يوم القاسم ع

يولـيدي يالقاسم .. شمعة بني هاشم
طفوها يبني شمعـتك ..وصارت عزيه فرحتك
يوليدي يالقاسم ..

……………………………

ليلة امـس فرحـة وشمع چانت ييمه بالخيم
وبيده الگمر ابخيمـتك يايمه شد ابيض علم
وفرحانه زينب عمتك وسون الك حنه الحرم

لكـن لمـن طـر الصبـح .. تصابحنه عرسك بالذبح
جابوك الي دمك يصب .. وبيك اشعمل يمه الرمح

ويا سلوتي سهمك .. صوب گـلب امـك
سيوف المعاره مگطعتك .. وصارت عزيه فرحتك
يوليدي يالقاسم ..

……………………………

يا يمه وبعرسك ردت افرح مثل باقي النسه
كل أم حلم عدها يضل اليكـبـر ابنـها اتـعرسه
بس اني ابني بكربله مو عرسه احضر مجلسه

مو للفرح هذا الشمع .. بشمع المصيبة انفجع
ورد الانـثره بـزفـتك .. صبح يجاسم منگطع

يالمـنـمرد خـدك .. مات الورد بعدك
نحنه وبچينه بليلتك .. وصارت عزيه فرحتك
يوليدي يالقاسم ..

……………………………

مات الحلم مات الأمل عكازه ردتك للوكت
انـته الـتزتـني للـگبـر تـاليها شو انته المتت
بحضني المنـك وذر يا يمه ابــد مـا حسبت

ردتك ذخر تالي العمر .. تنـزلـني بيدك بالگبر
تاليها اودعك والهظم .. يرافگني يمه باليسر

ولو صرت اودعنك .. وامشي بيسر عنك
عالگاع اعوفن جثتك .. وصارت عزيه فرحتك
يوليدي يالقاسم ..

……………………………

جاسم يبعد امك صدگ تخليني وحدي بكربله
هجـرك وحگ شيبة علي يا يـمه ابـد مـا احمله
ياهـو الينـوخ نـاگـتي من انـسبـي وي العـايـله

يالچنت تبره المحملي .. وتـگـلي يمـه اتـدليلي
باچر يبعد امك سبي .. وياهو البعد عينك الي

ضليت انه الوحدي .. ويچوي الدمع خدي
وحشه يجاسم وحشتك .. وصارت عزيه فرحتك
يوليدي يالقاسم ..

……………………………

هـم تـدري عمـك يالولـد عليك انـكـسر منه الظهر
يالچنت امانة من الحسن لو شافك لشخصه ذكر
اشگـد بچـه يـم جـثـتك عله مصيبتك لا ما صبر

يايمه جابك للخيم .. يزحف واظن ظهر انجسم
يصرخ أيـا تالي الحسن .. والـتمن اعليه الحــرم

واني احضنت صدرك .. وزينب تشم نحرك
تگـابـلنه يم اجنازتك .. وصارت عزيه فرحتك
يوليدي يالقاسم ..

……………………………

يا يمـه ضل الوحـده عمـك حسين وي العــدو
لا صاحب الضل لا ابن يفزعله لا ضل ليه اخو
بـس العـليل ابخـيمـته وغـير النسه لا ما اكــو

وذيچ العساكر شافته .. ضل وحده ويلي ابغربته
عله حسين تالي تكاثرو .. وصارت ييمه امصيبته

ريحـانـة الزهره .. يبني نگـطع نحـره
وهانت عليه امصيبتك .. وصارت عزيه فرحتك
يوليدي يالقاسم ..

الشاعر عقيل الحسناوي..
.

يوم علي الاكبر ع

سباح دلالي انـگـطـع راح الـولــد
ياريت ميتـه ولا علي مـيرد بـعـد
تموت الذي تفـگـد ضناها
يا وسـفـه للضايـع ربـاها .. راح الولد
……………………………

وي گـلبي احس ظهري انكسر .. لمن سمعت بهل خبر
ابـنـي علي لـيه هـجـر .. ما يرجـع الحـضني
گـالـولي ما يـرجـع الـي .. سلــوة حـياتـي وكـل هـلي
يايـمه صحـتـه يا عـلي .. مو وكت وتـذبـني

يا تعـب شيـباتي .. ويا سهـر دمعـاتي
وينـه حـگ اربـاتي
عـمـت بـعـدك عـيني .. بـيا كـتر دليني
ضيـعـيت اسنـيـني

دلـيـني ويـن بـيـا كـتـر طـاح العـمر
خليني اودعك يالذخر موت الهجـر
عيوني تره فگدك عماها
يا وسفه للضايـع ربـاها .. راح الولد

……………………………
الماتـلـها يايـمـه ابـن .. تـفـهم ونـيني من اون
يعاشرها للموت الحـزن .. آ يـا عـلي يمـه
ميتـه تـراها ام الوالد .. لـو مـا يــرد الـها بـعد
لا ما يمـر بـيها السـَعـد .. يبني الولد نعمه

بنـوحها و ونـتها .. عايشه بغربـتها
ومالحـه دمعـتـها
الموت الها راحه .. ولا تضل بنياحه
تعيش ما مرتاحه

الماتـلها بالدنـيه ضنـا تمـوت بحزن
وتبقـه لتوالي هالعمر تطحن طحن
والموت رحمه لو لفاها
يا وسفه للضايع رباها .. راح الولد
……………………………

الضايع رباها والسهـَر .. وما فرحت بعمره الكـُبـَر
فگـده يـهد الها الظـهر .. ويولـيدي يعمـيها
تـتذكر ايـامه المضت .. وي مهـده يـامـا ساهرت
لضحكـاته ياما اتبسمت .. يسرها ويسليها

وهسه ابنها الرايح .. وبالمعاره طايح
عليه تشبع صايح
ما تجـف الدمعـه .. وعالولد بس تـنعه
وبگـلبـها الوجـعه

تموت اليرد الها الابن بس منذبح
بالنوح ما تعرف بعد ليل وصبح
راح الذي يسند گـفاها
يا وسفه للضايع رباها .. راح الولد
……………………………

و بموتـتك مات الگـلب .. هجرك علي يمه صعب
والخيمـتك كـلما اطـب .. بـيها اشم عـطرك
نيـران روحي تشتـعـل .. موتـك علي ما ينحـمل
چا هيچ يمه تنچـتل .. سيوف العده توذرك

ياعلي يگـطعـونك .. بحـافر يسحگـونك
مخربـين عيونك
الف طبره بصدرك .. والف طعنه بظهرك
فرهدولك عمرك

گـصران طولك يالحـلو من الطـبر
جابوك الي چومة لحم دمك يخر
امك تره وضعك سباها
يا وسفه للضايع ربـاها .. راح الولد
………………………………

جابك ابوك ابـيا وضع .. ما سلـم من عـندك ضلع
تگـابلـنه نجـريلك دمـع .. يمـه وتـذكـرنه
ضحكـاتك الحلوه علي .. وانـظر الـه وينـظر الي
ياليلى گـال اتحملي .. عگب الولد ضعنه

وصرنـه دم نبچـيلك .. ثـنـينه نـنـعـيلك
وماگـدرنه نشيلك
شصار يمه بحالك .. مگـطـعيها اوصالك
بـثوبه تـالي شالك

نحضنك نريد وما اكو الك باقي حضن
يا يـمه جـسمـك يا علي شـو منـسحـن
وعمتك اجت نصبت عزاها
يا وسفـه للضايــع ربــاها .. راح الولد
……………………………

يايمه عمتك شافـتك .. وتـتـنخـه صارت غيرتـك
تگوملها يمه رادتك .. بت حيدر اتحشمك
گـالت علي يبن الاخـو .. يا ذخـر الحسين وكـفو
ابوالـدك حـاط العـدو .. يالسابـح ابدمـك

شحال بينه وبينك .. غمضت شو عينك
وحـيد ضل حسينك
گـوم يا بـو الغيره .. حسين طاح بحيره
ويـن وجـهه يديـره

لا ضل ابن لا ضل اخو وحده صفه
وهذا المـخـيم يا علي شـب وطـفه
سهام الوكت بينه رماها
يا وسفه للضايع رباها .. راح الولد

الشاعر عقيل الحسناوي..

