( السلام عليك يا ابا الفضل العباس)
،،،،،،،،،،،،،،،،،،،،،،،
زعلت الحچي وزعلت الحروف
وصفتك گمر ماعندك چفوف
بچت عين النهر
عله چفين الگمر
وصفتك گمر ماعندك چفوف
،،،،،،،،،،،،،،،،،،
بديت اكتب قصيده واجمع حروفي
حرت لن القلم مايقبل چفوفي
بدت قصة احزاني وحيرتي وخوفي
كتبت عباس ونظرت بعجب شوفي
رجف اسم النهر من طاري عباس
ومن اذكر حروفه تموت حراس
كتَبِتْ موت الحَمَر
عله چفين الگمر
وصفتك گمر ماعندك چفوف
،،،،،،،،،،،،،،،،،،،،،
النهر شفته رجف ويعاتب جروفه
وگطراته غِدَن دمعات مذروفه
ودَنَگ عالكفيل وقبل چفوفه
وصار النهر جربة ماي بچتوفه
اخذ ماي النهر ولعيلته راح
ومن طاحن چفوفه على النهر طاح
انكتب امر القدر
عله چفين الگمر
وصفتك گمر ماعندك چفوف
،،،،،،،،،،،،،،،،،،،
عذراً ياقلم لاتكتب اشعارك
لاتحرگ دليلي بجمرك ونارك
حيرت القصيدة بجملة افكارك
صرت انت النهر والماي خطارك
شفت زمزم نبع من بين چفين
واجه بجود الوفه لايتام الحسين
شبعد عندك صور
عله چفين الگمر
وصفتك گمر ماعندك چفوف
،،،،،،،،،،،،،،،،،،،
تزعل ترضه خل تسمعني كل ناسي
انه دمي حسيني وعشگي عباسي
هَواي حسين صار ومالك احساسي
واذا ماشال حبه اتبره من راسي
مثل عباس كون تصير وفاي
تِرسَخْ بالعقيده وتثبت بهاي
وتقدم النحر
عله چفين الگمر
وصفتك گمر ماعندك چفوف
،،،،،،،،،،،،،،،،،،،،،
مَثَل صاير وفه العباس لحسينه
وانظه لخُوِتَه ايامه وسنينه
وشاهد عالوفه اصبح سهم عينه
وزينب من كفلهه انطاهه چفينه
انطه لخُوِتَه الچفين والعين
وكونچ مارضيتي يم البنين
انطاهن واعتذر
عله چفين الگمر
وصفتك گمر ماعندك چفوف
،،،،،،،،،،،،،،،،،،،
نظر عباس لخته وعاين عليهه
چن عنده وصيه يريد يُوصِيهه
بينه وبين زينب راد يحچيهه
يگلهه امي برجعتچ لون شفتيهه
اخبريهه الگمر يم النهر غاب
يخجل لو سمع من زينب عتاب
جبتلچ هالخبر
عله چفين الگمر
وصفتك گمر ماعندك چفوف
،،،،،،،،،،،،،،،،
خام العباس ابو اسحاق الفحام

هذا بتارك ورايتك هايه
گوم بالبتار وانشر الرايه
،،،،،،،،،،،،،،،،،،
گوم ياعباس گوم بالبتار
عيال اخوك حسين شوف بيهه شصار
تريد منك ماي شبحت الانظار
الجود هذا الجود من علي الكرار
وانه اجيت اليوم الك شچايه
،،،،،،،،،،،،،،،،
گوم بالبتار ورايتك والجود
انه اجيت انخاك وانت راعي الزود
تدري بضماهه مرد منهه چبود
شلون تضمه شلون والگمر موجود
نريد ياعباس العلگمي ومايه
،،،،،،،،،،،،،،
ترضه ياعباس تضل بضماهه
اجت ليك اطفال وسكنه وياهه
من الضمه البيهه صعب ممشاهه
وانت كافلهه وصاحب لواهه
الماي غايتهه وتعرف الغايه
،،،،،،،،،،،،،،،،
بكثر ماحست بالضمه البيهه
اجت تشكيلي من الجره عليهه
قصة اضماهه سكته تحچيهه
وانه اسمعهه العطش ماذيهه
خويه هاي صبرت هوايه
،،،،،،،،،،،،،،،،
شفت عبدالله شابح بعينه
يمي يالجيدوم جابته سكينه
تگلي ياعمه لعمنه ودينه
