ارتل أجمل الحاني.. ظهر وجه النبي الثاني
علي الأكبر محمد
___
وجه النبي الثاني ظهر بالاكبر
اوعالدنيا نوره اوعالفضا ظل يزهر
كله مكارم طبعه طبع الجوهر
راضع قداسه اوهيبته من حيدر

صفاته من علي جده..يهنياله الذي ايوده
علي الأكبر محمد
___
ثغر الحُسين اتبسم ابميلاده
وآنه ابحروفه افرح اعله العاده
ويه اللي يقرا رددِت انشاده
الشيعه اعله بابه تنحسب وفاده

تلوذ ابكتره احبابه..تلاگي حتماً اجوابه
علي الأكبر محمد
___
تسحرني اوصافه واظلن حاير
يكفي جماله يبقى دايم زاهر
ميرد احد لابد يسر الخاطر
وابذكره تركع كل حروف الشاعر

يسولف سيرة ابداعه..تميز حتى بطباعه
علي الأكبر محمد
___
مثل الحسن عمه ابعطائه اوفضله
والصعبه يم اعتابه تبگه سهله
هذا اللي نوره اعله العرش يتجله
هذا علي إي والنعم من مثله

المكارم هوّه معناها.. اوكلامه اومنطقه طاها
علي الأكبر محمد
___
وارث شجاعة حيدره وافنونه
اويشبه ابوفاضل بعد بعيونه
اوكل الخليقه ابشوفته مفتونه
اومن وجهه افلاك او سما مزيونه

مصحف بالفخر نازل..وآنه ابشانه ماجامل
علي الأكبر محمد
___

عادل العبد الله
1/3/2023
https://www.tgoop.com/adela313
رحم الله من قرأ سورة الفاتحة واهداها لروح الوالدة *آمنه العبد الله*
والشاعر *حسين العبدالله*

من وجهك يالأكبر صارت ..هالدنيا ابأنوار
يالماخذ بوصافك حيدر.. واوصاف المختار
.. يالأكبر علي علي..
----
ضرغام اوچن حامي الجار.. حين الـ يبرز عالعدوان
اوخزراتك من راعي الجود.. اوسيفك يخسف بالميدان
خطواتك مثل المختار.. وانفاسك مصحف قران
هنياله الشافك بالكون.. يالوجهك صار الريحان
..
تشهد لك دنيانه كلها..يانسل الاخيار
يالماخذ بوصافك حيدر.. واوصاف المختار..
.. يالأكبر علي علي..
----
يالاكبر صوتك قُدسي ..وابشفتك تحلى البسمات
اوزهرت من نورك هالگاع..ياورده اتغازل نجمات
عينك بيها كحلة ليل.. يالچفك بيها آيات
اوبس انته عطرك يسحر.. يالغالي بين النسمات

ما واحد مثلك يالاكبر..يحمل كل ايثار
يالماخذ بوصافك حيدر.. واوصاف المختار
.. يالأكبر علي علي..
----
بلساني ذكرك يحلى.. يالبسمك عليت الراس
والـ عينك فدوه يرحل.. كل عمري ويه الانفاس
ودايم يالاكبر دايم..يتولد بيك الاحساس
انفاسك انفاس احسين..اوعزمك من عزم العباس

أهتف هالليله ابميلادك.. والفرحه ابكل دار
يالماخذ بوصافك حيدر.. واوصاف المختار
.. يالأكبر علي علي..
----
بسمك يالأكبر أثمر.. غصن العاشگ بالدلال
والـ روحك صارت افراح..معگوده ويه الآمال
ابتكوينك صافي الينبوع..يالخيرك يجري شلال
لتلوم الـ حبك بجنون..ينشد بوصافك موال

املاك الباري مسروره ..واترتل اشعار
يالماخذ بوصافك حيدر.. واوصاف المختار
.. يالأكبر علي علي..
----
ميلادك اصبح اعياد..يالأغلى من الاحباب
يالشخصك حيّر هالكون.. يامزيون ابكل اكتاب
تكرم كل سايل محتاج..يالبابك أوسع ابواب
يامالك گلبي والروح..فاز الـ يبديلك اعجاب

للعالم انته ميزانه..ياحاوي الاسرار ..
يالماخذ بوصافك حيدر.. واوصاف المختار
.. يالأكبر علي علي..
----
عادل العبد الله
27.4.2018
https://www.tgoop.com/adela313
الفاتحة لروح من علمتني الخدمة الوالدة *آمنه العبدالله*

.

