لسان حال السيدة زينب (ع) وهي تندب بني هاشم
وينـكم يهل الشيم حرگو اعلينه الخيم
شتمونا ... وسلبونا وعالنهر مرمي العلم
______________________
يآل هاشم يالمخوفين الملاعب
وين فزعـتكم يفـرسان الحـرايب
ترضه غيرتكم حرمكم بين اجانب
مدلالات وشافن أنواع المصايب
والعجيد اعله الثره ضامي حزو منحره
عذبونا ... وسلبونا وعالنهر مرمي العلم
_________________
حسينكم فوگ الثره ظل مرمي جسمه
مـوذر بحَّر الشـمس ، سـابح بـدمه
الخيل مثل گلوبهم ما بيهه رحمه
بالحوافر طحنت ضلوع ابو اليمه
وهاي ما صارت أبد سلبو حتى الجسد
ألمونا ... وسلبونا وعالنهر مرمي العلم
_________________
عاري ظل فوك الثره شيخ العشيره
من تجون لدفنه ؛ جيبوله حصيره
محد اعله حسينكم شالته الغيره
صاح (( ألَاَ من ناصر)) ومحد يجيره
بطيحة حـزام الـظهر ظهر ابو اليمه انكسر
راح اخونا ... وسلبونا وعالنهر مرمي العلم
_______________
جثث فوگ الگاع مطشره زلمكم
والتهاب سيوفكم داست خيمكم
هاي ما صارت غرب تحدي بحرمكم
يالهواشم ادري ما تقبل شيمكم
سبي كل يوم لبلاد فرجه صارن للعباد
مرمرونا ... وسلبونا وعالنهر مرمي العلم
_______________
انه اميرة هاشم وتالي سبيه
بيا وكت بت علي يسبوها ال اميه
بالسبي تمنيت تلفيني المنيه
تنتهي الآلام يم المر عليه
من عگب ذاك الدلال جفوفي تنشد بالحبال
جتفونا ... وسلبونا وعالنهر مرمي العلم
______________
خادم اهل البيت (ع)
الشاعر عبد العظيم أحمد الابراهيمي

قصيده للسبي لسان حال السيده زينب ع

وين اليودي المرسال لرض المدينه بهمه
ويگلهم ضعون حسين ما ضلت الهم حرمه
————————-
عاده التنهظم بخوانها تحشم
وتگوم البيض برگاب الزلم تكرم
وانا عفت اخوتي وبيه الحزن يهدم
لبني هاشم عتابي والعتب يلجم
ترضون ندخل ديوان ويزيد نسمع شتمه
وين اليودي المرسال لرض المدينه بهمه
————————

نسينه الصار بالطف من وصلنه الشام
دخلنه السوگ وعيون الشماته سهام
احنه اللي رفعنه راية الاسلام
خوارج تالي صرنه ودارت الايام
بهاي الحرم والاطفال ماكو بگلبهم رحمه
وين اليودي المرسال لرض المدينه بهمه
————————

بتنه بالخرايب يابني عدنان
ويا جفن اليغمض والگلب ولهان
كلها اهون علي من طبة الديوان
بشماته اعلينه كلها تعاين العدوان
تدخل حرمكم ديوان يهل المراجل زحمه
وين اليودي المرسال لرض المدينه بهمه
————————-
بنات حسين اخوي العذبن حالي
يضربوهن وانا راس الاخو اگبالي
گتله حسين خويه اعتذر يالغالي
عليهن خويه والله انمرد دلالي
بالسوط اذا ضربوهن عالرمح ينزل دمه
وين اليودي المرسال لرض المدينه بهمه
—————————
يفرسان الملاعب هاي ساعتكم
سلبوها الحراير وين غيرتكم
نخيناكم نريد اليوم فزعتكم
ذبوها العگل واعتنوا بهمتكم
واحدكم يشيل الراس لمن يذكرون اسمه
وين اليودي المرسال لرض المدينه بهمه
—————————
الشاعر عبد العظيم احمد الابراهيمي

