على طور شلون ليله لحمزه الصغير (گعديه) عن دفن السجاد لجسد أبيه الامام الحسين عليه السلام وباقي الاجساد الطاهره

اهواي صعبه المحب من يدفن حبيبه
هلمصيبه. المامثلها كل مصيبه
تهمل السجاد عينه
جسم أبوه اموذرينه.
اهواي صعبه
★★★★★
انطوتله الأرض لمن. رجع لأرض الغاضريه
بنظرة الملهوف گاصد. نار البگلبه سريه
وين ريحانة الهادي ومهجة الزهره الزچيه
شاف الجسم حين التفت
السجاد ناره. اتوجرت
شيحسب بطعناته الصفت. الف طعنه وتسع ميه

اهواي صعبه من نظر فخر الهواشم
كل كتر مهشوم. ماضل كتر سالم
شخلت بجسمه الحوافر وذيچ طبرات البواتر
اهواي صعبه
★★★★★
شلون منظر لو اوصفه. تسبگ الدمعه المشاعر
من يلم جسمه ويچفنه. الداسته خيول العساكر
سمه انحط ابلحد وسفه. حسين نوره اليشع زاهر
مكسور گلبه وممتحن
السجاد ساعات الدفن
من المدامع والحزن. اصبحن بيض النواظر

اهواي صعبه يدفن الروح الحنينه
نزلت املاك السمه تبچي وتعينه
مابعد يحصل الملگه. فرگه المحبوب فرگه
أهواي صعبه
★★★★★
يذكر السجاد زينب. بالظعن مكسوره خاطر
شلون لوتدري العقيلة. شحال جسم حسين صاير
علارض مفروش جسمه. من كثر دوس الحوافر
لا له ملامح لارسم
لاصوره ضلت لاجسم
اتموت ويفارگها العزم. لون زينب تدري باچر

اهواي صعبه. بياخبر زينب يگلها
ارماد صارت ياحسافه. اجسوم اهلها
وياه من ينصب عزيه الحال ابن خير البريه
اهواي صعبه
★★★★★
الدين والايمان كله. العدل وأحكام الشريعه
ومنظر الحق وجماله. النوره من نور الوديعه
بالسيوف امگطعينه. وماسلم حتى رضيعه
السجاد روحه معلعله
صوته حزن يملي الفله
هذي فجيعة كربله اعظم واكبر فجيعه

اهواي صعبه من يرد للضعن باچر
ولوعته ابوسط الگلب مثل الخناجر
من التعب مهدوم حيله ومن يصد حال العقيله
اهواي صعبه

الشاعر حسن لعيبي الحريشاوي

الامام السجاد عند دفن ابيه الحسين عليه السلام

يدفن حبيبه ومهجته
تعنه العليل أبلوعته

متعني مكسور الگلب
حد كربله يطوي الدرب
متعني ودموعه تصب
الله يافرگه المحب
والله اتموت فرگته
تعنه العليل بلوعته

متعني مهدود العزم
من الجسم مدري شيلم
كل كتر وصله من الجسم
ماكو معاني ولارسم
وماكو ملامح صورته
تعنه العليل بلوعته

لمن وصل يم الجسد
الطعناته ماالهن عدد
السجاد علرمله گعد
من الأمر ماكو أشد
مطحونه ينظر جثته
تعنه العليل بلوعته

معقوله ابن المرتضى
ظلوعه الشريفه مرضرضه
ونحبه على الغبره گضه
بهلحال لمن لاحظه
مخنوگ ظل بعبرته
تعنه العليل بلوعته

لاظهر ظل ولاصدر
بدوس الحوافر منكسر
بحفره نجمع نور البدر
ويلاه ناده أم الخدر
يبچي ويحشم عمته
تعنه العليل بلوعته

جيش الكدر يمك لفه
امگطع ينور المصطفى
والهم نهب ظعنك صفه
ينادي على الدنيا العفه
بعدك يگلبي وسلوته
تعنه العليل بلوعته

صعبة وأشد من الصبر
حالة گلب مثل الجمر
يدفن سمه بوسط الگبر
والجنه وسنين العمر
للباري يشكي حالته
تعنه العليل بلوعته

