لا تزعلن ايتها الطويلات مثلما انا اعشق القصيرات هناك من يعشقن فحب الناس مذاهب
مع اني طويل لكني لا احب إلا الانثى القصيرة

#زول_بشخبط

بدل تحتفلو برأس السنة.إحتفلو بقعر السنة.اصلكم عايزين أحتفال والسلام. منها تجردو أعمال العام وتحاسبوا نفسكم على تقصيركم وتعزموا على بداية جديدة أمام الله.

#زول_بشخبط
نزار عثمان هاشم

السَلآْم عَلْيُكّمٌ وٍرٍحَمُةّ الله وٍبُرٍكآتُهْ

متين يا غائبة ومجهوله
تدخلي حياتي وتسكني فيني
منتظرك سنين متعشم
زي قمرًا علي تبيني
متحكر في كهوف الوحدة
مستنيك انتي تجيني
تتونس روحيتي بروحك
واكمل بيكي نص الديني

صابر وبالامل متصبر
لو حتى بصيص امل اديني
مشتاق وشوقي ليك حرقني
زايد فيا ليكي حنيني
بعدم جيتك انا كنت كفرت
لو مافيهو مقوي يقيني
طال الانتظار يا الغائبة
وبخاف لو جيتي ما تلقيني

#زول_بشخبط
نزار عثمان هاشم

ناوي ادخل قِليبك اخشو
تسمحي لي يا استاذة
اقرأ في فصولو الريدة
وتشرحي لي كل الغازة
وتحكي لي عن روادة
وعن لغته وسر اعجازة
اسمحي لي وقولي ردك
قبال ما تروحي اجازة

تسمحي لي يا استاذة
اصبِح من ضِمن طلابك
وقلبك اخش مدرستو
وتقري لي منو كتابك
وتختي لي امتحانًا قاسي
يمكن فيه احوذ لاعجابك
ولو فيهو فشل ما نجحت
راضي بيهو البيبقى عِقابك

تسمحي لي يا استاذة؟
ادخل لفصول مدرستك
الليها انتي باقية مديرة
واخذ لي دروس خصوصية
عن الحب والشوق الغيرة
امسح ليكِ سبورة قلبك
وتكون ليك دماي طبشيرة
اسمحي لي يا استاذة
اصلو الرفض حاجة مريرة

اسمحي لي يا استاذة
يا المرهف رقيق احساسه
خليني انتظم في فصولك
ودقي للحصص اجراسه
وابدي لي تعليم مدرستك
من مرحلة روضتة واساسه
خليني النجيك تلميذ
شايل محبرة وكراسه

علميني يا استاذة
وخليني زيك اكون استاذ
فهميني كـــــــل المنهج
عشان اتفوق واجيب ممتاز
وعشان البينا يبقي طبيعي
لا يصبح مخل لا شاذ
اختمي لي الطلب وامضيهو
وقولي لي اتقبل واتجاز

اسمحي لي يا استاذة
ادخل في قليبك اخشو
وازرع حبي في دقاتو
وابني ليهو بيتو وعشو
واملاهو حنان ومحبه
والحزن البجيهو اهشو
ووعدًا مني ليك و لقلبك
لا اكذب عليك لا اغشو


تسمحي لي يا استاذة
يا مربية الاجيال
اطلب ايدك من والدينك
ويكون البينا مُباح وحلال
عشان ما يقولوا قالوا الناس
وعشان ما نسكت العُزال
نبني لينا جنه سعيدة
ونتم ونحقق الامال