.

يوم العباس ع

ياخـويه اجـيتك للنـهر واسمـع ونينك
اچفوف اديك امگـطعه ومطفيه عينك
فايض دمه وماي .. واجروحك اهواي
واسمع ونينك ..

……………………………

ادركني يا خويه اسمعت واركـض اجـيتك للنـهر
نـايـم لـگـيـتك عـالـتـرب وظـهري يـعباس انـكسر
حاچيني شنهو اليوجعك التارك على ادموعك اثر
سـهـم الذبـحـلك جربـتك لـو سهمك الطـفـه النـظر

ونك يخويه ينسمع .. وعالخد اثر جرح الدمع
للراس هذا المنهشم .. لـو وجـع چـف المنگطع

حاجيني يا بعد العمر ياهو من الجروح
هاكـثر خـويه يوجـك ومنك عله النوح
شيفـيدك ادواي .. واجروحك اهواي
واسمع ونينك ..

……………………………

ما چـان لجـروحـي ابـــد يحسين وني ودمعـتي
جرحي الچبير الماله طب ذبحـو الماي ابـجربتي
صرخات ياعـمي العطش براسي اشد من طبرتي
ولوعة سكينه من الضمه يا خـويه مـنـها لوعـتي

ياخويه صرخات الضمه .. عليه اشـد من العـمه
ويا خويه صد الجربتي .. مو ماي متروسه دمه

الماي اجـيـبه واعـدت تدري الوعد دين
وسهم الذبحلي جربتي ذابحني يحسين
وما تـعـبك وياي .. واجروحك اهواي
واسمع ونينك ..

……………………………
صوب النـهـر لمـن رحت المــاي اجـيـبه للخـيم
چنت اسمع اطفالك تون من العطش وي الحرم
ماي اترستها جربتي وحاظنها خوفي من السهم
محاميها بچفـوفي وچنت مغـطيها خويه بالعلم

وچانت اسهـام التنشمر .. بعظامي خويه تنكسر
وچنت اشكر الله واحمده .. كل سهم بيها مايمر

من زغري چانت نيتي احميه تدري
وصابوها تالي جربتي وتبده عمري
وماضلي كل راي .. واجروحك اهواي
واسمع ونينك ..

……………………………
لـتگـلـي ارجـع للـخـيـم ياخـويه مـا ارجع ابـد
لمن رحت صوب النهر چنت اني منطيهم وعد
بالماي ارويـهـم گـلت واسگي الرضيع البـلمـهد
وياخويه هسه رجعتي ما الـهـا اي معـنى بـعـد

شلون ارجع وعندك طفل .. بيه العطش ما ينحمل
وامـه الرجعـتي تـنـتـظر .. وادموعها عله الخد تهل

بــالمـــاي اردن تـنـتـظـر تـــروي ابـنــها
عبد الله يبچي وما هده لحظه بحظنها
من هايـه بـلـواي .. واجروحك اهواي
واسمع ونينك ..

……………………………
يالغـيرتـك فـاضت بـحــر وبگـصتـك مايك طفح
خـجـلان تـرجـع للخـيـم؟ چـي بـيدك الماي انذبح!
راح ارجع وظهري نكسر يالكـافل ودمعي انفضح
وابـاب خيـمـتـنه الطفـل عبد الله الي بعينه شبح

وارجع اجيبه بيا گـلب .. ماي اطلب لأجل الشرب
وبـأيدي عبد الله بسهم .. نحـره يخـويه ينضرب

صعبه رضيعي ينذبح بحظني يعباس
ست اشهر وسهمه فصل جسمه عن الراس
فجعتني دنياي .. واجروحك اهواي
واسمع ونينك ..

……………………………
وهـنـا يخـويـه حـيـرتـي ارجع اشلون الخيمـتي
وبـالبـاب امــه تـنـتـظـر مـتلـهـفه حـيل الجـيـتي
شخبرها يا خويه حرت والله چبـيره امصيبـتي
يـام الـولـد راح الـولـد وابحـضني ذبحـو وردتي

بگـلبچ ربـاب المنجرح .. هاچ اخذي ابنچ منذبح
وراجع انه الموتي بعد .. مستعجل الگلبي الرمح

وتـبچي الرباب وعالولد تلـطم صدرها
عباس خويـه مصيبتي شوف شكبرها
شوف المحن هاي .. واجروحك اهواي
واسمع ونينك ..

الشاعر عقيل الحسناوي..
.

ابا الفضل العباس ع لم يودع زينب ع ؟؟؟!!!

مـاودعـتها من رحت وبگـلبي ضلت حسره
اتموت ياخويه خفت بوداعي بـنت الزهـره
وداع .. وي زينـب هـوايه صعب
وداع .. يهد حيلي ويموت الگلب ..
وماودعـتها من رحت
………………………

لمن رحت صوب النهر .. مكسور گلبي والظهر
لخيمتها صديت النظر .. تبچي شفتها
گوه صعدت فوگ المهر .. حسيت ضيعت العمر
برجليه ماشي للگبر .. وماودعتها

كل خطوه امشي والتفت وزينب تصد عليه
بنـظرات مـتروسه دمـع توادعـنه اني وهـيه
شلت ايـدي الهـا وسلمت وسلمت هـيه علـيه


وللشاطي يحسين اركضت ماشوف جيش اگبالي
عـالمــاي ابــــد مــا طـولت لـزيـنـب ارد كـل بـالي
وداع .. شطولـه علي صار الدرب
وداع .. يهد حيلي ويموت الگلب ..
وماودعـتها من رحت
………………………

شگـد حـاولت ليـها ارد .. بس جـيشـهم بـيـه يـرد
وكل طعنه احس عنها ابتعد .. والـموت گـرب
ومن كـثرت اجروحي ايست .. ومعناها زينب ماشفت
وتاليها اديـه اتگـطعت .. وبالي عله زينب

گـطعو اچفـوفي وبعـمـد نهشمت يخويه الهامه
ومو من هذني جسمي ابد يرفس غده من الامه
الذابحـني زيـنـب تـنـتـظر يـرد الگـمر لخـيامـه

حاير شگول وشعـتذر زينب انه مواعدها
وياهـا اگـضيه العـمر ومـاعوفـها الوحدها

وداع .. موت وهجر طبع الحرب
وداع .. يهد حيلي ويموت الگلب ..
وماودعـتها من رحت
………………………

يحسين حطني عله الصدر .. بيك ارد اشم منها عطر
اللحظه الاخيره من العمر .. اتمنى اشمها
سندني خويه ارد انتچي .. بس فدوه بطل هالبچي
بزينبنه خل بس الحچي .. اعشگ اسمها

أمسح ادموعك يالاخو خليني اشوف اعيونك
صورتـها بعـيـونك تـضل يابـو علي خـيـعـونك
بس اني بعـيـوني طفت صورتها خويه ولونك

وحـده الدمه بـيها جـمد وحده السهم طفاها
شبيدي يخويه عله الوعد الفرگني اني وياها
وداع .. دم ودمـع عـينـي تـصـب
وداع .. يهد حيلي ويموت الگلب ..
وماودعـتها من رحت
………………………
يحسن يمي لا تضل .. اني گرب مني الاجل
لزينبنه ارجع بالعجل .. خايف گـلبها
بخيمـتـها قـلقـانـه تره .. تفرك بديـها وحايره
ماتدري طايح عالثره .. ذاكَ تعـبـها

عالشاطي متگـطع وصل ذاك التعب ورباها
واعـيون التحـبـهـن گـبل دم وتـرب غـطاها
چفوف الوفه متگطعه الچانت سند يمناها

ما ادري خويه هالخبر اشلون راح توصله
كافلچ مات عله النهر تكسر ظهر مو سهله
وداع .. بخـيمـتـها مأتـم ينـصب
وداع .. يهد حيلي ويموت الگلب ..
وماودعـتها من رحت
………………………

خليني خويه عله النهر .. ورد ليها مكسور الظهر
گـللـها عباس الگـمر .. راح من ادينه
يبلغـچ سلامه ويعـتذر .. مو بيده گـلها هالأمر
ولعـطش گـلبچ منفـطر .. گـلبه وجبينه

