي المسيه
أَما تحضر جنازتها يعباس ؟
بالشام او نعشها عافته الناس .
يا راعي الكفاله يا راعي الكفاله
_________________________

الى حظرة أمير الماي عباس إِلى سيّد الغِيره
أَمّا بعدو اختك لفضت اليوم حسرتها الاخيره
ماتت والالم ينخر بل اعظام او يا حيرتها حيره
ما ماتت عزيزه ابين الاخوان لا .. ماتت اسيره

عله افراش المنيه ايصب دمعها
تردد بسمك او محد سمعها
تگلك يابو فاضل كافي الاغياب
تعال الليله وسدني اعله التراب
يا راعي الكفاله يا راعي الكفاله
_________________________

نوديلك رساله تدمي الگلوب يا كافل ضعنها
زينب موتاها الشام مرتين والمهجه سحنها
احبال او هزل واسياط واجروح هذن ما موتنها
كتلتها الشماته او ذيچ العيون ابحقد وايناظرنها

ينشدون او عماده ايسمّعوها
هل علويه شو ما جاها اخوها
مو گالو عندها اسبعـ طعش حيد
زينب تنتظر بس واحد تريد
يا راعي الكفاله يا راعي الكفاله
_________________________

غريبه ابين ناس الموش اجاويد تنازعها المنيه
تدير العين مامش يمها خوان يا حامي الحميه
گامت تنعه وين انت يعباس ما تلحگ عليه
تعال ابرايتك غطيني عباس او سبلهن اديه

تعال او خن تباصر وحده وحده
الميت مو يوسدونه اعله خده
ياهو الي يوسدني اعله اتراب
او ناس اليمي ما تخجل بل اعتاب
يا راعي الكفاله يا راعي الكفاله
_________________________

حِملت اجروح يابو اجروح والله من يوم العفتني
أسيره او بيه دارو بين الابيوت او لا ديره احشمتني
وصلت الشام ريت اتشوفها الشام كيف استقبلتني
كلمن تارس ايده احجار وايريد كون ايلوح متني

اشاگف مدري احتار ابدمعتي
متدري اشگد يفرحون ابحسرتي
اعرضونه ابسوگهم للرايد ايشوف
او ناس اتدگ طبول او ناس بدفوف
يا راعي الكفاله يا راعي الكفاله
_________________________

اخير انفاسها اتناشد يعباس عليمن ما تجيني
گبل موتي تعال احچيلك اجروح منها انعمت عيني
من طبيت قصر ايزيد بحبال مچتوفات اديني
او يگلي انتي الگبل ما شافتچ ناس زينب جاوبيني

چا وين الخدر ها يل أميره؟
يدري كافلچ جابوچ اسيره ؟
لنه ايريد بينه يشري وايبيع
گطع گلبي يا عباس تگطيع
يا راعي الكفاله يا راعي الكفاله
_________________________

كل هاذه او گلت عباس معذور للشام اشيجيبه
بس هل ليله گوم ابجاه الحسين آنه اختك غريبه
اريد ابين ادينك روحي اتموت يل طاهر حليبه
لتشمت الناس ابزينب اردود واتزيد المصيبه

اريد اجنازتي انت اتحضرها
او تگول الزينب آنه احفر گبرها
جيب اوياك تربه من الحسين
اريد اشتمه واغفه وانسه الاونين
يا راعي الكفاله يا راعي الكفاله
_________________________

ابو فاطمة الطائي

زينب يهل زينب .. ماتت غريبه بل يسر مكسورة اجناح
مو كافي تتعذب .. ميته او بعدهي تنتحب چا يمته ترتاح
آ يزينب آ يزينب
_________________________________________

يا سادة البريه .. زينب گضت سبيه .. ما بين الاجناب
لا اهل لا گرايب لا جاره لا حبايب الها تدگ باب

يهل المفاخر والشيم ابعمتكم اشلون
تدرونها ماتت قهر وامورمه المتون
تدرونها ابلايه دفن لو لا متدرون

يا ساده عمتكم .. ميته او نظرها عل درب بلكت تفزعون
منتظره جيتكم .. لآخر نفسها و الدمع يهمل بل عيون
آ يزينب آ يزينب
_________________________________________