العطش يازينب حيل ماذينه
نريد عمنه يروح للمسنايه
،،،،،،،،،،،،،،،
للنهر ردتك تگصد بجودك
تدري هذا الجود ضخر من عودك
مأمنه هالاطفال خويه بوجودك
ادري كلك زود والوفه بزودك
ونعم منك وبيك الكفايه
،،،،،،،،،،،،،،
المشرعه عداكم خويه لزمتهه
تظن ياعباس عليك منعتهه
نموت بضمانه هاي غايتهه
گوم يالوفاي هاي ساعتهه
العلگمي اخذه وبيه دگ ثايه
،،،،،،،،،،،،،،
من سمع زينب صاحب النوماس
عرف طلبتهه وابتسم عباس
عله النهر گلهه كل هذيچ الناس
اليوم اخليهه راس يردم راس
واليلاگيني مشتبه رايه
،،،،،،،،،،،،،،،
تبسمت زينب وصدت بعينه
وتدري شاطي الماي يريد چفينه
للخدر والجود ناذر سنينه
ادري بيك تروح وماترد لينه
وبالخدر عگبك انه موصايه
،،،،،،،،،،،،،،،
مسح دمع اخته وگام يوصيهه
وصيتي هاذي گلهه اسمعيهه
امي بالاوطان لون شفتيهه
عالسهم والراس يختي خبريهه
والچفوف شلون غدت وفايه
،،،،،،،،،،،،،،،،
خادم العباس ابو اسحاق الفحام

(زينب تخاطب العباس ع)
،،،،،،،،،،،،،،،،،،،،،
زينب تحشم كفيل ضعونهه
وتجري دمعات العتب بعيونهه
،،،،،،،،،،،،،،،،،
تحشمك زينب يبن حامي الدخيل
هي بين اعداهه والمدمع يسيل
ياكفيل يصير عگبك يالكفيل
والكفاله وبسمك يعرفونهه
،،،،،،،،،،،،،،،،،
صدگ ياعباس تسمعني من اصيح
وانه بين اهل الرده انهض وطيح
خويه طاح حسين بالحومه ذبيح
والاخت عگب الاخو يولونهه
،،،،،،،،،،،،،،،،،،
خويه طاح حسين والعسكر اجو
بلايه عباس الخيم ضلن درو
لون حاضر ما علينه تجاسرو
والخيم ما گدرو يحرگونهه
،،،،،،،،،،،،،،،،،،،،،،
ركضت ياعباس بالحومه وطحت
وين كافل خدري يحضرني صحت
ردت اروحن لبو اليمه وما رحت
خاف ينشدني عله سكنه شلونهه
،،،،،،،،،،،،،،،،،،،،
خويه من حرگو خيمنه تحيرت
بين نار الخيمه والعسكر صرت
نار اشوفن بالخيام شما درت
وزلم ما ضل للخيم يطفونهه
،،،،،،،،،،،،،،،،،،
اعذرني ياخويه اطلعت من خيمتي
وانه تصعب يا بو فاضل طلعتي
فرت من النار بالبر عيلتي
وخاف بالخيل العده يسحگونهه
،،،،،،،،،،،،،،،،
وگفت عالتل خويه لحسين نظرت
صحت يحسين ويجيني اتنطرت
ايست منه واجيلك قررت
تلحگ اختك گبل لايسبونهه
،،،،،،،،،،،،،،،،،،،،
اسمع الفرسان تنظرلي وتگول
هاي بت المرتظى وبت البتول
راح اروحن للسبي خويه شتگول
ترضه زينب للسبي يودونهه
،،،،،،،،،،،،،،،،،،،،،
من عله التل نزلت ونويت ليك
لكن العدوان ما خلتني اجيك
خويه طگني الشمر وتمنيت اديك
البيهن اختك چانو يهابونهه
،،،،،،،،،،،،،،،،،
چنت بوجودك يسبع الگنطره
مدللة عباس سموني تره
هسه لني عله الهزيله ميسره
مدللتكم گامو يشتمونهه
،،،،،،،،،،،،،،،،،،،
خادم الحسين ابو اسحاق الفحام

(بحق ابو الفضل العباس عليه السلام )
،،،،،،،،،،،،،،،،،،،،،،،،
يعباس بطيحتك ظهري انطوه
يالعزيز الماخذ وياك الهوه
من طفت عينك طفه بعيني الضوه
شلون ارد بلا نظر لخيامي
....................