حلوه ليالينه
نوّرنا مهدينه
---
هالليله نور المنتظر.. شعشع على الاكوان
اوفرحت ارضنا والسما.. في منتصف شعبان
اوثغر الموالي مبتسم.. حقه يظل فرحان
ابدار الامام العسكري ..يترتل القرآن

بحروفه نادينه
نوّرنا مهدينه
---
خاتم حجج آل النبي ..نبعث إله مرسال
انگله نشوفك يامتى..ياللي سكنت البال
گلب المحب مايحتمل..طول البُعد جتال
ودنا ابحضوره اويستمع.. نص الشعر موال

يسمع تهانينه
نوّرنا مهدينه
---
فرحة قدوم ابن الحسن ..اعظم من الاعياد
كلمن ترقب مولده ..ايريد الفرح ينعاد
يل سيرته عزه اوشرف..محفوفه بالامجاد
نتمنى يحضرنا ابعجل ..وانجدد الميلاد

تاج اوفخر لينه
نوّرنا مهدينه
---
يبگه أملنا المنتظر..بيده نجاة الناس
ينشر موازين العدل..يزرع ورد والياس
يرفع لوائه ابكل محل..بالهيبه والنوماس
سيفه من المولى علي ..اودرعه من العباس

هوّه اللي يحمينه
نوّرنا مهدينه
---
يجمع شملنا ابكل حفل..ايغذينا بلطافه
گلبه عطوف ابن الحسن ..من طاها اوصافه
واسمه حرز بي نحتمي..اونتخيل اطيافه
فاز الذي ابحبه مشى .. اويخسر ترى العافه

حبه اللي ينجينه
نوّرنا مهدينه
---

عادل العبد الله
4/3/2023

https://www.tgoop.com/adela313
رحم الله من قرأ سورة الفاتحة واهداها لروح الوالدة *آمنه العبد الله*
والشاعر *حسين العبدالله*

هاليوم احتفلنا احتفلنا احتفلنا
يا بسمة املنا املنا املنا

يمهدينا .ابفرح جينا

نعلن الفرحه ابفخر.. يمهدينا
والثغر منا ابتشر.. يمهدينا
وعطرك اعلينا انتشر.. يمهدينا
والگلب بيك استقر… يمهدينا

وابأسمك يغالي يغالي يغالي
تحلى هالليالي الليالي الليالي
تغنينا ..ابفرح جينا
***
سيدي يبن الحسن ..يمهدينا
انته لينه اكبر وطن .. يمهدينا
وكل محب بيك استجن .. يمهدينا
ياللي اغله امن الثمن.. يمهدينا

تبگه بس سندنا سندنا سندنا
يالبيك اعتمدنا اعتمدنا اعتمدنا
العشگ بينا ..ابفرح جينا
***
بهالمسه نطلب مدد.. يمهدينا
وبسمك انجدد عهد .. يمهدينا
يالملاذ ابكل شدد.. يمهدينا
ننطرك يمتى الوعد .. يمهدينا

يمتى تجينا تجينا تجينا
واتهل علينا علينا علينا
الفرج وينه. ابفرح جينا
***
ابطلعتك نلگه الامل ..يمهدينا
يا ابن خير العمل.. يمهدينا
بيك دين الله اكتمل.. يمهدينا
ماتوافيك الجُمل.. يمهدينا

يالبيدك اجرنا اجرنا اجرنا
اشگد لجلك صبرنا صبرنا صبرنا

وتلاگينه.. ابفرح جينا
***
كل شعر بسمك حلى .يمهدينا
يا ابن خير الملا .يمهدينا
ماتحدك فاصله .يمهدينا
وبيك تمشي القافله .يمهدينا

يمضوي دربنا دربنا دربنا ..
بيك احنا افتخرنا افتخرنا افتخرنا

مَـ ملينه.. ابفرح جينا
***

عادل العبد الله
..
https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله

يالمنتظر ..يالمنتظر ..انته فخرنا للأبد
---
ابشوگ اومحبه ننتظر تلفينه..مولانه مولانه
ابگد السما يالمنتظر حنينه..مولانه مولانه
لمن تجي ننسى الكدر مهدينه..مولانه مولانه
اوتمسح علينه ابيمنتك تغنينه.. مولانه مولانه
يالمنتظر ..يالمنتظر ..انته فخرنا للأبد
---
نورك هدايه للبشر هم رحمه..ياموعود ياموعود
بوجودك انحس ابتمام النعمه..ياموعود ياموعود
خيرك شمل وامغطي حتى النجمه..ياموعود ياموعود
يالذكرك ابشفتنا ترسم بسمه.. ياموعود ياموعود
يالمنتظر ..يالمنتظر ..انته فخرنا للأبد
---
اچفوف التحبك بالحفل ممدوده..يامهدي يامهدي
والأمه بسمك يالولي موعوده..يامهدي يامهدي
يامن ورثت امن النبي كل جوده..يامهدي يامهدي
اومن الوصي حيدر علي كل زوده..يامهدي يامهدي
يالمنتظر ..يالمنتظر ..انته فخرنا للأبد
---
ابخامس عشر شهرك ننادي وينك.. مهدينه..مهدينه
كل البشر تسحرها كحلة عينك..مهدينه..مهدينه
وأنته الامام امن العلي تعيينك..مهدينه..مهدينه
خلنا انتبارك سيدي بسنينك..مهدينه..مهدينه
يالمنتظر ..يالمنتظر ..انته فخرنا للأبد
---
عادل العبد الله
16.4.2019
https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله

يابوصالح ....
كلنه هالليله بقدْومك مُلبين

ناصفه حلاوات
على النبي صلاوات
---
جينا عالعاده هالليله مهدينه
انشارك الافراح بالمحفل غنينه
انوزع الوردات للودام هنينه
يوسف الزهرا ياريتك تلفينه

يابوصالح..
متى تلفينه يانسل الميامين
ناصفه حلاوات
على النبي صلاوات
---
نحيي ميلادك والبسمه مفضوحه
اوإلك كل شيعي فرحانه اتظل روحه
اوعينه لقدومك يالوالي مشبوحه
ايريد هالليله ايعبرلك كل بوحه

يابوصالح..
انته تدرينه في حبك مجانين
ناصفه حلاوات
على النبي صلاوات
---
جاعلك ربنا اتظل قائد عالأمه
يالهوا منك جمّعنا باللمه
احنا من غيرك چا صرنا بالعتمه
بس لطف نورك غذانا اشگد رحمه

يابوصالح..
تبگه جاذبنه هم جاذب ملايين
ناصفه حلاوات
على النبي صلاوات
---
انته من نورك معبودك سوّانه
حتى انفاسك مولانا ويانه
ياللي آياتك هي تجري بدمانه
اوبيدك ايرفرف يالمهدي إلوانه

يابوصالح..
بالفرج ندعي ابدعوات الموالين
ناصفه حلاوات
على النبي صلاوات
---
انته سيف الدين يالثابت اوجودك
تشهد الايات يالمهدي في زودك
والخلگ كلها هم تكفي اشهودك
ياللي افضالك معروفه من جودك

يابوصالح..
يكفي بچفوفك مضمونه البراهين
ناصفه حلاوات
على النبي صلاوات
---
عادل العبد الله
27/3/2021

https://www.tgoop.com/adela313
رحم الله من قرأ سورة الفاتحة واهداها لروح الوالدة *آمنه العبد الله*
والشاعر *حسين العبدالله*

يامهدي ابحروفك دليلي انفتن
وآنه من جمالك كل فكري استجن
* * *
يامهدي ابحروفك سجد هالوجود
ياللي من خدودك تزهر الورود
اتعب من اوصفك متحدك حدود
يالذاتك قداسه واغلى امن الثمن
* * *
آيه تبقى آيه شامة وجنتك
وآنه ابگلبي تكبر دوم امحبتك
ومحد يا إمامي يملك هيبتك
يالكلك مكارم يبحر المِنن
* * *
يانور المعالي واصفى امن الذهب
اسمك من لفظته شعوري انطرَب
وشريان الموده بس بيك انجذَب
ولجلك هالقوافي شوگ اترتلن
* * *
طولت ابمغيبك مل مني الصبر
واشتعل دليلي من نار الجمر
اتمنى اشوفك لحظه بالعمر
تمحي كل همومي واتزيح المحن
* * *
يامهدي اطلبك.. بمك فاطمه
وادري الله خصك باعظم مكرمه
كل محب من جودك لا لاتِحرمه
انته ما تخيبه بالسر والعلن
* * *

عادل العبد الله
https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله .

نور الوالي بالمولد هل
---
انولد مهدينا والعالم تنور..نور الوالي بالمولد هل
والدنيا ابفرح والكل تعطر..نور الوالي بالمولد هل

مصحف للبشر نازل.. يشبه عمه بوفاضل
بسمه الشيعي ظل يتوسل
---
وصفه اوكل جماله من محمد..نور الوالي بالمولد هل
إله املاك السما هالليله سُجد.. نور الوالي بالمولد هل

مصدر معرفه اوحكمه..چفينه تظل نعمه
من طاريّه خير اتنزل
---
حاضر مُنتظرنا بالمحافل.. نور الوالي بالمولد هل
اولجله شيعته اتردد هلاهل..نور الوالي بالمولد هل

نلگه ابخطوته الجنه..اويخجل كل ضوه منه
كلمن وَده حاشا ينذل
---
لسان المصطفى اودستوره قرآن..نور الوالي بالمولد هل
اوسيفه من علي عالعدا نيران..نور الوالي بالمولد هل

