عليلة أهل البيت ع
،،،،،،،،،،،،،،،،،،،،،،،
من تاخذ حسيني
ما يسون سنيني
وياك أخذ عيني
من تاخذ حسيني
،،،،،،،،،،،،،،،،،،،،،
كلشي اخذته ورحت بس الحزن عفته
ريتك اخذت العمر وحسين ماخذته
سكته علبابي وگفت والتكتل السكته
وي حسين راح الصبر بيش أنتظر جيته
بلحسين وبلا صبر
صعبه الليالي تمر
ترحون وآنه انتظر
من تاخذ حسيني
،،،،،،،،،،،،،،،،،،،،،،،
مشتاگه للمايجي والشوگ ياذيهه
والفرگه بس اليضل يعرف معانيهه
روحي سحنهه البعد والنسمه تلويهه
وعيني عله طول الدرب طشت بواچيهه
جفن الليالي غفه
والشال طبع الوفه
ما بيٌ اعيش الجفه
من تاخذ حسيني
،،،،،،،،،،،،،،،،،،،،،،،،،،،
تمنيت لمن رحت يالحادي بحبابي
تاخذ عيوني نذر لعيون غيابي خطوه أمشي ورجع وحس ميته على بابي
والي بگه من العمر ينگظي عله اعتابي
مابين آه ودمع
يطفن سنيني شمع
نيراني حدر الضلع
من تاخذ حسيني
،،،،،،،،،،،،،،،،،،،،،،
تدري يحادي الضعن لمن رحت بيهم
وعين العليله بگت تتفكر عليهم
والدار وحشه غدت تدري يحاديهم
حتى الليالي بچن من جبت طاريهم
والدار گامت تون
مثلي لهلهه تحن
ما ريد ليلي يجن
من تاخذ حسيني
،،،،،،،،،،،،،،،،،،،،،،
انطر الرايح يجي ووگف عله دروبه
مايسوه عمره اليضل من غير محبوبه
عن عينه يسري الفرح والبسمه محجوبه
اظلم صباحه يجي وثوب الحزن ثوبه
من رحت بيهم تره
دمع النواظر جره
يرجعلي اتنطره
من تاخذ حسيني
،،،،،،،،،،،،،،،،،،،،،،
خادم أهل البيت أبو إسحاق الفحام

( العليله ع )
،،،،،،،،،،،،،،،،،،،،،،،،،،،،
عالراح لو سألوني
ما عندي غير عيوني
،،،،،،،،،،،،،،،،،،،،،،،،
بلا آه وبلا ونات
بلا شوگ وبلا حسبات
بلا ظلمه وبلا دمعات
ياليلي
ياريتك تمر علروح
مابيك ونه ولانوح
ولابيك گلبي المجروح
يشكيلي
ولاعيش وي ضنوني
ما عندي غير عيوني
،،،،،،،،،،،،،،،،،،
يا ليل بسك يا ليل
ساعاتك تهدم الحيل
مشتاگه للراحو حيل
ودموعي
سون عله خدودي رسوم
اخذن من عيوني النوم
نيران گلبي المهموم
بضلوعي
راحو هلي وخلوني
ما عندي غير عيوني
،،،،،،،،،،،،،،،،،،،،،،،
شعندك يليلي وي العين
لحظاتك تمر سنين
بالعين مرسوم حسين
وطيوفه
للراح احن واشتاگ
ما تحمل الروح فراگ
حادي الضعن بيهم ساگ
وتشوفه
ومن گامو يودعوني
ما عندي غير عيوني
،،،،،،،،،،،،،،،،،،،
يسألوني وين الاحباب
وحتار ما عندي جواب
بس العيون عله الباب
نظراتهه
ياذوني من يسألون
چاهلچ يمته يرجعون
بعيوني مني يشوفون
دمعاتهه
احتار ويشوفوني
ما عندي غير عيوني
،،،،،،،،،،،،،،،،،،،،،،،
اصفن وحير بلا راي
وتصور الرايح جاي
والدار حنت وياي
جدرانهه
تنشدني عنهم چاوين
وفرشهه برموش العين
ملگاهه كون وي حسين
عنوانهه
من دمعتي يعرفوني
ما عندي غير عيوني
،،،،،،،،،،،،،،،،،،،،،،،
الشاعر ابو اسحاق الفحام