شلون ارد لزينب بلايه گمر
والگمر مطروح ضل عله النهر
الخوه طاحت وانكسر مني الظهر
وظلمه صارت يعباس ايامي
...................
ظلمة ياعباس صارت دنيتي
يابو فاضل يالعفتني بغربتي
يالعفتني وعفت عشرة خوتي
خلاف جودك من يروي ايتامي
،،،،،،،،،،،،،،،،،،،
ظلمة صارت دنيتي خلافك تره
ومن ضماي بنار چبدي موجره
شلون اشوفك مرمي خويه عله الثره
بطيحة الرايه تطيح اعلامي
،،،،،،،،،،،،،،،،،،،،،
ليك اجيت وشايل همومي واصيح
يابو فاضل عالنهر لمن تطيح
اعثر وانهض ورد انوب اطيح
گوه جابتني يخويه اجدامي
،،،،،،،،،،،،،،،،،،،،،،
انهض واعثر ورد انوب اگوم
وبسمك انده گوم ياعباس گوم
من يردهه بساعة التهجم الگوم
رحت عني انت وجميع ازلامي
،،،،،،،،،،،،،،،،،،،
رحت عني ووحدي خويه بقيت
وزحفت خيول العده يالمادريت
بسمك انده يابو فاضل مااجيت
يالتهد بالموزمه جدامي
،،،،،،،،،،،،،،،،
ياهو مثلك بالوفه وهذا النبل
دون جوده بيمنته يرد النبل
تملكت ماي النهر يابوالفضل
وانت لجل حسين ميت ضامي
،،،،،،،،،،،،،،،،،،
خادم ابو الفضل العباس (ع) ابو اسحاق الفحام

شفنه الوفه الماينقاس عالمشرعه
------
كل هذيج الناس تايه رايهه
تريد عن عباس تگطع مايهه
مادرت احمر الموت الجايهه
صاح بيهه وطشهه بن حمايهه
والناس تردم بالناس عالمشرعه
شفنه الوفه الماينقاس عالمشرعه
-------
گصد صوب العلكمي عباسهه
شحدهه تثبت عالنهر حراسهه
اگبل عليهه وتواصت ناسهه
فخر للتشرد وتحفظ راسهه
واليبقه يبقه بلا راس عالمشرعه
شفنه الوفه الماينقاس عالمشرعه
------
ابو فاضل بيهه حكم سيفه
ياخذ ارواح ويردهه بكيفه
اخذ من ذيج الكتايب حيفه
طيف موت وهي شافت طيفه
يرهبهه طاري العباس عالمشرعه
شفنه الوفه الماينقاس عالمشرعه
--------
فنون حيدر بالحرب راواهه
ترجف السبعين الف خلاهه
مبتسم وكت الوغه تلكاهه
لو بعد سبعين الف وياهه
بعلومه ياخذ نوماس عالمشرعه
شفنه الوفه الماينقاس عالمشرعه
--------
مبتسم عباس وسط جموعهه
وهي ماظل گلب بين ضلوعهه
الماتموت بسيفه تگظي بروعهه
ماتهمه شما كثر مجموعهه
بالسيف معلن والطاس عالمشرعه
شفنه الوفه الماينقاس عالمشرعه
-------
شافته ورجف الخوف ابطالهه
ترادمت رجالهه وخيالهه
بسيفه لم جرف الشريعه وشالهه
انه بن حيدر وجيتج كالهه
حدي جمر ماينداس عالمشرعه
شفنه الوفه الماينقاس عالمشرعه
--------
زمجر وعالمشرعه دگ ثايه
ارواح يخطف من يرف بالرايه
اخذ من عدهه الفرات ومايه
نفسه بالعز والوفه موصايه
بين رباهه ام عباس عالمشرعه
شفنه الوفه الماينقاس عالمشرعه
---------
گام يرعد بالحرب صنديدهه
خيبر بوادي الطفوف يعيدهه
التشرد بنظرات عينه يصيدهه
بيده امرالمشرعه وموبيدهه
وجفوفه تربه وتنباس عالمشرعه
