هاي جيتي من الصور
بس ما عرفتك
ياهو المغيرك عليّ ؟
ذمة برگبتك
ياهو تارس عينك وماخذ مكاني ؟
واني حطيت اسمك بكل الاغاني
وانت حتى بصورتك گالب خلقتك
هاي جيتي من الصور
تعبان اجيت
طالع من السجن
بس ماعندي بيت
لهسة بالجامع ادورك من تغيب
وطفل بعيوني اشوفك مو حبيب
وكت هسة تشوفني وما تلتفت
واني من جابولي عطرك ما متت
الموت باذني يصيح
واني اسمع ضحكتك
هاي جيتي من الصور بس ماعرفتك
شلون هيج تغيرت ؟
گلي شجاك ؟
لك اني چنت المحترگ
واركض وراك
ومن طفيت وشفتك مشربني ماي ؟
مكيف شمدريني بالموت بدواي
ما معودني على هذا التزامك
ماردت تشبگني بس بارد سلامك
شلون تنسى اسمي بعد ذاك الدلال ؟
واني گايل لامي شنسمي الجهال
شلون راح اقتنع حتى انسى عشرتك ؟
هاي جيتي من الصور
بس ما عرفتك

شايلك حقد بالدرب لو الاگيك
واشوفك تحترك وتأشر افزعلك
صح اركضلك وكل همي اوصلك
ماطفيك !
صوغة حطب جايبلك

المثلك مو يذم
يمدحنا مو مقبول
جريمة افعالنا المثلك يقيمهن
انضبط واحجي على كدك يم اليسمعون
والامثال الرچيچة بغيرنا اضربهن
لو خيل احنا نسرج لو ركاض نفوت
نستنكف نجيب چلاب نسرجهن

بعيدة النقطة ذيج الرايد اوصلها
اريد ارجع لاول مشكلة انحلت وما احلها
مشاعر تنتهي ولا مشكلة بكل يوم
يمكن ساعة الـ تخرب نظام النوم
بس ساعات تسهر من تعدلها
علاقة وغطت الحب بمشاكلها
ادري المنظر يسر الـ ورا الشباك
وما لحگت اشوفه لان جنت وياك
اللحظات السعيدة ما مكملها
احبك گتلك گبال البشر من جان
قيس لـ ليلى بس معجب يگللها
وهسة تغيرِت وتغيرَت كلها
المشاعر ع الوجه بينت بعد ماداعي امثلها
تجيني تريدني اتلگاك ؟
كلش متستاهلها
تريد تروح ؟ ذيج الباب تندلها
اني تروح صحتي ما اگوملها
تنهي لبيني وبينك جنت دائما اتوقع
بس من التوقع جنت حيل اسرع
لمن صحتك باسمك
وصحتني باسمي
كلت هنا الحب مات وصعب يرجع
خليني اذكرك من جنت بالروح
دقايق قبل لا تطلع
ممركز جنت من چنا عين بعين
حجيت حجاية غثتني ونسيت اسمع
اذكرك حتى لمن ملتهي ويا الناس
اشوفك راحتي بنص يومي الموزع
وبعد مابية اظل وياك
وصلت هسة لاخر نقطة
نتودع
عموما ما بقالي وياك شي واحجيه
والظل بالگلب كالعادة راح ابجيه
ومو يمك
وحدي ابچي
مثل ما تضحك لوحدك
وهسة لغير ظهرك كلشي ما رايد
اريد تروح
ولو ما اظنك تعاند
واذا نتلاگه صدفة نسلم من بعيد
بسلام المبتعد يبقه الگلب بارد
شلونك والشلونج ما تغير شي
افترگنا ماكو شي ينگال ويساعد
عفتك ؟ لو عفتني ؟
ثنينهن واحد .

كم مرة التحبه بگلبك تعذره ؟
لان ما واگف گباله نساني يجوز ؟
ما بين خيالي الواگف بظهره
عشت بي حارس وماعندي شي ينباگ
الا شچم حلم ماينذكر سعره
رغم انا اول اليدعوله من يطيح
واول عين لاجله تگابل الحضرة
واول واحد الينخاني من تضيج
واول من يهد رشاشته بكتره
واول عاشگ لخاطر حبيبه يموت
ولنفس المحب يدفع سعر گبره

