السلام على جبل الصبر #زينب

إلي خوان چانو مثل الخيام
تحت فيهم گضيت ايام وسنين

تناغيني الطفوله وذيچ الايام
وكل گعداتنه المرت على العين

فتحت عيوني فجأه وماكو خوان
وصحت ليوين رحتو يالمبعدين

اريد اعتب يخوتي وحگي العتاب
عتب گلب الحنين اعله الشرايين

نجوم بليلي چنتو ونوركم غاب
وليش بلاسبب عن عيني ماشين

شيصبرني وليالي جفاكم طوال
وتحد سنونهه بضلعي السچاچين

ششمن ياهوه وبي تهده الأنفاس
اذا كل نسمه تحمل ريحة حسين

وششرب ياعذب وانسه الجره وياي
اذا كل قطره اشوفن بيهه چفين

تحاچيني الليالي بصوت الاحزان
يزينب موته اخوتچ لا تتانين

واجاوبهه وأحط گدامي الاعذار
چذب ماماتو انتي بهاي تدرين

شلون يموت گولي المثل عباس
اذا كل خزره منه تعادل الفين

چذب ماضن بقه العباس مطروح
جزء من شيمته المطروحه عالطين

واعدني الكفيل يردلي بالماي
وانا ادري الوعد عند الگمر دين

شلون يروح واحنه ابين الاجناب
ومو طبع الشهم يترك نساوين

واذا طاحت الجربه وما حصل ماي
يعصر غيرته ويترس جربتين

يخوتي انفاسي ثگلت والنفس ضاگ
ودمعي اعله الوجه تارك نياشين

شسكت ياطفل وأمسحلي ياراس
اذا كلهم يتامه ومحد يعين

وششمن ياهوه وبي تهده الانفاس
اذا كل نسمه تحمل ريحة حسين

صادق الوافي

ودعتهم والضلام أشتد عليه
ورجعت دلالي طايح بين أديه
بسهم خلاني نصبت وآنه لاحول أصبحت
ودعتهم ودعتهم
********************************
ياعذابي ومن مشو عفيه اعله صبري
مدوهنه وكل نسمه تعبر تحني ضهري
ويلي من بعد الأهل شيجبره كسري
كل مسيه تمرني وحشه ودمعي يجري

أخذوني وياكم ردت بس أسرج الخيل
بيدي أمد فراشكم لو چلچل الليل
أمشي وياكم ردت
وآنه لاحول أصبحت
ودعتهم ودعتهم
********************************

عيني تنظر للدرب بلكت يرجعون
بلكي وي طارش خبر منهم يودون
ردت منهم صوره أكحل بيهه العيون
شفت بس حسراتي صعدت ويه الضعون


گلبي يشعر چن خطر خيم عليهم
الله يدري الطف يبويه شسوه بيهم
شاب دلالي وحرت
وآنه لاحول أصبحت
ودعتهم ودعتهم
******************************
الله يدري شلون ليلي يمر عليه
سعفه والريح بزجر تتسله بيه
حته صبحي تحول يعيني مسيه
گلبي خايف ياهلي من الغاضريه

حيره تعصرني بألم والحسبه حسبه
والحياة بغير والي هوايه صعبه
والله حيل تعذبت
وآنه لاحول أصبحت
ودعتهم ودعتهم
*****************************
ويلي من ناده المنادي بطاري الأحباب
گلبي گبل أجدامي طاح بعتبة الباب
گتله ليش أتأخرو فهمني الأسباب
گلي ميرجعون أبد ميفيد العتاب

روحي شهگت والضلام أشتد بالعيون
گتله لتگلي بعد أهلچ ميلفون
تدري معناها شگلت
آنه لاحول أصبحت
ودعتهم ودعتهم
**********************************
گتله أنشدك عالطفل عبدالله وينه
ترفه روحه وعالورد متعوده عينه
هم بعد نور السمه يلالي بجبينه
گال نبتلة حرمله گطعت وتينه

والحوافر سحگت اعله صدور الزغار
شنهي رايچ يالعليله بهاي الأخبار
منين ألمهه اتحيرت
وآنه لاحولأصبحت
ودعتهم ودعتهم


