ليلة مولاي مسلم بن عقيل عليه السلام
محرم الحرام ١٤٤٦ هجري

قصيدة { غيرة وعزم }

شَد عالزلم هاك اخذ أخباره
گالــو علــي راجــع ابفـقّـاره

مسلم يمسلم ... مسلم يمسلم
........................................................................

مسلم بزوده طلع غيره وحميّه
دخلت انذار العساكر والله هيّه
كلهه محتاره بقت شنهو القضيّه
فارض اعله الكوفه جو الخيبريه

لا ما رجف غاره تتبع غاره
موت الحَمَر عالعده بتّاره

مسلم يمسلم ... مسلم يمسلم
........................................................................

هوّه مو كل سيف ينعد عالبواتر
شوف مسلم وحّده بس گلبه ثائر
بيا علي ضربات سيفه من يباشر
چن حجر سجيل نزلت عالعساكر

گول وفعل كلشي صار بكيفه
ميثنّي أبد ضربه وحده السيفه

مسلم يمسلم ... مسلم يمسلم
........................................................................

قالع إرگاب وكفو من هالمراجل
عنده أقوى معركه تحصيل حاصل
اختلفت بوصفه العده لمن يقاتل
علي گالو مرّه گالو أبو فاضل

هيچ الشهم من يشد احزامه
تصفه الزلم هامه تضرب هامه

مسلم يمسلم ... مسلم يمسلم
........................................................................

ما أبالغ بالوصف ثق ما أوافي
هالفحل تتباهه بمجاده القوافي
لو گلت مسلم فقط صدگني كافي
هذا واقع ما أظن عالدنيا خافي

كل الشعر ما وفه أمجاده
خله الخصم حاير ابمشراده

مسلم يمسلم ... مسلم يمسلم
........................................................................

طوعه حرمه وسجلت موقف بطوله
هذا مو أي واحد يحصله وينوله
گالت الحق بزمن محد يگوله
والشهامة اطباع واطباع الرجوله

گلهه بفخر هامتچ مرفوعه
شكراً إلچ والنعم يا طوعه

مسلم يمسلم ... مسلم يمسلم
........................................................................

خادم الإمام الحسين عليه السلام
عمار هليل الواسطي
الكوت
١٤٤٦ هجري / ٢٠٢٤

ولائية في خدمة الإمام الحسين عليه السلام

قصيدة (( عشگ بالفطرة))


من زغري هويتك
وبروحي لگيتك
ياعمري دگلّي بغيرك اشيسوه العمر
بس ويّاك يغالي بخدمتك أبقه أفتخر
...............................................................
كلشي إنته بدنيتي وأتنفسك مثل الهوه
والله لوما خدمتك أبقه آني والميت سوه
وحشه چانت هالليالي وشفتك بعيني ضوه
جرحك بگلبي ولگيتك للجرح إنته الدوه
هالخدمه هويتي
منهاجي وقضيتي
بالدم عاهديتك أمشي دربك لو جمر
بس ويّاك يغالي بخدمتك أبقه أفتخر
...............................................................
تدري يانبض الگلب ماغيرك بنص الگلب
أحمد الله وأشكره مافارگت هذا الدرب
ياحسين إنته الوطن وبدونك أشعر بالغرب
خادمك ياسيدي وعالفطره روحي من تحب
تقبلني بعبيدك
مجنونك واريدك
مي عيني حسيني وآنه حاسم هالأمر
بس ويّاك يغالي بخدمتك أبقه أفتخر
...............................................................
كل سنه أحسب أنا عاشورك بعمري فرض
أبتدي بأول جرح واطلابه بيه وما تفض
أحرص بكل الحرص عالخدمه يالحبك نبض
أدري عاشورك يظل حزن السمه وجرح الأرض
خادم ما نسيتك
محبوبي فديتك
بالدم وقّعيته عهدك من أول سطر
بس ويّاك يغالي بخدمتك أبقه أفتخر
...............................................................
آني روحي كربله وگلبي أشوفه منبرك
يلي أغله امن الهوه بشمّ الهوه أتذكرك
مصدري بهذا العشگ فطره ويقيني الناصرك
أدري يابعد العمر الله بعظمته مصدرك
والحزنك مؤكد
جرحي يلبس أسود
من مهدي غرامي وحدّه ويا القبر
بس ويّاك يغالي بخدمتك أبقه أفتخر
...............................................................
بيتي أصبح مجلسك كل إخوتي هاي الخدم
لازم أوفي بخدمتك من المهم هذا الأهم
شايل بعيني صور ويا الگمر جود وعلم
واعله گلبي دم جرح يرسملي دخان وخيم
حبك مني بيه
ياروح الزچيه
تتزكه خدمتي بختمك وآني أنتظر
بس ويّاك يغالي بخدمتك أبقه أفتخر
...............................................................
لكل جرح حبك دوه رغم أصبحت كلك جرح
ليلي مظلم سيدي وشفتك مثل شمس الصبح
لاتسد بابك يمن معودني بابك منفتح
عشرتي يا هيبتي عشرة عمر خدمة وملح
والخادم غرامه
بي معنى الكرامه
يمر بعيوني طيفك أحلى من كل الصور
بس ويّاك يغالي بخدمتك أبقه أفتخر
...............................................................

خادم أهل البيت عليهم السلام
عمار هليل الواسطي
الكوت
١٤٤٦ هجري / ٢٠٢٤

ليلة قمر العشيرة أبي الفضل العباس عليه السلام
محرم الحرام ١٤٤٦ هجري

قصيدة ( علامات الوفه )



علامات الوفه بگد أربع حروفك
جودك والعلم والعين واچفوفك
زينب ما عِفتهه وهيـّه مَـتعوفك
.........................................................................................................................

گظه العاشر وما تگظي الكفاله
أبد مَـتــعــوف زينــب إستحاله
عهد باقي بفضــــل رب الجلاله
على درب السبـــي هاي الدَلالـه

راسك عالرمح يوفي الكفالتهه
عينك ما غُفــت وتباري ناگـتهه
يا كعبة وفه ودموعهه اتطوفك
........................................................................................................................

