قصيدة للمشايه
*---------------*
انعكدت النيه ورفعنه الرايه
وجينه الك يابو علي مشايه
*----------------*------------*
جينه الك يابو علي طول ابعرض
ياللي حبك بينا يسري اويه النبض
هذا ممشانه صبح واجب فرض
وكل وكت يحسين الك وفايه
*-----------------*------------*
كل وكت يحسين نتعنه الصحن
ما تهمنه المغرضه و اهل الفتن
المهم يرضه علي او ام الحسن
او يرضه مهدينا علينا ابهايه
*--------------- *------------------ *
يرضه مهدينا المهم طول الدرب
وبدورب حسين تلكه بس محب
احنه شيعه ويسهل علينه الصعب
واحنه للأصعب نضل شرايه
*--------------- *------------------ *
لكربله حافي گصدت لكربله
قافلة الزوار تتبع قافله
آه يحسين او هله نقره اله
بالضريح اتصير احله اقرايه
*--------------- *------------------ *
بالضريح اتصير افواج وبكاء
يا حسين ابكل وكت هذا النداء
تبقى ملجأ للحيارى كربلاء
ويبقه گبر احسين هو الغايه
*--------------- *------------------ *
✍الخادم المقصر
مصطفى النائلي

بــالخرابــه انفجعت إكَلوب الحرم
نـاحن إعله حسين والصدر إنلطم
***
إتيسرت هالنسوه من طف كربــله
بس عليل اللي بكَه اويـــــه العايله
بين حسره وبيـــن دمعه الهــــامله
إتجتــــفت نسوانــكم يهل الشــيم
***
جتفوهـــــا ومــــــا سلم الهن متن
والسيـــــاط اعله الجتف ظلة تون
وبحنين النــــاكَه كلـــــها من تحن
وين يــــاعباس يـــــــاراعي العلم
***
وين يـــــاعباس وينك يـــاحسين
من بعدكم صرنه تـــالي اميسرين
مــــا رحم بينه يزيــــد إبن اللعين
حتى بالاطفال تــــــــالي ما رحم
***
طفله من أطفالــــــكم ضلة تصيح
وين ابـوي حسين والمــدمع يسيح
مـــــا درة بـــــــالوالد ابطفه ذبيح
وشحكم للطفله هالطـاغي اشحكم
***
بــالطشت راس الابو من انتصب
قدم الـــراس الـــرقيــــه وللعجب
كَالت انـــــا حسين ردته مو ذهب
كَلــها هذا اليوم ليج اللـــي انقسم
***
إتحيـرت هالطفله والعكَل اندهش
والطشـت فتحته والكَلـب انخمش
شافت الراس إوجفنــــها ما رمش
طاحــــــت الطفله وكثر بيها الالم
***
بويـــه ليش المنحر اصبح منكَطع
ليش ضل جسمك يبـــويه منصرع
بعــــــدك اشينفع يغالـــــي هالدمع
ريت انــــا راسي بويه اللي انهشم
***
نامت إعله الراس هالطفله وبجت
لحظه لنها وختفه الصوت إوسكت
إبيـــا وضع زينب لكَتها من إجت
ميته فوكَـ الراس والمــــوت انختم
***

الشاعر اياد الديراوي

ميمر

منك الك يامولاي. درب العشك ممشانه
..................

نمشيلك وكل كلب رافع رايه
ممشه الدمه بشريان وانته الغايه
ان الذين امنو المشايه

من كلب ولسان وياك. ونظراتك انته ويانه

..............

السبعه العجايب مو عجيبه الفكره
تبقه انته الاعجب والله يبن الزهره
مركز العالم صار وسط الحضره

ومن كربلاء الاحرار. صار الفلك دورانه
.................

بس الك معقوده تظل النيه
ياملك وزيارتك مليونيه
حزام احنه صرنه عالكره الارضيه
بكل اتجاه وكل صوب. مشايتك تلكانه
................