كلمات :- صادق الوافي

يالعلمـــت حته الـــورد يتسله بالغبشه
روحي بغيابك چنهه طير ومنهدم عشه
ياشمس ترسم خيـــوط الضوه
عن غربتك ينشدني حته الهوه
أرجع يغايب كل مسيه بغيبتك وحشه
***************
طالت الفــرگه يبويه الملگه وينه
ليش مارد بالأهل حــادي الضعينه
بويه ضلمه خلافك بعيني المدينه
بكــل مسيه اتأملك تـــرجع علينه

ويه الزمن راح الضعن وتنطر بحرگه
شجرة حياتي مـابقه بيهه ولاورگه
حته الجفن من نار دمعي أستوه
عـــن غربتك ينشدني حته الهوه
أرجع يغايب كل مسيه بغيبتك وحشه
******************
يالچنت ويـاي وأقــرب مـــن دليلي
وبصلاتك بويــه دومـــــك تندعيلي
بويه ترضاهه بدمــوعي أتلگه ليلي
ماردت أي حاجه بس ردتك تجيلي

ردتك ترد تحيي الورد وتسكت جروحي
وتهدم جبــال الهظيمه الطلعت بروحي
يالشوفتك بلسم الجرحي ودوه
عـن غربتك ينشدني حته الهوه
ارجع يغايب كل مسيه بغيبتك وحشه
*****************
المشكله الگــالك أثر حته بهوه الهــاب
كل نسمه تحمل ريحتك وتزيد المصاب
تاخذني رجلي بلهفه بـويه العتبة الباب
أتمدد بطـــولي وگـــمت أشتم بالتراب

بلكت يمــر منـــك عطــر وتشمه انفاسي
لو طيفك يمرني ويضل يمسح علـّۓ راسي

حته التراب آثار منــــك حوه
عن غربتك ينشدني حته الهوه
أرجع يغايب كل مسيه بغيبتك وحشه
*****************
يابويه كل طــارش يمـر نشديته عنك
لكــن ولا واحــــد خبـــر جـابالي منك
عندك گلب تتركني أبد ماچنت أضنك
أرجعلي ماعاتب بعد بس أرد أحضنك

شفتك حلم وسط الزلم والحيره بعيونك
يابويه بس لا مـن صدگ بالغربه يولونك
كل الحزن داخل مهجتي انطوه
وعن غربتك ينشدني حته الهوه
ارجع يغايب كل مسيه بغيبتك وحشه
*********************
دنيا مــا تسوه العتب وعتــــب عليهه
م̷ـــِْن بعد اهلي المشو ليش ابقه بيهه
ليــله يمهــــم عيني تـــرتاح ابچيهه
والله لو ترهم تــره بعمري اشتريهه

حته الأرض صلت فرض من سمعت ونيني
لمن أون تدعي بحــزن كـــون الله يحميني
الموت والفــــرگه ألمهــــن سوه
عن فرگتك ينشدني حته الهوه
أرجع يغايب كل مسيه بغيبتك وحشه

كلمات :- صادق الوافي

هالمصيبه....أبد مــــــا چانت ييمه أبالي
عالشريعه....أنته مرمي وزينب بلا والي

والضعن غصبن يشيل
شلـــون تقبل يالكفيل
عالشريعه....أنته مرمي وزينب بلا والي
************

يمـــه تتذكـــر وصيتي بيـوم رحلتكم بــدت
برگبتك زينب أمـــانه ومـــن أبــوك أتسجلت
أنته كافلهه وخدرهه وهيه بس بيك أنتخت
يمــــه لا تتركهه حته لــــــو أبلكــــم نوخـت

وبسفركم....كونك تضل يــم ضعنهه تراقب
للعقيلــــه....دگه صدرك ولــزم ألهه الشارب
أختك ويهضمهه ليل
شلـون تقبل يالكفيل
عالشريعه....أنته مرمي وزينب بلا والي
************

آنه أعـــرفك أنته گــــدهه وأمنت لمــــن حــــديت
بالضعـــن وضنوني كلهــن فــــارگن راسي وهديت
مـــن گلتلي وداعة الله بحـــرگة العبـــــره نچويت
بس وگفت بعيني أنته وخفت أعطلك لـو حچيت