حوار بين الامام زين العابدين ع وابي حمزة الثمالي

لا تناشدني اعله دمعة عيني
انا برض الطف دفنت سنيني
——————
يابو حمزة الصار ما يكفي صبر
وكسر يوم الطف ابد ما ينجبر
من تروح احبابك شيسوه العمر
راحو وذكراهم تبجيني
————————-
آه .. والآه الجبيره اعله النهر
عالشريعه انخسف من هاشم گمر
مثل ابوي لعمي احس ظهري انكسر
بداله ريت تكطعن جفيني
——————-
يابو حمزه انهدم حيلي اعله الشباب
من بدر جاسم والاكبر عني غاب
شلون طاوعني الگلب هلت التراب
ريت موتي بالعجل يلفيني
——————-
گبالي ابوي الخيل لمن داسته
اعوجية وبالسحك ما رحمته
وذر صاير جسمه حرت بدفته
لهسبب للموت يبقى ونيني
——————
القتل عادة النا وبده من النبي
لچن مو عادة لحرايرنا السبي
بيا وكت حادي الفواطم أجنبي
للسبي يا مدمع يكفيني
________
حگي لو امزج الزاد بدمعتي
گبالي اشوف السوط يضرب عمتي
شلون ينشف دمعي واكطع ونتي
وسبي زينب كل وكت يسبيني
_________
يابو حمزة الشام جرحه بمهجتي
ثوبي احمر صار من دم رگبتي
بالخرايب للفواطم لوعتي
الشام كل ذكره بسهم ترميني
—————-
الشاعر عبد العظيم احمد الابراهيمي

نزال ميمر للمشاية


هنا يالخدم شدو الهمم
بدرب المشي نصبو الخيم

زوار اجت مثل السيل رايه تدافع رايه
_________
رايات اجت متعنيه من البصره
لگبر الحبيب تواسي اخته الحره
شدو العزم خلي نفرح الزهره

شانك ترفعه الزهراء يالتخدم المشايه
____
وزعو السبيل حسينكم ظل عطشان
وصيحو اشرب والعن يزيد الشيطان
الحط ايده بيد حسين ابد مو خسران

ويضمن نجاة الدارين الخله الحسين الغايه
____
الگلكم اسراف الخدمه هاي وتبذير
گلوله كل هذا ونحس بالتقصير
يرجع ألف، دينار ك بدرب الخير

بهالخدمه ما تخسر دوم من عندي اخذها حجايه
__
هذا الدرب جنه ودرب للجنه
وحتى الاملاك لكربله تتعنه
واحنه بعزم راعي الوفه تحزمنه

بكل زمن لحسين انصار بدم النحر وفايه
___
كل غالي يرخص للحسين الغالي
وراس الخَدَم يبقى بخدمته عالي
بدونه نظل لا اول ولا تالي
مغرگنه بالخير حسين افضاله علينا هوايه
__
عهد الخدامه نجدده بدمانه
ما ننسه عهده وهو ما ينسانه
شنهي التعب وام الحسن ويانه

كل تعب من عدنا يروح لو شفنا ر فة رايه
_
خادم الحسين ع
الشاعر عبد العظيم احمد الابراهيمي

تجليبه للإمام علي بن موسى الرضا عليه السلام

لمصاب الرضا خل نجذب الحسره
ونواسي بمصابه فاطمه الزهره
________
لبو محمد يشيعه نرخص الدمعه
من بيت الوحي اليوم انطفت شمعه
بمصابه نواسي جدته البضعه

بس غربه خلص يا شيعته عمره
________________
ما شاف الرضا اهوال مثل حسين
ولا شاف الگمر يوگع بلا جفين
صاح بطيحته مثلك اجيب منين

وگلبي اعليك ابد ما ينجبر كسره
________________
ماتت اخته يوم السمعت مصابه
وزينب يا اخو الي تحمل غيابه
مذبوح الحسين وسلبو ثيابه

ظل فوگ الثره وتعاينه الحره
_______________
ثلث تيام ظل وسلبو عياله
وزينب بس تون والدمعه هماله
اهو الفاگد اخو الدمعات تحلاله

وكل حسره على غيابه تشب جمره
________________
من عگب الخدر مسبيه اخت عباس
الما شافت بشر مشوها بين الناس
رغم كل الجره بس ما تطخ الراس

وجن حيدر علي حجايتها عن طبره
______________
تاريخ الكتابة (٢٠١٦)
خادم أهل البيت ع
الشاعر عبد العظيم احمد الابراهيمي

حوار بين الحسين (ع) وأخته العقيلة زينب (ع)

شغيرچ لتگلي يا ضي عيني
الشام حتى حروفه احس تاذيني
________________
خويه مهظومه اجيت من اليسر
مو يسر بي شفت بس ضيم وعسر
دخلونا السوگ يبن امي العصر
والشماته عيونهم ترميني
__________________
عالتراب نبات كل ليل السبي
يالغيور وصارت غطانه العبي
چن خوارج صرنه مو آل النبي
ولا قرابه ابين طه وبيني
_______________
كل مصاب يهون يم طاري القصر
طبت الديوان خويه ام الخدر
گبالي وبراسك شفت يضرب زجر
ياصبر يگدر يهود اونيني
_______________
خويه وبنيتك المردت جبدتي
تصيح اريدن والدي يا عمتي
ماتت اعله الراس وانا بحسرتي
ريت وياها الأجل يلفيني
_______________
ادري گلبك ينجرح لبنيِّتك
بموتها يحسين واست غربتك
خويه بالشام ادفنتها رويحتك
الحالها يا دمعه التكفيني
_______________
ياحسين وهذا كل الي جره
جيت محشومه ورجعت ميسره
نار الك ما تطفى بيه موجره
والدمع يبن امي ميطفيني
______________
خادم اهل البيت (ع)
الشاعر عبد العظيم أحمد الابراهيمي