على طول الدرب ما تغمــض العين
حي بعــدك رغـــم كل گطعت البين
تِــرد كلــمــن يگلـهــه كافلــــچ وين
دُخان امن الرمح يطلع يخو حسين

دُخان الرمح يثبت عينك تشاهد
راسك حار غِــيـره وهـالأمر وارد
مو ميت عدل كل واحد ايشوفك
........................................................................................................................

كفاله تــوقّـعـت مــن علي الكــرار
إذن مـعــلــوم بيـهــه اهواي أسرار
إذا يـم النــهــر جسـمـــك وذر صار
يكفي الزيــنــبــك ظل راسك الحار

واضح موقفك مو صعب تفسيره
هوّه الراس أصلاً مركـــز الغِــيــره
تنطر عالعقيله بأصعب اظروفك
........................................................................................................................

كـفــو مــنــك يتــربــات الصميده
مُحال تعوفــهـه زيــــنـــب وحيده
من نظرتــهــه تـفـتـهـمــه التــريده
علاقه خـــوّه بـــــس خـــوّه أكيده

خـوّتـكـم وحـقّـك خـوّه صدگيـّه
عالحُب والوفه والطيب مبـنـيّــه
تشوف طيوفهه وتشاهد اطيوفك
........................................................................................................................

يفخر أم البنــيـــن وتبقه كافل
بالطف بالسبي بعــهدك تواصل
من إسـمـــك عدوّك گلبه جافل
يرجف يــوم يسـمــع أبو فاضل

معلوم الفحل لو گطــعــوا چفوفه
فخامت إسمه تزرع بالخصم خوفه
راس اعله الرمح خزراتك اسيوفك
........................................................................................................................

يلي بكل وكت معروف وفـّـاي
واحد بس تشوفك زينب هواي
أكبر من صراع العطش والماي
تباصر للضعن وتــگـــول بحماي

تشد الحيل بيك اعيال أبو اليمّه
كلهه ابذمّتك يا صاحــب الذمّــه
أمانه امن المدينه تشيلهه اچتوفك
........................................................................................................................

جمال أربع حروفك صار إحساس
أمـــان لكل گلب لـــــو گال عباس
أغلى امن النبض اغله امن الأنفاس
شهم والوفه بسـمــــك صار ينقاس

گمر فوگ الرمح طبع الگمر عالي
كفــيل الزينــبــك والعــهـد للتالي
بحر من الوفه گاع وسمه اجروفك
........................................................................................................................

خادم الإمام الحسين عليه السلام
عمار هليل الواسطي
الكوت
١٤٤٦ هجري / ٢٠٢٤

هلال شهر محرم الحرام ١٤٤٦ هجري

قصيدة { يا رب العرش }

هل شهر الحُسيـــن وناحت السبعه

يربي إرزقني جمر الحزن و الدمعه

محرم فتح بابه ... على حسين ومصابه

يربي إرزقني جمر الحزن و الدمعه
..................................................................................................

إلهــي وسيــدي يا خـــالــق الأكـــوان
بده شهر المصيبه ورجــعــت الأحزان
على المگطوع نحره ومنذبح عطشان
على المهشوم صدره ومرمي عالتربان

نار بمهجـتـــي تفور ... كلما يهل عاشور
أنوح ورزقك دموع ... أطلبه وأنذر انذور

إذا هلال المحرم شفته يا ربي
توج نار الأبد ما تنطفي بگلبي

أنا الحاسب حسابه ... على حسين ومصابه

يربي إرزقني جمر الحزن و الدمعه
..................................................................................................

أشوف بكل درب رايات منشوره
چنهه اگلوب عالمذبــوح مقهوره
سواد بكل مكان يوضح الصوره
أبو الأكبر وياهو الينسى عاشوره

نار تشب بالضلوع ... ما تطفيهه الدموع
من أجيال وأجيال ... صوت الآه مسموع

عهد كل خادم يكتبه لأبو السجاد
شما شهر المصايب بالحزن ينعاد

دمع عينه جوابه ... على حسين ومصابه

يربي إرزقني جمر الحزن و الدمعه
..................................................................................................

على حسين ومصابه الآه تتبع آه
حزن هالفاجعـــه للموت ما أنساه
عهد بدموعي كاتب بالحزن أقراه
وقف لحسين عمري وعمري كله اوياه

وقف لحسين عمري ... أخدمه وهذا نذري
گلتهه والله شاهد ... وأدري حسين يدري

وحق كل حرف بسمه عمري منذور
عشرة عمر ويّا أحزان عاشور

جرح گلبي وخضابه ... على حسين ومصابه

يربي إرزقني جمر الحزن و الدمعه
..................................................................................................

بدون حسين أبد ماريدهه سنيني
أعطش والدموع التجري ترويني
آلهي بحق ذبيح الطف تخليني
خادم للحسين بكل عناويني

أعيش بحزن الأيام... مصايب كربله وشام
أذوب بگد الجروح ... أجدد عهدي كل عام

شنو نفع العمر لوما أعيش اهموم
وأجري دمعة اعيوني على المظلوم

رحت فدوه التُرابه ... على حسين ومصابه

يربي إرزقني جمر الحزن و الدمعه
..................................................................................................

باچر بالقيامه احساب كل إنسان
ودمعتي عالحسين ترجّح الميزان
يهل شهر الدمع والحسره والأحزان
وأصيح بحسرتي ويلي على العطشان

قميصه بالسمه هناك ... من اتنشره الأملاك
تعلن شهر الجروح ... يهنيال الّي واساك

شهر عاشور يبدي وتبدي ساعاته
سماوات وأرض تستمع حسراته

الكون وإنتحابه ... على حسين ومصابه

يربي إرزقني جمر الحزن و الدمعه
..................................................................................................