امصيبتها يا مصيبه .. هم حرمه هم غريبه .. واليمها شمات
محد دره ابألمها .. من ماتت ابهظمها ... واشبيها حسرات

العلويه لو ماتت گبل مو چنتو ترحون
انتو التشيلون النعش انتو التدفنون
چا ليش يا ساده اشعجب ما رحتو لم عون

بل غربه وحّدها .. زينب يهل زينب بقت ما عدها دفان
الدمعه اتحفر خدها .. لا ولد عدها او ينتخي لا عدها خوان
آ يزينب آ يزينب
_________________________________________

العمايم انزعوها والزينب اگصدوها شيلوها عل هام
شوفو السِده عليها بيها اشعمل سبيها واثار الالام

شوفو الكتلها يا وجع . يا حسره يا بين
موتها شمر ابحربته من يطعن احسين
لو ماتت اعله المشرعه من صابو العين

شوفو الجسد ناحل .. گاضيها يا ضيم السبي او طبتها للشام
حبل اليسر واصل .. من العبايه او للزند واصل للعظام
آ يزينب آ يزينب
_________________________________________

عدكم خبر يهلها زينب وكت اجلها اتعاين عله الباب
تتحسر اتمنه. يجوها اهل المحنه واتردد اعتاب

بل قصر ما جيتو ألي. لا جيتو بل سوگ
لا حادي من عدكم وصل نوخ لي النوگ
بل موت هم وحدي اضل دلالي محروگ
چا يمته تلفوني .. مو شامتي ابابي وگف وايگلي ما جوچ !!!
دمعاتي بعيوني .. وافرك بديه انحيرت من گلي عافوچ
آ يزينب آ يزينب
_________________________________________

يا اعلى كل عشيره عمتكم الچبيره كتلوها بالشام
جثه ابنعش عافوها. وابگبر ما دفنوها ماعدهم اسلام

چن ما كفاهم بل قصر من جابو الناس
اعليها اتفرج والحچي ايشيب الراس
عافوها جثه اعله الارض بعناد عباس

لا عدله مرتاحه .. او من ماتت النوب الهظم متضاعف اضعاف
ما تعرف الراحه .. ياساده مو چانت گبل بل حلم تنشاف
آ يزينب آ يزينب
_________________________________________

يل بيكم الحميه گصدوها هل مسيه خل تسرع الخيل
اجنازتها شيعوها بالدمعه ودعوها والصرخه والويل

اخذولها ماي او سدر من گاع الاطفوف
واخذولها بيرغ گمر مگطوع الاچفوف
خلها اتوسد بل گبر واجروحها اتروف

شيعوها شيعوها .. سوولها اهناك العزه او هوسات واصياح
ودعوها ودعوها .. خل تغفه زينب بل گبر خلوها ترتاح
آ يزينب آ يزينب
_________________________________________

ابو فاطمة الطائي

يا راعي الثار
عندك اخبار
بل شام اشصار
يا راعي الثار
____________

الشام الشام جمره او ضلت تچوي ابروحك
الشام الشام تبرد يمته او تنسى اجروحك

يمته اتعود او تعتنيها
او زينب تخلص من سبيها
ميته او ما گطعت بچيها
تتحسر وسط الگبر

عدله او ماراعو گدرها
ميته او لحگوها الگبرها
غيرك من يجبر كسرها
امروتك يا راعي الامر

عونك ياحيد
البشاره انريد
يل جيتك عيد
يا راعي الثار
____________
ايام .اسنين او دار الغربه اتلوع زينب
ايام .اسنين گد ماتقراه ( الندبه ) شيب

جوه الگاع او عالي ونها
تشكي امن الغربه او متنها
وانت ادرى ابهمها او حزنها
تعرفها او تعرف ما جره

فوگ الهم فوگ المصيبه
ردت زينبكم غريبه
هم مسبيه او هم سليبه
او بيها العبره امكسره

مامش زوار
لا جوها انصار
مسدوده الدار
يا راعي الثار
____________

مسدوده البوب حظرة زينب محد بيها
مسدوده البوب المرقد خالي ويلي اعليها

وحشه او ما واحد أجاها
چن الطف رد او لفاها
من ضلت محد حماها
في ليل الحادي عشر

لا خوان او لاكو والي
بس الدمعات التلالي
وانا المحتار ابسؤالي
يا يوم او يمها اتحضر

