#SafaricomEthiopia

⚫ "በሚቀጥለው ሁለት ዓመት ተኩል ተጨማሪ 3000 የኔትወርክ ሳይቶችን በመገንባት የደንበኞቼን ቁጥር ከ25 እስከ 30 ሚሊዮን አደርሳለሁ" - ሳፋሪኮም ኢትዮጵያ

የሳፋሪኮም ኢትዮጵያ አገልግሎት የሚያገኙ የ90 ቀን ንቁ ደንበኞች 10 ሚሊየን መድረሳቸውን ተከትሎ ኩባንያው ለዋና ዋና አጋሮቹ የምስጋና መርሐግብር በትላንትናው ዕለት በሸራተን ሆቴል አካሂዷል።

በዚህ የምሥጋና መርሐግብር ላይ የኩባንያው ልዩ ልዩ ስኬቶች የቀረቡ ሲሆን ሳፋሪኮም ኢትዮጵያ በ3100 ሳይቶች ላይ የኔትወርክ ማማዎችን መትከሉን ገልጿል።

በዚህም 55 በመቶ በሚሆነውን የሀገሪቱ ክፍል የሳፋሪኮም ኔትወርክ ማዳራስ መቻሉን አስታውቋል።

ሳፋሪኮም ኢትዮጵያ ራሱ ከተከላቸው የኔትወርክ ማማዎች በተጨማሪ ከኢትዮ ቴሌኮም የኔትወርክ ማማዎችን በመከራየት የሚጠቀም ሲሆን በዚህም በየዓመቱ 5 ቢሊዮን ብር ክፍያ እንደሚፈጽም ገልጿል።

የሳፋሪኮም ኢትዮጵያ ዋና ሥራ አስፈፃሚ ዊም ቫንሄለፑት በዚህ የምስጋና መርሐግብር ላይ "አገልግሎት ለመስጠት የሚያስችለንን ፍቃድ ለማግኘት ብቻ አንድ ቢሊዮን ዶላር አውጥተናል። ይህ ውድ ዋጋ ቢሆንም ምን ያህል በኢትዮጵያ ገቢያ እምነት እንዳለን ያሳየንበት ነው።" ሲሉ ተናግረዋል።

በምሥጋና መርኃግብሩም ለኢትዮ ቴሌኮም፤ ለኢትዮጵያ ኤሌክትሪክ አገልግሎት፤ የኢትዮጵያ ኤሌክትሪክ ኃንል፤ ኖኪያ ሁዋዌ፤ ቮዳ ሜታል ኢንደስትሪ ጨምሮ ለተለያዩ አጋሮቹ እውቅና ሰጥቷል።

ዋና ሥራ አስፈጻሚው በዚሁ መድረክ በሚቀጥሉት ሦስት ዓመታት በኢትዮጵያ የኔትዎርክ አገልግሎትን ሙሉ ለሙሉ ለማዳረስ ከ25,000 በላይ ሳይቶች ላይ ታዎሮችን መገንባት ያስፈልጋል ሲሉ ተናግረዋል።

በዚህም አሁን ላይ እንደ ሀገር ሳፋሪኮም ኢትዮጵያ 3100 እንዲሁም ኢትዮ ቴሌኮም 9000 በላይ ሳይቶች አሉ በጋራ ከግማሽ በላይ ደርሰናል ነው ያሉት።

በሚቀጥሉት ሦስት ዓመታት ይሄንን ለመሙላትም 500 ቢሊዮን ብር ኢንቨስትመንት ያስፈልጋል ብለዋል።

ዊም ቫንሄለፑት በመድረኩ ሳፋሪኮም ኢትዮጵያ በኢትዮጵያ 3ኛውን ፍቃድ ማግኘቱንም አብስረዋል። በዚህም "ሳፋሪኮም ፋውንዴሽን" የተሰኘ የበጎ አድራጎት ሥራን የሚሰራ ተቋም ፈቃድ ማግኘቱን ነው የገለጹት።

በዚህ ተቋም ከዚህ በፊት ሲሰሩ የነበሩ ልዩ ልዩ ማኅበራዊ አገልግሎቶች በትኩረት ይሰሩበታል ያሉት ዋና ሥራ አስፈጻሚው "እኛ ከጀርባችን ብዙ የውጭ ተቋማት አሉ እኛ 1 ብር ስንሰጥ እነሱ 5 ብር ለመስጠት ቃል ገብተውልናል" ሲሉ ነው የተናገሩት።

ሳፋሪኮም ኢትዮጵያ በማኅበራዊ አገልግሎት ዘርፉ ባለፉት ጥቂት ወራት ብቻ ከ120 ሚሊዮን ብር በላይ ማዎጣቱን የገለጸ ሲሆን አብዛኞቹ ተጠቃሚዎችም ከ20 ዓመት በታች ያሉ ናቸው ብሏል።

ባለፉት ጊዜያት ከ10 ሺ በላይ ላፕቶፖችን በተለያዩ የሀገሪቱ ክፍሎች ለሚገኙ ተማሪዎች ማስጠቱም በመድረኩ ተነስቷል።

አሁን ላይ 900 ቋሚ ሰራተኞች እንዳሉት የገለጸው ሳፋሪኮም ኢትዮጵያ 97 በመቶ የሚሆኑት ኢትዮጵያዊያን ናቸው ሲል ገልጿል።

ከቋሚ ሰራተኞች በተጨማሪ ባለፉት 4 ዓመታት በተለያዩ አጋር ድርጅቶች በኩል ለ20,000 ዜጎች የሥራ እድል መፍጠሩን በመድረኩ አቅርቧል።

ቲክቫህ ኢትዮጵያ
አዲስ አበባ

@TikvahethMagazine