✍نزار عثمان هاشم
✍ #زول_بشخبط

اللامبالاة والإستهتار والتصرفات الفردية هي أكبر سلبيات مجتمعنا السوداني

فبالرغم من خطورة هذا الوباء الفتاك وسرعه انتشاره يتصرف غالبية الشعب السوداني باستهتار معه ...! وكأنه يعيش في كوكب أخر غير الذي تعيش فيه بقية الشعوب...! لايزال الناس يعيشون حياتهم العادية قبل ظهور المرض...! فقط نسبة قليلة من يلتزمون بالنصائح والارشادات الصحية للوقاية من الاصابة بفيروس كرونا.
لا ادري اهو الجهل؟ أم هو (التواكل) وليس التوكل على الله ؟
فأن كان هو جهل فلا فائدة من المجهود العظيم - والمقدر- الذي تقوم به وزارة الصحة ومنتسبيها و اجهزة الاعلام الرسمية ومنظمات المجتمع المدني و نشطاء السوشيال ميديا .
فالجاهل لا يقتنع بما ينصح به إلا عندما يصاب! وحين يصاب جاهل عندها يكون هو اخطر من الفيروس نفسه.

اما ان كان تواكل ، وهو توكل على الله بجهل من دون العمل بالاسباب والالتزام بارشادات الوقاية التي تحمي من انتقال المرض فتلك مصيبة أخرى.

فالله قادر على كل شئ، قادر على ان يحفظنا من الاصابة بالمرض حتى وان خالطنا المصابيين به. وايضا قادر على اصابتنا به وان لم نخالطهم ، لكن لكي نتوكل على الله حقا علينا ان نوقي انفسنا اولا ومن ثم ندعو الله ونسأله ان يحفظنا ويدفع البلاء عنا وعن بلادنا.

"ففي حديث عن الإمام السجاد عليه السلام قال:”مر موسى بن عمران عليه السلام برجل وهو رافع يده إلى السماء يدعو الله، فانطلق موسى في حاجته، فغاب سبعة أيام، ثم رجع إليه وهو رافع يده إلى السماء.

فقال موسى عليه السلام : ” يارب! هذا عبدك رافع يديه إليك، يسألك حاجته، ويسألك المغفرة منذ سبعة أيام وأنت لا تستجيب له؟ فأوحى الله إليه: « يا موسى، لو دعاني حتى تسقط يداه، او ينقطع لسانه ما إستجبت له حتى يأتيني من الباب الذي أمرته»"
فاذا كان ربنا قد فتح لنا ابواب رزقه فإن علينا أن ندخل منها ، ثم نطلب منه أن يرزقنا رزقا واسعا.

وكذلك الامر ينطبق على العافية وعدم الاصابة بالفيروس علينا ان نعمل بالارشادات ومن ثم ندعوا الله ان يحفظنا ويسلمنا منه.

التزموا بارشادات الوقاية وكونوا بخير.

نزار عثمان هاشم
#زول_بشخبط

الزواج في زمن الـ كورونا مبسط ورخيص بس وين تلقى العروس العايزة وتقتنع


نزار عثمان هاشم
#زول_بشخبط

ما يعجبني ربما يعجبكم

ادوها طله وقرروا
👇

@i_like_me

سوال لي اي بنت بتستعمل كريمات بتغير اللون وتخلي الخدرا والسمراء بيضاء .
دا كلو عشان شنو؟ ليه بتشوهي خلقة الله ؟ عشان الاولاد بفضلو البنت البيضاء؟ ومالو حب الناس مذاهب كل شخص بحب لون معين وانا لو حبيت مثلا اللون القمحي مابحبو لو ما كان اللون الطبيعي الخلقو الله وليس الذي تغير بفعل السموم الكيميائية والكريمات التي شوهتو.