يرب الكون أخر حلم بحلامي
وعليك أقسم أريد بغربة الظامي
ردت كون بعزاءه وتگظي أيامي
وأبو الأكبر يگلّك هذا خَدّامي

حلم والدمعه مطلع ... وأبو السجاد يشفع
أموت بمجلس حسين ...خلهه الروح تطلع

هاي أمنيتي يا ربي بحياتي
بعزاء حسين أبو الأكبر مماتي

أريد الإستجابه ... على حسين ومصابه

يربي إرزقني جمر الحزن و الدمعه
..................................................................................................

خادم الإمام الحسين عليه السلام
عمار هليل الواسطي
الكوت
١٤٤٦ هجري / ٢٠٢٤ ميلادي

قصيدة بحق سيدتي ومولاتي فاطمة العليلة عليها السلام
محرم الحرام ١٤٤٦ هجري / ٢٠٢٤ ميلادي


قصيدة { حزن العليلة }

عليله... ظل گلبي يمكم
عليله... روحي بضعنكم
ها يا هلي طال الغياب
مشتاگه روحي وگلبي ذاب
عليله
...........................................................
ما ظل بعد ذاك الحيل
صار الصبح نفس الليل ... مظلم عليّه
يهلي وضعنكم من راح
راد القدر ما أرتاح ... وآني اشبديّه
لا من خبر لا مكتوب
ومفارگه چم محبوب
روحي بهضم دهري تذوب
هسه العمر ما محسوب

عليله... أصبر واتاني
عليله... تموت الأماني
أسأل ولا منكم جواب
مشتاگه روحي وگلبي ذاب
عليله
...........................................................
صورة حزن وسط العين
صرخة جرح بويه حسين .وينك يغالي
مو گتلي تاخذني اوياك
ما ريده عمري ابلياك .. دوم اعله بالي
ليش اليتم صار احساس
ما جاني عمي العباس
بيه حزن ما ينقاس
حسراتي ويّا الأنفاس

عليله... لي وين أكابر
عليله... ظل فكري حاير
من العذاب أكتب عتاب
مشتاگه روحي وگلبي ذاب
عليله
...........................................................
وحدي عليله ظليت
العبد الله آه اشتاگيت..وبروحي لهفه
أتمنى اهز مهده اليوم
يرتاح أخويه بالنوم .. وعيونه تغفه
أتصوّره گبالي هواي
ألزم چفوفه بهداي
ماريد منكم بس هاي
يرجعلي ويظل اوياي

عليله... طفله حزينه
عليله... عبد الله وينه
ما ينحمل هذا العذاب
مشتاگه روحي وگلبي ذاب
عليله
...........................................................
عفتوني وجروحي تصيح
چن ريشه بهبوب الريح ..عفتوني وحدي
والگلب مليان جروح
ليل ونهار بهالنوح .. دمعي اعله خدي
كل لحظه أكثر أحتار
بيه زماني يندار
وبكربله شنهو الصار
من زغري وجروحي إكبار

عليله... أذكرهه وانحب
عليله...يا عمتي زينب
يا عمّه مو حمل المصاب
مشتاگه روحي وگلبي ذاب
عليله
...........................................................
هسه العلم لله شصار
مجهوله كل الأقدار .. بالغاضريه
أصفن دمع عيني يطيح
والگلب من وحده يصيح ..وينچ رقيه
والله الرقيه اشتاگيت
أبچي عليهه ظليت
يهلي تره وحشه البيت
ترجعون أگولن يا ريت

عليله... روحي خطيه
عليله... رادت رقيه
عمري مناحه وإنتحاب
مشتاگه روحي وگلبي ذاب
عليله
...........................................................
جدي الرسول المختار
يم گبره أگعد واحتار .. أحچيله همّي
يا جدي أهلي غيّاب
ما حسّبت هيچ احساب .بس انته يمي
يا جدي محتاره الروح
كلّي حزن كلّي اجروح
لي وين هالروح اتنوح
تتمنى لاحبابي اتروح

عليله... مثل الغريبه
عليله... عشت المصيبه
آخر فصل من الكتاب
مشتاگه روحي وگلبي ذاب
عليله
...........................................................

خادم الإمام الحسين عليه السلام
عمار هليل الواسطي
محرم الحرام/ ١٤٤٦ هجري

قصيدة في فضل خدمة سيدي ومولاي الإمام الحسين عليه السلام


بالعيون ... مرسومه لمصابك صور
بالعيون ... دمــعـــه المحرّم وصُفر
..............................................................................................................................

يحسين كلنا ابخدْمتك بعدنه
نكتبلك بدمـــع الوفـه عهدنه
يا روح روح التسكن بجسدنه
كل عـــام أكــثـر يرتفع عددنه

بالعيون ... تلگه الحزن تارك أثر
بالعيون ... دمــعـــه المحرّم وصُفر
..............................................................................................................................

خدمه بكرامه ما رضينه الذلّه
فـــدوه الك هذا عُمــرنه كلّه
بهاي الشعائر للمــجــد نوصلّه
والما تعــجــبـــه هالشعائر خَلّه

بالعيون ... من مستهل هذا الشهر
بالعيون ... دمــعـــه المحرّم وصُفر
..............................................................................................................................

شهرين بيهن چم جرح يكابر
بنوح العــوالـــم كربله نسافر
بحزن الليالي ترسم المشاعر
من هسه نبدي والنهار العاشر

بالعيون ... چم حسره من هذا السفر
بالعيون ... دمــعـــه المحرّم وصُفر
..............................................................................................................................

وبكل محرّم وصفر مواجع
والـنــار شيطفّيهه بالمدامع
بكل عين يصغر هالفضاء الواسع
وبكل گلب عاف الحزن منابع

بالعيون ... نوح وصدى وصفنة قدر
بالعيون دمــعـــه المحرّم وصُفر
..............................................................................................................................

عاشور يرفع للمجالس رايه
بيك البدايه وعندك النهايه
حد ما تجيك الكربله المشّايه
وفّايه يحسين الخدم وفايه

بالعيون ... إنته المقر والمُستَقر
بالعيون دمــعـــه المحرّم وصُفر
..............................................................................................................................