عمتك مولاي
تعبانه اهواي
من داي الداي
يا راعي الثار
____________

ماضل اعيون من گد النوح يابو الغيره
ماضل اعيون زينب والشام حيره ابحيره

او ما مش غيرك نشتكيله
والمدمع من دم نسيله
يا راعي الغيبه الطويله
يمته اتكحلها المقل

ارجع يا يوسف زمنه
إرجع إرجع لم شملنه
والزينب خلينه انتعنه
يا بعد اعيوني العجل

كافي. الالام
جرد الصمصام
مو بينه اسهام
يا راعي الثار
____________

يا راعي الثار انريد الها انروح مامش چاره
ياراعي الثار اولاد ايزيد منعو الزياره

لا موكب لاكو يمها دمعه
لا قاري او لا ملا ينعه
بس صوت الناصب تسمعه
كلسا كبر بالصحن

نفس اوجوه الي سبتها
ردت هسا عذبتها
اعناد اوياها او حاربتها
ردوها اردود المحن

مو حگك ضاع
گوم الها ابساع
زلزاها الگاع

يا راعي الثار
____________

سرفن يمناك واگصد للشام وقلع بابه
سرفن يمناك. خل ابن العاص يرمي اثيابه

انعجدت بس انت التحلها
يا حلم الشيعه يا املها
الكد مهرك واگصد الها
وياك الزهره او علي

بيهم گلبك طفي ناره
حط بيرغكم عل مناره
البوب افتحهن للزياره
خل مرقدها يمتلي

يانور العين
يا عطر احسين
اگصدها الحين
يا راعي الثار
____________

ابو فاطمة الطائي

زينب لخير انفاس
تتنطّر العـبّاس
تتمنّه امن الطف يجيها
ايشيعها . ايصلي عليها
واويلي واويلاه
_____________________________

زينب يزينب يا جرح وآلآم
اشسوت ابگلبچ يل غريبه الشام
لا دمع ينشف لا جرح يلتام
تحرگ ابروحچ چن حرگ الخيام

والازيد امن الموت
شماتچ عل تابوت
حتى اسمچ محد يجيبه
ايگولون اجنازة غريبه
واويلي واويلاه
_____________________________

لآخر انفاسچ دمعتچ عل خد
اجنازه او غريبه ما حضرها احد
لا من عشيره او لا علم اسود
او لاچن يزينب جدچ محمد

محد اجاچ اليوم
چنچ سبايه الروم
بالدنيه ماشفتي راحه
ميته او هم ما مستراحه
واويلي واويلاه
_____________________________

عادة الوادم من يموت انسان
تلتم عمامه او ولده والخوان
ابيارغ او چادر او مدمع او حزان
ما شفنه حرمه اتضل بلا دفان

بس ضل علي السجاد
لمّن يشيعچ راد
ايفزع ما واحد يجيله
والمدمع من دم يسيله
واويلي واويلاه
____________________________

جور الليالي ابروحچ اشعامل
يا خدر ضايع ما عنده كافل
ريته يلفيلچ ابدمعه الهامل
ايغسل اجروحچ بيده ابو فاضل

آ لو يجي الكفال
چا دمعه من دم سال
چا حافي اوذب العمامه
او يبچيلچ بچي اليتامه
واويلي واويلاه
_____________________________

حسرة دليلچ من عرف بيها
اشرف اجنازه ابلايه واليها
العل گبر وگفو. موش اهاليها
لا بچي تسمع لا نعي اعليها

شمّاته واينشدون
منهو الذي مدفون ؟
ما عدها اشيوخ او عشيره
اي . هاذي الچانت اسيره
واويلي واويلاه
_____________________________

زينب اعتابچ محد ايسمعه
أيسي يزينب واگطعي الدمعه
ابو سكنه الخيل كسرت ضلعه
او كافلچ عل شط أيده منگطعه

والصوبه العامود
هيهات الچ وايعود
لحنيّن مصيوبه عينه
او لعتابچ زايد ونينه
واويلي واويلاه
_____________________________

ابو فاطمة الطائي

ابو ذيات
لمصيبة سيدتي زينب عليها السلام

هلي ما خبر عن حالي ... وصلهم؟
جفوني ابكربلا او گطعو ... وصلهم
ريت الحيل الي يرجع ... واصلهم
واگلهم عل جره والصار بيه ....