ياخامس اصحاب الكساء الازهر
كلشي ايتغير ونته ماتتغير
يوم اربعينك جنه يابو الاكبر

كل الرسل والاملاك تتعنه الك مولانه
................

متفضل انته وكل فضل ما عدنه
ومن خيرك احنه نخدم وعزبنه
نلوگ لخدمتك وانته التلوگ النه

والخادم انعرفه شلون ؟. اسمك بطرف لسانه
....................

بمدرسة حبك خادمك متعلم
قانون بيهه الخدمه للمتفهم
حِب واسكت وحِب واعمل وحِب واخدم

العارف بحقك مولاي. انته صرت قرآنه


حسين صادق العقابي

الحمد والشكر لك يا رب العالمين على هذه النعمة

قصيدة لشهادة رسول الله
(ص وآله)
.............مجزوء الرمل........
.
وامحمداه. وامحمداه
وامحمداه . وامحمداه
.
.
ذابَ عـرشُ اللهِ حُـزناً ..
وأرتدى ثوبَ السـواد
وعَلـت في اللـوحِ رآيه
أعلنت يـــومَ الحـداد
أيُ خطـبٍ مــــا تُراهُ
زلزل السبـعَ الشِـداد
قد أتى صوتُ المنادي
ناعياً خيرَ العـــــباد
.
وامحمداه .. وامحمداه
وامحمداه .. وامحمداه
.
.
أمـةُ الأحقـادِ عـــادت
في رُبىَ الدارِ تصول
عجلهم أمسى خلــيفه
يــزدري تلك العــقول
سيــدي و الســامريُ
عَــذبَ قَلــبَ البتـــول
ذلكَ الصُعـلوكُ نادى
أحرِقوا بيـت الرسول
.
وامحمداه..وامحمداه
وامحمداه .. وامحمداه
.
.
سَيدي مَن قَــالَ تَهجُر
أعلنَ يــــومَ البــلاء
ساق أهـلُ الجـــاهليه
نَحو بيـــتِ الأنبــياء
خلف بابِ الدارِ ويلي
هشـّموا قلبَ السماء
سحقوا ضـِـلعَ النـبوه
عَـبّــدوا دربَ الـــدماء
.
وامحمداه ...وامحمداه
وامحمداه.. وامحمداه
.
.
بنتُ عِجلَ القـــومِ نــالت
كُـلَ ميـــراثِ الإمين
والبتــــولُ ويـــحُ قلــبي
إرثُـها صِفــرا اليدين
عُد الى الزهـراءِ وانظر
خـــدُها والمُقلتـــــين
وأستمع جُــرحَ الدمـــاءِ
ناعــياً أم الحُــسين
.
وامحمداه .وامحمداه
وامحمداه .. وامحمداه
.
.
إن تسل عن روحِ قلبك
إرثُها نَــزفُ الــدمــــوع
سطـرةً في الخدِ تـروي
سيدي كَسـرا الضلوع
فاطــمٌ أمســـت غريــبه
بيـن هــاتيك الجموع
في ظــلامِ الليلِ تنــدُب
سيـدي حتى الطلـوع
.
وامحمداه . وامحمداه
وامحمداه .. وامحمداه
.
.
ثَغرُ مَن قَبلـــتَ ثَــغره
أرتـوى سُــمَ الحتوف
نَحرُ مَن قَبلــتَ نَحره
قطــــعوهُ بالســـيـوف
سيدي لو كُنتَ حاضـر
إذ ترى يـومَ الطفوف
بيتُك أضـــحى ذبيــحاً
والعدى فـــيهِ تطوف
.
وامحمداه . وامحمداه
وامحمداه .. وامحمداه
.
.
لاتنسوني ووالدي من فضل دعائكم المبارك

حسن الموالي الفاطمي

.

.

