#قصائد_محرم
#بصوت_ملا_احمد_الزوار

نزلة مسلم بن عقيل عليه السلام

يا مسلم انهض بالسيف    شد حيلك ولا تهتم
٠٠٠٠٠
عمك علي حامي الحمه وحامي الجار
ذكّــرهم بصولاته درع المختار
يوم الضرب عمرو بن ود بالفقّار
يا مسلم بهذا الصيت.   سل صارمك وتقدّم
٠٠٠٠
تدري بأبن مرجانه خاين خوّاف
دزلك يمسلم مو الف جيش آلاف
اتباع امية اهل الخيانه الاجلاف
لن يدري بيك انت الحيد.  ما تنثني ولا تُهزَم
٠٠٠٠٠
گلهه يطوعه الهاشمي عد عيناج
انتي الوگفتي وياي اوكف ويّاج
يوم الحشر اشفعلج وما انساج
ياطوعه من سيفي اليوم.   خيل وزلم ما تسلم
٠٠٠٠٠
مسلم أنه وللذل ابد ما انگاد
اگلب الكوفه بثورتي عله ابن زياد
ميهمني جيشه شما تسلّح وزداد
سيفي بيميني وهيهات.    انسه العهد وتوهّم
٠٠٠٠٠
ياطوعه حان الثار من دارج حان
إلا اترس بروس وجثثها الكيعان
هذا آنه مسلم بالحرب والميدان
انشر مناحه بكل بيت.   والكوفه تغرك بالدم
٠٠٠٠٠
كلا لبن مرجانه كلا ليّزيد
ولغير ابو السجاد ما مد الايد
ما عوفه لا بالموت لا بالتهديد
متمسّك بحبل حسين.   لا اخسر ولا اندم
٠٠٠٠٠٠
گالتله يا مسلم اعرفك وفاي
ما قصّرت لحسين وفيت بهاي
عطشان حدما متت ما ضگت الماي
اسمك يضل نور ونار.   والكوفه بي تتكلّم

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠


https://www.tgoop.com/+QYhwKs0Xy1h303S6

مقدمه للعباس عليه السلام

عباس الگمر. يم جرف النهر
لا تنتظرينه. طاحن چفينه. يم جرف النهر
٠٠٠٠٠٠٠٠٠٠
يزينب يختي جيتج والظهر مكسور
عفت عباس يم جرف النهر منحور
يزينب لا تعتبين الگمر معذور
چفوفه مكطّعه وراسه بعَمَد مطبور
بلا جود وعلَم. ميرد للخيم
كون تشوفينه. طاحن چفينه. يم جرف النهر
٠٠٠٠٠٠٠٠٠٠٠٠
يزينب من وصلت المشرعه وشفته
مگطع بالسيوف وخيل دايسته
انحنيت عليه اودعه وللخيم شلته
اعتذر من عندي يختي وعالنهر عفته
من صابه السهم. نص حيلي انهدم
لا مو بس عينه. طاحن چفينه. يم جرف النهر
٠٠٠٠٠٠٠٠٠٠٠٠٠
اشد موقف فجعني وحيل اذّاني
شفته وردنه واحد يشبگ الثاني
شبگته وماكدر يشبگني بچّاني
يگلي اعذرني طاحن منّي ذرعاني
شم نحري وبچه. مات وما حچه
مابيني وبينه. طاحن چفينه. يم جرف النهر
٠٠٠٠٠٠٠٠٠٠٠
صاحت زينب آ يحسين يبن امي
راح الچان يكشف همك وهمي
أنشدك خويه منهو اليحرس خيمّي
اذا عباس طاح وانت مو يمي
ابقى بلا اخو. ويسبيني العدو
والكافل وينه. طاحن چفينه. يم جرف النهر
٠٠٠٠٠٠٠٠٠٠٠٠٠
يزينب يختي لو شفتي الجره بحالي
جسمي مكطّع وراسي برمح عالي
أنتي تكفّلي بالعيله وطفالي
وعينج عالعليل ابني علي الغالي
صبرج لا يقل. دمعج لا يهل
راح التنخينه. طاحن چفينه. يم جرف النهر
٠٠٠٠٠٠٠٠٠٠٠٠٠
راح الچان درعي وسيفي بالشده
صرت وحدي وغريب بلا اخو بعده
شحال اليبقه مابين العدو وحده
لا ناصر ينصره ولا اخو عنده
لكن ما اذل. حدما انقتل
ما يرجع لينه. طاحن چفينه. يم جرف النهر