شفنه الوفه الماينقاس عالمشرعه
---------
زينب بعين المباهه تشوفه
صگر ومطشر اسراب الكوفه
اخذ ماي العلگمي بچفوفه
صولته بيوم الحرب معروفه
للخوه اصبح مقياس عالمشرعه
شفنه الوفه الماينقاس عالمشرعه
---------
خادم العباس ابو اسحاق الفحام

راعي الوفه / بعهده وفه
يم النهر / يم النهر
٠٠٠٠٠٠٠٠٠٠٠٠٠٠٠٠
يانهر سولف لزينب عالعدد
ياهو الثبت عالمشرعة وياهو الشرد
ياهو بيهم صاح ويدور المدد
وياهوطش فرسانهه بسيفه وصمد
والمبتسم / ماينهزم
يم النهر / يم النهر
٠٠٠٠٠٠٠٠٠٠٠٠٠٠٠
كون زينب تنظر السبعين الف
شلون صارت سعفة وبريح تخذف
الميمنه من الميسره ماتنعرف
وابد ماينعاب واليشرد كلف
وراعي اللوه / بيده الهوه
يم النهر/ يم النهر
٠٠٠٠٠٠٠٠٠٠٠٠٠٠٠
من علي الكرار جايب هالعزم
بسيفه كام يلم زلم ويطش زلم
هي حارت وبوفاضل مبتسم
كام من خوفه يموت الينهزم
والما شرد / راسه انحصد
يم النهر/ يم النهر
٠٠٠٠٠٠٠٠٠٠٠٠٠٠٠٠
هو يتذكر وصية ام البنين
صار بعيونه الربه وتعب السنين
هنا يزينب للنهر لمن تجين
للسهم يازينب انه انطيته عين
كتله انتظر / أم الخدر
يم النهر/ يم النهر
٠٠٠٠٠٠٠٠٠٠٠٠٠٠٠٠
يانهر خليت يمك رايتي
بيهه مكتوب الوفه بدم هامتي
هامتي وجفيني فدوه لخوتي
تدري شنهي اللي هظمني بطيحتي
بت فاطمة / يمسهه الضمه
يم النهر/ يم النهر
٠٠٠٠٠٠٠٠٠٠٠٠٠٠٠
خادم ابو الفضل( ع) ابو اسحاق الفحام

(لسان حال رملة أم القاسم)
،،،،،،،،،،،،،،،،،،،،،،،،،،،،،،،،،،،،،،
وين تريد،،،، يالماخذ دليلي ورايح بعيد
وين تريد،،،، يالروحتك حزني وجيتك عيد
جسام انت حلمي البين العيون
ياحسبة امس ومسهر الجفون
يالماخذ دليلي ورايح بعيد
،،،،،،،،،،،،،،،،،،
يالماخذ النسمه وياك عگبك تختنگ ريتي
ياتعب السنين عليك چانت خيمه حنيتي
كبرت والامنيات هواي لكن وحده امنيتي
حنه وزفه وافرح بيك ويطش الفرح بيتي
والمصباح ،،،، يطلع والورد منثور بالبيت
والمصباح ،،،، بعرس جاسم اشوفه شگد تمنيت
عريس الهواشم بيه يفرحون
ياحسبة امس ومسهر الجفون
وين تريد ،،،،،يالماخذ دليلي ورايح بعيد
،،،،،،،،،،،،،،،،،
ياشمعة ضواي وبيك عيني عله الدرب تمشي
ياشوفة هلال العيد اكحل بشوفتك رمشي
خطوات الولد نبضات گلب امه لون يمشي
چنت كلشي واخذت وياك يبني بروحتك كلشي
والخطوات،،،نبضات بگلب مايحمل افراگ
والخطوات،،،بيهن لهفتي وشوغات الاشواگ
واعيش ببين لهفاتي والظنون
ياحسبة امس ومسهر الجفون
وين تريد ،،،،يالماخذ دليلي ورايح بعيد
،،،،،،،،،،،،،،،،
يحلم سنين رايح وين روحي تريدك وياهه
اجتك جية الملهوف ياجاسم تلگاهه
بعذب صوتك يبعد الروح تريدك تحچي وياهه
امك والزمان عليك تجري دموع خلاهه
رايح وين،،،ماتگدر تعيش خلافك الروح