من الطفوله وما تركنه دربك
والترضى عنّه يعني يرضي ربك
شگد غالي عدنه وبينه ثابت حبك
تسكن گلبنه وكلنه فدوه الگلبك

بالعيون ... فوگ الرمح صرخة نحر
بالعيون دمــعـــه المحرّم وصُفر
..............................................................................................................................

تخلص سنه ونحسب سنه العاشورك
يبن الولي ونور الله مــصــدر نورك
غصبـــن على العــاداك عالي سورك
ونزورهه الجنّه إذا نزورك

بالعيون ... ننطر أملنه المنتظر
بالعيون دمــعـــه المحرّم وصُفر
..............................................................................................................................

خادم الإمام الحسين عليه السلام
عمار هليل الواسطي
محرم الحرام/ ١٤٤٦ هجري
٢٠٢٤ ميلادي
الكوت

سيدتي ومولاتي زينب عليها السلام بلسان الحال في طريق السبي تقول :




بس العليل اويايه ... لا كافل ولا رايه 
.............................................................................................................................

زينب أنا وأم الصبــــر عنواني 
بالغاضريـــه ضـيّـعـت إخواني 
يم كل جسد أبچي دمه تلگاني 
والدهر كلشـــــي بكربله راواني 

بيّه الجروح اهوايه ... لا كافل ولا رايه 
.............................................................................................................................

گلبي إنفطر والروح بيت الحسره
شفت الحسين اموذر اعله الغبره 
ماظل ضلع صاحي وتهشّم صدره 
شمر الخنا بالســـيـــف طبّر نحره 

عالگاع ذبحوا آيه ... لا كافل ولا رايه 
.............................................................................................................................

صوب النهر ألطم بقيت اعله الراس 
عباس ما مثلـــه فقط بــــس عباس 
گطعوا يمينه ويــســــرته أرذل ناس 
لا دين عدهم لا شرف لا نوماس 

جوده تطشّر مايه ... لا كافل ولا رايه 
.............................................................................................................................

ظليت محتاره بزمانــــي ودنـياي 
وآني الحرم وايتامي حارت وياي
نار المخيم تشــــبـــه النار احشاي 
مكسورت الخاطر ومذهولت راي 

مذهول فكري ابْرايه ... لا كافل ولا رايه 
.............................................................................................................................

غابت شمسنه وحل زمان الظلمه 
والگمر فوگ النــهــــر سافح دمه 
گلّي علي السجاد ها يا عمّه 
درب اليسر محتاج منچ هِمّه 

والسبي عدهم غايه ... لا كافل ولا رايه 
.............................................................................................................................

أجمع بنات حسين وجروحي اجروح
وبكل وجه صــــورة إخويه المذبوح 
ذنّي اليتيمات الصـــــدگ شبعن نوح 
شافن أبوهن بالمعاره مطروح 

وعمهن على امسنّايه ... لا كافل ولا رايه 
.............................................................................................................................

يبدي طريق السبي ويا عين اتنام 
وبأُمرت أشباه الزلم والظِلّام 
ضـعـن الأرامـــل والثكالـــى وأيتام 
من كربله ينوي السبي لأرض الشام 

والبقت بس احچايه ... لا كافل ولا رايه 
.............................................................................................................................

خادم الإمام الحسين عليه السلام 
عمار هليل الواسطي 

بعد أن ودّعت مولاتي زينب عليها السلام كربلاء قالت :-



ودِّعَتهم وابتدت أحزانها ... فارِگتهم والصبر عنوانها
...........................................................................................


چن قرائين وعلت فوگ الرماح

چم عزيز وغالي من الحرّه راح

راح بدر الگوم وي شمس الصباح

دم بچت حتى السمه وأكوانها

...........................................................................................


يا صبر يوصل صبر أم الصبر

تمحّنت بهموم أيام العسر

بت علي وتنگاد بدروب اليسر


تنسبي ومتغرّبه اعله أوطانها

...........................................................................................


تنسبي وأحـــزان مهـجــتها تزيد

شما تصد بعيونها الراس الشهيد

والكــفـلـها يا طــلــب منّــه تريد


تنوح من يلهج بأسمه السانها

...........................................................................................


اشتطلبْ وفوگ الرمح راس الكفيل

وهيه ما عدها بعد بس العليل

صابره وهَمّ السبي كلش ثگيل


لاح مهجتها وخطف ألوانها

...........................................................................................


زينب الوصلت أميره الكربله

وچانت بعهد الكفاله امدلّــلــه

تروح مسبيّه وچبيره المعضله


والشماته من طبع عدوانها

...........................................................................................


شافت هموم وقهر من الأيام

والدهر لا ما نصف مو عالمَرام

يا جفن عدها بعد يرضه ينام

اتجرّحت من الدمع أجفانها

...........................................................................................


آه من حسراتها وهذا العذاب

بكربله تعوف البواسل عالتراب

يا مصاب الأشد من هذا المصاب

تدعي ربنا يقبل بقربانها

...........................................................................................


خادم الإمام الحسين عليه السلام

عمار هليل الواسطي

ويبقى العهد لسيدي ومولاي الإمام الحسين عليه السلام




حي ميّت بدمّي حسين بي للحشر أتباهه
.............................................................................................................

دم الحُسين الكتب نهج الثوره
عاشر محرم بي تحقـــق نصره
واتكفّلت بعــــده العقيله الحرّه

فصل السبي وفوگ إرماح روس الزلم ويّاها

.............................................................................................................

واهم الظن هالملـحـمـــه تتلاشه
نصر الحسين إويا الزمن يتماشه
دين الله ثــــورة كربـــلــه إنعاشه

سر البقاء بعاشور وربنا الذي يرعاها
.............................................................................................................

شوف الخلود المن صُـفــه بالتالي
وينه يزيـــد ووين قصره العالي
ما قارنت بـــس الحُســـيــن الغالي

وشگد كريم ومهيوب للباري روحه انطاها
.............................................................................................................

عرّج على درب السبايا الأصعب
ذاك إبتدت مـنّــــه حكاية زينب
تلگه النصر هوّه الجواب الأنسب

كلّه بسبيل المعبود قربان عترة طه
.............................................................................................................

فوگ الرمح بس كلّه غِيره الوفّاي
أكبر عزم من مسألة جـــــود وماي
عباس واحد بس وحــق الله هواي

كل الصفات الطيبات راعي الفضل معناها
.............................................................................................................

كلشي بسبيل الله توجّه للشام
روس النشامه والحرم والأيتام
رغم الحزن رغم القــهــر والآلام

كلمة شرف گال حسين وبهالنصر وفّاها
.............................................................................................................

أجيال بعد أجيال والدنيا اتدور
تروي البطولة من وقائع عاشور
صرختها ترفض كل عناوين الجور

هيهات للذلّه تصيح والذلّه مِنْ يرضاها
.............................................................................................................

خادم الإمام الحسين عليه السلام
عمار هليل الواسطي
١٤٤٦ هجري / ٢٠٢٤ ميلادي

بين السيدة زينب عليها السلام وأخيها سيدي ومولاي الإمام الحسين عليه السلام




شخبرك عالسبي يحسين جرح محسوبه كل خطوه
أمــيــره اوياك اســيــره اليوم أجُـرّه النَـفَس بالگوّه
حسينا واحسيناه ... حسينا واحسيناه
............................................................................................................................

وحق من أنزل الــقــرآن وحــفــظ بالمُحكم آياته
صعب درب السبي يحسين ثگيله هواي خطواته
وبعد ليل الخــرابــه شلـــون تهدّ الحيـــل ساعاته

ويتأمر على اعيالك وين الصدگ ما يسوه
حسينا واحسيناه ... حسينا واحسيناه
............................................................................................................................

چنت امدلـّلـه بحمـاك بوجــودك إنــتـه والكافــل
شگولن والشمــاتــه اهواي تســأل عن أبو فاضل
يعرفونه كـفــيلــي الچــــان ابخزرته يعدّل المايل

هسه اعله الرمح راسه وأشمّ بي ريحت الخوّه
حسينا واحسيناه ... حسينا واحسيناه
............................................................................................................................

بس آني وعلي الســجــــاد بقينه ابولْيَتْ الظِلّام
ويّانــه يَــمــاي العــيــن بــس الحــرم والأيــتــام
نظل ننطر عليهه الليل بعـــد يا عــين ترضه اتنام

كل هذا التعب يحسين أگول الخاطرك فدوه
حسينا واحسيناه ... حسينا واحسيناه
............................................................................................................................

رقيّه تريدك وتسأل عليك ودمعتي بعيني
شجاوبهه يخويه حسين عن البينك وبيني
الراسك عالرمح أنظر رقيه شما تحاچيني

عليك اتعوّدت بنتك وإنته الكل محب سلوه
حسينا واحسيناه ... حسينا واحسيناه
............................................................................................................................

إذا يغمض جفن عيني ولو لحظات شتذكّر
شمر لمن گـطـــع نحرك مدري الجسم الموذّر
لو نار المخــيّــم ذاك لــو طفلك يــبـــو الأكبر

لو فجعة علمنه الطاح وكتره چف أبو النخوه
حسينا واحسيناه ... حسينا واحسيناه
............................................................................................................................

أحاه يا حزن عاشور يخويه بكل گلب جمره
كلما يمر طاري الماي تبقى بمهجتي الحسره
وأشوف الكافل امگطعين چفوفه اليمنه واليسره

صور ما فارگت بالي بيّه العاشر اشسوّه
حسينا واحسيناه ... حسينا واحسيناه
............................................................................................................................

مشيت وكل نبض گلبي يمّك والإخوّه احساس
أغلى امن الهوى عندي دونـــــك شلّي بالأنفاس
بــعـــد شيعيد لـمّـتنه آنـــي اويــــاك والعــبــاس

يبن أمي السبي للشام هضيمه وكربله بلوه
حسينا واحسيناه ... حسينا واحسيناه
............................................................................................................................

خادم الإمام الحسين عليه السلام
عمار هليل الواسطي

قصائد مسير السبايا


قَمَرٌ على رأسِ القنا
قالَ لها إني هنا
يا زينبي إنّي أنا العباس
...................................................................................

ما خلص عهد الكفاله ولا نسيت
عدل ميت آني كفّالچ بقيت
گلت لازم أبقه يمچ واعتنيت
شاهدي عالرمح بس راسي وإجيت
أُختاهُ ذا عهدُ الوفا
قدْ قال إسمي واكتفى
يا زينبي إنّي أنا العباس
...................................................................................

يختي مرخوصه تحاچيني بعتب
حقچ والله اليعينچ عالتعب
من مصابچ دخّن الراس وغضب
أثّر برمحه وخطف لون الخشب

وهكذا عهدي لكِ
ما زلتُ مأموراً بكِ
يا زينبي إنّي أنا العباس
...................................................................................

إتقرّبي من الرمح وآني الكفيل
الزلمه بيهم خل يجي وفنّه يعيل
وين ما مال الضعن ويا أميل
هيچ وصاني علي حامي الدخيل

لا الرمحُ لا كيدُ العِدا
روحي لكِ تبقى الفِدا
يا زينبي إنّي أنا العباس
...................................................................................

أدري گلبچ يا ضوه عيني حزين
صعبه من للشام يختي إتغربين
لكن وداعت علي سدّچ أمين
واني گتلچ آني إبن أم البنين

فالصبرُ أنتِ أمَّهُ
وأصلَهُ وإسمَهُ
يا زينبي إنّي أنا العباس
...................................................................................

يل إجيتي الكربله بحمايتي
اوياج باقي وهيّه هيّه غيرتي
منهو گال الرايه طاحت مهجتي
عالرمح راسي ويعوض رايتي

والنصرُ مقرونٌ بنا
في الطفِ أو فوقَ القنا
يا زينبي إنّي أنا العباس
...................................................................................