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

#عيد_الغدير

والينه والينه.   بايعنه والينه
عيد الغدير اليوم.   بايعنه والينه
٠٠٠٠٠٠٠٠٠٠٠
بعد النبي المختار
بيعتنه للكرار
والفرحة من كل دار.    نرفع صداها
من خالق الأكوان
تنصيبه بالقرآن
والي الإنس والجان.    حيدر خذاها

يهدينه يهدينه.   للجنه يهدينه
مثل الصلاه والصوم   بايعنه والينه
٠٠٠٠٠٠٠٠٠٠٠٠٠٠
خل نعلن الافراح
بسم الوصي نرتاح
شال ايده طه وصاح.     بين لمسلمين
يصحابي يا انصار
حيدر وليكم صار
والماقبل للنار       ما عنده اي دين

يحمينه يحمينه بالشده يحمينه
مو بس سنة للدوم.  بايعنه والينه
٠٠٠٠٠٠٠٠٠٠٠٠٠
تاج الولايه الله
يلوك لعلي شمحلاه
رب العرش سوّاه.        توّج ولينه
لوما علي الضرغام
ما يكمل الأسلام
القائد ابو الأيتام.     بلغ نبينه

يروينه يروينه   من چفه يروينه
خل اليلوم يلوم   بايعنه والينه
٠٠٠٠٠٠٠٠٠٠٠٠٠٠٠٠٠
البايع علي ربحان
بالجنه والميزان
المابايعه خسران.      يوم القيامه
الينكر علي شيگول
عند الله ما مقبول
بيوم الحشر مذهول.    حيره وندامه

يكفينه يكفينه.   بس حبه يكفينه
مثل النبي معصوم.    بايعنه والينه
٠٠٠٠٠٠٠٠٠٠٠٠٠٠٠٠٠٠٠
عيد الله هذا العيد
طه وعلي فد ايد
بس هالمحبّة تفيد.     طاعه وعباده
برض النجف مذكور
ما ينطفي هالنور
نبايع علي ونزور     اجمل سعاده

مهدينه مهدينه.   ويّانه مهدينه
بسمه الحفل مختوم.    بايعنه والينه

سيد زيد الفحام
_______

عيد الله الأكبر عيد الغدير الأغر

عيد الغديرية.    والفرحه شيعية
بولاية الكرار.     والفرحة شيعية
٠٠٠٠٠٠٠٠٠٠٠٠٠
تنصب علي بعد النبي اول خليفه
بأمر الجلالة غصباً عله اهل السقيفه
البايع علي در وذهب روحه نظيفه
مشكوك بي منّ المهد كلمن يعيفه
فرحتنه بالغالي.     تنصّب علي والي
ونتقلت الاخبار.     والفرحة شيعية
٠٠٠٠٠٠٠٠٠٠٠٠٠٠
جبريل للهادي نزل والباري ودّاه
يا طه بلّغ بالأمر جبريل ناداه
شال أيده طه المصطفى وايد الله ويّاه
مَنْ كُنتُ مولاهُ فهذا علي مولاه
ما فهمو اسراره.     والخالق ختاره
مستبشر المختار.    والفرحة شيعية
٠٠٠٠٠٠٠٠٠٠٠٠٠٠
دين الله ما يكمل ابد لوما الولايه
منهج مُحمّد وعلي نفس الهدايه
بيوم الغدير عله النبي نزلت الآيه
بعدك خليفه بس علي ونهي الحكايه
والضده والعافه.       خل يسأل اسلافه
اعلنهه لا تحتار.      والفرحة شيعية
٠٠٠٠٠٠٠٠٠٠٠٠٠٠
ما قصّر الهادي وهتف ذيچ الظهيره
من بعدي كل مسلم تره حيدر اميره
والمارضه بحيدر ولي خاسر مصيره
اوصافه اوصاف النبي ماصح نظيره
ما تنعد افضاله.       چفه النبي شاله
وارث مُحمّد صار.    والفرحة شيعية
٠٠٠٠٠٠٠٠٠٠٠٠٠٠٠٠٠٠
عيد الغدير اجمل فرح للرافضيه
يم حيدر التم الشمل نفرح سويه
وي طه وأملاك السمه وروحه الزجيه
ننصب حفلنه ونبتهج هاي المسيه
غصباً على الحاقد.    بس حيدر القائد
طب الهَنَه بكل دار.   والفرحة شيعية