بس خويه ادري بحالتك ميت ترد لخيامك
تسـتـرجـع ابــالك صـور لايــامـنـه وايــامـك
وشلـون تنـقـل هالخبر لام الحـزن وايـتـامك

سبعين الف موته متت بهالحاله واتصورتك
محني الظهر الهـم ترد واتطيح جدام اختك
وداع .. ميت عله ايتامك تطب
وداع .. يهد حيلي ويموت الگلب ..
وماودعـتها من رحت
………………………

چماله يخويه للضمه .. اتموت بضعة فاطمه
لمن تصد شيبك دمه .. من دم وريدي
لعينك لمن زينب تصد .. لتگـلها راح ومايرد
اخذلها چفي وتستعد .. لو شافت ايدي

تعرف وضعـها وتسـتعد ايـدي اذا شـافـتـها
معـناهـا باچـر للسبـي يحـدي الشمر ناگـتها
معناها يم جثتك تجي الليله وتصب دمعتها


بطف كربله كلشي انتهى وللشام باچر موعد
وي روسنه تـلـم الحرم بذيچ الخرابه ونگعد
وداع .. بذيچ الخرابه عله التـرب
وداع .. يهد حيلي ويموت الگلب ..
وماودعـتها من رحت

الشاعر عقيل الحسناوي..

.

يوم علي الاكبر

گـلـبي علي انصاب ابمصابك
وحـيلي انـهـدم يمـه بغـيابك
ابـد ما حاسبه احساب
اعـوفـك فـوگ الـتراب

* * * * * * * *

يمه مشلوع الگـلب .. شلون اعوفك عالترب
وامشي يايمه بسبي وي ناس غـربه
علـيك ظهري منـكسر .. راح كـل تـعب العـمر
يا علي فراگـك يروحي والله صعـبه
يالچـنـتـلي سلـوتـي .. غـربة صارت دنـيـتي
يمـه اليـفـارگ حبـيـبه ايمـوت گـلـبه
ودعتني وانتهت .. احلامي، واحزاني ابتدت
رحـت والمـدمـع دمه بجـفـاك اصـبه

ميته علي بس جسمي عايش
وحزني بجفوني دمعي فارش
جرحـك يمـه ما طـاب
اعـوفك فـوگ الـتراب

* * * * * * * *

شفـتـك بذاك الفــله .. مغـيره حـالك كربـله
انـتـه مـو ذاك علي ابـنـي العـرفـته
جروحك اينزفن دمه .. جسمك اشلون الزمه
وصل صاير يمه جسمك گوه شلـته
راس مـا بـيه الجـسد .. ويــن راسـك يالـولـد
عالرمـح راسـك يـيمـه عالي شـفـته
ما سـلـم عندك ضلع .. العـظـم طگـته تنسمـع
لـون جـسمـك يا علي يـمـه حظنـته

وحـظـنـك علي تـارسـته السـهام
واسمعه من احظنك طگ العظام
يـيمه مصابك امصاب
اعـوفك فـوگ الـتراب

* * * * * * * *

ويـن اشـمـك يالـولـد .. نحـر ما عندك بعد
نحرك بسيف العـدو يوليدي مگـطوع
شلون اقبل وجنتك .. وعيني يمـه شافتك
راسك ابراس الرمـح يوليدي مرفـوع
علـيك گـلبي مـنشلع .. وگـابـلـيتك بالدمـع
وادري ما تشفي جروحك كل الدموع
هـذا حكـم الله الـي .. هـنا اعـوفك يا علي
وامشي للشام ودلـيلي عليك مشلـوع

امشي واعـوفـك عالـترابه
وگـلبي الـك نوحـه وعذابه
ورمـشي يلولد شــاب
اعـوفك فـوگ الـتراب

* * * * * * * *

راح تعـبي والسهر .. وجرحي بوداعك كبر
يا علي ردتـك يـيمـه التـالي عمـري
چنت اظنك ياعلي .. تالي شيبي اتضل الي
وانـتـه تـدفـني يـيمـه بلـحـد گـبري
تالي من شفـتك متت .. من حياتي ايـست
بموتـتك يولدي والله اكسرته ظهري
صعبه يا تعب العمر .. امشي ظهري منكسر
والسبـي دربـه طويـل ومـات صبري

اعوفك علي يولدي صعبه
ودمـعي يالاكـبر دم اصـبه
ودليلي من الهضم ذاب
اعـوفـك فـوگ الـتراب

* * * * * * * *

گـلبي يايمه انذبح .. ودمـع الموادع طفح
راح اودعك وامشي يا يمه اسيره
يبني اعوفك عالثره .. وتمشي امك حايره
خايفه ويا يمه وجهي عليك اديره
امشي تـاليها بدرب .. بـلا ولي عليه صعب
يالـمـدلـلـني وچـنـت ويــاك امـيره
يمـه هـزلـه ناگـتي .. وحيره يـبني حـيرتي
ياعلي بسوط انضرب والله چبـيره

مـتني تـورم والدمـه يسيل
يبني بعد ما عندي كل حيل
چبير ابمـتني الصواب
اعـوفك فـوگ الـتراب


الشاعر عقيل الحسناوي..
.

ليلة العاشر..( عبد الله الرضيع )

يمه نام .. سهمك وغافي بوريدك
والظلام .. خــيـم اعليه واريــدك
هذا وكت التغـفه بيه يمه عله صدري
ويـن ادورك تـــاه يـا عـبد الله فـكري .. بالظلام
……………………………
هذا وكت ارضاعك ودر صدري يمه
ويـن ادورك كربلـه يولــيدي ظلـمه
اعـثـر ابـين الجـثث عـبد الله زحمه
ضاع عطرگ بالحرگ ما گمت اشمه

انته وين .. بيا كـتر دليني صاير
بالدخان .. ضعت وبعج الحوافر
ضعت وشلون الگه جسمك والله مدري
ويــن ادورك تـــاه يـا عـبـد الله فـكري .. بالظلام
……………………………
يمه من ابـعيد ناغيني ارد اسمعـك
بلـكـت انـدلك يـعـبد الله واتـبـعـك
حيل مشتاگه يروحي وارد ارضعك
خاف باچر امشي يوليدي واودعك

الــــوداع .. يا حبيب امك يغالي
كلشي راح .. تعبي ومساهر ليالي
ياحـرامـات الـلـبــن ضل هسه يجري
ويـن ادورك تـــاه يـا عـبد الله فـكري .. بالظلام
……………………………
ويـن نـايــم ارد اجـي يا يـمـه يمـك
ارد اطلـع من رگـبـتك بـيـدي سهـمك
يمه اريدن شيبي اصبغه بفيض دمك
وخاف هاي الخيل تمرد يمه جسمك

ارد اجــيـك .. حـتـلـو يا يـمــه باللـيل
عليك اخاف .. تنسحگ يوليدي بالخيل
بـلـيـل اجـيك وفوضت للباري امري
ويـن ادورك تـــاه يـا عـبد الله فـكري .. بالظلام
……………………………
يبني يالما عيني شبعت شوف منك
النـار ما تـطـفه بـدليلي الا احـظنك
ليـش فـارگـنـي زمـاني يـمــه عـنـك
ريـت يـمـه ابگـلـبي السـهام الرمـنك

ريت اموت .. شلي بالدنيا بـدونك
نظره اريد .. يمه من نظرة عيونك
نظرتـك تطفي يـيـمه بروحي جمـري
ويـن ادورك تـــاه يـا عـبد الله فـكري .. بالظلام
……………………………

بحظني متعود گبل يوليدي اخليك
خالي مهدك يمه واني ارد اهـز بيك
نايـم بهـيـمه يروحي خايـفـه عليك
حـار يوليدي الرمل وادري يجـويك

والـتـراب .. يـمه لا ياكـل اخدودك
ردلي عاد .. تواسي ليه بذبح عودك
فراگـكـم كـاسـرلي يمـه حـيل ظهري
ويـن ادورك تـــاه يـا عـبد الله فـكري .. بالظلام
……………………………
فـراگ ابـوك امصيبة يا يمـه چـبـيره
تهنه من بعده وصفت حيرتنه حيره
لا اهـــل ضلـيـنـه بـعـده ولا عـشـيره
وعالـنـهر مـذبـوح عـمـك ابــو الغـيره

خايفات .. والشمـر يفـتر علينه
معذبات .. حـرم يايمه شبـدينه
حـرم ضليـنه بمدامـع حـسره تـجـري
ويـن ادورك تـــاه يـا عـبد الله فـكري .. بالظلام

الشاعر عقيل الحسناوي..

