توني أنا و الدمع كنّا بطاريك
رمشت قدامه وطاح.. و طريتك
أسعدتني الله يسعد لياليك
ربي كتب لي عمر ثاني.. و جيتك
ذوبتني و الشمع ذايب معي فيك
أشعلتني طول الزمن.. و أحتريتك

مريت مثل الليل بعيون الاغراب
لقيت ما باقي من العمر غربه
زرعت نجمٍ حار .. بيد النوى و ذاب
وجنيت من شهب الغوى.. كم ضربه
عديت من ذل الهوى راس مرقاب
و البير من غل الظما.. بط جربه
تأوّب لصوتي مشاريه و هضاب
والنوح له آهٍ ماهي بـ آه طربه
كليت من دمعي تباريح و تراب
من خان فيها ملحها .. هان شربه
العوز كيف تطيرّه ريشة غراب؟
لا ناح حلم و طار به قبل سربه!
سهله تطير رقاب يا طير الرقاب
لكنها صعبه على فك كربه
لو إنها ردت على درب و غياب؟
قلبي دليلة ضيم ويدل دربه
مربي أقداره على رب الأرباب
و القفر له منشى يرده و مربى
لا حامت الفرحه علي حومة عقاب
دريت يمي ذنب ما عنه هربه
ضاع النسم و السم لو خانه الداب!
بكره بيخسر كل شي.. أنتصر به
ما يلحق الميّت على صده عتاب
الحق على اللي الموت عنّه يا قربه
ما فز قلبه شوق لأحب الأحباب
الذل من وطي الخطايا .. عثر به
ما حب قدم دعوه بدمعه ولا تاب!
حتى ولا حب يصلح اللي مخربه
راجع حساباتك قبل يوم الحساب
ويخون فيك المعدن اللي مجربه
ذهب ولا كنت أدري إن أصله تراب!
لا يرتفع خشمه و تاليه تربه

‏" إِنَّ اللَّهَ وَمَلَائِكَتَهُ يُصَلُّونَ عَلَى النَّبِيِّ ۚ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا "
اللهم صلِّ و سلّم على نبينا محمد و آل محمد
قال صلى الله عليه وسلم: من صلى علي صلاة واحده ، صلى الله عليه بها عشراً.
وصلاة الله على عباده تعني المغفره و الثناء.
-لك أن تتخيّل صلاة الله عليك !!

إلهي تباركت وتعاليت يا قهار
يسبح بحمدك كل شيٍ بمقداره
لك الحمد و التكبير وحدك والاستغفار
ولك الحب يا فالق نواياه و أسراره
تعز العزيز وتجبر قلوب يا جبار
لطيفٍ خبير بكلّ كسرٍ و جبّاره
ينجيك لو بـ جب لك رب ..لطفه مار
لو إنك بسابع أرض؟ مرْتك سياره
لك الله يا روحٍ وفت لأخر المشوار!
تزور الولايف كنها آخر زياره
إذا دارت الدنيا و بارت مع الأبرار
يموت الذليل و شاهده نعل قباره
قلوبٍ تقلّب في يد مقدّر الأقدار
ولا في يدين العبد قدره على أقداره
نسى يوم فيه النار توقد بشر وأحجار
قسى بغضها في بعضها قسوة حجاره
ومن الحجاره ما تفجّر و شق أنهار
وكم خضعت خشية من الله منهاره
يورّد بذكره ورد .. ويصبّر الصبار
تصوّر عقول وكل لوحٍ ومسماره
يسد بمكان الذيب.. لا غاب غصن كنار
ينزل على المبلي علاجه، ويختاره
بنادم ندم ويخونه العمر بإستحقار
يدوّر هواه ولا درى عن هوى داره
يحسب الزمن ذكرى وأثاري الزمن أذكار
وكل واحدٍ ياخذ نصيبه من أذكاره
دخيلك ياربِ من عذاب القبر والنار
تطمن نفوسٍ لايمه كل أماره.