(العليله ع)
،،،،،،،،،،،،،،،،،،،
لا تطاول يليل فراگهم
تحرگ الروح لواظي اشواگهم
بهاي الضعون/ من يروحون
تحرگ الروح لواظي اشواگهم
،،،،،،،،،،،،،،،،،،
لا تطاول عالعليله الفارگوهه
بلكي وي طلعة شمس باچر يجوهه
بيك يل ليل شكثر حنت لبوهه
بوحشتك يا ليل خافنهم نسوهه
تدري يا ليل صعب فگد الغوالي
بدون الاحباب طويلات الليالي
وصبر شلون/ من يروحون
تحرگ الروح لواظي اشواگهم
،،،،،،،،،،،،،،،،،،،،،،
ساهرت بيك شكثر ليله عله ليله
والسهر ما يرحم دموع العليله
والتمنيته يجيني واشتكيله
عني راح وغيبته صارت طويله
عني يا ليل بعيده اخبارهم
وانه وياك وحيده بدارهم
شابحه اللون/ من يروحون
تحرگ الروح لواظي اشواگهم
،،،،،،،،،،،،،،،،،،
كون يا ليل بسفرهم مثلي تشتاگ
چاصرت كلك صبح بايام الفراگ
لو تكون لوحدك وبيك الوكت ضاگ
چا محيت من الزمن ساعات الاشواگ
ساهرت بيك وعد أيامي
وبظلامك تضيع احلامي
وما يرجعون/ من يروحون
تحرگ الروح لواظي اشواگهم
،،،،،،،،،،،،،،،،،،،،،،،،
ساعة وداع الاهل تصعب علي
ومن مشو صدگ تمنيت المنيه
ناشدتهم بويه منكم أتنه جيه
بويه لو هذا الوداع وهاي هي
انت يا ليل اجيت وما اجوني
راحو بعيد وأظن عندك نسوني
بنار الضنون/ من يروحون
تحرگ الروح لواظي اشواگهم
،،،،،،،،،،،،،،،،،،،،،،،،
روحي مشتاگه يليلي وتدري بيهه
تجفل شما ظلمتك تشتد عليهه
تكتب كتاب الحزن دمعة بچيهه
تنتظر عباس لوجاسم يجيهه
جمر الدموع يچوي خدودهه
ونار الاشواگ تذبل ورودهه
وتدمه العيون/ من يروحون
تحرگ الروح لواظي اشواگهم
،،،،،،،،،،،،،،،،،،،،،،،،
تدري من گالو رجع ضعن الهواشم
فاطميه وجيت اتلگه الفواطم
شكثر مشتاگه لهلي بس الله عالم
حسين كون من السفر يرجعلي سالم
بالمسافات اطش عيوني
وشهگ انفاس هلي الخلوني
واظلم الكون/ من يروحون
تحرگ الروح لواظي اشواگهم
،،،،،،،،،،،،،،،،،،،،،،،
الشاعر ابو اسحاق الفحام

( لسان حال العليله ع )
،،،،،،،،،،،،،،،،،،،،
عالماينامك يا ليل يطول ظلامك
والفاگد احبابه شلون يگدر ينامك
*****
ياليل جمرات البعد تچويني
لحظاتك بدون الأهل تاذيني
خليني ياليل البعد خليني
اترك جفنهه وخلي تغمض عيني
چنك تسولف عالراح واسمع كلامك
والفاگد احبابه شلون يگدر ينامك
،،،،،،،،،،،،،،،،،
يا ليلي ساعاتك تهد بحيلي
كلما اغمض عالبعد تحچيلي
ريتك تروح وما ترد ياليلي
كلما تجي طي الجفن يشكيلي
ياريت عندك جفنين يشكن هيامك
والفاگد احبابه شلون يگدر ينامك
،،،،،،،،،،،،،،،،،،،
طبع المفارگ صعبه تغمض عينه
والبسمه تجفي وما تمر بسنينه
خاف المشو عنه بغرب ناسينه
ويّ الليالي الموحشه مخلينه
تطلع شمس باچركون وحضر ختامك
والفاگد احبابه شلون يگدر ينامك
،،،،،،،،،،،،،،،،،،،،
ما نامك واسهر وتاني احبابي
بلكن يرد ضعن المشه بغيابي
كلما تمر نسمه وتحرك بابي
يفزع دليلي وانسه حتى عتابي
ماعاتب احباب الروح واغفه وانامك
والفاگداحبابه شلون يگدر ينامك
،،،،،،،،،،،،،،،،،،،،
طولن يا ليل الهجر لحظاتك
حلم المفارگ ينتهي بفزاتك
ميته عسني ولايجن ساعاتك
وذكر هلي من راحو بظلماتك
ياليلي كلش بالروح كثرن سهامك
والفاگد احبابه شلون يگدر ينامك
،،،،،،،،،،،،،،،،،،
الشاعر ابو اسحاق الفحام

بين فاطمه العليله وام البنين ع
،،،،،،،،،،،،،،،،،،
اندعي وبم البنين تصير دعواي
آنه أقره الفاتحه وتقراهه وياي
لم البنين/ يرجع حسين
،،،،،،،،،،،،،،
وگفت عله الباب والمدمع تسيله
تدعي كون الفرگه ما تغدي طويله
بويه والله تحيرت ياهي العليله
ثنينه بلا حيل والفرگه ثجيله
من تريد تشوفك تصد عله عيني
عيني شالت صورتك لمن تجيني
لصبر الاثنين/ يرجع حسين
،،،،،،،،،،،،،،،،
سولَفت عالاربعه وما جاوبتني
كتبت حسين بدمعهه وحيرتني
تحسرت أم البنين وخبرتني
تگلي مية اربعه لو فارگتني
لا يهمني ولا يجون اترجه منهم
لو يرد حسين سالم فدوه كلهم
فدوه السنين/ يرجع حسين
،،،،،،،،،،،،،،،،،،
بويه كل ضعن اليجي ويگبل علينه
ندعي الله يكون ضعنك يبو سكينه
آنه للعباس مشتاگه يجينه
وهي الك مشتاگه يا بويه وحزينه
حايره الافكار كلهه وبالهه احتار
يا وصف يگدر يوصف ذيچ الافكار
تصبر العين/ يرجع حسين
،،،،،،،،،،،،،،،،،،
بويه ننطر جيتك صبح ومسيه
تمسح عله عيوني وتصبرني هي
من اگلهه الراح ما ظن منه جيه
توصل بشوغاتهه لحد المنيه
بينهه وبيني الصبر يتقسم اثنين
ناسيه العباس وتفكر بالحسين
اتنه لاوين / يرجع حسين
،،،،،،،،،،،،،،،،،،،،،،،
هي عدهه اربعه ومن ودعتهم
راية العباس شدتهه ببختهم
ودعتهم وبرباهه حلفتهم
ما يضوگ الماي واحد گبل اختهم
وصت العباس من تتملك الماي
موت ضامي عله النهر يا گرة رباي
انطي چفين / يرجع حسين
،،،،،،،،،،،،،،،،،
الشاعر ابو اسحاق الفحام