الشاعر حسن لعيبي الحريشاوي

لسان حال الامام السجاد عليه السلام  عند دفن جسد ابيه الامام الحسين عليه السلام  (وزن النصاري)

ياوسفه بديه    دفنت ابن الزچيه
تعوفه بگبره وتروح   ماظلت بعد روح
         دفنت ابن الزچيه
★★★★★
دفنت الروح والدنيا والاحلام
ودفنت السلوه والراحه والايام
دفنت الطيبه والجنه والانسام
شيصبر الروح هاگد تحمل آلآم
محبوبي دفنته    وخليته  بغربته
تحمل ها كثر نوح     ماظلت بعد روح
          دفنت ابن الزچيه
★★★★★
انا السجاد اجيت الغاضريه
دفنت حسين وايامه الزهيه
دفنته وطاوعتني شلون اديه
تمنيت وردت گبله المنيه
ياكسري شيجبره    بديه حفرت گبره
تشوف حسين مذبوح   ماظلت بعد روح
          دفنت ابن الزچيه
★★★★★
شنهي المايون لحسين وينوح
دفنت ايام عمري وسلوة الروح
ابوي  الماحظه بالماي  مذبوح
ثلث تيام فوگ الگاع مطروح
مگطعته البواتر    وطاحنته الحوافر
تشوفه شلون مطروح    ماظلت بعد روح
          دفنت ابن الزچيه
★★★★★
يا نجم السمه  الطايح بالتراب
نجم الماخفه  وعن بالي ماغاب
هذا الماجره   ولامر  بالحساب
عليك ادري صعب يابويه العتاب
دنيا  الفارگتها     تلوعني عفتها
تحمل هظم وجروح   ماظلت بعد روح
          دفنت ابن الزچيه
★★★★★
يبو اليمه الجره مامر على البال
يطيبة خاطري وياسلوة  الحال
عليل الوحدي  مچتوف بحبال
بس الحرم ظلت عندي  واطفال
ماظلت مدينه    مابيها مشينه
تمشي جبال وسفوح    ماظلت بعد روح
          دفنت ابن الزچيه

الشاعر حسن لعيبي الحريشاوي

قصيدة لدفن الاجساد على طور مر بيه لوطيف
لباسم الكربلائي. حال لسان السجاد عليه السلام

يابويه رديت.  من الأسر جيتك
ياشمعة البيت. تعذرني ياريتك
مااحمل احزان.   ياعالي الشان
★★★★★
عليل بفرگتك والدهر عذبني
ودروب الأسر نيران   چوَّني
أريد اوصاف إله ماينوصف حزني
اسمعك من تناديني علي يبني

يابويه چتال.  فراگك على روحي
بويه انظر الحال. شگد لوعتي ونوحي
والگلب خلصان.     ياعالي الشان
★★★★★
اجيت الدفنتك حاير يبو اليمه
كون اليندفن ناس وأهل يمه
وسالم كل كتر لوگلبت جسمه
وذر يابويه جسمك لو ردت  لَمَّه

لاظلت ارسوم.   لاخنصر العندك
عليها العفه دوم.   هلدنيا من بعدك
ريت الاجل حان.  ياعالي الشان
★★★★★
يبويه اليوم جيت بروح حيرانه
من كثر القهر. والنوح.  خلصانه
من شفت الجسد ورسومه ذبلانه
يمن راسك اسير ابولية اعدانه

يلمثل عباس.  كاسرني الف كسره
جسمك بلاراس.   ياضنوة الزهره
يلمتت عطشان.   ياعالي الشان
★★★★★
اودعك يلچنت هلروح ترعاها
من اودعك جيت اودع الدنيا. معناها
يدنيا الروح  بعدك شنهي دنياها
تبث للباري بعدك روحي شكواها

دمعاتي بالعين.  متفارگ اعيوني
لمصاب الحسين.  ماتغمض جفوني
وبگلبي نيران    ياعالي الشان
★★★★★
جوه التربان وسفه ادفن الجنه
شگل لأم الخدر لوناشدت عنه
دفت الماكتر سالم بعد منه
اخاف اتموت بعد الحسره والونه