نعي يوم الأربعين من صفر
عندما وصل الحادي الى مفترق طرق ، طريق يؤدي الى كربلاء وطريق الى المدينة ، جاء زين العابدين ع الى عمته زينب ع يسألها الى اين نذهب
نادت بلسان الحال:

مشتاگه لرض الغاضرية
عندي عتب لهل الحميه
واشجي الزمان شعمل بيه
للشام وداني سبيه
_____
وصلت الى قبر الحسين ع القت بنفسها من على ظهر الناقة :

يـ فياينا لو عز الفياي
ضامي عسن لا يهنه الي الماي
لا تون ونك يمرد جلاي
حيلي انهدم من فركتك هاي
___
صاحت يعگلي ونور عيناي
بنتك رقيه موش وياي
يحسين انه مشدوهت الراي
جيت اعتذرلك ها يرجواي
__
انه رايحه ونار بدليلي
يامن يوصلني لجفيلي
من الشام خويه باد حيلي
بالون كضه نهاري ويه ليلي
___
خادم اهل البيت عليهم السلام
الشاعر عبد العظيم الابراهيمي

تأريخ الكتابة (٢٠١٦)
على لحن قصيدة باسم الكربلائي (يالتراب دفنت احباب الي وظلت صورهم)


دهري بسهم فكدك يعبد الله رماني
بس الحزن يوليدي من بعدك لفاني
ظل دمعي يهل
جرحك مو سهل
_____________
ييمه يلب احشاي يازهرة حياتي
بغيابك أودع يالولد كل امنياتي
يمحبوب فقط وياك ترجع ذكرياتي
يغالي گبل موتك تمنيته مماتي
تمنيت وياك انگطع نحري يغالي
سهرانه من يوم الرحت كل الليالي
بزغرك تنجتل
جرحك مو سهل
________________
بالعيون انگطع نحرك يبعد عيوني شفتك
ولحسين انکسر گلبه عليك وهل دمعته
الك نار بوسط گلبي وجرح كلبي لجمته
اناديك وظن صوتي بيمه ماسمعته
صعبه اشوفك يالولد گدامي مذبوح
گلبي عله فراكك يظل يوليدي مجروح
عنك انسئل
جرحك مو سهل
______________
الكلب صاح ييمه بيا ذنب تنذبح عطشان
رحت ليش وعفت لمك يغالي بس الاحزان
من الفراگ بعيوني انطفت كل هاي الاكوان
رجع بيك الحسين الله الخيم بس هو خجلان
نادي اعله زينب يختي الطفل اخذي
مالي كلب يم الحزن مذبوح اصد لي
ذبحاه النذل
جرحك مو سهل
____________
بالدموع. يعبد الله اجيت وغسليتك
وحكك انغمه اعليه انه من شاهديتك
شسولف مگطوع النحر يبني لكيتك
السماوات بجت وي الارض لمن بجيتك
عيوني وحكك من رحت ما ضاگت النوم
ناري اعله فكدك ما طفت تسعر تضل دوم
ظل خالي النزل
جرحك مو سهل
__________
شيصبره يعبد الله الكلب من فاركتني
العمر راح بیمه خلاف عينك لوعتني
النوايب. اجني مرادف بيوم العفتني
الفكر تاه. ومصايب دهري بعدك عذبتني
احزان ومصايب يالولد عكبك ولتني
وايام سود بغيبتك يبني لفتني
اهات احتمل
جرحك مو سهل
__________________
لخادم اهل البيت ع الشاعر عبد العظيم احمد الابراهيمي

تأريخ الكتابة (٢٠١٧)
على لحن قصيدة باسم الكربلائي (محرم ياهله بشهر الدمع)