اذا صارو حصن خيبر عله الماي
اصيرن حيدر وفقاري وياي
وبچفين حيدر/ اقلع باب خيبر
،،،،،،،،،،،،،،،،
اذا مسچ ضمه يختي ونخيتيني
انه الكرار يم النهر تلگيني
خيبر ما تهمني ولا تجي بعيني
كل ذيچ الزلم فنهه تلاگيني
شني السبعين الف يا گرة العين
والسبعين كون وياهه سبعين
وتمنيت اكثر/ أقلع باب خيبر
،،،،،،،،،،،،،،،،،،،،
يزينب عالنهر خيبر اسويهه
واقلع جرف نهر العلگمي وبيهه
اجيب الماي للأطفال ورويهه
واخلي الناس كلهه تسولف عليهه
تصير بكربله للناس تذكار
وراوي جيوشهم طعنات فقار
تراني ارباة قسور/أقلع باب خيبر
،،،،،،،،،،،،،،،،،،،
إذا يم النهر جمعو عساكرهم
انفخ صور يا زينب واحشرهم
اجمعهم ورد بسيفي اطشرهم
آنه بن الصميده السيف يخبرهم
يزينب لا تهمچ كثرة الناس
شحده اليگرب وبالحومه عباس
صحت والسيف كبر/اقلع باب خيبر
،،،،،،،،،،،،،،،،،،،،،،،
رحت يم النهر والسيف بيميني وذكرت أمي عله زينب من توصيني جبت جودي وجبت چفي وجبت عيني
وياهن فدوه الچ يا زينب سنيني
النهر يم الخيم لازم يجي وياي
واذا سكنه يزينب رادت الماي
اصيرن موت أحمر/اقلع باب خيبر
،،،،،،،،،،،،،،،،،،،،،،،،،،،،
اريدچ لو لگيتي امي تخبريهه
عن المشرعه وعن الجره عليهه
اخبريهه برباهه اليوم اوافيهه
يم الزهره تنسر كون اخليهه
اجيب النهر يا زينب للخيام
ذليل ويعتذر من دمع الايتام الضمه عله شفاچ لو مر/اقلع باب خيبر
،،،،،،،،،،،،،،،،،،،،،،،،،
خادم ابوالفضل ع أبو إسحاق الفحام

درب السبي كلش بعيد عليچن
شلون الولي ويً العده مخليچن
خشنه الحبال تجَرح بايديچن
درب السبي كلش بعيد عليچن
،،،،،،،،،،،،،،،،،،،،،،،
مشية نبي ومشية وصي بممشاچن
حروف القدِر مسبيه تمشي وياچن
ملهوفه اجت للشام تتلگاچن
شلون الكفلچن بالسبي خلاچن
عباس يقبل بالشمر يسبيچن
درب السبي كلش بعيد عليچن
،،،،،،،،،،،،،،،،،،،،،
بضعنچ يتامه تحيريتي وياهه
بدرب السبي كلش صعب ممشاهه
يا زينب وياچ القدر سواهه
ام الخدر فوگ الهزل مشاهه
انتن سبايه والشمر يحديچن
درب السبي كلش بعيد عليچن
..................
انت الاميره البالخدر معروفه
خيالچ ستر والناس ابد متشوفه
هسا يسيره وطابه للكوفه
شلون الاميره ميسره ومچتوفه
عگب المهابه اهل الرده ميسريچن
درب السبي كلش بعيد عليچن
،،،،،،،،،،،،،،،،،،،،،
يا زينب شلون الدرب تمشينه
والكافلچ فوگ الثره تخلينه
طاحن يزينب عالنهر چفينه
وستحه يردلچ للخيم تدرينه
بس روحه ردت ضلت تباريچن
درب السبي كلش بعيد عليچن
،،،،،،،،،،،،،،،،،،،،،،،
الچانت امس بالخيمه ما شافوهه
تطلع شلون اليوم ويسلبوهه
عيلة محمد هاي ويعرفوهه
للشام صعبه عليهه لو ودوهه
جبريل ناشر جنحه ومغطيچن
درب السبي كلش بعيد عليچن
،،،،،،،،،،،،،،،،،،،
صعبه عله ابو السجاد من مريتي
گلبچ تعثر يمه وتلويتي
حيرچ دهرچ يخته وحتاريتي
بين الحسين وعيلته ضليتي
هيچ الدهر يا زينب افتر بيچن
درب السبي كلش بعيد عليچن
،،،،،،،،،،،،،،،،،،،،،،،،،
خادم أهل البيت أبو إسحاق الفحام

نشِد شامت نشَد عنهن وعني
خواتك واليسر عنهن وعني
الحبل بچفوفهن عنهن وعني /علني
وردنه چفوف ابن حامي الحميه
،،،،،،،،،،،،،
من وحده لوحده بحبل شدهه
من هاي المصايب بعد شدهه
يبوهه جروح زينب گوم شدهه
ملاهه جروح يوم الغاضريه
،،،،،،،،،،،،،
الدهر للضيم عگبك ولماني
مشت وياك روحي ولماني
يخويه اللي هضمني ولماني
عيون الناس من صدت عليً
،،،،،،،،،،،،،،
ضحك صوت الشماته وسَمعاني
شتم حيدر يخوتي واسمع اني
نخيتك يا بوفاضل واسمعاني
اجو بسياطهم ردو عليً
،،،،،،،،،،،،،،،،،
خادم أهل أبو إسحاق الفحام