.

من منهاج محرم القصائد الرئيسية
يوم مسلم بن عقيل ع

بويه مسلم  انته وينك .. هوايه مشتاگـه لحنينك
الكوفه ادخلـها سبيه .. ندارت الدنيه عليه
……………………………

ودعـتـني بالـمدينه  وچنت احـسك  مـا تـردلي
وغـيـبتك طالت عليه  وبالخـواطر  گـلبي يغلي
واسـرح بعـالم مغـيـبك  ظنـوني يا بويه تـگـلي
يا حـمـيده  مايـردلـچ  مسلم اعله الله  تـوكـلي

اسرح ابعالم ظنوني .. وميت اتشوفك عيوني
وانچـوي بنار الرزيه .. ندارت الدنيه عليه
……………………………

وهسه للـكـوفه من اجينه  ارد ازورك  ويـنه گـبرك
تراب گبرك ردت احظنه  وچني احظن بويه صدرك
وخـدي امرغـنه بـترابك  وعن جـروحي ارد اخبرك
وادري اذا سولـف مصابي   ينـكـسر بالـگـبر ظـهرك

جيتك ابروحي الغريبه  .. اشكي الك نار المصيبه
جروحي تنزف ألـم بيه .. ندارت الدنيه عليه
……………………………

بـكـربلـه لمـن عـطـشنـه   گـطـعـو المــاي الـنـشربـه
وگطعو اچفوف السقايه  وذبحو عله الشاطي جربه
وذبـحـو بسـهم الضلالـه   طفل ضامي شنـهو ذنـبه
وبسـهم  حـقد وضغـينه  حسين مـردو بـويـه گـلبه

وذَبحـو بالطف ولدنه .. ولا ولي ضل بويه عدنه
حامت اعلينه المنيه .. ندارت الدنيه عليه
……………………………

وعمي الحسين  بغربـته  رادك تلحگـه وتحضره
دارات علـيه الاعادي  ومـا بـقـه واحــد ينـصره
بويه لـو عينك  تشوفه   من يحـز السيف نحره
بالخيم ونشوفه يرفس جالت الخيل عله صدره

خربت وجـهه البواتر .. گــَطعت جسمه الحوافر
ويشتكي لرب البريه .. ندارت الدنيه عليه
……………………………

وذبحـو حسين واجونه  حرگـو اعلينه المخيم
ركـضنه والنـار بعبينه  وگـامت برجـلينه تـلـهم
كربله هيمه وچـبيره   وين عنـهم بويه نـنـضم
التسلم من النار بويه  من السياط اشلون تسلم

نركض وتركـض ورانه  .. سياطهم  اكلت گـفانه
وهاي الاثــار بأديه  .. ندارت الدنيه عليه
……………………………

وبويـه تـاليـها سـبـونه  وعالـهـزايـل  ركـبـونه
وتـالي للـكـوفه اجـيـنه  بـلا محـامل دخـلـونه
الناس تـتفرج علينه  وچـن ولا يعرفون ابـونه
يا وكت علويه  تمشي  بسوگ ما ترحم عيونه

نـظـرة الشـمات تـذبـح .. وچـلـمة العـُذال تجـرح
گوم بويه الحگ اليه  .. ندارت الدنيه عليه


الشاعر عقيل الحسناوي..

.

بحر طويل يقرء (كربلائي او اهوازي او نعي )

يوم العاشر

زينب صوب اخوها حسين راحت تركـض وتعـثر
من گــب ابعـجـاج الخـيـل وادي كـربــلـه تـغـيـر

………………………………

ركـضت زينب عله حسين حـست بالخطر صوبه
لگـت يمـه الخيول اتجول الدنـيـه هنـاك مگـلوبه
لگـتـه شـلـون صايـر بـيـه چـبدته بسهم مصيوبه
وگـالـلـهـا يــزيـنـب مـــاي گـلبي من الضمه تفطر

………………………………

يـزيــنـب بلـكـت امـيــه ابـلـل بـيـها بـس اشـفـاي
العطش يازينب ادخيلچ نار وتشب واسط احشاي
وگـالـتـه يـبـعـد اخـتـك يخويه منين اجيب الماي
وهاي الخيل هاي الناس علـه خـيمـنه غدت تفـتر

………………………………

يخـويـه بـالـخــيـم شـبـت نـــار وانـتــه ما تــدري
نــايــم عـالارض وتـلــوج ونــار بعـيلـتـك تـسـري
وعفتها وجيت اركض ليك انته اللي اشغلت فكري
من شفت الاعادي تحوم وجمعـها عليك ضل يكـثر

………………………………

سمعت هـوسات بالميدان يهـوسون برماح الشـوم
وانـتـه عالـترب مـطـروح وما تگـدر يخويه اتگـوم
شـي بـحـجـار يـرمـونــك شي بسهام تـرمي الگـوم
واجيت وشفت ظهرك بيه طـعـنـات لـغــدر خـنجر

………………………………

شمر ياخويه جاك ابساع يمـشـي وشـره بـعـيونه
اظـنــه لـلـذبـــح نــــاوي شـفـت اسـود گـلب لونه
نظر نظره ويزينب صاح وعليه اصتكـت اسنـونه
گـومـي وخــري يـگــلـي وعـيـنـه تجادحت بالشر

………………………………

وگـلـتله يـا شـمـر وخـر لا تــذبــح اخـــوي احـسين
اذا تـذبحـه اضيـع انـي وبـعـد انـطي الوجـه لاوين
ولـنه برمحـه هالملعـون يـدفـعني وسطـرلي العـيـن
ولن اظـلم بـعيني الكون اشـوفـن دربـي مــا اگـــدر

………………………………

ولـنـه اگـبـالـي هـالمـلـعـون يحـط وسط الگلب رمحه
وضل يرفس اخوي احسين غميچ ابگـلبه اظن جرحه
وشـالـه اعلـه الـوجــه ذبــه وبـسـيـفـه غــده ايذبحـه
وانـي اگـبـالــه يـا هـلـنـاس سمعـته طـگـطگ المنحر

………………………………

شال الراس عن جسمه وعلـى ذاك الـرمــح خـلاه
وچـنه عله الرمح روحي وي راسـه اخـذهــا ويــاه
وبقيت الطم على راسي شلون ابن امي اريد انعاه
ومـا ضلـت الـي خـيـمـه ابـچـي اعلـيـه وي الخـدر

الشاعر عقيل الحسناوي..
.

ابوذيات زينب ع

روحي من الهضم بالشام لابــت
ولاخيمه الـتلمني صفـت لا بيت
رديــــت ولا خــــــوان لابـــت
تسليـني عگب موتـت رقيه ..

اخـوتـي الفـارگـونـي وجفوني
الدمـع نـار بفـگـدهم وج جفوني . حرگ الجفون
انــه ابـديـون تـــالي وجفـوني
وكل الناس تـتـفـرج عليه ..

بنات حسين نار الطف عمـتهن
ركـضـن واليـسـلبـهـن عمـتهن
مـرعـوبـات ويــدورن عمـتهن
بيها ايلوذن من اسياط اميه ..

چلـت كربله بوحـشه وخـيمات
وخدر ماضل بعد النه وخـيمات
شبيدي والزلم تفـتر واخي مات
احشمـن بعــد ينـغـر عليه ..

كـعـبـه والـحـزن بالـهـم يطفنه
احترگنه وما فزع واحد يطفنه
شنو شتاخـذ بـعـد اكـثر يطفنه
اخوتي اتذبحت واني سبيه ..