امجهَز للحرب فارس.. وفنه من علي دارس
يا من كيفه سيفه ينسل
---
من احسين السبط خيله ولدروع.. نور الوالي بالمولد هل
المهدي لو طلع تتراجف اجموع..نور الوالي بالمولد هل

نظراته گمر هاشم ..سيفه عالكفر ناقم
اليدنى له عقله مختل
---
عذب الماي ينبع بين چفه..نور الوالي بالمولد هل
اويذبح كل عدو مو عجبه طَرفه..نور الوالي بالمولد هل
شبل العسكري قسور.. فرع من جوهرة حيدر
ابكل خطواته ماخذ أول

عادل العبد الله
7/3/2023

الفاتحة لروح من علموني الخدمة الوالدة *آمنه العبدالله*
والشاعر *حسين العبدالله*
https://www.tgoop.com/adela313

.

انوارچ بهيه..مولاتي رقيه
---
عاده صارت بالمجالس ..نحتفل بسمچ
ياللي بيچ الروح تزهر.. من ضيا نجمچ
عطفچ امن احسين أصبح..واضح ابرسمچ
ياللي كل الكون بيدچ ..بمرچ اوحكمچ

اسرارچ خفيه..مولاتي رقيه
---
مرقدچ بالشام جنه..اومقصد الوادم
هاله قدسيه صفاتچ.. تشبهي فاطم
بالشديده اوبالسكينه ..نذكرچ دايم
اويم ضريحچ يالحنينه..يركع الخادم

معروفه سخيه..مولاتي رقيه
---
اسمچ ابگلب الموالي..عايش امن اسنين
انتي تسبيحه اوقنوته..اوحرفچ ابكل عين
وانتي آيه امن الجلاله.. اوزينة التكوين
واليعرفچ عن عقيده ..چن عرف لحسين

يا أصل الهويه..مولاتي رقيه
---
امدللة لحسين انتي .. امشرفه الاكوان
ازغار ادينچ لچن تبگه.. اچبيره بالاحسان
ياكهف كل الحياره.. اومروى للعطشان
وشـ كبر حظّه اليزورچ ..يرتفع له شان

يحظى بالعطيه..مولاتي رقيه
---
يارقيه بيچ نحظى ..ابجنة الجبار
واعله ذكرچ يالحنينه..تحلى هالاشعار
ابسيرتچ نلگه الكرامه..عايشه ابكل دار
ياللي مثلتي ابصمودچ ..حيدره الكرار
ياورده اوزهيه..مولاتي رقيه
---
فرحةاحسين ابوجودچ.. فرحت الاملاك
اومن قبس نورچ رقيه..اتضوت الافلاك
اوللموالي الليله نهتف.. بالحفل حياك
انگله مولاتي ابحضورك.. والله ماتنساك

نفرح هالمسيه...مولاتي رقيه
---
عادل العبد الله
26/3/2022
https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله.. .

هاليوم فرحه .. ياشبيهة فاطمه
-------------------------
والينا ابمولدچ..فرحان ابجيتچ..واحنا في سيرتچ
يابنت احسين
رغم اللي عادتچ ..ماعفنا فرحتچ..نتغنه ابطروتچ
يابنت احسين

فرحت اويانه الكره الارضيه
ياشبيهة فاطمه القُدسيه
امن الله انتي الراضيه المرضيه
هاليوم فرحه ..ياشبيهة فاطمه
---
ياوردة بوعلي..يانور الله الجلي..بيچ الهم ينجلي
يلمبروره
ابيومچ بس نبتشر.. يلوجهچ مزدهر..اويحلالچ هالذكر
يلمبروره

بالحشر كلمن يحبچ غانم
ابجنتچ يلگه سروره الخادم
يا رقيه ياسليلة فاطم
هاليوم فرحه ..ياشبيهة فاطمه
---
كل شيعي منطرب..بسمچ يصفى الگلب..اويتخيل لو يطب
وسط الحضره
كلمن بسمچ وصل ..يابت خير العمل..يتلگه كل امل
وسط الحضره

ماتخيّبينه الإجاچ ابحسره
انتي بس انتي التجبري كسره
اوتشملينه يلعطوفه ابنظره
هاليوم فرحه فرحه ..ياشبيهة فاطمه
---
عدنا هالمعتقد..منعوفچ للأبد..نطلب بسمچ مدد
يانور العين
غذيتي هالمَلا..ياريحة كربلا..واسمچ نتأملَه
يانور العين

ابگد حروفچ نطلبچ مانخسر
ثبّتينا اعله ولاية حيدر
والبراءه من عدوه الأگشر

هاليوم فرحه ..ياشبيهة فاطمه
---

عادل العبد الله
15/2/2025
https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله.. .

