يمه وينج ضل مجاني خالي
فكي عينج وشوفي عكبج حالي
اهنا ييمه اهنا ييمه
*******
ييمه اشلون انام وتغمض عيوني
ابجي اعليج كل ساع ويسكتوني

يمه اشلون اطب للبيت وام البيت ماهيه
كلبي ما يحب اوداع وانه افراك ما بيه
جنازج حجيت وياه وكتله اتعطل اشويه
شالت للكبر يا حيف امي الكلها حنيه

يالخذتها جلمه عندي وياها
انسه روحي وامي ما انساها
اهنا ييمه اهنا ييمه
*******
شينشف الدمع يايمه حاجيني
محتاجه الحنانج ليش عفتيني

لمن شالج الجناز روحي وياج شالاها
صحت بصوت هاي امي وخل اتواع وياها
عافتنه وبعدنه ازغار وامنه وين نلكاها
بتراب الكبر نامت والضنه كطعناها

وكت الغروب ندخل الحجرتها
والها نشتاك من نشم ريحتها
اهنا ييمه اهنا ييمه
*****
فليت الجفن بيدي ولزمت ايدج
وتخليني بعذابي يمه ماريدج

يايمه صحت شبساع رحتي وخلصت العشره
كلبي ينعصر كل يوم كمت امن ادخل الحجره
اذكر كعدتج بالبيت ضليت واجر حسره
بس اسمع صده الحيطان يرجع وانه منتظره

يمه يمه ليش فاركتيني
انه زينب اوياج ماخذتيني
اهنا ييمه اهنا ييمه
******
صحت شمسويه واعله الخد يسطرونج
وبين الباب والحايط يعصرونج

بضلوعج نبت بسمار يالحالج يبجيني
وتنادين اسمعنج يا فضه الحكيني
رفسوني اعله بطني ومات والله محسن اجنيني
انه فاطمه كتله وشال ايده وسطر عيني

ما رعوني وصوبو دلالي
حيروني وخيبوا مالي
اهنا ييمه اهنا ييمه
******


المن عايش وضال التموت امه
بعيني الدنيه من رحتي اصبحت ظلمه

شو كل ما اذكرنج مالحك عله عيوني
يايمه اشكد اتمنيت يم كبرج يدفنوني
اعثر بالجدم ضليت يايمه ويشيلوني
اتلفت وصيح اعليج وخواني يسكتوني

يالمشيتي ناري شيطفيها
يالحنينه جروحي شيداويها
اهنا ييمه اهنا ييمه
******
تمت
تحسين الخفاجي

واكف اعله بابج ونحب المصابج
عيوني وعيونج جرن ليش فركنه الزمن
******
حزني ليل وساكن بوسط الجوارح
انه طايح مدري كلبي مني طايح
فاطمه بوجهج جنت كل يوم اصابح
رحتي عني وكلشي احس من عندي رايح

والله يالحبيبه فركتج مصيبه
فاطمه يم الحسن ليش فركنه الزمن
****
الحرك بابج فاطمه شيريد منج
انه ادري امن الضلع كل هذا ونج
اشلون اغسلج فاطمه وبجفوفي ادفنج
يا حرامات الكبر يبعدني عنج

من علي خذيتي كلشي من مشيتي
الشوفتج دلالي حن ليش فركنه الزمن
******








ليش اليفارك حبيبه ايزيد ونه
انه وانتي احله شي بالدنيه جنه
انتي رحتي وراحت وياج المحنه
والدهر كل يوم يحرمنه امن اهلنه

هاجت المواجع امشي جني ضايع
عكبج احلامي اختفن ليش فركنه الزمن
*****
ياهي مثلج حيل بالباب اعصروها
وطيحو من عدها ابنها وروعوها
ياهي مثلج حيل عالخد اسطروها
ونبت بسمار بضلعها وشتموها

فاطمه العضيمه تنعصر هضيمه
والجروح اتراكمن ليش فركنه الزمن
*******
اشلون تغفه عيوني بليل واسدها
صحت ذيج ايامنه الحلوه اشيردها
انه روحي اويالمصايب هذا حدها
والحديقه تموت من يذبل وردها

