በህይወታችን ችላ ያሉ እየመሰሉ በቁስላቸው ደስታችንን ላለማበላሸት ሲሉ ከአከባቢያችን የሚርቁ ሰዎችን ግን ፈጣሪ ያስባቸው 🙏🙏

....ጥላቻና ፍቅር....


ጥላቻና ፍቅር እየተሽከረከረ
አዕምሮዬ ቢዞር ልቤ እየሰከረ
ረብ የለሽ ህይወት ህይወት አልባ ኑሮ
እንዲያው መጮህ ብቻ ልክ እንደከበሮ

ወዝ አለው ከበሮ ካልሆነ በባዶ
ልብን ያስደስታል በዜማ ታጅቦ
ጭብጨባ እልልታ በበዛበት ቦታ
ዝም ብሎ አይደለ ከበሮ ሲመታ
በወግ በአግባቡ በጥበብ ሲደለቅ
ከበሮ ድንቅ ነው ወደ ጆሮ ሲዘልቅ

አለሁ እንጂ እኔ ከከበሮ ያነስኩ
መቀደስ አቅቶኝ በሀጥያት የረከስኩ
ሰሚ እስከማጣ በደሌ የከፋ
ጽድቅን እየገፋሁ ለሀጥያት ምለፋ
መልካም ድምጽን ትቼ ክፋትን ምሰማ
ሀጥያት ሲደልቀኝ ክፋትን ማሰማ

አለሁ እኔ ከንቱ
ያነስኩኝ ከስንቱ
የጠፋኝ መንገዱ
የቃጣኝ ማበዱ

ፍቅርን ለመፈለግ
ጥላቻን የማድግ
ጥላቻን ሳብራራ
በፍቅር ሳቅራራ
ውል መንገዴን ስቼ
ከራሴው ጋር ተጣልቼ
እንዲያው መጮህ ብቻ
እኔው በእኔው ዛቻ።


ኢዮብ
ሰኔ 07/2015 ዓ.ም
04፡42 ማታ