متحير اشلون  خوفي على خاطرها
من تسئل شلون.    حاير. شخبرها
ماضلوا أخوان.  ياعالي الشان

الشاعر حسن لعيبي الحريشاوي

ثكيل -  بحق الحسين

أداء : احمد عزيز
كلمات : حسن لعيبي الحريشاوي

حسين گال بكربلاء

حسين گال بكربلاء
گال لأخته بهلنداء
استعدي للبلاء   آه يزينب
★★★★★
گال يازينب يبت خير العمل
ودعت بحماچ ودعت الاهل
صبري يختي شماجره اعلينه وحصل
لكل أجل حتماً كتاب الكل أجل
نايبتنه ابكربله
اعلينه يختي امسجله
عينچ على العايله   آه يزينب
★★★★★
صبري يوم الطف إذا مسچ قهر
وگلبچ من الفاجعه المره انكسر
الله حاميكم اذا يلفي الخطر
والله حافظكم يبت خير البشر
تگضي هاي الموزمه
الصبر احسن خاتمه
يبت حماي الحمه   آه يزينب
★★★★★
صبري يابت علي ويابت  فاطمه
الله ينجيكم وحگ رب السمه
ومايمسكم شر بعد لاموزمه
عاقبتكم خير وانتي عالمه
ربچ الباري الجليل
يعوفكم لامستحيل
والخصم باچر ذليل    آه يزينب
★★★★★
صح يزينب باچر يمرچ عسر
وتمشي وياچ الحراير للأسر
وعينچ تشوف  الزمان المايسر
يكسر الريح الجبل ماينكسر
جبل انتي من الصبر
بوجه كل شده تمر
ولله تاليه  الأمر   آه يزينب
★★★★★
صح تمرچ باچر هموم السبي
وبلضعن حداي يمشي الأجنبي
صبرچ على الهظم يابنت النبي
باچر اگبالچ ذليل   الناصبي
والنصر يصبح حليف
وموقف الظالم ضعيف
وموقفچ بالغربه سيف    آه يزينب

الشاعر حسن لعيبي الحريشاوي

موعظه حسينية

حسين لورايد تِنصرَه نصرته موبس كلام
انطه كل ماعنده لجلك صدره مهبط للسهام
كون صبرك مثل صبره
حسين لورايد تنصره
نصرته موبس كلام
★★★★★
يلي بالعاشر تون تبچي وحزين
وانت چاويلك گلب ومبچي عين
وعلى اسرار الناس گلبك مو امين

بكلشي متحسر عليها دنيا باچر للزوال
باقي حالك ينتظرها وهيه ماتبقه على حال
بيها دينك لاتخسره
حسين لورايد تنصره
نصرته موبس كلام
★★★★★
حسين بلسانك شعار وبيه تعيد
وانت عن حسين ياغافل بعيد
يلي متربع وسط گلبك يزيد

وعلضوه والخير تحچي وگلبك انت بلانهار
سَلَّمِت للدنيا گلبك بعيد عن الرحمه صار
طبعك الموصح تِغَيَّرَه
حسين لورايد تنصره
نصرته موبس كلام
★★★★★
تجربه الدنيا وحلم باچر تصير
بالعساكر والمخيم لاتحيير
الياهو منهن انت ويامن تصيير

ناس ماتعرف دربها دوم تنصر بالطغاة
تذبح الخير ونعيمه تريد ناس بلاحياة
أخذ من دنياك عبرَه
حسين لورايد تنصره
نصرته موبس كلام
★★★★★
كون چلماتك على اخلاقك دليل
مومثل سعفه بهوه العالي تميل
وتخلط الهيهات بالفعل الذليل

باليسر تِدَّعي الرحمه وبالعسر طبعك جحيم
تنصر الظالم ودمعه تعوفها بخد اليتيم
اطلب من الباري نظره
حسين لورايد تنصره
نصرته موبس كلام
★★★★★
بصدر ابواليمه سهم من تستغيب
وانت ضده مره راعي ومره ذيب
شوكت توصل ذره من جون وحبيب