وكـتنه الضيم بالطف عمه بينه
وسياط الجيش كلـها عمه بينه
ركضنه وشفنه طايح عمه ابينه
بالحومه وترض بيه اعوجيه ..

يخويه مصابك اشعـظمه هز النه
ومن تعب السبي وضيمه هـزلنه
ركــبـنـه بـــلا هـودجــنـه هـزلنه
ودخلنه السوگ گبل المغربيه ..

الشاعر عقيل الحسناوي..

مشهد ـ حرم السلطان ع

انــه الـوالــده والـگــلـب لـهـفان
ودليلي بالحزن والـنـوح لـه فان
على الذاك الظهر لحسين لـهـفـن
ولگـنه مرضرضاتـه الاعوجيه..

الشاعرعقيل الحسناوي

مصيبة الحسين ع.

يالعـطشان مـا شارب لـذيـذ المـاي
اجيتك وبعباتي عليك اسوي افياي
الشمس ياخـويه حارگـتك
عسى تنفـعك عبات اختك
……………………………

طلعت من خيمتي وجيتك اركض بالجثث اعثر
گـبـل ليـذبحـك الملـعـون عرفته لذبحك اتحضر
ويخويه بيا وضع شفـتك جسمك يلـولي امـطبر
الجـروح اشلـون اضمدها اشــدن يا جـرح اگــدر

جروحك عبرن الالـف وتسعـمـيه
شخـيـط ياجـرح تـاه الفـكـر بـيه
بــدمـع عـيـوني ضمـدتـك
عسى تنفـعك عبات اختك
……………………………

شفـتك عالرمل نايـم يخويه وحـار ضل يچـويك
وشمـس العـاشـر التـلـهب تـلـسع بالجـروح البيك
وانته اتـلوج عالـتربـان واشوفك وترفس برجليك
اجيت اركـض الك واعـثر بعباتي گلت افيي عليك

من حر الشمس عادن يخويه ارتاح
ولو محترگـه منها هالعـبايه اصفاح
تـهـيـد مـن الوجـع ردتـك
عسى تنفـعك عبات اختك
……………………………

الشمس حرگـة جلد جسمك يخويه وغيرت لونك
وانـته مـن العـطـش والحـر ذبـلـن يالولي عيونك
الجـروح ابـوجـهك هـوايه بحلگـك كسرو اسنونك
وچـا لـيش بحـجـر يرمـوك نـيـتـهـم يـدفـنـونك

الحجر صاير عليك حسين چن تـله
گـلي شلـون جسمـك خويه اوصلـه
ومـن بـيـن الحجـر لحـتك
عسى تنفـعك عبات اختك
……………………………

يبعد اختك صحت يمك يروحي شصاير بحالك
عدل بعدك يماي العين واشوف مگـطعه اوصالك
الشمـر هـذا عليك يحـوم گـرب خـويه وتـدنـالك
يحــز راسـك اظـنـه ايـريـد هالـمـسـرع تـعـنـالك

اجـه يركض شمر ليك وشهـر سيفه
يريـد اگـبالي حـز نحـرك على كـيفه
ولگـاني خويـه حاضنـتـك
عسى تنفـعك عبات اختك
……………………………

الشمر يضحك علي ويگول الخدر يام الخدر چاوين
حرگـة اخيامـچ وشـفـتـچ تـركـضين بعـمـر خـمسين
واضحك مـن اشـوفـنـچ يبـت حيدر علي اتـطيحين
وهسه احـرگ بعـد گـلبـچ گـبالـچ راح اذبحـه حسين

عـنـك خويه شوفـه هاليجـر بيه
اوخـرنـه ويطگـني بسوطه بيديه
يطگـني وابــد مـا عفـتـك
عسى تنفـعك عبات اختك
……………………………

واشوفك ترفس برجليك من ايطگني تتحسر
تريد اتگـوم بـس تـعـبان حـيلك خويه ماتگدر
ايـدك ما تـحـركـها الظـهـر وي صدرك امكـسر
وتالي گـبالي حـط السيف وبراسك غـده ينحر

رجعت اركض يخويه بدمعي لخيامي
ولگـيت اخـيامي محـترگـات جـدامي
ورجعت بحـزني حشمـتك
عسى تنفـعك عبات اختك

الشاعر عقيل الحسناوي..

.

بحر طويل ( كربلائي او اهوازي )

وصية الزهره يالخادم گـلبك فـتحه واسمعـها
الخـدمه التـتعب عليها بــذنـبـك لا تـضيـعـها

،،،،،،،،،،،،،،،،،،،،،،،،،،،،،،،،،،،،،،،،،

لحـسين شكـثر تـتـعـب هـذا تعـبك ابـعـيني
اعرفك من گـلب والسان بـوليـدي تـواسـيني
بـيـضــه نـيـتــك ادري واحـضرلـك تـخـيـني
وادور مجلس العطشان دروب ابعيده اگطعـها

،،،،،،،،،،،،،،،،،،،،،،،،،،،،،،،،،،،،،،،،،

احـضر مجـلـس الالگـاه بـي خـدام مجـتمـعه
وغـير الونـه ما عـدهـم عالمـذبـوح والـدمـعه
يمـهـم اگـعــد وابـچـي واضلـن عالولـد انـعه
والگـلـبه نـظـيف هـواي ونـتـي راح يسمعـها

،،،،،،،،،،،،،،،،،،،،،،،،،،،،،،،،،،،،،،،،،

بالك يالـتحـب حـسين تزل رجـليك عن دربك
نعرفك بالخدامه تذوب صادق نـعـرف ابحـبك
لچـن دورات يالخــادم تـزعـل احسينك ابذنبك
واجروحه الغميجه هواي بـذنـبـك انـته توجعـها

،،،،،،،،،،،،،،،،،،،،،،،،،،،،،،،،،،،،،،،،،

تره حسينك يحـبك حيل لذلك جابك اتخدمه
حسين الضحه الك بعيال واخيام وبعـد دمـه
تـكـسر خـاطـره بـذنـبـك يالخادم تـره زحمه
وتچمل اسهامه ذيچ اسهام الرادك عود تشلعـها

،،،،،،،،،،،،،،،،،،،،،،،،،،،،،،،،،،،،،،،،،

لسانك صونـه يالخـادم واحفـظ لا تـزل عـينك
وگـلبك عن هواه حفظه يريدك ثابت احسينك
عـالـم مـا يـريـد اتصير ورع راد بـأمـر ديـنـك
وزيل الموش حلوه اعليك وبس الزينه طالعـها

،،،،،،،،،،،،،،،،،،،،،،،،،،،،،،،،،،،،،،،،،

فطرتك خدمتك تعبك كلشي مسجل ومحسوب
لـچـن بالك تـزل ويـاه گـلبه من الذنب متـعـوب
من هالساعه يالخـادم لجل احسين كون اتوب
يـسـتاهـل تـضـحـيـلـه ذنـوبـك ذيــچ ودعـها

،،،،،،،،،،،،،،،،،،،،،،،،،،،،،،،،،،،،،،،،،

افـتـح گـلـبك وعـقـلك وامـورك كـلـها صفـيـها
ومن باچـر تعـال انسان ثاني الخدمه طب ليها
يستـاهل ابـو السـجـاد صفحـتك ذيـچ تطويـها
وذيـچ اذنوبـك الچـانت تعال ابمجـلسه اخلعـها

،،،،،،،،،،،،،،،،،،،،،،،،،،،،،،،،،،،،،،،،،

وگـله الخـاطـرك يحسين اجيـتك سيدي تايب
واريدك ترضه عني وكون يرضه سيدي الغايب
واحلـفـك سيدي بـزيـنب تگـله يمسح اشكاتب
عـني بدفـتـره مـو زيــن والـزيـنـــه يـرجـعـها


الشاعر عقيل الحسناوي..
.