والد علي ما ينحجب ..معروف ابو طالب
ذكره على السان المحب ..فرض اويظل واجب
فضله اومقامه..أصل الكرامه
---
هذا الكفل أعظم نبي..واتخلدت امجاده
ابهِمَه اوشجاعه مستعد ..يفدي النبي بَولاده
ظِله صُبُح ميفارِگه.. اوچفه ابمسائه اوساده
لو ينوي حاجه المصطفى.. فوراً يجيب امراده

كهف اوحِمه للمصطفه ..من أول الدعوه
اوناذر حياته ابكل وفه..ينطيها له فدوه
حبه اوهيامه..أصل الكرامه
---
عارف مقام المصطفى..اوهالمعرفه ساس الدين
ماساوم ابحبه احد..صار الحصن والتحصين
رغم المكائد والظُلم..رغم الجرح والتطعين
يبگه ابو طالب عَلم.. اوعنه تسولف لسنين

مؤمن قُريش ابكل فخر..يشهد وحي طاها
والأنكره يصلى سقر..مو هوّه يصلاها
نهجه استقامه..أصل الكرامه
---
لولا ابوطالب ترى..ماشعشع اسم الاسلام
هوّه الـ شعل شمع القيم..ضد الجهل والاوهام
يكفي من ابنائه علي..رايه اوتذل الظلام
اوهالرايه أيدها الصمد..مرفوعه طول الايام

لابد نشكره اونستمُر..وانعدد افضاله
انجازه حاشا يندثُر.. والشاهد اعياله
كله شهامه..أصل الكرامه
---
ايكفرونه ندري بالسبب..لنه أبو حامي الجار
لو ابنه مروان اشحصل..چه اصبح امن الاخيار
ماينطفي نوره أبد..الينصر الله الجبار
مستودع اسرار النبي..اوبيْه العدو ظل محتار

رب الشرف والتضحيه..منه ورث حيدر
ماهمه دنيا فانيه..اشما چذبو يكبر
فخر الإمامه..أصل الكرامه
---
بانت علامات الحزن....اوچف الأجل يدناله
ودع رسول الله اوعلي..واتغيرت أحواله
راحل كفيلك يالنبي ..وللآخره ترحاله
يوضح مقامه بالحشر..من تنتشر اعماله

يشفع ابوطالب مثل..شفاعة الزهره
اوكل الخلايگ تنذهل..من معرفة قدره
هذي العلامه..أصل الكرامه
---

عادل العبد الله
28/3/2023

https://www.tgoop.com/adela313
رحم الله من قرأ سورة الفاتحة واهداها لروح الوالدة *آمنه العبد الله*
والشاعر *حسين العبدالله*

عم الرسول اليوم..يصعب نودعه
ابهم وقهر ننعاه..وابخدنه دمعه
***
جينه ابعزانه اليوم..نجري المدامع
انواسي النبي المختار..في هلمواجع
وانگله يالمرسول..منهو اليدافع
بعد الحمه المبرور..تمسي ابلاشمعه
***
بعد الحمه المعروف ..دنيانه ظلمه
وصار الهوا مخنوگ..يصعب نشمه
اوگلب الوصي الكرار..عگبه يألمه
ياوسفه عز الدين...منهو اليرفعه
***
حامي النبي للدوم.. تابع كتابه
هذا اللي چان الناس ..كلها تهابه
معقوله چف الموت..خاطف جنابه
وهوّه الذي ابلاخوف..كل ذل يدفعه
***
شاله نبينه اوصاح.. يااغلى لحباب
شلون الكفل مرسول .. يتغطه بتراب
ما تنفع الـ يا ويل..بلگلبه لهاب
والما إله حماي ...محد ينفعه
***
صورة ابو طالب..ماتُمحى هيهات
يبگه مَثل للناس..وي كل لآيات
والكفروه اقزام.. ماتمتلك ذات
يبگه شعار الدين..محد يردعه
***
عادل العبد الله.
1.6.2017
https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله.

ياهيبة بني هاشم..كلمن يطلبك غانم
فضلك تِعرفَه الأمه..ياناصر نبي الرحمه
---
ياكفيل المصطفى بسمك نفاخر
يلصرت درع النبي ولدينه ناصر
اولجله انته اتحملت كل المخاطر
اشلون بعد التضحيه ايگولون كافر

اشلون اتمادت الاقزام ..وانته ابصدرك الاسلام
سرك محد ايفهمه...ياناصر نبي الرحمه
---
يا أمين الله اعله وحيه اوسره سرك
واجب ابفرض الصلاة احنه نشكرك
رغم حقد الكفرَك ظل عالي قدرك
انته مؤمن .للنبي افنيته عمرك

