tgoop.com/ahm9ll/954
Last Update:
بركبتك زينب امانه .. بويه عباس
حيدر تعوض مكانه .. بويه عباس
هاك اخذها الرايه .. يبني دك الثايه.. بويه عباس
****
راح اغمض عيني واتركلك مكاني
استورثت عباس كل طيبي وحناني
ادري بيك بكل حرب كرار ثاني
ولو نزلت المعركه سبع المثاني
يبني كبعه بحنانك .. ياضوه الكون
تارس الدنيه مكانك .. ياضوه الكون
بهجمة الرمايه . يبني دك الثايه.. بويه عباس
****
ياترف يغفه النده اعلجفوف ادينك
يالفتحت الكل سهم بيبان عينك
يالي قاسمت النفس بيني وبينك
يالي تخجل روحك وتزهي بحنينك
ضلك بكل خيمة غيره .. بوادي الاطفوف
برايتك زينب اميره .. بوادي الطفوف
نفس عودك هايه . يبني دك الثايه.. بويه عباس
****
هاي اخيتك يا كمر يابو الشهامه
تغفه اريدن بالخيم مثل الحمامه
بضل وجودك يشعر النام بسلامه
ليله يصعب عاليتيم الماينامه
زينب اليله يتيمه .. وانت كفال
لاتضل بلايه خيمه .. وانت كفال
وانت منطي حجايه ..يبني دك الثايه.. بويه عباس
****
ادري من يوم الصرت تمسح بأثرها
خايف يشوفون ضلها بضل كمرها
الرايه بيدك باجر ترف اشكبرها
بيها صيت الكنطره المحد عبرها
يسجد اليل بخيالك .. ياهوه حسين
صفنت الدنيه بجمالك .. ياهوه حسين
زمزم انت ومايه . يبني دك الثايه.. بويه عباس
****
يوم شافك مالك بذيك القيافه
استعجل وكال الكمر بعده بترافه
مو كمر حيدر دخل ميدان شافه
ياغيور تلوكلك حت الخلافه
بس تريد حسين اميرك .. وانت قائد
ومايشيل الرايه غيرك .. وانت قائد
تطب للمسنايه .. يبني دك الثايه .. بويه عباس
****
يالي راسك مارفعته كبال عيني
ولو ندبتك تركض مدنك تجيني
بكل خجل عباس تغفه بين اديني
اخذ اجفوفك واشم وامسح جبيني
امسح بجفك يروح .. ادري مكطوع
خضبت شبي بجروحي .. ادري مكطوع
والنوايب جايه .. يبني دك الثايه .. بويه عباس
***
تمت
احمد الخفاجي
BY الشاعر أحمد الخفاجي
Share with your friend now:
tgoop.com/ahm9ll/954