أنا أنا، من صغر سني وأنا في عنا
زرعت لين الخطاوي من خطايا جنوا
أنا خذتني سنيني ، يوم أدوّر سنا
كل الاماني بحر ، يم المنايا دنوا
سمعت صوتٍ يقول إن الحقيقه هنا !
بس الحقيقه، أنا ما كنت عارف شنو
الناس هاذي منو ؟. هذا أنا.! مو أنا؟
طيّب عرفت العدو.. لكن صديقي منو؟
غارق بفضل اللطيف اللي خبيرٍ بنا
سبحان من حط بالشدات ما هوّنوا
الحمد.. بر العفو و العافيه و الهنا
الحمد لله و الدنيا و أهلها فنوا
الحمد لله وحده و الشكر و الثنا
ملاحده دوروا غيره ولا عيّنوا
الحمد لله في كل حاجةٍ بيننا
آياته البيّنه ، مع ناس ما بيّنوا
اللي يظن الغنى في مال.. ماله غنا
لو شاف جنة عدن، ما قال كيف أغتنوا ؟
الله لنا ، أشهد إنّا بخير دامه لنا
رفت له قلوبنا وبذكره تطمنوا
حياة دنيا تزيّن بين مال و ضنا
والباقيات إن بقوا بالصالحات أعتنوا
ناسٍ تحسب البسيطه ماوراها فنا
وإذا أقاموا صلاة الله ، ما أذّنوا
تحفظ أحاديث ، حتى وإن سرق وإن زنى
و إنهتكت آمالهم بـ الغي.. حتى زنوا
إيماننا كيف يوم الحشر بـ نأمنّا؟
وابن الذينَ كفر غير الذين آمنوا !

الحمدلله يوم إن الستر ضافي
من أول الخلق سبحانك لتاليها
الحمد لك والثنا اللهم يا كافي
يا عالمٍ بكل نفس وكل خوافيها
قريب لطفك علي طبطب على أكتافي
سكينةٍ تسكن الروح و تدفيها
أغيب.. و البرد وحشه تنهش أطرافي
وأحطب من الليل دعوه .. وأشتعل فيها
غرقى سنين النوى يا عمري الطافي
والنار ما تحرق الا قلب واطيها
ما خانك النور.. خانك ظلمك الوافي
والله نور السما و الارض يكفيها
ليتك مع الحق ساعة كنت متعافي
في ساعةٍ الله أعلم عن بلاويها
ما يحسب الطيب طيّب كانه سنافي
ما غير الإخلاص بالشده ينجيها
ما تلحق الموج شرهه كثر .. مجدافي
وش قيمة النفس لا خانت مباديها؟
كم ليلةٍ ما لمسها طرفك الغافي
حوريةٍ تسهر الجنه لياليها
ندم خطا جرة الولهان ..للسافي
وش قيمة الرجل لا زلة خطاويها؟
حتى لو إنها تجملني بميقافي!
يا رب يوم الحشر أقدر أمشيها

أهزّ العمر ويطيح منّه غصّن رمّان
سريت ورميت اللوم ومقيط في بيره
عيون الليالي فاتنه كاذبة ألوان
حسبت إنها مدحه.. وأثرها طلعت عِيره
عليها فنى صبري.. وكل من عليها فان
ولا فادني قلبي بكثرة معاذيره
زمان الأسى وده ينسّيني القرآن!
نسى قدرة اللي حط للكون تقديره
أشوف الهوى يرقص وأشوف الجبل طربان!
ولاني بمستغرب إذا هزة الديره
على النمل تاطى رجل ويكابر الإنسان
نسى يوم فيه الرمل كابر بتصغيره
إذا زلزلت زلزالها وكان ياما كان
ياويل الكبير اللي نسى كل تكبيره
بنادم على الدنيا سرى بدمه الحرمان
بيندم ويبكى دم عن كل مشاويره
عصيت الزمان و رحت أبي طاعة الرحمن
أنا مسلم مسلم لربه مقاديره
يموت الشغف لا صار ساس الشغف شيطان
وأنا عبد لله ماني بعبدٍ لغيره
سحابٍ حسبت إنّه سحاب ! وطلع دخان
وغيابٍ حسبت إنّه عذاب ! وطلع خيره

