قصیدة :هایم هایم
ـــــــــــــــــــــــــــــــــــــــــــ
هایم هایم..خل تسمع الناس
هایم هایم..بحسین وعـباس

شوگي تارس راسي
تــرجمــته انــفاسي
کـربـلائي احـساسي
هایم هایم..بحسین وعباس
ـــــــــــــــــــــــــــــــــــــــــــــــــــ
قـد فتــحنا لکَ یا گلبــي کتیـبه
بیها مکتوب المحب راید حبیبه
کلمـن ابهــالدنیا یتــناول نصیبه
وآنه أحب أثنین بأنفاسي الغریبه

حب الحسین سحرني وملک دلْالي
وجه لهلال أشوفه ابسمائي العالي
والگمر بـس گمرنه الیـشع وایلالي

هایم هایم..شفت الگمر زین
هایم هایم..بعـیون الحـسین

نظر شوگه اقـیاسي
تــرجمــته انــفاسي
کـربـلائي احـساسي
هایم هایم..بحسین وعباس
ـــــــــــــــــــــــــــــــــــــــــــــــــــ
یا جـمال اللّه الـرسـم بدر العـشیره
هذه ابوفاضل حبـیبي العـنده غیره
گلبي هایم والعشگ ماشي ابمسیره
الیــحـب اثــنیــن حسْـاده کــثیــره

یکفي عقلي ترسته ابجنون الـکافل
العنده عباس بخیت و ابد مایجامل
آنه عشــگي رفعني ابأسم ابوفاضل

هایم هایم ..رافعني لجنون
هایم هایم ..خـلهم یـموتون

هـالعـــشگ عـبْاسي
تــرجمــته انــفاسي
کـربـلائي احـساسي
هایم هایم..بحسین وعباس
ـــــــــــــــــــــــــــــــــــــــــــــــــــ
گلبي یطربني أبمواویله الثجیله
هالـفرح یـنرادله سهــره طـویله
یحله لو هلـیله صحــناله دخیله
احنه غیر احسین ماعدنا وسیله

یل تگــلّي دلیــلي أبعشــگمن هــایم
آنه اگــلک أحــبن شـخــص ما نــادم
یکفي لحسین اصـیرن موالي وخادم

هایم هایم ..ما بدل الراس
هایم هایم.. بحسین مولاي

هــالفــخر نبــراسي
تــرجمــته انــفاسي
کـربـلائي احـساسي
هایم هایم..بحسین وعباس
ـــــــــــــــــــــــــــــــــــــــــــــــــــ
ما یلوم احساسي ذاک الیدري بیه
آنه أحب عــباس لیــث الـغاضریه
موقــفه علّــمني مــوقــف للمــنیه
الأخــو بالضـــیج مایتــرک أخــیه

عفــیه بأم البنـین و نعــم بأولادها
الله بحسین کرمها ونطاها امرادها
کربــلائي و مواقــفها گلــبي رادها

هایم هایم ..گــد أم البــنین
هایم هایم..ابعباس وحسین

هالشرف نومــاسي
تــرجمــته انــفاسي
کـربـلائي احـساسي
هایم هایم..بحسین وعباس
ـــــــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...
شعبان1445

مقطوعه..للحسین بن علی ع
ــــــــــــــــــــــــــــــــــ
چذاب عشگ البشر...من یبتدي أمن العین
هوّه العـشگ بالگلب...یعرف طریقه أمنین

مرات تعشگ شخص..چـنّک تعرفه أسنین
تتـمـنه گلبــک یدگ...مـو دگـه ألـه دگتین

مــتـورط آنـه أبمــحب..رایــد ألـه گـلبـین
خاطـر یدگن سوه...بسم الـولف کل حین

ما یکـفي عنـدي گـلب..اتمنه کون آثـنین
بثنینهن کون أحب...بس الحبیـب حسین

ـــــــــــــــــــــــــــــــــــ
خادم الحسین ع
عبدالامیرالناصري...المحمره

قصیدة:شعبانیة
ـــــــــــــــــــــــــــــــــــ
حگها روحي اللیله لو تتغازل
ومن سیاج الدنیا خل تتعازل
اللیـله مو لیلة قـدر بس لٰاکن
الخـیر کله اللـیله ضل یتنازل
ـــــــــــــــــــــــــــــــــــــــ
عفیه یاروحي..اللیله طربي و غنّي موال العشگ ساعه
عفیه یاروحي..خلّي گلبي اللیله یحضن روحه بذراعه
عفیه یاروحي..اللیله بأسم أحسین صیحي سمعاً و طاعه
عفیه یاروحي..أحسین من السمه نازل ضاوي أبگاعه

أبمیلاد الضوه..هالعـالم روه
هاللـیله عزف..مـوال الهوه

اللیله مو عجبه الهون یشتاگن
یم الحــسین أنـحنن و أتـلاگن
اللیـله مو لیلة قـدر بس لٰاکن
الخـیر کله اللـیله ضل یتنازل
ـــــــــــــــــــــــــــــــــــــــ
یاگمر لیلي..اللیله توأم للگمر لاح أبسمه العالي
یاگمر لیلي..اللیله عند أم البنین النور متعالي
یاگمر لیلي..بین الف لیله و گمر عباس یحلالي
یاگمر لیلي..روحي حنّت للتریده و تعشگ الغالي