يبويه والله عذبني الهجر
________________
بويه من يوم المشيتو الحزن بكليبي سكن
وبهجركم يلغوالي ماشفت غير المحن
يا حبيب الزهره يمته ترجع الهذا الوطن
اصبر ومن كثر صبري حتى دلالي انسحن
اصابر وادري ما ينفع صبر
____________
الينتظر جيت حبيبه يحسب اليوم بشهر
وانا يابويه انتظركم لجن طول هالسفر
ماطبك جفني بسفركم غافي بعيوني السهر
گاعده عالباب اتاني وانتظر منكم خبر
اتاني والكلب يلهب جمر
__________
داري وحشه خلاف عينك يانبض دلالي
طفله يابويه وعليله وانت تدري بحالي
خنگه كل الدنيا بعدك والدمع يبرالي
ليل ونهار وغلاتك انت ساكن بالي
بغيابك بعد ماريد العمر
___________
شيبقى من عمره اليفارك مثلك بهذا الزمن
والله من يوم العفتني عيوني لجلك دم بجن
جروحي عالجمات بويه من عفتني اتعودن
بيه چم آه لهجركم وانتظر جيت الضعن
عليكم خايفه من اهل الغدر
____________
بويه اتذكر كعدتك بين اخوتي وكل هلي
خلافكم كلبي يبويه بالحزن ظل مبتلي
شلون ترضاها يبويه ابقه وحدي بلاولي
لدارك اترد يبو اليمه اقسم اعليك بعلي
على البال والله غيرك مايمر
_____________
لخادم اهل البيت .ع ./
الشاعر عبد العظيم احمد الابراهيمي

رابط قناتي على اليوتيوب 👇

https://youtube.com/@user-he6uo3oy3v?si=leNQRAo6U1BpQMhu

نعي بعد رجوع زينب ع للدار تخاطب الدار

يادار وين اهل المحنه
يرجعون لو نكطع الضنه
شالو احباب الكلب عنه
***
يادار شالو هلج عنج
وليالي الحزن هسه لفنج
خليني اون انا اعله ونج
**
يا ما كعدنه وسولفينه
ويا ما ترافكنه ومشينه
وسفه الليالي اغدرت بينه
عنه ارحلو واحنه شبدينه
**
عالزاد من نكعد سويه
ويلتم شملنه بكل مسيه
للمشو ماضن بعد جيه
فراك الاهل مثل المنيه
**
عگد بجفاك خويه ما حلتلي
احرمت دنياي بعدك ما حلتلي
الحياة خلاف عينك ما حلتلي
اريد وياك تاخذني المنيه

الشاعر عبد العظيم أحمد الابراهيمي

استشهاد الرسول الاعظم (ص)

يل شلت نعش المختار خل الزجية تحضره
اخر وداع الها اليوم خليها تشتم عطره
__________
عالنعش شبگت فاطمة المظلومة
وصاحت يبو ابراهيم انا المهظومة
وسفه الترب وجهك يغطي رسومه
وفوك امي جرحك گلبي زاد همومه
معقوله ما تحجي وياي انا يبويه الزهره
___________
لو رحت بعدك بويه من يفگدني
ولو ردت انوحك ياهو اليساعدني
جانت يبويه شوفتك تسعدني
هسه الهظم بعدك غده يهددني
نعشك يشيلونه اليوم وانا استعد للعصره
_________
يا بويه فت گلبي لهيب مصابك
مو فاطمة ؛ يتمت كل احبابك
گبل الممات وخانتك اصحابك
ونار الحقد باجر تشب ابابك
وباجر يجتف الكرار حبل الوصية وصبره
________
انگلبت عليك الامة يا هاديها
وبـ ذوي القربى ما جن موصيها
: ياذيني كلمن بضعتي ياذيها
الهم گلت تدري المحن تلفيها
تنفخ سموم واحقاد طفت سراج العتره
___________
يا والدي ومن البچي منعوني
ما اهل دمعي لفركتك رادوني
شينشف عيوني ينور عيوني
صاروا عصابه ومن فدك حرموني
لازم تعرف الاجيال هاي الحقيقة المره
__________
خادم اهل البيت ع
الشاعر عبد العظيم احمد الابراهيمي

لحن يلشلت نعش المختار

نزال عگيلي استنهاض للحجة المنتظر عج

عجل يا مهدينه بثارك
عجل يا مهدينه بثارك
____
عجل عجل يابن حيدر
خل سيفك يگطع راس الشر
وياك لحد گطع المنحر
شيل الراية وسل بتارك
عجل يا مهدينه بثارك
__________
سل بتارك گرّب يومه
وخل تفرح فاطم بعلومه
امك يالقائم مهظومه
اجبر خاطرها بفقارك
عجل يا مهدينه بثارك
________
امك بسمك كامت تندب
يوم ويوم لثارك تحسب
الها الحك لو رادت تعتب
انهض داسو عتبة دارك
عجل يا مهدينه بثارك
_________
ياثار الله وثار العتره
شبو نار اباب الزهره
وصار ازرك خدها من السطرة
من سيفك خل تجدح نارك
عجل يا مهدينه بثارك
______
گر عين اهلك يا قائمهم
تعرف اكثر شي يألمهم
من الشيخين الله يلعنهم
صيح الثار وكلنا انصارك
عجل يا مهدينه بثارك
______
يـلـجفك يعشگ صمامك
كـدامك نوگـع كـدامك
هد وحشد الفتوى حزامك
يلـ من حيدر خذت اصرارك
_________
خادم اهل البيت ع
الشاعر عبد العظيم احمد الابراهيمي