يا ريتك لا هليت
تدري بحالي شسويت
يا شهر احزاني
هلالك عذبلي الروح
خليت بگلبي جروح
يا شهر احزاني
يا شهر احزاني
،،،،،،،،،،،،،،،،،،،،
شفتك والعين مدري شبيهه
رفت ورماد صار عليهه
چنك بهلالك راميهه
تحط بيهه جروح وتدميهه
العين تشوفك خيمات
برض الطف محترگات
يا شهر احزاني
ساعاتك ونه ونوح
خليت بگلبي جروح
يا شهر احزاني
،،،،،،،،،،،،،،،،،،،
يا شهر احزاني الماتبره
جرحك بالروح تدري شكبره
كل دمعه بعيني وكل نظره
تحمل احزان لبن الزهره
باچر تبدي الاحزان
عاشوراء العنوان
يا شهر احزاني
منك آهات تفوح
خليت بگلبي جروح
يا شهر احزاني
،،،،،،،،،،،،،،،،،،،،،،،،
شفتك يهلال خيمه وبيهه
ايتام ونار تچويهه
معذبهه اظماهه وماذيهه
منتظره الجود يرويهه
بهلالك شفت الجود
مرمي وشفت العامود
يا شهر احزاني
شفت الكافل مطروح
خليت بگلبي جروح
يا شهر احزاني
،،،،،،،،،،،،،،،،،،،
شفتك عباس وبلا رايه
وچفين الجود مرمايه
شفتك اطفال تنطر مايه
وشفاف حسين مدمايه
يا شهر احزاني الجاي
تخبرني بنار ضماي
يا شهر احزاني
والشام گبالي يلوح
خليت بگلبي جروح
يا شهر احزاني
،،،،،،،،،،،،،،،،،،،
من شفتك وجعني متوني
حسيت الگوم يضربوني
يوگع عباس ويسبوني
مايبرن دمعات عيوني
جاي وجايب لوعات
تتلگاك الدمعات
يا شهر احزاني
بيك ابچي عله المذبوح
خليت بگلبي جروح
يا شهر احزاني
،،،،،،،،،،،،،،،،،،،،،
خادم أهل البيت أبو إسحاق الفحام

لسان حال حميده يتيمة مسلم ع
،،،،،،،،،،،،،،،،،،،،،
مشتاگه يا عمي شكثر مشتاگه
يصعب علي فگد الابو وفراگه
ماينوصف شوگي اله
يرجعلي كون اتامله
يصعب علي فگد الابو وفراگه
،،،،،،،،،،،،،،،،،،،
مشتاگه يا عمي شكثر روحي وتريد تشوفه
لو ينطوي بيدي الدرب اطوي الدرب للكوفه
محتامه وشفافي تره اشتاگت لعطر چفوفه
يا عمي كل ليله التمر بي تمر طيوفه
بالطيف اجاني وبالهله تلگيته
بچفوفه ضمني وشمني وشتميته
تمنيت افز وستقبله
يرجعلي كون اتامله
يصعب علي فگد الابو وفراگه
،،،،،،،،،،،،،،،،،،،،،،
مشتاگه حيل لوالدي راح وبعد ماجاني
طول عليً بسفرته من سافر وخلاني
اذكر يعمي حچايته بوكت السفر وصاني
شفافه عله خدي بقت وعيونه يم اخواني
وانه انتظر يرجع واشوف عيونه
لكن اخاف من العده يغدرونه
بجاه الحمد والبسمله
يرجعلي كون اتامله
يصعب علي فگد الابو وفراگه
،،،،،،،،،،،،،،،،،،،. يا عمي سافر والدي وانه بقيت بحيره
وبلا ابو تدري تضل يا عمي وحشه الديره
انت ابو ونعم الابو وكلك محنه وغيره
لكن الوالد مو سهل لوترك طفله زغيره
بحضانه چنت اغفه واغمض عيوني
هسا گمت اغفه وتفز ضنوني
بالكوفه وانه لكربله
يرجعلي كون اتامله
يصعب علي فگد الابو وفراگه
،،،،،،،،،،،،،،،،،،،،،،،،
يا عمي هم عندك خبر عن والدي وعلومه
گالولي ضل لوحده ودارت عليه الحومه
العدوان خاف تولته لا اخوته ولا گومه
يمكن يعمي تيتمت حس الگلب بهمومه
يا عمي هم عندك خبر حاچيني
خجلانه منك تجري دمعة عيني
كل العمر فدوه إله
يرجعلي كون اتامله
يصعب علي فگد الابو وفراگه
،،،،،،،،،،،،،،،،،،،،،،
يا عمي تدري بوالدي مهما يطول غيابه
وشما تطول سفرته ماظنه ينسه احبابه
لاطارش المنه اجه ولا وصل خط كتابه
يا عمي يمكن والدي ما يرجع لغيابه
ماضنه يرجعلي وتشوفه عيوني
عيني بدمعهه وعايشه وي ضنوني
كل غايب يرد لهله
يرجعلي كون اتامله
يصعب علي فگد الابو وفراگه
،،،،،،،،،،،،،،،،،
خادم أهل البيت أبو إسحاق الفحام

يا حسين بمجلسك اتمنه اصير
خادمك والخادم العندك امير
سيدي وياك يربطني المصير
بعالم الذر روحي خدمت روحك
.....................
سيدي ببابك وگف گلبي حزين
حيل ماذيته يبو اليمه السنين
عمري ما يسوه بلا خدمة حسين
كون اتحمل وشيل جروحك
..................
من الزغر امي توصيني وتگول
لو تريد لمحنتك تلگي الحلول
صير خادم يبني لاولاد البتول
وسجل الخدمه بصحيفة لوحك
،،،،،،،،،،،،،،،،،،،،،،،،
يا حسين اقبلني خادم حتى اكون
بمجلسك اسگي الخدم لمن يجون
ينخلط ماي السگه وماي العيون
يالمتت عطشان عيني تنوحك
،،،،،،،،،،،،،،،،،،،،،،
رمح راسك هدم عروش الطغاة
وحبر دمك يمحي تاريخ البغاة
منك تعلمت يحسين الاُباة
مادنت عاشت بعالي صروحك
،،،،،،،،،،،،،
أبو إسحاق الفحام

