لسان حال بنات رسول الله
بشام


الـعَـزيـمـه براس ابـو فاضل.. نشدها
أبـيـسـر والـشـاف حـالـتـنـه.. نشدها
عــلــيــنـــه طـــوّل الـــوادم.. نشدها

بــسـوگ الــشــام راوونـه الــمــنـيــه

                                      *---------------*---------------*

✍خادم الحسين (ع)
الشاعر رعد الجريخي

نزلة  في شجاعة السيدة زينب عليها السلام

هاشمية وبت علي.  ما يذلّوها
هاشمية وبت علي.  ما يذلّوها
.....

هيه زينب تبقه هيه   هاشميه وماتذل
حتى لو عالناگه ركبت  چتّفوها بالحبل
بيها هيبه من ابوها  وين ما تمشي وتحل
مثل حَدّ السيف ردها  عالعدو من تنسئل

لو حچت تسكت زلم.  ما يسكتوها
هاشمية وبت علي.    ما يذلّوها
......

من علي ورثت شجاعه وبيها عـزّه ومفخَرَه
ما تطخّ الراس هيبه  اخت سبع الگنطره
شافت وحملت مصايب  مثل زينب يا مَرَه
صلبه وتحدّت عدوها  والنعم بت حيدره

راسها بعلو النجم  ما يدنگوها
هاشمية وبت علي.  ما يذلّوها
......

صح سبيه وعالهزيله گطعت دروب السبي
لكن يشوفوها آية  مو مَرَه بهيئة نبي
قهرت السلّب خدرها ومات منها الناصبي
تنعمي عيون التصدها  كشخه سوّت للعبي

ما تلين وتنحني  شما يأذّوها
هاشمية وبت علي.  ما يذلّوها
...........

هيه بت مَنْ حتى تنذل  بت علي حامي الحمه
الوگفت بوجه السقيفه  هيه امها فاطمه
اجه الدور ألهه العقيله  الهاشمية العالمه
وگفت بوجه آل امية  الظلمت وسفكت دمه

كشفت وجوه الظلم  ثورة شافوها
هاشمية وبت علي.  ما يذلّوها
...........

بمجلس ابن زياد زينب  شامخه بوگفة جَبَل
من سأل عنها وسئلهه  ردّت عليه ونذهَل
شلون شفتي مقتل اهلج  ظنّه تبچي من سئل
(ما رئيت الّا جميلا)  صاحت بوجهه وجفَل

بچّت عيون العدو  ما يبچّوها
هاشمية وبت علي.  ما يذلّوها
...........

بمجلس يزيد العقيله  دخّلوها بلا ولي
ذلّته وكسرت غروره  والنعم من بت علي
كيد كيدك وسعه سعيك  لابد الحق يعتلي
والله ما تمحي ذكِرنه  للحشر آنه وهلي

صرخة بالشام اعتلت.   خل يسمعوها
هاشمية وبت علي.       ما يذلّوها
..........

كمّلت مشوار اخوها   زينب وماعافته
الثوره بالطف ابتداها  وهيه نشرت ثورته
حسين هزّ عروش امية  والعقيله سنّدته
فجّرت بالشام ثوره  والظلمهه كشفته

راية رفعت للنصر.  ما يطيحوها
هاشمية وبت علي.  ما يذلّوها

#سيد_زيد_الفحام

__________

وداعاً يا حُسين. وداعاً يا حُسين
وداعاً يا حُسين. وداعاً يا حُسين
........

حسين يبن امي صحت آنه العقيله
راح اودعك من على الناگه الهزيله
ما يخلّوني اجي لجسمك اشيله
آل امية اخذوني مسبية ونحيله

وداعاً يا حُسين. وداعاً يا حُسين
وداعاً يا حُسين. وداعاً يا حُسين
........

من بُعد انظر الك جثّه سليبه
بالسيوف مگطّعه وبالدم خضيبه
لا تگلّي اختي عافتني الحبيبه
والله مو بيدي رحت عنك غريبه

وداعاً يا حُسين. وداعاً يا حُسين
وداعاً يا حُسين. وداعاً يا حُسين
........

ارد اودعك ارد اضمك بين ادية
خويه منعوني بحقدهم آل امية
عالهزل مچتوفه وخذوني سبية
بلا دفن عفناك مرمي عله الوطية

وداعاً يا حُسين. وداعاً يا حُسين
وداعاً يا حُسين. وداعاً يا حُسين
........

خويه للكوفه مشينه بلا خدرنه
وبيد چتّالك يبوالأكبر امرنه
خوفي لا بالسوگ يبن امي يمرنه
چم مصيبه وچم عذاب الينتظرنه

وداعاً يا حُسين. وداعاً يا حُسين
وداعاً يا حُسين. وداعاً يا حُسين
..........