فركتج طويله ودمعتي ثكيله
شيبت من المحن ليش فركنه الزمن
******
تمتم
تحسين الخفاجي

رسول الله ص يوصي امير المومنين ع
بالصبر على مصيبة الزهراء ع
--------------------
تموت الزجيه او دمها عالتراب
  وتصبح يحيدر دنيتك عذاب
انته الامير على الصبر .. شد حيلك او لا تنكسر
سلام .. سلام
-------------------------
صح جفك الخيبر قلع .. والشافك اكبالك وكع
تتگيد ابذاك  الوجع       .. تطيح
اهل الحقد بيهم طبع .. لاذمه عدهم لا شرع
باجر يكسرون الظلع   ..  تطيح
على خد يسطروها تره .. دين الله يمك منبره
ياحيدر اصبر عالجره  .. تطيح

حتى السمه علنت ترى الحداد
انحب يحيدر ولبس السواد 
كسر الگلب ماينجبر   ..  شد حيلك او الاتنكسر
سلام .. سلام
-----------------------------
باب او عله الحايط هوه .. عالزهره ونطبگن سوه
مختنگه واتدور هوه   ..  تصيح
ريتها دخان انملت .. اعليها الچفوف اتطاولت
ياعلي الزهره اتالمت      .. تصيح
ضلوع الزچيه مكسره .. ومحسنها اصد دمه جره
او وردة حياتي  محيره      . تصيح

خلي ابن عمي مني هالرجاء
لا ارفع ايدي واگلب السماء
اگلبها عاليها حدر     .. شد حيلك او لاتنكسر
سلام .. سلام
------------------------
لمن اموتن ياعلي . . مو بلوه رايح تبتلي
ولاواحد ايضل من هلي  .. حرام
امر الله هذا الكاتبه .. وعين الله هيه اتراقبه
الجامع حطب وي صاحبه     ..حرام
لا رحمه عنده ولا يحن ..جاب الحطب يصرخ وان
الزهره گالوله تون          ..   حرام

باچر يحيدر دمعتك تسيل
وظهرك مثل هذا الكمر يميل
كلبك صبح مثل الجمر    شد حيلك ولا تنكسر
سلام .. سلام
------------------------

واليندبك تحظر اله . وتفظله اعظم مشكله
والزهره عندي مدلله    .. تنوح
جرحك إعلام ايظلله .. صعبه ترى هل مرحله
خلگك ياحيدر طوله    .. تنوح
ياحيدر اي هذا الصدگ .. چفوف التسبح تنحرگ
ويه الباب عمرك ينطبگ   .. تنوح

يمك ياحيدر يبقه هل قرار
وانه ادري كلبك على الزجيه نار

صبرك عله كل اليمر   .. شد حيلك او لاتنكسر
سلام .. سلام
------------------------
باجر يحيدر شيعتك … كلها تصير ابخدمتك
يرفعون باجر رايتك     ..امير

الحاضر يبلغ غايبك . يالصابر الله يعوظك
ياهو الي منهم يوصلك    . .. امير
هذا الحقد ظل للازل ..يغارون منك لااقل
والحبك ابنعشه انحمل  .. امير
هاي العصابه العلنت الولاء
باجر اموت أو تنصب العداء
اي وحق خدها المنسطر   .. شد حيلت او لاتنكسر
سلام سلام
--------------------------

الخادم
حسين الزيدي

‏مقطع صوتي من اللهم صل على محمد وال محم

هيه زينب زينب
*****
الدنيه كلها تنورت بعيادها
عمة الساده هله بميلادها
كلشي يصفن لو نعد امجادها
تموت خل اهل الحقد بعنادها

نعلك شموع الفرح والكلب همه نشرح
زينبي العالم صبح وبالارض كلشي وضح
******
هاي زينب والحجي عنها يطول
اليوم بالميلاد فرحان الرسول
كمطتها الحور بكماط البتول
بالعقيله احتارت اصحاب العقول

بالضبط تشبه علي هيه روحي وكل هلي
بيها كل همي ينجلي صوت حبنه يعتلي
********









بزود اخوها تزامط المهيوبه
الله ميزها شكثر محبوبه
من عشكها ما اكول التوبه
والتبعها الباري يمحي اذنوبه

هيه باء البسمله والاميره بكربله
والمسير اتكمله هله بزينب يا هله
******
من العفاف ايغار ضل حته الكمر
ماكو شاعر شفنه وصفها كدر
وياها تتمنه الشمس تاخذ صور
بليله الميلاد خل يحله السهر

واخت سبع الكنطره هيه ستر الله تره
بيها تحلف كل مره هله بغيرة حيدره
******
علي بيده امن المهد شالاها
والحسين بضحكته ناغاها
والحسن بعيونه يحجي وياها
الله زينب بالسمه سماها