ردت أگــلك....لا تفارگني البعـد مـــو ثوبي
بس أعرفك....تنسه كلشي ولاترد مطلوبي
وأنته لحسين الدليل
شلـون تقبل يالكفيل
عالشريعه...أنته مرمي وزينب بلا والي
************

أدري يـــا يمــه بمعـــزتي بگلبـــك بكبــــر السنين
الچـــان بيهه الــوالي خيمه وأحنه تحته مدثرين
بگلبك تفـــور المحبه وكــــل نبض يصرخ حسين
ولجل هذا الحب ييمه چفوف تنطي وتنطي عين

ولحبيبك....تنطي روحك مــاتعزهه أدريتك
وبحليبك....يمـــه گطــرات العشگ رضعيتك
والوفه بدمك يسيل
شلون تقبل يالكفيل
عالشريعه....أنته مرمي وزينب بلا والي
************

بله سولفلي اعله أخيك من طحـت بيه شحصل
مــــن وصل يم الشريعه وشــافك مگطع وصـل
صدگ يــم راسك تخوصر مــاعرف شنهو العمل
وتالي رد ومحني ظهـره ويصفگ اچفوفه بزعل

فدوه گلي....هم نشغ من شفته دنگ باسك
هم تحسر....مـــن لگه آثـــار العمود براسك
بطيحتك ماضله حيل
شلـــون تقبل يالكفيل
عالشريعه....أنته مرمي وزينب بلا والي
************

ومن مشت زينب سبيه ضلت تعـاين عليك
چــــان لو بيديهه يبني تبيع دنيا وتشتريك
رادتك تفزع لجلهه وما گطع كل ضنهه بيك
لكــن بيا حـاله تفزع ويـن راسك وين أديك

عــاينتلك....وهيه عالنــاگه ودمعهه تسيله
أشتكتلك....خويه هجرك والله مابي حيله
تدري بغيابك طـويل
شلـون تقبل يالكفيل
عالشريعه....أنته مرمي وزينب بلا والي

كلمات :- صادق الوافي

دمعي جاري… وياك أخذني… الليل عذبني يبويه وياك أخـــذني

ناحن حمامات وصفن گلبي اعله ونهن
وبلا شعــــور استلهمت معنى لحزنهن
مدري شيخليني احس يبچنلي چنهن
وجرن گلبي من الحزن يا ويلي منهن

الحمامـــات… المصيبـــــــه… يقرن جــروحي وألمهن والمصيبه
بويه أنخاك… وياك أخذني… اللي عذبني يبويه وياك أخـــذني

*********************

چم شوغه تطلع بالگلب لليفگد أحباب
ياخذ الحيل من الجسد كل غالي لو غاب
أصفن على حالي وگلت مو سهل المصاب
ياريت روحي ولا أبوي يدفنه التراب

بويه ياريت…… بمكانك… ..أنزل بحفره ويدفنوني بمكانك
صعب الفراگ….. وياك أخدني…. الليل عذبني يبويه… ..وياك أخذني

***************
امنع على عيوني البچي ويطلع بچيهه
والمثلي يابويه الحزن لايگ عليهه
آنه الأميره الراحو اعزاز من أديهه
دنيا وخذت مني الأبو چا شلي بيهه

من تمر طيف… ..اعله بالي… أحضن صورك وضمنهه… .اعله بالي
يادوه الروح….. وياك أخذني…. الليل عذبني يبويه وياك أخذني

*****************

تطلع على جروحي الشمس ويخف ضواها
وتلم خلگهه وتنطوي بكل مستحاها
چا روحي ليش تجر نفس ضلت شجاها
المفروض ميته الفارگت نسمة هواها

جرح الاحباب…. ومصابه… ينلچم كلما يذكرونه بمصابه
صعبه ينزاح…. وياك أخذني…. الليل عذبني يبويه وياك اخذني
****************
الدار وحشه وكل ضوه مابيهه داري
يابويه مل مني وتعب حتى أنتظاري
آنه العزيزه الفارگت شوگ العصاري
لو ما اشوفك ما تهيد بگلبي ناري