صرت ما فرزن ايميني ... ويسراي
كِتلني الي جره بالطف ... ويُسراي
منو العباس يتعنه ........ ويسراي
او يگله الليله خل يلحگ عليه ...

التصد اچفوف ابو السجاد ... يومين
زين اتضل تشم الهوى ........ يومين
زينب ماتت امن السبي ...... يو. من
ضربها الشمر يم راعي الحميه ...

ارى عباس بطيوفي ... وارى ماي
نشدته . الدوه هم ينفع .. وراماي
يخويه اليمشي مو ينذب .. وراه ماي
الشام احجار شو ترمي عليه ....

الدنيه او لا جرح يدّي .... شِفت بي
متت والناس تتبسم ..... شفت بي
الشام الشام بس لوعه .... شفت بي
انا اجنازه او يسموني السبيه ....

ابو فاطمة الطائي

كيد كيدك واسعى سعيك يا دهر
تبقه زينب عاليه او بيرغ فخر
_______________________

رغمن اعله الي قبل والما قبل
ألشام تبقه وادي او زينب جبل
اشما يحاربها الدهر واشما عمل
نهر . والگشايه متوگف نهر
_______________________

لو جفوها او حاربوها من جديد
الحجر يتصدع من ايطگ الحديد
زينب الداست على الطاغي يزيد
او گيد اديها عل السلاطين انتصر
_______________________

وين وين الحاربوها گلي وين
وينه ابن ازياد وايزيد اللعين
راحو او ضلت فقط اخت الحسين
تاج الله نصباها عل بشر
_______________________

يهل سديتو ابحقد بوب الضريح
او گلتو اهدموه ابحقد واضح صريح
يشهد والعباس زينب ما تطيح
صرخه زينب. موش بنيان وحجر
_______________________

صرخه واحدود السمه الها فضاء
شرف وايمان او عقيده وانتماء
الشالت ابمهجتها كل طف كربلاء
والله ما تحنون من عدها الظهر
_______________________

هاي اخت عباس سبع الگنطره
بيها كل طبع او خصايل حيدره
_دين _ زينب لا تحسبوها مره
او يا گلبها للشرايع مُستقر
_______________________

سدو حضرتها وامنعو كل عزاء
ما تمنعون المدامع و البكاء
الله متكفل عزاها بالسماء
واليرتب التعزيه بأيده الگمر
_______________________

ان چان بالشام المجالس ما تصير
اتصير وسط ارواحنه او وسط الضمير
امن السمه انسويلها چادر چبير
فاتحه او بيها النبيين اتحضر
_______________________

فاتحه او مجلس او رادود او شعر
موش يومين او ثلاثه تستمر
لا لحد المهدي يلفي او يستقر
او ننسه لوعتنه او دمعنه والقهر
_______________________

ابو فاطمة الطائي

نزله

زينب يزينب زينب يزينب
____________________

يا عگال الـ يلبسونه الساده
يا بهاء الباري بين اعباده
اعليچ ياوسفه الزمان اتماده
الليله طحتي وابو فاضل ناده
زينب يزينب زينب يزينب
____________________

طحتي والعباس حاله اشلونه
تارس الشباچ دمع اعيونه
يون . وابسابع سمه ايسمعونه
ايصيح ماتت باليسر مرهونه
زينب يزينب زينب يزينب
____________________

ايصيح ماتت واعتنه اعله احسينه
وابو سكنه ادموم صبت عينه
عله خاصرته يحط أيدينه
او گام ينعه يم نفس الحنيّنه

زينب يزينب زينب يزينب
____________________

ويلي بل شباچ ضل ينعاها
اتخالطن دمعه او دماء اشفاها
اتذكر ايام الگضن وياها
صاح وين الشام وين الگاها
زينب يزينب زينب يزينب
____________________