والكواكب هلهلت والنجوم اتزينت
والطيور اتباركت اباب زينب عيدت
*****
تمت
تحسين الخفاجي

ثلاث دكات

اضلوع الزجيه اشلون. كسروها بالباب
وانته القلعت الباب. بيدك يبو اتراب
****
بكل حيله اجه وعالباب خصمك عصرها
وياحيدر البسمار. صوب صدرها
وبقوته اعله العين. رد وسطرها

ودار النبي المختار. حركوها الاصحاب
**
عندك علم بالصار. هجمو عليها
ماتت عصر والنار. تسعر بديها
وام الحسن كل حيل. ما تلكه بيها

طاح الضنه وما طاح. من عدها الاحجاب
***--
وكت الحروب نشوف. جانو يرجعون
ومن الرسول ايصيح. كلهم يلبدون
بس انته للميدان. تبرز يعرفون

حيدر الك صفين. تشهد والأحزاب
*****
ميت علي يكولون عكب الشهيده
وبالكوه طاست ماي. يلزمها بيده
تتسند اعله الكاع وانته الصميده

بعده الجرح لليوم. عالزهره ما طاب
**
وينك يحامي الجار. يالتحمي جارك
ما تنحط اعله البال. محروكه دارك
وانته انعرف جبريل. حد ذو الفقارك

دخن يراعي الزود. سيفك بالكراب
*****
انته علي ولولاك. ما قام السلام
بعد الوصيه اعداك شو صارو ازلام
لو زلم جان وين ذنيج الأيام
هجمو لان يدرون. معروفه الأسباب
***
تمت
تحسين الخفاجي

مجروح كلش علي وبجرحه اذاني
يابير كلي تون من تسمع احزاني
عالزهره من هظمته يحجيلي عن حالته ما تنحمل كسرته وبجرحه اذاني
*******
حيدر بير وانه البير ومحد يعرف اشجواي
حيدر بيه مدري اشاف وطاحت دمعته فوكاي

اول مره اشوفه ايذب النكاب
وابو تراب اعله راسه ايهيل التراب
القالع باب كسرو ضهره بالباب

يا بير تدري بعلي بكسره كلب جايك
شيصير بيك اعترف لو فاركت مايك
هز راسه شفته ورجع ومن صدره كلبه طلع وكبالي نوحه ارتفع وعالزهره بجاني
****
خذت حيله مصايبها وفلا ينعدن جروحه
حيدر يمشي بس اخيال ودافن بالكبر روحه

وامبين علي امن الدنيه متعوب
والمحبوب فارك اغله محبوب
تره حيدر دمعته امبلله الثوب

من فاطمه الفاطمه خضر علي شيبه
راحت بعد زهرته والراح شيجيبه
وياها عشرة عمر وراحتها صار الكبر ضل يبجي باب الصبر والنور عافاني
******
بين الباب والحايط هظيمه الزهره عصروها
الخادم بيتها جبريل اعله خدها اشلون سطروها

دفعها الظالم وضيع هواها
وره الباب انتهت والدم خذاها
اعله محسن طاحت وزينب وراها

البسمار صاب الضلع والعصره اذتها
عكب النبي فاطمه الاصحاب ظلمتها
عالباب لمو حطب وحته الله منهم غضب موت الزجيه كرب وتشمت الجاني
******
انه البير بير اسرار اليسولفلي اضم سره
بس حيدر يكلي احجيه سري ولازم اتنشره

يصيح امن الالم حاجيني يابير
علي بلا فاطمه جا كلبه شيصير
وكف عالمغتسل وبناظره ايدير

خلاني صاحب اله ومن دنيته ايعاتب
وطبع اليصاحب صدك ما ينطي بالصاحب
سولفلي سره وبجه وحيدر عليه انتجه البير انترس من حجه وزيدها نيراني
*****





علي كتله ولا تهتم يبعد البير وعيونه
هاي الناس ما ترحم اليخاويهم يذمونه

الملح شتحطله ووياهم يغزر
بس تكضي شغلها الناس تنكدر
حكك يا علي من تجرع المر

الناكر جميلك علي معروف شيطانه
لو مو وصيت النبي ما وصلو اهنانه
ناسك شفت باعتك والدنيه ما نصفتك بيرك سمع ونتك يا مالك احساني
******
تمت
تحسين الخفاجي