معقوله تمسك نار.. وانته والد الكرار
اوجسمك من أصل جسمه..ياناصر نبي الرحمه
---
انته شيخ البطحه والوادم تهابك
تكرم اضيوفك ولا سديت بابك
والتجيك ابمعضله تبدي جوابك
الطلبه سهله في حضورك وابغيابك

شانك حاشا يتغير..يل أغلى من الجوهر
يا أعلى من القمه..ياناصر نبي الرحمه
---
يللي بيدك شيدِت ركن العداله
اوساندِت طاها النبي ابنشر الرساله
ماگطعته كمّلت ببنك وِصاله
وانته وصيته يظل چنه خياله

ببنك حيدره اتوصي..اوحاشا هالإبن يعصي
منك ما هوى عزمه...ياناصر نبي الرحمه
---
يبوطالب خالِده كل تضحياتك
من بداية عمرك الساعة مماتك
حققِت وّيه النبي كل امنياتك
ايهمك انته أمره ابأول حياتك

شكراً يا أبوطالب ..يل ذكرك يظل واجب
عگبك غابت البسمه..ياناصر نبي الرحمه
---

عادل العبد الله
17/3/2024
الفاتحة لروح من علموني الخدمة الوالدة *آمنه العبدالله*
والشاعر *حسين العبدالله*
https://www.tgoop.com/adela313

ندري كل الناصبه ايعادونك
والسبب والد علي ايكفرونك
***
يللي شخصك كافل الهادي الشفيع
ناصره وانته بعد حصنه المنيع
وابأمر ربنا لجل دينه مُطيع
وشايل انته طه وسط اعيونك
***
انته أول صوت هز الكافرين
وجبل صامد في وجوه الحاقدين
تبگه قدوه نافعه للمؤمنين
يامن ابكل مأتم ايذكرونك
***
لو ما انته ما إجه معنى الوئام
اولا عرفنا الدين والوان السلام
حگك اعلينا تحية احترام
وتدري مايسوى الهوا من دونك
***
انته خطيت البدايه اويه الرسول
اونوّرت بسم الديانه كل عقول
ونعجز ابوصفك بعد شنهو نگول
وانته كل الوادم ايهابونك
***
ينصير الهادي عجزّت الحروف
انته ضحيت ابثباتك يالعطوف
في مصابك كل دمع يبگه ذروف
اوكلها اتباع الوصي يبچونك
***
كلشي يركع تحت جدمك يالكريم
يللي حاميت ابشرف اعظم يتيم
ما نشك انته حزت كل النعيم
ونلت من رب البشر مضمونك
***
عادل العبد الله

https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله.

1.6.2017

يا أبوطالب يساس المرجله
سرك امن اسرار باء البسمله
---
شحچي عنك ياعزيز المصطفه
ياللي نورك باقي مالحظه طفه
شخصك الغالي يظل مصدر وفه
يكفي انته والد العقد الوله
---
انته والد حيدره فحل الفحول
انته بيك اتفرعت كل الاصول
والنبي ابوجهك ترى همه يزول
عنه تدفع سيدي كل البله
---
انته للهادي درع يبگه حصين
اوتضحايتك خالده طول السنين
اومن جبينك منبع النور المبين
واسمك الشيعه تظل اترتله
---
اسمك الإيمان وافعالك فخر
والبغض شخصك يمولايه كفر
مايدخلّه الجنتك فارس مضر
والعوج ساسه مُحاله ايعدله
---
گالوا كافر وانته ايمانك سليم
اوسيرتك معروفه حتى اعله الغشيم
وانته من صلبك صراط الله العظيم
إليضدك يمشي عكس البوصله
---
من رحت گلب النبي صابه الحزن
وابنك الكرار بالحسره يون
اودمعة الزهره تسيل ابكل جفن
حتى دمعات الملايك سايله
---


عادل العبد الله
8/4/2022
https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله..

اهل السما يبچوها..واهل الأرض ينعوها
اوصوت الألم بيهم تردد..راحت خديجه يامحمد
- - -
أهل السما يالمصطفى..صارت بسمها تنحب
تنصب مواكب للعزا..اويلطم لجلها الكوكب
والصرخه توصل للعرش..اوفوگ الوصف والأعجب
اوجبريلك اينادي ابكدر..وضعك يطاها يصعب

هاللحظه زايد كسرك..رحلت شريكة عمرك
حگك عليها تلبس اسود..راحت خديجه يامحمد
- - -
أهل الأرض إلها تون..واللطمه فوگ اللطمه
من غابت أم الزاچيه..غابت معاها البسمه
هاي اللي لولاها انمحت..احروف اومعاني العصمه
بس الله خلاها شمس..تضوي ابسماء الرحمه
..
أول سند بالدعوه..اوكل التملكه فدوه
بَمرك مشت والباري يشهد..راحت خديجه يامحمد
- - -
ماجف دمع عينك أبد..تذكرها دوم ابالك
هاي اللي من دون البشر..تحچي ابصدق اقوالك
مالحظه شكت يالنبي..ظلت تشوف افضالك
اولمن دنى منها الأجل ..وسفه تغيّر حالك