قصيده نزله. للنبي محمد. (ص )
لسان حال الزهراء عليها السلام
🔸▪🔸▪🔸▪🔸

    اه يابـو الـزهـره اه.    اه يابـو الـزهـره اه

                   🔸▪🔸▪🔸

الـيـوم دمـعـات البـتـول.   تهمل الفگـد الرسـول
تصـرخ بحـرگـه وتـگـول.  مــوتـي اتـمــنـه وراه
                اه يابـو الـزهـره اه
                اه يابـو الـزهـره اه

الـدمـع مـن دم يسـيل. وليلـي من بعـدك طـويل
تراب گبرك گمت اهيل. وصحت من روحي فداه
                اه يابـو الـزهـره اه
                اه يابـو الـزهـره اه

گـمـت الـطـم عـالـضلـع.   ورگض گدامي الدمع
وخلـصت مـثل الشـمـع.   مـن بعد نوره وضواه
                اه يابـو الـزهـره اه
                اه يابـو الـزهـره اه

يـابـعـد نـاسـي وهـلـي.   مـن بـعـد عـيـنـك علي
هـمـه مـاضـن ينجـلـي.   گــلـبـي بـالـونـه جـواه
                اه يابـو الـزهـره اه
                اه يابـو الـزهـره اه

بويه بـس عـني مشـيت.   بالذبـول اني ابتديت
وباليبغـضـوني ابـتـلـيت.   وحقده عالعتره بداه  
                اه يابـو الـزهـره اه
                اه يابـو الـزهـره اه

بويه بعدك كلشي صار.   داري شـبـو بـيـهـــا نار
جـنهـا تطـلب بينه ثـار.   الــهــبـل رادت رضــاه
                اه يابـو الـزهـره اه
                اه يابـو الـزهـره اه

حـيـدر  ابـوده يـهـد.  يسـحـب بـسـيـفـه ويـرد
لأن مـنطـيلـك عـهـد.  مـايـسـلــه اعـلـه الاجـاه
                اه يابـو الـزهـره اه
                اه يابـو الـزهـره اه

اسـمـعـه يتمـتم كـلام.  والله لو اسـل الحسـام
الــه اســويـهــا ضـلام.  ابـابـي احــد لــو دنــاه 
                اه يابـو الـزهـره اه
                اه يابـو الـزهـره اه

بوجهه اقره شگد حجي.  يروح بالبيت ويجي
يگول بس منيه ارتجـي.  رخصه ينطيني الاِله
                اه يابـو الـزهـره اه
                اه يابـو الـزهـره اه

بالخـتام الهـا لـعـزاء.  كـلـنـه خـل نـهـتف نـداء
كـــربــلاء كـــربــلاء.  قـلــبـي صــار مـبـتـغــاه
                اه يابـو الـزهـره اه
                اه يابـو الـزهـره اه

       🔸▪🔸▪🔸▪🔸▪🔸▪🔸
               تمت بعون الله تعالى

            
           عقـيل حسـين الگـرعـاوي

بسم الله الرحمن الرحيم
قصيده الى النبي محمد -ص-
كلام بين الامام علي ع وفاطمه الزهراء ع
ــــــــــــــــــــــــــــــــــــ

الـزهـره ويـه المرتـضـه دمـوعهـم تـجـري سـوه
اصـبح العـالم حـزين يـارسـول الله الامـيـن
------------------------------------------
1 فــاطـمـه
يـاعـظـم فـرگـه ابـويـه شـرد اوصـفـهـه شـأگـول
بـعـد مـاينـزل عـليـنـه الـوحي ويحـاجي الرسول
مــن بـعـد عـيـن الـنـبـوه ريـت عــمـري لايـطـول
يـاعـلـي وجـنـهـه الـمـصـايـب بـعـدعـنـه ماتـزول
مـن شـفـتـهـه اجـمـعـت وبـالسـقـيـفـه خـطـطـت
بـيـن الـحـقـد الـدفـين يـارسـول الله الامـيـن