سيد زيد الفحام

يوم عاشوراء

شحالهه الذبحو اخوها شحالهه
تشوف خيل ادوس صدره گبالهه
٠٠٠٠٠
تشوف جسم حسين اخوها الطاهر
گطّعوه بسيوف ظُهر العاشر
بصدره وبظهره انطبع چم حافر
شلون توصل والشمر يبرالهه
٠٠٠٠٠٠
شلون توصل خيل بينه وبينها
گبالهه طايح تشوفه بعينها
شصار بيهه شصار الله يعينها
بين اخوها محيّره وطفالهه
٠٠٠٠٠٠٠
تشوف شمر شلون حز اوريده
وشال راس حسين ينزف بيده
شبيدها وشتسوي هيه الوحيده
مذبحه عله الكاع كل رجالهه
٠٠٠٠٠٠٠٠٠٠
هاي زينب يالسئلتوا عليها
بچتل اخوها وبالسبي معذبيها
بجمر الخيام انچوت رجليها
تركض عله النار تحمي عيالهه
٠٠٠٠٠٠
بين خيل ونار تركض خايفه
تحمي الأطفال الرعب ماشايفه
جم اخو عالگاع ينزف عايفه
بلا ولي المحّد نظر لخيالهه
٠٠٠٠٠٠
هجموا عله خيامها وسلبوها
عاليتامه وعالحرم حركوها
جم يتيمه الشردت وسحكوها
رد سلب خدر الحرم چتالهه
٠٠٠٠٠٠
حسين ظل عله الثره مگطعينه
والكفلهه گطّعوا چفينه
وينهه باقي الهواشم وينهه
عالهزل راحت عكب كفّالهه

سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

#ليلة_الوحشة

ليلة الحادي عشر. ليلة احزان وخطر
متنه من كثر القهر. ذبحو حسين
٠٠٠٠٠٠٠٠٠٠٠٠٠٠٠٠٠٠
من يوصّل للنبي وحامي الحميه
خبر مفجع والحدث بالغاضريه
ذبحوا حسين بحقدهم ال اميه
وداسوا بصدرة حوافر اعوجيه
حركو علينه الخيم. فرّت اطفال وحرم
من بعد راعي العَلَم. نتّجه وين
٠٠٠٠٠٠٠٠٠٠٠٠٠٠٠٠٠٠٠٠
چلچل الليل بضلامه واحنه غربه
شلون احميها اليتامه والله صعبه
الليل موحش والگمر مكطوع دربه
الچان يحرسنه وكع ونصاب گلبه
خيمه ماكو ولا خدر. وسفه يحرسنه الشمر
باجر بنوگ الأسر كلنه ماشين
٠٠٠٠٠٠٠٠٠٠٠٠٠٠٠٠٠٠٠
ذاك اخوي حسين جسمه مگطعينه
وبحوافر خيل صدره مرضرضينه
والكفيل عله النهر مطفيه عينه
الليله من يحرسنه يا ناس انسبينه
عيله مجتوفه بحبل. منّي ولآخر طفل
لا اخو عندي عدل. ويلي ميتين
٠٠٠٠٠٠٠٠٠٠٠٠٠٠٠٠٠٠
ترجف گلوب اليتامه وموحش الليل
بيها رهبه وخوف سوّت غارت الخيل
والله من كثر التعب ما ظل بعد حيل
مثل دم جروح اخوتي دموعنه تسيل
ويلي لو صار الصبح. ننسبي دمعه وجرح
راسك براس الرمح ياضوه العين
٠٠٠٠٠٠٠٠٠٠٠٠٠٠٠٠٠٠٠٠
هذه آخر ليله باجر للسبي انروح
والمصيبه انعوف اخوي حسين مذبوح
بالسيوف امگطعينه جروح بجروح
آه ميدفنون جسمه ويبقى مطروح
يا وكت بنت النبي. تمشي بدروب السبي
يحدي بيها الأجنبي للدواوين