صرت ابحزن ترثيها..اومن ثوبك اتغطيها
يل مدمعك يجري على الخد..راحت خديجه يامحمد
- - -
اشلون الگبرها ابيمنتك..تدفنها يابوالاطهار
اوتلگاها بنتك فاطمه .. مستوحشه من الدار
صارت حزينه ياوسف.. واعليها حاطت اكدار
لا شك عگبها تنتحب..اومنها الحشا يلهب نار

حين اللي غابت أمها ..وسفه انخطف مبسمها
الهسه الحزن عدها تمدد..راحت خديجه يامحمد
- - -
آية فگدها تستمر..ما تنتهي ياطاها
والهسه افواج المَلا..ابحرگه اوقهر تنعاها
او.جن اوإنس من كل محل..تذكرها ماتنساها
اعليها تظل امگصِرَه..اشما تحچي في طرواها

أُم راضيه اومرضيه ..وامشرْفَه لحسينيه
هاي الذكرها اشگد تخلد..راحت خديجه يامحمد
- - -

عادل العبد الله
30/3/2023
https://www.tgoop.com/adela313
رحم الله من قرأ سورة الفاتحة واهداها لروح الوالدة *آمنه العبد الله*
والشاعر *حسين العبدالله*

القصيدة لسان حال السيدة فاطمة عليها السلام
بعد فقد امها السيدة خديجة عليها السلام .

رحلتي ياخديجه عن لعيون
واسودت جفوني واظلم الكون
اه مجروح الگلب
اه وادموعي تصب
***
يمه يحبيبه حزينه وابچي ليل انهار
يمه محد ظل اليه اتراكمت لكدار
يمه وابحث عن خيالچ في زوايا الدار
والتهب گلبي ييمه والدمع مدرار
.
وانا بعدچ ترافگني الهضيمه
واصيرن من صغر سني يتيمه

آه صرتي بالترب
اه وادموعي تصب
***
من غيابچ يالحنينه دنيتي ظلمه
وصرت انادي ابكل شجوني يمه يايمه
تعصف اعليه المصايب وابگه متألْمه
وكل جرح بيه ييمه مو سهل لچمه

من عگبچ عليه تهجم انذال.
ياحسره اوبعد يتبدل الحال

اه حگي ينغصب
اه وادموعي تصب
***
من ترحلي بويه يرحل واشبچ ابصبري
وينغصب حگي ييمه و ينهضم قدري
ودومن اتمنى المنيه تخطف العمري
ومره انحب ليكم آنه ومره لكسري

مذبوح الفرح بعدچ يروحي
ومن رحتوحِمم تلهب جروحي

آه مفجوعه الكُتُب
آ وادموعي تصب
***
موحشه اعليه الليالي والله الشاهد
وتشعل ابداري عجيبه زمرة الحاقد
وتالي يا يمه يگيدو حيدره القائد
يسحبونه وعالأذيه صابر وصامد

وأنا بذيالي اتعثر وانادي
خلو بو الكرامه يالأعادي

آه من جور النُصُب
آه وادموعي تصب

* * *
يمه راح افگد شبابي وافگد اعيالي
اوكلشي يتغير حسافه اويندهش بالي
شالجنايه وآنه حُرمه امن العلي العالي
ينجهل شاني واموتن يا وسف تالي

وابو الحمله علي يخفي لي گبري
واذا المهدي إجا ويّاه سري

آه چني بالغُرُب
آه وادموعي تصب
.
* * *

عادل العبد الله
https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله
١٤٣٦هـ

ماتت يطه المصطفى.. أم الزچيه
اودارك بعدها مظلمه ..هاي المسيه
---
غابت خديجه والحزن ..خيم على الدار
اودمعك على اخدودك صفى..يالهادي مدرار
اوگلبك تفطر سيدي..هم اشتعل نار
الله يصبرك يالنبي..ابهاي الرزيه
---
أم البتوله الآمَنَت.. بسم الجلاله
بذلت لك اموال اشكثر.. لجل الرساله
وگفت جبل ماينحني.. الكيد الضلاله
الهذا رسمها ابخاطرك.. مايخفه ضيه
---
وجهك تغير منظره..من هيّه راحت
وابنيْتَك الزهره بچت ..واعليها صاحت
اوكلها ملايكة السما ..بس ليها ناحت
واتعظم اجرك يالنبي ..ابحاله شجيه
---
التارس ضواها مقلتك..غطاها لتراب
الله يعينك عالجرى ..من أول امصاب
اوجرحك عليها للأسف..يالهادي ماطاب
والمهجه من جمر الأسى..تبگه لظيه
---
آية فگدها نزلت..اورتلها جبريل
اوحتى صباحك ينتحب..إلها مع الليل
اوحيدر وصيك دمعته..كل لحظه اتسيل
ايواسي مصابك بالألم ..حامي الحميه
---