رايتك تانتك تجيهه
ياحبيب لاتغيب عليهه
،،،،،،،،،،،،،،،،،،،،،،،
بيد ابو اليمه بقت رايه وذخرهه
يجري دمعه شما يصد ليهه ونضرهه
گال هاي الرايه الهه الينتظرهه
كل معاني العشگ مرسومه بصورهه
دمعته بوجنته يجريهه
ياحبيب لاتغيب عليهه
،،،،،،،،،،،،،،،،،،،،
ابن ظاهر وصل يم بن الزچيه
طلگ الدنيه وركب ظهر المنيه
بچه لمن سمع صوت الهاشميه
مَن اكون وزينب تسلم عليَّ
سمعته وصته بواليهه
ياحبيب لا تغيب عليهه
،،،،،،،،،،،،،،،،،،،،،،،،
أخذ من حسين رايه وهزهه بيده
صاح وين اهل المفاخر والعقيده
گالت الانصار آمر بالتريده
ياحبيب الجنه يمك مو بعيده
شافته رايته معليهه
ياحبيب لا تغيب عليهه
،،،،،،،،،،،،،،،،،،،،،
هتف شيخ انصارهه وحشم زلمهه
اجت ليه ليوث متحزمه بعزمهه
عابس وجون وبرير العشگ لمهه
الف موته تموت وابدا مايهمهه
بموتته جنته يدريهه
ياحبيب لا تغيب عليهه
،،،،،،،،،،،،،،،،،،
حسين گلهم رضا الباري من رضانه
وانتم اصحابي ورضيت عليكم انه
وي ظلام الليل هذا اللي اجانه
يرتحل كل واحد بصهوة امانه
غيرته نادته بالبيهه
ياحبيب لا تغيب عليهه
،،،،،،،،،،،،،،،،،،،
هزو الرايات رايه تنخه رايه
صاحو علينه يبو اليمه البدايه
عسل طعم الموت وشمحله المنايه
ثابتين عله العهد وعله الولايه
رادته بدعوته يجازيهه
ياحبيب لا تغيب عليهه
،،،،،،،،،،،،،،،،،،،،،،،،،
خادم أهل البيت أبو إسحاق الفحام

السلام عليك يا ابا الفضل
،،،،،،،،،،،،،،،،،،،،
نار خيامك تچوي ايتامك
يا عباس
يا بو الغيره طحت بحيره
يا عباس
تچويهه النار وتچويني
لتخليهه ولتخليني
يا عباس/يا عباس
،،،،،،،،،،،،،،،،،،،،
تشب نار الخيم واطفالك البيهه
لهيب النار يا عباس يچويهه
شما اگرب وريد النار اطفيهه
اشوف ايتام نار محاوطه عليهه
تگوم وتعثر/شفت الخدر
يا عباس
جمر ضماهه/ يگصي وياهه
يا عباس
ياذيهه ضماهه وياذيني
لتخليهه ولتخليني
يا عباس/ يا عباس
،،،،،،،،،،،،،،،،،،،،،
شفت طفله عله شاطي النهر تنشدني
تگلي اخذيني عمه العطش مضهدني
يعمه الگمر عمي بماي واعدني
اريد اوصل لعمي والعده تردني
شلون اقنعهه / وشيرجعهه
يا عباس
واليولوهه / ميرحموهه
يا عباس
بين عيالك طشت عيني
لتخليهه ولتخليني
يا عباس
،،،،،،،،،،،،،،،،،،،،،
اسولفلك يعباس شجره علينه
حرم ويتام بين الخيل ضلينه
يخويه من الخيم للبيده فرينه
الجمر وسياطهم يا خويه تچوينه
وصلت حدهه/ ياهو يردهه
يا عباس
ردتك يمهه/حتى تلمهه
يا عباس
بيهه حسين ادري موصيني
لتخليهه ولتخليني
يا عباس
،،،،،،،،،،،،،،،،،،،،،
الچانت يخوتي مهيوبه بحماكم
ما مسهه الهضم من چانت وياكم
الگاع تميل من تسمعهه تنخاكم
عجيبه شلون تصفه بولية اعداكم
يا كافلهه/ومدللهه
يا عباس
لتخليهه/لليسبيهه
يا عباس
تقبل يسبيهه ويسبيني
لتخليهه ولتخليني
يا عباس
،،،،،،،،،،،،،،،،،،،،،،
يعباس الهضمني وزيد احزاني
الشمر خويه تجره وبسمي سماني
وانه مخدرة عباس خويه آني
الشمس تترخصك تدخل لَصيواني
ويهضموني/ لو سموني
يا عباس
ردت چفوفك /عيني تشوفك
يا عباس
تحميهه تگوم وتحميني
لتخليهه ولتخليني
يا عباس
،،،،،،،،،،،،،،،،،،،،،،،،،،،
خادم أهل البيت أبو إسحاق الفحام