صيح لامك عدنا شغلة تفيدها
نگلها شكرا خالة ونبوس ايدها
قطعة وحدة وصايرة عليك ازدحام
نريد نتوسلها بلكي تعيدها
عيونك بكبر الفرح والامنيات
وضحكتك طيرة وعجزنا نصيدها
واحنا ماعدنا على كد عينك فلوس
نريد بس ضحكتك بيش تريدها ؟

چا غير امها تنطيها ؟
لتدافع عليها مدافع الزوار
العمايم والعگل انگلهم عليها
هيج الله وبخت جدكم
وارد لبيتنا الگيها
ماخليها تطلع يمكن من الباب
لا يا باب
باب ردانها ما اطلع ايديها

هاي شبيك ؟
هذا اني !
احترم مو هيج تنساني
ترى المفروض
وحدك تبقه فترة هواي
يلا تحب شخص ثاني

ماجنت ادري انسي
وعادية من ابتعد
حسبالي مو عادي
ما ادري تفزع هوا
على شموع ميلادي
واحساسي مابي غلط
كال على نيتك بعد
من كمت تحسب منو الغلطان والبادي
قصرت تگول للخلگ ؟
مو والله اذا سولفت
منهم تظل تلبد
اشرد من المدرسة بيوم امتحاني واجي
عن لا اتاخر جنت وياك بالموعد
وتتعارك ويا الخلگ
وافرش چفوفي غطا
واندهلك انا احتمل بس فدوة انت اشرد
هاضمني ردك لمن گايل عليّ منو
ماتعرف انا منو لمن صعد شانك ؟
انا الكفيل الـ اجه طلعك من السجن
وبغرفته لبدك وانحكم بمچانك
راح ابقه اتاني لحد
ما ترجع لوحدك
وتروح هاي الخلگ
ويصير هذا الحجي من يختلف شكلك
خايب وحگ عزتي
ما تلگه مثلي بشر هاكثر يهتملك

نوارس حط علينا الشيب
چي نشبه نهر دجلة
مرات الحزن بالروح
بس ينشاف بالگذلة

ما ادري مني الغلط ؟
ماعندي حظ اني ؟
عود اني ردتك عوض
تطلع درس ثاني ؟
شحجيلك
تفاجأت
ما اخذ منك وقت موضوع نسياني
انت البديت الحجي وتقربت مني
وحاولت ما حاولت عن كلشي تسألني
ومن شخص عابر صرت للشخص اليهمني
تاليها تكسرني ؟
تتركني لمن بدا گلبي علمودك صدك تتغير أطباعه؟
تقترب مني بسنة
وتعوفني بساعة !
ع الاقل حاول چذب
هم لو شخص مو مهم تتأذه بوداعه
ماعندي موقف الك ويقهرك شوية ؟
مايظل بالك علي وترجعك اغنية ؟
المطر
هذا الشتا ميذكرك بية ؟
مشكلتي احبك جنت
جانت عيونك صدك ما اكدر اعبرها
وحتى الهداية التجي من عندك
من الفرح كل ساعة اصورها
غشني الكلام الحلو
ثاري البداية شغف يختفي باخرها
شكم غلطة الك عبرت
وگلت انچفى شرها
مشكلتي بالمشكلة الماچنت اكبرها
المفروض اكبرها !
صدمة وعشتها قوي
لكن امل خليت
وانت ذكي بموقفك
جواية تحفر چنت وبكلشي ماحسيت
من گتلي خل نبتعد فترة ويردنا الزمن
اني رحت للمرض
وانت رحت حبيت ..

صايرة الدنيا على وجهك تبتدي
لا شمس تطلع ولا يطلع گمر
وجهك الفرصة السعيدة
وكل وجه بعدك يجي چفيان شر
و وگع شعرك على عيونك
وخفت لا يسوي قدر
ولو هو المطر ينزل
حتى يغفى على النهر
احضني خلي اغفى على چتفك
خلي احس وضعي استقر
حضنك يذكرني بالبيت القديم البيه ربيت
وبي امان وبي سهر
وغيبتك من انهجر
تحجي يمي ومايمر بأذني صوت
عوفني بعيونك اصفن راح اموت
تدري كدامك صدك ما احجي ليش
اصدق انواع الغزل هو السكوت
والله لو انت بحياتي من زمان
ولا على الخالي بشر غيرك بفوت
صير گدامي اليحبك خلص صبره
اني سود وما اقاوم جايني بعيون شگره ؟
اخجل بعينك اباوع سدها خلي اخذلي نظرة
تنام قبلي بساعة
بس مو ساعة چنها
سنة چنها مفارگك
امنيتي اكعدك عادي من اشتاقلك
امنيتي من النوم افز گبالي وجهك
وجهك الحلمي ابوسه
حبني خنكمل سوه لتكلي لا
انت من هذا الميجي احد وراه