عادل العبد الله
18/4/2021
https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله

اوداعة الله ياخديجه الطاهره
ادموعها الشيعه إلچ متناثره
***.
اوداعة الله انصيح والمدمع همول
الف رحمه اعليج يا أم البتول
امصابچ ابگلب النبي وشگد مهول
ولجلچ املاك السمه متكدره
***
صاحت اعليچ الزچيه بالنحيب
وعگب عينچ اصبح العالم كئيب
ويستعر لمصيبتچ گلب الحبيب
ابفرگتچ عجبه تغيّر منظره
***
وجه طه المصطفى صاير حزين
ويجذب الحسره غدى ويه الونين
واصبح ايواسيه جبريل الامين
من صفيتي يا وسف تحت الثرى
***
ياخديجه انتي نبع المكرمه
وبسمچ اتلوذ الارض ويه السمه
اشلون خليتي الزچيه فاطمه
اميتمه ونار القهر متوجِره
***
ياحسافه عگبچ ايزيد الجراح
وفاطمه بنتچ تظل دوم ابنياح
الليل كله ابلاطعم ويه الصباح
اوماتذوگ النوم بت خير الورى
***
ياخديجه الزهره بعدچ تنعصُر
والضلع تاليها عجبه ينكسُر
بيد اصحاب الخيانه والغدُر
ابهالمصيبه كل عقول امحيره
***
بعد بنتچ تصبح العيله ابشتات
وكل حفيد اويه حفيده ابنايبات
منهم المقتول يم نهر الفرات
حالته ابحر اللظه متغيّره
***
عادل العبد الله
15.6.2016

https://www.tgoop.com/adela313
رحم الله من قرأ سورة الفاتحة واهداها لروح الوالدة آمنه العبد الله

خديجه اللي اصطفاها رب لكوان
سيرتها قداسه اومنبع احسان
بذلت كل عطاها..فدوه لجل طاها
بارينا شكرها
---
خديجه اللي..اخدمت طاها..شهدت إلها ليام
العلي العالي شكرها دوم..بداية صدر لِسلام
اوهبت كلشي..لجل دينه..للعز رفعت اعلام
بتفانيها..اومحبتها..نالت أشرف اوسام

أم الزاچيه أم الكرامات
عليها صلت املاك السموات
سيرتها اوثناها..فدوه لجل طاها
بارينا شكرها
---
عقيدتها ..ابرسول الله..عظيمه من مثلها
تقدمه ابكل ..امر عدها..يظل طاها أملها
منه اتشوف..كرامه اهواي..اويسولف عن فضلها
خديجه اتظل..وعاء النور.. الموالي اشگد يجلها

يكفيها فخر جَده للاطهار
والباري ابگلبها اودع اسرار
والخير الإجاها..فدوه لجل طاها
بارينا شكرها
---
سند ظلت..لبوالزهره..يفرح من يجيها
اومواقفها..نرتلها..اونباهي دوم بيها
حصن هيه..ابمزاياها..الوحي يركع إليها
ابعبادتها..حچه القرآن..سلام الله عليها

مصونه اوطاهره طيلة عمرها
إلى هسه نظل نجني ثمرها
بارينا ارتضاها..فدوه لجل طاها
بارينا شكرها
---
صعب نوصف..جلالتها..اومكانتها النجيبه
رغم لرجاس..تظل نبراس..والطاها حبيبه
ما وحده..تشابهها..من الله گريبه
اوتاليها..اجلها صار..والزهره ابمصيبه

تنعى فاطمه واتعلّي لونين
والهادي النبي يصفچ الچفين
واجا حيدر عزاها..فدوه لجل طاها
بارينا شكرها
---
نبينا آه..جهزها..اوغسلها اودفنها
اوبگت فاطم..على امها..تون زايد حزنها
وصار العام..عام احزان..والأمه ابشجنها
اوعرش الله..مع الاملاك..ينعى اويحچي عنها

ماتت ياوسف أم الاطايب
والكون الفگدها وجهه شاحِب
والعالم رثاها..فدوه لجل طاها
بارينا شكرها
---
عادل العبد الله
4/3/2025

الفاتحة لروح الوالدة *آمنه العبدالله*
والشاعر *حسين العبدالله*

https://www.tgoop.com/adela313