(الظليمه الظليمه من امة قتلت بنت نبيها )

الظـلـيـمـه الظـلـيـمـه .. مـُهـرك ينادي الظـليمه
طاح الحسين يزينب .. سابـح ابـدمـه هضيمه
……………………………

مـُهـرك اتـعـنــه الخـيمنـه سرجـه ملـوي
يصهـل ينـادي الظـلـيمه وصوتـه يـدوي
وانـي محـتـاره يخـويـه شـراح اسـوي
ولـنـه مـُهـرك عـن مـصابـك صـار يـروي

مـُهـرك ايگـلي بصهـيلـه .. لحگـي اخـيـچ يالعقـيله
الگوم اجـته تريد ذبحه .. مصيبة حسينـچ عظيمه
……………………………
گـومـي لحگـيلـه يزيـنب ذاك الحسين
دارت اعلـيـه الاعـادي يخـتـه صوبـيـن
ضعف حيله من الـنزف ميشوف بالعين
عـفـتـه نايـم عالـتـرب سـابـلـها الايدين

بـيـه مـا ضلـت بـعـد روح .. حيل تعبان من الجروح
ومن نزيف اجروحه ذيچه .. خضب الشيـبـه الكريمه
……………………………
عـفـتـه فـوگ الـغـبـره يـتـلوه ولـيـنـه
ومـن جـروحـه يسمـع الشامت ونينـه
يالعـقـيـلـه بالحـجــر صابـو جـبـيـنـه
ونـزل دمـه على عـينـه وطفـه عـيـنـه

عفـتـه اخيچ فوگ التراب .. دمعه وي ادمومه سچاب
راد يزحف صوب الاخيام .. ومنـعـتـه الما عدها شيمه

……………………………
گـالي مـُهـرك اخـيـچ روحي لحگـيه
بالگـلب سهـم المـثلـث منـه طلـعـيه
يالعـقـيـله وبـعـبـاتـچ روحـي غـطـيه
بالشـمـس عـاري يزينـب راح تـلـگـيه

انـي ادلـيـچ امـشـي ويـاي .. ابعـباتـچ سوي الـه افـياي
الشمس تچوي والرمل حار .. وما مش عله حسين غيمه
……………………………
اخـذي لحـسـينـچ عـسه مـن المـاي گـطـره
ولـو لـگـيـتـيـه مـنـذبـــح شـربـيـه بـنـحـره
ولا تـلـچـمـيـنـه علـه كـيـفـچ ويــه صـدره
من السحگ صدره انطبگ يخـته ويه ظهره

بـهـيـده مسحـيله دمـوعـه .. لا تـلچـمـيـهن ضلوعه
بهذا وضعه وفكره مشغول .. بـيچ واطفاله وحريمه
……………………………
وخـاف تـلـگـيـن الشمـر ايحـز وريـده
لا تـگـربـيـلـه تــره اتـسـطـرچ ايــده
روحـي اركـضي للـنهر حشمي عضيده
ولــو ذيــچ الـمـشـرعـه عـنـچ بـعـيـده

روحي حشمي الگمر عباس .. حسين گـليلـه بلا راس
والـزلـم فـزعـت عـالخـيـام .. والحـرم فـرت ابـهـيمه

الشاعر عقيل الحسناوي..
.

ابوذيات نعي لأبالفضل العباس ع

يخويه الرايه طاحت مال اخينه
رحت والگيت جسمه مالـخـيـنه
ومـن مـهـره يزيـنب مال اخينه
بدون اچفوف طاح اعله الوطيه ..

تعـب من النزف حيلـه وگـل باه ـ قل حيله
اشيلـه اشلـون حيرني وگـلبـاه ـ
السهام ابظهر وبصدره وگـلبـاه
رمح نصين طـر گـلبه يخيه..

عله الناگه ودرت وجهي ورايه
شفت جود الكفل طايح ورايه
شني شوره بسبي زينب ورايه
اضل لويرضه اروح اني سبيه..


شني الحصلته من فرگاك وجناي
غير اسياط خويه وسطر وجناي
الشمر من وج خيمنه النوب وجناي
احترگت وليلى گام اطفي بيه.

الامام الحسين ع يخاطب ابا الفضل ع

خبر موتك وصلني وصار علماي
عگبك ياهو خويه يشيل علماي
نايم لا تـضــل عـباس عـالماي
بعـد سـاعـه تـدوس الخـيل بيه..



موتـك خله گـلبي بجـرح يدماي
هدم حيلي وشلـّل صابالي يدماي
طحـت بيدك عـلم عباس (يد ماي)
العـلم والمــاي مـارجـعـن الــيـه..

الشاعر عقيل الحسناوي..
.

يوم ام البنين ع

يالزهره اعذريني .. بـبنـيـني .. راحو فـدوه الأبنـين
ريت انـي علـويه .. ومسبيه .. وي نسوان الحسين
اعـين العـقـيـله
بمحنها الطويله .. واحـرسها بالعـيـن
……………………………………

يافاطمة اسمعت الخبر ولسه بحزن مفجوعه
گـالـو عـزيز ام الحـسن امـهـشمـيـن اضلـوعه
يافاطمة وروحي احس من الجـسد مـنـزوعه
وياريت راسي المنگطع ولا رگـبـته المگـطوعه

يوم الخبر جاني .. ولسه اني .. اسكن ماتم النوح
انـصبلـه تعـزيـه .. لـيــلـيــه .. لمـن تـطلـع الروح
اهـيـم ابـمـناحي
واذوب ابجراحي .. كـل هاي السنين
……………………………………

عذريني يا ام الحـسن وياچ احـس امقـصره
ياريت مـو بـس اربعـه بالطـف بنـيـني عشره
والخيل تسحگـهم سوه وعاـفت عـزيز الزهره
شماضحي لبنـيـچ ولــد مـا وافـي فـضلـچ ذره

خـالقـنـي الـچ الله .. وما اسوه .. يالزهـره ابــلاياچ
كل عمري واسنيني .. وابنـيني .. بكل الغالي نفداچ
لخدمتچ وجودي
اوفـي ابـعـهودي .. يبقـه العهد دين
……………………………………

يا ريت ويـاهـم رحـت واخدمهم ابشيباتي
ياريت من ذاك العطش ارويـهـم ابـدمعـاتي
وسوط الشمر بيه يطگ ولا طگـهن ابنـياتي
يافاطمه وحـرگ الخيم هـو سبب مأسـاتي

من حرگـو الخـيمه .. بالهيمه .. طلعت اخت الحسين
ما تدرين وين اتروح .. للمذبوح .. للمگـطوع الايـدين
يگـلـبـي التـعـذب
عله حيرتها زينب .. كـل هذا الاونين
……………………………………
يافاطمة وگـلـبـي انـمـرد لمـن سمـعـت اعلـومه
گـالـو حبـيـب المصطـفى غـارگ ابفـيض ادمومه
عـطشان نـايـم عالـتـرب ومـسلـيـبـيـن اهـدومه
وخيل العده بصدره ترض وجسمه تطش بالحومه

يا فاطمة لظـهـره .. مـن صــدر .. نـازل حـافـر الخيل
الحافر شلع روحه .. من اجروحه .. ماضل بي بعد حيل
حبـيـبي وعـذابه
ذبحـنـي مصـابه .. مگـطوع الوتـيـن
……………………………………
يافاطمه وابـنـي الـبـچـر راعي الوفه والنوماس
عيونه انطفت عالمشرعه ويلي انفطر منه الراس
وياوسفه اخـته ابغـيبـته اتـشـمـتـت بـيـها الناس
وبكـل ديـواويـن الـغـرب ينـشـدوها عـن العباس

چا وين ابو فاضل .. والكافل .. خـدرچ يالعـقيله
اليبرالـچ ابـعـيـنـه .. چا وينه .. بهالسفرة الطويله
بهذيـچ الشماته
بهـضيمه خواته .. وين الگـمر وين
……………………………………

ويا هضمة الماعدها اخو لـمـن تـطــب للـديــوان
ديـوان مـتـروس بـغـرب وشماتـه زلــم او نـسوان
زينب تـطر وسفـه الزلم يعاينها ضل ياهـو الچـان
اي هاي اخت المـنذبح عالشاطي واخت العطشان

بـيـن الزلم صعبه .. بالغربـه .. شلون الطاهره اتفوت
يالشام وخرايبها .. متحبها .. وتـالـي بـيـهـن اتـمـوت
هـضيمه وظلـيمه
الخرابه الها خيمه .. ويـه النساوين


الشاعر عقيل الحسناوي..
.