يا بحر جيتك وأنا نفسي غريقه
‏روحي يم الفرح موج و جرح حادق
‏قال من ولّع بصدرك؟ قلت ضيقه
‏ناصب آمالي على عروقه سرادق
‏في يديني قاز و أطفي حريقه
‏للموادع حرب ما فيها خنادق
‏ما لقيت لقلبي الضايع طريقه
‏ماهو بكل ثار، يوخذ بالبنادق
‏المحبه شك، و الفرقا حقيقه
‏يوم يتركني لحالي.. كان صادق

ما سألت الكرى والناس حتى لحاف
اسألك، وأنت من يسألك كيف يهلك؟
فوق سبع السنابل دون سبع العجاف
خاب ظني بنفسي وأستحيت اسألك
علّم أبصار تبصر صبرها ..لا تخاف
أمنّت فيك وحدك لا شريكٍ ا لك
كم ذي نون يتحرى من الظلم كاف!
كم نفسٍ تجاهل، مير ما تجهلك
من عرف عزتك مايعرف الارتجاف
من سلك في طريقك أشهد انه سلك
أشهد أن لا إله إلا أنت حق إعتراف
هلل البحر وبحمدك يسبّح فلك
يوم عبد الملوك يشاف ولا يشاف
أنت رب كل شي ما غيرك أنت الملك

غربة خطا، وبكل خطوه عقوبه
قلبٍ خذى كل شي، إلا قراره
كنت أحسب الأيام ماهي محسوبه
ماكنت أحسب ان الليالي تجاره
سهله إذا مرت عليك بصعوبه
فرصة عمر والعمر ربح وخساره
نوبه أحس بذنب وأندم، و نوبه!
يغشى على قلبي و أحسه حجاره
لا ضاق ثوب اللي طفح من ذنوبه؟
‏ما ينفعه لا قام ينتف زراره
‏كريه طعم المعصيّه بعد توبه
‏مثل مرارتها ما مرّت مراره
‏الذنب له ونّه و دمعه و حوبه
‏من رد لله .. رد كل إعتباره
من صابته دعوه ولا أحد بصوبه
ماقام يدري وين يمّة دياره
‏ماقام حتى يلتفت في دروبه؟
‏ملائكه تكتب يمينه و يساره

من رحمة الله لو تعرف الغيب ما تنزل يديك
‏الجهل غيّب في قلوب الناس قبل عقولها
‏كم ليلةٍ قلّط بها الشيطان ضيفانه عليك
‏و شهب الليالي ترجم الكلمه.. قبل يرقولها
‏ياللي تحسب إن الفراسه فيك، ليت الخير فيك
‏ما كل كذبه تتّفل بأذنك، تقوم تقولها

كل ليلٍ منك خالي عم ضيقه
الأماني كنت أبي جد، توفّق
كل سحاب تسامره نادى رفيقه
يا سهادٍ لا لمس طرفي ترفّق
الجروح اللي من كفوفك رقيقه
كل حزه بخاطري منك أتشفّق
حتى لو شبيت في قلبي حريقه
قام وقّف لك من أشواقه وصفّق
كذبةٍ من كثر ما كانت حقيقه؟
ألقف ادنى عذر وألقاه يتلفّق
ماقدرت ألقاك و ألقى لك طريقه
لا تلقف من طواريك المطفّق.

الولي الله تعالى ولا غيره ولي
يدرك الأبصار سبحانه ولا تدركه
يختلي بالذنب من سكّر الباب.. و تلي!
نسمةٍ من فتحة القفل.. ليت تحركه
علم اللي يحسب إنه من الرحمه خلي !
كل مصيبه لا بغاها، يخليها بركه
لا قنع في حكم ربه همومه تنجلي
لا سخط في حكمه المشرك أبن المشركه
كنت أعيّب ع الليالي وعاني مبتلي
من غدر في جفن عيني بظلمه وفركه؟
يا علي.. لا يهرجن الرواخي يا علي
للشدايد هرج منه الرواسي مبركه
أتحلى بالصبر .. والصبر ماله حلي
من خلقه الله وهو ما هزم في معركه
دنيا ما دامت لغيري ولا وصلت إلي
الحظيظ اللي تركها قبل لا تتركه