صوبین الدهر...شایع هالخبر
هــلیله أنــولد...تــوأم للگــمر

عفیه من أم البنین أشجابت
ولد لو جـابت گــمر وأنهابت
اللیـله مو لیلة قـدر بس لٰاکن
الخـیر کله اللـیله ضل یتنازل
ـــــــــــــــــــــــــــــــــــــــ
یاهله بیهم..عفیه بزلام الحسین و هیبة أولاده
یاهله بیهم..اللیله بالسجاد رفعت روسها الساده
یاهله بیهم..و لحدعش هذه الشهر هالنور یتماده
یاهله بیهم..صار الأکبر وأنحنت من شافته القاده

صح کلــمن علي...زوده معــتلي
فدوه أتروح إله..کل ناسي وهلي


موعجیبه البیه عرگ من حیدر
أزغـــیر والـــوادم تلـقبه الأکـبر
اللیـله مو لیلة قـدر بس لٰاکن
الخـیر کله اللـیله ضل یتنازل
ـــــــــــــــــــــــــــــــــــــــ
وینه محبوبي..دوّرت روحي و لگیته عایش أبروحي
وینه محبوبي..گلبي یوحي ابأسمه وأسمع گلبي من یوحي
وینه محبوبي..مو گمر و أگعد أتاني الگمر بسطوحي
وینه محبوبي..المهدي مني وآنه منه أبفرحتي و نوحي

أشهد بالزمـن..محبوبي وطن
عیني تنـتظر..نور أبن الحسن

عــجّل اللّه فــرجــه مـولانا
وسهل اللّه مخرجه أبدنیانا
اللیـله مو لیلة قـدر بس لٰاکن
الخـیر کله اللـیله ضل یتنازل
ـــــــــــــــــــــــــــــــــــــــ
کلمات خادم الحسین ع
عبدالامیرالناصري..المحمره
شعبان1446

‌مقطوعه للعباس علیه السلام

روح أختـفي یاگـمـر..خلّي السمه مختلي
وکتک خلص بالسمه..لا تصــعد و تبــتلي
هــلیـــله ام الگــــمر..جابت گمر من علی
نــور الگــمر بالأرض..حد الســمه معـتلي
کافي تگول الضــوه..من عندي و یرد الي
عبــاس هوه الضـوه..و رد الضــوه الاولي
حضن السمه بي گمر..راســم الي منــهلي
أم البنــیـن أنـجــبت ...آول گـمر من علي

خادم العباس ع عبدالامیرالناصري

هوسات في حق العباس علیه السلام


أحسین یم حیدر یراقب ناطر اللیله الخبر
حیدر امسولفله رایح ینولد عدنا الگمر
گعد ملهوف ویتاني یچسي عباس ابنهر

عباس الطف صار اللیله
ـــــــــــــــــــــــــــــــــــــــــــــ
من نظر لعیون أخیه أحسین صاح ابکل یقین
مرت ابوي أحزام جابت لایگ الضهر الحسین
راح یم إم البنین وگلها بس هالچلمتین

مو مال أحد هذه أحزامي
ــــــــــــــــــــــــــــــــــــــــــ
عبدالامیرالناصري

لـسـیدتـے ومـولاتے امــیـرة الــطـف (رقــیه بنت الــحــسین ع)
🌸🌸🌸🌸🌸🌸🌸🌸🌸
 اسمها من الزچیه.  بنت الحسین
رقیه الفاطمیه.       بنت الحسین

ابدماوصفوها      حبیب گلب ابوها
رقیه الفاطمیه. بنت الحسین
   🌸🌸🌸🌸🌸🌸🌸
نزلت بشاره من السمه های المسیه
تحمل هدیه من العرش لأبن الزچیه
الله خلق من طینته الحره الأبیه
هالطفله وحسین ابتشر صارت رقیه

جمال الله وخصاله.   بنت الحسین
اجت بنت الرساله.     بنت الحسین

ابدماوصفوها.      حبیبت گلب ابوها

رقیه الفاطمیه.  بنت الحسین
🌸🌸🌸🌸🌸🌸🌸🌸
نور الزچیه فاطمه بلعز تعبّد
هلیله من صارت رقیه رد تجسد
ینظر علیها ابن الزچیه وشوفه یمتد
شاهدها تشبه فاطمه بضعة محمد

إبسحرشوگه یضمها.  بنت الحسین
رقیه تشبه امها.      بنت الحسین

ابدماوصفوها.    حبیبت گلب ابوها

رقیه الفاطمیه بنت الحسین
🌸🌸🌸🌸🌸🌸🌸🌸
ربنه جعل هاذه الاسم من محتواها
کلمن اسمها فاطمه ربنه اصطفاها
فرحتها لحسین ابکبر دنیه وعطاها
ضوّت دیاجیر الظلم من شع ضواها

ضِوت بیهه الوسیعه.    بنت الحسین
مثل امها الودیعه.         بنت الحسین

ابدما وصفوها    حبیبت گلب ابوها

رقیه الفاطمیه بنت الحسین
🌸🌸🌸🌸🌸🌸🌸🌸🌸
واگف یهز بیده المهد والعین بلعین
تنظر ابوها وتبتسم واتنادی یحسین
هالطفله تصنع ملحمه في مر السنین
خدّام اله تنجعل کل السلاطین