بس الغياب….. بدليلي….هدم الفرحه وشعل نار بدليلي
شِيسْوه العتاب…. وياك أخذني… الليل عذبني يبويه وياك اخذني

كلمات: - صادق الوافي

غطي روحك ياجرح بعده ماصار الصبح
نامت عيون الزغار وأنت بعيونك ملح

صوت يطلع من اذان المغربيه
يلچم بجرحي ويبچيني عليه
صاح حي اعله المشت حرمه وسبيه
حي عالمچتوفه وتحامي لرقيه

الله اكبر عالهزل بزينب يميل الحمل
كبر بروحي الاذان وانت بعيونك ملح

عندي ضلت امنيه بعد الجرالي
ريت يحضر كافلي واشكيله حالي
من عگبكم لعبت بحالي الليالي
مو سهل يرتاح المفارگ غوالي

لو ترجعون أنتظر حتى لو طول العمر
تخلص ايامي أنتظار وأنت بعيونك ملح

لو يجمعون الثكاله بكل صبرهه
ذره من لوعاتي مايوصل جمرهه
روحي الله يعينهه ويجبر كسرهه
وأدري ما ترتاح الا بنص گبرهه

ريت يدفني التراب بلكت يهيد المصاب
وأنسه الفراگ وأنام وأنت بعيونك ملح

الچان يغضب لو هوه يحرك عباتي
ولمن ازعل يزعل ويرضه برضاتي
اعتب ويدري العتب مو من صفاتي
لچن بلكي يعود لو حلفه بغلاتي

وينفظ سهامه ويگوم وبالسمه تفور الغيوم
لو گمر هاشم غضب وأنت بعيونك ملح

غطي روحك لا تهيج بيه الآلام
خاف تسمعني وتفز من وني الايتام
الله يرحم كل أخوتي وذيچ الايام
الچانت تخلص فرح چنهه من الاحلام

الله يرحم ضحكتي الراحت بموت أخوتي
آنه بعيوني العذاب وأنت بعيونك ملح

كلمات :- صادق الوافي

جديد للعليله…

يالسافرت تدري النفس ضاگ...يبويه
بس لاصدگ ويطول الفراگ… يبويه

طال انتظاري وضاگ صدري
لو ماترد ماريده عمري

بس لاصدگ ويطول الفراگ… يبويه
**************
نامت الناس ومانمت بس آنه جفني سهران
جسدت حزن الليالي وعايش بجسم انسان
يالرحتو عني وداعة الله اتوادع ويه النسيان
مكتوب اضل هيچ آنه وحدي لا ابو ولا خوان

شفت الحزن يرسم علامات… بالعيون
استفسرت ويگلي هيهات… يرجعون

صعبه انهضم يابويه تدري
لوما ترد ماريده عمري

بس لاصدگ ويطول الفراگ… يبويه
***************
فراگ الأهل بعيوني ضل يرسم ونين وحسرات
ومرادف احملهن صرت جرح الهجر واللچمات
ياريت لو طارش يمر گمره ويه ليل الكلفات
يحچيلي عنكم واستچن واتذكر العمر الفات

ما ادري وين وأنشد الناس… عليكم
يابويه روحي تفرفح تريد…  تجيكم

زغيره وشلت حملي اعله ضهري
لو ماترد ماريده عمري

بس لا صدگ ويطول الفراگ… يبويه
*****-*********
كلمن يسافر ياهلي لابد يمر يوم يعود
بيده يگص رجل المسافه وينطي للغيبه حدود
چا وآنه يمته افتح عيوني وكون اشوفك موجود
وأفرح وأحضنك واشتكيلك وانزع هدومي السود

كونك ترد يالغالي والگاك… وأحضنك
وأرد اكسر الحسبات الهناك… خذنك

وأضحك فرح گوه اعله دهري
لو ماترد ماريده عمري

بس لاصدگ ويطول الفراگ… يبويه
****************
ضل ياكل بگلبي الهجر كلما يمر وكت غروب
بالهلبت اتصبر گمت بويه الصبر چا چندوب
يالبيكم اتقوى چنت رحتو وبده الحيل يذوب
أوگف وأطيحن وأنتچي اعله صوركم وگمت انوب