يوم العباس ع

گوم ارجع يا خويه  وياي .. لا تـكـسر ظهري
عبـاس  اخـلافـك دنـيـاي .. حافـرها بصدري
بانت للعسكر خلـتي .. خلافك ما ترحم دنيتي
…………………………………………
گـوم  ويــاي  يا عبـاس  اروحـن  فـدوه للخـوه
لتخـلـينـي بـيـن اعـداي  اكـابـر  عالجـرح  گـوه
وحگ عين الطفتها ادماك  وراس الينزف امروه
قـلــة  حـيلـتي  هــسـه  وظـهـري أنـكـسر  تـوه

ياعباس الحگـني وگـوم .. ياخويه اسندني
بعدك ساعة وهاي الگوم .. راح.  تـفـرهـدني
يصير المصار ابجـثتي .. خلافك ما ترحم دنيتي
…………………………………………

يبو فاضل يروح حسين  تره حسينك صفه بحيره
شيسوي الاخـو مذبـوح   ومـا عنـده  اخـو غـيـره
ياهـو بـولـيـت العــدوان   يفــزع  للاخـو ايجـيـره
بمـثـل هالشـده ياعباس  يبـيـن  كـل اخــو خـيـره

بس هسه اني ابلا خوان .. وحـدي ابـلا ناصر
تـتـشمت  بـيـه العـدوان .. محضريلي الحافر
متشمته الناس ابغربتي .. خلافك ما ترحم دنيتي
…………………………………………
گوم ارجع لعد زينب  تراها عليك قلقانه
گـلبها خايف ومرتاب  تصهر بـيـه نيـرانه
اخلـيك وارد اشلـون  الها وهي عـطشانه
شگـللها كـفيلچ مات  وبين الغربـة خلانه

ياعباس وصعبه هواي .. من دونك ارجع
ترجع الها تجيب الماي .. زينب  تـتـوقـع
بهل موقف حيره حيرتي .. خلافك ما ترحم دنيتي
…………………………………………

شگـل لسكينه ياعباس  العطشانه وتريد الماي
شگـللها انـذبـح عالماي  يا عبـاس اريـدن راي
شگل لام الرضيع اهناك  سولفلي يخوي بهاي
وحگـك حيرتي حـيـرة  وما ينقاس ابد بلواي

كـلـها تـريـدك يا عـباس  .. تـرجـع  تـرويـها
واني الحاير افر بالراس .. شلون ارجع ليها
ياخويه چبيرة مصيبتي .. خلافك ما ترحم دنيتي
…………………………………………
اذا ارجـع واعـوفـنـك  السلامة اعليه اقـراها
بعد ساعة يبو فاضل  الرماح بصدري تلگاها
فوگ الجـثة حافر خيل  وحافر خيل جواها
وتلگـه حجار والتربان  هذيچ الجثة غطاها

ياعـباس تـشـوف  الخـيـل  .. اتروح وترجع
وماضل من احسينك حيل ..  تلگاني مگطع
ومن دمي حمرة شيبتي .. خلافك ما ترحم دنيتي
…………………………………………

اذا عـوفك يبـو الغيره   خـيمـنه مـا يخـلـوها
يسلبوها ويـهـدمـوها  وعله الخـدر يحرگوها
وبنات الزهره ياعباس  يخويه الگوم يولوها
يشتموها ويضربوها   وخواتـك راح يسبوها

يصفن راح ابلايه اخيام .. ياخـويه الخدر
ويسبوهـن لديـار الشام .. بوليت هالعسكر
وهامك وياها وهامتي .. خلافك ما ترحم دنيتي

الشاعر عقيل الحسناوي..
.

( ليلة الوحشه).

ليلـة وحـشـه وكـسرة خـاطـر
بـيـهـا شـسـوه ظـهـر الـعـاشـر
المحشومه بين اخوتـها
ضلت وحدها بغـربـتـها .. كسرت خاطر ..

………………………..
من ذبحو عالغبره الضامي وداست صدره الخيل حسين
ومن طـاح اعله الشاطي الكـافـل سهـم بعينه بـلا چفين
ذيـچ الخـيـل وذاك العـسكـر عـالحـره انـدارت صـوبـيـن
وبـين اطفال ونسـوه احـتارت تركـض زينب بيـهم ويـن

ويـن تروح بذيـچ الخــدر
نـار وخـيل ورهـبـة عسكر
زينب محـتاره بحالـتها
ضلت وحدها بغـربـتـها .. كسرت خاطر ..

………………………..

وعگب الصار بحال الوالي گـصدو ليـهـا بـذيـچ النـار
وخيـل وعسكـر دارعـليها وضاعت منها اطفال ازغار
حرمه ومهظومه وهم ثكله  مگطع شافت راعي الدار
تگصدمـن تشكيله الحـاله  لامها الزهـره لحامي الجار

ياهـو اليفـزع ليـها ويحضر
وفـوگ الغـبره حسين موذر
ياهـو يساعدها بمحنتها
ضلت وحـدها بغـربـتـها .. كسرت خاطر ..

………………………..

وضلت زينـب هـاي الليله  وحـدها تـلـم بالنسوان
ومابين المذبـح والشاطي تگـوم وتوگـع عالتربان
ولاخـيمه الضلت تسترها التـهمت خيمتها النيران
تعبـانـه وتـتـنـفـس گــوه خـانـگ ريـتـها الـدخـان

تراب ودخـان الطـف جـوه
ومخـتـنـگـه وضلت تـتـلوه
غـبره ودخـان ابريـتـها
ضلت وحدها بغـربـتـها .. كسرت خاطر ..

………………………..

الله يساعدهـا بهليله  بيـها شـسـوه طـف عاشـور
تلـم بالعيله، تگـعد تبچي، عالميت ضامي ومنحور
تدور اطفال الضاعت منها، تبقه عله الخدر ناطور
تداوي المچـويه برجليها، لو عـظم البطـگ مكسور

وكـفت ذيـچ الليله بحـيره
مهضومـه ومدمعـها تديـره
وشـتسوي بهايه حيرتـها
ضلت وحـدهـا بغـربـتـها .. كسرت خاطر ..

………………………..

عگب الكافـل حـيـف ووسفـه  يحـرسـها صـار الذبـاح
يحـاچـيـها الذبـاح وشـامت  زيـنب كـافـل خـدرج راح
مگطوعه چفوفه عله الشاطي وسهم بعينه الكافل طاح
وحـسيـنـچ طايـح عالغـبره بـسـيـوف مگـطـع وارماح

وضحكـات الشامت تهـظمها
ومـا گـدرت دمعـتـها تظمـها
وسالت فوگ الخد دمعتها
ضلـت وحـدهـا بغـربـتـها .. كسرت خاطر ..

………………………..
الله يساعـدها بمحـنـتها ويالوعـه وياهـم اتحمله
يسبوهـا لو صبح باچـر وبـلا هـودج تركـب هـزله
بالخدر باچـر تـتمحن چم طفل العدها وچم طفله
من الطف لقصر الكوفه صعبه لقصر الشام الرحله

زيـنب بـاچـر مـن يسـبـوها
هـواي المحشومه يعـذبوها
بالغربـه تهـظم وحـشتـها
ضلـت وحـدهـا بغـربـتـها .. كسرت خاطر ..


الشاعر عقيل الحسناوي..

جروح السبي..