امگابل العباس دمعه ايهله
ايگله خل ننصب عزاء ايگله
الچادر انخليه فوگ التله
قاري انجيب او نصعد مُلا
زينب يزينب زينب يزينب
____________________

گله أي عل تله خـنـ سويها
فاتحه او نوگف نعزب بيها
او جربتك من الفرات امليها
وابثواب الحره كلها انطيها
زينب يزينب زينب يزينب
____________________

ابو فاطمة الطائي

لمصيبة الأمام الكاظم عليه السلام

صبرك ذل السجان او گبرك اوضح برهان
اصبح چن كعبه او كلها اتطوفه

من كل فج ايگصدون من فيضك ينـتهلون
يم بابك كلمن مد اچفوفه

يل كاظم مثلك وين
يل كاظم مثلك وين
____________________

يمن صبرك مثل وجهك جميل ايحير الناظر
او يمن حزنك عليم الله يشبه سورة الفاطر
رغم گيدك رغم حزنك بس اچم صنم كاسر
بني العباس من رادو يقهرونك صرت قاهر

الرادو ليك ايطمسون يابن جعفر يخسون
أسمك نور الله او ما يطفونه

مشعل ضل للاحرار ما يمحونه اشما صار
الكاظم چن كوكب ما ايلوحونه

ماخذ نهجه امن احسين
يل كاظم مثلك وين
____________________

ابطامورة حقد سجنوك حدر الگاع يل كاظم
والباب اغلجوه اعليك او خلولك حرس ظالم
بيت احزان سجنك صار چن بيت العند فاطم
بي ليل او نهار اتنوح يا لوعة بني هاشم

بس صوتك ضل متعال يتردد بل اجيال
هاذه آنه الكاظم بيرغ عالي

واعرفناه چل قرآن طاهر عن الادران
تبقه انت الخالد حد التالي
يا تجسيد الهل دين
يل كاظم مثلك وين
____________________

ابغياهب هل سجن مولاي گضيت العمر كله
صابر بس دمع عيناك يسولف لمن اتهله
عجيب انت يسر الكون المحد يعرف ايحله
سجين او تتبعك احرار والسجان بل ذله

الگالو نهجك يمحوه ثوب العار ايلبسوه
راحو ما أخذو غير اللعنه

وانت الگبتك شنيار بيها العالم محتار
اتسير كل ليله اعليها الجنه

خالد يبن الطيبين
يل كاظم مثلك وين
____________________

يل نهجك نهج الحسين مَتهادن ولا اتجامل
غريب . أوحيد . والسجان ذرة رحمه ما شايل
السلاسل عنده چنها اسيوف تحز ابجسمك الذابل
او گلت هيهات للذله واعله الألم متحامل

مو مثلك صبر ايوب او لا مثلك ون يعگوب
مكسور . او راسك ما طخيته

هنياله الشيعه اعليك حگنه او نتفاخر بيك
يامن للحَبّك كلشي انطيته

هم نوفيلك هالدين ؟؟
يل كاظم مثلك وين
____________________

ابلسان الحال چن أتگول اخذ ياربي حد ترضى
او لذالك الله هل خلاك سلطان ابوسط أرضه
باب الكل گلب مهموم . للمعتاز . للمرضى
تنطي الي يعرفك زين او تنطي الما عرف فرضه

بابك للكل مفتوح ايقر عين ايسر الروح
حاشه او مترده الجايك خايب

كل الي دگ الباب يوصله ابساع اجواب
اتفضل يل زاير گول اشطالب

اخذ ازياده او ضعفين
يل كاظم مثلك وين
____________________

هاذه انت يبن جعفر كوكب دري يتلامع
گبه او اربع امنارات ضون للسمه السابع
چا وينه الرشيد او ذاك قصره العالي الواسع
اندثر واتلاشه بالتاريخ او عن گبره منو السامع

ولى او ماضله اوجود وانته الباقي او موجود
حد يوم المحشر تبقى العالي

ابهاذه العالم او ذاك تبقه انت الكاظم ذاك
نور او للوادم يبقى ايلالي

يا كحلة هاي العين
يل كاظم مثلك وين
____________________

ابو فاطمة الطائي

ابيات على وزن التجليبه لمصيبة موسى بن جعفر عليهم السلام

عجب مامش عشيره تفزع الموسى
على جسر الرصافه انفاسه محبوسه
____________________________