أمشي وأحس تثگل بالفراگ… عباتي
وأتذكرت مربوطه بصفاد… خواتي

وشصار بيهن الله يدري
لوما ترد ماريده عمري

بس لاصدگ ويطول الفراگ… يبويه
***********
حزن البشر ساعه ويفض بس آنه حزني للدوم
والغصه تعصر بالگلب ماتنگضي بليله ويوم
مرات ياخذني التعب ويغمض عيوني  النوم
وأحلم وأشوفك بالحلم عالغبره وبلايه هدوم

أشهك وأفز چن سحگت الخيل… عليه
يابويه أحس يم راسك تموت… رقيه

وتصيح يتموني اعله زغيري
لو ماترد ماريده عمري

بس لاصدگ ويطول الفراگ يبويه

كلمات:. صادق الوافي

كلمات:.الشاعر صادق الوافي
حيدر مودع حياته بهالمسيه
خله كافل للحرم بالغاضريه
بزينب يوصي الكفيل
لمن أنوه أعله الرحيل
خله كافل للحرم بالغاضريه
******
اليوم بالــــدمعات حيدر ودع أيـــــــــــام العمر
دموع زينب لجل أبوهه أعله الوجه تنزل جمر
تكلـــــــــــه بويه ياهو بعدك عندي كافل للخدر
مودع الله بهـــــــــــالمسيه والله ينطيني الصبر
يكلهه لاتبجين خـــل يبرد دليلج
آنه وصيت الكمر يصبح كفيلج
كــــافي دمعج لايسيل
لمن أنوه أعله الرحيل
خله كافل للحرم بالغاضريه




بويه بويه هوايه صعبه شلون أشاهد حالتك
مخضبه بدمك شفتهه والله بويه عمـــــامتك
هذا يــــــــاسيف التجرء بويه يطبر هامتك
ويلي ويلي عليه باجر من أشوف أجنازتك
حيره شكتم يــــــاحزن شيهود بجاي
بويه باجر من صدك ماشوفك وياي
ياعـــذابي شكد طويل
لمن أنوه أعله الرحيل
خله كافل للحرم بالغاضريه
*****
زينب أنتي شكد عزيزه وهذا حزنج مايهون
هذا أمر الله شبديه أعــــله البشر لازم يكون
بويه زاد ونيني دمعج كــافي ذوبتي العيون
أنتي للعباس رايه وحاشه تحنيهه الضنون
باجر بصولاته بالطف يرفع الراس
بــــــاجر الغيره بفخر تسمه عباس
شحده دهرج لـــويميل
لمن أنوه أعله الرحيل
خله كافل للحرم بالغاضريه

حيدر بيا حـــــاله ينضر بيهه ويشوف القهر
ونة حسين ونحيبه البــــالحزن بجه الصخر
هايه مو أول جريمه بحقه سواهـــــه الدهر
حته ضلع الزهره قبله بعصرة الباب انكسر
ذاك مــوقف أثر بحيدر مصابه
وهذا موقف كاعد يعيش بعذابه
دنيه وبحيدر تعــــــيل
لمن أنوه أعله الرحيل
خله كافل للحرم بالغاضريه
*****
الكـــــــــافل يدك اعله صدره وللولي يمد الجفوف
يكله بحمــــــــــاي العقيله وراح اذل حته الطفوف
آنه كــــــــــــــــد هاي الكفاله وباجر العالم يشوف
مو فقط روس آل أميه وحته أكص روس السيوف
أله اخلي الجيش يتخلخل نضامه
وكربلـه بصولاتي تتحول قيامه
ويرتفع صوت العويل
لمـن أنوه أعله الرحيل
خله كافل للحرم بالغاضريه

يابويه رايـح مــــن صدگ    تدريني بعـدك اختنگ
                      يابو الحسن وين تريد
تتركني وحدي ويه الدمع    إلمن بعــد اشعل شمع
                      شلي انـه بجيت العيد


     بـــويه يامــــن بالسمــــه تـــراوالي رسمه
     وحتــه جبــرائيل ضــــل ينــــــادي بسمه
     كون ناوي اعله الهجر خلني احچي چلمه
     بيـــاذنب گلبــــي اليــــدگ لجـــلك تيتمه

  وين الگه اليشبهك ابو     واليترس مچانك منو
                   ماضن بعد حزني يهيد
  يلـ عالفلك نـورك يشع     إلمــن بعد اشعل شمع
                   شلي انـه بجيت العيد
                *****
      الله اليعينــك يگلبـــي شتحمــل مصاب
      سيف ابــن ملجم اشد لـــو عصرة الباب
      ذاكه منضر بي طفل طــاح اعلـه التراب
      وهـــذا منضر بالـــــدمه خضبله محراب

 كل صوره تعصرني بزجر     بالعبره مخنوگ الصدر
                      عن ياجرح وني يزيد
 عالهــــامه لـو كسر الضلع     إلمن بعـــد اشعل شمع
                      شلي انه بجيت العيد
                *******
      والله عفيه اعله الـــوكت مــاقصر وياي
      آنه بس ضيــــم وحـــزن راوتنـي دنيـاي
      گـــــولو لليسمعني اون خل يعذر ابچاي
      بيه نـــار مــــن الهضم مــــاتطفى بالماي

من ابچي يرتاح الگلب    واتسله وي دمعي اليصب
                  عالراحو اصفگ بالأيد
مــــاضن يرجعهم دمع     إلمـــن بعــــد اشعـل شمع
                  شلي انـا بجيت العيد
             *******
     آخ يــــابــــويه الهجــــــر مــــــالايگ اعليك
     وأنتـــه يلـ بيـــــه شكثـــــر متعلــــق ادريك
     تــــدري متعــــوده الصبح مـــن اگعد الگيك
     تصــــدلي لحظـــه وتبتسم وتضمني بيديك

خليني يم جرحك امر      بلكي اگدر انطيلك عمر
                   من عمري اخذ كون تريد
بس لا انفـاسك تنگطع      إلمــن بعــد اشعل شمع
                   شلي أنـــه بجيــت العيد
            *****
     بويه اجــــت تنشــــد عليك بلهفه الايتام
     كلهـه يـــم بابـــك بقت تلطـــم على الهام
     بداعـــة الزهره الــــزچيه وذيـــــچ الأيام
     گـــوم ويـــاي بعجــــل مـــاريـــــدك تنام

حته الگمر لجلك طفه     ويصرخ على الدنيا العفه
                ضل يصفگ الأيد بأيد
والشمس تبقه بلا نفع     إلمــن بعـــد اشعــل شمع
                شلي انــا بجيت العيد

كلمات :- صادق الوافي

جديد للامام العباس عليه السلام


بحلم يالماخذ عيوني الطيوفك
أعيش الذكريات وبيهه اشوفك
أفز من الحلم عطشان
أدور جودك المليان
واشوفك… اشوفك
*****
بسم الله ياعباس رتل مصحف بروحي
آنه الطبعي عكس الناس حيلي يصير بجروحي
قريت بسورة العشاگ آيه وسَكِنَتْ نوحي
قل هو الگمر عباس نازل للنهر يوحي

نزل بالطف نبي يبلغ رساله
رسول الماي من رب الجلاله
وآمنت بگمر عدنان
أدور جودك المليان
وأشوفك… اشوفك
******
المعروف كل ديوان زلمه يريد بالموقف
أصيل ومايل اعله الخير حار ويعرف يسولف
أنت العلميت الناس كلهه برايتك تحلف
يعثر كل مريض يريد عن هذا القسم يزلف

من تصير گعدات الدواوين
واجب تنختم بسمك يخو حسين
لازم من اطب ديوان
ادور جودك المليان
وأشوفك… أشوفك
********
يالرايد أخوّة ضيج لاتحسبهه بالكثره
يوسف عنده عشر اخوان بس ذبوه بنص حفره
أريدك تقره عن حسين بالطف واعرف الفكره
بنص سبعين ألف هادود بس عباس كض ضهره

هذا الخوش أخو ومن صدگ يسوه
أسد من ضهر أسد وتجيبه لبوه
يفرض روحه بالميدان
ادور جودك المليان
وأشوفك… اشوفك
********
بكل الناس ماموجود واحد شايل ايثارك
ياكلمة شرف لحسين هيچ المرتضى اختارك
بير وغير ابو السجاد محد يعرف اسرارك
الصفات الحلوه ياعباس كلها تلوذ بأكتارك

انت اصل الشهامه وانت سرها
گاع المرجله و چفك نهرها
لذلك من ارد ذبلان
ادور جودك المليان
وأشوفك… أشوفك
******
عذراً ياچبير الصيت وآنه مقصر هوايه
لأن مرن علي سنتين ما كاتب على الرايه
يالاسمك نهر ريان وحروفك عذب مايه
شوصفك وانت كلك جود ما تنوصف بحچايه

انت الضاهره المحد عرفها
وحتى الفاهم يحير بوصفها
مايستوعبك انسان
ادور جودك المليان
واشوفك… اشوفك

كلمات :- صادق الوافي

يامصيبتنه الچبيره
خويه زينب راح اخونه
راح ابو الغيره اليلمنه
البي حنان امنه وابونه
******
اذا تسألين عن عباس حاير شرد احاچيچ
وآنه الضهري مثل القوس راجع منحني عليچ
اخاف احچي ودموع العين تفضحني من اصد ليچ
عفته اعله النهر مطروح ويوصي الگمر بيچ

عفته مرمي اعله الشريعه
والجروح مغيره لونه
طاح اخوي وكسر ضهري
البي حنان امنه وابونه

*****
يگلبي شلون تگضي وياك يالما شفت راحه
الدنيا خلاف اخوي الزين ماتسوه بصراحه
النهار المابده بعباس چا شلنه بصباحه
يگلبي خلافه آنه وياك نگضيهه نياحه

هااا يگلبي بيا طريقه
البي حميه يودعونه
انهدم حيلي شلون اودعه
البي حنان امنه وابونه

********
طلعت من المدينه وجيت للديره الغريبه
قليل انصاري ينحسبون شيبه بصفهه شيبه
صحيح عدانه حيل هواي بس مابيهه هيبه
ولكن واحد العباس ويعادل كتيبه

من كثر ما هزهم الخوف
عشره عشره يبارزونه
سوه بيهم رهبه عباس
البي حنان امنه وأبونه
*******
اعاين والمشاهد ذيچ كلها تزيد المصاب
واحد وره الثاني يطيح اشوف بعيني الاصحاب
ولكن مشهد اصعب چان من شفت الگمر غاب
تذكرت الحسن وأمي وطفلها وعصرة الباب

أمي صاحت هااا يبويه
بغيبتك كلهم ولونه
وهو صاح ادركني يحسين
البي حنان أمنه وأبونه

*****
يزينب خويه لا تبچين اوصيچ بغلاتي
اذا حلت منيتي وصار گدامچ مماتي
على ضهور للهزل تمشين وگبالچ بناتي
وراسي اعله الرمح ينشال هو وذكرياتي

خاف منچ تجري دمعات
والشمر تضحك سنونه
عالرمح وتشوفچ عيون
البي حنان امنه وأبونه



كلمات… صادق الوافي

آنه أبو فاضل زلمكم وينهه
اليوم اطشرها وألم اسنينهه

ارد اطب يم العذب
وأچهب الماينچهب

اليوم اطشرهه وألم اسنينهه
*****
حانت اللحظه ولمع وجه السيوف
هذا ملك الموت بالحومه يطوف
شرگت حلوگ الملا بطاري الحتوف
كلهه تتأمل يحل وكت الخسوف

والزلم گامت ترف رجليهه
لمن بسيفي گربت اعليهه

ريح واصگر من اهب
وأچهب الماينچهب

اليوم اطشرهه وألم اسنينهه
*****
لازلم توگف بوجهي ولا عدد
اليوم اخلي جيوشكم تطلب مدد
ياعبيد النازل بنصكم اسد
ما اعوف اليلفي منكم والشرد

هاي حومه وكل جيوش البيهه
تعرف اصل المرجله وراعيهه
اگلبهه من صوب وحدب
وأچهب الما ينچهب

اليوم اطشرهه وألم اسنينهه
********
راح تسكت لاشهور ولا سنين
وبعد ما تمشي الثواني وتستعين
يصير ميزان الزمن بيد الحسين
بأمر ينزل من إله العالمين

ويحكم ابن الزهره كلشي بكيفه
يريد يعفي يريد ينهي بسيفه
ويوم الآخر يقترب
وأچهب الما ينچهب

اليوم اطشرهه وألم اسنينها
*****
يارعاع وحگي اوصفكم رعاع
وأمر ابن مرجانه لازم ما يطاع
حسين اخوي شراع خصماً للنزاع
والسفينه تضيع لو طاح الشراع

حسين نوح ومركبه النجانه
من غمرنه الباطل بطوفانه

نعمه وعليه انحسب
وأچهب الماينچهب

اليوم اطشرهه وألم اسنينهه
*******
أرد أطب للماي وأترس جربتي
وأرجع ويه الجربه لعيال اخوتي
حسين اخوي اليوم طالب نخوتي
وآنه عندي حسين اعز من دنيتي

حسين قائد وآنه بيدي الرايه
اليوم ابين صولة الوفايه

خل تقر عين اليحب
وأچهب الما ينچهب

كلمات :- صادق الوافي

صعب الوداع. ...صب يدمعي وإذا بيـــدي ابچــي الضوه
وسفه بالگاع. ...نـــــدفن الغــــــالي ونحــرمه شم الهـوه

صعبه من تفگد عـــزيز ودمعـــــــك النــازل يودعه
هيچي تنــــزل ذكــرياتك ذكـــره ذكره ودمعه دمعه
الله لايفجعلــــه واحـــــــد لابخــــوته ولابـــــــربعه
كلشي ممكن عـــادي يجـــرع بس بعدهم مايجرعه

حگهه العيون. ...تبچي وبحرگه مدمعهه والناظر سوه
ترهم شلــون. ...ندفـن الغـــالي ونحـــرمه شـــم الهوه
*********
يادمــــع هـــــديت حيلــي أرحــــم شـويه بعيوني
خلني اعــــاين وأنتضرهم بلكــت الراحــو يجوني
لاتگلـــــي أنسه هـــواهم حتــه لــــو كلهـم نسوني
آنه أعــــرف لـــــو بديهم چــــان اجـــو وتعذروني

دمعــي ميهيد…. ينزل ومنه احس خدي بالنار استوه
صعبه بالأيـــد…. نـــدفن الغالي ونحـــرمه شم الهوه
*********
والله مـــــــو سهله التودعه وتبقه عنــدك ذكـرياته
وبالگبر تــــدفن ضحكته الچــــــانت تلـــون حياته
الچــــان بيه الناس تحلـــــف كلهه وتمجد صفــاته
وتارس البيت بگعـــدته والحچـي يگـوله شحـلاته

هسه التــراب…. غطه كل جسمه والماضي كله أنطوه
أعظم مصاب…. نــــدفن الغالي ونحـــرمه شم الهـوه
******

كل جرح نام بدليلي وخــــزن آهـــــات ومـــواجع
رايــــد ابچيه اعله كيفــــي بلكـت تشله المـــدامع
صحت محد جاوباني وبس صدى لصيحاتي راجع
گمت أجر نفسي واحسن حيلي ويه انفاسي طالع

صدري موجوع…ومن كثر وني بالحسره ألف چويه أنچوه
ويه الدمـــــوع…. ندفــــن الغالـــي ونحـــــرمه شـم الهوه
********
ياهـــــــواهم مــــن نشمه ننسه الجـــــروح وألمهه
تضحك النسمه لضحكهم والصــــور تزهي برسمهه
هسه مــــن نشتاگ نمشـي لــــذيچ الگبـور ونشمهه
يافگــــدهم والليــــالي ضلــــــت تــــــزيد بهضمهه

لمن نـزور…. نــــذرف الدمعــــه ونحسهه للفــاگد دوه
بين الگبور…. نـــــدفن الغــــــالي ونحــرمه شــم الهوه


كلمات: - صادق الوافي

دعم مؤسسة منبريون الحسينية
#افضل قناة للنعي
https://www.tgoop.com/+P0VV4bLqtzuKdcQS
#للاشتراك بالدعم @ahmed_alziwar0