عكيلي فاطمه العليله


يا بويه فراكك سابيني

يالوالد من بعد غيابك
انتظرك بدموعي ابابك
اشتاگ و اشتم بثيابك
والمدمع ما فارگ عيني

اعليله وحنيت اعله الوالد
الله ايصبر كلمن فاكد
والليل اعله دموعي شاهد
والوحدي ليش مخليني

كل فرض بدمعات اتضرع
يارب الوالد هم يرجع
متجرحه اعيوني امن المدمع
ما واحد يمي يواسيني

شمعات فراكك كل ليله
اعلكها و انطر للعيله
ومن غيابك روحي اعليله
وبس شوفك بويه ايداويني

كل ليله اترقب واتمل
ضعن يعود ورايه ومحمل
شتحمل بعدك شتحمل
وخلافك دمعي يسليني

وكل يوم بآلام اوونه
لعبدالله اشتاقيت وسكنه
لرقيه وشوفتها اتمنه
اتحسر والهم واليني

والزينب مشتاقه العمتي
يمته ترد وتهود ونتي
خلص بدموعي كل وكتي
ومصايب عمتي اتاذيني

كون العباس يضل يمي
عمي ومحتاجه لجف عمي
تبرة جروحي ويبرد همي
وجفوف الكافل تحميني

الشاعر سيد علي الموسوي الكربلائي

الله وياكم الله وياكم وداعة الله وداعة الله
———
حانت الفرگه بدمعه وبشهكه
وكمت ادور اعله الضعن النوگ متحمله بسفر متوكله
اه يا جرح الزمن
عالاهل انعي مو سهل وضعي
اخدودي بدموعي انچون

صعب فركاكم وداعة الله
———
ساعه يم عمتي اوكف بونتي
ايسولف بدمعه النظر
عمة عينيني وياج اخذيني
احمل هموم و قهر
ناحت اعليه تكلي مسبيه
ومو سهل هذا السفر

ربي يرعاكم وداعة الله
———
ابعلتي و همي اتجمعن يمي
كل خواتي بالدمع
وياچن اتمنه امشي واتعنه
ابخيمه وحده ننجمع
رقيه شبكتني وسكنه شمتني
مو سهل ذاك الوضع

ابقه اتناكم وداعة الله
———
وساعه يم عمي اعتني بهمي
والزم اچفوفه ابحزن
يمسح بعيني لا تتانيني ايكلي وبحسره اون
شاهدت عينه ومنظر سنينه
الشوفتك عمي احن

صعبه انساكم وداعة الله
———
لوالدي بلهفه بحظنه و بعطفه
ايكلي بويه اتحملي
خوفي ما ترجع ودمعي ما ينفع
وياك اخذني ابمحملي
كمت اشم صدره وامسح بنحره
ومن يضل بعدك الي

ابونه انعاكم وداعة الله
———
سيد علي الموسوي الكربلائي

بداية عزاء للانصار


بايعناك يا مولاي
عاهدناك يا مولاي

خل يشوف الكون كله كربله
وحگ جدك راح تصبح زلزله
شنهو دمنه والله لجلك ما غله
نخلي عالي الكون يصبح سافله

عد عيناك يا مولاي
……
خل نعيد اليوم صولة حيدره
وخل نخلي اجسومهم متنثره
الروس ودماهم تضل اعله الثره
خل نسوي كربله چالاخره

دون ادماك يا مولاي
……
شيخ الانصار الذي سوه العجب
رد شباب بسيفه هالكون انگلب
عابس و جون بأعالي امن الرتب
حي زهير و حي برير و حي وهب

ما عفناك يا مولاي
……
احنه ترباتك يبن خير البشر
راح نگلبها ويسجلها الدهر
يا حسين انكتبت ابدم عالنحر
ما نزل لو صرنه من أجلك وذر

وعشگناك يا مولاي
……
صرنه نشتمك هوانه ياحسين
فاز كلمن يمشي دربك يالحنين
ثنين والسبعين صارو فد يمين
وينه كلمن ضدك وواجهنا وين

يالردناك يا مولاي
……
الشاعر
السيد علي الموسوي الكربلائي

كعدية
لسيدي ومولاي الامام الصادق عليه السلام


وحي المصايب كبر
امن ا مصيبتك يا جعفر
والمصحف و اياته
هلت جمر دمعاته
امن امصيبتك يا جعفر
……

يا ابو الكاظم مصابك جمره ما يخمد لضاها
والحزن خييم سواده والشمس حجبت ضواها
ابكل گلب حسره اعله فگدك وراجت الگاع و سماها

وانرسمت بمشهد حزن
صورة بدر بالهم يون
والفگدك العالم يحن
هالمصيبه شضل وراها

بوداعك اتالمنه
وغيابك الضيعنه
وكل منبر يون وينوح
وعالصادق دموع اللوح
امن امصيبتك يا جعفر

……
اسست منهج علوم و يا علم ضاهه مقامك
شرعت دستور واضح ومصحف النور ابكلامك
اشجم شخص حاول ينافس وما وصل اضفر ابهامك

يشهد الفضلك چم سند
وشجم حديث و معتمد
والعِلم يم بابك سجد
والعِلم يجري بنضامك

يا سر الاه القدره
ووارث علوم العتره

لاكن جهل هالاشرار
من شبو ابدارك نار
امن امصيبتك يا جعفر
…..

ابحكمك وفترة وجودك عاشت الامه بسلامه
ابكل عِلم خصك الباري ونلت چم رتبه وكرامه
والذي ما عرف قدرك يبقه كل عمره بندامه

وسنيت چم سِنه و شرع
الأمر الالهي تتبع
وقاسيت من ذاك الوضع
والشرع بيدك نضامه

صابر بقيت ابعمرك
ما رعو حرمة قدرك

والهم يعيش بگلبك
وتناجي بالهم ربك

امن امصيبتك يا جعفر
……

وانتهت رحلة حياتك بالمدينه الكون ينحب
وچبدك ابسم من توذر وحالتك مولاي تصعب
تلوج وتنازع ابعمرك ونار وسط حشاك تلهب

غمضت عيناك ورحت
يا سيدي و اتعذبت
والعمر باللوعه اختمت
والدموع ادموم تنصب

وكل شيعتك مالومه
ومن غيبتك ملچومه

والحزن ما فارگنه
ابهالفاجعه اتالمنه
امن امصيبتك يا جعفر
……

سيد علي الموسوي الكربلائي

نزال لأنصار الامام الحسين ع

على طور
(زينب امن الخيمه طلعت بيديها)

اخذ الدرس منهم و بيه اتمعن
أنصار معدنهم درر بل أثمن
واحدهم بإسم الحسين اتحصن

يا نعم الصحبه اووگفتهم
تهتز الكاع بهيبتهم
…..
كل واحد البيهم جبل ما ينهز
وكل الوصف بفعالهم تتعجز
طف كربلا لو بارزوا تتهزهز

واندار الطف و ميدانه
وعداهم ضلت حيرانه
…..
نور اعله نور وللحرب طلابه
سوح الوغه عجعج دمه اويه ترابه
الواجههم بورطه يضل وشجابه

ما يرجع راسه اليدناهم
وجفوف حسين الترعاهم
…..
فتيه ونعم منهم مهابه ونوماس
اگبال الخصم ما دنكو عالي الراس
مسنوده بالرايه ويمين العباس

والكون اتراجف جواهم
والرايه ترفرف فوكاهم
…..
طف كربله مال وتعدل ساسه
والعدو بالگوه يجر أنفاسه
امن الرعب ضل الجيش لازم راسه

واحدهم ما تسلم روحه
وسجلوا بالطف اطروحه
…..
قسمو قسم لحسين بالروح ودم
كلمن يدوس الحد ابد ما يسلم
والما عِلم هاليوم خله يعلم

عالحگ و العايل طلابه
وبكربلا يصير حسابه
…..
وهوسوا يم الخيم والكون أعجب
محد يمس احدود خيمة زينب
بوجودهم زينب فلا تتغرب

مأمونه الحره ابخيمتها
ومتحصنه ابضل اخوتها
…..
سيد علي الموسوي الكربلائي

دارمي

ضلع امك المكسور ينتظرك تعود
وصوت الضلع لليوم أظهر يموعود
وينك وينك طال الوعد يبن الحسن وينك

يا سيد الأحزان ضلع امك انصاب
ولسا تون وتنوح من عصرة الباب
ومن بعد حرك الدار ما ينفع عتاب
كلشي انكشف مولاي و اتوضحت اسباب
وينك وينك طال الوعد يبن الحسن وينك

ضلع امك لهليوم ضل بانتضارك
يترقبك بالويل ومتاني ثارك
يا ساعة بيها ويوم تعلن قرارك
وتصب على العدوان يالمهدي نارك
وينك وينك طال الوعد يبن الحسن وينك

دار الوحي و النور بابه توجرت
والزهره خلفه تلوذ ويلي وتسترت
والجانو الأصحاب بحقد وتحضرت
هجمو عليها انذال وبالهم تحيرت
وينك وينك طال الوعد يبن الحسن وينك

صطرو وجها و طاح محسن ضحيه
وابتدت من الباب اول رزيه
عالعتبه يالموعود عندك وصيه
اضهر الك ثارات ضلع الزجيه
وينك وينك طال الوعد يبن الحسن وينك

أصعب وضع مولاي تدري بوضعها
جف النذل يا حيف لمن صفعها
دم باقي بالبسمار ويجري دمعها
نادت انا الزهراء محد سمعها
وينك وينك طال الوعد يبن الحسن وينك

وحيدر بقه بلا حيل من هالمصيبه
بوصيتة ملزوم وحاله عجيبه
بالدمعه والحسرات شاف الحبيبه
محنيه خلف الباب فاطم غريبه
وينك وينك طال الوعد يبن الحسن وينك

الشاعر سيد علي الموسوي الكربلائي

للقاسم عليه السلام

جاسم بأيمانة جن علي ابميدانه
ينفذ بدوره
من الحسن نوره
ويحصد بعدوانه جن علي ابميدانه

شبل الحسن لمن برز للميدان مفخرة وعينة
نورة يتلالة والحسن يا سبحان من الحسن زينه
محروس من عين الحسد وعالشبان يسطع جبينه
يجذب ابهندامه. ما يدنك الهامه
محصن بعمه
ومن يصل يمه
والعزم عنوانه جن علي ابميدانه


جاسم جعلها الحومة بعلومة اتحير ويرهب بزوده
من هاشم اطباعة و على الحگ ايغير وبذل مجهوده
بيمينه سيف المرجله وصار ايدير الكون ابوجوده
يبتسم بحروبه والرگب مطلوبه
يرهب بسيفه
ويحصد بكيفه
والحسن بالسانه جن علي ابميدانه

شايل امانه والوعد بالطف جان وشهالوصية
من الحسن كله بكربلا وكتك حان غير ابحميه
لو شفت عمك وحده بلا وليان بوكت المنيه
نفذ اشوصيتك وعالوفه ربيتك
بالطف أريدك
تعرض وريدك
ولززم ابذرعانه جن علي ابميدانه

خاظ وتفرس واختلف وضع الناس من هالبساله
وفصل جثثهم واليواجه ينداس وترهب افعالة
ركظهم وخله الزلم رأس برأس هيبه بخصالة
المعركة بحفوفه من الأصل مكفوفه
مجندل الفرسان
ويكصي بالعدوان
معجزه وبزمانه جن علي ابميدانه


بعرس البطوله الوفة بذاتة يفور وما ترك عمة
و رملة التشجعة عالحرب وبهالدور مرجلة وهمه
والحنه لازم تصبح بطف عاشور من نزف دمه
ما رجع بوعوده والحرب مكصوده
بعرسك مبارك
ومزهره انوارك
واضح ابرهانه جن علي ابميدانه


صارت الحومه مغبره والطف اندار وغير نضامه
القاسم ثبت و مقاوم بعز و اصرار وما رد خيامه
بولية وغدرهم من وكع بين أشرار وتفخر عمامه
حنتة من دمومه من هوه بالحومه
وهلهلت رمله
مبارك اتكله
ما خلف وليانه جن علي ابميدانه

الشاعر سيد علي الموسوي الكربلائي

للعباس عليه السلام

من شفت راعي الجود عالمتن جوده
بنضرته هموم و قهر
عالمخيم والنهر
وللحرم منطي اوعود عالمتن جوده