حاجيني يا دار كلبي اشتعل نار
اهلج وين دمع العين ما فارك عيوني
*******
شو فرغت منازلهم والوحشه اعله حيطانج
راحو والتحبيهم ما دكوها بيبانج
يا دار الهجر موزين شالو وين خلانج
من دار السعد صرتي دار الحزن عنوانج

والفاركتهم يمي ردتهم
كلبي اشتاك وانه افراك ما بيه تدروني
اهلج وين دمع العين ما فارك عيوني
*****
يا دار اشبعد يا دار بين عيوني الف حسره
بس دموع اخلص الليل وابجي الفركة الزهره
يا دار امن اطبنج انوح واذكر العشره
مهدوم الحسن حيله وحسين انكسر ضهره

يا دار الاحزان نوحي اويالخوان
بيه اشلون اصرخ كون وياها دفنوني
اهلج وين دمع العين ما فارك عيوني
*****






يا دار انحلت يا دار كاسر ضهري فركاهم
اتمنيت العمر لحضات يكضي ويخلص وياهم
حنيت الهلي والروح ما تصبر بلياهم
ما ظن ترجع الايام عكب الضيعيناهم

جا وين اهلنه اهل المحنه
صعبه ارتاح والكل راح وبحيره خلوني
اهلج وين دمع العين ما فارك عيوني
*****
امي الكلها طيبه اشلون خلف الباب عصروها
وحركو دارها الاشرار واعله العين سطروها
بهمها تصيح محسن مات ولا جنهم يسمعوها
اضلوع ام الحسن يا حيف بذاك الباب كسروها

التمو عليها واشتد بجيها
والدخان يصعد جان وتنادي اذوني
اهلج وين دمع العين ما فارك عيوني
*****









اشعدها الدنيه بله وياي ليش الوحدي خلتني
راوتني هظم وجروح ومن الزهره حرمتني
انه ام الخدر زينب والاحزان سلتني
ماظن الزمان ايعود الدنيه اهواي بجتني

شلي بحياتي ونطر مماتي
بعيني دموع كلبي ايلوع ورتاح يردوني
اهلج وين دمع العين ما فارك عيوني
*****
تمت
تحسين الخفاجي

غريبه راح اخليج وبخوج حسين اوصيج
لو ظهره انكسر شميه بالنحر
********
يمه زينب كرب موتي وحانت الساعه الاخيره
شدي حيلج عالمصيبه مصيبتج باجر جبيره
حسين باجر يبقى وحده وناظره المن يديره
شما اصدله ايگطعونه وجسمه ينلم بحصيره

وحده من تشوفيه. بيدج مهره قدميه
همه لو كبر شميه بالنحر
******
بدمع عينج. روحي يمه ونفذي يايمه الوصيه
امي گالت شمي نحره لو گرب يوم المنيه
فوگ صدره تروح وترد باجر خيول اعوجيه
الشمر بيده من يذبحه يذبح وياه الزجيه

ويگلهم ذبحته ودو الراس لخته
راح اشبع قهر شميه بالنحر
*****
عالترايب يبقى جسمه. عاري ومسلبه اهدومه
بالحوافر. راح صدره. وماكو مثل حسين يومه
ايموت ضامي ونحره دامي. وعالرمل تنزف ادمومه
آه ياشمس الظهاري باجر اتغير ارسومه

يمه انتي وبناتج فييله بعباتج
اهناك اخذي الحذر شميه بالنحر
******
الحرگ بابي راح باجر يحرگ الخيمه عليجن
عگب اهلجن محد الجن وكلها غربه شلون بيجن
الخيل تهجم عالمخيم والشمر رايح يجيجن
ايصيح بيجن وحده وحده وبحبال ايشد اديجن

عالتل من تصعدين جم خاطر تكسرين
ومن بعد الگمر شميه بالنحر
******
يالعقيله. شما اشوفج بلا عشيره ولا گرابه
الشام ياخذ راح حيلج. واه يالشام وعذابه
الشده باجر يمه زينب من يخلوج بخرابه
اهناك طفله من حلمها تفز تصرخ بابا بابا

رقيه باخر انفاس راح اتموت عالراس
باقي بخدها اثر شميه بالنحر
****
تمت
تحسين الخفاجي
ميثم العمري

‏مقطع صوتي من اللهم صل على محمد وال محم

‏مقطع صوتي من اللهم صل على محمد وال محم