باچر لو طلع صبح السبايه
ما عندچ كفيل وبيده رايه
عندچ عيله وايتام
من ترحين للشام
ما عندچ كفيل وبيده رايه
،،،،،،،،،،،،،،،،،،،،،،،،،،
يزينب وي شمس باجر تروحين عالهزل سبيه
يزينب وينچ ووين الدواوين ووين الغاضريه
ولاچنچ اخت عباس و حسين بت حامي الحميه
انت رباة حيدر والصواوين ورباة الزچيه
اخت عباس سبع الگنطره انتِ
الفلك يخجل إذا شافچ طلعتي
شلون بين الازلام
من ترحين للشام
ما عندچ كفيل وبيده رايه
،،،،،،،،،،،،،،،،،،،،،،،،
الخدر يزعل يزينب من تطلعين خاف تشوفچ الناس
مثلچ ما تصح بين النساوين اخت كافلهه عباس
للديوان يردونچ تطبين هاي تعذب الاحساس
ما يرضه بطلعتچ وانت تدرين اخوچ الكله نوماس
راح وياچ راسه الكله غيره
هو الكافلچ وانت الاميره
دارت بيچ الايام
من ترحين للشام
ما عندچ كفيل وبيده رايه
،،،،،،،،،،،،،،،، يزينب رايحه ودرب السبي بعيد
والناگه هزيله
وانت من الهضم والضيم والصار
متعوبه ونحيله
بسبي ومدللات حسين وياچ
وجروحچ ثجيله
لارايه ولاكافل ولاخوان
ياهو التشتكيله
يزينب طبة الديوان صعبه
والديوان مملي عيون غربه
اشد كل هاي الآلام
من ترحين للشام
ما عندچ كفيل وبيده رايه
،،،،،،،،،،،،،،،،،،
من ترحين وتخلين عباس فوگ
النهر نايم
يوصيچ بخدرهن صاحب الباس
ويوصي عله الفواطم
يختي لو مشيتي بسچة الشام
ودرب مليان وادم
اريدن مشيتچ مشية اميرات
مشي بهيبة هواشم
مثل حيدر يبت حيدر اريدچ
وتصير الناس بالمجلس عبيدچ
وتهدمين الاصنام
من ترحين للشام
ما عندچ كفيل وبيده رايه
،،،،،،،،،،،،،،،،،،،،،،
شمس باچر يزينب تطلع عليچ
وتشوفچ زلمهم
ويدچ بيهه اثر جمر الصواوين
يلچمهه حبلهم
هلچ طشهم يزينب عنچ البين
وطشر شملهم
بعد ماظن شملهم يرجع وياچ
والدنيا تلمهم
يزينب ودعوچ وهاي هي
هذا وداع حد وكت المنيه
شوفتهم بالأحلام
من ترحين للشام
ما عندچ كفيل وبيده رايه
،،،،،،،،،،،،،،،،،،،،
خادم زينب ع أبو إسحاق الفحام

هي روحي ودفنتهه
بين التراب تركتهه
ورجعت وحدي واحس
اليوم ما يشبه امس
ـــــــــــــــــــــــــــــــــ
اليوم ما يشبه امس كلشي تغير
گلبي بين ضلوعه دامي وناره تسعر
چنه طيف البارحه وهسا تفسر
فزت العين وشفت گدامي منظر
بين التراب عمري شفته
ورجعت عنه وتركته
صُبح روحي بلا شمس
اليوم ما يشبه امس
هي روحي ودفنتهه
ـــــــــــــــــــــــــــــــــ
هي روحي والدفن روحه شيفيده
الچانت بداري و غدت عني بعيده
عاشت بروحي وصفت روحي وحيده
الباقي من عمري بعد لا ما اريده
هٍلت التراب وانظرلهه
وحاير بروحي شگلهه
روحي طير ومنحبس
اليوم ما يشبه امس
هي روحي ودفنتهه

ـــــــــــــــــــــــــــــــــــــ
الچانت بروحي مشت وآنه انتظرهه
روحي راحت وخذت وياهه صبرهه
شمعة البيت نطفت باول عمرهه
عمري ليل وينتظر طلعة فجرهه
طول الليل عاليتامه
موحش عليهم ظلامه
ظلمه وتعِل النفِس
اليوم ما يشبه امس
هي روحي ودفنتهه
ـــــــــــــــــــــــــــــــ
تراب گبرچ فاطمه حيل ارده اشمه
والتطش سنينه نجمات شيلمه امشي خطوه وارد خطوه وماكو همه
خاف ارد وحسين ينشدني عله أمه
وزينب تناشدني عنهه
تگلي مشتاگه لحضنه
وزينب بناري تحس
اليوم ما يشبه امس
هي روحي ودفنتهه
ــــــــــــــــــــــــــــــــــ
طبع المفارگ يتاني جية الاحباب
يرسم بعينه صور ويعاشر الباب
وآنه حتى الباب خله بمهجتي صواب
شلون اظل بالدار واهل الدار غياب
بيهه بسمار المصيبه
هشم ضلوع الحبيبه
ويهمس لروحي همس
اليوم ما يشبه امس
هي روحي ودفنتهه
ـــــــــــــــــــــــــــــــــ
خادم الزهراء ع ابو اسحاق الفحام