رايح وين،،،تموت امك اذا عن امك تروح
يانسمة هواي تعوفني شلون
ياحسبة امس ومسهر الجفون
وين تريد،،،يالماخذ دليلي ورايح بعيد
،،،،،،،،،،،،،،،،،،
بعرسك ردت اطش سنين عمري وانثر ايامي
فرح بس بالخيال يطوف عرسك طيف بحلامي
بدل فرحتي بزفتك زماني بلوعة آلامي
اجيت لكربله وشفتك ورد مذبوح گدامي
حلم سنين،،،فزيت ولگيته گبالي مذبوح
حلم سنين،،،راح وضل دليلي بونه وبنوح
جاسم مايرد اسمع يگولون
ياحسبة امس ومسهر الجفون
وين تريد يالماخذ دليلي ورايح بعيد
،،،،،،،،،،،،،،،،
يا أول فرح للروح عاشت روحي ساعاته
ضميتك برمش العين عن الهوه ونسماته
تكبر والفكر وياك تكبر يبني حسباته
ياحنه عله چف مذبوح مطفيات شمعاته
والوجنات،،، ذبلهن ضماهن يوم الطفوف
والوجنات،،، مدري من النحر مدري من الچفوف
بلون الحنه صارت حمرة اللون
ياحسبة امس ومسهر الجفون
وين تريد،،،يالماخذ دليلي ورايح بعيد
،،،،،،،،،،،،،
شحال الفاگده الشبان وانه خلافك شحالي
امك ضلت بلا روح لمن رحت يالغالي
ياسلوة دليلي عليك تايه منشده بالي
طيف بكل وكت وياي رسمك صار يبرالي
شلون انساك،،،يانبضة دليلي ببين الضلوع
شلون انساك،،،ياصورة بجفن ترسمهه الدموع
كلشي يهون بس الغالي ميهون
ياحسبة امس ومسهر الجفون
وين تريد ،،،يالماخذ دليلي ورايح بعيد
،،،،،،،،،،،،،،،
خادم الحسين ابو اسحاق الفحام

بالطف حيرهه الاكبر
هذا الاكبر لو حَيْدَر
مو يوم الطف سواهه
سواهه الاكبر خَيبَر
،،،،،،،،،،،،،،،،،،
بالطف الاكبر ذكرهه بيوم الكرار
خيبر يوم الطف سواهه وبيده الفقار
تثبت لو تشرد جدامه الوادم تحتار
ملك الموت بخزرة عينه يقبضهم صار
متبسم طب للحومه
ذكرهه بجده ويومه
تشرد ما تگدر خلاهه
سواهه الاكبر خَيبَر
،،،،،،،،،،،،،،،،،،،،
خيبر سواهه ومن حيدر راواهه علوم
يقلع باب الطف بيمينه وهو الجيدوم
گاع الطف ماجت بجدامه ويخسفهه اليوم
حجارة سجيل بحد سيفه ويرمي عله الگوم
سجيل انصب عليهه
اليوم الموت يراويهه
شردت والموت تلگاهه
سواهه الاكبر خَيبَر
،،،،،،،،،،،،،،،،،،،،،،
العسكر صاحت من طب ليهه هذا العباس
يتباهه اليشرد من سيفه وياخذ نوماس
حتارت من شافت ضرباته وكل ذاك الباس
يلم ناس بسيفه شگد رايد ويطشر ناس
بسيفه يلم ويطشرهه
بيوم الخندق ذكرهه
موقف من حيدر راواهه
سواهه الاكبر خَيبَر
،،،،،،،،،،،،،،،،،،
بين يمينه وبين يساره يلم الميدان
گاع الطف منبت سواهه لروس الفرسان
لاعاصم من طبرة سيفه اليوم الطوفان
خيبر ردت والفقار وداحي البيبان
خيبر يرسمهه بكيفه
صار الموت بحد سيفه
موتهه ورد احياهه
سواهه الاكبر خَيبَر
،،،،،،،،،،،،،،،،،،،
الشردت من سيفه تلگاهه بنظرات العين
يرجز بالحومه ويتفاخر انه بن حسين