ليه ياخ ياسمراء وياخدورية تجلبطن وشكن الانضر بسموم كيميائية ماعارفاتنها مركبة من شنو وجاية من وين وليس مصرح بها من وزارة الصحة وماعارفات اثارها الجانبية؟للدرجة دي صحتكن رخيصة عليكن حرام والله عليكن البتعملنو في روحكن دا.
زمان حبوباتكن واماتكن كانن بتزينن بالكحل وزيت السمسم والكركار والودك وحاجات طبيعية من صنع ايديهن جميلات كما الزهور وسماحة الدنيا عليهن.
لكن انتن جنيتن في الفسخ والجلخ شوهتن لونكن وجمالكن.
اللون الطبيعي والخلقة من الله هو الاحلي و
كل لون ليهو عشاقو ومحبيه فخليك كما انت هناك من يعشقك بلونك الذي خُقلتِ به فعشاق اللون الاخدر يتفاخرون بعشقهم لهذا اللون (سمحة الخدرة لما تروق وتاني اي لون محروق خدار جاي من الله ما بجيبوه السوق)و في الاغنية
من نورك المتوهج يا اللخدر الليموني
سحبت موية بصري وعميت عليّ عيوني
ومحبي اللون الاسمر يرددون من الشعر والمقولات (سمراء تكحلت فاربكت قلب ذلك الذي تاب عن الحب ) و اسمر جميل فتان ما بجود بمثله زمان ملاك في شكل انسان سبحان من صور .
وكذلك محبي اللون الخمري (الساده لونو خمري قلبي حبا مفتون بلونو وبريق سنونو يارب صونو)
وايضاَ عشاق لون المنقة (لون المنقة يا الشايل المنقة ما عارف كيف نحنا بنشقى)

عشان كدا خليك زي ما انتي في ناس بيعشقو لونك دا موت واي بنت بتتمني لو لونة زي لونك انتي حتي تلك التي خلقها ربها بلون بشرة بيضاء تتمني لو كان لونها اخدر او اسمر.
ارتضي بما وهبك الله ولا تحاولي ان تغيري وتبدلي في خلقة الله وتشوهي جمالك الطبيعي وتصيبي جسمك الصحيح المعافة بالامراض الخبيثة التي تاتي من الكريمات المليئة بالسموم الكيميائية.
تجملي وتزيني وتنعمي وبخلطات طبيعية لا تمرض واياك ان تستعملي كريمات تغير لون بشرتك انتي جميلة بلونك الخلقك بيه ربنا 😃

#زول_بشخبط
نزار عثمان هاشم
#ارشيف2016

ان تكون في عمر الثلاثين يعني بانك قد تخطيت مرحلة التجارب وترقيت إلى مرحلة التعلم. اما ان تكون في عمر العشريين فما دون ذلك يعني هذا بانك لازلت في عمر التجارب. وحتى ان فشلت تجاربك ستتعلم منها الكثير.

#ثلاثيني 🙈
نزار عثمان هاشم
#زول_بشخبط

- أنت لسة قاعد؟
- يازول مالك
ـ قوووووم سريع
ـ اقوم وين؟
ـ تقوم وين كيفن؟
ـ يازول مالك في شنو!
ـ انت شكلك ما عارف اي شئ ولا متابع المسجدات!
ـ يازول ما تجنني كدي براحة كدة فهمني الحاصل شنو؟
ـ الحاصل يا سيدي انو الحكومة اطلقت مبادرة اسمها القومة للسودان للتبرع من اجل النهوض بالسودان واعماره وفتحت التبرع لكل سوداني.
ـ وطيب لو عايز اقوم واتبرع للسودانا الغالي. اتبرع كيف؟
ـ بكل سهولة ويسر عن طريف تلفونك لو كان شريحتك سوداني ولا زين او ام تي ان ما عليك إلا تضغط نجمة(*) واحد تسعة ثم سلم(#) وترسل الطلب بتجيك خيارات التبرع من الرقم 1 الي الرقم 8 اقل تبرع 3 جنيه سوداني واقصى تبرع 200جنيه سوداني لو عايز تتبرع 3 جنيه رد بالرقم 1 ولو عايز تتبرع ب5 جنيه رد بالرقم 2 ولو عايز تتبرع 10 جنيه رد بالرقم 3 لو عايز تتبرع ب20 جنيه رد بالرقم 4 ولو عايز تتبرع ب50 رد بالرقم 5 ولو عايز تتبرع ب100جنيه رد بالرقم 6 ولو عايز تتبرع ب200جنيه سوداني رد بالرقم 7
ـ *19# 5 تم
ـ اها اتبرعت؟
ـ ايوة اتبرعت
ـ يلا نكلم التانييين ونخليهم يتبرعوا


وانتو كمان ماتنسو تتبرعو

#القومة_للسودان

#زول_بشخبط
نزار عثمان هاشم