ـــــــــــــــــــــــــــــــــــــــــــــــ
2 عـلـي
انـكـســر ظـهـري يـزهــره وبـعـد مـا اگـدر اگـوم
من دفـنـت انـي الرسـالـه ودعـت ذيـج الـرسـوم
جـنـت روحي منـي تـطلـع لـو رحل من عدنه يوم
هـسـه يـم الحسـن فـرگـه بيـهـه مـفـتاح الهـمـوم
الـبـايـع بـيـوم الـغـديـر يـنـكـر الـيـوم الامــيـر
ولـلـولايـه نـاقـضـيـن يـارسـول الله الامـيـن

ـــــــــــــــــــــــــــــــــــــــــــــــ
3 فـاطـمـه
والله يابو حسـين صعبـه مـن سـمع يحجي النبـي
قـلـم جـيـبـولي اكـتـبـلكم گـال يـهـجـر صـاحـبـي
نـتـرك احـنـه الامـر شـورى وخـطط الـهه الناصبي
لطـمـت وجهـي من سـمعته هيج يحجي الاجـنبي
ومـن مـتـت مـا شـيـعـك ولاحـظــر بـجـنــازتـك
بـالـخـلافـه طـامـعـيـن يـارسـول الله الامـين

ـــــــــــــــــــــــــــــــــــــــــــــــ
4 عـلـي.
بـعـد يـم الحسـن لوعـه واجـب اعـلـيـهـه الصـبر حـرگ دارج يـالـزجـيـه وظـلـع مـنـج يـنــكـســـر وانـي مـلـزوم بـوصـيـه ونـار گـلـبــي تـســـتــعــر عاصـفـه ريـح السـقـيـفـه تـوصـل الـگـطـع النـحـر
نـحـر الحـسـين الشـهـيد الـيـرفـض يـبـايـع يـزيد
بـثـارجـدهـم طـالـبـيـن يـارسـول الله الامـيـن

ـــــــــــــــــــــــــــــــــــــــــــــــ
5 فـاطـمـه
هـواي حـاجيـلي الـرسـول اعله الـمـصايب ياعـلـي
بـس خـبـر يـبـجـي ويـعـوفه من يصـل يم السبي
مـن اســم زيـنـب يـذكـره يـنـحـب وگــال اتـركـي
هـسـه يـابوحسـيـن اريـدا اسـمـعـك تـحجيلي بـي
لـيـش مـن ذكـره يگـول اه و يــون الــرســــول
ويتـركـه ويبقى حزين يارسـول الله الامـيـن

ـــــــــــــــــــــــــــــــــــــــــــــــ
6 عـلـي
فـدوه اعـذريـنـي يـزهــره مـووكـت هـذا الـكــلام
مـخـتصـر بـس انـي اگـلـج تـنـسـبي عـيال الامـام
ومـن بـعـد ذبـحـه زلـمـهـه زيـنـب وحـرگ الخـيـام
تـصـفـه بـس هـيـه كـفـيـلـه لاعـشــيـره ولاعـمــام
مـايـظـل بـس العـلـيـل وتـمـشـي هلدرب الطويل
بسوط يظربهه اللعين يـارسـول الله الامـيـن
ـــــــــــــــــــــــــــــــــــــــــــــــ
--------تمت بعون الله-----------


(عـقـيـل حـسـين الگـرعـاوي)

جيتك وعيني مدمع هاملة - الرادود احمد لفتة الزوار
https://youtube.com/watch?v=HPhmnd3qeBs&si=aJ5j02n525PhFeBL

قصيدة في شهادة المصطفى محمد صلّى الله عليه وآله وسلّم ،،،،

ـــــــــــــــــــــــــــــــــــــــــــــــــــــــــــــــ


يا رَحمَة الباري ونَبِيّه يا مُحمّد
ما تدري يا خَيرالبَرِيّة يا مُحمّد

ذِيچِ الوَصِيّة الواضِحَة
نِكروهَه وبذَاك الضّحَى

ما تدري يا خَير البَرِيّة يا مُحمّد

ـــــــــــــــــــــــــــــــــــــــــــــــــــــــــــــــ

الأمة العِدهَة مَبدأ لازم إطّيعَك
موشِ علَلكراسي ومَنصِب ٱتبِيعَك
ونِسَت يا طه هاي الأمة تَوديـعَك
وطِعنَت بالوَصِيّة البِيهَة تَوقِيعَك