راسك براس الرمح يبره الظعينه
عاليتامه وعالحرم مشبوحه عينه
بالسيوف وبالحجاره مجرّحينه
وشيبك بدم الوريد مخضّبينه

وداعاً يا حُسين. وداعاً يا حُسين
وداعاً يا حُسين. وداعاً يا حُسين
............

تنظر لراسك رقية الفارگتهه
تصيح بابا حسين بس ما جاوبتهه
تبچي طول الدرب ما سكتت شفتهه
يتّمت كل اليتامه ويتّمتهه

وداعاً يا حُسين. وداعاً يا حُسين
وداعاً يا حُسين. وداعاً يا حُسين


سيد زيد الفحام
_______

الحمد لله

الشكر لله

نزلة / للإمام السجاد عليه السلام


عايش باحزانه والدمع عنوانه
.................

قصّة السجاد صعبه تفجع اليقراها
بس دمع وجروح بيها والحزن معناها
تبتدي بالغاضريه من شهد بلواها
عمره مانشفت دمعته ولاگدر ينساها
كربله بلسانه والدمع عنوانه
................

ياعليل الشاف اهله عالترب مذبوحه
بس علي السجاد هذا والمصيبه بروحه
حگه لو يبچي عليهم ما نلومه بنوحه
راس ابوه عالرمح شافه دم تسيل جروحه
عالترب جثمانه. والدمع عنوانه
..................

اعظم وافجع مصيبه عالامام الصابر
من خذوا زينب سبيه بلا محامي وناصر
ينظر السجاد زينب عالمصيبه تكابر
بالمرض مهدوم حيله وي خواته مسافر
چتفوه عدوانه. والدمع عنوانه
...................

واجب نذكره يشيعه نلتزم منهاجه
منهج السجاد عدنه كل وكت نحتاجه
وارث الهادي مُحمّد هوه لابس تاجه
لو نخينه الباري بسِمه الله يگضي الحاجه
ميّت ويرعانه. والدمع عنوانه
...............

خلّص ايّامه مناحه والشهود ادموعه
يبچي عالمرضوض جسمه کسّروها ضلوعه
حفرت خدوده المدامع عالوجه مطبوعه
حالة السجاد هايه لوعه تتبع لوعه
واسع باحسانه والدمع عنوانه
...................

ويلي من سمّوا دليله گطّعوا احشائه
من بعد كل المصايب سمّموه اعدائه
شيّعوه مسموم ويلي للگبر ابنائه
واجب نقيم العزاء انشارك بأحيائه
نبتغي رضوانه. والدمع عنوانه

سيد زيد الفحام
_______

ياعلي السجاد

ياعلــي السجاد نــاده الباقر
بويه من بعدك غريب وحاير
ــــــــــــــــــــــــــــــــــــــــــ

بويه يل گظيت عمرك بالحزن
وعلى امصيبة والدك تبچي وتون
اليوم بيدي شلون اغمضلك جفن

بجفنك اهات وصور للعاشر
ـــــــــــــــــــــــــــــــــــــــــ

يامصيبة فگدك أتهد الگلب
صحت اه ياحسين بمصاب المحب
انت مسمــوم وحبيـبك منسلــب

وانا بفراگ الاحبهم صابر
ـــــــــــــــــــــــــــــــــــــ

بويه يالسجاد اضمد ياجرح
وانا بعيوني شفت سم وذبح
ريت ماصبح يابو الباقر صبح

اظلم المصباح وانت امسافر
ـــــــــــــــــــــــــــــــــــــــــــ

يامحرم مابطل بيك البچي
من علي الاكبر لابو الباقر علي
بيك ماتوا يامحرم كل هلي

امس جرحك بالدليل وباچر
ــــــــــــــــــــــــــــــــــــــــــ

هاي هيه اوياك ماشوفك بعد
ياعلي يابويه رايح للابد
وبالبقيع اهناك گبرك والوعد

ومن هلك ياحيف محد حاضر
ــــــــــــــــــــــــــــــــــــــــــــــ

وين ابوصالح يشوف اللي جره
ونار اهلك بالدليل اموجره
ياوكت يبرد گلب لمخدره

ودم علي السجاد ليك يناطر
ـــــــــــــــــــــــــــــــــــــــــــ

ادموع نذرف لو مشاعر بالعزاء
بمجلس المسموم يجمعنه البكاء
اشما مشينه نرجع الطف كربلاء