الغيره بيه بكل زمان وكل مكان
والضعن بالعين يا عين الحنان
راسي من عالرمح ينطيكم أمان
من أهد (قالت له) هالعهد چان

لا لنْ يضيقَ بكِ الفضا
قسماً بقلبِ المرتضى
يا زينبي إنّي أنا العباس
...................................................................................



عمار هليل الواسطي

قصيدة ( شهداء الحشد )

لوما دمكم چان ما شفنه الضوه
وچان حسره اعلينه نشتم الهوه
…………………………………………………………………………………………………………………………………………

والنعم منكم زلم وكت الصــعاب

تضحيتكم أصبحت أصدق جواب

دمكم السال وجره فـــوگ التراب

تراب گاع حسين من عنده إرتوه

…………………………………………………………………………………………………………………………………………

إمتداد الثورةْ حســـيــن الشـهـيـد

أبد ما قــرّيــتــو إقــرار العـبــيـــد

سيف گص كل ذيل متبوع الـيـزيد

حمم وبنيرانكم جيشه إنچوه

…………………………………………………………………………………………………………………………………………

واللّه ما عــاش النـســاكم يالفـخـر

يا ربات حســــيـــن واربـــات الگمر

بالنهايه بدمــكــم الحـــق إنــتــصــر

ورفرف بهيبتكم اليوم اللوه

…………………………………………………………………………………………………………………………………………

الكل شهــيـد ادموعــنــا أبـلــغ كلام

من ربوع اعــــــراقـــنا بإســم الكرام

چــــان ما طارت حـمـامات الـســـلام

لوما دمكم كتب أصدق محتوى

…………………………………………………………………………………………………………………………………………

من صوركــم نفــتـهم معـنــى الثبات

إنــتـو يالأبــطــال صُــنّاع الـحـــيـــاة

منكم الأجــيــــال تاخــذها الصــفــات

إنتم الجرح الوطن صرتو الدوه

…………………………………………………………………………………………………………………………………………

شهدت الصولاتكم گاع الوطن

وسجد يم أعتابكــم هذا الزمن

دارت اعله الباغي دورات الفتن

وغير بس الذل خصمكم ما حوه

…………………………………………………………………………………………………………………………………………

خادم الحسين عليه السلام
عمار هليل الواسطي

قصيدة للمشاية

كله بـحــبــّـك مـولاي  ... عمري و موتي ومحياي 

أتــعــنــالــك مـــشّـاي ... تستاهل ماي العين

.....................................................................................................................................



إذا تگظي المجالــــس حبي ما يگظي 

شما بسمك يــــدگ يا سيّــــدي نبضي

صلاتي أختمهه بسمك يا عطر فرضي 

بتسبيح العشگ واني اشكـبــــر حظّي 


محظوظ بگد الشوگ ... ما دام إنته المعشوگ 

وآنه العبد الوفّاي  ... تستاهل ماي العين

.....................................................................................................................................


لطمت اعله المصيبه بمجلسك حاضر 

وكل يوم بـمـــحــرم حاســبــه العاشر 

أرضّ بصـــدري رضّ وأتخـيّــل الحافر 

بعد كل يوم يگــظــي أتحــضّــر الباچر 


عايش لوعةْ مهضوم .. هيچي بحزنك كل يوم 

يا مذبوح ومظلوم  ... تستاهل ماي العين

.....................................................................................................................................



تگظي العشره الاولى وكل جرح بيّه 

يبدي يـصــيـــح يا زيـنــــب المسبـيّه 

عيوني اعله العليل تصــــب دمع هيّه

وعلى ضعن اليــتــامـــى النوح  ليليه 


إي والشالتهه إرماح ... سيف أحزانك ذبّاح

واسيت وگلبي الصاح ... تستاهل ماي العين

.....................................................................................................................................



أعدهــن واللـيـالــي بـخـدمـتـك حـسـره 

أنا إمــعـاشــر مـصـابــك ألـطــم وأقــــره 

أنا بكل عَــشــره مــرّت أوفــي لـلـعِـشــره 

يـغـزّر بــيّــه فـضـلــك فـضـلــك إشْكـبـره 


آني امسجّلهه الروح ... بسمك وسنيني جروح

خليهه الروح اتنوح ... تستاهل ماي العين

.....................................................................................................................................



إلــــي مــوعــد حـزيــن بـقـادم الأيـــام 

أروح أتلگه زينب راجـعــه إمــن الـشــام 

تـــرد بالــروس والحــســـرات والأيــتـام 

مـشـــاي أعــتـنـي الدربــك أشــد إحــزام 


كل تعبي هناك يهون .. فدوة لدمعة أم عون 

خادم واني الممنون ... تستاهل ماي العين

.....................................................................................................................................



حــرم وأطـفــال وشـيـوخ وشــبـاب هناك 

كل واحد أشــوفــه بـچـفــه شــال إلـــواك 

كـلهـا تصــيــح يا بــو اليــمــه عـــد عينــاك

ملايين بشــغـــف عالـفــطـره  تــتـعــنـــــاك 


كل واحد عابس صار ... يا حي الله الزوار

غيرك لا ما تختار ... تستاهل ماي العين

.....................................................................................................................................


شغف  يوم أربعــيـنــك كـل مــحــب وفّـاي  

من يــنــوي الزيـــاره ويعــتـــنــي مـــشّـاي 

يطــلــب هالطــلــب مـنــك يــمـي عـيــنــاي 

يگلّك ســيــدي العَـــوده اعـــلــــه عام الجاي 


درب الجنه المعروف ... دربك واني الملهوف 

تتعنه صفوف صفوف ... تستاهل ماي العين

.....................................................................................................................................


خادم الإمام الحسين عليه السلام

عمار هليل الواسطي

قصيدة في وداع شهر محرم الحرام

بالسلامة ... إنْشوفك بعد عام
بالسلامة ... وكل إحنـه خدّام
أيّــامـــــك وليــاليـــك ..
جِرَحنه كل جرح بيك ..
يا مُحرّم
.....................................................................................