طبع العيون تنشد عله احبابهه
ياعلي شلون من يطول غيابهه
عله ام الحسين
تنشدك العين
من يطول غيابهه
،،،،،،،،،،،،،،،،،،،
ياعلي عيونك تنشدك عن الاحباب
شلون تخبرهه عليهم همه غياب
خاف ياحيدر تروح وتنشد الباب
وتسمع البسمار يخبرهه علمصاب
تدمه العيون من ثجيل اخبارهه
فاطمه شلون ما ترد لدارهه
فاطمه وين
تنشدك العين
من يطول غيابهه
،،،،،،،،،،،،،،،،،،،،
الليله دار أم الحسن وحشه وخليه
ويمرد بدلالك فراگ الزچيه
ياعلي بلا فاطمه هاي المسيه
يعني روحك ياعلي اخذتهه المنيه
راحت الروح والجسد بجروحه
يبقه محتار ومنه راحت روحه
برحلة البين
تنشدك العين
من يطول غيابهه
،،،،،،،،،،،،،،،،،،،،،،،،
من يطول غيابهه وعينك تنشدك
من يعينك ياعلي من تبقه وحدك
دمعة المحتار تجريهه عله خدك
يا جرح لمن مشت منهو اليشدك
رحتي والعين يم حسن عفتيهه
نظرة الباب تبچي وتبچيهه
طول السنين
تنشدك العين
من يطول غيابهه
،،،،،،،،،،،،،،،،،،،،،،،،
حيره زينب ياعلي تنشدك عله امهه
ودمعتك بالعين ما تگدر تضمهه
تدري يوم الباب اذاهه وهضمهه
الليل يا حيدر اجه وزيد المهه
لم الحسين حسين مشتاگ وحسن
كل الجروح ياعلي وي الليل اجن
بشوگ الاثنين
تنشدك العين
من يطول غيابهه
،،،،،،،،،،،،،،،،،،،،،،،
الغايبه الروح عله بابه وينتظرهه
بدفعة الباب التوه وخلص صبرهه
ياعلي عندك علم لمن عصرهه
طاحت وبين عله الزهره كسرهه
سطرة العين بينت بجفونهه
تقبل شلون ياعلي يسطرونهه
دموع جفنين
تنشدك العين
من يطول غيابهه
،،،،،،،،،،،،،،،،،،،،،،،،،،
خادم الزهراء ابو اسحاق الفحام

روحي هاي بين اديه
مني تاخذهه المنيه
مايِطَّيبْ جروحي نوحي
شلون اشوف بعيني روحي
مني تاخذهه المنيه
ــــــــــــــــــــــــــــــــــــــ
بعيني اشوف الگبر ضمهه بالتراب
شلون اصبر عيني لو طال الغياب
لاعتب ينفع وداوي بالعتاب
راحت ودلالي احسه بناره ذاب
ناري تسعر ونظرلهه
وروحي محتار شاگلهه
وانظر حروف الوصيه
مني تاخذهه المنيه
ـــــــــــــــــــــــــــــــــــــــ
چان بعيوني نظر والليله راح
وين اروح وراحت اليمهه استراح
بلا شمس للعين ما يطلع صباح
راحت الشوفتهه بلسم للجراح
راحت الدلالي عدهه
وضلت جروحي شيشدهه
هي كل الدنيه هي
مني تاخذهه المنيه
ــــــــــــــــــــــــــــــــ
چانت يمس الجرح چفهه ويطيب
وياهه عايش چنت والليله غريب
والحبيب يموت بغياب الحبيب
وما يكفي الدمع ويطفي اللهيب
أذكر الزهره وضلعهه
يحرگ عيوني دمعهه
يصعب وداع الزچيه
مني تاخذهه المنيه
ــــــــــــــــــــــــــــ
ما يعيش الشجر وحده بلايه ماي
ذبل هرش الروح يالزهره تعاي
العمر گيض وروحي تحتاجچ فياي
الدار ظلمه خلاف عينچ يا ضواي
عگبچ البيت بظلامه
وحش حيل عله اليتامه
الچانت تضوي علَيَّ
مني تاخذهه المنيه
ـــــــــــــــــــــــــــــ
داري بم حسين چانت كلهه نور
جنه والاملاك تگصدهه وتزور
لچن طبع الدنيه مو ثابت يدور
الهجمت عله الدار دافعهه الغرور
النكرت الدار واهلهه
باچر المهدي يذلهه
راحت وما بيهه جيه
مني تاخذهه المنيه
ـــــــــــــــــــــــــــــــــ
خادم الزهراء( ع ) ابو اسحاق الفحام

ليش تاخرت ليش يا موتي انتظرتك عگب الزهره شيفيد عمري وانت ردتك
وحشه عليَّ السنين
بغياب أم الحسين
يا موت انتظرك
ـــــــــــــــــــــــــــــــــــ
يا موت انتظرك شايل جروح
شيفيد العمر من تاخذ الروح
لياليه التمر بالونه والنوح
بلكي بجيتك تاخذهه وتروح
تاخذ روحي وياك يم الفارگتني
وي نسمات الغروب اتمناهه اجتني
صورة موتي بالعين
بغياب أم الحسين
يا موت انتظرك
ـــــــــــــــــــــــــــــــــــ
تروح أم الحسن ما حسبتهه
تراك ستعجلت مني وخذتهه
حِنيت ضلوعي لمن غسلتهه
مكسورة ضلع تدري شفتهه
يا موت وي العزاز يا ريتك خذتني
تمنيتك للايام ما رحت وعفتني
تاخذ عمري يالبين
بغياب أم الحسين
يا موت انتظرك
ـــــــــــــــــــــــــــــــــ
يموت وداعهم يصعب علي
اخذني وياهم بهاي المسيه
خلاف أم الحسن رحمه المنيه
ما يسوه العمر عگب الزچيه
الدنيا بدون الاحباب حيل تصير مره
تدري الفاگد عزاز حيل يهون عمره
يا روحي شتظنين
بغياب أم الحسين
يا موت انتظرك
ــــــــــــــــــــــــــــ
انتظرتك والصبر راح وي الاحباب
من ساعة السطره وعصرة الباب
وحدي بداري واهل الدار غياب
يموت ارحم عليَّ أنت من المصاب
صواب الزهره ميهون أنت اهون عليَّ
طبع الفاگد عزاز يتمنه المنيه
يموتي تاخرت وين
بغياب أم الحسين
يا موت انتظرك
ــــــــــــــــــــــــــــــــــ
شكثر مرن عليْ صعبات الأيام
شكثر ساهرت ليلي بهمي ما نام
شكثر حس الگلب بهموم والآم
تغمض عيني وتفززهه الاحلام
احلم لنهه بالدار تنشدني عله حالي
وشكي لم الحسين من هم الليالي
يعيني لا تنامين
بغياب أم الحسين
يا موت انتظرك
ـــــــــــــــــــــــــــــــــــــ
خادم الزهراء ابو اسحاق الفحام