اهناك للظل بالعراء اناصر


الشاعر فاروق الغنامي

(ياناگتي) شور



يا ناگتي الهـزيلـه الهـزيلـه الـهـزيلـه
يا ناگتي الهـزيلـه الهـزيلـه الـهـزيلـه

*---------------------*-----------------*
بـاچـر نــگـطــع الـبَـيـده
ويـگـودچ شـمــر بـيــده
إمشي ومشيـچ بـهـيـده

سفـرت حـزن طـويلـه طـويلـه طـويلـه

*--------------------*-----------------*
أحـدي بـهيـده يالـعـرجـه
شــتـئـمــل بــعــد ورجـه
سـوتـنـي الــزلـم فــرجـه

راح الـخـدر كـفـيلـه كـفـيلـه كـفـيلـه

*-------------------*-------------------*
عَـلـيّـه اشمصعب الـروحـه
أروحـن وانـه مـجــروحــه
والـمـثلـي شـلــه ابــروحـه

صعبه الـضـعن رحـيلـه رحـيلـه رحـيلـه
*--------------------*--------------------*

يـنـاگــه بـهـونـچ بـهـونـچ
شـمـاتـه اللي يحيـطـونـچ
عَـرجـه وهـزلـه يـدرونـچ

مـاكـو بـعـد وسـيلـه وسـيلـه وسـيلـه

*--------------------*--------------------*
فـوگ الـحـسـره والــغـربــه
اطيحـن بـالـيسـر صـعـبـه
الــشــامــت تـســر گــلـبــه

آنـه الـچـنـت عـقـيلـه عـقـيلـه عـقـيلـه
*---------------------*------------------*

يـانـاگــه الـگـلـب خـوفـه
لـمّــن نــدخــل الــكـوفـه
أصـيـرن بـيـهـه سـالـوفـه

گـلبي انـجـرح يـويلـه يـويلـه يـويلـه
*----------------------*------------------*

والـشـام أسمـعـت بسمـه
گـــالــوا نـاخــذّچ يــمــه
چـبـيره وتـجـرح الكـلمـه

عيب الـدمـع أسـيـلـه أسـيـلـه أسـيـلـه

*----------------------*------------------*

✍خـادم زيـنـب( ع)
الشاعر رعد الجريخي

للاربعين
.
.
.
هاج الحنين بروحي .. سولفلي يامذبوحي
احچيلي عن جرح الرمح
وانه احچي عن اجروحي

----------------------------

يالنابت ابـراسك رمـح .. شلونك يبعـد اعيوني
لونك احسه امن التعب .. يشبه امن الحر لوني
متاذي گلي امن الرمح .. لومن حچي الگادوني
بعيونك الذبلانه احس .. نظـرة الـــم لمتـــوني

كل هذا وتحس بيه .. يالمــنترس حــنيه
گلــبك اليه منفتح
وانه احچي عن اجروحي

-----------------

البيه وحقك مو جرح .. واحــد ولاهـــن مـيه
الف وتسع ميــه الذي .. يحــسين صـارن بـيه
بالرايه مأساتي بـدت .. مــن طاحــت الحـنيه
ونختمت ابشام الحزن .. من غفت عين ارقيه

ابنــادم المايحــملـــهن .. طاحن على اختك كلهن
وحدتهن اتگول الملح
وانه احچي عن اجروحي

-----------------

خويه الشفتهن بالدرب .. ماينحچن يالغالي
ياهي الاسولـفها الك .. وياهي التضل ابالي
زينب يبو اليمه تطب .. ديــــوان اول تـالي
وتصور ابنــص الزلم .. حرمـه بلايـــه والي

ثق مقتلك حسيته .. الديون من طبيته
واستوعبتها منذبح
وانه احچي عن اجروحي

-------------------

رمحــك يـخويه بالارض .. لو گعـــدو اينبتــونه
ايذبحوني كل ما ريضو .. راسك امن ايحركونه
چم مره من عدهم وگع .. ياخــويه ويــشـيلونه
يتعـــمدون ابهالـــفعل .. گلب اختك ايحرگونه

شحچيلك وشحچيلك .. ومن ياهي خويه اشكيلك
والصار لاماينصلح
وانه احچي عن اجروحي

-----------------

كلما اســولف عالسبي .. ابصدري الحچي يتكسر
وليش الملامــح يالاخــو .. ابوجهك احس تتغير
بس وحده اسولفها وبعد .. ما احچي يابو الاكبر
خــويه خــذوني للســـبي .. بنــاگه تــگوم وتعـثر

كل ماتهل اعيوني .. ايضربوها ويضربوني
لاليلي ليل اولا صبح
وانه احچي عن اجروحي
_
حيدر تركي الكربلائي