وانه الخادم رقیه.    بنت الحسین
فضلها بین ادیه.      بنت الحسین

ابدماوصفوها.  حبیبت گلب ابوها

رقیه الفاطمیه بنت الحسین ع
🌸🌸🌸🌸🌸🌸🌸🌸🌸🌸

لخـادم رقیه عبـدالامیرالنـاصرے
@abdolamiralnaseri
#شعبان

قصیدة:ثلث احیود
ــــــــــــــــــــــــــــــــــــــــــــــ
أشخلّفت و أشجابت..یعباس
أمــک الـمــا خــابـت..یعباس
عــدل بسمک صابت..یعباس
وابــگمــرها انــهابت..یعباس

ألخلّفـتک بـت عـرب بدویه
الما عرفها ایگول هم علویه

عباس..کلشیتک هیبه
ـــــــــــــــــــــــــــــــــــــــــــ
المـجد بسـمک کـبْـر..یعباس
هلـه ابـزلـمة حیــدر..یعباس
الفرک خشم العسکر..یعباس
صــگر مــا یتـصــگّر..یعباس

تطــبگ السبــعه و تعـثّر خـیلها
الحومه من تدخلها تاخذ حیلها

عباس...لا ما تتلاگه
ــــــــــــــــــــــــــــــــــــــــــــ
******
یا جـمــال أعیـونک...یالأکـبر
حسنک و مضمونک..یالأکـبر
أبزغــرک ایـهـابونک..یالأکـبر
چن علي ایشوفونک..یالأکـبر

یا جمال اللّه أعله طارف عینک
شـهله عیـنک یاعـزیز أحسـینک

مهیوب..یا أبن الساده
ــــــــــــــــــــــــــــــــــــــــــــ
مـن کبـر أیثـارک..یالأکـبر
واعـرفت فقّـارک..یالأکـبر
أکـتـمل شنـیارک..یالأکـبر
درت محـد دارک..یالأکـبر

الیشـوفک ما یصدّگ عینه
هـذه أنـته لو عـلي رد لینه

کرار ..تشطر بالحومه
ــــــــــــــــــــــــــــــــــــــــــــ
******
یا بـدر شـع نـوره...یمهدي
من سمه المعموره..یمهدي
أنت للـحگ صوره..یمهدي
رایتـک منــشـوره..یمهدي

هله ابزودک یاعجید الساده
هله ابشـیْال العــلم لـجداده

ماطاح..چف العدناني
ــــــــــــــــــــــــــــــــــــــــ
یـا أمـــل دنـیــانـه..یمهدي
یاللّه شــیل الـوانه..یمهدي
خل تشـوف أعدانه..یمهدي
نمشي وأنت اویانه..یمهدي

یاللّه شـدها ابیمنـتک لعمامه
بیک خل نکـشخ یتـاج الهامه

حیاک..یاسیف الشیعه
ــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره
#شعبان1444

قصیدة:حبیب العمر
ـــــــــــــــــــــــــــــــــــــــــــــــ
یا أغلی .. من عمري ..وأسنین العمر
تستاهل .. لعیـونک .. مـولاي أنتـظر

یا سبب کلشیتي ... یا هـواي أبریتي
صحّتي و عافیتي..یامهدي/یامهدي
ـــــــــــــــــــــــــــــــــــــــــــــــ
أبتدي ابیا چلـمه من أحساسي
و العـشگ ویّـاک تـارس راسـي
یلّي تسوه الیسوه بین أنفـاسي
فدوه یرحولک هلي وکل ناسي

بالحـچي ما بالي ..لو گلت تحلالي
أنته وانته ابْالي..یامهدي

سولفتک...لعیوني... یا أجـمل حلم
بیک أحلم...لیـلیّـه...واگـعد مبتسم

أنته کل أُمنیتي ... یا هـواي أبریتي
صحّتي و عافیتي..یامهدي/یامهدي
ـــــــــــــــــــــــــــــــــــــــــــــــ
أشلون اگولن غایب أنته اعلیّه
و آنه أحسْک روحي و اکثر بیّه
یا هو عـاش ابـلایه روح و ریّه
أنتـه روحـي الـشـایلک بیــدیّه

آنه أحبّن روحي .. لنها بسمک توحي
یاملاذ اجـروحي..یا مهدي

آنه اعرف .. دلّـالي .. غیرک مایحب
خلْـیني ..کـل عمري.. یم بابک محب

ماأعوفک نیتي ... یا هـواي أبریتي
صحّتي و عافیتي..یامهدي/یامهدي
ـــــــــــــــــــــــــــــــــــــــــــــــ
آنه أحبّن حُب طموحه أثجیله
الیطــب ابراســي لا مـا شیـله
حبّـي بس اللّه ایعـرف تآویـله
حبّـي میفـهمونه قیـس و لیله

آنه أحبّـن واحـد ... مـا اریـدن زاید
ابگلبي أنته الگاعد..یا مهدي

ایفهمولي..من أحچي...بس أهل العشگ
لو أنتـه ... لو أشـلع ..گلبـي أمن العرگ

هالعشگ ماهیتي ... یا هـواي أبریتي
صحّتي و عافیتي..یامهدي/یامهدي
ـــــــــــــــــــــــــــــــــــــــــــــــ
الدنیا لو مـابیـها أنته أشبیها
غیـر أنته البیــها و أمـضوّیها
من جمالک قطره بس ناطیها
اشلـون لو کـلک تشـع اعلـیها