ياخويه عالنـوگ .. طبينه للسـوگ
مـن لـمت الناس .. دلالي محـروگ
وبالعـلويات  ..  كـلهم شمات
………………………

يخويه حسين شحچيلك  من دار الوكت بيه
من ذبحـوك يبن امي  خـذتـني الناس مسبيه
اني ام الخــدر زيـنب  الما شـافـو طـرف لـيه
بيا شـيمـة عـرب يحسين  تركب هـزله علويه

بت حامي الجار .. وبيه الوكت دار
وبالهيمه يحسين .. اركض من النار
واشبع طيحات .. كـلهم شمات
………………………


اني ام الخـدر ياحـيـف  المـحـد شـاف اليه اخـيال
اني ام الـدلال الچـان  العـرب بـي تـضرب الامـثـال
بـين الخـيل بـين النوگ  امشي ويـاي غـربه ارجال
وراسك يمـشي عالي وياي  بس فوك الرمح ينشال

او ويانه عباس .. هم يمشي بس راس
بـلا رايـه ويـاي .. ولا سيـفـه لا طـاس
الكـافل من مات .. كـلهم شمات
………………………



وطبـيـنـه بـهذيـچ النـوگ  ويخـويـه النـاس ملـتمه
مستحـيه واگـول اشلـون  هـذا السوگ اطب زحمه
والـتـمشي بضـوه العباس  بمـصابـيـح المـدن تعـمه
المتعلمه عله حچي حسين  بذنها اترن صفت شتمه

تلـگـونه بطبـول  .. ومراگـص اخيول
وغمضنه العـيون .. شنحچي شنگول
ونجر حسرات .. كـلهم شمات
………………………

شحـچـيـلك شـسـولفـلك  طبـيـت وذهـيلـه الراي
زلـم نسـوان مـتحضرين  يحـسين الشماتـه هواي
الحچي بوجهي الأسمعنه ضعـفين انحچه بمگفاي
شـي بحـجـار طـگـونـه  وشـي دارو الحــار المـاي

بنظرات العـيون .. ياخويه يحچـون
بت فاطمه هاي .. واسمع يشـتمـون
صعبه حچايات .. كـلهم شمات
………………………

وحـتى اطفـالهـم خويه نسمـعـهم يشتـمونه
ومن فوگ السطوح هناك  ابكلشي يشمرونه
بشوارع ضيگـه مزدحـمه متعـمدين  مشونه
مهـضومات مكـسورات  كـل الناس شافـونه

ما بيـن الفروع .. مشونه ونلـوع
وراسك عالرماح .. ويانه مرفوع
وبينه الطگات .. كـلهم شمات
………………………

وعگب ذاك الحصل بالسوگ  يبن امي ادخلت ديوان
مـتحضريـن الي الشمـات  شـفـت كـل القـصر ملـيان
نصارى وعـرب بيه ويـهود  بـزلـم مـتروس وبنسوان
واني ابـيـن هـاي النـاس  وحـيده ومـا الـيه اخــوان

ربات الخـدور .. طبن للقـصور
ماعدنه وليان .. ذبحها عاشور
وبالمسبيات .. كلهم شمات


الشاعر عقيل الحسناوي..

يالراسك براس الرمح .. يسبوني لو طر الصبح
جابوها هزلـه ناگـتي.. ونزلت هـظيمه دمعـتي
يالراسك براس الرمح

…………………………

يل عالرمح راسك عله .. وجـثتك رميه مفصله
ودم يجري نحرك
جابولي يحسين الهزل .. وباچر يچتفوني بحبل
ويسبـونـه خـدرك

لمن طحت مذبوح بالطف عطشان
بخـيمنه اجـو شبـو يخويه النـيران
وما النه والي بهل عرب بس نسوان
يتمـرجـل علـينه غـده ياهـو الچـان

الچنت اني هيبه وانحشم .. فرجه اصبحت بين الزلم
ياوسفه من عگب اخوتي .. ونزلت هـظيمه دمعـتي
يالراسك براس الرمح

…………………………

عيني التشوفك منصرع .. عاميها يحسين الدمع
واني غريـبه
اني الچنت ام الخدر .. يضحك علي تالي الشمر
والله مصيبه

يبـن امـي دارت والوكـت بـيه انــدار
خـلـوني اركـض حـافـية فـوگ النـار
اخـيالـي مـا شافـه گـبل حـتى الجــار
وتالي انكشف طولي وتصدلي الانظـار

بين الزلم طولي وگـف .. من المستحه وجهي نشف
كـتلـتني خويه حرگـتي .. ونزلت هـظيمه دمعـتي
يالراسك براس الرمح

…………………………

باچر يروحي اطلع سبي .. والشمس تحرگ بالعبي
ابـلايــه هــودج
كـلش طويله رحلـتي .. وهزلـه ونحـيله ناگـتي
ومن تمشي تعرج

الناگـه هزلـه وعـرجـه وتـعـذبـنـي
خـطـوات تمشـي بـيـه وتطيحـني
وما تحـمـل الناگـه نيـاحـي وونـي
وگامت تون وي وني من تسمعني

ياريت يم جسمك متت .. ولا عالهزل خويه اركبت
عالهزله تصعب رحلـتي .. ونزلت هـظيمه دمعـتي
يالراسك براس الرمح

…………………………

وذاك الدرب ما ينحـمل .. مچـتوفـه واني عالهـزل
لـو مالـت اوگــع
بمتوني كل ذاك الضرب .. يشتموني ياخويه الغرب
واسكت من اسمع

الممشه وي غـربه يخويه قاسي
يشتمون امي واني اهبط راسي
واعيوني يجـرن وانظر العباسي
ويغمـض عيونه الكـفل نوماسي

وبعـيونـه اليـه يعـتـذر .. ويهـزلي راسه المنفـطر
ويگـلي شوفي حالتي .. ونزلت هـظيمه دمعـتي
يالراسك براس الرمح

…………………………

وي الشامت الممشه صعب .. شتم وضرب كل الدرب
واني الجليله
والراسك امشي والتفت .. ساعه ومن الناگه طحت
تميل الهزيله

يـاخـويـه عـذبـنـي تــره هـذا الحــال
من الناگـه اوگـع خويـه لو حملي مال
وابرگـبـتـي وبأيـدي مشـدوده احبـال
وحرمه اني خويه امشي ما بين ارجال

ياريت وافـاني الاجـل .. بالطـف ولا هـذا الحصل
ياخويه تهـظم غربتي .. ونزلت هـظيمه دمعـتي
يالراسك براس الرمح

…………………………

اني العفيفه امخدره .. ديوان اطب باچر تره
بين الشماته
ويزيد ينظرلي بفرح .. وحسينچ ايگلي انذبح
وهايه خواته

جايبـهـن بنـص القـصر مچـتوفـات
وذنـي بنـات حسينـكـم مـرعـوبـات
ويگـلي عباسـچ يزينـب هـم مــات
بنص القصر تضحگ علينه الشمات

ويكـتلـني ياخويه القـهر .. من يجلـد بعـوده الـثغـر
وعوفـه اگـله بصرخـتي .. ونزلت هـظيمه دمعـتي
يالراسك براس الرمح

الشاعر عقيل الحسناوي..

تجليبه لاستشهاد الامام السجاد ع

علي السجاد مات الليله بالحـسره
واجت يمه تحضره فاطمه الزهره

قبل ميموت ابو الباقر اجت يمه
بضلع محني الزچـيه فاطمه امه
والسجـاد چـان اينـازع ابسـمه
بچـبده نـار سمه حيل مستـعره

يصد للزهره عينه والدمع يجري
يكلها جده نار السم غدت تسري
منيتي گربت واني نگضه عمري
وللمـثـلي شيفيده بالشفت عمره

يجده بعيني شفت اهوال ماتنشاف
واذا احجي عليج من هضم ينخاف
شفت حسين من حز راسه السياف
ومثنـي الشمر ساحـگ على صدره

يحـز ابراس ابـوي بعيني شاهدته
وطلعت حافيه تركض يجده اخته
تريـد تخـلص الصارت وذر جـثـته
بلكت ماتـدوسـه الخـيل وتـطشره

لچـن عـنه الشمر ياجـده درفـعـها
بچعب رمحه النذل كلساه يوگعها
يطگها بسوط جده وحيل يوجعها
حـرمـه عمـتي وماتـگـدر تـنـحـره

وعگب ذبحه يجده وكسرت اعظامه
اجـوا صوب المخـيم حـرگـوا اخيامه
وطـشـت بالبـراي وضاعـت ايتـامه
وتـدور ويـن زينـب ويلـي متحـيره

احترك بينه المخيم جده وين انروح
والكـافل ضعـنه عـله النـهـر مـذبـوح
عليمن جـده نعـتب والعتب مسموح
ونشاهدهم جـثث عالگاع متـطشره


الشاعر عقيل الحسناوي..