شوكت بالمعروف تأمر وترفض دروب الهوان
وعلى المنكر دوم تنهي شماصعب وجه الزمان
وربك الباري تذكره حسين لورايد تنصره
نصرته موبس كلام

الشاعر حسن لعيبي الحريشاوي

بعد ما تحتاج تنشر قصيدتك بغير قناة انشرها بقناتك ودز الرابط فقط واحنة انروجها اعلان حقيقي عراقي مشاهدات او مشتركين للتواصل
@ahmed_alziwar0

نعي  لسان حال العقيلة زينب عليها السلام

مارحل ليلي  لمن رحت يحسين   مارحل ليلي
هدمت حيلي  من بعدك الشوغات هدمت حيلي
من صحت ويلي مختنگ صوت الروح من صحت ويلي
علمشوا سيلي يدموعي مثل النار  علمشوا سيلي
نوحي وعويلي مابطله حد الموت نوحي وعويلي
شوفت چفيلي من فارگت ياحيف شوفت چفيلي
نار بدليلي  ماتنطفي للموت نار بدليلي

الشاعر حسن لعيبي الحريشاوي

ويلي على المذبوح بارضچ كربله
ويلي على المذبوح بارضچ كربله
★★★★★
مصبوغه ليش الگاع من نحر الدمه
وگفت تنوح افلاكها وتبچي السمه
ذبحوا على الكرار ذبحوا فاطمه
وچن النبي مطروح جسمه على الفله
★★★★★
بيچ الاقمار اليوم طاحت علثره
بسيوف بتاره الجسوم اموذره
طايح علي الأكبر وسبع الگنطره
ابحر السموم حسين محد ظلله
★★★★★
سبعين بلحومه يتانون الحتف
لمن عليهم داروا السبعين ألف
چم ظالم وغدار ملتم وصلف
بذبح الرضيع الشمر حشم حرمله
★★★★★
دارت على المظلوم متحزمه الزلم
علنهب والتخريب ماخذهم  عزم
بالخدع عرفوها المواقف تنحسم
علواحد جموع الغدر متجحفله
★★★★★
التموا إبلا وجدان حرگوها الخيم
ايركظن ومرعوبات خلوها الحرم
مات الظمير ومايحسون ابندم
بيهم ابوالاحرار بالطف ابتله
★★★★★
صوب المدينه عيون زينب ناظره
نادت يجدي حسين ظل على الثره
ترضه الشمر بالسيف يگطع منحره
اموذر ثلث تيام محد غسله

الشاعر حسن لعيبي الحريشاوي

آلاف طعنات الصدر لاستشهاد الإمام الحسين عليه السلام (وزن المجرشه )

الاف طعنات الصدر  ياريت ماسمعنه
ضربات علضربه صفن والطعنه فوك الطعنه
مهبط اسيوف الكفار
صدرك يبن حامي الجار
هذا الخبر فجعنه
ياريت ماسمعنه
★★★★★
الاف طعنات الحقد  طبرات فوك الطبره
امگطع ابواليمه وذر مذبوح فوگ الغبره
مهدور دمه علارض من دمه صارت حمره
بهلفعل مقصود النبي.والمرتضى والزهره

ماكو فرق بين الگوم
أهل الامس وأهل اليوم
نفس الفكر والمعنه
ياريت ماسمعنه
★★★★★
معروفه نيات الزلم لمتهم ومقصوده
اهل السقيفه لهلوكت احفادهم موجوده
معروفه اثاروطبع رايات الهم سوده
يردون سلطان السمه وعقولهم محدوده

احسين رادوه يختار
لوذله لوحرب ونار
سعروا نار الفتنه
ياريت ماسمعنه
★★★★★
خاطبهم بعين العقل احسين من خاطبهم
رادلهم الخير شكثر    هلحال ماينفعهم
باثنين ناده وينتظر  اي كلمه تصدرمنهم
يرضون  بالحق والعدل لويرحل ويتركهم

الهلامر مدفوع المال
بس الشمر رد وگال
هلراي ماينفعنه
ياريت ماسمعنه
★★★★★
طعنات كلها اموجهه   للنبي ودين الاسلام
ينفك حصار على الجهل ينفتح سجن الاصنام
وترجع قوانين الظلم    تنشال كل الاحكام
سلوا  اسيوف الواقعه وارماح تتبعها اسهام