والله حاضر أحلف...کلشي منک یرجف
أشجابه یمّک یوسف..یامهدي

لو یوسف ..عشگنّـه..نسـوان البلد
عشْـاگک ..یالمهدي...شیعدهم بعد

من محبتک صیتي ... یا هـواي أبریتي
صحّتي و عافیتي..یامهدي/یامهدي
ـــــــــــــــــــــــــــــــــــــــــــــــ
ندعي مـعبـود السـمه ابأیثاره
أیرد علینه الغایب اعله أدیاره
هالبــشاره مـا مثــلها أبــشاره
المهدي بالدنیا نشـوف أنـواره

عجّل اللّه فرجک..سهل اللّه مخرجک
أوسع اللّه منهجک..یامهدي

تانینه ... ونادینه ..مـولاي العجـل
بعیوني.. الطافک ..رسمت کل أمل

أوّلـي و تالیـتي ... یا هـواي أبریتي
صحّتي و عافیتي..یامهدي/یامهدي
ـــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره
#شعبان

قصیدة:ابداع الخالق
ــــــــــــــــــــــــــــــــــــــــــــــــ
شعبان أجانه..خل نصلّي ونگول
نــوّر سمــانه..نــور آل الـرسـول
سبحانه مَن جاد...نور أربع أسیاد
نــوّر سمــانه..نــور آل الـرسـول
ـــــــــــــــــــــــــــــــــــــــــــــــــــــــــــــ
للحسین

سبحانه رب الخالق الدنیا بیده
شاءت قدرته من ضیاء الثنین
نور الزچیه ضافه نور الصمیده
من هل کواکب سوه نور الحسین

وجه الحسین أبهر ضیاء السمه
نصه العلي ونص الثاني الفاطمه

لاح نـوره والعـالم صـفن
لاح وجها وجه ام الحسن
لاح هیبتـه هـیبة عــلي بالزمن
---------------------------------------------------
للعباس


سبحانه رب المبدع ابکل صفاته
ببـداعه خالــق للگـمر یا قــرین
وجه ابوفاضل منّـه أکثر حلاته
شــع ابسـمانه گــمر أم البنیــن

غیّر مدار الکــون و کل أنظمه
یطلع گمر لو عباس اعله السمه

صار وجـها یـشبه للگـمر
صار حیدر ابجیته ابتشر
صار هذه ابوفاضل أحزام الظهر
---------------------------------------------------
للسجاد


سبحانه رب الیخلق ابکل أراده
من نوره صوّر علي ابن الحسین
خلّه مثاله اعله الارض للعباده
صاحب کراماته زین العابدین

کلمن علي بالفخر ضل معتلي
هذه علي ابن الحسین ابن علي

نور وجها مثل المرتضیٰ
نور ساطع ابکبر الفضا
نور للعرش من وجها سار و مضیٰ
---------------------------------------------------
للمهدي


سبحانه رب الجاعل الکلشي حجه
من نور أنجز وجه نور المبین
بالمهدي تمّم حجته و خلّه نهجه
صارت خلقته رحمه للمؤمنین

نص شهر شعبان أکتمل یا بدر
وجه ابوصالح غطه نور الفجر

وین مثــله ما صـایر بعــد
وین حبه احلیٰ امن الشهد
وین یا ابوصــالح ســیّدي المـدد
---------------------------------------------------
كلمات .الشاعر : عبدالأمیر الناصري
#شعبان

قصیدة:قمر العشیره
ـــــــــــــــــــــــــــــــــــــــــ
یا گـمر مـن الله..وعـودک ولي الله
ام البنـین أشخـلّفت..تحرسها عین الله

جابت گمر أمک الهیبه..مثلک فلا واحد ایجیبه
امک سمه وانته ضاویها

صاحت علي أنظر اولیدي..مثل الگمر شوفته عیدي
شافک گمر ضاوي بیدیها

گلها و کفو أنتي أم بیتي..جبتي ولد یمتلک صیتي

الغیره العلي و هوّه راعیها

راضع غیره مو شارب دُر
ـــــــــــــــــــــــــــــــــــــــــــــــــــــ
ما اشـک علویه.....أمـک الـبدویه
من الأسد جابت أسد..حلوه معانیه

چانت تهز مهدک أم شیله..وگلبک یفز من تلولیه
ما تغفه لا إله بحچایه

زینب تجي تنظر اعیونک..تقریٰ الحمد لا یحسدونک
من تبتسم تعرف الغایه

تنظر الک چن تحاچیها..ما تهده بس أله بیدیها
أتگمّطک أله بالرایه

أتلولیه بحسین حسین
ـــــــــــــــــــــــــــــــــــــــــ
یا بــدر یا ضاوي...هیچ انته غیراوي
أنته اعرفت من المهد..یا وادم أتخاوي

طبع الشهم من یحمدونه..کلها أتعرف شارة اعیونه
زلمه الکفو هیچي أفعاله

أنته الذي گد الحچایه..تفصال أجت بیدک الرایه
هذه العلم و أنته شیْاله

بالطف الک موقف أشکبره..حتی السمه ابزودک اتعبره
بیک الحسین والله هنیاله

کلک هیبه یا صگر الطف
ـــــــــــــــــــــــــــــــــــــــــــــ
یا شهـم أیـثارک...خطّیـته بصیارک
لیث انته واحیود الحرب..بچاها فقّارک