سيد زيد الفحام
محرم ١٤٤٧هـ
______________________________________&&&

يمة بسهم / الرادود احمد الزوار
https://youtube.com/watch?v=sDLkJ2njYdA&si=H23XeCPsKb9bag13

يابوية / الرادود احمد لفتة الزوار
https://youtube.com/watch?v=zJNFp8WMiwM&si=waD-Ngx9XXM0dCeF

موشح الليله العاشره

الليلة آخر ليله مضويه الخيام
الليله اشِبعن شوف من وجه الامام
___________________________

الليله ملتمات ربّات الخدور
ابخيمة الحره او گلبهن ضل يفور
كلمن ابكتر الولي گامت تدور
الليله طاب النوح ما طاب المنام
__________________________

زينب او سكنه او رقيه نايحات
واعله ابو السجاد كلهن فازعات
يمه وگعتهن مثل وگعة ممات
فرفحن عنده شبه طير الحمام
__________________________

هاي بيده چلّبت واتقبله
هاي شابگته او دمعها تهمله
هاي تنحب يم وليها او تسأله
اشلون بينه لو رحت يبن الكرام
__________________________

زينب العباسها اتدير النظر
اتگله يمي بعدك او ظهري انكسر
اشلون بيه من تطيح اعله النهر
العيش من عگبك عله اعيوني حرام
__________________________

او يم مهد عبدالله ملتويه الرباب
عله ارگبته حبته او شدت حجاب
اتگله باچر عمك ايجيب الشراب
نام نوم العافيه يوليدي نام
__________________________

او ليلى تنظر عله ولد متحيره بيه
ساعه وجهه اتشمه ساعه اتشم اديه
الليل كله ايخر دمعها او تدعي ليه
ربي دونه خل تلوعني السهام
__________________________

او جاسم امه امجابلتّه او ذاهله
گامت اتنازع وديها امسبله
اتگله يمه امنين اجتني بكربلا
هرش گلبي انشلع يابدر التمام
__________________________

ابو فاطمة الطائي

ليلة الوداع


شفتها بليلة العاشر
حزينه وتكسر الخاطر. اويلاه
تودع اخوتها مهضومه
تصيح وتبچي مالومه. اويلاه
٠٠٠٠٠٠٠٠٠٠٠٠٠٠٠٠٠٠٠٠٠
رجع بية الزمن للطف. حلم بس شفته بالعين
وداع ام الخدر زينب. شفتها تودع حسين
حزينه امگبّعه بهمها. تون من لوعة البين
طبت خيمة ابن امها. تودعه وبيها نارين
نار اوداعه وغيابه
ونار جروحه ومصابه اذا راح
اخوها وكعدت تنشده
غريبه وتنسبي بعده. اذا راح متنساه اويلاه
٠٠٠٠٠٠٠٠٠٠٠٠٠٠٠٠٠٠٠٠٠
سمعتها تگلّه يبن امي اريدن منك جواب
صدك باجر يذبحونك. صدك يسلبني سلّاب
اشوف بسهم المثلّث يخويه گبالي تنصاب
بحوافر خيلهم خويه يطشرونك بلتراب
عسن لا طر صبح باجر
ولاشوفن اثر حافر. بلظلوع
مثل ما كسروا الزهره
اشوف بعيني چم كسره. بلظلوع اثر آه اويلاه
٠٠٠٠٠٠٠٠٠٠٠٠٠٠٠٠٠٠٠٠٠٠
صدك ياخويه اسمعها. فقط هالليله ويّاك
صعب يحسين توديعك. صعب يالغالي فرگاك
توصيني وتودّعني. أنه وكل اهلي بحماك
بعد وضحت غداً زينب. سبية بولية اعداك
أنه الماشافوا خيالي
سبية عله الهزل تالي. الى الشام
وحگك يا ضوه عيوني
اموت ولا يودّوني. الى الشام. بلاياه. اويلاه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اخوها حسين جاوبها. اسمعه ودمعي سچاب
يگلها يختي يازينب. اقاتل دون الاحجاب
اذا ما ينسفك دمي. وذا ما راسي ينصاب
يرد دين الشرك والذل يموت الحق ولكتاب
ابد ما بايع الظالم
ابد للذلّه ما ساوم. أنه حسين
عزيز لآخر انفاسي
اخوج ومااطخ راسي. أنه حسين سمعناه. اويلاه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
گبل فجر الحزن طلعت. شفتها تريد عباس
تلگّاها بهلا يختي. هلا يارفعة الراس
عظيمه وكعدت كباله. بأبوها الوالي تنقاس
صدك رايد تودّعني. وظل بلايه حـرّاس
جبتني امن الوطن آيه
كفيلي وبيدك الرايه. يعباس
اذكرك بالعهد جيتك
يمن صيت الوصي صيتك. يعباس نخيناه. اويلاه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اسمعه يگلها يازينب. بچيتي وآنه موجود
قسم باجر اراويهم. سقر وعيونج شهود
امية وكل عساكرها. وعددها شما بقى يزود
اگص رگابها بسيفي و رد اسحگهم اردود
يويله اليوصل خيامج.
اذبحه بسيفي كدامج. تأمرين
يزينب آنه كفّالچ
احامي خيامي وطفالچ تأمرين. بعد لا اويلاه

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠

نزلة/ ليلة الوداع

اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠
كل جرح لابد اله فتره ويطيب
إلا جرح الرايد يودع حبيب
واني هاي الليله بجروحي اشيب
راح اودع حسين بدموع ونجيب

يهضم وكلش صعب. جرح الوداع
اعظم جروح الگلب. جرح الوداع

٠٠٠٠٠٠٠٠٠٠٠٠٠٠٠٠٠٠٠٠٠٠
شلون اودع حسين يا عالم شگول
ودري باجر تسحك بصدره الخيول
ريت ليل العاشر اعلينه يطول
ولا يروح حسين والهيبه تزول

اول جروح الحرب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
شلون اودع الكافل وحامي الظعن
چفوفه يم شاطي النهر يتكطعن
كبل ابوالغيره يذبحوني عسن
ولا اشوف چفوفه دم يتسايلن

خَلّه دمعي دم يصب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
ليلة اوداع اخوتي ليلة جرح
راح أظل سهرانه وبچي للصبح
باجر ابن امي وحبيبي ينذبح
وراس اخويه حسين ينشال برمح

بسمه بعيون الغرب جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
آنه مو أي مره زينب بت علي
من يعوفوني خوتي منهو الألي
جابني العباس گلّي ادلّلي
لا تعوفيني غريبه يا هلي

يعصر دموعي غصب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
هذه آخر ليله ملتم الشمل
كلها باجر تنذبح حتى الطفل
والمصيبه الكبره والماتنعقل
انسلب ياوسفه ونجر بحبل

علّتي بطول الدرب. جرح الوداع
اعظم جروح الگلب. جرح الوداع

سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