باي شكل من الاشكال
گالوا نغير هلحال
هذا الامر جمعنه
ياريت ماسمعنه
★★★★★
معقوده رايات الغدر     بغير الدمه ماتنزاح
حسين بالغ بالنصح  يدرون قصده الاصلاح
يدرون للجنه الاصل وللهدى حسين المصباح
گلوب مقفوله ابحقد   مايرهملهم    مفتاح

جيش الكتب احنه أنصار
بطف كربله عليه اندار
كلها تخلت عنه
ياريت ماسمعنه

الشاعر حسن لعيبي الحريشاوي

هوسات للسبي

احضر ياعلي وبحسين شوف اصار
اشضل بجسمه من الصارم البتار
وانظر حال زينب ياعلي الكرار

( مسبيه الحره ومهظومه )
★★★★★
أيام المامثلها.     اتمر بعد أيام
تطُّفي خيام  زينب لوتلم ايتام
خوارج عن اهلها تگول اهل الشام

( امعيدين ابطيحة كافلها )
★★★★★
العليل ويانه صاحت بويه ياحيدر
ينهض للعده ايحامينه  مايگدر
الشمر بالسوط اجه يم الحرم يفتر

( مسبيه اتلوذ ابمسبيه )
★★★★★
أبحر الشمس گبل السير خلونه
بزجر وبسوط لأرض الشام ودونه
يبويه البلشدايد علي ينخونه

( أحضر شوف أصاير بينه )

الشاعر حسن لعيبي الحريشاوي

سلام الله على المظلومة زينب

سلام الله على المظلومه زينب
على گلب الحنين أشگد تعذب
سلام الله
★★★★★
سلام الله على خدر العقيله
على بنت الوصي الحره الجليله
الشفيعه بالحشر واكرم وسيله
يوم انروح بأعمال القليله
بأسمها تنطفي كل نار تلهب
سلام الله على المظلومه زينب
سلام الله
★★★★★
سلام الله عليها ام المصايب
الشافت بلطفوف شگد نوايب
اهلها اموذرين على الترايب
لاضلوا اهل عدها وگرايب
والعدوان وسط الخيم تنهب
سلام الله على المظلومة زينب
سلام الله
★★★★★
سلام الله على بنت المكارم
على ام الصبر خدر الهواشم
على الخلت خصمها بحيره هايم
سعفه ماتصير ابريح ظالم
ماجزعت رضاك تنادي يارب
سلام الله على المظلومة زينب
سلام الله
★★★★★
سلام الله على زينب الحره
اخت المنذبح غطته الغبره
خيول الگوم  سحگت فوگ صدره
الصارت من دماه الارض حمره
وعطاشا اتريد منها الماي تشرب
سلام الله على المظلومه زينب
سلام الله
★★★★★
سلام الله على بنت الزچيه
الشافت بالحياة أچم رزيه
اهلها اتذبحوا بالغاضريه
بعد شمل الاهل راحت سبيه
وبلسان العدو المهظومه تنسب
سلام الله على المظلومه زينب
سلام الله

الشاعر حسن لعيبي الحريشاوي

ت
https://youtube.com/watch?v=xyfYKjnrWKQ&si=fbfNvrUYTf_xA5DR

نعي عن العقيلة زينب عليها السلام

هاذي زينب اليحچون عنها
مواجع كربلا   المافارگنها
وسهام  النوايب صَوًّبَنها
من دار الاهل للطف خذنها
أيام المو على الخاطر لفنها
صار الحزن ياخذ من حزنها
للأكبر  تون مابَطَّل ونها
وعلى القاسم ولاغَمَّض جفنها
واخبار الرضيع الدولبنها
وعلى الكافل مدامعها عِمَنها
شديدات النوايب عَذِبَنها
وأشدهن يوم راح حسين منها

الشاعر حسن لعيبي الحريشاوي

اهواي صعبه المحب من يدفن حبيبه
سيد عماد الحسيني
الشاعر حسن لعيبي الحريشاوي