فارس وغی و درّبک فارس..وکت الحرب سیفک اینافس
حلوه الحرب أنته لو بیها

شلت النهر هوّه ما شالک ..بس أشّرت للخیم جالک
مو صعبه لک من تسویها

خل تفتخر بسمک الساده..عمهم کسر شوکة القاده
الخضره لک وانته راعیها

عم الساده بس انته وبس
ــــــــــــــــــــــــــــــــــــــــــــ
کلمات خادم الحسین ع
عبدالامیرالناصري
#شعبان

قصیدة:ضوّه سمائي
ـــــــــــــــــــــــــــــــــــــــــــــــــ
موسم عشگنه أجه..وابنوره گلبي لجه
شعبان أجه أبمنهجه..ضــــوّه ســمائي
....................................
یاحضرت عشگنه الغالي
هـلیــله اعتــله مــوّالـي
بـحسـین السـکـن دلّالي

شاء الله و خلق من نوره
محبوبي و نطاه هالصوره
بصیــاره و دلیـلي أیزوره

لگیت أنفاسي یمّه..سیّدي الغالي
أجیت اللیله أشمّه..سیّدي الغالي
وسط گلبي أضمّه..سیّدي الغالي

بحسین أحسّه یدگ..گلبي المشه بالعشگ
نور الله شفته صدگ..ضــــوّه ســمائي
............................................
بصـیار الگــمر شع لیلي
واعیونه غدت تضـویلي
یادنیا عنّه بس أحچیلي

الخوّه صارت اویه اصیاره
حي الله الـکافل و أیـثاره
هنـیاله الأخو زینـب جاره

کفـو الجـابت أبنها...هیْه بدویه
گمر ضاوي ابحضنها..هیْه بدویه
رضـعها الغـیره منها..هیّه بدویه

أم الي جابت گمر...تتباها بین البشر
ردتلي نور البصر..ضــــوّه ســمائي
............................................
یــا هیبــة علــي و أولاده
ساجدهم سیداعله الساده
بالسجاد هالعـشگ یتمـاده

فرض الحب عنّه یحچي الواقع
عـند الله صــار أمــام الــرابع
کل عمره ساجد أهـوه و راکع

أجه احسین و دناله...یوم میلاده
نـظر أبنه ابجمـاله...یوم میلاده
علیـنه أشـرق هلاله...یوم میلاده

عند الله أسمه علي...ابن الحسین الولي
هلـیله نـوره جلي..ضــــوّه ســمائي
............................................
ابن الطف وصل مولوده
واتباها الحسین ابزوده
حیدر ثاني یشبه عوده

بالأکــبر غـرامي یکــبر
کلـشیته یقــارن حیـدر
نفس الهیبه نفس المنظر

علي و الکل تشوفه...حیدر الثاني
مهابه ابکل چفوفه..حیدر الثاني
نفس اسمه و حروفه..حیدر الثاني

سبحانه رب الفلق...ثاني علي النه خلق
من نوره کلشي صدق..ضـــوّه ســمائي
............................................
ودّیــني صحت ودّیــني
یاروحي الحبیبي أخذیني
من نـوره أکحّـل عیــني

بالمهدي سمانه العالي
هـلیله یشـع و ایـلالي
حي الله العزیز الغالي

لهج گلبي و لساني...مهدي یامهدي
تضـل أنت أمــاني..مهدي یامهدي
أیا صاحب زماني..مهدي یامهدي

یالمهدي گلبي لهج...منک نرید الفرج
نورک ینور الحجج..ضــــوّه ســمائي
............................................
کلمات خادم الحسین ع
عبدالامیرالناصري...المحمره
#شعبان

قصیدة :شهر المسرّات
ـــــــــــــــــــــــــــــــــــــــــــ
شهر المسرّات هلاله بالسمه
*هلیوم هلیوم نهنّي فاطمه*
واجب نبارک علي حامي الحمه
*هلیوم هلیوم نهنّي فاطمه*

حي اللّه یا شعبان..بیک الفرح عنوان
مستبشـره الأکـوان..طه النبي فرحان

*خل نبارک حیدر بولاده*
ــــــــــــــــــــــــــــــــــــــــــــــــ
شع نور الحسین ابن عقد الوله
*هلیوم هلیوم نهنّي فاطمه*
شالتّـه أمه و قرتله البسمله
*هلیوم هلیوم نهنّي فاطمه*

حي اللّه نور حسین..مثل الگمر مرتین
مامثله صایر وین..شهله وچبیره العین

*یا محله العیـد ابمیلاده*
ــــــــــــــــــــــــــــــــــــــــــ
حي أم البنین و حي هذه الشهر
*هلیوم هلیوم نهنّي فاطمه*
من ابوحسنین علي جابت گمر
*هلیوم هلیوم نهنّي فاطمه*

اسم الولد عباس..صاحب وفه و نوماس
بالحله ما ینقاس..من زغره رفعة راس

*من زغره و سولف بالغیره*
ـــــــــــــــــــــــــــــــــــــــــ
یا فرحة حسین و مجـده المعتلي
*هلیوم هلیوم نهنّي فاطمه*
من علي السجاد و من لأکبر علي
*هلیوم هلیوم نهنّي فاطمه*