يالكفيل بهالوكت اختك و انخاك لا تخليني
الماي منك ما ردت بس ردت يمناك بيها باريني
يبن أبويه لو رحت لهفتي العيناك يالتحاميني
مو سهل من تروح روحي مفكوده
ابقه بهموم انتضر خلافك شينفع صبر
والكلب ضل ممرود عالمتن جوده


بيك احس بهيبتي يا نضر عيناي و نبض دلالي
دونك ابقه بغربتي وحايره بدنياي وتكلف احوالي
خل أخبرك حالتي ما يهمني الماي وبيك آمالي
ياالوفي يالكفيت جن علي وزوده
خويه و انطيك الخبر لو رحت ابقه بخطر
لو رحت لا متعود عالمتن جوده


مأمنه دوم برايتك يالربيت وياك فدوه لعيونك
خدري يزهي بهيبتك والخدر بحماك وتجوتي متونك
موتي خويه بغيبتك وغربتي بفركاك صعبه من دونك
والعمر حين مشيت ذبلت وروده
يالمرهب الموزمه بشوفتك يروه الضمه
ما تقصر و تجود عالمتن جوده


كلي يا زينب عهد راح اگر عيناج وفدوه الج عيني
يختي وانطيتج وعد والعمر يفداج ولجلج اسنيني
السيف بيمني ارتعد والگلب وياج من تحشميني
العلكمي يمج راح ارسم احدوده
أمني يا بت علي هالعدو بالنسبه الي
عالزلم ما معدود وعلمتن جوده

ضهضب و شد وارتجز والعدو محتار بخزرة عيونه
الحومه مالت من برز حير الأفكار وانكلب كونه
والعدو كباله عجز بالزلم يختار واضحة فنونه
بلا وعي ضل الجيش تاهت حدوده
عالنهر سوه العجب. والدمة حد الركب
وبس يروي المكصود عالمتن جوده


لاجن إندار الدهر وانعكس كل حال ونكسر ظهري
والسهم طفه النظر وضاعت الآمال اتحيرت بامري
اه يا جرح النهر شاخبر الأطفال دمعي دم يجري
وانكسر ضهر حسين بطيحة ازنوده
العلكمي نارة سرت وبدليلي اتوجرت
وشيلم شملي اردود عالمتن جوده

سيد علي الموسوي الكربلائي

اذا ادور قصائد لمحرم مرتبة وحلوة تفضل هذا رابط القناة
https://www.tgoop.com/abbmmnn

ديوان حسيني لخادمات الحسين ع
مع نشر قصائد جديده لمحرم الحرام
https://www.tgoop.com/Jafar_Jafar_ssss

اجمل قصائد محرم كذلك يوجد قصائد شور
https://www.tgoop.com/muhamed11117

عنّ ارقيّه أُوگف سَل ابُوها
اشكِثر نور ابوَجِهها سلّه ابُوها
الترَاچي الّي بذِنها سلّبُوها
وبچَت مابطِّلَت حَد المِنيّه

مجموعة القصائد الحسينية لشهر محرم الحرام ١٤٤٧ هـ
للشاعر لقمان لعيبي البدران
على قناة  التليگرام .

https://www.tgoop.com/lukmanbdran1970

اذا ادور قصائد سهلة الحفظ وجميلة المعنى ادخل هنا ما راح تندم


🔗 اضغط هنا للانضمام
📡 https://www.tgoop.com/alhagamy78sattar

حقيبة الرادود لتحضيرات محرم اول باول
https://www.tgoop.com/ahmed_alziwar15

يوجد ترويج مشاهدات
#حقيقي عراقي
(فيس+ انستا + تيك توك + يوتيوب)
للتواصل واتساب 07732320742
تلجرام
@ahmed_alziwar0

ليسـتة #مؤسسة منبريون الحسينية🌻.
#التثبــيت_سـاعـه
#الحــــــــــذف
بـعـــد نشر اللسـتـةّ بـ4  سـا؏ـات
� غَـير مبري الـذمـةّ ٲمـام الله ڪـل من يـحذف البــوت دون ؏ـلمنا
استقبل 300 عضو
━━━━━━━━━━━━━━━━━━
للإشـــتِـراك 👇🏻.

وإرسل قناتك هُنا : @ahmed_alziwar0

--------------------------------------------------

قناة تعليم الرواديد الالحان
https://www.tgoop.com/ahmed_alziwar1