عفتينه ييمه زغار
عگبچ حيل وحشه الدار
ليش بساع عفتينه
أم البيت من تروح
يبقه البيت مابي روح
ميته ايامه وسنينه
ــــــــــــــــــــــــــــــــ
يمه الدار كلش وحش منظرهه
يالچنتي ضواهه اللي ينورهه
حنينه لجيتچ روحي شيصبرهه
بسجادة صلاتچ صوره انظرهه
الچ صوره عله باب الدار
ضلع ومهشمه بسمار
ليل واظلم اعلينه
أم البيت من تروح
يبقه البيت مابي روح
ميته ايامه وسنينه
ـــــــــــــــــــــــــــــ
الحسن وحسين يم محرابچ يونون
عله ترتيلة دعائچ چانو يأمنون
ياشجرة محنه بفيچ يگعدون
هسه بياحضن يافاطمه ينامون
من يگبل الليل احتار
من جروحي شرده اختار
كلهن يوجرن بينه
أم البيت من تروح
يبقه البيت مابي روح
ميته ايامه وسنينه
ـــــــــــــــــــــــــــــــ
ياجرح الليالي المااظنه يطيب
عله ضفة عمرنه تحوم ابد متغيب
طبعك تاخذ عزاز وابد متجيب
رتبت الهموم عله الگلب ترتيب
اول جرح منك صار
صواب أم الحسن تذكار
كل لحظه يبچينه
أم البيت من تروح
يبقه البيت مابي روح
ميته ايامه وسنينه
ــــــــــــــــــــــــــــــــ
ييمه اول جرح بضلوعي وسدته
ساهرت الليالي وگتله نام أنت
بچه حسينچ ييمه وگوه سكته
خافن يفز صار بچاي بالسكته
چلماتي ييمه گصار
ما ظنهن يطفن نار
تحرگنه وتچوينه
أم البيت من تروح
يبقه البيت مابي روح
ميته ايامه وسنينه
ـــــــــــــــــــــــــــــــــــ
ميته سنين عمري وروح ما بيهه
وزينب يالمشيتي ميته عفتيهه
اليجرحهه الدهر ياهو اليداويهه
ياريتچ الروح وياچ اخذتيهه
كون الروح الچ تندار
نجمعلچ تلث اعمار
ولمسه بچفچ انطينه
أم البيت من تروح
يبقه البيت مابي روح
ميته ايامه وسنينه
ــــــــــــــــــــــــــــــ
خادم الزهراء ابو اسحاق الفحام

أمنه ياكاسر ضلعهه ماتت وتدعي
عليك
مايفيدك عمل باچر لوندم گطعت
اديك
النبي شلون تكلمه
من تموت وفاطمه
ماتت وتدعي عليك
ــــــــــــــــــــــــــــــ.
يالجبت نار واجيت بباب حيدر
وجرتهه
تدري باب الجنه هاي باب فاطم
ونكرتهه
باب وحي الله الامين بيهه واگف
وحرگتهه
شگد حقد شايل عجيبه فاطمه
شلون سطرتهه
فاطمه جبريل يوگف خادم عله
اعتابهه
فاطمه الجنه بفناهه وانت تحرگ
بابهه
شعذرك لرب السمه
من تموت وفاطمه
ماتت وتدعي عليك
ــــــــــــــــــــــــــــــــ
فاطمه الجنه بوسعهه الهه تشتاگ
وتجيهه
فاطمه من ضربتهه العرش گام يون
عليهه
الأرض فوگ جناحه حطهه الوحي
ويعاين عليهه
يطبگ الگاع بسماهه لو دعت وتشيل
اديهه
يالبعت دينك بدنيه زايله أبداً ما
تدوم
باچر بساعة حشرهه شنهي عذرك
من تگوم
ونكرت حامي الحمه
من تموت وفاطمه
ماتت وتدعي عليك
ــــــــــــــــــــــــــ
باچر بلحظة حسابك من يسالونك
عليهه
بيا ذنب تكسر ضلعهه وهي الله
موصي بيهه
اللوح والقرآن يشهد والاحاديث و
وحچيهه
حيدره آيه القربه وفاطمه هي و
وبنيهه
تدري بالباب الدفعته هشم ضلوع
البتول
بنارك اليلهب حقدهه تحرگ بباب
الرسول
للرسول تخاصمه
من تموت وفاطمه
ماتت وتدعي عليك
ـــــــــــــــــــــــــــــــــــ
امنه ياكاسر ضلعهه حيل متغير
وضعهه
للصلاه لمن تگوم بايدهه تلزم
ضلعهه
تدعي دعوه وبيهه شهگه عله الحقود
اللي دفعهه
ماتت امنه وزعل بيهه عله الچف
اللي صفعهه
ماتت وماتت وياهه البسمه والحب
والحنان
واحنه هم ندعي عليك شما يألمنه
الزمان
ماتنول المرحمه
من تموت وفاطمه
ماتت وتدعي عليك
ــــــــــــــــــــــــــ
امنه چانت رحمة الله وباب جناته
الوسيعه
فاطمه بضعة محمد عد علي ظلت
وديعه
ليش من عدهه حرمتنه باول العمر
وربيعه
صارت بدار الهواشم من مصيبتهه
فجيعه
الدار ظلمه بلا ضواهه الراحت و
وياهه راح
وظلت بدار اليتامه الونه والهم و
الجراح
بحر جهنم والضمه
من تموت وفاطمه
ماتت وتدعي عليك
ــــــــــــــــــــــــــــــــــ
خادم الزهراء ابو اسحاق الفحام