نعي
لسان حال اولاد الزهراء (ع) بعد فقدها :
يالـوالـدة يـم المحـنة
ياهو العگب فيّج يلمنه
بفگدج تره مظلم نزلنه
والعيش بعدج ما حلنه
_________________
يالوالدة يا شمعة الدار
نبچي عليج ازغار واكبار
بكل كتر من الدار تذكار
اعلينه الدهر من فرگتج جار
_________
نذكر دلال ارباچ بينه
وشكثر گلبج يبارينه
شنوفي منچ يالحنينه
عالفرگه ابد متعودينه
___________
بالدار الج وحشه ييمه
نشتاگلچ والشوگ لچمه
حگها عليج العين تعمه
شله بعيونه اليفگد امه
___________
من هلاي
لجيت الضيف بدموعي من هلاي
يهل دمعي ويفت گلبي من هلاي
يدار شضل بعد عندي من هلاي
مشو وديارهم وحشه وخليه
____
الشاعر عبد العظيم احمد الابراهيمي

نعي
عندما كان امير المؤمنين جالسا عند قبر الزهراء ع جاءته الزهراء في المنام تخبره ان زينب جلست وهي مرعوبه ذهب امير المؤمنين مسرعا الى الدار وجد زينب جالسه في وسط الدار قال لها بني زينب لم انت جالسه .... تجيبه :

بالحـال وديـني لكـبرها
مشتاكه وارد اشتم عطرها
كسر الضلع روحي كسرها
عالوالدة الما تم عمرها
________
خذني لعند امي اشتكيت
لكعدتها من تلمنه بالبيت
بغيابها لموتي تمنيت
وياها اندفن بالگبر ياريت
_______
شحال الطفل لو راحت امه
ياهو الذي يحبه ويشمه
ويا حضن لو راحت يضمه
شمعه وعكبها الدار ظلمه
______

نعي لسان حال السيدة الزهراء (ع) بعد هجوم القوم على دارها :


يبو ابراهيم داسوها ثنيتك
وما راعو حرمتك باهل بيتك
گبل لا تندفن نكرو وصيتك
يبويه تشوفني بهالحال ريتك
________
يبويه انكسر ضلعي ونزف دمي
وخذو مجتوف من داري ابن عمي
تمنيتك يبو ابراهيم يمي
وتسمع شكوتي وحزني وهمي
________
يبويه الگوم عگبك ما رعوني
بحقد للدار ذاك اليوم اجوني
احرگو بابي يبويه وشتموني
وجنيني سگط مني من اعصروني
________
اون بهداي بويه بهدوت الليل
اونين المنهظم يرادله حيل
اضم كسر الضلع عن حامي الادخيل
گبل دمعي اشوفن مدمعه يسيل
________
الشاعر عبد العظيم احمد الابراهيمي

نعي لسان حال السيدة زينب (ع) بعد فقد الزهراء (ع)
________

چانت شمعه وسط الدار …أمي الكلها حنيه
بسوالفها الترد الروح …نلتم چنه يوميه
أصعب شيء اذا غالي …يروح وما اله جيه
راحت مني اغلى الناس… وما ترجع بعد ليه
___
اذا امك بعدها وياك …خل گلبك على امك
اذا راحت بعد عنك …ياهو اليشرك بهمك
محنتها وگلبها اعليك …ويألمها الذي يألمك
من ترحل تحس وحدك… لون كل البشر يمك
____
واذا امك خذاها الموت … يعينك الله ويصبرك
تره من تروح ام البيت … يصير البيت الك گبرك
بغياب الوالدة الطيبه … ما ينفع بعد عمرك
ادعي الباري يرحمها … واجبر بالصبر كسرك
___
يناس الام اذا غابت … يغيب الفرح وياها
يعرف لوعتي الفاكد … وضايگ نار فرگاها
زاد بلا ملح صارت … الدار بدون ملگاها
شوفيها سنين العوز … لو دمعتها واربها

___

الشاعر عبد العظيم احمد الابراهيمي