يشهر النايبه وعدنه الحزن عاده
حزن من الله بينه وللسبط راده
لطمنه عالحسين واحنـــه أولاده
وهلّينه الدمـــوع العمّــت الساده

للقيامه ... نار الحزن نار
للقيامه .. ترسمهه الأعبار
تحاچينه ونحاچيك ..
جِرَحنه كل جرح بيك ..
يا مُحرّم
.....................................................................................

ليليه اعله حب حسين من نلتم
يلمنه بخيـمــتـه يا شهر المحرّم
نشب بنار من نحچي اعله المخيّم
نود كون الدامع من تهل من دم

چم علامه .. من طف الدموع
چم علامه .. نحنيهه الضلوع
تغادر مســـرع شـبيك..
جِرَحنه كل جرح بيك ..
يا مُحرّم
.....................................................................................

تجينه ومن وكت يا شهر نتحضّر
ننصب خـيـمــة الأحـــزان والمنبر
عليش بسرعه رايح راح نتحسر
عليك وعالوداع بساع ما نگدر

هالكرامه .. من الله نعمه
هالكرامه .. وحسين رحمه
بدموع أحباب نحييك ..
جِرَحنه كل جرح بيك ..
يا مُحرّم
....................................................................................

بوداعك والموالي صب دمع عينه
ذاك اليوم بهلالك تلاگينه
تروح تخلي بعدك چم جرح بينه
هاك إسمع لطم خدام أبو سكينه

مو ندامه .. نلطم عالحسين
مو ندامه .. بل فوز دارين
تواسينه ونواسيك ..
جِرَحنه كل جرح بيك ..
يا مُحرّم
.....................................................................................

صدگ هالليله آخر ليله وتسافر
صدگ ماكو عزاء ولا لطم باچر
صدگ وحشه تصير لكل محب حاضر
بعد ما نشفت الدمعه على العاشر

وبتمامه ... أيامك تروح
وبتمامه .. يامالك الروح
صعب نصبر نتانيك ..
جِرَحنه كل جرح بيك ..
يا مُحرّم
.....................................................................................

يشهر الفاجعه ندعي الله سبحانه
كل خادم العاش حسين واحزانه
رضا عنّه الحسين وقبل برهانه
وبدفتر الخدمه كتب عنوانه

عالي هامه ...كل خادم هنا
عالي هامه .. وحسين مولاه
بدمعنه من نوافيك ...
جِرَحنه كل جرح بيك ..
يا مُحرّم
.....................................................................................

خادم الحسين عليه السلام
عمار هليل الواسطي

قصيدة { المشاية }




ميراث الوفه من صاحب الرايه
جينه امن البحر للنحـــر مشّايه
..................................................................................................................................

مشّــايه إجيــنـــه بغـيرة الكافل
جدّدنه العهد والعهد مِـتْـــواصل
تعلمّنه الوفه بمدرسـة أبو فاضل

كلنه ابخدمتك يحسين وفّايه
..................................................................................................................................

رايات الوفه بكل صوب منتشره
مشينه ومستهلنه كتبته البصره
قصيده للوفه مكتوبــــه بالعبره

كل خطوه حرف نقراهن اقرايه
..................................................................................................................................

يبن المرتضى وما عدنه شي يصعب
وبيوم اربعينك فرض يتوجّب
نستقبل ضعن أم الخدر زينب

نمشي الكربـلائــك والمشي آيه
جينه امن البحر للنحـــر مشّايه
..................................................................................................................................

آيات الـــوفـــه بدمــــوع نكتبهه
وخطوات المشي للجنّه نحسبهه
ملايين التزورك گلبك يحبهه

ولأجلك غدت للموت شرّايه
..................................................................................................................................

وحق راية كفيل الطاهره وجوده
ويّاك المحــب ما يخلـــف اعهوده
نوصلّك مــشـــي والسُفره ممدوده

مواكب بالكرم والجود عطّايه
..................................................................................................................................

على طول الدرب مَد المواكب صار
وتـــنــادي يــزايــر أبـــد لا تحــتــار
نوصل حَضْرتـــك يا ســيّــد الأحرار

والقله القليله صارت اهوايه
..................................................................................................................................

الك سمعاً وطاعه وكلنه عد عيناك
مشايّه وفدائك كلمن اتعنّاك
لا حَر لا برد يمنعنه عن ملگاك

يا أول عطش فاق وهزم مايه
..................................................................................................................................

خادم الإمام الحسين عليه السلام
عمار هليل الواسطي

قصيدة { الأميرة تروح أسيرة }




من هوان الدنيه والدنــيــه گصيره
هالأميره تــروح للــطـاغي أسـيره
...................................................................................................................................

إي أمــيــره وچــان كافـلــهـه الغيور
أبو فاضــــل عالعقيله إچـفـوفه سور
وهيّه زيــنـــب نـــور والكافــلـهه نور
شگد هضيمه تخونــهـــه الدنيه وتدور

كابرت أم عون بس حيرتهه حيره
هالأميره تــروح للــطـاغي أسـيره
...................................................................................................................................

من بعد عاشـــر مـحـــرم شــي أكيد
دارت الدنيه بضعـــن أصــبـح وحيد
تشوف زينب عالرمـــح راس الشهيد
وزجر يحدي الضــعـــن للطاغي يزيد

تنسبي من ناس أبد ما عدهه غِيره
هالأميره تــروح للــطـاغي أسـيره
...................................................................................................................................

أظلم تشوف الصـــبــح ويّا العليل
ومن يجيهه الليل بالحسره طويل
آه يا ضــيــــــم السبايا شگد ثگيل
رغم صــبر أم الخــــدر مـاله مثيل

بزينب الحسبات يا عالم چبيره
هالأميره تــروح للــطـاغي أسـيره
...................................................................................................................................