حي اللّه هالأولاد..بیهم شموخ أمجاد
یسلم علي السجاد..لأکبر ضیائه أزداد

*فرحان احسین ابأولاده*
ــــــــــــــــــــــــــــــــــــــــــــ
یا وردة احسین التشبه فاطمه
*هلیوم هلیوم نهنّي فاطمه*
سمّـاها لحسین رقیه العالمه
*هلیوم هلیوم نهنّي فاطمه*

حي اللّه هالأنـوار...من دوحة الأطهار
صارت رقیه وصار..بیها الشرف عتبار

*کحّلها احسین امن اعیونه*
ـــــــــــــــــــــــــــــــــــــــــــــ
لأبن الحسن نور بزغ نص الشهر
*هلیوم هلیوم نهنّي فاطمه*
چن عمّه عباس گمر یشبه گمر
*هلیوم هلیوم نهنّي فاطمه*

نص الشـهر یانور...بین السمه منشور
فرحانه کل الحور..والعسکري مسرور

*تستاهل یا شیخ الساده*
ــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره
#شعبان

قصیدة:محبوبي
ــــــــــــــــــــــــــــــــــــــ
یا اول حب الي ... بجنونه مبتلي
فدواته کل هلي ... محبوبي
ـــــــــــــــــــــــــــــــــــــــ
سولفت عـشگي اعله الأنـظار
وبالعشگ فضحتني العین
مـــا تشـوف اعیـوني النـاس
لن ترسـها حُـب الحسـین

گلبي یعرف..من خذاني..یم شخص مالک کیاني
ماهي صدفه..آنه اعرفه..محبوبي

ما فارگ عالمـي..محبوبي الفاطمي
لعیـونه أنـتمي... محبوبي
ـــــــــــــــــــــــــــــــــــــ
روحي حنّت والعـشگ نار
جازفـت مو مره مرتـین
کل عشــگ تالیـته خسران
بس تجاره حب الحسین

گلبي شاطر..یدري بیمن..بالعشگ واجب أهیمن
آنه أحبه..والله أحبه..محبوبي

کل خیري ابخدمته...أستعطي رحمته
ما فارگ خیمته...محبوبي
ــــــــــــــــــــــــــــــــــــــــــ
محبوبي..یا اول آیات العشگ
محبوبي..گلبي الوصاله بس یدگ
محبوبي..لو ما أشمّه أختنگ
یستاهل

ماعندي غیره .. خاطر اعوفه
یکفیني خیره ..یمي اشوفه
محبوبي الحسین..ضمني ابچفوفه

سألوني و جاوبت .. عن حبي ما تبت
ماعوفه لو متت... محبوبي
ـــــــــــــــــــــــــــــــــــــــــ
یا ملک عدنه امن المــلوک
الیــخدمــونه سـلاطین
الخیـــر مـو بــالدنـیا والله
الخیر کلّه اباب الحسین

الله یدري..من عشگته..گتله احبک انته وانته
یا نفس روحي..یا دوه اجروحي..محبوبي

من ساعة مولدي... بشواگه مهتدي
شکراً یاسیّدي...محبوبي

ـــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري....المحمره
#شعبان

قصیدة:عید العقیده
ـــــــــــــــــــــــــــــــــــــــــــ
نص الشهر..عید العقیده
بالمنـتظر..فرحه سعیده

عجّل یـرب الکون
یوم الفرج مرهون
نص الشهر..عید العقیده
ـــــــــــــــــــــــــــــــــــــــــــــــــــ
رب العــرش زاد أمـتداد أنواره
من مملکة ذاته و عظیم اسراره
هلــیله عنــده للــوجود أبـشاره
میـلاد صــاحب ثــارالله و ثاره

نتبع أثر..طلعه الرشیده
بالمنـتظر..فرحه سعیده

صاحب وفه و أیثار
ضنــوة علي الکــرار
نص الشهر..عید العقیده
ـــــــــــــــــــــــــــــــــــــــــــــــــــ
من جانب الطور و سمانه العالي
هلــیله نـور ابن الحســن متـلالي
قوس الگمر حاجب اعیون الغالي
نـزلت الرحمـه أکــراماً الهـالوالي

تاج الفخر..هلیله عیده
بالمنتظر..فرحه سعیده

موسی هتف بالطور
نـور انخـلق من نـور
نص الشهر..عید العقیده
ـــــــــــــــــــــــــــــــــــــــــــــــــــ
آنه أشهد المهدي ابفخر حبّیته
ومحبوبي الأول بالگلب سمّیته
والــیته مـن اول عـهـد والــیته
عایش و تاني و منتظرها جیته

یوم الـظفر..کلنه نریده
بالمنتظر..فرحه سعیده

یــرفــع لــواء الــدین
من صحن ابوالحسنین
نص الشهر..عید العقیده
ـــــــــــــــــــــــــــــــــــــــــــــــــــ
ناتـج حروف المهــدي اکبر غایه
یهدي الزمان و ربّه ناطي احچایه
یـاربّــي عجّـل طلــعتـه الوفّــایه
عنـده اعلـه راگ العـلگمي یا رایه