وجثمانَكِ الطاهِر تِعِـيفَه يا مُحمّد
وتجَمّعت تَحتِ السقيفَة يا مُحمّد

والباقِي رَاح انوَضّحه
نِكروهَه وبذَاك الضّحَى

ما تدري يا خَير البَرِيّة يا مُحمّد

ـــــــــــــــــــــــــــــــــــــــــــــــــــــــــــــــ

داَر وللمــــلائك مُختَلَف چانَت
يا طه شسِدَه مِن ساعِتَك حانَت
نَوايا ومُــبغِضَة وبروحِتَك بانَت
ولاحُرمة إلَك يالمصطفى صانَت

هِجموا على دارِالزچية يا مُحمّد
وتِحمّلَت عگبك أذِيّة يا مُحمّد

ومنهه الجفون امجَرّحَه
نِكروهَه وبذَاك الضّحَى

ما تدري يا خَير البَرِيّة يا مُحمّد

ـــــــــــــــــــــــــــــــــــــــــــــــــــــــــــــــ

نَعَم يالمصطفى كِسروا ضِلعِ مِنهَه
ولا بِنتِ النبي ولا كوثَرَه چَـنهَه
گِضَت باللّوعة دِنياهَه برَغُم سِنهَه
يِفِت گلبِ الصّخَر مِن يِنسِمِع وَنهَه

بَيت الحِزِن أصبَح سَكَـنهَه يا مُحمّد
بيومِ الرّحِت لِبسَت چفَنهَه يا مُحمّد

بَيتِ الحِزِن مَتبارِحَه
نِكروهَه وبذَاك الضّحَى

ما تدري يا خَير البَرِيّة يا مُحمّد

ـــــــــــــــــــــــــــــــــــــــــــــــــــــــــــــــ

عَلِي آ يا عَلِي لو تِنظُر احوالَه
مِن هذا المَرار الموتَة أشوالَه
نِزَف گلبه بألم ما ظَلّت اوشالَة
ومُصايِب دِنيِتَه يالهادِي تُبرالَه

مِن أُمّتَك شافِ القَطيعَة يا مُحمّد
وِتحَمّل لأجلِ الــشّريعَة يا مُحمّد

زُمرَة وما تِملِك مِستَحَه
نِكروهَه وبذَاك الضّحَى

ما تدري يا خَير البَرِيّة يا مُحمّد

ـــــــــــــــــــــــــــــــــــــــــــــــــــــــــــــــ

ماتَت غِيــــرَةِ الأمة گبُل مَوتَك
نِسَـــوهَه رأفِتَك يا طه وِمروتَك
يَمَن چَان الوَحي يِستأنِس بصوتَك
كَريم ولا سَجِيّة غانِمة ٱتفـوتَك

تِبچي السمَه وزَخّت دَمِعهَه يا مُحمّد
وِنشَقّت الگاع بجَـــزَعهَه يا مُحمّد

وناَحَت عَليك النايِحَة
نِكروهَه وبذَاك الضّحَى

ما تدري يا خَير البَرِيّة يا مُحمّد

ـــــــــــــــــــــــــــــــــــــــــــــــــــــــــــــــ

برَحِيلَك موسَى يا طه ٱنهِدَم حَيلَه
وعزاءَه مِستِمِر عِيسى ٱويَ إنجِـيلَه
ومَـريَم وَيّه فاطِــم تِنحَبِ الليلة
وداود وزَبورَه بحَــسرَة يِبچـــيلَه

والكَعبة ناحَت والمدينة يا مُحمّد
لَيلِ الحِزِن چلچل عَلينَه يا مُحمّد

غَيبة مُحمّد جارِحَـــة
نِكروهَه وبذَاك الضّحَى

ما تدري يا خَير البَرِيّة يا مُحمّد
ما تدري يا خَير البَرِيّة يا مُحمّد

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي