قصيده شور بحق{السيده زينب}{عليها السلام}
****
انه زينب يبو فاظل ينوماس
شيب من حسرتي الكلب والراس
اسولفلك صدك رايد يعباس
عافتني وتخلت عني الناس
هالصرت وحدي * هالصرت وحدي
غريبه ومالي ناصر هالصرت وحدي
****
عليك شكد يبعد الروح ناديت
ورسايل يابو فاظل الك وديت
تانيتك تجيني وانته ماجيت
وعلى وجهي لطمت اشكثر وبچيت

كل مغربيه * كل مغربيه
عزه انصب عليه كل مغربيه
****
من يوم العفتني والدمع هال
وعلى حالي اون ونين چتال
مصايب شفت ماچانت على البال
ولا صحلي برحيلك يوم كفال

بكطعت چفوفك * بكطعت چفوفك
شيب رمش عيني بكطعت چفوفك
****
من حزن الحزن تاخذني دنياي
والف موته اموت من اشرب الماي
مصايب بيه مرت كلش هواي
تمنيتك يخويه چنت وياي

وداعت عيونك * وداعت عيونك
اتموت من المصيبه وداعت عيونك
****
من يوم الطحت مكطوع الچفوف
وانه دمعي على الوجنات مذروف
يا عباس لو بس عينك تشوف
حالي وحزن كلبي ونوحي والخوف

يابعد زينب * يابعد زينب
موتك هدم حيلي يا بعد زينب
****
كل الناس من تموت ترتاح
بس انه عليه تزيد الجراح
بحياتي ماشفت لو مره الافراح
وخدري الجان عالي من طحت طاح

هاك اخذ عيني * هاك اخذ عيني
وعليه تعنه هاك اخذ عيني
****
خلصني تعال وخذني وياك
عله نار الحزن عباس اتناك
اشلع سهم عينك ومسح دماك
وعليه الحك يبو الكلفات انخاك

ماكسر كلبك * ماكسر كلبك
وضعي وهاذه حالي ماكسر كلبك
****
كل لحظه عليه تزيد الالام
واسهر ويه نوحي وابد مانام
ونحر حسين وجفوك والخيام
ياعباس ما ريد ابقه بالشام

لاتخليني * لاتخليني
عليك بروح ابويه لاتخليني
****
خادم اهل البيت عليهم السلام
الشاعر السيد{هاشم قاسم سعود الداودي}
١٤٤٦ هجري

قصيده موشح بحق{السيده زينب}{عليها السلام}
****
الزينب تعنت رقيه الدارها
اه ياعمه تصيح بنارها
****
اجت والونات تمشي وياها
والدمع يبچي على بلواها
اجت بس محد اجه تلكاها
والحزن كله لبد بكتارها
****
محدبه ومشيبه عويله ونايحه
والمدامع عله خدها سافحه
عله زينب اجت تقره الفاتحه
والمصيبه اذهلت افكارها
****
اه تصرخ والصدى يرجع نحيب
يمها لا شافت كرايب لا حبيب
بالغريب يحس تره بس الغريب
وعلى وجهه تنرسم اثارها
****
بلا ضوه من شافت وظلمه الضيرح
من المصيبه كامت تكوم وتطيح
يابو فاضل كامت تنوح وتصيح
اعله الطفوف تحولت انظارها
****
ياخو زينب هاي زينب شوفها
تبچي عين النايبات ظروفها
يابو فاضل مو كلت ماعوفها
ليش عايفها بنحيب اكدارها
****
كوم صاحت ليه ياكفالها
ليش راضي بالذي يجرالها
الشمر يذبح كل وكت امالها
وتنكشف للماتريد اسرارها
****
زركه ليهسه بعدها متونها
والدمع مانشف من عيونها
الشام واهل الشام مايردونها
على زينب سلطت فجارها
****
مابرت ليهسه ذيچ جروحها
وعن قبل اضعاف زايد نوحها
مدري من ياجرح طلعت روحها
والمنيه سيرت خطارها
****
اجه ليها الموت بديار الغرب
وهيه بين الغربه والمدمع يصب
رادت من اخوانها واحد يطب
من تشوفه تنسه كل اخطارها
****
ماتت بحسرتها زينب بت علي
بالف موت جروحها ماتنجلي
ياذنب عدها العقيله وتنولي
امن ال اميه ياوسف واشرارها
****
ناحت شكد وشكثر لمن اجت
وبچي الكلبه محترك يمها بچت
ناعي مثل العام يمها مالكت
وجنة الله طافيه انوارها
****
كل سنه الزوار چانو من يجون
والمواكب من تجي تملي العيون
تفدي زينب بالاموال وبالبنون
وتوصل السابع سمه اخبارها
****
هسه كل الحضره تارسها الظلام
والگبب ياحيف هاجرها الحمام
هالمصيبه مايكفيها الكلام
ابو صالح يمته ياخذ ثارها
****
يگلب الشام اعله اهلها من يعود
والنواصب الها مايبقه وجود
ويزرع دروب التأدي ٱلها ورود
وزحف تتعنه عليها انصارها
****
عله كُبْر الشام مرقدها يصير
و بجماله الدنيه كلها تستنير
و الأمان بگبر زينب يستجير
واليضدوها تموت بعارها
****
خادم اهل البيت عليهم السلام
الشاعر السيد{هاشم قاسم سعود الداودي}
1446 هجري

قصيده تجليبه بحق{السيده زينب}{عليها السلام}
****
عمت عيني ٱعله زينب وحشه وحشتها
ردت من جديد الالم غربتها
زينب بت فاطمه * لليوم تبجي دمه
**** 
ردت من جديد بلا ولي وكفال
زينب بت محمد حوطوها انذال
كلشي تغير وهي اعله نفس الحال
بالغربه وحدها وتجري دمعتها
****
ليش بكل زمان يموت كافلها
وجرحها المايطيب يصير چاتلها
امن اهل البيت هيه واهل ما الها
تجي يمها وتواسيها بمصيبتها
****
الشمر مايرضا الاخت حسين يتركها
عدله وميته هالملعون يلحكها
مويربط ايديها يريد يخنكها
ويطير من الفرح لوسمع ونتها
****
ماشايف كبل ميته ويلوعوها
يسلبوها ويأذوها ويعذبوها
يسبوها ويشتموها ويفجعوها
قسمتها عليها الغربه كتبتها
****
وين حسين عنها وين ابو النوماس
بالمنفى اختهم لاحمه وحراس
مايدرون بالشام واهلها ارجاس
ميراعون ابد ياحيف حرمتها
****
صحنها فارغ ولازاير يطبه
يكسر الف خاطر دمع التصبه
ولاجنها العقيله ومن ذوي القربه
حال امها الزجيه صفت حالتها
****
عمت عيني عليها تكسر الخاطر
ردت فوك املها تسحك الحافر
هل من ناصرٍ صاحت ولا ناصر
تعنه بلهفه الها وكشف حسرتها
****
مثل حسين تتلفت يسار يمين
تدور عالمحب وفاي والها يعين
من عاشر محرم بت علي وللحين
كل ساعه تزيد اضعاف محنتها
****
ماادري شوكت تخلص مصايبها
ظلام الليل شيب من نوايبها
محبوبة الباري وكل حبايبها
جفوها وبقت هيه بنوح حيرتها
****
خادم اهل البيت عليهم السلام
الشاعر السيد{هاشم قاسم سعود الداودي}
1446هجري

قصيده لسان حال{السيده زينب}{عليها السلام}
****
آنه زينب عالدرب مشبوحه عيني آنه زينب
يمتى احبابي تمر * عذب عيوني الهجر
آنه زينب آنه زينب
****
شكثر يحبابي مشتاكه الكم ياضوه عيوني
هجركم زيد ونيني وشيب كلبي وجفوني
سنه مرة عله الفركه كضت بالكوه صدكوني
بس انتو البقيتولي بعد خواني تدروني
من تجوني انسه احزاني ومصابي من تجوني انتضركم عالجمر * عذب عيوني الهجر
انه زينب انه زينب
****
ليالي طوال اتانيكم واحسب يمته نتلاكه
تجوني والشمل يلتم الكم والله مشتاكه
بجفاكم كلشي صار اظلم وغربتي غربه خناكه
العزيز فراكه ماينطاق الصبر مايحمل فراكه
ليله ليله اني ودموعي اتاني ليله ليله
عذر ياخذني العذر * عذب عيوني الهجر
انه زينب انه زينب
****
ليش الوحدي عفتوني غريبه وحالتي حاله
مابين ال اميه النوب اون ودموعي هماله
وتدرون الشمر قاسي وماريد انظر خياله
يهدم مرقدي عليه ويجتف ايدي بحباله
وانتو تدرون شنهو بالطف سوه بيه انتو تدرون
من اخذني لليسر * عذب عيوني الهجر
انه زينب انه زينب
****
رد بيه الزمان اردود الذيج احزاني والغربه
شفت المايمر عالبال وايام شكثر صعبه
ميته وماخلص ضيمي ولا جن من ذوي القربه
الشمر لي هسه يتمنه الخدري يرجع يسلبه
يمته ارتاح واخلص انه من ال اميه يمته ارتاح
لشوكت ابقى انتضر * عذب عيوني الهجر
انه زينب انه زينب
****
كلبي وصحني ياشيعه بجفاكم تكسر الخاطر
لا موكب الي منصوب ولا ناعي ولا زاير
لا خادم ولا مجلس لا دمعه ولاناصر
وكتي ماحسبته يدور ويردني الغربة العاشر
بعد الحسين صرت وحدي وهسه وحدي بعد الحسين بعد ماعندي صبر * عذب عيوني الهجر
انه زينب انه زينب
****
رجب لو بيّن اهلاله انه وحزني نناطركم
انه كل عام متعوده تكصدوني بمواكبكم
اشم بيكم وفه العباس اخويه وغيره تارسكم
عزيزه عليكم انه ادري تفدوني بمناحركم
ادري بيكم سبي تسبيكم وفاتي ادري بيكم
عدكم اغله من العمر * عذب عيوني الهجر
انه زينب انه زينب
****
وحيده وحشتي وحشه اعاين والدمع يجري
وين انطي الوجه لا وين صرت والله ماادري
غربتي غربه ما صارت عيون عليها هل صبري
مثل حسين للعباس فركاكم كسر ظهري
يا حسافه تدخل الحضره النواصب ياحسافه
منهم امشي الياكتر * عذب عيوني الهجر
انه زينب انه زينب
****
خادم اهل البيت عليهم السلام
الشاعر السيد{هاشم قاسم سعود الداودي}
1446 هجري

قصيده كعديه بحق الامام{ موسى ابن جعفر الكاظم}{عليهما السلام}
****
باب الحوائج والشدد بجفوفه سهله
هيهات يهمل كاصده ويفشل اهله
وكفاته تشهد ** والله ومحمد
****
باب من ابواب ربنه وفرع من اصل الامامه
شيخ وسط الهيمه فاتح لليجي كلبه وخيامه
مايخيب اليعتنيله ضوه ويشتت ظلامه
مثل الابو كلبه واحن حنيته حنيت وطن
الحاجه يقضيها ابلا ثمن امن السمه اعلى مقامه
اياته كاتبها بذهب قرأن الاعجاز
موسى عزيز الله وابد ميعوف الاعزاز
للوفه مرقد ** والله ومحمد
****
منين ومنين اليجوله ابو الجفوف الحنونه
صاحب الوكفات هو ابو طلبه يلقبونه
تحلف الوادم ابخته من تضيج يحزمونه
شاراته لا ماتنحسب عذيبي الفرج منه يهب
ضيه ابد ماينحجب الرحمه تنبع من اعيونه
صبح ومسيه ابن النبي فاتح مضيفه
شيخ المشايخ لليجي بجفه يضيفه
بابه متنسد ** والله ومحمد
****
الشيعي والمو شيعي يكصد اله ويتعناله عنوه
يشافي ويعافي ويداوي العله ماينطيها عطوه
السوده ايامه ويندبه يخلي كل ايامه حلوه
حيد اليميل يعدله عالم يحل كل مسئله
اليتنخه بيه ايدلله الضاع حكه يجيبه كوه
مهيوب يبقه بكل وكت للحاجه قبله
بابه المحال تفرهده وترسه ذله
وصفه مينحد ** والله ومحمد
****
اسد بغداد وفخرها وزودهه وعزه وحماها
بيرغ العز وشموخه الدنيه من نوره ضواها
بموسى بن جعفر الكاضم حكه كل شيعي ايتباها
من كبته يغار النجم نطياته اشبه بالحلم
كل امر بيده ينحزم الشده بجفوفه طواها
ماعنده ابد شي مستحيل ابن الصميده
الزينات ابن حيدر علي تمشي بوريده
للغيره معبد ** والله ومحمد
****
على مصابه الدنيه تبچي وينحب الكون الرحيله
بالسجن خلص حياته. صاحب السجده الطويله
ياوسف سمو جبدته. وهو ابن حامي دخيله
ثكل السلاسل هدته. والوحشه خنكت ونته
مات ودمعته بوجنته الحالته وحال العقيله
من ياجرح مدري الاجل روحه خذاها
باع النفس عالمعرفه والله شتراها
موقف تخلد ** والله ومحمد
****
اه يالوعة مصابه ياكَلب يحمل هضمها
مصيبته اتهد الرواسي من ألمها ومن عضمها
الله اليعين الزچيه سكم نايبته سكمها
نرفع تعازينه بحزن الها وعلى امصابه نون
وبنوح ابد مايستچن بيا مكان امه الزچيه
مصيبة الكاضم تضمها
****
خادم اهل البيت عليهم السلام
الشاعر السيد{هاشم قاسم سعود الداودي}
1446 هجري

قصيده موشح بحق{موسى ابن جعفر الكاظم}{عليهما السلام}
****
موسى إِبن جعفر يحامي دخيلها
جنازته عالجسر روح وشيلها
****
ياعلي الكرار انه فاطمه
جيت احشمك ياامام الغانمه
يمك تعنيت يابو الموزمه
الميله غيرك من يَعدِل ميلها
****
ابني يابو حسين مرمي اعله الجسر
قطعه مني ياعلي وسابع بدر
مات مسموم وغريب ومن غدر
دموع عينك لو تشوفه تهيلها
****
خلِته الحماله ياحيف ومشت
وعلى مصابه وحاله دمعه مابجت
انتهى ابني ونايباته منتهت
للحشر ابقه اون وابجيلها
****
جروحه من الكيد وصلت للعظم
والسياط اثارها تسكم سكم
رسومه كلها تغيرت من الظلم
مصيبته ينجلي ماظن ليلها
****
ياعلي خلص حياته بالسجون
ومنع سجانه عليه اهله يجون
الكاظم مصابه يحيدر مايهون
الماتحبنه عليه صبت ويلها
****
ماعفت سلمان وحده بغربته
دفنته وعيونك بجت لمصيبته
تكسر الخاطر يحيدر محنته
الفاجعه يهد الجبل تئويلها
****
اقسم اعليك بضلوعي ومحنتي
ياعلي ونوحي وغربتي وعشرتي
إِتعنه يم ابني وحبيبي وضنوتي
تكفل انتَ جنازته وتغسيلها
****
ياعلي بجفك ادفنه ياعلي
بالكبر بلجن همومه تنجلي
موسى ابن جعفر غريب بلا ولي
للزجيه هاي هدت حيلها
****
خادم اهل البيت عليهم السلام
الشاعر السيد{هاشم قاسم سعود الداودي}
1446 هجري

قصيده بمناسبة استشهاد الامام {موسى الكاظم }{عليه السلام}
****
مثل حسين الوحدك حاير يامظلوم
ويومك يشبه يوم العاشر يامظلوم
عين الشامت من تنظرك * عشر خيول وتسحك صدرك
يامظلوم
****
ياموسى ابن جعفر حالتك حاله
يالعمرك كضيته بونه جتاله
من ذاك الظلام الشفته واهواله
طولك جان يحلم يلمح خياله
بكد السبعين الف همومك اي والله
كلها تريد تشوف دمومك اي والله
يبن الزهره اشفت بعمرك * عشر خيول وتسحك صدرك
يامظلوم
****
سجنك ياغريب ولوعته وليله
طف ماينسي ذكره وتفاصيله
ونينك والنحيب ودم التسيله
وفرت امنياتك فرت العيله
مثل خيام حسين احلامك متوجرات
والاصعب طاحت كدامك متوجرات
مدري شلون تحمل صبرك * عشر خيول وتسحك صدرك
يامظلوم
****
سياطك والسلاسل والحجي اليجرح
شفافك ضاميات وبالدمه تسبح
تتعذب جنت والناصبي يفرح
تطمح بالمنيه وهو هم يطمح
يضربك اكثر واكثر بيده ياويلاه
لو شافك تتالم عيده ياويلاه
والحاقد من يدنه القدرك *عشر خيول وتسحك صدرك
يامظلوم
****
من سجن السجن عدوانك يودوك
يعرفونك امام وعمداً ياذوك
مثل زينب غريب مكيد وضربوك
وتدمع سكته عينك لمن يشتموك
كلشي اللي بيك يذكرني بطف حسين
مولاي مصابك يخبرني بطف حسين
لمن جنت تحير بامرك * عشر خيول وتسحك صدرك
يامظلوم
****
بعينك كل مسيه تنرسم خربه
واحلامك رقيه الغاليه وتسبه
مثل سهم المنيه الصوب الجربه
كلام المايحبك ياابو طلبه
مثل حسين مطبر صوتك يامحروم
وعدوانك تتنطر موتك يامحروم
عاشرت شجم شمر بعصرك*عشر خيول وتسحك صدرك
يامظلوم
****
على تراب الطفوف حسين متوذر
ماظل منه كلشي كله متغير
لو طاح العزيز بناس متقدر
يموت من القهر واحساسه متفطر
وارث الامك من عنده لمن طاح
الجبدك سمه هشم جبده لمن طاح
والشمات من اتقهرك * عشر خيول وتسحك صدرك
يامظلوم
****
يالمبجي الصخر يبن النبي همك
هارون اللعين تفنن بظلمك
كسر كلب الزجيه بقتلك وسمك
ومتت وحدك ولا واحد حضر يمك
جثتك عالجسر مخليها يامسموم
محد صب دموع عليها يامسموم
من شالوك الغربه الكبرك *عشر خيول وتسحك صدرك
يامظلوم
****
خادم اهل البيت عليهم السلام
الشاعر السيد {هاشم قاسم سعود البلداوي}

قصيده عكيلي بحق الامام{موسى ابن جعفر}{عليهما السلام}
****
هاي الليله هاي الليله نودع الكاظم هاي الليله
****
هالليه نودعه بدمعتنه
ونبجي الكون بونتنه
مصيبة مولانا مصيبتنه
يكون ادموم احنه النبجيله
****
مظلوم ومسموم بجنه
مات ابن الصادق وبحزنه
السم جبده لو عافه وسمنه
وطيحنه ولا طيح حيله
****
شافت بس الظيم عيونه
والناس اللي ميحبونه
شابت من الحزن جفونه
سجانه عليه سلط ويله
****
مكيد من ايديه وجدامه
ويوميه تشتدد آلامه
موسى الكاظم كل ايامه
دمعه اعله الخدين يهيله
****
بجت كل الكون اهمومه
من الكيد اتسيل ادمومه
ضاعت عنه احبابه علومه
والحماله لنعشه تشيله
****
بنت الهادي امه انعزيها
بهاي الليله ونواسيها
ما ناسيه وما ناسيها
لا والذي حامي دخيله
****
بدين الله نقسم وبكتبه
اعله الكاظم مدمعنه نصبه
من الله مطلبنه نطلبه
قائمنه يسهل تعجيله
****
خادم اهل البيت عليهم السلام
الشاعر السيد{هاشم قاسم سعود البلداوي}
1446 هجري

قصيده تجليبه بحق الامام{موسى ابن جعفر}{عليهما السلام }
****
على موسى ابن جعفر فاطمه الزهره
اجت من البقيع وتهمل العبره
****
اجت ام الحسين بضيمها البغداد
اجت بالكوه يمه والجمر وكاد
اجت تنعى وتون السادس الاولاد
مكسورة كلب والنار مستعره
****
ابنها الكاظم المات بسجن مسموم
بالغربه وحيد ومنكسر مهموم
مهظوم وغريب ومن غدر مظلوم
سمه ابن البغات الماعرف قدره .
****
اجت متلهفه من سمعت خبر موته
لا يمه اهل واحباب لا خوته
لا شكله ولا لونه ولا صوته
ويه جروح كيده كلها متطشره
****
على جسر الغرب محطوط جثمانه
وعرش الله ينوح وينعى حرمانه
بني العباس ضيعو حيف عنوانه
وجتاله بجتل موسى علن كفره
****
كلها اصيح عليه هاذا الغريب منين
مكيد بالسلاسل ليش بعد البين
مصابه يشبه مصاب الغريب حسين
بس عنه الفرق مامنكطع نحره
****
حتى الهوه ضل ينعى على حاله
واملاك السمه بلونه تنعاله
نعش الكاضم اوف تشيله حماله
والدمع المصابه مانزل كطره
****
ويه امه الزجيه تعنت الشيعه
تشارك ويه امه اليوم تشيعه
عليه تبجي وتون وتنعى توديعه
هارون اللعين بسم خسف بدره
****
خادم اهل البيت عليهم السلام
الشاعر السيد{هاشم قاسم سعود البلداوي}
1446 هجري

قصيدة كعدية ندبه لصاحب الزمان (عج)
****
مصيبتنه مصيبه تهد الجبال
ماجانت يبو صالح عله البال
منها اشتكيلك * يالمهدي دخيلك
ماجانت يبو صالح عله البال
****
اليوم يالمهدي ارد اسولف واحجي كل الذي بكلبي
وادري بعض الناس تزعل وعن كلامي دكول سلبي
تعوفني وماتستمعلي وقله بس توكف بقربي

يالمهدي صرنه كالدُمَه * ماظل عقل بالجمجمه
كافي بعد ماطمطه * وخل يصير الطلب شعبي

غصه بكلبي ضلت يبن الحسين
راح احجي السمعته وشفته بالعين
امن اللي هدم حيلك * يالمهدي دخيلك
ماجانت يبو صالح عله البال
****
صرنه بيد الغرب لعبه يسوي بينه شما يريده
بفكر ماسوني ويهودي يريد ينسفها العقيده
يروح من عدنه بمكيده ويرجع علينه بمكيده

وهاي الشباب الضايعه * شما طلب منها تطاوعه
ولفكاره سجدت خاضعه * وكل امرها صار بيده

حريه تهز وسط الشوارع
وتطور عده هجران الجوامع
وتدور بديلك * يالمهدي دخيلك
ماجانت يبو صالح عله البال
****
الإلحاد اصبح ثقافه والاسلام اصبح تخلف
المستحه مات اويه هلنا والعفاف اصبح تعسف
والصلاه صارت قديمه والركص هو التكلف

مذمومه اصحاب القيم * ومنبوذه كل اهل الشيم
نباعت يمولاي الذمم * ودينكم اصبح تطرف

عد بعض البشر ماضلت اخلاق
بالدينار باعت كل الاعراق
تدعي الله يطيلك * يالمهدي دخيلك
ماجانت يبو صالح عله البال
****
ناس بالمثليه تفخر وعدها حريه الدعاره
وبالحرام ابطون شبعت وعلم رفعت للقذاره
الانحطاط الفكري واضح بكل عقل باني سفاره

رجعيه عدها اليلتزم * إرهابي ويعادي السلم
لاعلم عدهم لافهم * العيشه وياهم خساره

امريكي تريد ايصير الاسلام
دين الله ومحمد كله اوهام
اي الله وكيلك * يالمهدي دخيلك
ماجانت يبو صالح عله البال
****
عكس هَؤلاء عدنه ناس مانكرت اصلها
الدين عدهم شي أساسي امن الجبل اثكل عقلها
بدمها لجل الدين ضحت ذلت الرايد يذلها

شبان بيهم نقتدي * الضوه بيهم يهتدي
وكفت بوجه المعتدي * فخر للشيعه واملها

وكفو عالسواتر وكفت ابطال
ماباعو الدين بحفنة اموال
بسبيل الله و سبيلك * يالمهدي دخيلك
ماجانت يبو صالح عله البال
****
فكست عيون اللي رادت تفرهد بعزنه و سلمنه
الذبحت حسين بغدرها ترجع و تذبح وطنه
كل خططهم مزقوها اسباع اهل غيره ولدنه

يالمهدي كلها مناطره * جيتك يشبل الطاهره
تمحي الجيوش الكافره * وبيك يتحقق حلمنه

يلتم الشمل و تطيب الجروح
وينشال الحمل ما يبقه مطروح
ويشوف النور ليلك * يالمهدي دخيلك
ماجانت يبو صالح عله البال
****
الشاعر السيد هاشم قاسم سعود البلداوي
1446 هجري

مكطوعه اهديها الى كل ابطال الحشد الشعبي
****
يبقى الحشد شوكه بعين عدوانه
جبل والجبل متهزه العواصف
مثل نكطة بياض وزاهيه بنص ليل
تطيب وتحله وياها السوالف
مواقفهم تسد عين الشمس والله
زلم والزلم تكشخ بلمواقف
ماهابو الموت بزمن چان الموت
من دمنه شفه حقد المخالف
ولد سيد علي السيستاني حشد الله
سوالف صيتهم تملي المضايف
****
خادم اهل البيت عليهم السلام
الشاعر السيد{هاشم قاسم سعود البلداوي}

قصيده بحق {اباالفضل العباس}{عليه السلام}
****
يابو فاضل شرد اوصفك يالعضيد
وانت عن وصفك عجز حتى القلم
ومن اسولف شرد اسولف عالچفوف
وعالوطيه شلون من طاح العلم
يابو فاضل والله لو مو الله راد
چان گمت بلا چفوف عله الخيم
وچان ماخليت ايديهم تطول
عاليتامه وعل عليل وعل حرم
وچان ماخليت سكنه بلايه ماي
چان جبتلها الحواري الها خدم
چان گمت الحرمله وگصيت ايديه
گبل ماينصاب عبدالله بسهم
چان ياعباس ماصار اللي صار
چان امر الطف دقايق ونحسم
علتريده ايموت بس تنوي يموت
شحده چان الموت ميگلك نعم
هاشميتك من تشب توصل لديك
وچان ملك الموت بالگوه انهزم
ادري بچفوفك تسوي لمستحيل
منها بالميدان ماواحد سلم
الطف معاناة والم حزن ونياح
ومن دخلت اعليه عباس ابتسم
انت اول ساقي جودك ينطي عين
ودك بطولاتك على زنوده وشم
وانت اول ضامي مات وبيده ماي
وعله جروف النهر ضمأن انرسم
حروفك من اذكرها تترسني عطاء
وتترس عيوني بيو فاضل شيم
تارس الدنيه وفاء وكربلاء
الهسه من اچفوفك توزع قيم
****
خادم اهل البيت عليهم السلام
الشاعر السيد{هاشم قاسم سعود البلداوي}

قصيده بحق الامام{الحسين}{عليه السلام}
****
يااجمل عشك بعيوني شلتك ليل
اسهرلك فرح للصبح مانام
عشك صبيان فطري شماردت سميه
بدوي مايفرط بعشك الخيام
عشك صار العشك بيه يضرب الامثال
تارسني موده وطيبه وألهام
بديتك عليه وانته تدري بهاي
وحزمت لدليل لحبك حزام
خذت مني العقل والعين والصفنات
ماهمني انذبح انكره انلام
انه يمك لكيت الچنت احلم بيه
بل ورموش عينك فاق الاحلام
يحسين اليحبك من صدك محضوض
ينسه هموم حزنه وجرحه يلتام
ابو الكاك واكف من اطيح بضيج
وفرج الكاك من انضنك وانضام
انتَ كبال عيني وانه الك مشتاك
واشتمك اظل شمت المحتام
من امشي واعوفك حيلي كله يطيح
وعلى طول الوداع الدمع سچام
يخنكني الهوه وكل لحضه اشوف الموت
جَن واحد برئ انحكم اعدام
حتى وانه ساكت هم اسولف بيك
مثل مؤمن وهام بحب السلام
اعوفك لا أبد مابيك شي ينعاف
واجب من اذكرك البس احرام
احبك ثم احبك ثم اهيمن بيك
يبعد الروح وهلي وكل الاعمام
أحسبني يتيم واكف اترجاك
مهضوم وحزين وكلي الام
غيرك ماهويت ولا احب بيوم
وغلات الله ورسوله وابو الايتام
يحبك كلشي بيه وداعتك يحسين
ابصملك بكَلبي مو بالابهام
****
خادم اهل البيت عليهم السلام
الشاعر السيد{هاشم قاسم سعود البلداوي}

قصيدة إلقائيه
*
امس زينب سبوها وكلنه امر الله 

لازم تنسبي وتكمّل الثوره 

لابد تنشتم تنضرب من ارجاس

نهج حسين خاطر يكتمل دوره

يهددها الشمر تنشاف من اجناب 

ويموت الخدر حسره بأثر حسره 

شاء الله وحدها تصير اخت حسين

وكافلها يطيح وينكطع نحره

مجتوفه بسلاسل دخلوها الشام 

بت حيدر علي الكرار متأسره

انتهى ذاك الزمن ميعود والعباس 

خل يسمع يزيد وزمرته القذره

ليمسها بكلام وعلي راسه يطير

اليتماده عليها كبالها نكبره

لا يحلم يزيد الليل جاله النور

انكشف سره بعد ليضمضم بكفره

اليتعده اعله زينب ذكر ميضل ليه

اليجرب راد خل يجيسها بشعره

عله خشمه يضل مرقدها ماينزال

خل ينسه الامر خل يلغي هالفكره

إسمع يالبعت كل دينك بدينار 

مو زينب القدس وقبة الصخره
*
الشاعر السيد هاشم قاسم سعود البلداوي

قصيده موشح بحق{خديجه}{عليها السلام}
****
مو سهل من تفتقدلك غالي
وياك يبدي ومايظل للتالي
****
لوعة فراكه تبين بالعيون
وياخذ وياه الاماني والظنون
العزيز غيابه والله مايهون
اخ من يظل مكانه خالي
****
ذكرياته من تمر تكتل كتل
والدمع يصبح جمر لمن يهل
الفاكد من البجي ليكل لايمل
وتهدم الاهات سده العالي
****
انه هو المصطفى طه الامين
عشت كل سنين عمري بالونين
الموت لمن اخذ ام المؤمنين
هدم بجفه جميع امالي
****
الي جانت وطن تارسني امان
تلمني جانت من يفرهدني الزمان
الوفه هيه والموده والحنان
كل مواقفها تعيش بالي
****
جنت اتمنه تظل ويايه
هالحنينه الطاهره الوفايه
الخاطري تحملت ضيم هوايه
الم فركاها وصل لخيالي
****
هيه ام بيتي وحبيبت روحي
وفرحتي وبلسم جميع جروحي
عليها مابطل دمعتي ونوحي
هيه ابويه وامي وام اعيالي
****
غيرها بعيوني ما يحله ابد
جنت من اعيونها اخذ مدد
سند صارتلي الحنينه بالشدد
غيرها مايوم ابد يحلالي
****
وصل من عافتني شيبي للرمش
ومثل منجل حزني بكليبي يحش
من شفتها كبال عيني بالنعش
ردت وياها الاجل يدنالي
****
خادم اهل البيت عليهم السلام
الشاعر السيد{هاشم قاسم سعود البلداوي}
1446 هجري

قصيده بحق {خديجه}{عليها السلام}
****
بسج يدموع كافي انسي الموضوع كافي
الراحو مايردون * لو تنعمي العيون انسي الموضوع كافي
****
العافونه ومشو للدار شيردهم
لو ابصط سبب للرجعه ماعدهم
حلم نرجع سوه ياحسرتي بسدهم
الاخذهم باك منهم عطر البخدهم
على ضيم النار صبري هاي الاقدار صبري
صدكيني ميرجعون * لو تنعمي العيون
****
انه وانتِ مجبورين نتحمل
وفراك الحبايب مُره نتقبل
واقع ماننكره ولاهو يتبدل
رجعتهم محاله بيش نتأمل
ترد الايام انسي نلتم اوهام انسي
حلمج ابد ميكون * لو تنعمي العيون
****
شكثر راحولي وانه اعله الهجر صابر
واحدهم وكفته تطيب الخاطر
عليهم كلبي احر من الجمر صاير
ماردهم حنيني ودمي الفاير
اشكي لله حالي مل من الاه حالي
عتابي مايسمعون * لو تنعمي العيون
****
الهجر ماحن عليه ورحمني
انهدم حيلي ياويلي والحزن هدني
بعد شيفيد نوحي وحسرتي ووني
اخذه الموت مني وليه ماخذني
ام الاحساس ماتت ذيج الانفاس ماتت
حواسي عليها يبجون * لو تنعمي العيون
****
تستاهل عليها اكضي العمر بلون
او عيني من البواجي والحزن تعمن
نار الوحشه بيه يجون ويدمن
اموت من القهر ليها الكلب لو حن
ماادري الموت ياخذها من عندي سكوت ياخذها
عليه الفركه متهون * لو تنعمي العيون
****
من راحت خديجه وبالكبر سكنت
اغصاني الي جانت زاهيه ذبلت
فركته عليه كلشي ماخلت
والف موته اموت الزهره لو ونت
اغلى من الروح هيه بلسم لجروح هيه
شيب رمش الجفون * لو تنعمي العيون
****
صانت كل حدودي ومانطت بيه
واكثر مني هيه خافت عليه
مليانه مشاعر كلها حنيه
كون انصب عزاء عليها يوميه
يامه تمنيت ترجع ويانه اعله البيت ترجع
سر وبيه مدفون * لو تنعمي العيون
****
خادم اهل البيت عليهم السلام
الشاعر السيد{هاشم قاسم سعود البلداوي}