عمّه الگمر..ذاخرله أیده
بالمنتظر..فرحه سعیده

أیشد عزمه بالعباس
والــرایه ما تنــداس
نص الشهر..عید العقیده
ـــــــــــــــــــــــــــــــــــــــــــــــــــ
کلمات خادم الحسین ع
عبدالأمیرالناصري..المحمره1442

🎥 " صياد الطفوف "

🎙أداء الرادود: محمد علي الکعبي

✍🏻 للشاعر : عبدالأمير الناصري

🎼 الهندسة الصوتية: هيثم السعيداوي

🎬 المونتاج والتنفيذ: علي عبدالرسول الأسدي

🖥 الرعاية الإعلامية: الأهواز ميديا

📡البث الفضائي: قناة الأهواز الفضائية


🎦اليوتيوب :
https://youtu.be/LdyNzDyCAhE

🎦آپارات :
https://www.aparat.com/v/p2CTx

📸 الانستقرام:
https://www.instagram.com/p/BwZBLv2D6EA/?utm_source=ig_share_sheet&igshid=y4jo71tmss72


➖➖
@AhwzMedia2  ⬅ للإشتراك

صیّاد الطفوف
ــــــــــــــــــــــــــــــــــــــــــ***ـــــــــــــــــــــــــــــــــــــــــ

صـیّاد الـطـفوف....مولاي الأکبر
یلعب بالسیوف ....مولاي الأکبر
أبچفّیّة عبّاسه..گام وعصّب راسه
علي الأکبر علي الأکبر.. شال و طگ
علي الأکبر علي الأکبر.. ما دنّـــــــــــــــگ
ــــــــــــــــــــــــــــــــــــــــــــــــــــــــــــــــــــــــــــــــــــــــــ
صفنتله الرجال ....مولاي الأکبر
من شد عالقتال ....مولاي الأکبر
الیگابل سیفه..مایرد أبکیفه
علي الأکبر علي الأکبر.. طیر و حط
علي الأکبر علي الأکبر.. یــــــــتـــــلـــگّط
ــــــــــــــــــــــــــــــــــــــــــــــــــــــــــــــــــــــــــــــــ
سویٰ المستحیل ....مولاي الأکبر
یـتـلگـّط    ثـجـیل ....مولاي الأکبر
أشسوه بالخیاله..من نوت تدناله
علي الأکبر علي الأکبر.. ضل یلعب
علي الأکبر علي الأکبر.. بـالمـــــــلعب
ــــــــــــــــــــــــــــــــــــــــــــــــــــــــــــــــــــــــــــــــــ
بالملعب یحیر ....مولاي الأکبر
لا لا  ما  تصیر ....مولاي الأکبر
الیمّه گایل آنه..بیده گص السانه
علي الأکبر علي الأکبر.. گدها و هـد
علي الأکبر علي الأکبر.. داس  الحد
ــــــــــــــــــــــــــــــــــــــــــــــــــــــــــــــــــــــــــــــــــــــ
گدها و بي تلوگ ....مولاي الأکبر
ضل بیهم یسوگ ....مولاي الأکبر
ما تفر من أیده..من یقاتل صیده
علي الأکبر علي الأکبر.. خلّه الطف
علي الأکبر علي الأکبر.. تتـــخاطـف
ـــــــــــــــــــــــــــــــــــــــــــــــــــــــــــــــــــــــــــــــــــ
یا طف بي ینول ....مولاي الأکبر
تربـایت   فحـول ....مولاي الأکبر
ألبي شهامه وهیبه..من علي تدریبه
علي الأکبر علي الأکبر..کر هــم کر
علي الأکبر علي الأکبر.. چن حیدر
ــــــــــــــــــــــــــــــــــــــــــــــــــــــــــــــــــــــــــــــــــ
کلمات خادم الحسین ع
ابوعلی..عبدالامیرالناصري
https://www.tgoop.com/abdolamiralnaseri
#شعبان

قصیدة:مضیف الساده
ـــــــــــــــــــــــــــــــــــــــــــــ
هوّسـتله القــاده هلا هلا
من گرب میلاده هلا هلا
صار الأکبر والبشاره یم مضیف الساده
ــــــــــــــــــــــــــــــــــــــــــــــ
جت البشاره والعین عشگ تضویله
بیت الحـسین فرحته چبیره اللیله
حلـوه لمْـت عــمامه مـن اتحــیّیله
کلــها صـاحت أجــینه نـبارک لـیله

هاشـــم رفعــتله الـــرایه
صار أبن احســین الـغایه
عـــمّه اتقـــدّم بــالـــثایه
هــوّس عبــــاس ابــهایه

*ثلثـین الأکبـر عبـاسي*

هلهــلن عمْاته هلا هلا
قبّلن وجــناته هلا هلا
صار الأکبر والبشاره یم مضیف الساده
ــــــــــــــــــــــــــــــــــــــــــــــ
أذْنـتــله الـمــنایــر هـلــه ابأیثــاره
دویة أصیاح عـمامه عـلت یم داره
زلمة احسین یشابهمن أمن أصیاره
کلــها گالت یــشابه عــلي و فقّـاره

یشــبـه حیــدر کلــشیــته
اسمه و رسمه وشخصیته
مـن زغره و عالي أبصـیته
عــاگد عـالـمــلــعب نیــته