الفارس گام يگل للفارس مهربنه منين
رد الكرار بصولاته وردت صفين
الشردت من موت يمينه
ماتت من خزرة عينه
جده الكرار ويتباهه
سواهه الاكبر خَيبَر
،،،،،،،،،،،،،،،،،،،،،
الماحاضر خيبر خل يحضر بالطف ويشوف
ويكتب تاريخ لاجياله ويسطر حروف
ثابت بالميدان الاكبر ومرجف الخوف
خله الفرسان بصولاته بس موت تشوف
راواهه الموت الاحمر
وهو القائد يتبختر
متواعد بالطف وياهه
سواهه الاكبر خَيبَر
،،،،،،،،،،،،،،،،،،،،،،،
خادم الحسين ابو اسحاق الفحام

بزينب ماتدرون
عنكم تمشي شلون
رادت يمشي وياهه
كافل بيده لواهه
عنكم تمشي شلون
،،،،،،،،،،،،،،،،،،،،،،
امس عباس هو الچان يحميهه
بچفه ورايته الخضره يغطيهه
ياهو من العده يگدر يصل ليهه
وحارسهه الكفيل ورايته عليهه
خيمه وعن الناس
يحميهه العباس
اخته ويتفداهه
كافل بيده لواهه
عنكم تمشي شلون
،،،،،،،،،،،،،،،،،،،،
امس عباس يمهه ويحرس خيمهه
شلون الليله والعباس مويمهه
زينب رادتچ ليل هدعش يمهه
تخاف الشامت بچلماته يهضمهه
زينب عگب حسين
وعگب الكافل وين
من تطلع ممشاهه
كافل بيده لواهه
عنكم تمشي شلون
،،،،،،،،،،،،،،،،،،
امس طوگ الزلم عالخيم صاير سور
وديوان المكارم بالاهل معمور
وعلي الأكبر لخيمة عمته ناطور
شكثر وكحه الليالي وتوجع من تدور
الچانت بالصيوان
تمشي وي العدوان
چفوفك تتمناهه
كافل بيده لواهه
عنكم تمشي شلون
،،،،،،،،،،،،،،،،،،
اگعد يالجبتهه من الوطن وياك
بصيوان الخدر ويرف عليهه لواك
ياعباس زينب واگفه وتنخاك
تقبل يابو فاضل تمشي وي اعداك
الكافلهه انت شلون
تصد عليهه عيون
بمشيتهه وبسباهه
كافل بيده لواهه
عنكم تمشي شلون
،،،،،،،،،،،،،،،،،،
طلعت للسبي والناس نظرتهه
وبعيون الشماته عداك شافتهه
بين الناس صعبه تصير مشيتهه
واصعب يالولي للكوفه طبتهه
ودرب الشام بعيد
ولديوان يزيد
طبت يا رجواهه
كافل بيده لواهه
عنكم تمشي شلون
،،،،،،،،،،،،،،،،،،،
للمجلس لون طبت وعرفوهه
وعن حسين بالديوان نشدوهه
وگدام الزلم توگف يخلوهه
بت حيدر علي ولنهم يشتموهه
وگامت تتمناك
حاضر كون هناك
وترد عنهه عداهه
كافل بيده لواهه
عنكم تمشي شلون
،،،،،،،،،،،،،،،،،،،،،
خادم الحسين ابو اسحاق الفحام

شلون تطلع والزلم تبرالهه
لو شفت يامرتضاهه شحالهه
٠٠٠٠٠٠٠٠٠٠٠٠٠٠٠٠٠٠
شحالهه لمن نوه الحادي يشيل
والصباح بعينهه بظلمة الليل
حايره بين اليتامه والعليل
حيل مابيهه وثجيله احمالهه
..................
شلون تمشي بلاكفيل ولاحمه
وهي بالعز والكفالة محشمه
يابو فاضل هذا يوم الموزمه
بصوتهه تنده لعد كفالهه
................
تنده ودمعاتهه من دم تصب
صعبه ياعباس نمشي وي الغرب
خاف للكوفة يبوفاضل نطب
وتدري بالكوفة وردايه افعالهه
................