انطيني حل عيوني تعبت
صورتج ماجاي تنزل بالدموع
ليل درويش اكضي ليلي
ويكضن على جفوفي جويات الشموع
ارد انام
شلون انام ؟
سيف هجرك اعمى ويحز بالضلوع
انت بس كلي تجي ؟
لو احير بامري
ولك ريح تمر علية ايام عمري
مالي واهس حتى باهلي
بهاي تدري ؟
ليش ماكتلي من الاول جاي اكسرك ؟
لا حجر محبس جزع وبكيفي انزعك
لا حلم واكعد وافسرك
اني خسران بحياتي هواي
علمني ارد اخسرك
ارد احب الناس
ارد اضحك اغني
لا انت اليمي واطير
ولا انت المبتعد عني
غير عود گلوبنا گالوا سواجي
شبيك ماتعرف تحبني ؟

لا سفرة شمس واتناها يمتى تموت
ولا تگضي بدمع واعبرها واتعدا
چان الموت ارحم منها راحة بال
وعلي ليلة وداعك ع الگلب شدة
وبچيت بكد معزتك من نويت تشيل
وحلم يتبع حلم گدامي يتبده
لما حسيت شوفي ويا الظلام ولام
بحيث الباب جفني يموت لو امده
اخذني وياك گتلك گتلي دربي بعيد
نفس گتلك دجرني وگتلي شيرده !
وجهك درته عني وبية دار الليل
روحي وگمت انازع جفني ما اسده
وانا ادري النجم لو ما الليل يضيع
انعم الله على الصور لو شوگك تعده
وانا اول بشر لمن يريد يگوم
گواغد مو چفوف التوگف تسنده
وحگك كلشي سومر بية وانسليت
ومامش في يشبهك واكعد بسده
سيف فراگ وجهك بية شابع صيت
ثخن كل ما يجوع برگبتي يحده
ولك عطاب روحي الغيم كاشخ بيه
تذكر من كلتلي يعيل بية هواي ؟
الهوا وهو الهوا وگتلك شحده !
اذا مر على خشمك ناقص استئذان
ارده الما مفكر واحد يرده
تعبت لخاطرك كلت المجازه الگاه
شتالي شلون غيري يحوفه ويحصده

المن بعد جيتك ؟
چا غير گبل العمى صحتك تعاللها ؟
واسحب كلامي خلص
لا احبها عينك بعد
ولا فدوة اروحلها

الليلة كلش مختنگ ياريت اموت

خاف من شباچچ تمر الجنازة
كولي احبك حتى اذا مابيها صوت
وابچي يم اهلج علية وكولي ماتتلي صديقة
ومو حبيب
والسبب مو صحتي
وجهج من يغيب
مبري ذمة المرض شعليه
انتي لو جايتني اطيب
وانا كل ما اريد اجيج يحير چفي
اغلى من گلبي شجيب ؟
وانا گتلج لا تعلقيني وتبچيني علية
وانتي تدرين الدمع بچتافي امسحه
وما تلوحه چفوف ايدية
مو زعل ويفض بالاسف
گامت تحس بالملل
جاي اعاني من الاحبها بكد معاناة الشلل

امي باب الجنة بس ببيتنا
امي يم رجليها يكبر صيتنا
امي يا اول فراشة
تحط علينا وماتحط على الورد
امي لو كالتلي عفية
هنانه احسن بالمجد

يا أم
ي بزره
و يارفيجه
يا الشاعلتني بلا حريجة
حسبالي
اموتن بيج و وياج
مو كلمن يروح
ب طريجه
يا دافية
وكلش حنينة
يا شعطلج..
يالما تجينه
تدرين كلبي
شلونه بالليل
تتونس الموتى بونينه !
يا رب محنة
ويا منارة
فكدج ؟
صدك رايد جساره
زلمه شكبرني
وجنت اهم بيج
ماورثت يمج جكارة
ااخ
و شحط لـ ااخ و تطيب ؟
يا الكلشي عگبج مو خسارة

ما جاي انام وگلبي تعبان
وزعلان احس من كلشي زعلان
تطفه الشموع ودمعي سهران
وميت احس والليل دفان
وحتى الما تمر بالبال
مرتلي
واحس الدنيا بالبلعوم وگفتلي