قم تحدى كلما وقتك تحدّى
‏منهو غير الله تعالى نشتكي له؟
‏طيب حتى في عدوّك، لا تردّى
‏الردى ملعون من حطه سبيله
‏ووقف إن مريت مسجد .. لا تعدّى
‏من تعدى باب ربه..وش دليله؟
‏ولا تصدق من يقول العمر هدّى
‏العمر ريشه تطير بظرف ليله
‏و طمّن اللي جفنه من الخشيّه..ندّى
‏و بشر اللي ما سجد له بالفشيله

شبيت عمري للسنين وتنطفي
كم من سنه حلمٍ حطبته من سناه
أدري تغيب الشمس لكن ما تغفي
بكره تحرى تشب من كل إتجاه
يا نفس.. قولي كيف أحدد موقفي؟
لا تخادعين الله جلَّ في علاه!
أستغفري ربك من الشرك الخفي
لغمٍ توطى في جهنم من وطاه
أنتبهي لحالك لحالك وألطفي
ماعاد به شيٍ يشد الإنتباه
روفي دخيل الله فيني وأنصفي
بكره لنا وقفه أمام الله عراه
لا عاصمٍ من أمر ربي ولا يفي
سبحانه فاطر كل شي عمّا سواه
كافي خلاص أرجوك حسي وأكتفي
أدري الحياه حلوه.. لكن مو هالحياه.

يسبّح لك السجّد ويستغفرون قنوت
لك الحمد ولك الشكر والحق ما قبّح
ترى الفرق فرق الذكر .. بين الحياه و الموت
نسى من حفر حفره.. بيذكر إذا طبّح
على العروة الوثقى فلا أستمسك الطاغوت
تمسك بكرسيّه ومستذبح و ذبّح
الإيمان ماله قلب لا صار ماله صوت
زمان العجب مسى من الضر... ولا صبّح
ينادى نبي الله يونس ببطن الحوت
بجوفه لبث للبعث.. لو إنه ما سبّح
شيوخ ومشايخ عزها بس لبس بشوت
يا رخص اللحى اللي من ورى الدين تتربّح

أمتلى قلبي ونين و حنين و لايمين
‏في عيونك دمعتي.. لعنبو من لامها
‏أتلفتْ ما لقيتك يسار ولا يمين
‏كيف تفتك الحنايا وطيفك لامها؟

فيني من الصمت ما يروي فيافي
‏وفيني من البوح ما يكفي عن البوح
‏لكن تركت الوهم هذا خلافي
‏أنا وصلت لهنيّا بطلعة الروح
‏الله من سنين ما مرت عوافي
‏يبيلها قلب أيوب و متن نوح
‏على كثر عبرتي ما قلت كافي
‏سامحت كل جرح.. لو ماهو بمسموح
‏ما عض كف الندم من كان وافي
‏الوافي يخلص مع الأيام... و يروح

سهاد.. مل عين الفراش رقاد
رذاذ ينفث بالحنايا روض
ياما و ياما ما رويت اكباد
كوثر ولا جف بعيونك حوض
رايح على بال السنين و راد
مفروض ما تنسى بخمس فروض
ماقد سمعت بعيد للميلاد
براق.. ما شفت بحياتي نوض
ماجابتك صدفه ولا ميعاد
مكتوب لي في لوحي المحفوظ
يقدر الله ما يشاء و اراد
وتخضنا الفرقا .. وحنا نخوض
حاولت كم مره معك مافاد
أزريت أعيّن عين عنك تعوض
من ترفضه الغربه وكل بلاد؟
ماعاد يدري شنهو المفروض
يا شرهةٍ ترضخ لها نقاد
يا قسمةٍ ماتت وراها حظوظ
أنا دخيلك لا تزيد عناد
عهد الرضا باقي.. معك منقوض
يا جود ماجادت به الأجواد
من كل جنة حلم، فيك غيوض.