شلون تطلع بت علي عقد الوله
الچانت بجال الاخوان مدلله
هسه لنهه محيره بطف كربله
تحوم بين خيامهه وعيالهه
،،،،،،،،،،،،،،،،،،
تحوم بين الخيم مكسورة گلب
تصيح ياعباس ومتيهه الدرب
مخدرتكم طلعت بين الغرب
وشافهه المايوم شاف خيالهه
،،،،،،،،،،،،،،،،،،،،،
ياحسين تصيح عالتل اوچبت
ظلمه صارت والشمس هالغربت
والعده علينه يخويه تحزبت
كلهه فزعت خيلهه ورجالهه
،،،،،،،،،،،،،،،،،،،،
نزلت من التل لچنهه محيره
تعنت لعباس سبع الگنطره
تگله لحگ عالخيم ليهن تره
وصلت النار وتچوي اطفالهه
،،،،،،،،،،،،،،،،،،،،
ليك اجيت وردتك لحالي تشوف
شفتك بهالحال مگطوع الچفوف
وصحت وينك ياعلي احضر بالطفوف
وشوف اميه وشوف شين افعالهه
،،،،،،،،،،،،،،،،،،،،،،،،،،
خادم الحسين ابو اسحاق الفحام

( الرباب تخاطب الرضيع)
،،،،،،،،،،،،،،،،،،،،،،،،،،،،،،،،،،،
جربت ابقه بلا ضوه
واحرم روحي من الهوه
بنيران الشوگ انچوه
گلبي بلياك
كلما انظر للمهد
يزداد بروحي الوَجَدْ
مهدك خالي بلا ولد
واحضن ذكراك
،،،،،،،،،،،،،،،،،
يالعايش بين عيوني دمعات ونوح
يالماخذ كل الدنيا وتاركلي جروح
امك ظلت بغيابك خيال بلا روح
خطار وماچنت ادري من الباب تروح
افرش گلبي لجيّتك
روحي بشوگ تلگتك
ماخذ كلشي بروحتك
واتمنه الگاك
ياصوره تلامس رمش
عطرك بحضاني يطش
بصدري مسويتلك عرش
واحضن ذكراك
،،،،،،،،،،،،،،،،،،،
يالعفت امك تدري امك تشتاگ هواي
يانبع الروح الوجهك يسگيني الماي
ردتك لآخر ايامي تبقه انت وياي
ياشمعة عمري بدونك تظلم دنياي
عمري انت وكل دنيتي
شمعه تنور ظلمتي
لكن بالطف شمعتي
طفاهه جفاك
شمعه مطفيهه السهم
وامك ماذيهه الالم
بين الواقع والوهم
واحضن ذكراك
،،،،،،،،،،،،،،،،،،،،،،،،،
وردك بمهادك ذبل ظل بلا لون
يالرايح روحة جفه بجفاك شلون
تانيتك يانسمتي يا عطر الكون
احلم چنت بدنيتي تكبر وتكون
لجرح امك انت الشفه
وانتظرك متلهفه
رمشك عالنبله غفه
وردت اغفه وياك
شمعك من جرحك طفه
وامك ما تحمل جفه
نظرة حنيه ووفه
واحظن ذكراك
،،،،،،،،،،،،،،،،،،،،،،،،،
بمهدك چانت جنتي يا ماي العين
ياحلم الروح الچنت انتظره سنين
يالماخذ كل دنيتي رايح لاوين
برسومك وبشوفتك صوره من حسين
شايلتك صوره بجفن
دمعات ونوح وحزن
تحرگ دلالي واون
جمرة فرگاك
ياطير مفارگ غصن
مشتاگه الروح وتحن
سويت رموشي حظن
وحظن ذكراك
،،،،،،،،،،،،،،،،،،،،،
يالماشي برحلة سفر والدرب بعيد
كل لحظه انظر للرمح نابت بالجيد
غيرك يالعنهه رحت امك شتريد
تتمنه تشوفك تجي بمصباح العيد
راسك بالنبله انفصل
بدرك غاب وماكمل
عشت خلافك بالوجل
ما شفت صباك
وجهك عن عيني رحل
دلالي لربه ابتهل
وظل بين عيوني الامل
وحظن ذكراك
،،،،،،،،،،،،،،،،
عبدالله اشتاگ الگلب لمهادك وتمناك
وياريت سنين العمر يگظن يوليدي وياك
وتنظر عيني عله المهد وتحزن لوماتلگاك
وحشه الليل بلا ضوه وموحش عمري بلياك
لو بيدي انطيك العمر
واحمل روحي عله الصبر
خلصت سنيني انتظر
لحظة ملگاك
مرن لحظات شكثر
كل لحظه بدونك تمر
تشعل بضلوعي جمر
وحظن ذكراك
،،،،،،،،،،،،،،،،،،،،
خادم الحسين ابو اسحاق الفحام

( نعي لخروج الحسين من المدينه)
،،،،،،،،،،،،،،،،،،،،،،،،