أبطامورة سجنهم عانه ما عانه
واقسى من الشمر يا شيعه سجّانه
جوه الگاع حطه . اشلون زنزانه
ظلمه او موحشه واگيود متروسه
____________________________

ابطاموره او عليه امضيچ السجان
لا گيده يفكه او لا فتح بيبان
ابن جعفر تجرع هل عذاب الوان
امنگع بالدمه وادموع ملبوسه
____________________________

خِلص عمره او بعد ما خلصت العبره
مر عليه نفس المر على الزهره
يوم الي اجاه السندي وايسطره
او طاح اعله الارض والحاله ميؤسه
____________________________

يون او ما بشر يترأف ابحاله
تصد الباب عينه او تجري هماله
لا يمه وَلَد . لحد من اعياله
واعداه بل شماته اصبحت مهووسه
____________________________

كل هاذه او عدوه ما اشتفه منه
رد سمم دليله او زيد الونه
نحل جسمه او غده مثل اسعفه چنه
يتراجف . يويلي اوحاله منكوسه
____________________________

مات او لم يزل سجانه باحقاده
او گال امن السجن شيلوه باصفاده
خلاه عل درب وابكل حقد ناده
ابلا ضجه او بچي ماريد كل هوسه
____________________________

ينادي الما له غِيره او لا شرف عنده
امام الرافضه هاذه انمرد چبده
ممنوع البچي او لحد يصل عنده
او لون بيدي اخلي الحافر ايدوسه
____________________________

او خلا عل جسر وامگيد الكاظم
ويلي اعليك يا راهب بني هاشم
بچت ليك النبوه وانحبت فاطم
واجت فوگ النعش تشتمه واتبوسه

____________________________

ابو فاطمة الطائي

الكاظم بالسجن مسموم . ما تنهض يوالينه
__________________

يل مهدي صبرنه انباد
يمته سيدي الميعاد
گوم اوشوف اسد بغداد

امگيد . منكسر مالوم
الكاظم بالسجن مسموم . ما تنهض يوالينه
__________________

أمسمم والبدن مِخضر
او گلبه سيدي اتفسر
يون او روحه تتحسر

ما واحد اجاه اليوم
الكاظم بالسجن مسموم . ما تنهض يوالينه
__________________

سجّانه رحم ما بي
امگيد ايده او رجليه
او بيبانه غلگها اعليه

ينزف من گيوده ادموم
الكاظم بالسجن مسموم . ما تنهض يوالينه
__________________

يل مهدي وحيد او مات
واحچيلك بعد لوعات
تدري اعيونه محفورات

من گد مابچه المضلوم
الكاظم بالسجن مسموم . ما تنهض يوالينه
__________________

مات امسمم ابيا حال
اعليه من الحديد ارطال
اجنازه او دمه ينزف سال

يل مهدي الگلب مكلوم
الكاظم بالسجن مسموم . ما تنهض يوالينه
__________________

غيرك من نگله الصار
يل غايب مهجنه ابنار
اشذنبه الكاظم او يحتار

او هوه امصوبه المحتوم
الكاظم بالسجن مسموم . ما تنهض يوالينه
__________________

موسى ابنعشه ما مرتاح
ما يسمع بچي واصياح
يسمع ضحكة الذباح

يگله ما ترد اتگوم
الكاظم بالسجن مسموم . ما تنهض يوالينه
__________________

الي ايخدمه جبرائيل
شالوه اربع احماميل
مشو والنعش چان ايميل

واعليمن نذب اللوم
الكاظم بالسجن مسموم . ما تنهض يوالينه
__________________

اعليه ناده ابرفيع الصوت
هاذه المرمي بل تابوت
امام الرافضه والموت

ناله والقدر مشؤوم
الكاظم بالسجن مسموم . ما تنهض يوالينه
__________________

يمهدينه الجروح اهواي
عجل لينه يا مولاي
اوشوف الكاظم اشبي داي

امروتك يا عزيز الگوم
الكاظم بالسجن مسموم . ما تنهض يوالينه
__________________

ابو فاطمة الطائي