بالخرابه تــنــام أســف بنت الولي
يا گلـــب يرتــــاح يا هَــــمْ ينجلي
تصيح من القــهـــر بويـــــه يا علي
هــمــهـــه زاد وعالمصــايــب يعتلي

تندب وهالضيم لا ماكو نظيره
هالأميره تــروح للــطـاغي أسـيره
...................................................................................................................................

صعبه نظرات الشماته اعله الضعن
ناس غربه والوطـــن غــيــر الوطن
ما گظن ســـــود الليــالي مـــا گظن
هذا درب الشــــام حســـرات ومحن

كلهه غربه الشوف چا إلمن تديره
هالأميره تــروح للــطـاغي أسـيره
...................................................................................................................................

جروح تكبر والدرب خطواتــه نار
والزمن ما أنصــف وعالحُــــرّه دار
ما تمــيّـــــز بـــيــن ليل ولا نــهـــار
من أهَـــد عاشـــــور هذا الصار صار

واليتامى جروح حَسبتهه خطيره
هالأميره تــروح للــطـاغي أسـيره
...................................................................................................................................

آخ من الشــــام مـــا يگظـي الونين
كلشي بالدنيه صـُـفــــه مؤلم حزين
الدين يــنـــگــاد بحـبــال الماله دين
وينسبي آل النـــبــــي الهادي الأمين

بالقيامه النار كل طاغي مَصيره
هالأميره تــروح للــطـاغي أسـيره
...................................................................................................................................

خادم الإمام الحسين عليه السلام
عمار هليل الواسطي

قصيدة { درب السبي }

بحرم وايتام ... رحت للشام ... يخويه حسين مسبيّه
..................................................................

عگب عينك يماي العين ما أنصف زماني بهاي
آني وهالضعن خويه وراسك عالرمح ويّاي
هضيمه اعله الهزل نصعد هوان الله على دنياي
عگب عباس ما ظل حيل ولا رايه ولا وفاي

شيظل بالحيل ... بخرابه بليل ... أبات ابونّه مخفيه
..................................................................

بالناگه زجر يحدي وتتشمت يخويه الناس
ياهو يشوفني يگلي وينه كافلچ عباس
معذوره لون أنحب وألطم يالسبط عالراس
وادم لا شرف لا دين لا ذمّه ولا إحساس

يشتموني ... يروعوني ... لچموا كل جرح بيه
..................................................................

روس اعله الرماح شلون أشوف وبالگلب حسره
آه يا كربله وعاشور بعد ما تنشف العبره
آني إختك يبو السجاد أمس عالتل بقت نظره
گلتلك بيهه يا مظلوم سبوني وشتموا العتره

بفكر محتار ... بدليلي النار ... طولك ضيّعت فيّه
..................................................................

عندي أيتام مرعوبه يا خويه نهار وليل
من حرگ الخيم لليوم ومن هجمت علينه الخيل
أجمعهم يضي عيناي لاچن بيش أشد الحيل
ما ظل بس عليلي اوياي ومجرى الدمع شبه السيل

أصبرهم ... أباصرهم ... اعله هذا الحال ليليه
..................................................................

وحياتك خويه يا مظلوم بعد ما تنشف الدمعه
فراگك سهم وسط احشاي والله وفجعتك فجعه
اليروح وما يرجعه الموت بعد يا مدمع يرجعه
دار الزمن بيّه وحيف بعيني ضاگت الوسعه

بحبل أنكاد ... عذابي زاد ... الهوه مخنوگ بالريّه
..................................................................

أصبر والصبر مريود وأخلي الصبر يتعجب
أميره امدلـلـه بحماك وصرت أم الصبر زينب
الصعب كلش يخويه حسين عفتك والبعد أصعب
رقيّه شما تناشدني عليك الروح تتعذب

شجاوبهه ... شخاطبهه ... شگولن جثه مرميه
..................................................................

خادم الإمام الحسين عليه السلام
عمار هليل الواسطي

{ شرف الخدمة }
ميمر


راحه التعب بس ويّاك وبخدمتك نتباهه
..........................................................................

كلمة شــــــرف ننطيك يابو اليمه
طول العمر ما نترك إحنه الخدمه
نشكر البــــــاري انطانه أكبر نعمه

نعمه وشرطهه الإخلاص هنياله من جازاهه
..........................................................................

ندعي الله يرزقنا عليك الدمعه
والخادم اليدعيك إنته اتسمعه
يتواضع بخدمتك وانته ترفعه

بهذا التواضع مهيوب والباري يرفع جاهه
..........................................................................

يتباهه كلمن صار لجلك خادم
ويصفّي نيته وربنا هوّه العالِم
كلمن طموحه الشُهره يطلع نادم

والخدمه تحتاج الزين وتوافي من وافاهه
..........................................................................

خِدّامــك ومــنــك نريـد التسديد
عالفطره اجينه وغير دربك منريد
مو بس شهر عاشور لا بالتأكيد

بكل لحظه ويّانه اتعيش يا سبط جدك طه
..........................................................................

بگلوب بيضه نلبس اثياب السود
ونواسي بمصابك حبيب المعبود
يحسين لولاك العــمـــر ما مريود

دنيانه دونك يحسين ما تسوه لو عشناهه
..........................................................................

إنته السفينة للنجاة وننخاك
يبن الزچيه ورضا الباري امن ارضاك
بالدم كتبنه العهد لا ما ننساك

أجيال تتبع أجيال والخدمه ما عفناهه
..........................................................................

عشت بضمايرنه يبن حامي الجار
لولاك ما صرنه وحقّك أحرار
خدّامك وتحسبنه عندك أنصار

وبخدمتك هالأرواح أفلَحَ من زكّاهه
..........................................................................

أطهر زكاة لكل نفس يا مظلوم
هالخدمه وبجاهك العند القيوم
مندوم كلمن عاف دربك مندوم

ذاكرهه ربنا القهار قدْ خابَ من دسّاهه

..........................................................................

خادم الإمام الحسين عليه السلام
عمار هليل الواسطي