گعد يم الگبر والمدمع جره
ونار مابين الضلوع موجره
ويحچي للمختار عن ضيم الجره
يحچي ودموع الحزن يجريهه
،،،،،،،،،،،،،،،،
يگله ياجدي الاصحاب البايعوك
بعترك ياجدي ابداً مارعوك
بدت يوم الباب لمن انكروك
بباب دار الزهره صار البيهه
،،،،،،،،،،،،،،،،،،،
تدري ياجدي الامس گالت بَخٍ
اجت حرگت دارنه وگالت وإنْ
تسمع الزهره على الباب وتون
وبحقد يدفع الباب عليهه
،،،،،،،،،،،،،
الاخذت الكرار مچتوف بحقد
ورادته للباطل چفوفه يمد
اليوم اجت ياجدي وبنفس الگصد
تريد ابايعهه ورحب بيهه
،،،،،،،،،،،،،،،،،
وسفه يتجره الوزغ وبن الطريد
يگلي بايع بيعة الأمره ليزيد
يريدني اقبل بيعة الذل والعبيد
وابقه بالذله وحياتي اگظيهه
،،،،،،،،،،،،،،
هومت عينه وغفه يم الگبر
لن رسول الله اجه وبيده الأمر
يگله يبني لدينك تبيع العمر
ولرضاة الله وجنانه اشريهه
،،،،،،،،،،،،،،،،
روح يبني لكربله بهالعايله
تنال عزك والشهاده بكربله
ادري بيهه رباة عز ومدلله
وصعبه يحسين العده تسبيهه
،،،،،،،،،،،،،
طلع من طيبه بوجل والد علي
لن عليله دموعهه تصب وتهلي
وياكم اخذوني بضعنكم ياهلي
خلافكم روحي المرض ياذيهه
،،،،،،،،،،،،،،،،
وياكم اخذوني يبويه بهالسفر
احس گلبي من الوجل حيل انفطر
والله يعمه خلافكم بويه النظر
وضل بس دموع عيني اجريهه
،،،،،،،،،،،،،،
الشاعر ابو اسحاق الفحام

حيل تغيرت يحسين من حر الشمس والخيل
شفتهه تحيرت يمك وزينب واگفه بلا حيل
،،،،،،،،،،،،،،
من رد المهر خالي وزينب سمعت صهيله
عنك نشدته يحسين وهي المدمع تسيله
تگله بياكتر خليت والي الحرم والعيله
اخذني وياك وديني عن الحال نحچيله
گلهه المهر بالميدان عفته وجسمه حيل نحيل
،،،،،،،،،،،،،
صاحت يالمهر وياك يم حسين وديني
بلكي الحگ عله الضامي واسگيه بدمع عيني
اخذني وياك يالميمون وعله حسين دليني
بلكي يشوفني يمه ويفك عينه ويحاچيني
اعرفه صاحب الغيره مايقبل عباتي تميل
،،،،،،،،،،،،،،
وداهه المهر يمه وشافت صاحب الغيره
گعدت يمه وتنشده زينب ضلت بحيره
حيل حسين ابو اليمه متغيره تصاويره
ردته يگوم عود وياي ماعندي ولي غيره
وخيامي بقه بيهه بس ايتامنه وعليل
،،،،،،،،،،،،،،،،
اجت والحرم وياهه وگعدن يم ابو اليمه
وحده تفيي للمظلوم وحده تقبله وتشمه
وحده تلم جرح صدره وعن ريح الهوه تضمه
وحده تگول اشوف حسين ميت چنه ياعمه
وحده تگله گوم وياي عالايتام صار الليل
،،،،،،،،،،،،،،،،،
سمعهن صاحب الغيره وعله الحرم فك عينه
صبت دمعته من شاف يمه واگفه سكينه
صد لزينب وگلهه چا سجادكم وينه
بس هو بقه للدين يزينب لاتخلينه
عگبه مايضل تدرين لا قرآن لا ترتيل
،،،،،،،،،،،،،،،،،،،،
حيل تغيرن يحسين من سحگ العده رسومك
نايم بالشمس عطشان عاري مسلبه هدومك
لا مظلوم مثلك صار ولايوم المثل يومك
وينه للغري يوصل لبوك وياخذ علومك
يحشم هاشم وعدنان خل تسرج بسرعه الخيل
،،،،،،،،،،،،،،،،،،،
زينب شافت المظلوم ضامي وشابح عيونه
يتگلب عله التربان ومغيره الشمس لونه
وجابو اعوجيه الخيل نيتهم يسحگونه
صاحت ياعلي وينك لحگ لايذبحونه
وحادي الضعن للشامات عگب حسين بينه يشيل
،،،،،،،،،،،،،،،،،،
خادم الحسين ابو اسحاق الفحام