*من زغره وسیفه أبکاروکه*

بالمهـد وأیـتاني هلا هلا
صولت العدناني هلا هلا
صار الأکبر والبشاره یم مضیف الساده
ــــــــــــــــــــــــــــــــــــــــــــــ
مو عجیبه اللي أسمه علي متعالي
هـالأسـم جـاذبیــته تجـیب الغالي
هیــچ الأکـبر نـشوفه نجم وایلالي
بالمـیادین ابوحسین ینوش العالي

ماخـذ فـنّـه وتـدریــبه
من حیدر راعي الهیبه
یفـزع لو صــارت نیـبه
ایکض الطایر وایجیبه

*حي صگر الطف مایتلاگه*

لاگت ابراعیها هلا هلا
رایــه لمعـلّیها هلا هلا
صار الأکبر والبشاره یم مضیف الساده
ــــــــــــــــــــــــــــــــــــــــــــــ
زلمة الزین کلامه أنحچه بأفعاله
هذه الأکبر والطفوف سند تبراله
فنّه واحد من ایصول گدر یدناله
خله أبن غانم أعله الفـقار و شاله

صاح آنه الیشطر سیفي
بالملــعب أکــرم ضـیفي
أفــتر عالقــاده ابـکـیفي
طـگ أبطـگ أخذ حیفي

*لو هذه الطـف لو مـاریده*

عفـیه زلمة هاشم هلا هلا
شال بیده الصارم هلا هلا
صار الأکبر والبشاره یم مضیف الساده
ــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري المحمره

قصیدة:غیمة سوالف
ـــــــــــــــــــــــــــــــــــــــــــــ
یا غیمة سوالف یاصدر المضایف
یالمهدي دخیلک مثلک ماني شایف
ــــــــــــــــــــــــــــــــــــــــــــ
یل أمقدّر نصیبي..دوه اجروحي وطبیبي
اذا گولن حبیبي..وحگک ماأغالي

اشوف الدنیا انته..احبک خلها سکته
حضن گلبي سکنته..یبوصالح یغالي

اشوف اهلالک..نزل تفصالک
اذا ما احبک..شحب ابدالک

یاشمس الحقیقه یانـور الخلیقه
گلبي یعرف اشلون بالدنیا یوالف
ــــــــــــــــــــــــــــــــــــــــــــــ
الیناشد انته وینک..اگلّه اتبع یقینک
امامک هوّه عینک..یشوفک ماتشوفه

ابد ما انته غایب..بعد المن نعاتب
ذنوب الناس حاجب..حلم عیني تحوفه

الیرید ایشوفک..ویبوس اچفوفک
یطــهّـر ذاتــه..ویجیب احروفک

تعرف بالمشاعر تعلم بالضمایر
یاشارة بختنه واحساس العواطف
ـــــــــــــــــــــــــــــــــــــــــــــ
یمن حیل الله حیلک..وابوفاضل کفیلک
دخیل الله و دخیلک..ظهورک بس نریده

یمهدینه ابزمانک..عطش کلشي الحنانک
منایر جمکرانک..علینه مو بعیده

بعد چم دمعه...ونشوف الطلعه
نصلّي خلفک...صلاة الجمعه

یمته آخذ مرادي وایصیح المنادي
ابن الزهره یاناس شیخ اعله المضایف
ــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره
#شعبان

قصیدة:شبیة فاطمه
ــــــــــــــــــــــــــــــــــــ
تشبه فاطمه أمها العالمه
هـلیله رقیه نوّرت هاي السـمه

عباس أبتسم هز ألها العلم
هالطفله ترف بیدیها رایات الأمم

هـلا بالمـــیلاد
وفرحة الأعیاد
بالکــرم تــزداد
ســیدة لأسـیاد

هلا بنت الحسین هلا روح الحسین
بنت ابوها لقّـبوها ورد الیاسمین

هلا بنت الدلال والــعز والکــمال
وردة الله والها صله زین العابدین
ــــــــــــــــــــــــــــــــــــــ
اللهم صلّي علی حسین و طفلته
ــــــــــــــــــــــــــــــــــــــــ
من طاهر نسب من بیت وحسب
صارت ذهبٌ من ذهبٍ وأغلی ذهب

من بیت العله شان الها عله
صح طفله ولکن سیّده ابطف کربله

صح عمرها ازغیر
بس عطاها اچبیر
بیها حگه ایــحیر
عــالـم التـــقــدیر

هلا نفس الحسین هلا عین الحسین
هلا واکثر جدها حیدر سیدالعالمین

هلا بنت الکرام الهـا جاه و مقام
بنت ولینه الها جینه أنقدّم السلام
ــــــــــــــــــــــــــــــــــــــ
اللهم صلّي علی حسین و طفلته
ــــــــــــــــــــــــــــــــــــــــ
یا درة علي من الأزلــي
دره ابچف الحسین و ضیاها معتلي

کلها عاطفه تحچي بالوفه
نسخه أمن الزچیه فاطمه بالمعرفه

من نظرها أحسین
بیــها قــر العـــین
هالــجمال أمنیــن
الــها بالتــکــویـن

هلا عشگ الحسین هلا شوگ الحسین
طفله هایه چنها آیه من ذکر المبین

هلا بأغلی البنات زینة هالـحیات
هلا بیها وابولیها شمس الخافقین
ــــــــــــــــــــــــــــــــــــــ
اللهم صلّي علی حسین و طفلته
ــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره